ပေါက်ခေါင်း၊ ဩဂုတ် ၂၀၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကျောက်ပြင်သာနဲ့ ဖလန်ပင်ကျေးရွာတို့ကို စစ်ကော်မရှင်တပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သားအဖ ၂ ဦးသေပြီး ၄ ဦးဒဏ်ရာရတယ်လို့ ဒေသခံတွေဆီက သိရပါတယ်။

ဩဂုတ် ၁၉ ရက် မနက် ၁၁ နာရီကျော်မှာ သဲကုန်းဘက်ကတက်လာတဲ့ စက်တပ်လေထီး ၄ စီးဟာ ကျေးရွာ ၂ ရွာထဲကို ဗုံး ၁၂ လုံးကြဲချခဲ့တယ်လို့ ဆိုပါတယ်။

“ပထမ ၂ စီးလာတယ်။ ကြဲသွားတယ်။ ဒုတိယ ၂ စီးလာတယ်။ ထပ်ကြဲတယ်။ ဖလန်ပင်က အိမ်ထိပေမယ့် လူမထိဘူး။ ကျောက်ပြင်သာ ပြည်သူ ၂ ဦးသေတယ်။ သားအဖ ၂ ယောက်ပေါ့။ ပြည်သူ ၄ ဦးထိတာမှာ စိုးရိမ်ရတဲ့ ၁ ယောက်က သေဆုံးသူကောင်လေးရဲ့အမေပါ”လို့ ပြည်ခရိုင် ၃၆၀၂ တပ်ရင်း သတင်းနဲ့ပြန်ကြားရေးတာဝန်ခံက ပြောပါတယ်။

ဗုံးကြဲခံရလို့ ကျောက်ပြင်သာကျေးရွာက အသက် ၁၀ နှစ်အရွယ် မောင်သက်ပိုင်ဇော်နဲ့ ဖခင်ဖြစ်သူ အသက် ၃၈ နှစ်အရွယ် ဦးသိန်းဇော်တို့သေဆုံးပြီး နာရေးကိုတော့ အဲ့ဒီနေ့ညနေပိုင်းမှာပဲ ကျေးရွာ သုသာန်မှာ သင်္ဂြိုဟ်ခဲ့တယ်လို့ သူကပြောပါတယ်။

ဒါ့အပြင် ကျောက်ပြင်သာရွာက နေအိမ် ၂ လုံးလည်းပျက်စီးပြီး ဦးသိန်းဇော်ရဲ့ မိန်းမဖြစ်သူ အသက် ၃၆ နှစ်အရွယ် အမျိုးသမီး ဖြစ်သူနဲ့ အသက် ၄၀ အရွယ် အမျိုးသမီး ၃ ဦးဒဏ်ရာရကာ ဆေးဝါးကုသဖို့ အခက်အခဲကြုံနေရတယ်လို့ သူကဆက်ပြောပါတယ်။

ဒါ့အပြင် ဖလန်ပင်ကျေးရွာမှာလည်း နေအိမ် ၃ လုံးပျက်စီးခဲ့ပြီး လူထိခိုက်မှုမရှိခဲ့ဘူးလို့ သိရပါတယ်။

ဩဂုတ် ၁၅ ရက်ကလည်း ကြိမ်ချောင်းကျေးရွာကို ပါရာမိုတာနဲ့ဗုံး ၄ လုံးကြဲချခဲ့ရာ အသက် ၁၃ နှစ်အရွယ်မိန်းကလေးငယ် ၁ ဦးအပါအဝင် ၆ ဦးသေဆုံးပြီး ၁၁ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ပေါက်ခေါင်း၊ သြဂုတ် ၅၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ ကင်မွန်းခြုံကျေးရွာအုပ်စု၊ နတ္တလင်းစုရွာကို စစ်ကောင်စီတပ်က စစ်ကြောင်းထိုးဝင်ရောက်ပြီး အမျိုးသား ၂ ဦးကို ဖမ်းဆီးသတ်ဖြတ်ခဲ့တယ်လို့ ဒေသခံတွေဆီက သိရပါတယ်။

အသတ်ခံရသူတွေဟာ နတ္တလင်းစုကျေးရွာနေ အသက် ၂၀ နဲ့ ၁၆ နှစ်ရှိ လူငယ်အမျိုးသား ၂ ဦးဖြစ်ပြီး သြဂုတ် ၂ ရက် ည ၇ နာရီကျော်မှာ ကျေးရွာပြင်ပကိုခေါ်ဆောင်ကာ သတ်ဖြတ်ခံခဲ့ရတာလို့ ဆိုပါတယ်။

” သေနတ်သံ သုံး၊ လေးချက် ကြားလိုက်ရတယ်။ သေနတ်သံကြားပြီး မကြာဘူး မီးရှို့တဲ့ မီးခိုးလုံးတွေ တက်လာတယ်။ ဘုန်းကြီးကျောင်းထဲကနေ ခေါ်ထုတ်ပြီး ရွာအပြင်မှာ သွားသတ်တာ။ သတ်တဲ့နားမှာရှိတဲ့ လှည်းတစီး၊ ဆိုင်ကယ်တစီးနဲ့အိမ်က ထရံတွေ၊ သက်ကယ်တွေရယ်ကို ဖျက်ဆီးပြီး လောင်စာအဖြစ်လုပ်တယ်။ အဲ့နားက ကားတစီးထဲက ဓာတ်ဆီတွေကို ထုတ်ပြီး အစဖျောက် မီးရှို့ခဲ့တာပါ” လို့ ဖြစ်စဥ်ကိုသိရှိထားတဲ့ ပေါက်ခေါင်းဒေသခံတဦးက မြေလတ်အသံကို ပြောပါတယ်။

နတ္တလင်းစုရွာကို အင်အား ၂၀၀ ခန့်ပါ စစ်ကောင်စီတပ်ဖွဲ့က ဇူလိုင် ၃၁ ရက်မှာ စတင် စစ်ကြောင်းထိုးဝင်ရောက်ခဲ့တာဖြစ်ပြီး ဩဂုတ် ၁ ရက် မနက်ပိုင်းမှာ ရွာခံ ၆၀ ကျော်ကို ကျေးရွာဘုန်းကြီးကျောင်းအတွင်း ဖမ်းဆီးခဲ့တယ်လို့ သိရပါတယ်။

” အဲ့ဖမ်းခံထားတဲ့သူတွေကို ကောင်လေး ၃ ယောက်က အခြေအနေသွားကြည့်ကြတာ။ ၃ ယောက်ထဲက ၂ ယောက်ကိုတော့ကင်းချထားတဲ့ စစ်သားတွေက ဖမ်းမိလိုက်တယ်။ ၁ ယောက်ကတော့ထွက်ပြေးလွတ်သွားတယ်။ ဖမ်းခံရတဲ့ ၂ ယောက်ကို သတ်ဖြတ်သွားတာ”လို့ အထက်ပါဒေသခံက ပြောပါတယ်။

ဒါ့အပြင် စစ်ကြောင်းဝင်ရောက်ခဲ့စဥ်က လက်နက်ကြီး၊ လက်နက်ငယ်တွေနဲ့ ပစ်ခတ်ခဲ့လို့ နတ္တလင်းစုရွာခံ အသက် ၅၀ ကျော်အရွယ် ကိုမိုးဝင်းဆိုသူမှာလည်း လက်နက်ကြီးပစ်ခတ်သံတွေကြောင့် နှလုံးရပ်အမောဖောက်ကာ သေဆုံးခဲ့သေးတယ်လို့လည်း သိရပါတယ်။

အဲ့ဒီစစ်ကြောင်းဟာ သြဂုတ် ၄ ရက် ယမန်နေ့ နေ့လယ်ပိုင်းမှာ နတ္တလင်းစုရွာကနေ ထွက်ခွာပြီးကင်မွန်းခြုံရွာဘက်ကို ဆက်လက်စစ်ကြောင်းထိုးဝင်ရောက်နေကြောင်းသိရကာ စစ်ကြောင်းထွက်ခွာချိန်မှာ နတ္တလင်းစုကျေးရွာဘုန်းကြီးကျောင်းအတွင်း ဖမ်းဆီးထားတဲ့ဒေသခံတွေကို ပြန်လွှတ်ပေးခဲ့တယ်လို့ သိရပါတယ်။

အထက်ပါစစ်ကောင်စီစစ်ကြောင်းကြောင့် နတ္တလင်းစုရွာနဲ့အနီးတဝိုက်ရွာတွေဖြစ်တဲ့ ဒွရွာ၊ ယောင်းပြန်ရွာ၊ ကြို့ပင်ရွာနဲ့ ကင်မွန်းခြုံရွာက သက်ကြီးရွယ်အို၊ ကလေးငယ်နဲ့ အမျိုးသမီးတွေအပါအဝင် ဒေသခံ ၂,၀၀၀ ကျော်ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။

စာတည်း – ဟိန်းစံ

ပေါက်ခေါင်း၊ မေ ၃၀၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်က ကျေးရွာ ၄ ရွာကို စစ်ကောင်စီတပ်က မေ ၂၉ ရက်မှာ မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ပေါက်ခေါင်းမြို့ပေါ်ကနေ သိုက်ချောင်းကျေးရွာကို စစ်ကား ၃ စီးနဲ့စစ်ကြောင်းထိုးလာပြီးနောက် မနက် ၈ နာရီကျော်မှာ ကွမ်းအုံစု၊ အိုက်စောက်နဲ့ နေ့လယ် ၁ နာရီကျော်မှာ မြေနီကုန်း၊ သဖန်းကိုင်း စတဲ့ကျေးရွာတွေကို မီးရှို့ခဲ့တာလို့ဆိုပါတယ်။

“အဲ့ရွာတွေက ဘယ်နှစ်အိမ်လောက် မီးလောင်လဲဆိုတာတော့ မသိရသေးဘူး။ မနက်မိုးလင်းကတည်းက လက်နက်ကြီး၊ လက်နက်ငယ်များစွာအသံကို ညနေထိကြားနေခဲ့ရတယ်။ စစ်ကြောင်းက ကား ၃ စီးဆိုတော့ အင်အား ၆၀၊ ၇၀ လောက်ရှိမယ်”လို့ မြေပြင် အခြေအနေကိုသိရှိထားတဲ့ ဒေသခံအမျိုးသားတဦးကပြောပါတယ်။

မီးရှို့ခံရတဲ့ကျေးရွာတွေဟာ အိမ်ခြေ ၁၀၀ ကျော်ရှိတဲ့ရွာတွေဖြစ်ပြီး တရွာနဲ့ တရွာဟာ လယ်ကွင်းပြင်တခုစီသာ ကွာခြားတယ်လို့သိရပါတယ်။

မီးရှို့တဲ့စစ်ကြောင်းကို ဒေသခံကာကွယ်ရေးတပ်ဖွဲ့တွေအနေနဲ့ ပစ်ခတ်တိုက်ခိုက်ခဲ့ပေမယ့် ကျည်၊ လက်နက်၊ လူအင်အား မလုံလောက်တာကြောင့် တန်ပြန်စစ်မျက်နှာမဖွင့်နိုင်ဘဲ တပ်တွေပြန်ဆုတ်ခဲ့ရတယ်လို့ဆိုပါ တယ်။

“သူတို့(စကစ)မှာ Jammer တပ်ထားတဲ့ ကားတွေပါတယ်လို့ပြောတယ်။ မိုင်းကွင်းထဲရောက်တာတောင် ကာကွယ်ရေးအဖွဲ့တွေ မိုင်းဆွဲတိုက်ခိုက်လို့မရဘူးလို့သိရတယ်။ အနီးအနား တပ်ရင်းတွေတော့လာပေမယ့် Gun အင်အား ၁၀ လက်လောက်နဲ့ တူမီးသေနတ်တွေပဲပါတယ်ပြောတယ်”လို့ တော်လှန်ရေးတပ်ဖွဲ့နဲ့နီးစပ်သူ အမျိုးသားတဦးက ပြောပါတယ်။

အဆိုပါစစ်ကြောင်းဟာ မေ ၃၀ ရက်ဒီကနေ့အချိန်ထိ သဖန်းကိုင်းကျေးရွာအနီး ပတ်ဝန်းကျင်မှာ တပ်စွဲရှိနေသေးတာကြောင့် သိုက်ချောင်း၊ အိုင်စောက်၊ ကွမ်းအုံစု၊ သဖန်းကိုင်း၊ မြေနီကုန်း၊ ဓားသွေးကျောက်စတဲ့ကျေးရွာတွေက ပြည်သူတွေ ထွက်ပြေးတိမ်းရှောင်နေကြရတယ်လို့ သိရပါတယ်။

ပြီးခဲ့တဲ့မေ ၂၆ ရက်ကလည်း အင်အား ၆၀ ကျော်ရှိတဲ့စစ်ကောင်စီတပ်ဖွဲ့၀င်တွေက တိုက်ပွဲမဖြစ်ဘဲ သိုက်ချောင်းကျေးရွာကို မီးရှို့ဖျက်ဆီးခဲ့တဲ့အတွက် လူနေအိမ် ၅၀ ခန့် မီးလောင်ပျက်စီးခဲ့တယ်လို့ ဒေသခံတွေဆီကသိရပါတယ်။

စာတည်း – လင်း

ပေါက်ခေါင်း၊ မေ ၂၆၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်ထဲမှာ စစ်ကောင်စီတပ်က မေ ၂၆ ရက် ဒီမွန်းလွဲ ၁၂ နာရီကျော်မှာ စစ်ကြောင်းထိုးပြီး နေအိမ်တွေကို မီးရှို့နေတယ်လို့ဒေသခံတွေက ပြောပါတယ်။

ပေါက်ခေါင်းမြို့ပေါ်ကနေ စစ်ကား ၃ စီးနဲ့ သိုက်ချောင်းကျေးရွာကိုဝင်ရောက်လာပြီးနောက် နေ့လယ် ၁ နာရီကျော်မှာ နေအိမ်တွေကိုမီးရှို့နေတာလို့ဆိုပါတယ်။

“စကစတွေရွာထဲကနေမထွက်သေးဘူး။ မီးရှို့နေတာကို အဝေးကနေလှမ်းမြင်ရတယ်။ မီးခိုးလိပ်တွေ တော်တော်ကိုထွက်နေတာဗျ။ ရွာခံတွေကတော့ အကုန်လုံးထွက်ပြေးကြကုန်ပြီ”လို့ မြေပြင်အခြေအနေကိုသိရှိသူ အမျိုးသားတဦးက ပြောပါတယ်။

စစ်ကောင်စီတပ်က လက်နက်ကြီးတွေပစ်ခတ်ပြီး သိုက်ချောင်းကျေးရွာကို မီးရှို့နေတာကြောင့် တော်လှန်ရေးတပ်ဖွဲ့တွေဘက်ကလည်း လက်နက်ကြီးတွေနဲ့ပြန်လည်ပစ်ခတ်တိုက်ခိုက်နေတယ်လို့ သူကဆက်ပြောပါတယ်။

ပေါက်ခေါင်းဒေသခံ နောက်ထပ်အမျိုးသားတဦးကလည်း ဒီကနေ့ နေ့လယ် ၁ နာရီကျော်ကစတင်ကာ ဒီနေ့လယ် ၃ နာရီကျော်အထိ သိုက်ချောင်းကျေးရွာဘက်နေ လက်နက်ကြီးပစ်ခတ်သံ ၁၀ ကြိမ်ထက် မနည်း ကြားနေရတယ်လို့ ပြောပါတယ်။

“အကြိမ်အရေ ၁၀ ချက်လောက်ရှိပြီး။ အသံကျယ်ကျယ်က ၄ ချက်လောက်။ အတော်ကျယ်တယ်။ အသံကလေသင့်နေတော့ အတော်ကျယ်ကျယ်ကြားရတယ်”လို့ သူကဆိုပါတယ်။

သိုက်ချောင်းကျေးရွာမီးရှို့နေတာကြောင့် သိုင်းချောင်း၊ ကွမ်းအုံစု၊ အိုင်ဇောက်၊ ဗောဓိကုန်း၊ တာကောက်၊ မြှောက်ခွေး၊ ရဲချောင်းခြားစတဲ့ ကျေးရွာတွေက ဒေသခံပြည်သူတွေဟာ ဘေးလွတ်ရာကျေးရွာတွေကို ထွက်ပြေးနေကြရတယ်လို့ဆိုပါတယ်။

အိမ်ခြေ ၁၀၀ ကျော်ရှိတဲ့ သိုက်ချောင်းကျေးရွာကို ပြီးခဲ့တဲ့ဧပြီ ၃၀ ရက်ကလည်း စစ်ကောင်စီတပ်က တိုက်ပွဲမဖြစ်ဘဲ ဝင်ရောက်မီးရှို့ခဲ့ရာ လူနေအိမ် ၇ လုံးပြာကျခဲ့ပါတယ်။

အလားတူ ပြီးခဲ့တဲ့ဖေဖော်ဝါရီ ၁၉ ရက်မှာလည်း သိုင်းချောင်းကျေးရွာအနီးမှာ စစ်ကောင်စီတပ်နဲ့ တော်လှန်ရေးတပ်ဖွဲ့တွေထိတွေ့တိုက်ပွဲဖြစ်ခဲ့ပြီး ၂၃ ရက်မှာတော့ သိုက်ချောင်း ရွာကိုမီးဝင်ရှို့ခဲ့ရာ လူနေအိမ် ၆ လုံးမီးလောင်ကျွမ်းခဲ့တယ်လို့ဒေသခံတွေဆီကသိရပါတယ်။

စာတည်း – လင်း