ပရီးမီးယားလိဂ်

မြေလတ်အသံ၊ ဖေဖော်ဝါရီ ၃၊ ၂၀၂၅။

မနေ့က ယှဉ်ပြိုင်ခဲ့တဲ့ ပရီးမီးယားလိဂ် ပွဲစဉ် ၂၄ ရဲ့ နောက်ဆုံးပွဲစဉ်မှာ အာဆင်နယ်အသင်းက မန်ချက်စတာစီးတီးအသင်းကို ၅-၁ ရလဒ်နဲ့ ဂိုးပြတ်အနိုင်ရယူခဲ့ပြီး အဆင့် ၁ နေရာက လီဗာပူးလ်ကို ဆက်လက်ဖိအားပေးနိုင်ခဲ့ပါတယ်။

အာဆင်နယ်အသင်းက အဓိက တောင်ပံတိုက်စစ်ကစားသမား ဆာကာ ဒဏ်ရာရပြီးတဲ့နောက်ပိုင်း ပုံမှန်ပွဲထွက်လေ့ရှိတဲ့ မာတင်နယ်လီ၊ ထရော့ဆက်၊ ဟားဗက်ဇ် တို့နဲ့ တိုက်စစ်တွဲလုံးနဲ့ ပုံမှန်အတိုင်းပွဲထွက်လာပြီး ဆာကာ၊ ဂျေဇူး၊ တိုမီယာစု၊ ဘန်ဝှိုက်တို့ ဒဏ်ရာကြောင့် မပါဝင်နိုင်ခဲ့ပါဘူး။

မန်စီးတီးဘက်ကတော့ လက်ရှိ ဇန်နဝါရီ အပြောင်းအရွှေ့ကာလ ဖရန့်ဖတ်ကနေ ဝယ်ယူထားတဲ့ အိုမာ မာမွတ်ရှ် ကို ကွင်းလယ်မှာ ပွဲထုတ်လာသလို ဂိုးသမားနေရာမှာတော့ အီဒါဆင်အစား အော်တီဂါ နဲ့ ပွဲထွက်လာခဲ့ပါတယ်။ ဒီပွဲမှာ အဓိကပွဲထွက်လူစာရင်းက အကီ၊ ဒီယက်ဇ်၊ ဒိုကူ တို့နဲ့ ဒီရာသီကာလရှည်ကြာ အနားယူနေရတဲ့ ရိုဒရီ အပြင် အော်စကာဘော့ဘ် လည်း ဒဏ်ရာကြောင့် မပါဝင်နိုင်ခဲ့ပါဘူး။

ပွဲအစ ၁ မိနစ်ကျော်မှာပဲ မန်စီးတီး နောက်တန်းကစားသမား အကန်ဂျီရဲ့ ဘောလုံးထိန်းသိမ်းပုံ မသေသပ်မှုကနေတဆင့် အာဆင်နယ်အတွက် ဦးဆောင်ဂိုးကို အသင်းခေါင်းဆောင် အော်ဒီဂတ်က ရယူပေးနိုင်ခဲ့ပါတယ်။ အဲ့ဒီနောက် ပထမပိုင်းတပိုင်းလုံးနီးပါး မန်စီးတီးက တောက်လျှောက် တိုက်စစ်ဆင် ကစားလာခဲ့ပေမယ့် ချေပဂိုးမရရှိခဲ့ပါဘူး။

ဒုတိယပိုင်း ၅၅ မိနစ်မှာတော့ ဟာလန်းရဲ့ ခေါင်းတိုက်သွင်းဂိုးနဲ့ မန်စီးတီးတို့ ချေပဂိုးပြန်လည်ရရှိခဲ့ပါသေးတယ်။ ဒါပေမယ့် ချေပဂိုးသွင်းယူပြီး ၁ မိနစ်အကြာမှာပဲ ကွင်းလယ်လူပါတေးရဲ့ကန်ချက် ဂျွန်စတုန်းနဲ့ထိပြီး လမ်းကြောင်းပြောင်း ဂိုးဝင်ခဲ့လို့ အာဆင်နယ်တို့ ပွဲကိုချက်ချင်းပြန်လည် ဦးဆောင်နိုင်ခဲ့ပါတယ်။ အဲ့ဒီနောက် ၆၂ မိနစ်မှာ လူးဝစ်စကယ်လီ၊ ၇၆ မိနစ်မှာ ကိုင်ဟားဗက်ဇ် နဲ့ ၉၀ မိနစ်မှာ အီသန်နွယ်နာရီတို့က အသီးသီး သွင်းဂိုးတွေရယူနိုင်ခဲ့ကာ မန်ချက်စတာစီးတီးကို ဂိုးပြတ် အနိုင်ယူခဲ့တာပါ။

ဒီနိုင်ပွဲကြောင့် အာဆင်နယ်အသင်းက လက်ရှိ အဆင့် ၁ က လီဗာပူးလ်အသင်းထက် ၁ ပွဲပိုကန်ထားပြီး ၆ မှတ်ကွာဟနေပေးမယ့် အဆင့် ၂ နေရာကနေ အနီးကပ်ဆုံး ဖိအားပေးနေဆဲ ဖြစ်ပါတယ်။

ပြီးခဲ့တဲ့ ၄ ရာသီဆက်တိုက် ပရီးမီးယားလိဂ် ချန်ပီယံဖြစ်ခဲ့တဲ့ မန်ချက်စတာစီးတီးအသင်းက လက်ရှိမှာတော့ ပရီးမီးယားလိဂ် အဆင့် ၄ နေရာမှာ ရပ်တည်နေပြီး အဆင့် ၁ နဲ့ ၁၅ မှတ်အထိ ကွာဟနေပြီ ဖြစ်ပါတယ်။ ဒါ့အပြင် လက်ရှိခြေစွမ်းအရ လာမယ့်ဗုဒ္ဓဟူးနေ့ ရီရဲလ်မက်ဒရစ်နဲ့ ကန်ရမယ့် ချန်ပီယံလိဂ် ၁၆ သင်းအဆင့် Play-off ပွဲမှာလည်း ရုန်းကန်ရဦးမယ့် အခြေအနေပါ။

Photo – Premier League.

မြေလတ်အသံ၊ ဇန်နဝါရီ ၁၆၊ ၂၀၂၅။

ဇန်နဝါရီ ၁၆ ရက် ဒီနေ့ မနက်အစောပိုင်းမှာ ယှဉ်ပြိုင်ခဲ့တဲ့ အာဆင်နယ်နဲ့စပါးတို့ရဲ့ ပရီးမီးယားလိဂ် ပွဲစဉ် ၂၁ မြောက်လန်ဒန်ဒါဘီမှာ အာဆင်နယ်အသင်းက စပါးအသင်းကို ၂-၁ ရလဒ်နဲ့ အနိုင်ရရှိခဲ့ပါတယ်။

EFL Cup နဲ့ FA Cup ကနေ ထွက်ခဲ့ရပြီးနောက် နောက်ဆုံး ၃ ပွဲဆက် နိုင်ပွဲပျောက်ဆုံးနေတဲ့ အာဆင်နယ်အသင်းက ဒီနေ့ပွဲစဉ်မှာတော့ အကောင်းဆုံးပြင်ဆင်လာခဲ့ပြီး ဒါဘီပြိုင်ဘက် စပါးအသင်းကို အိမ်ကွင်း အမ်းမရိတ်မှာ အနိုင်ကစားနိုင်ခဲ့တာပါ။

ဒီပွဲစဉ်မှာ ဆွန်ဟောင်မင်က စပါးအသင်းအတွက် အဖွင့်ဂိုးကို ပွဲချိန် ၂၅ မိနစ်မှာ မြေမကျအဝေးကန်ချက်နဲ့ ကန်သွင်းခဲ့ပေမယ့် ပွဲချိန်မိနစ် ၄၀ မှာတော့ ထောင့်ကန်ဘောကနေတဆင့် အာဆင်နယ် နောက်ခံလူ ဂါဘရီရယ် ရဲ့ ခေါင်းတိုက်ချက်က စပါးတိုက်စစ်မှူး ဆိုလန်ကီ ကိုထိပြီး လမ်းကြောင်းပြောင်းကာ အာဆင်နယ်အသင်း ချေပဂိုးရရှိခဲ့ပါတယ်။ အဲ့ဒီနောက် ပွဲချိန် ၄၄ မိနစ်မှာ ဦးဆောင်ဂိုးကို ထရောဆက်ကနေ အဝေးကန်ချက်နဲ့ ကန်သွင်းခဲ့ကာ ၂-၁ ရလဒ်နဲ့ပဲ ​ပွဲပြီးဆုံးခဲ့ပြီး အိမ်ရှင်အာဆင်နယ်တို့ နိုင်ပွဲရရှိခဲ့တာပါ။

ဒီပွဲမှာ ရှုံးနိမ့်ခဲ့တာကြောင့် စပါးအသင်းက ပရီးမီးယားလိဂ် ၅ ပွဲဆက် နိုင်ပွဲပျောက်ဆုံးခဲ့နေပြီး အမှတ်ပေးဇယား အဆင့် ၁၃ နေရာအထိ ရောက်ရှိနေပြီဖြစ်ပါတယ်။

ဇန်နဝါရီ ၁၅ ရက်က ကစားခဲ့တဲ့ပွဲတွေမှာ လီဗာပူးလ်၊ ချဲလ်ဆီးနဲ့ မန်စီးတီး သရေရလဒ် ထွက်ပေါ်လာချိန် အာဆင်နယ်အသင်းက နိုင်ပွဲရှာဖွေနိုင်ခဲ့တာပါ။ ဒီနိုင်ပွဲကြောင့် အာဆင်နယ်အသင်းက အဆင့် ၁ က လီဗာပူးလ်အသင်းက် ၁ ပွဲအသာနဲ့ ရမှတ် ၄ မှတ်သာ ကွာဟတော့တာ ဖြစ်ပါတယ်။

မြေလတ်အသံ၊ ဒီဇင်ဘာ ၁၅၊ ၂၀၂၄။

ပရီးမီးယားလိဂ် ပွဲစဉ် ၁၆ ရဲ့ မန်ချက်စတာစီးတီးနဲ့ မန်ချက်စတာယူနိုက်တက်တို့ရဲ့ မန်ချက်စတာဒါဘီပွဲကို ယနေ့ည ၁၁ နာရီမှာ ယှဉ်ပြိုင်သွားမှာပဲ ဖြစ်ပါတယ်။

မန်ချက်စတာစီးတီးအသင်းက အဆင့် ၅ နေရာမှာ ယာယီရပ်တည်နေပြီး နောက်ဆုံးယှဉ်ပြိုင်ခဲ့တဲ့ ပရီးမီးယားလိဂ် ၅ ပွဲမှာ ၁ ပွဲသာ အနိုင်ရထားကာ ချန်ပီယံလမ်းကြောင်းပေါ်ကနေ တဖြည်းဖြည်း ဝေးကွာလာတဲ့ အခြေအနေဖြစ်ပါတယ်။ ဒါ့အပြင် ကွင်းလယ်နဲ့ နောက်တန်းက အဓိက ကစားသမားတွေ ဒဏ်ရာရနေသလို ခရစ္စတယ်ပဲလေ့စ်နဲ့ သရေကျခဲ့တဲ့ပွဲမှာရခဲ့တဲ့ အနီကတ်ကြောင့် ကွင်းလယ်လူငယ်ကစားသမား ရီကို လူးဝစ်ကလည်း ပွဲပယ်ပြစ်ဒဏ်ကျခံနေရတာဖြစ်ပါတယ်။ 

မန်ချက်စတာယူနိုက်တက်ကတော့ ဒီရာသီမှာ ရလဒ်တွေဆိုးရွားခဲ့လို့ နည်းပြ တန်ဟက်ဂ်ကို ထုတ်ပယ်လိုက်ပြီး စပို့တင်းက လူငယ်နည်းပြ ရူဘင်အမိုရင် ကို ခန့်အပ်ခဲ့ပေမယ့် မြင်သာတဲ့အပြောင်းအလဲမျိုး မစွမ်းဆောင်နိုင်သေးသလို ခြေစွမ်းမတည်ငြိမ်ဘဲ ဆက်လက်ရုန်းကန်နေရဆဲပဲ ဖြစ်ပါတယ်။ လက်ရှိ အဆင့် ၁၃ က ယူနိုက်တက်တို့ကလည်း ပရီးမီးယားလိဂ် နောက်ဆုံး ၅ ပွဲမှာ ၂ ပွဲသာ အနိုင်ရထားတာဖြစ်ပါတယ်။

ဂွာဒီယိုလာ မန်စီးတီးကိုကိုင်တွယ်ခဲ့တဲ့ ၈ ရာသီမှာ ပရီးမီးယားလိဂ်ဖလား ၆ ကြိမ်ရယူထားပြီး နောက်ဆုံး ၄ နှစ်ဆက်တိုက် ဖလားယူထားနိုင်ခဲ့တာဖြစ်ပါတယ်။ ဒီရာသီမှာ ရလဒ်တွေဆိုးရွားနေတယ်ဆိုပေမယ့် လက်ရှိ အဆင့် ၁ နေရာက လီဗာပူးလ်အသင်းနဲ့ ၉ မှတ်ပဲ ကွာဟနေတာဖြစ်လို့ ချန်ပီယံဆုအတွက် မျှော်လင့်လို့ရနိုင်သေးတယ်လို့ ဆိုရမှာပါ။ ဒါကြောင့် ဒီနေ့ည မန်ချက်စတာဒါဘီမှာ စီးတီးတို့ အနိုင်ရခဲ့ရင် ချန်ပီယံပြေးလမ်းပေါ် ပြန်တက်လှမ်းနိုင်ဖို့ မျှော်လင့်နိုင်သလို အသင်းရဲ့ စိတ်ဓါတ်ပိုင်းလည်း ပြန်လည်တိုးတက်ကောင်းမွန်လာနိုင်မယ့် အခြေအနေရရှိသွားမှာပါ။

တစ်ဖက်မှာလည်း ယူနိုက်တက်ကို ပြိုင်ပွဲစုံ ၆ ပွဲသာ ကိုင်တွယ်ရသေးတဲ့ နည်းပြသစ် အမိုရင် ဟာ ယူနိုက်တက်ကို မပြောင်းခင် စပို့တင်းနည်းပြအဖြစ်နဲ့ မန်စီးတီးကိုယှဉ်ပြိုင်ခဲ့တဲ့ ချန်ပီယံလိဂ်ပွဲစဉ်မှာ ၄-၁ ရလဒ်နဲ့ ဂိုးပြတ်အနိုင်ယူခဲ့တာကြောင့် လက်ရှိယူနိုက်တက်အသင်းနဲ့လည်း အလားတူစွမ်းဆောင်ရည်မျိုး ဖော်ဆောင်သွားမလား စိတ်ဝင်စားစရာပါ။ ဒါပေမယ့် အခုချိန်အထိ ပထမဦးစားပေးကစားသမား အတိအကျမရှိသေးဘဲ လူထုတ်ပုံ မတည်ငြိမ်သေးသလို ကစားကွက် မတည်ငြိမ်သေးတဲ့ အမိုရင်အတွက် ဒီပွဲက ခက်ခဲတဲ့ပွဲတခုတော့ ဖြစ်လာနိုင်ပါသေးတယ်။ ရလဒ်ဆိုးတွေကြောင့် နည်းပြသစ်ခန့်အပ်ခဲ့ပေမယ့် ပုံစံကောင်းမပြနိုင်သေးတဲ့ ယူနိုက်တက်တို့အတွက် ဒါဘီနိုင်ပွဲသာ ယူဆောင်နိုင်ခဲ့မယ်ဆိုရင် အသင်းရဲ့ အပြုသဘောဆောင်တဲ့ တိုးတက်မှုတွေကို ဆက်လက်မြင်တွေ့သွားဖို့ မျှော်လင့်ချက်ကောင်း ပိုင်ဆိုင်နိုင်မှာလည်း ဖြစ်ပါတယ်။

နောက်ဆုံးယှဉ်ပြိုင်ခဲ့တဲ့ မန်ချက်စတာဒါဘီ ၅ ပွဲမှာ မန်စီးတီးက ၄ ပွဲနိုင်ထားပြီး ယူနိုက်တက်က ၁ ပွဲသာ အနိုင်ရယူထားခဲ့သလို မန်စီးတီးအိမ်ကွင်း အီတီဟက်မှာ ယူနိုက်တက်တို့ နောက်ဆုံး ပရီးမီးယားလိဂ်နိုင်ပွဲရယူထားခဲ့တာ ၂၀၁၉ ဒီဇင်ဘာ ၇ ရက်က ဖြစ်ပါတယ်။

နှစ်သင်းစလုံးအတွက် အမှတ်ရော ရလဒ်ပါ လိုအပ်ချက်ရှိနေတဲ့ မန်ချက်စတာဒါဘီမှာ မန်စီးတီးက အနိုင်ယူပြီး ချန်ပီယံလမ်းကြောင်းပေါ် ပြန်လာနိုင်မလား၊ အမိုရင်ရဲ့ ယူနိုက်တက်ကပဲ အနိုင်ယူပြီး အီတီဟတ်မှာ အောင်ပွဲရှာပြသွားမလားဆိုတာကိုတော့ စောင့်ကြည့်တော့မှာပါ။ 

ဒီနေ့ည မန်ချက်စတာဒါဘီပွဲကို မန်ချက်စတာစီးတီး အိမ်ကွင်း အီတီဟက်မှာ ကျင်းပသွားမှာဖြစ်ပြီး ကွင်းလယ်ဒိုင်အဖြစ် အန်တိုနီတေလာက တာဝန်ယူကိုင်တွယ်သွားမှာ ဖြစ်ပါတယ်။ 

မြေလတ်အသံ၊ ဒီဇင်ဘာ ၁၊ ၂၀၂၄။

ယနေ့ည စူပါဆန်းဒေးရဲ့ ပရီးမီးယားလိဂ် ပွဲစဉ် ၁၃ က ပွဲကောင်းတပွဲဖြစ်တဲ့ လီဗာပူးလ်နဲ့ မန်ချက်စတာစီးတီးပွဲစဉ်ကို မြန်မာစံတော်ချိန် ည ၁၀ နာရီ ၃၀ မှာ ယှဉ်ပြိုင်သွားကြမှာဖြစ်ပါတယ်။

အိမ်ရှင်အသင်းကတော့ ဒီရာသီဟာ လီဗာပူးလ်ရဲ့ ရာသီလို့ပြောလို့ရလောက်အောင်ကို အကြိမ်ကြိမ်သက်သေပြနေခဲ့တာဖြစ်ပြီး နော်တင်ဟမ်ကို ရှုံးနိမ့်ခဲ့တဲ့ပွဲနဲ့ အာဆင်နယ်ကို သရေကျခဲ့တဲ့ပွဲကလွဲရင် ပွဲစဉ်တိုင်းကို နိုင်ပွဲရယူထားခဲ့ကာ ပရီးမီးယားလိဂ်မှာရော ချန်ပီယံလိဂ်မှာပါ အမှတ်ပေးဇယားတွေရဲ့ထိပ် ဦးဆောင်နေတာ ဖြစ်ပါတယ်။ 

အဓိကဂိုးသမား အလီဆင်အပါအဝင် ဒဏ်ရာရကစားသမား ၆ ယောက်အထိ ရှိနေပေမယ့် ဂိုးသမား ကယ်လင်ဟာရဲ့ လက်စွမ်းပြမှု၊ အသင်းရဲ့ ဟန်ချက်ညီမှုတွေနဲ့ ဆာလာ၊ ဒီးယက်ဇ်တို့ရဲ့ သွင်းဂိုးတွေကနေတဆင့် လီဗာပူးလ်အသင်းအနေနဲ့ အမှားအယွင်းမရှိဘဲ ရှေ့ဆက်နေခဲ့တာပါ။

လက်ရှိပရီးမီးယားလိဂ်ချန်ပီယံ မန်ချက်စတာစီးတီးကတော့ နောက်ဆုံး ၆ ပွဲမှာ ၅ ပွဲရှုံး ၁ ပွဲသရေ ရလဒ်နဲ့ နိုင်ပွဲပျောက်ဆုံးနေပြီး ပရီးမီးယားလိဂ်မှာ လက်ရှိ (၁ ပွဲလို) အဆင့် ၄ နေရာအထိ ရောက်ရှိနေခဲ့သလို ချန်ပီယံလိဂ်မှာလည်း အဆင့် ၁၇ နေရာအထိ ရောက်နေခဲ့တာ ဖြစ်ပါတယ်။

အဓိက ကွင်းလယ်လူ ဘလွန်းဒီအောဆုရှင် ရိုဒရီအပါအဝင် ဂျွန်စတုန်း၊ ကိုဗာဆစ် စတဲ့ခံစစ်နဲ့ ကွင်းလယ်ခံစစ်ပိုင်းက ဒဏ်ရာပြသနာတွေကြုံနေရချိန် ပေးဂိုးတွေ အများအပြားခွင့်ပြုနေခဲ့ရပြီး နိုင်ပွဲပျောက်ဆုံးနေတဲ့ မန်စီးတီးအသင်းဟာ လက်ရှိ ပရီးမီးယားလိဂ်ဇယားထိပ်က လီဗာပူးလ်ကို အဝေးကွင်းမှာ သွားရောက်ရင်ဆိုင်ရမယ့် အရေးဟာ နည်းပြ ဂွာဒီယိုလာအတွက် ခေါင်းခဲစရာအခြေအနေပါ။

ဒီနေ့ပွဲမှာ မန်စီးတီး နိုင်ပွဲရှာဖွေနိုင်ခဲ့ရင်တော့ အဆင့် ၂ နေရာအထိ ပြန်လည် တက်လှမ်းနိုင်မှာဖြစ်သလို ချန်ပီယံဆုဖလားအတွက် လီဗာပူးလ်ကို ဖိအားပေးနိုင်ဖို့ မျှော်လင့်နိုင်မှာ ဖြစ်ပေမယ့် ရှုံးနိမ့်ခဲ့ရင်တော့ ချန်ပီယံဆုဖလားနဲ့ ဝေးကွာသွားနိုင်တဲ့အထိ ဖြစ်သွားနိုင်လို့ မန်စီးတီးတို့ အကောင်းဆုံးပြန်လာဖို့ မျှော်လင့်ထားမှာ အသေအချာပါပဲ။

တဖက်မှာလည်း လီဗာပူးလ်အနေနဲ့ ဟန်ချက်ပျက်နေတဲ့မန်စီးတီးကို အိမ်ကွင်းမှာ အနိုင်ကစားပြီး ဇယားထိပ်မှာ အမှတ်ပြတ်နဲ့ ဆက်လက်ဦးဆောင်နိုင်ဖို့ကြိုးစားသွားမှာဖြစ်သလို လက်ရှိ ခြေစွမ်းပြန်မှန်လာတဲ့ အဆင့် ၂ က အာဆင်နယ်အသင်းရဲ့ ဖိအားပေးမှုကနေကင်းလွတ်ဖို့လည်း နိုင်ပွဲရယူဖို့ လိုအပ်နေတာပါ။

နောက်ဆုံး တွေ့ဆုံခဲ့တဲ့ ၅ ကြိမ်မှာတော့ ၁ ကြိမ်စီ အနိုင်ရခဲ့ပြီး ၃ ပွဲသရေကျထားတဲ့ လီဗာပူးလ်နဲ့ မန်စီးတီးတို့ ဒီတကြိမ် အန်ဖီးလ်ကွင်းမှာတော့ ဘယ်လို ရလဒ်ထွက်သွားမလဲဆိုတာကို ယနေ့ည မြန်မာစံတော်ချိန် ၁၀ နာရီ ၃၀ မိနစ်မှာ စောင့်ကြည့်သွားရတော့မှာပဲ ဖြစ်ပါတယ်။

Photo – lapremierleague. 

မြေလတ်အသံ၊ နိုဝင်ဘာ ၂၄၊ ၂၀၂၄။

မနေ့ညက ယှဉ်ပြိုင်ကစားခဲ့ကြတဲ့ ပရီးမီးယားလိဂ် ပွဲစဉ် ၁၂ မှာ စပါးအသင်းကို အိမ်ကွင်း အီတီဟတ်မှာပဲ ၄ ဂိုး ဂိုးမရှိရလဒ်နဲ့ မန်ချက်စတာစီးတီး ရှုံးနိမ့်ခဲ့ပြီး ဒါဟာ ပြိုင်ပွဲစုံ ၅ ပွဲဆက်တိုက် ရှုံးနိမ့်ခဲ့တာပဲ ဖြစ်ပါတယ်။

လတ်တလောမှာပဲ ဘလွန်းဒီအောဆု ရရှိထားတဲ့ အဓိက ကွင်းလယ်ကစားသမား ရိုဒရီ အပါအဝင် ကိုဗာဆစ်၊ ရူဘင်ဒီယက်စ်​၊​ ဒိုကူ၊​ အော်စကာဘော့ဘ် အစရှိတဲ့ ကစားသမားတွေ ဒဏ်ရာပြသနာနဲ့ကြုံတွေ့နေရချိန် အခုလို ၅ ပွဲဆက်တိုက် ရှုံးနိမ့်ခဲ့ရတာဖြစ်ပြီး ဒီ ၅ ပွဲအတွင်း ပေးဂိုး ၁၄ ဂိုးအထိ ခွင့်ပြုထားခဲ့ရကာ ၄ ဂိုးသာ သွင်းယူထားခဲ့နိုင်တာပါ။

၅ ပွဲဆက်တိုက် ရှုံးနိမ့်ခဲ့ရတဲ့ ပွဲစဉ်တွေဟာ ကာရာဘောင်းဖလားပွဲ ၁ ပွဲ၊​ ချန်ပီယံလိဂ် ၁ ပွဲနဲ့ ပရီးမီးယားလိဂ် ၃ ပွဲတို့ဖြစ်ပြီး ကာရာဘောင်းပွဲစဉ်နဲ့ ယမန်နေ့က ပရီးမီးယားလိဂ်ပွဲစဉ်မှာ စပါးအသင်းကိုရှုံးနိမ့်ခဲ့ရတာကြောင့် ဒီ ၅ ပွဲအတွင်း စပါးကိုပဲ ၂ ကြိမ် ရှုံးနိမ့်ခဲ့တာလည်း ဖြစ်ပါတယ်။

နောက်ဆုံး ၇ နှစ်အတွင်း ၆ ကြိမ်အထိ ပရီးမီးယားလိဂ်ဖလားရယူထားနိုင်ခဲ့တဲ့ မန်စီးတီးဟာ ဒီရာသီမှာလည်း ဖလားရယူဖို့ ရေပန်းစားခဲ့ပေမယ့် အခုလို ရှုံးနိမ့်မှုတွေကြောင့် လက်ရှိဇယားထိပ်မှာ ရပ်တည်နေတဲ့ လီဗာပူးလ်အသင်းနဲ့ အမှတ်ကွာဟချက် ကြီးမားလာသလို အဆင့် ၃၊ ၄၊ ၅ နေရာမှာရှိတဲ့ ချဲလ်ဆီး၊​ အာဆင်နယ်၊ ဘရိုက်တန်တို့နဲ့ ၁ မှတ်သာကွာဟခဲ့လို့ မန်စီးတီးအတွက် ဒါဟာ စိုးရိမ်စရာအခြေအနေ ဖြစ်ပါတယ်။

ဒီဇင်ဘာ ပွဲကြပ်ကာလ မတိုင်ခင်မှာတင် ပရီးမီးယားလိဂ်မှာ ရမှတ် ၉ မှတ်အထိ ဆုံးရှုံးခဲ့ရတဲ့ မန်စီးတီးအသင်းဟာ ဒီတစ်ရာသီလုံးနားလိုက်ရတဲ့ ရိုဒရီနဲ့ ဒီဇင်ဘာလလယ်လောက်မှ ဒဏ်ရာကနေပြန်လာနိုင်မယ့် ကိုဗာဆစ်တို့ မရှိချိန် ကွင်းလယ်အဖျက်နေရာကို ဖြည့်တင်းနိုင်မယ့် ကစားသမားမရှိလို့ ဆက်လက် ရုန်းကန်ရဦးမှာပါ။

လာမယ့် ဒီဇင်ဘာပွဲကြပ်ကာလအတွင်းမှာလည်း လီဗာပူးလ်၊ နော်တင်ဟမ်ဖောရက်စ်၊ ခရစ္စတယ်ပဲလေ့စ်၊ မန်ချက်စတာယူနိုက်တက်၊ အက်စတွန်ဗီလာ၊ အဲဗာတန်၊ လက်စတာ တို့နဲ့ ပရီးမီးယားလိဂ် ၇ ပွဲနဲ့ ဂျူဗင်တပ်နဲ့ ချန်ပီယံလိဂ် ၁ ပွဲ စုစုပေါင်း ၁ လအတွင်း ၈ ပွဲ ကစားရမှာကြောင့် မန်စီးတီးတို့အတွက် ခက်ခဲမယ့်ကာလတခုပါ။

လက်ရှိ အဆင့် ၁ နေရာက လီဗာပူးလ်ဟာ မန်စီးတီးကို ၁ ပွဲလို ၅ မှတ်ဖြတ်ထားနိုင်ပြီး ဒီနေ့ည ယှဉ်ပြိုင်မယ့် ဆောက်သမ်တန်ကို လီဗာပူးလ်အနိုင်ရခဲ့ရင် ၈ မှတ်အထိ ဖြတ်ထားနိုင်မှာဖြစ်လို့ လာမယ့်ပွဲစဉ်တွေမှာ မန်ချက်စတာစီးတီးအသင်း ဘယ်လိုပြန်လာနိုင်မလဲဆိုတာ ဆက်လက်စောင့်ကြည့်ရမှာဖြစ်ပါတယ်။

မြေလတ်အသံ၊ နိုဝင်ဘာ ၃၊ ၂၀၂၄။

နည်းပြအပြောင်းအလဲပြုလုပ်ထားတဲ့ မန်ချက်စတာယူနိုက်ဟာ နည်းပြသစ် အာမိုရင် မကိုင်တွယ်ခင် လက်ထောက်နည်းပြဖြစ်တဲ့ ဂန္ထဝင်ကစားသမား နစ္စတယ်ရွိုင်းက ယာယီနည်းပြအဖြစ် ကိုင်တွယ်နေတာပဲ ဖြစ်ပါတယ်။

နစ္စတယ်ရွိုင်းအနေနဲ့ ဒီပွဲဟာ ယူနိုက်တက်ကိုနည်းပြအဖြစ် တာဝန်ယူပြီးကိုင်တွယ်ရမယ့် ဒုတိယပွဲဖြစ်ပြီး ပထမဆုံး ကိုင်တွယ်ခဲ့တဲ့ EFL ပွဲစဉ်မှာတော့ လက်စတာစီးတီးအသင်းကို ၅ ဂိုး ၂ ဂိုး ရလဒ်နဲ့ ဂိုးပြတ်နိုင်ပွဲ ရရှိခဲ့တာပါ။

ယနေ့ည မြန်မာစံတော်ချိန် ၁၁ နာရီမှာ ယှဉ်ပြိုင်မယ့်ပရီးမီးယားလိဂ် ပွဲစဉ် ၁၀ မှာတော့ နစ္စတယ်ရွိုင်းရဲ့ ယာယီနည်းပြဘဝ ဒုတိယပွဲစဉ်အဖြစ်  ချဲလ်ဆီးအသင်းကို အိမ်ကွင်းမှာ လက်ခံယှဉ်ပြိုင်ရမှာဖြစ်ပြီး တန်ဟဂ် ထုတ်ပယ်ပြီးနောက်ပိုင်း ယူနိုက်တက်တို့ ဘာတွေ လုပ်ပြနိုင်မလဲဆိုတာ စောင့်ကြည့်ရမယ့် အခြေအနေပါ။

ပြီးခဲ့တဲ့ EFL ပွဲစဉ်မှာ နယူးကာဆယ်ကို ၂ ဂိုး ဂိုးမရှိနဲ့ ရှုံးနိမ့်ခဲ့ရတဲ့ ချဲလ်ဆီးအသင်းကတော့ အဲ့ဒီပွဲမှာ အရန်ကစားသမားတွေကိုသာ အသုံးပြုသွားတာဖြစ်ပြီး ဦးစားပေးကစားသမားတွေကိုပဲ ထုတ်သုံးခဲ့တဲ့ ယူနိုက်တက်နဲ့စာရင် ကစားသမားတွေ ကောင်းကောင်း အနားရထားတဲ့ အခြေအနေဖြစ်ပါတယ်။ ဒါ့အပြင် ဒဏ်ရာရ ကစားသမားကင်းစင်တဲ့ချဲလ်ဆီးဘက်က ဒဏ်ရာရ ကစားသမား ၈ ယောက်လောက်ရှိနေတဲ့ ယူနိုက်တက်ထက်ပိုပြီးတော့ ကစားသမား ရွေးချယ်အသုံးပြုနိုင်စွမ်း သာလွန်နေတာလည်း ဖြစ်ပါတယ်။

ယူနိုက်တက်အိမ်ကွင်း အိုးထရက်ဖို့ဒ် နောက်ဆုံး ၁၁ ကြိမ်တိတိ ချဲလ်ဆီးကို ရှုံးနိမ့်ထားခြင်းမရှိခဲ့ဘဲ ၅ ပွဲနိုင် ၆ ပွဲသရေ ရရှိထားခဲ့ပေမယ့် ချဲလ်ဆီးနောက်ဆုံးတွေ့ဆုံခဲ့တဲ့ ချဲလ်ဆီးရဲ့ စတန်းဖို့ဘရစ်ကွင်းမှာတော့ ၄ ဂိုး ၃ ဂိုး ရလဒ်နဲ့ ယူနိုက်တက် ရှုံးနိမ့်ခဲ့ရပြီး ကိုးလ်ပါးမားက ဟက်ထရစ် သွင်းယူတာကိုပါ ခွင့်ပြုခဲ့ရတာပါ။

ဒီနေ့ညမှာတော့ ပရီးမီးယားလိဂ်မှာ ခြေစွမ်းအတန်အသင့် တည်ငြိမ်နေတဲ့ ချဲလ်ဆီးနဲ့ လတ်တလော နည်းပြအပြောင်းအလဲအပြင် ခြေစွမ်းတည်ငြိမ်မှုပါမရသေးတဲ့ ယူနိုက်တက်တို့ပွဲစဉ်ဟာ သွင်းဂိုးအများအပြားနဲ့ ပွဲကောင်းတစ်ပွဲဖြစ်လာမလားဆိုတာ စိတ်ဝင်စားစရာပါ။

ယူနိုက်တက် ဂန္ထဝင် တိုက်စစ်မှူး နစ္စတယ်ရွိုင်းရဲ့ တိုက်စစ်အားသန်တဲ့ ကစားဟန်ကရော ချဲလ်ဆီးကို ဘယ်လောက်အထိ လွှမ်းမိုးနိုင်မလဲ၊ ပရိသတ်မျှော်လင့်ထားသလို နစ္စတယ်ရွိုင်းအနေနဲ့ နိုင်ပွဲယူဆောင်ပေးနိုင်မလား၊ ဒါမှမဟုတ် လက်ရှိ အဖက်ဖက်က ပိုမိုသာလွန်နေတဲ့ ချဲလ်ဆီးကပဲ အဝေးကွင်း ၁၁ ပွဲဆက် အနိုင်မရခဲ့သေးတဲ့ စံချိန်ကို ချိုးဖျက်သွားနိုင်မလားဆိုတာ စောင့်ကြည့်ရမှာပါ။

Photo – SuperSport Football

မြေလတ်အသံ၊ အောက်တိုဘာ ၂၀၊ ၂၀၂၄။

လက်ရှိ အဆင့် ၁ နေရာမှာရှိနေတဲ့ လီဗာပူးလ်နဲ့ ခြေစွမ်းကောင်းပြန်ရလာပြီး လက်ရှိအဆင့် ၆ ကနေ ထပ်တက်လာဦးမယ့် ချဲလ်ဆီးတို့ ယနေ့ည ပရီးမီးယားလိဂ် ပွဲစဉ် ၈ အနေနဲ့ လီဗာပူးလ် အိမ်ကွင်း အန်ဖီးလ်မှာ ယှဉ်ပြိုင်သွားမှာပါ။

နှစ်သင်းလုံးက နည်းပြသစ်တွေနဲ့ ပြန်လည်တည်ဆောက်ဆဲကာလဆိုပေမယ့် ပိုမိုအထိုင်ကျနေတဲ့ လီဗာပူးလ်အသင်းကတော့ ဒီရာသီ ပရီးမီးယားလိဂ် ၇ ပွဲကစားထားရာမှာ ၆ ပွဲအနိုင်ရရှိထားပြီး နော့တင်ဟမ်ကို မထင်မှတ်ဘဲ ရှုံးခဲ့တာကလွဲရင် ပုံစံကောင်းရနေတဲ့အပြင် လက်ရှိချန်ပီယံမန်စီးတီးရဲ့အထက်မှာ ၁ မှတ်အသာနဲ့ ဇယားထိပ်ကနေ ဦးဆောင်နေတာပါ။

ချဲလ်ဆီးကတော့ ရာသီအစ မန်စီးတီးကို ရှုံးထားတာအပြင် သရေ ၂ ပွဲနဲ့အမှတ်လျော့ထားပြီး အဆင့် ၆ နေရာမှာ ရှိနေပေမယ့် ကိုးလ် ပါးမား ခြေစွမ်းပြနေမှုနဲ့အတူ အသင်းက ပုံစံကောင်းရလာနေပြီလည်း ဖြစ်ပါတယ်။

ဒီရာသီ ပရီးမီးယားလိဂ် ပေးဂိုး ၂ ဂိုးပဲ ခွင့်ပြုထားရတဲ့ လီဗာပူးလ် ခံစစ်က အကောင်းဆုံး အနေအထားမှာ ရှိနေပေမယ့် ချဲလ်ဆီးကတော့ ဒီရာသီ ပေးဂိုး ၈ ဂိုး ရှိထားပြီး အားထားရတဲ့ ဘယ်နောက်ခံလူ ကူကူရယ်လာ ပွဲပယ်ပြစ်ဒဏ်ကြောင့် ခံစစ်ပိုင်းမှာ အနည်းငယ် အားနည်းနေသလို ပြိုင်ဘက် လီဗာပူးလ်ရဲ့ အဓိက တောင်ပံတိုက်စစ်ကစားသမား မိုဟာမက် ဆာလာနဲ့ ရင်ဆိုင်ရမယ့်ဘက်ခြမ်းဖြစ်နေလို့ ဒါက စိုးရိမ်ရမယ့် အနေအထားပါ။

ချဲလ်ဆီးအနေနဲ့ကတော့ စက်တင်ဘာလ ပရီးမီးယားလိဂ် အကောင်းဆုံး နည်းပြဆုကို နည်းပြ အန်ဇို မာရက်စကာနဲ့ အကောင်းဆုံးကစားသမားဆုကို ကွင်းလယ်တိုက်စစ်ကစားသမား ကိုးလ် ပါးမားတို့ အသီသီးရရှိထားနိုင်ခဲ့တာ ဖြစ်ပါတယ်။ ဒီနေ့ပွဲမှာတော့ အသင်းရဲ့ အားထားရတဲ့ ကစားသမား ကိုးလ် ပါးမား ခြေစွမ်းပြစေနိုင်ဖို့နဲ့အတူ တိုက်စစ်မှူး နီးကိုးလပ်စ် ဂျက်ဆင် အဆုံးသတ်သေချာစေဖို့ ဂရုပြုရမှာပဲဖြစ်ပါတယ်။ 

ပရီးမီးယားလိဂ် အကောင်းဆုံးခံစစ်၊ ပေးဂိုးအနည်းဆုံးအသင်းကို ချဲလ်ဆီးတို့ ကျော်ဖြတ်သွားနိုင်မလား၊ အန်ဖီးလ်ရဲ့ အရှိန်အဝါအောက်မှာ လီဗာပူးလ်တို့ ဆက်လက် တောက်ပနေဦးမလား။ နည်းပြ အာနဲ စလော့ နဲ့ အန်ဇို မာရက်စကာ ဘယ်သူက နည်းစနစ်ပိုကောင်းပြီး ပွဲကို အသာစီးရယူသွားနိုင်မလဲဆိုတာ ဒီနေ့ည မြန်မာစံတော်ချိန် ၁၀ နာရီမှာ ပရီးမီးယားလိဂ်ပွဲကောင်း ၁ ပွဲကို စောင့်ကြည့်ရမှာပါ။

လက်ရှိ ဇယားထိပ်မှာ ဦးဆောင်နေတဲ့ လီဗာပူးလ်ကတော့ ဒီပွဲပြီးရင် အာဆင်နယ်၊ ဘရိုက်တန်၊ အက်စ်တွန်ဗီလာ၊ နယူးကာဆယ်၊ တော့တင်ဟမ် စတဲ့အသင်းတွေနဲ့ ပရီးမီးယားလိဂ်ပွဲကြပ်တွေ ကစားရမှာဖြစ်ပါတယ်။

Photo – DStv. 

မြေလတ်အသံ၊ အောက်တိုဘာ ၆၊ ၂၀၂၄။

ပြိုင်ပွဲစုံ ၄ ပွဲဆက် နိုင်ပွဲပျောက်နေတဲ့ မန်ချက်စတာယူနိုက်တက်ဟာ ဒီကနေ့ညမှာလည်း ခြေစွမ်းကောင်းပြသနေတဲ့ အက်စတွန်ဗီလာကို အဝေးကွင်းမှာ သွားရောက်ရင်ဆိုင်ရမှာ ဖြစ်ပါတယ်။

ယူနိုက်တက်ဟာ ဒီရာသီမှာ လူအင်အားဖြည့်တင်းမှုတွေ အတန်အသင့် လုပ်နိုင်ခဲ့သလို နည်းပြပိုင်းမှာလည်း ဂန္ထဝင်တိုက်စစ်မှူး နစ္စတယ်ရွိုင်းကို အားဖြည့်ခေါ်ယူထားပေမယ့် လက်ရှိအချိန်ထိ အလုပ်မဖြစ်သေးဘဲ ရုန်းကန်နေရဆဲပါ။

ပြီးခဲ့တဲ့ ပြိုင်ပွဲစုံ ၄ ပွဲမှာ ၁ ပွဲရှုံးပြီး ၃ ပွဲသရေကျခဲ့တဲ့ ယူနိုက်တက်တို့ ဒီနေ့ အက်စတွန်ဗီလာရဲ့အိမ်ကွင်း ဗီလာပါ့ခ်မှာလည်း ခက်ခက်ခဲခဲ ရုန်းကန်ရဦးမှာပါ။

အာဆင်နယ်ကိုရှုံးထားပြီး အစ်ပ်ဆွစ်တောင်းကိုသရေကျတာကလွဲရင် ပြိုင်ပွဲစုံနိုင်ပွဲရယူထားနိုင်တဲ့ အက်စတွန်ဗီလာကတော့ ဂိုးသမား မာတီနက်ဇ်ရဲ့ လက်စွမ်းတွေ၊ တိုက်စစ်မှူး ဝက်ကင်းစ်ရဲ့ သွင်းဂိုးတွေနဲ့အတူ နည်းပြ အူနိုင်းအမ်မရီ လက်အောက်မှာ တောက်လျှောက်ပုံစံကောင်းပြသခဲ့တာပဲ ဖြစ်ပါတယ်။

နည်းပြ တန်ဟက်ဂ်ရဲ့ ယူနိုက်တက်ကတော့ တိုက်စစ်မှူးသစ် ဇာ့ခ်ဇီးရဲ့ ဂိုးသွင်းမသေချာမှုကြောင့် ထိုက်သင့်တဲ့ရလဒ်တွေ မရခဲ့တဲ့အပြင် အသင်းခေါင်းဆောင် ဘရူနိုဖာနန်ဒက်ရဲ့ ဒီရာသီ မတည်ငြိမ်မှု၊ အလောတကြီး ဖျက်ထုတ်မှုတွေကြောင့် ၂ ပွဲဆက်တိုက် အနီကဒ်ပြခံရတာတွေကလည်း အသင်းကို နစ်နာစေခဲ့တာပါ။

စပါးနဲ့ပွဲမှာ အနီကဒ်ပြခံခဲ့ရပေမယ့် အယူခံအောင်မြင်ခဲ့တာကြောင့် ဒီပွဲမှာ အသင်းခေါင်းဆောင် ဘရူနို ပြန်လည်ပါဝင်နိုင်မှာဖြစ်သလို တိုက်စစ်မှူး ဟွိုက်လန်း ပါဝင်လာခဲ့ရင်တော့ ပိုမိုကောင်းမွန်တဲ့ရလဒ် ဖော်ဆောင်နိုင်ဖွယ်ရှိနေပြီး ခံစစ်ပိုင်းက ပိုမိုကျစ်လစ်ပြီး ပေးဂိုးတွေ အလွယ်တကူခွင့်မပြုရဖို့လည်း အထူးသတိထားရမှာဖြစ်ပါတယ်။

ပရီးမီးယားလိဂ် ပွဲစဉ် ၇ အဖြစ် ယှဉ်ပြိုင်မယ့်ဒီပွဲမှာ ဗီလာတို့ အိမ်ကွင်းအမှတ်ပြည့် ရယူနိုင်မလား ၄ ပွဲဆက် နိုင်ပွဲပျောက်ဆုံးနေတဲ့ ယူနိုက်တက်ကပဲ နိုင်ပွဲပြန်လည်ရှာဖွေသွားနိုင်မလားဆိုတာကိုတော့ ဒီနေ့ည မြန်မာစံတော်ချိန် ည ၇ နာရီ ၃၀ မိနစ်မှာ စောင့်ကြည့်သွားရမှာပဲဖြစ်ပါတယ်။