မင်းကင်း၊ အောက်တိုဘာ ၂၊ ၂၀၂၅။

စစ်ကိုင်းတိုင်း၊ မင်းကင်းမြို့နယ်၊ လောင်းပြည့်ရွာ နုန်းတင်မြေနုကျွန်းပေါ်မှာ ရွှေတူးဖော်ဖို့ ပြင်ဆင်နေတဲ့ ရွှေမျောတာဝန်ရှိသူတွေကို အောက်တိုဘာ ၂ ရက် ဒီမနက်ပိုင်းမှာ ဆန္ဒပြခဲ့ကြတယ်လို့ ဒေသခံတွေဆီက သိရပါတယ်။

အဆိုပါ လောင်းပြည့်ကျွန်းရွှေမျောကိုလည်ပတ်ဖို့ စက်တင်ဘာ ၂၆ ရက်ကစပြီး ရွှေမျောတာဝန်ရှိသူတွေက ပြင်ဆင်ခဲ့ကြတာဖြစ်ပြီး သဘာဝဘေးအန္တရာယ်နဲ့ စစ်ကော်မရှင်တပ်ရဲ့ လေကြောင်းအန္တရာယ်ကိုစိုးရိမ်တဲ့အတွက် ဒေသခံကျေးရွာတွေက လက်မခံနိုင်ဘဲ ဆန္ဒပြခဲ့ကြတာလို့ ဒေသခံတဦးက ပြောပါတယ်။

“အဓိက ပြည်သူလူထုအနေနဲ့ ဒီဟာလက်မခံရတဲ့အကြောင်းအရင်းက ရွှေမျောဖြစ်လာပြီဆိုရင် ဒေသခံတွေရဲ့ ပညာရေး၊ ကျန်းမာရေးကစလို့ လေယာဉ်အန္တရာယ် ရောက်လာမှာတွေရယ်၊ ယန္တရား ပျက်စီးမှုကြောင့်မို့ ရေတိုက်စားမှုကြောင့်တို့ ရွာတွေထိခိုက်လာနိုင်တာတွေအတွက်တွေရယ်၊ သူတို့ရဲ့ လုံခြုံရေး၊ စစ်ရေး လုံခြုံရေးပေါ့နော်၊ အဓိကကတော့ လေယာဉ်ပေါ့၊ အချိန်မရွေးလာနိုင်တယ်၊ ဒါမျိုးတွေကစလို့ လက်မခံနိုင်လို့။” လို့ ဒေသခံတဦးကမြေလတ်အသံကို ပြောပါတယ်။

မင်းကင်းမြို့နယ်၊ သင်းတောရွာမှာ ပြုလုပ်ခဲ့တဲ့ဒီဆန္ဒပြပွဲမှာ လောင်းပြည့်ရွာ၊ အနောက်တောရွာ၊ အုန္နဲဘုတ်ရွာ၊ ဘင်ရွာ၊ ညောင်ပင်သာရွာ၊ ဇင်ကလဲရွာ၊ သင်းတောရွာက ဒေသခံထောင်ကျော် ပါဝင်ခဲ့ကြတယ်လို့ ဆိုပါတယ်။

ရွှေမျောဖောင်တွေ ပြင်ဆင်ထားတဲ့ လောင်းပြည့်ကျွန်းပေါ်ကယာမြေတွေမှာ ဒေသခံတွေက သီးနှံစိုက်ပျိုးကာ လုပ်ကိုင်စားသောက်ကြရတာဖြစ်ပြီး ရွှေမျောကြောင့်ကမ်းပါးပြိုပြီး မြေယာတွေ ဆုံးရှုံးရမှာနဲ့ ရွာတွေအထိ ရေတိုက်စားခံရမယ့် စိုးရိမ်မှုတွေလည်းရှိနေတယ်လို့ အထက်ပါဒေသခံက ဆိုပါတယ်။

“အဲ့ဒီကျွန်းတွေမှာဆိုလို့ရှိရင် ပြည်သူလူထု စိုက်ခင်းတွေ၊ ယာခင်းတွေ လုပ်ကိုင်စားသောက်တဲ့ နေရာပေါ့၊ အဲ့လိုနေရာ၊ သူတို့သာ အဲ့ဒီလို ရွှေကျင်လိုက်မယ်ဆိုလို့ရှိရင် သယံဇာတအနေနဲ့ ရေတိုက်စားပြီး ဒီကျွန်းတွေက ပါသွားနိုင်တယ်၊ နောက်တဖြည်းဖြည်း သူတို့ရဲ့ ယာခင်းမှမဟုတ်ဘူး၊ သူတို့ရဲ့ ရွာတွေကိုပါ တိုက်စားမှု ဖြစ်လာနိုင်တယ်ပေါ့နော်၊ ရွာတွေပါ ထိခိုက်ပျက်စီးလာနိုင်တယ်။” လို့ ဒေသခံကပြောပါတယ်။

ဒီရွှေမျောစီမံကိန်းကို မင်းကင်းမြို့နယ်အတွင်းရှိ ပြည်သူ့ကာကွယ်ရေးတပ်ရင်းတပ်ဖွဲ့တချို့ရဲ့တာဝန်ရှိသူတွေက ဦးစီးကွပ်ကဲနေတာလို့ သိရပြီး ဒေသခံတွေနဲ့ ညှိနှိုင်းဆွေးနွေးမှုတွေမရှိဘူးလို့ အထက်ပါဒေသခံကပြောပါတယ်။

အဆိုပါဆန္ဒပြမှုနဲ့ပတ်သက်ပြီး မင်းကင်းမြို့နယ် ပြည်သူ့အုပ်ချုပ်ရေးအဖွဲ့တာဝန်ခံကို ဆက်သွယ်မေးမြန်းခဲ့ရာ မြို့နယ်တွင်းတပ်ရင်းတပ်ဖွဲ့တွေက တိုက်ခိုက်ရေးရန်ပုံငွေအတွက် ရွှေမျောမောင်းဖို့စာတင်ခဲ့ရာ သက်ဆိုင်ရာဝန်ကြီးဌာနတွေနဲ့ ညှိနှိုင်းဆဲအခြေအနေသာဖြစ်တယ်လို့ ပြန်လည်ဖြေကြားပါတယ်။

“ဒါ ကျနော်တို့က မဟုတ်တာလုပ်ရင်လည်း (ဆန္ဒ)ပြခံရမှာ၊ ဟုတ်တာလုပ်လည်း ဒီကာလမှာတော့ ကျနော်တို့က တာဝန်ခံအဆင့်ပဲ ရှိတာကိုး၊ အဲ့ဒါဆိုတော့ ကျနော်တို့အနေနဲ့ ပြုပြင်သင့်တာတွေ ပြုပြင်မယ်၊ ဒါကလည်း ကျနော်တို့ လုပ်တဲ့ကိစ္စမဟုတ်တဲ့အတွက် ကျနော့်အနေနဲ့ မှတ်ချက်ပေးလို့မရဘူး၊ အုပ်ချုပ်သူ အစုအဖွဲ့ဆိုတာ ကျနော်တို့က စီမံလို့ပဲ ရတာ၊ ဆုံးဖြတ်လို့က ရတဲ့ကိစ္စမဟုတ်ဘူး၊ ပြီးတော့ ဒါတွေက တော်လှန်ရေးကာလ တော်လှန်ရေးရန်ပုံငွေ အလို့ငှါ လုပ်ကြကိုင်ကြရတာဖြစ်တဲ့အတွက် တပ်ရင်းတပ်ဖွဲ့တွေနဲ့ ဝန်ကြီးဌာနတွေပဲ စကားပြောသွားပါလိမ့်မယ်။” လို့ မင်းကင်းမြို့နယ်ပအဖတာဝန်ခံက ဖြေကြားပါတယ်။

ရွှေမျောလုပ်ကွက်လည်ပတ်နေစဉ် ရေတိုက်စားတာနဲ့ ကမ်းပြိုတာတွေမဖြစ်စေဖို့ နားလည်တတ်ကျွမ်းတဲ့ ပညာရှင်တွေနဲ့ပူးပေါင်းပြီး ထိန်းသိမ်းဆောင်ရွက်နေတယ်လို့ မင်းကင်းမြို့နယ် ပအဖတာဝန်ခံက ဆက်ပြောပါတယ်။

“အခုကျနော်တို့ ကျင့်သုံးနေတာကတော့ ကမ်းတင်တဲ့ စနစ်ပေါ့၊ သဲစာကို ကမ်းတင်ပြီးမှ သဲကို ဖြည်းဖြည်းချင်းစုပ်ယူသွားတဲ့ စနစ်ဆိုတော့ ရေတိုက်စားဖို့တော့ မရှိဘူး၊ ကမ်းပြိုဖို့လည်း တော်တော်နည်းတဲ့ပုံစံတော့ရှိတယ်၊ အဲ့လို ကျွန်းတွေဘာတွေ မထိဖို့၊ မြစ်ကမ်းပါးတွေ မထိဖို့ဆိုရင်တော့ ကျနော်တို့အုပ်ချုပ်ရေးကတော့ စီမံရုံပဲရှိတာပါ။”လို့ ပအဖတာဝန်ခံက ပြောပါတယ်။

လောင်းပြည့်ကျွန်းဟာ ချစ်တွင်းမြစ်ကမ်းဘေး မင်းကင်းမြို့နယ်၊ လောင်းပြည့်ရွာအနီးမှာရှိပြီး ယခင်က ရွှေတူးဖော်တာမျိုးတွေမရှိခဲ့ဘဲ ယခုမှ ကျွန်းတဝိုက်မှာ ရွှေမျောဖောင် ဆယ်နဲ့ချီချထားပြီး တူးဖော်ဖို့ ပြင်ဆင်နေတာလို့ ဒေသခံတဦးက ပြောပါတယ်။

၂၀၂၄၊ မတ် ၆ ရက်ကလည်း မင်းကင်းမြို့နယ်၊ ကမ်းပြည့်ကျေးရွာအနီး ကမ်းပြည့်ရွှေမှော် လုပ်ငန်းခွင်ကြောင့် ဒေသခံပြည်သူလူထုရဲ့ စိုက်ခင်းပျက်စီးတာတွေ၊ ရွှေမျောရပ်တန့်ဖို့ပြောပေမယ့် မရပ်တန့်ခဲ့တာတွေကြောင့် မင်းကင်းမြို့နယ်ဒေသခံတွေက မြို့နယ်ပအဖတာဝန်ခံ အပါအဝင် ရွှေမျောအာဏာပိုင်တွေကို ရာထူးကထုတ်ပယ်ဖို့အထိ ဆန္ဒပြကန့်ကွက်ခဲ့ကြပါသေးတယ်။

စာတည်း – လင်း

ယင်းမာပင်၊ စက်တင်ဘာ ၁၈၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ နဘူးတောရွာကို စက်တင်ဘာ ၁၇ ရက်နဲ့ ၁၈ ရက်မှာ စစ်ကော်မရှင်တပ်က စီးနင်းဝင်ရောက်ပြီး ရွာသား ၁၀ ဦးကိုလည်းဖမ်းဆီးသွားတယ်လို့ ဒေသခံတွေက မြေလတ်အသံကို ပြောပါတယ်။

နဘူးတောရွာကိုဝင်ရောက်ချိန်တွေမှာလည်း သေနတ်တွေပစ်ဖောက်ဝင်ရောက်ခဲ့တာကြောင့် အသက် ၇၀ အရွယ်အမျိုးသား ၁ ဦးလက်မောင်းကျည်ထိမှန်ခဲ့တယ်လို့ ဆိုပါတယ်။

“ရွာကိုဝင်တာ နှစ်ရက်ဆက်တိုက်၊ ရှောင်ရင်းတိမ်းရင်း တမ်းမိတာဆိုတော့ စစ်ရှောင်တွေဆီက အထုပ်အပိုးတွေ လုသွားတယ်။ အမျိုးသား ၁၀ ယောက်လောက်လည်း မြေဖွေးတောင်ဖက်ကိုဖမ်းခေါ်သွားတယ်”လို့ ဒေသခံအမျိုးသားတဦးက မြေလတ်အသံကိုပြောပါတယ်။

စက်တင်ဘာ ၁၇ ရက်ကစစ်ကော်မရှင်တွေဝင်ရောက်စဥ်မှာ နဘူးတောရွာက ဆိုင်ကယ် ၂ စီး၊ ငွေသား ကျပ် ၁၅ သိန်း၊ ရွှေ ၁ ကျပ်သားအပါအဝင် စုစုပေါင်း ကျပ်သိန်း ၂၀၀ ခန့်ပမာဏရှိ ပစ္စည်းနဲ့ငွေထည်တွေကို ယူဆောင်သွားတယ်လို့ ဆိုပါတယ်။

ဒါ့အပြင် စက်တင်ဘာ ၁၈ ရက်မှာလည်း နဘူးတောရွာထဲက ဒေသခံတွေရဲ့ ဆန်၊ ဆီစတဲ့ ရိက္ခာတွေကို ထပ်မံသယ်ဆောင်ပြီး ညနေခွဲအချိန်မှာ မြေဖွေးတောင်ဆီပြန်သွားပြီး အသက် ၃၀ နဲ့ ၅၀ နှစ်ကြား နဘူးတောရွာသား ၁၀ ဦးကို ဖမ်းဆီးခေါ်ဆောင်သွားတယ်လို့ သိရပါတယ်။

စက်တင်ဘာ ၁၉ ရက်ဒီကနေ့ထိ ဒေသခံတွေတိမ်းရှောင်နေရပြီး ဖမ်းဆီးခံအမျိုးသားတွေလည်း ပြန်မလွတ်လာသေးဘူးလို့ ဆိုပါတယ်။

မြေဖွေးတောင်ဟာ နဘူးတောရွာနဲ့ တမိုင်ခန့်ကွာဝေးပြီး စစ်ကော်မရှင်တပ်တွေက စက်တင်ဘာ ၅ ရက်ကတည်းက ခြေကုပ်ယူတပ်စွဲထားတယ်လို့ ဒေသခံတွေဆီက သိရပါတယ်။

ဒါ့အပြင် စစ်ကော်မရှင်တပ်ဟာ မုံရွာ နမခ တပ်ကနေ သံပြားကာကား ၆ စီး၊ စစ်အင်အား ၁၅၀ ခန့်နဲ့ နဘူးတောရွာနဲ့ ၂ မိုင်ခွဲအကွာ ဘန့်ဘွေးရွာအထိုင်စခန်းကို အင်အားဖြည့်ထားပြီး မြေဖွေးတောင်နားတဝိုက်မှာလည်း ကင်းပုန်းချထားတယ်လို့ ဆိုပါတယ်။

စာတည်း – လင်း

ဒေသခံတချို့ပြန်လွတ်လာပြီး ဖမ်းဆီးခံအမျိုးသမီးတွေလည်း အဓမ္မပြုခံနေရဟုဆို

တောင်သာ၊ စက်တင်ဘာ ၁၂၊ ၂၀၂၅။

မန္တလေးတိုင်း၊ တောင်သာမြို့နယ်က ကျေးရွာတွေကို စစ်ကြောင်းထိုးနေတဲ့ စစ်ကော်မရှင် စစ်ကြောင်းက နေအိမ်တွေကိုမီးရှို့ခဲ့တဲ့အပြင် ဒေသခံတွေကိုဖမ်းဆီးပြီး အဲ့ဒီထဲက အမျိုးသမီး တချို့ကိုလည်း အဓမ္မပြုကျင့်မှုတွေလုပ်နေတယ်လို့ ဒေသခံတွေဆီက သိရပါတယ်။

စက်တင်ဘာ ၁၀ ရက် မနက် ၉ နာရီခန့်မှာ မလှိုင်မြို့နယ်ဘက်ကနေ အင်အား ၃၀၀ ခန့်ပါ စစ်ကော်မရှင်စစ်ကြောင်းဟာ လက်ပတောနဲ့ မကျီးကုန်းကျေးရွာသွားလမ်းပေါ်မှာ စစ်ကြောင်း သတင်းထောက်ဖို့သွားတဲ့ မကျီးကုန်းကျေးရွာသား အသက် ၃၀ ဝန်းကျင်အရွယ်အမျိုးသားတဦးကို ဖမ်းဆီးခဲ့ပါတယ်။

အဲ့ဒီနောက်စစ်ကြောင်းဟာ အဆိုပါအမျိုးသားကို ဖမ်းဆီးသွားပြီး ရုံးစည်ကြီးကျေးရွာကိုဖမ်းခေါ်သွားကာ ည ၇ နာရီမှာ ဖမ်းဆီးခံရသူရဲ့ ဖုန်းကနေတဆင့် သူရဲ့အမျိုးသမီးဖြစ်သူ အသက် ၂၇ ကျော်အရွယ်အမျိုးသမီးကို စစ်ကော်မရှင်တပ်သားတွေက ထမင်းလာပို့ခိုင်းပြီးနောက် ရောက်ရှိလာချိန်မှာ အဓမ္မပြုကျင့်ခဲ့တာလို့ ဆိုပါတယ်။

“စစ်ကြောင်းကိုထောက်ခိုင်းတဲ့ သူယောင်္ကျားကို ဖမ်းသွားတယ်။ အဲ့ဒါကိုညပိုင်းကျတော့ သူ့ယောင်္ကျား ဖုန်းနဲ့ ထမင်းလာပို့လို့ပြောတယ်။ သွားပို့တဲ့အချိန်မှာ အဓမ္မပြုကျင့်လိုက်တယ်။ အခုလည်းအမျိုးသမီးတွေဖမ်းထားပြီး သေတဲ့သူသေ၊ အဓမ္မပြုကျင့်ခံရသူတွေရှိနေသေးတယ်။ ထပ်သိရတာက ၁၂ ယောက် အဓမ္မပြုကျင့်ခံရသူတွေလည်းရှိသေးတယ်လို့ သိရတယ်”လို့ ရုံးစည်ကြီးရွာခံတဦးကပြောပါတယ်။

အထက်ပါ မကျီးကုန်ရွာသား ၁ ဦး၊ လက်ပတောရွာသား ၁ ဦး၊ ရုံးစည်ကြီးကျေးရွာထဲရှိ တောင်ရပ်၊ မြောက်ကွမ်းရပ်ကွက်တွေထဲက အမျိုးသား ၁ ဦးနဲ့ အမျိုးသမီး ၁၅ ဦးကျော်ဖမ်းဆီးခံထားရတာဖြစ်ပြီး အဲ့ဒီထဲက အမျိုးသမီး ၃ ဦးနဲ့ အထက်ပါ မကျီးကုန်းရွာသားရဲ့ အမျိုးသမီးကိုတော့ ပြန်လွှတ်ပေးလိုက်တယ်လို့ သိရပါတယ်။

ရုံးစည်ကြီးကျေးရွာထဲ အထိုင်ချထားတဲ့စစ်ကြောင်းက စက်တင်ဘာ ၁၁ ရက် နေ့လယ်ပိုင်းလောက်ကစတင်ပြီး ရွာထဲရှိဒေသကာကွယ်ရေးအဖွဲ့တွေနဲ့ သက်ဆိုင်သူတွေရဲ့နေအိမ်တွေအပါအဝင် ၁၅ လုံးကိုမီးရှို့ဖျက်ဆီးခဲ့တယ်လို့ ရုံးစည်ကြီးရွာခံတဦးက ပြောပါတယ်။

“ရွာထဲက ထောက်ပို့အိမ်တွေကို ဒလန်ကလိုက်ပြလို့ ကျနော်တို့ထောက်ပို့ အိမ်တော်တော်များများ ပါသွားတယ်။ ကျနော့်အိမ်၊ ကျနော့်အဒေါ်အိမ်ရယ် ထောက်ပို့တော်တော်များများရဲ့အိမ်ကို ဒလန်က လိုက်ပြခဲ့တယ်။ အဲ့ဒလန်ဘယ်သူဆိုတာလည်းသိထားပြီး။ စစ်ကြောင်းရှိနေလို့ မကာနိုင်သေးဘူး။ “လို့ အထက်ပါရွာခံက ဆက်ပြောပါတယ်။

စက်တင်ဘာ ၁၂ ရက်မနက်ထိ စစ်ကော်မရှင်စစ်ကြောင်းက ကျေးရွာထဲအထိုင်ချထားပြီး တန်ပိုကျေးရွာဘက်ကို လက်နက်ကြီးတွေနဲ့ပစ်ခတ်နေကာ အထိအခိုက်အပျက်အစီးကိုတော့ မသိရသေးဘူးလို့ ဆိုပါတယ်။

စစ်ကော်မရှင်စစ်ကြောင်းဝင်နေလို့ ရုံးစည်ကြီး၊ မကျီးကုန်း၊ ခပေါင်း၊ အနောက်တော၊ လက်ပတော၊ တန်ပိုကျေးရွာတွေက ဒေသခံ ၅,၀၀၀ ကျော်ထွက်ပြေးနေရတယ်လို့ သိရပါတယ်။

မတ် ၄ ရက်ကလည်း တောင်သာမြို့နယ်၊ နတ်စောင့်ကျေးရွာမှာ စစ်ကော်မရှင်ဘက်က လေကြောင်းကနေ ဗုံးကြဲခံရလို့ ဒေသခံ ၆ ဦးသေဆုံးပြီး နေအိမ် ၃၀ နီးပါး မီးလောင်ပျက်စီးသွားတယ်လို့ သိရပါတယ်။

စာတည်း – လင်း

ဘုတလင်၊ ဩဂုတ် ၂၇၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်၊ လွှဲတဲရွာမှာ စစ်ကော်မရှင်တပ်ကဒေသခံတွေကို ဖမ်းဆီးပြီးနောက် ရွေးကောက်ပွဲမဲထည့်ဖို့ ပြောဆိုတာ၊ မဲထည့်နည်းသင်ပေးပြီး မှတ်တမ်းဓာတ်ပုံရိုက်ကူးတာတွေ လုပ်ဆောင်ခဲ့တယ်လို့ ဒေသခံတွေထံက သိရပါတယ်။

ဘုတလင်မြို့ပေါ် အထိုင်စခန်းကထွက်လာတဲ့ စစ်ကော်မရှင်စစ်ကြောင်းဟာ ဩဂုတ် ၂၂ရက် မနက်ပိုင်းက လွှဲတဲကျေးရွာကို ဝင်ရောက်လာချိန်မပြေးနိုင်တာကြောင့် ကျေးရွာအတွင်းကျန်ခဲ့သူတွေနဲ့ စစ်ကြောင်းလာရာလမ်းတလျှောက်ဖမ်းဆီးလာတဲ့ဒေသခံတွေကို ခြိမ်းခြောက်ဖိအားပေးပြီး မဲထည့်ဖို့ပြောဆိုသွားတာလို့ ဆိုပါတယ်။

” အရပ်ဝတ်တွေရော၊ စစ်သားတွေရော အများကြီးလာပြီး အဲ့ဒါတွေကို လက်နက်ပြခြိမ်းခြောက်ပြီး လုပ်နေကြတာ။ စစ်ကြောင်းထိုးပြီး မပြေးနိုင်တဲ့ လူတွေနဲ့ အသင့်ခေါ်လာတဲ့ ဓားစာခံတွေကိုစုပြီး ဓာတ်ပုံရိုက်ကြ၊ ဆယ်ဖီဆွဲကြပေါ့ဗျာ၊ တကယ့်အတုတွေ လုပ်နေကြတာ၊ မဲထည့်ဖို့ပြောတယ်လို့ ဖမ်းခံရတဲ့ပြည်သူတချို့ကတော့ ပြောတယ်” ဘုတလင်စစ်ဘေးရှောင်တဦးက မြေလတ်အသံကို ပြောပါတယ်။

စစ်ကော်မရှင်တပ်ဖွဲ့ဝင်တွေက လွှဲတဲရွာမှာကျန်ခဲ့တဲ့ ရွာသားတွေကို မဲထည့်နည်းသင်ပေးကာ ဓာတ်ပုံရိုက်သွားတာတွေဟာ ၎င်းဒေသတွေမှာ ရွေးကောက်ပွဲလုပ်ပြီးကြောင်း လိမ်လည်ဖော်ပြဖို့ဖြစ်နိုင်တယ်လို့ ဘုတလင်မြို့နယ်ပအဖနာယက ဒေါက်တာ ဇေလင်းမောင်က သုံးသပ်ပြောဆိုပါတယ်။

“ ကြောက်လန့်နေကြရတာဆိုတော့ သိပ်တော့မှတ်မိကြဟန်မတူဘူး၊ မဲပေးခိုင်းတယ်လို့ပဲ သိရတယ်။ မဲထည့်နည်းသင်ပေးတယ်၊ ဓာတ်ပုံတွေ ရိုက်တယ်။ အဲ့ဒါကို သူတို့က ရွေးကောက်ပွဲလုပ်ပြီးပြီလို့ အချိန်တခုရောက်ရင် ဓာတ်ပုံတွေထုတ်ပြမယ့် သဘောရှိတယ်။ သူတို့က အဲ့ဒီလို လိမ်လေ့ရှိတယ်လေ” လို့ သူက ဆိုပါတယ်။

ထပ်မံပြီး အဲ့ဒီစစ်ကြောင်းဟာ ဩဂုတ် ၂၆ ရက် မနက်ပိုင်းမှာ ဘုတလင်မြို့အဝင် ဗန္ဓုလရုပ်ထုရှေ့ရှိ လမ်းသွားလမ်းလာတွေကိုဖမ်းဆီးပြီး အထက်ပါအတိုင်း မှတ်တမ်းဓာတ်ပုံရိုက်ယူခဲ့သေးတယ်လို့ နောက်ထပ် ဘုတလင်မြို့ခံတဦးက ပြောပါတယ်။

“မြို့အဝင် ဗန္ဓုလကြေးရုပ်ရှေ့မှာလည်း အရပ်ဝတ်တွေနဲ့ စုပြီးဓာတ်ပုံရိုက်ကြတယ်၊ ရွေးကောက်ပွဲအတုလုပ် မဲဆွယ်ပွဲအတုတွေလုပ်နေကြတာလို့ ယူဆရတယ်” လို့ ဘုတလင်ဒေသခံတဦးက ပြောပါတယ်။

ဓာတ်ပုံရိုက်ပြီးနောက် ပဲပြစ်တောရွာကို ဆက်လက်စစ်ကြောင်းထိုးလာခဲ့တာကြောင့် ရွာခံအားလုံးနီးပါး ထွက်ပြေးခဲ့ရပြီး စစ်ကြောင်းဟာ ပဲပြစ်တောရွာအတွင်းယာယီတပ်စွဲခဲ့ကာ ဒီကနေ့ ဩဂုတ် ၂၇ ရက် မနက် ၁၀ နာရီခန့်မှာ ဘုတလင်မြို့၊ အထကကျောင်းအတွင်း ပြန်လည်ဝင်ရောက်သွားခဲ့တယ်လို့ ဆိုပါတယ်။

စစ်ကြောင်းကြောင့် မြောက်ကျီကျေးရွာ၊ ထတန်း၊​ မြောက်တော၊ ရှမ်းတဲ၊ တလှိုင်း၊ ပဲပြစ်တောအနောက်၊ ပဲပြစ်တောအရှေ့၊ ဆိတ်သာကန်၊ ကြို့ကုန်း၊ နတ်ရွာ၊ မြင်သာ၊ ရွာသာလေး၊ အုတ်ဖို စတဲ့ရွာတွေက ဒေသခံ ၃,၀၀၀ ထက်မနည်း ရှောင်တိမ်းနေကြရတယ်လို့ သိရပါတယ်။

စာတည်း – ဟိန်းစံ

ဒေသခံရိက္ခာတွေနဲ့ပစ္စည်းတွေပါယူသွားလို့ ကျပ်သိန်း ၁၀၀ ကျော်ဆုံးရှုံးနိုင်ဟုဆို

ပေါက်၊ ဩဂုတ် ၁၄၊ ၂၀၂၅။

မကွေးတိုင်း၊ ပေါက်မြို့နယ်က ရွာ ၁၀ ရွာကျော်ကို စစ်ကောင်စီတပ်က သြဂုတ် ၁၃ ရက် မနေ့ကစစ်ကြောင်းထိုးမွှေနှောက်ပြီး ဒေသခံအမျိုးသားတွေကိုလည်းဖမ်းဆီးသွားတယ်လို့ ပေါက်မြို့ဒေသခံဆီက သိရပါတယ်။

ပခုက္ကူအခြေစိုက်တပ်မ ၁၀၁ ကနေ ရိက္ခာယာဥ်တန်း ၁၀၀ ကျော်၊ အင်အား ၂၀၀ ဝန်းကျင်ပါတဲ့ စစ်ကြောင်းက ဆယ်၀ရွာ၊ ထန်းတောကုန်းရွာ၊ ပျဥ်းချောင်းရွာ၊ အောက်ကျင်းရွာ၊ ဆင်သေရွာ၊ ကျွန်းပင်စုရွာ၊ ငမို့လေးရွာ၊ ငမို့ကြီးရွာ၊ ရွှေလှံရွာ၊ မြင်းခြံကုန်းရွာ၊ ရေပြာရွာ၊ ဘုရားတောင်ရွာ၊ မကျီးစင်ရွာ၊ ညောင်ပင်သာရွာ၊ ဆယ်ပင်းရွာ၊ ဇီးတောရွာ၊ လယ်ဘဲ့ရွာ၊ ကျူတောရွာ၊ နတ်ဦးယဉ်ရွာနဲ့ သမားတော်ရွာ တို့ကိုဝင်ရောက်ခဲ့တာလို့ ဆိုပါတယ်။

“ရေပြာရွာနားအနီးတဝိုက်က ကျေးရွာ ၁၀ ရွာကျော်က ပစ္စည်းတွေသယ်သွားတာ၊ ဆန်အိတ်တွေ၊ မြေပဲ‌အိတ်တွေ၊ စက်ပစ္စည်းတွေ သယ်သွားတာ၊ ဆယ်ဝရွာက ပစ္စည်းတွေတော့ သယ်မသွားဘူး၊ ရွာကိုတော့ ဝင်မွှေသွားတယ်၊ ချက်ပြုတ်ပြီးလည်း စားသောက်သွားကြတယ်၊” လို့ ပေါက်မြို့ခံတဦး ကပြောပါတယ်။

ဒါ့အပြင် စစ်ကြောင်းဝင်ချိန် ဘုရားတောင်ရွာက အသက် ၃၀ နဲ့ ၄၀ ကျော်အရွယ် အမျိုးသား ၇ ဦးကိုလည်း ဖမ်းဆီးသွားပြီး ဒီနေ့ထိပြန်မလွတ်သေးဘူးလို့ ဆိုပါတယ်။

“မနေ့က ဘုရားတောင်ရွာကို စစ်ကြောင်းဝင်တာ၊ ပြည်သူ ၇ ဦးကို ဖမ်းသွားတယ်၊ အခုထိ ပြန်မလွှတ်သေးပါဘူး၊ ဖမ်းသွားတာက အမျိုးသားတွေပါ၊ ရွာထဲမှာတွေ့တာနဲ့ ဖမ်းသွားတာ၊ ဘာကြောင့် ဖမ်းတာလည်းတော့ မသိဘူး” လို့ ပေါက်မြို့ခံ ကိုလရောင်က ပြောပါတယ်။

အဆိုပါစစ်ကြောင်းဟာ ကျေးရွာတွေထဲကိုဝင်ချိန်မှာ နေအိမ်တွေကပစ္စည်းတွေနဲ့ ရိက္ခာတွေကိုသယ်ယူသွားတာကြောင့် အနည်းဆုံး စုစုပေါင်းကျပ်သိန်း ၁၀၀ ဝန်းကျင်လောက်ဆုံးရှုံးနိုင်တယ်လို့လည်းဆိုပါတယ်။

တော်လှန်ရေးတပ်တွေက လမ်းပိုင်းတွေဖြတ်တောက်ထားတာကြောင့် ပေါက်မြို့နယ်ထဲက ပျူစောထီး အားကောင်းတဲ့ရွာတွေမှာလည်း ရိက္ခာပြတ်လပ်နေတာတွေရှိပြီး စစ်ကောင်စီဘက်က လေကြောင်းကနေပဲ ရိက္ခာပို့ပေးနေရတယ်လို့ ကိုလရောင်က ပြောပါတယ်။

ခုလိုစစ်ကြောင်းထိုးနေတာကြောင့် အထက်ပါကျေးရွာတွေက ဒေသခံ ၁ သောင်းကျော်လည်း ထွက်ပြေးတိမ်းရှောင်နေကြရတယ်လို့ ဆိုပါတယ်။

လက်ရှိမှာတော့ အဲ့ဒီစစ်ကြောင်းနဲ့ ရိက္ခာယာဉ်တန်း ၁၀၀ ကျော်ဟာ ပေါက်မြို့နယ်၊ ရေပြာတံတားအနီးမှာ ယာဉ်တန်းနဲ့အတူ တပ်ဖြန့်ထားပြီး မိုင်းရှင်းလင်းရေးတွေ လုပ်နေတယ်လို့ သိရပါတယ်။

ဒါ့အပြင် ပေါက်မြို့နယ်၊ တိုက်တောရိုးရွာကို သြဂုတ် ၁၄ ရက် ဒီမနက် ၈ နာရီလောက်မှာ စစ်ကောင်စီတပ်က မီးရှို့ဖျက်ဆီးခဲ့တယ်လို့ ပေါက်မြို့ခံတွေဆီက သိရပါတယ်။

ဆိပ်ဖြူမြို့နယ်၊ ရွှေဘိုးကျွန်းရွာအခြေစိုက် ကပစ ၂၂ က အင်အား ၁၈၀ ဝန်းကျင်ပါစစ်ကောင်စီ စစ်ကြောင်းဟာ သြဂုတ် ၁၃ ရက်မနေ့ကမနက်ပိုင်းမှာ စတင်စစ်ကြောင်းထိုးလာခဲ့ပြီး သပြေ တောတိုက်မှာညအိပ်တပ်စွဲပြီးနောက် ဒီမနက်ပိုင်းမှ တိုက်တောရိုးရွာကိုဝင်ပြီး မီးရှို့ခဲ့တာလို့ ဆိုပါတယ်။

“တိုက်တောရိုးရွာကလည်း ပေါက်နယ်တောင်ပိုင်း နယ်စပ်မှာရှိတာ၊ မနက် ၈ နာရီထိုးလောက်မှာ ရွာထဲဝင်ပြီး ပြည်သူနေအိမ်တွေကို မီးရှို့သွားတယ်၊ နေအိမ်တော့ အတိအကျမရသေးဘူး၊ ရွာကတော့ သေးသေးလေးပဲ၊ တရွာလုံးပေါင်းမှ အိမ်ခြေ ၃၀ လောက်ရှိတာ”လို့ ပေါက်မြို့ခံတဦးက ပြောပါတယ်။

စစ်ကြောင်းဝင်လာတဲ့ လမ်းတလျောက်မှာလည်း ချောင်းဆုံရွာက ကားသမား ၁ ဦးကို ရိုက်နှက်ဖမ်းဆီးခဲ့ပြီး ချောင်းဆုံရွာလမ်းစုံအရောက်မှ ပြန်လွှတ်ခဲ့တယ်လို့ ဆိုပါတယ်။

ဒါ့အပြင် ချောင်းဆုံရွာလမ်းစုံမှာ ကင်းပုန်းဝပ်တပ်စွဲနေချိန်မှာလည်း လက်နက်ကြီးတွေနဲ့ ပစ်ခတ်တဲ့အတွက် သပြေတောတိုက်ရှိ ဒေသခံနေအိမ်ပေါ်ကျကာ မီးလောင်ပြီး နွား ၁ ကောင်သေဆုံးကာ ၂ ကောင် ထိခိုက်ခဲ့တယ်လို့ သိရပါတယ်။

လက်ရှိမှာစစ်ကြောင်းက ကပစ ၂၂ တပ်ထဲကို ပြန်ဝင်သွားတယ်လို့ သိရကာ ပြီးခဲ့တဲ့ ဩဂုတ် ၁၀ ရက်က လည်း ပေါက်မြို့နယ်အတွင်းက ရွာ ၁၂ ရွာကျော်ကို စစ်ကောင်စီတပ်က ဗုံး ၅၀ ကျော်ကြဲချတာကြောင့် ကလေးအပါအဝင် ၅ ဦး သေဆုံးခဲ့ပါသေးတယ်။

စာတည်း – လင်း