ပဲခူး

ပဲခူး၊ ဧပြီ ၁၊ ၂၀၂၃။

ပဲခူးတိုင်းဒေသကြီး၊ ဝေါမြို့နယ်၊ ညောင်သုံးခွရွာနားမှာ ဝေါမြို့နယ်နဲ့ သနပ်ပင်မြို့နယ်ကိုဆက်သွယ်ထားတဲ့ ကျေးရွာချင်းဆက်လမ်းကို စစ်ကောင်စီဘက်က ဘူဒိုဇာနဲ့ ထိုးဖျက်သွားတယ်လို့ သိရပါတယ်။

မတ်လ ၂၉ ရက်နေ့ နေ့လည်ပိုင်းက စတင်ပြီး စစ်ကောင်စီဘက်က ကျေးရွာချင်းဆက် မြေသားလမ်းကို အကျယ် ၁၀ ခန့်နဲ့ အနက် ၄ ပေခန့် တူးပြီး ဖျက်ဆီးသွားတယ်လို့ ဒေသခံတဦးက ပြောပါတယ်။

“အဲဒီလမ်းပိုင်းက ဦးသိန်းစိန်လက်ထက်က ဖို့ထားပြီးလုပ်ထားတဲ့ ကုန်ထုတ်လမ်းပေါ့။ မိန်းလမ်းကို ရှောင်ကွင်းလမ်းလို့လည်း ပြောလို့ရတယ်။ ဒေသထွက်ကုန်တွေကို သယ်ဆောင်သွားလာတဲ့ လမ်းပေါ့။ နောက်ပြီး မွန်ဘက်ကနေ ပဲခူးဘက်ခြမ်းဖြတ်မယ့် မှောင်ခိုကုန်တွေနဲ့ လိုင်စင်မဲ့ယာဥ်တွေ ဖြတ်သန်းသွားကြတာ။ အဲဒီလမ်းကို ဘူဒိုဇာနဲ့တူးပြီး ဖျက်ဆီးလိုက်တာ” လို့ ပြောပါတယ်။

စစ်ကောင်စီဘက်က အဲဒီလမ်းပိုင်းကို ဖျက်ဆီးလိုက်တာဟာ ဒေသကာကွယ်ရေးအဖွဲ့တွေရဲ့ လမ်းကြောင်းကို ဖြတ်တောက်တာဖြစ်နိုင်ပေမယ့် တကယ်တမ်း စိုက်ပျိုးရေးတောင်သူတွေနဲ့ ဒေသခံတွေကိုသာ သွားလာရေးအတွက် အခက်ခဲဖြစ်စေတယ်လို့ ဆိုပါတယ်။

စစ်ကောင်စီဘက်က လမ်းပိုင်းကို ဖျက်ဆီးလိုက်လို့ ဝေါမြို့နယ်ဘက်က ညောင်ကုန်းဝ၊ ကံမြင့်၊ မိုးနတ်ကျေးရွာတွေအပါအဝင် ကျေးရွာပါ ၁၀ ရွာကျော်နဲ့ သနပ်ပင်မြို့နယ်က မင်းရွာ၊ ကမာဘာကျေးရွာအပါအဝင် ကျေးရွာ ၁၀ ရွာနီးပါးလော​က်ဟာ တမြို့နယ်နဲ့တမြို့နယ် ဒေသထုတ်ကုန်တွေ ပို့ဆောင်ဖို့ ခက်ခဲသွားတယ်လို့ သိရပါတယ်။

လမ်းပိုင်းဖျက်ဆီးခံလိုက်ရလို့ ဒေသထွက် စပါး၊ ပဲ၊ ပြောင်း၊ ဖရဲအပါအဝင် စိုက်ပျိုးသီးနှံတွေကို ပို့ဆောင်ရာမှာ ယခင်ထက် ကုန်ကျစားရိတ်ပိုများလာပြီး ကုန်စည်ပျက်စီးမှုတွေရှိလာနိုင်တာကြောင့် ဒေသခံတောင်သူတွေမှာ အခက်ခဲတွေရှိလာတယ်လို့ ဆိုပါတယ်။

စစ်ကောင်စီက ဝေါမြို့နယ်ရှိ စစ်တောင်းမြစ်ကမ်းဘေးရွာတွေမှာ လုံခြုံရေးတင်းကြပ်ထားသလို အစစ်ဆေးလည်း များနေတယ်လို့ သိရပါတယ်။

စာတည်း – 007

ပဲခူး၊ မတ် ၃၁၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့နယ်၊ ကြာနီကန်ရဲကင်းအပိုင် အုန်းနှဲစမ်းရွာက လောင်းကစားဝိုင်းကို မတ်လ ၃၀ ရက်မနေ့ကနေ့လယ် ၂ နာရီလောက်မှာ စစ်အုပ်စုက ဝင်ဖမ်းပြီး လောင်းကစားနဲ့ ဆက်စပ်ပစ္စည်းအချို့ကိုသာ သိမ်းဆည်းသွားတယ်လို့ သိရပါတယ်။

မှတ်တိုင်ရဲစခန်းလက်အောက်ခံ ကြာနီကန်ရဲကင်းက စစ်သားနဲ့ရဲ ၈ ဦးဟာ အုန်းနှဲစမ်းရွာက ဉာဏ်ကျယ်ကြီး (ခ) မျိုးသန်းထိုက်ရဲ့ နေအိမ်ရှေ့ခြံဝန်းထဲမှာ လောင်းကစားဝိုင်း ပြုလုပ်နေချိန် မနေ့ကနေ့လယ် ၂ နာရီလောက်မှာ ဖမ်းဆီးခဲ့တာလို့ ဆိုပါတယ်။

“လောင်းကစားဝိုင်းကို အုန်းနှဲစမ်းရွာက ကြံ့ခိုင်ရေးစည်းရုံးရေးမှူး နတ်စိန် (ခ) စိုးမြင့်နဲ့ ဉာဏ်ကျယ်ကြီးတို့ဦးဆောင်ပြီး လိုင်းကြေးပေးလုပ်နေတာ။ စစ်သားနဲ့ရဲတွေက လိုင်းကြေးယူထားတော့ အဖမ်းပြရတာ။ ဝင်လာကတည်းက သေနတ်တွေပစ်ဖောက်တော့ အကုန်ပြေးတာပေါ့။ သူတို့တကယ်ဖမ်းရင် မိပါလျက်နဲ့ မဖမ်းတာ။ PDF ကိုဖမ်းမယ်ဆို အဲ့လိုသေနတ်ဖောက်ပြီး လာဖမ်းလို့လား” လို့ လောင်းကစားဝိုင်းကို သွားရောက်ခဲ့သူတဦးက ပြောပါတယ်။

လောင်းကစားဝိုင်းအတွင်းရှိ ဆိုင်ကယ် ၃ စီးနဲ့ ဂျုံးဂျုံးကျ ခုံကို သိမ်းဆည်းသွားပြီး၊ ဦးဆောင်သူ ၂ ဦးကတော့ လက်ရှိမှာ တိမ်းရှောင်နေတယ်လို့ သူက ဆက်ပြောပါတယ်။ လောင်းကစားဝိုင်းပြုလုပ်တဲ့ နေအိမ်ပိုင်ရှင်နဲ့ ဦးဆောင်သူ ကိုစိုးမြင့်တို့ကို ရဲက လိုက်လံဖမ်းဆီးတာမျိုးမရှိတဲ့အတွက် လောင်းကစားဝိုင်းတွေ ပြန်လုပ်မှာကို ဒေသခံတွေ စိုးရိမ်နေကြပါတယ်။

မှတ်တိုင်ရဲစခန်းနယ်မြေထဲမှာ လောင်းကစားဝိုင်းတွေကို အခုနှစ် နိုဝင်ဘာလလောက်ကတည်းက ပြုလုပ်နေကာ မဲခေါင်းရွာမှာ စနေ၊ တနင်္ဂနွေ၊ တနင်္လာ၊ ကျွဲတဲကြီးရွာမှာ အင်္ဂါ၊ ဗုဒ္ဓဟူးနဲ့ လက်ပံပါးပျဥ်းရွာမှာ ကြာသာပတေးနဲ့ သောကြာနေ့တို့မှာ ပြုလုပ်နေပြီး အခုဖမ်းဆီးတဲ့ အုန်းနှဲစမ်းရွာ လောင်းကစားဝိုင်းကတော့ နေ့စဥ်ပြုလုပ်နေတာလို့ သိရပါတယ်။

ပြီးခဲ့တဲ့ မတ်လ ၁၄ ရက်ကတော့ ကျွဲတဲရွာ လောင်းကစားဝိုင်းကနေ ပြန်လာတဲ့ လက်ပံပါးပျဉ်းရွာက လောင်းကစားဒိုင် ကိုမောင်းဝင်းကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့က သေနတ်နဲ့ပစ်ခတ် ရှင်းလင်းခဲ့ပါသေးတယ်။

စစ်ကောင်စီက ပေါင်းတည်မြို့နယ်အတွင်းရှိ ပြည်သူတွေဆီကနေ စိုက်ပျိုးစရိတ် ချေးငွေနဲ့ သမချေးငွေတွေကို အဓမ္မတောင်းခံနေသလို တဖက်မှာလည်း လောင်းကစားဝိုင်းတွေကို လိုင်းကြေးယူကာ ကျင်းပပေးနေတယ်လို့ ဒေသခံတွေဆီက သိရပါတယ်။

ပုံစာ – ပေါင်းတည်မြို့နယ်အတွင်းက လောင်းကစားဝိုင်းအချို့။ (ပုံဟောင်း)

စာတည်း – လင်း

ပဲခူး၊ မတ် ၃၁၊ ၂၀၂၃။

ပဲခူးတိုင်း(အနောက်ပိုင်း)၊ ပြည်မြို့နယ် စီမံအုပ်ချုပ်ရေးကောင်စီက ဌာနဆိုင်ရာတွေကို သင်္ကြန်မဲလက်မှတ်တွေ ဖိအားပေးရောင်းနေတယ်လို့ သိရပါတယ်။

စစ်ကောင်စီ ဌာနဆိုင်ရာတွေ၊ ရပ်ကျေးအုပ်ချုပ်ရေးမှူး၊ ဆယ်အိမ်မှူး၊ သတင်းပေးတွေနဲ့ စစ်ကောင်စီထောက်ခံသူတွေကို ရောင်းချနေတာလို့ ဆိုပါတယ်။

“ရောင်းတာကတော့ ပုဂ္ဂလိကဆေးရုံ၊ ဆေးခန်းနဲ့ သူတို့နဲ့နီးစပ်တဲ့ စီးပွားရေးလုပ်ငန်းရှင်တွေကို ရောင်းတာတွေ့ရတယ်။ တမဲကို ၃၅၀၀ တဲ့ ဆိုင်ကယ်နဲ့ ဖုန်းတွေပါတယ်” လို့ မြို့ခံတဦးက ပြောပါတယ်။

မဲတစောင်ကို ၃၅၀၀ ကျပ်နှုန်းနဲ့ ရောင်းချပြီး ယိုးဒယားဆိုင်ကယ်(၁) စီး၊ တရုတ်ဆိုင်ကယ်(၂) စီးနဲ့ ဖုန်းအလုံး(၂၀) ကို ကံစမ်းမဲဖောက်ပေးမှာဖြစ်တယ်လို့ မဲလက်မှတ်မှာ ဖော်ပြထားပါတယ်။

ဒါ့အပြင် သင်္ကြန်ကာလစည်ကားရေး စစ်ကောင်စီက နည်းမျိုးစုံသုံးနေသလို ကမ်းနားလမ်းလျှောက်သင်္ကြန်၊ ရေပေါ်သင်္ကြန်တွေနဲ့ ဌာနဆိုင်ရာ၊ ရပ်ကွက်ရုံးတွေကနေ တာဝန်ယူပြီး ယိမ်းတွေ ထွက်ကြဖို့ကိုလည်း ညွှန်ကြားထားတယ်လို့ သိရပါတယ်။

ရပ်ကွက်ယိမ်းတွေအတွက် ရပ်ကွက်အတွင်းမှာရှိတဲ့ စီးပွားရေးလုပ်ငန်းရှင်တွေကို အချိုးကျစီ တာဝန်ယူခိုင်းတာမျိုးတွေလည်း လုပ်ဆောင်နေတယ်လို့ မြို့ခံတွေက ပြောပါတယ်။

ပဲခူး၊ မတ် ၃၁၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ ကျောက်ကြီး-နတ်သံကွင်းလမ်း ညောင်ကုန်းတံတားမှာ အုတ်သယ်ကား မိုင်းထိလို့ ၂ ဦးသေ၊ ၃ ဦး ဒဏ်ရာရသွားတယ်လို့ သိရပါတယ်။

မတ်လ ၃၀ ရက်နေ့ မနက် ၈ နာရီ ၅၀ မိနစ်ခန့်မှာ ပဲနွယ်ကုန်းဘက်ကနေ ကျောက်ကြီးဘက်ကို စည်ပင်ဌာနအတွက် အုတ် ၄၀၀၀ လောက်တင်ပြီးလာတဲ့ Faw ကား အပြာရောင်ယာဥ်ဟာ ညောင်ကုန်းတံတားပေါ်အတက်မှာ မိုင်းနင်းမိခဲ့တာဖြစ်တယ်လို့ ဒေသခံတဦးက ပြောပါတယ်။

“အဲကားက ကျောက်ကြီးဘက်ကနေ ပဲနွယ်ကုန်းဘက်ကိုအသွား အဲတံတားပေါ်ကပဲ ဖြတ်သွားတယ်။ ဘာမှမဖြစ်ဘူး။ အုတ်သယ်ပြီးအပြန် တံတားပေါ်အတက် ချဉ်းကပ်လမ်းနဲ့တံတားနဲ့ကြားမှာ မိုင်းနင်းမိပြီး ပေါက်ကွဲမှုဖြစ်တာ။ ကားကဝိတ်ပါလာတဲ့အတွက် ဖြစ်တာလို့ ယူဆလို့ရတယ်။ ကားကတော့ ခေါင်းပိုင်းကို ထိသွားတာ” လို့ ပြောပါတယ်။

ကားမိုင်စထိတာကြောင့် ကားခေါင်းခန်းပါစောမင်းဦး ၃၈ နှစ် ကွင်းချောင်းဝကျေးရွာနေသူ၊ ဦးရန်နိုင်အောင် ၅၇ ကွင်းချောင်းဝကျေးရွာနေသူ ၂ ဦးမှာ ဆေးရုံအရောက်မှာ သေဆုံးခဲ့ပြီး ယာဥ်မောင်း ဦးအောင်ဌေးဦး ၃၈ နှစ်နဲ့ ယာဥ်နောက်ကနေ လိုက်ပါလာသူ ညီမင်းခန့်၊ ဦးစိန်မင်းဆိုသူ ၃ ဦးမှာ ဒဏ်ရာရခဲ့တယ်လို့ ဆိုပါတယ်။

သေဆုံးဒဏ်ရာရသူတွေအနက် ဒဏ်ရာပြင်းတဲ့ ဦးစိန်မင်းကို တောင်ငူစစ်ဆေးရုံနဲ့ ကျန်သူတွေကိုတော့ ကျောက်ကြီးဆေးရုံတို့ကို လူမှုကူညီရေးကားတွေနဲ့ ပို့ထားရတယ်လို့ သိရပါတယ်။

အဲဒီတံတားဟာ သံကူကွန်ကရစ်တံတားအဖြစ် ၂၀၂၂ ခုနှစ် ဇွန်တွင် ပထမအကြိမ်မိုင်းခွဲခံရပြီး ယာယီဘေလီတံတားတည်ဆောက်ပြီး နိုဝင်ဘာလတွင် ဒုတိယအကြိမ် မိုင်းခွဲခံရကာ တံတားပြန်မတည်ဆောက်ခင် မြေသားရှောင်ကွင်းလမ်းမှာ ဖြတ်သန်းနေကြတာလို့ ဆိုပါတယ်။

ယင်းနောက် မြေသားလမ်းတွင် ၂၀၂၃ ခုနှစ် ဖေဖော်ဝါရီလ ၃ ရက်နေ့ မနက် ၇ နာရီကျော်ခန့်မှာ ကျောက်ကြီးမြို့ဘက်ကနေ ပဲနွယ်ကုန်းဘက်ကို စျေးရောင်းဖို့ထွက်လာတဲ့ လိုက်ထရပ် အဖြူရောင်ယာဥ်ဟာ ညောင်ကုန်းတံတား ရှောင်ကွင်းလမ်းအ‌ရောက်မှာ မိုင်းထိခဲ့လို့ ကလေး ၁ ဦးအပါအဝင် ၄ ဦးဒဏ်ရာရခဲ့သေးတယ်လို့ သိရပါတယ်။

ဒါအပြင် မတ်လ ၂၀ ရက်နေ့ မနက် ၇ နာရီခန့်မှာ ကျောက်ကြီးဘ​က်နေ ပဲနွယ်ကုန်းဘက်ကို မောင်းနှင်လာတဲ့ ”ဝင်းရတနာ” ယာဥ်လိုင်း ခရီးသည်ပို့ဆောင်ရေးယာဥ်ဟာ ညောင်ကုန်းတံတား ရှောင်ကွင်းလမ်းကနေ မောင်းနှင်လာချိန် မိုင်းထိခဲ့လို့ ၃ ဦးသေဆုံးပြီး ၂ ဦးဒဏ်ရာ ရခဲ့သေးတယ်လို့ ဆိုပါတယ်။

စာတည်း – 007

ပဲခူး၊ မတ် ၃၁၊ ၂၀၂၃။

ပဲခူးတိုင်းအရှေ့ခြမ်း၊ တောင်ငူမြို့နယ်က စစ်တပ်သတင်းပေးဆိုသူ ၃ ဦးကို အခုမတ်လအတွင်းမှာ ရှင်းလင်းခဲ့တယ်လို့ ပြည်သူ့ကာကွယ်ရေးတပ်ဖွဲ့ (ရေတာရှည်)က သတင်းထုတ်ပြန်ထားပါတယ်။

တောင်ငူမြို့နယ်၊ ကျီးအင်းကျေးရွာက အသက် ၃၈ နှစ်အရွယ် ကိုနိုင်လင်းစိုး၊ ၄၁ နှစ်အရွယ် ကိုအောင်ကျော်ဇောနဲ့ ၃၅ နှစ်အရွယ် ကိုဖြိုးတို့ကို စစ်တပ်နဲ့ ပတ်သက်ဆက်နွယ်ပြီး သတင်းပေးတယ်ဆိုတာ ပြစ်မှုထင်ရှားတဲ့အတွက် ခုလို ရှင်းလင်းခဲ့တာလို့ ပြည်သူ့ကာကွယ်ရေးတပ်ဖွဲ့ (ရေတာရှည်)ရဲ့တာဝန်ရှိသူက ပြောပါတယ်။

“ကျနော်တို့ ပျူစောထီးအယောက် ၃၀ လောက် ခေါ်စစ်တာမျိုးရှိတယ်။ ၂၀ ကျော်ကို ပြန်လွှတ်ပေးတယ်။ ခံဝန်ကတိ ထိုးခိုင်းတယ်။ အေးဆေးနေရင် ဘာမှပြဿနာမရှိဘူး။ အခုကောင်တွေက ပြစ်မှုထင်ရှားလို့ပါ” လို့ ပြောပါတယ်။

သူတို့ ၃ ဦးကို မတ်လ ၂၉ ရက်ညနေ ၆ နာရီလောက်က ကျီးအင်းရွာထိပ်မှာ ဖမ်းဆီးခဲ့ပြီး၊ မတ်လ ၃၀ ရက်မနေ့ကမနက် ၅ နာရီလောက်မှာ ရှင်းလင်းခဲ့တာလို့ ဆိုပါတယ်။

သူတို့ ၃ ဦးဟာ တော်လှန်ရေးရဲဘော်တွေရဲ့ စစ်မြေပြင်လှုပ်ရှားမှုနဲ့ပတ်သက်ပြီး စစ်တပ်ကိုသတင်းပေးတာ၊ လမ်းပြနဲ့ရိက္ခာထောက်ပို့လုပ်တာ၊ သစ်စက်တွေကနေ ရဲကို ဆက်ကြေးတောင်းပေးတာအပြင် PDF နဲ့ဆက်သွယ်ပါက အရေးယူခံရမယ်လို့ခြိမ်းခြောက်တာတွေအပြင် လောင်းကစားဝိုင်းထောင်တာ၊ ပရဟိတအမည်ခံကာ ပြည်သူ့ငွေတွေကို အလွဲသုံးစားလုပ်တာတွေကိုလည်း စစ်ဆေးတွေ့ရှိရတယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် ပျူစောထီးသင်တန်းဆင်းစာရင်းကိုလည်း ပြုစုထားကာ စစ်ဆေးမှုတွေနဲ့ ပတ်သက်တဲ့ မှတ်တမ်းတွေအပြင် အသံဖိုင်တွေကိုလည်း ပြုစုထားတယ်လို့ ပြည်သူ့ကာကွယ်ရေးတပ်ဖွဲ့(ရေတာရှည်)ရဲ့တာဝန်ရှိသူက ပြောပါတယ်။

ရေတာရှည်ပြည်သူ့ကာကွယ်ရေးအဖွဲ့ဟာ ပြီးခဲ့တဲ့မတ်လ ၂၈ ရက်ကလည်း တောင်ငူခရိုင်၊ ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက စစ်တပ်သတင်းပေးဆိုသူ ကိုမင်းလွင်ဦးကိုလည်း ရှင်းလင်းခဲ့ပါသေးတယ်။

စာတည်း – လင်း

ပဲခူး၊ မတ် ၃၀၊ ၂၀၂၃။

ပဲခူးတိုင်း၊ ပဲခူးမြို့ပေါ်က ရွှေမော်ဓောဘုရားပွဲမှာ အသံဗုံးပေါက်ကွဲပြီးနောက် ဘုရားပွဲလာတဲ့ ပြည်သူတွေကို စစ်ကောင်စီတပ်ဖွဲ့ဝင်တွေက စစ်ဆေးမှုတွေ ပိုမိုပြုလုပ်လာတယ်လို့ မြို့ခံတွေဆီက သိရပါတယ်။

မတ်လ ၂၈ ရက် ညနေ ၅ နာရီလောက်မှာ ရွှေမော်ဓောဘုရားပွဲဝန်းရှိ ကားကြီးကွင်းနားက စျေးဆိုင်တန်းတွေမှာ အသံဗုံးတလုံး ပေါက်ကွဲခဲ့ပြီးနောက် အဲ့ဒီညမှာပဲ ရဲတပ်သားတွေက လုံခြုံရေးချကာ စစ်ဆေးမှုတွေ ပြုလုပ်နေတာလို့ ပဲခူးမြို့ခံတဦးက ပြောပါတယ်။

“စစ်ဆေးရေးက ဘုရားဝန်းကျင် လေးဘက်လေးလံပဲ။ ရဲတွေက ကားနဲ့အပြည့်ပဲ။ ဝန်းထဲကို လွယ်လွယ်ဝင်လို့ မရတော့ဘူး။ အသံဗုံးပေါက်တဲ့နေ့မှာပဲ လမ်းတွေ ပိတ်ချလိုက်တယ်။ အဝင်လည်း စစ်တယ်။ အထွက်လည်း စစ်တယ်။ ဆိုင်ကယ်လိုင်စင်၊ ဖုန်းနဲ့ ခန္ဓာကိုယ် ကိုင်ပြီးလည်း စစ်တယ်” လို့ ဆိုပါတယ်။

ရွှေမော်ဓောဘုရားပွဲမှာ အခုလို စစ်ဆေးတာဟာ ပထမအကြိမ်ဖြစ်ပြီး၊ စွံပလွန်ကန်လမ်းအဝင်၊ ပဲခူး Tennis ကွင်းရှေ့၊ ဘုရားစျေးထိပ်၊ ကမ္ဘာလုံးဘုန်းကြီးကျောင်းဘေး လမ်းထိပ်နဲ့ ပုပ္ပါရုံကျောင်း‌မြောက်ဘက်မုဘ် စတဲ့နေရာတွေမှာ စစ်ဆေးနေတာလို့ အထက်ပါမြို့ခံက ပြောပါတယ်။

“အရင်ညတွေက ရဲ** တွေက အရပ်ဝတ်တွေနဲ့ ပွဲခင်းထဲမှာ စောင့်တယ်။ အသံဗုံးပေါက်တဲ့နေ့ကစပြီး အဲဒီဘုရားဝန်းကို သံဆူးကြိုးတွေနဲ့ ကာပေးလိုက်တယ်။ တချို့နေရာမှာဆိုရင် လူတယောက်စာပဲ ဖွင့်ထားတယ်။ အကုန်သံဆူးကြိုးတွေနဲ့ ကာလိုက်တယ်” လို့ ဆိုပါတယ်။

ဒါ့အပြင် ပြီးခဲ့တဲ့မတ်လ ၂၆ ရက်မှာလည်း ပွဲဝန်းထဲရှိ ပင်လယ်ဓားပြရဟတ်စင် ပြုတ်ကျခဲ့ရာ လူ ၁၀ ဦးထက်မနည်း ဒဏ်ရာရရှိခဲ့ပါသေးတယ်။

အဆိုပါဘုရားပွဲကို ပဲခူးစစ်ကောင်စီအဖွဲ့ဝင်တွေက ဦးဆောင်ကျင်းပနေတာဖြစ်ပြီး၊ မတ်လ ၂၀ ရက်ကနေ ဧပြီလ ၁၈ ရက်အထိ ကျင်းပသွားမှာလို့လည်း သိရပါတယ်။

စာတည်း – လင်း

ပဲခူး၊ မတ် ၃၀၊ ၂၀၂၃။

ပဲခူးတိုင်း၊ ရေတာရှည်မြို့နယ်က စစ်တပ်သတင်းပေးသူ တဦးကို ရှင်းလင်းခဲ့တယ်လို့ People Defence Force – Yedesheက သတင်းထုတ်ပြန်ထားပါတယ်။

ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက အသက် ၂၈ နှစ်အရွယ် ကိုလွင်မင်းဦး ဖြစ်ကာ စစ်ဆေးမေးမြန်းအပြီး မတ်လ ၂၈ ရက်နေ့လယ်က ရှင်းလင်းခဲ့တာလို့ ဆိုပါတယ်။

“မင်းလွင်ဦးကို စစ်ဆေးပေါ်ပေါက်လို့ ရှင်းလင်းခဲ့တာပါ။ သူနဲ့အတူ ဖမ်းဆီးခဲ့တဲ့ ကရင်ချောင်းရွာသား ၂ ဦးကိုတော့ အမှုပေါ်ပေါက်မှု မရှိတာရယ် သတင်းပေးအလုပ် ဆက်မလုပ်တဲ့အပြင် ရွာသားတွေရဲ့အာမခံမှုနဲ့ ခံဝန်ထိုးပြီး ပြန်လွှတ်ပေးခဲ့ပါတယ်” လို့ People Defence Force-Yedeshe အဖွဲ့က ပြောပါတယ်။

ကိုမင်းလွင်ဦးနဲ့အတူ ကရင်ချောင်းရွာသား အခြား၂ ဦးကို သူတို့ရွာရဲ့မြောက်ဘက်အထွက်မှာ မတ်လ ၂၇ ရက်ညနေ ၅ နာရီကျော်လောက်က ဖမ်းဆီးခဲ့တာလို့ ဆိုပါတယ်။

အကြိမ်ကြိမ်သတိပေးမှုတွေရှိခဲ့ပေမယ့် လိုက်နာမှုမရှိတဲ့အပြင် မကွေးတိုင်းအတွင်းက PDF တဖွဲ့ လက်နက်သယ်တာကို သတင်းပေးခဲ့သလို တောင်ငူမြို့နယ် စစ်တောင်းမြစ်တလျောက်က ကျေးအင်းရွာ၊ ထုံးဘိုရွာ၊ ကရင်ချောင်းရွာ၊ ကျွဲရိုင်းပြင်ရွာတွေကို စစ်တပ်က စစ်ကြောင်းထိုးရာမှာ လမ်းပြလုပ်ဆောင်ခဲ့တာတွေကိုလည်း စစ်ဆေးပေါ်ပေါက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ မတ်လ ၅ ရက်မနက်အစောပိုင်းက ရေတာရှည်မြို့နယ် ကျောက်အိုးရွာက PDF ထောက်ပံ့တဲ့မိသားစုကို တရွာတည်းနေ အသက် ၄၆ နှစ်အရွယ် ဦးကြည်နိုင်နဲ့ အသက် ၄၉ နှစ်အရွယ် ဦးမောင်နိုင်တို့ ၂ ဦးက နေအိမ်အတွင်း ဝင်ရောက်ကာ သေနတ်ပစ်ခတ်ခဲ့မှု စစ်ဆေးပေါ်ပေါက်တဲ့အတွက် မတ်လ ၂၄ ရက်က ရှင်းလင်းခဲ့ပါသေးတယ်။

စာတည်း – 007

ပဲခူး၊ မတ် ၂၉၊ ၂၀၂၃။

ပဲခူးတိုင်း၊ တောင်ငူခရိုင်၊ တောင်ငူမြို့မြောက်ဘက် စစ်ကောင်စီတောင်ငူလေတပ်စခန်းဌာနချုပ်(တလခ) ကို KNLA၊ PDF ပူးပေါင်းအဖွဲ့တွေက မတ်လ ၂၅ ရက်နဲ့ ၂၇ ရက်တွေမှာ ရှော့တိုက်ဒုံး ၈ လုံးနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

Rain Of Fire စစ်ဆင်ရေးအဖြစ် မတ်လ ၂၅ ရက်နေ့မှာ ရှော့တိုက်ဒုံး ၄ လုံး၊ ၂၇ ရက်နေ့မှာ ၄ လုံးနဲ့ ၂ ကြိမ် သွားရောက်ပစ်ခတ်တိုက်ခိုက်ခဲ့တာဖြစ်ပြီး တိုက်ခိုက်မှုအတွင်း ရဟတ်ယာဉ် ၁ စီး ထိခိုက်ပျက်စီးသလို စစ်ကောင်စီတပ်သား ၃ ဦး သေဆုံးတယ်လို့ Bago Region PDF တာဝန်ရှိသူက မြေလတ်အသံကို ပြောပါတယ်။

“ပထမရက်မှာ ၄ လုံး သွားပစ်တယ်။ နောက်တရက်မှာ ၄ လုံး သွားထပ်ပစ်တယ်။ တိုက်ခိုက်မှုဖြစ်စဥ်မှာ ထိခိုက်ပျက်စီးသေဆုံးတွေက ထုတ်ပြန်ပေးထားတဲ့အတိုင်းပါပဲ။ အဲဒါကတော့ သေသေချာချာစုံစမ်းပြီး ဖရဲသီးတွေဆီက ရတဲ့အချက်အလက်တွေအရ ထုတ်ပြန်ထားတာဖြစ်ပါတယ်။ နောက်ဆက်တွဲ အခြေအနေတွေကတော့ ထပ်မသိရသေးဘူး” လို့ ပြောပါတယ်။

မတ်လ ၂၅ ရက်တိုက်ခိုက်မှုမှာ ရှော့တိုက်ဒုံး ၂ လုံးဟာ လေတပ်လိုင်းခန်းအနီး တောစပ်နဲ့ လေယာဉ်ပြေးလမ်း အနောက်မြောက်တောင့်ဖြူးကန်ဘေးကို ကျရောက်ပေါက်ကွဲခဲ့ပြီး ထိခိုက်ပျက်စီးမှု အခြေအနေကို မသိရပေမယ့် မတ်လ၂၇ ရက် တိုက်ခိုက်မှုမှာတော့ လေတပ်စခန်းအတွင်းက ဗုံးဂိုထောင်၊ ဆီလှောင်ကန်နဲ့ လေယာဉ်ဂို‌ထောင်တွေအနီးကို ကျရောက်ပေါက်ကွဲခဲ့ပြီး ရဟတ်ယာဥ်နဲ့ စစ်ကောင်စီတပ်ဖွဲ့ဝင်တွေ ထိခိုက်သေဆုံးတာလို့ Bago Region PDF က ဆိုပါတယ်။

လေတပ်စခန်းဌာနချုပ် တိုက်ခိုက်ခံရပြီးနောက် စစ်ကောင်စီတပ်ဖွဲ့တွေဟာ စခန်းနဲ့နီးစပ်တဲ့ကျေးရွာတွေနဲ့အနီးတဝိုက်ကို တောနင်းရှာဖွေတာတွေ လုပ်ဆောင်ခဲ့တယ်လို့လည်း သိရပါတယ်။

ပြီးခဲ့တဲ့ ဖေဖော်ဝါရီလအတွင်းကလည်း မကွေးလေတပ်စခန်းဌာနချုပ်(မလခ)ကို ၁၀၇ မမ ရှော့တိုက်ဒုံး ၃ လုံးနဲ့ ပစ်ခတ်ခံရလို့ လေတပ်ဝန်းအတွင်းနဲ့ စစ်မှုထမ်းဟောင်းအိမ်ရာတွေဘက်ကို ကျရောက်ပေါက်ကွဲခဲ့တယ်လို့ သိရပါတယ်။

စာတည်း – ရင်ငြိမ်း