ပဲခူး

ကျောက်ကြီး၊ မတ် ၂၀၊ ၂၀၂၃။

ပဲခူးတိုင်း၊ ကျောက်ကြီးမြို့နယ်၊ ကျောက်ကြီး-နတ်သံကွင်းလမ်း ညောင်ကုန်းတံတားအနီးမှာ ဒုတိယအကြိမ် ကားတစီးမိုင်းထိပြီး ၃ ဦး သေဆုံးကာ ၂ ဦး ဒဏ်ရာရတယ်လို့ သိရပါတယ်။

မတ်လ ၂၀ ရက် ဒီမနက် ၇ နာရီခန့်မှာ ကျောက်ကြီးမြို့ဘက်နေ ပဲနွယ်ကုန်းရွာဘက်ကို မောင်းနှင်လာတဲ့ လိုက်ထရပ် အမျိုးအစား ”ဝင်းရတနာ” ခရီးသည်ပို့ဆောင်ရေးယာဥ်ဟာ ညောင်ကုန်းတံတား ရှောင်ကွင်းလမ်းကနေ မောင်းနှင်လာချိန် မိုင်းထိခဲ့တာလို့ ဒေသခံတဦးက ပြောပါတယ်။

“ကျောက်ကြီးကနေ ပဲနွယ်ကုန်းသွားမယ့် ကားပါ။ ခရီးသည်တင်ကားပေါ့။ ကားပေါ်မှာ အနောက်ကနေ ၃ ယောက်ပါတယ်။ ကားခေါင်းခန်းမှာ ၂ ယောက်ပါတယ်။ တံတားက အရင်မိုင်းထိပြီး ပျက်စီးသွားတော့ ပြုပြင်နေလို့ ရှောင်ကွင်းလမ်း လုပ်ထားတာ။ အဲ့ကနေသွားချိန် မိုင်းထိတာပါ” လို့ ပြောပါတယ်။

မိုင်းထိတာကြောင့် အသက် ၄၀ နှစ်အရွယ် အမျိုးသမီး ၁ ဦးနဲ့ ၅၀ နှစ်အရွယ် အမျိုးသား ၂ ဦး သေဆုံးခဲ့ပြီး ခရီးသည်အမျိုးသမီး ၁ ဦးနဲ့ ယာဥ်မောင်းအမျိုးသားမှာ ဒဏ်ရာရသွားတယ်လို့ သိရပါတယ်။

သေဆုံးသူနဲ့ ဒဏ်ရာရသူတွေကိုတော့ လက်ရှိမှာ ဒေသတွင်းပရဟိတအသင်းတွေက ကျောက်ကြီးပြည်သူ့ဆေးရုံကို ပို့ဆောင်ပေးထားရတယ်လို့ ဆိုပါတယ်။

ဒီမိုင်းတွေကို ဘယ်အဖွဲ့အစည်းက ထောင်ထားခဲ့လဲဆိုတာကိုတော့ မြေလတ်အသံက သီးခြားအတည်ပြုနိုင်ဖို့ စုံစမ်းနေဆဲဖြစ်ပါတယ်။

ဖေဖော်ဝါရီလ ၃ ရက်ကလည်း ကျောက်ကြီးကနေ ပဲနွယ်ကုန်းကို စျေးရောင်းဖို့ထွက်လာတဲ့ လိုက်ထရပ်အဖြူရောင်ယာဥ်ဟာ ညောင်ကုန်းတံတား ရှောင်ကွင်းလမ်းအရောက်မှာပဲ မိုင်းထိခဲ့လို့ ကလေး ၁ ဦးအပါအဝင် ၄ ဦး ဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပဲခူး၊ မတ် ၂၀၊ ၂၀၂၃။

ပဲခူးမြို့ပေါ်မှာနေထိုင်တဲ့ ပြည်သူတွေဆီကနေ စစ်ကောင်စီခန့် ရာအိမ်မှူးနဲ့ အပေါင်းအပါတွေက သင်္ကြန်မဏ္ဍပ်ဆောက်လုပ်ဖို့အတွက် မတ်လ ၁၈ ရက်နေ့မှာ ငွေကြေးတွေ စတင်ကောက်ခံနေတယ်လို့ မြို့ခံတွေဆီက သိရပါတယ်။

သင်္ကြန်မှာ ကပြဖျော်ဖြေမယ့် ယိမ်းအဖွဲ့တွေကို ကျွေးမွေးဧည့်ခံဖို့အတွက် ရပ်ကွက်ကြီး ၁၅ ခုထက်မနည်းရှိတဲ့ ပဲခူးမြို့ပေါ်က နေအိမ်တွေကနေ တအိမ် ၁၀၀၀ ကျပ် မထည့်မနေရဆိုပြီး ရာအိမ်မှူးနဲ့နောက်လိုက် ၂ ယောက်က လိုက်လံကောက်ခံနေတယ်လို့ ပဲခူးမြို့ခံတဦးက ပြောပါတယ်။

“အမေစုခေတ်တုန်းကတော့ စေတနာရှိသလောက်ပဲ ထည့်ရတယ်။ မထည့်လည်း ရတယ်။ အခုက မရဘူး။ အိမ်တိုင်း ထည့်ရတယ်။ သင်္ကြန်မှာ စည်ကားဖို့အတွက်နဲ့ စတုဒီတာကျွေးဖို့ဆိုပြီး လာကောက်တယ်။ နှစ်နှစ်ရှိပြီ အခုလိုကောက်တာ။ ပြီးရင် မဏ္ဍပ်တွေမှာ သူတို့လူတွေကြီးပဲ ရှိတယ်” လို့ ဆိုပါတယ်။

ဒီနှစ်သင်္ကြန်မှာ ဌာနဆိုင်ရာဝန်ထမ်းသားသမီးတွေက ယိမ်းအဖွဲ့ဖွဲ့ပြီး သင်္ကြန်ယိမ်းအကတွေကို ဗဟိုမဏ္ဍပ်မှာ ကပြရမှာဖြစ်သလို Non CDM ဝန်ထမ်းတွေကလည်း မဏ္ဍပ်တွေဆီကို မဖြစ်မနေ လာရမယ်လို့လည်း မြို့ခံက ဆက်ပြောပါတယ်။

“ဗဟိုမဏ္ဍပ်ကို ပဲခူးပြည်သူ့ဆေးရုံရှေ့မှာ ဆောက်တယ်။ ပဲခူးလုပ်ငန်းရှင်တွေကို စပွန်ဆာပေးခိုင်းတယ်။ စစ်တပ်တွေရဲ့ သားသမီးတွေအကုန် သင်္ကြန်အကတွေ ကရတယ်။ နောက်ပြီး ဒီနှစ်က Non CDM တွေလည်း အကုန်ပါဝင်ရတယ်။ ဒီနှစ်သင်္ကြန်ကို လမ်းလျှောက်သင်္ကြန်ပဲ လုပ်မယ်လို့လည်း ကြားနေရတယ်” လို့ ဆိုပါတယ်။

ပြီးခဲ့တဲ့ ၂၀၂၂ ခုနှစ် သင်္ကြန်အတက်နေ့တုန်းကလည်း ပဲခူးမြို့ဗဟိုမဏ္ဍပ်မှာ အသံဗုံး ၂ လုံး ပေါက်ကွဲခဲ့ပြီး ထိခိုက်ဒဏ်ရာရရှိသူ မရှိခဲ့ဘူးလို့ သိရပါတယ်။

စာတည်း – 007

ပေါင်းတည်၊ မတ် ၂၀၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့နယ် သမဝါယမဦးစီးဌာနက ဒေသခံတွေကို ထုတ်ချေထားတဲ့ သမချေးငွေကို စစ်တပ်ခေါ်ပြီး ခြိမ်းခြောက်တောင်းခံနေတယ်လို့ သိရပါတယ်။

မတ်လ ၁၇ ရက်ကစတင်လို့ စစ်ကောင်စီလက်အောက် မြို့နယ်သမဝါယမဦးစီးဌာန ဦးစီးအရာရှိ ဒေါ်အေးအေးခိုင် ဦးဆောင်ပြီး စစ်ကောင်စီတပ်ဖွဲ့ဝင်တွေနဲ့အတူ ကျေးရွာတွေအထိ ချေးငွေပေးဆပ်ဖို့ တအိမ်တက်ဆင်း လိုက်လံတောင်းခံနေတာဖြစ်ပြီး မပေးရင် ဖမ်းဆီးအရေးယူမယ်ဆိုကာ ခြိမ်းခြောက်တောင်းခံနေတာလို့ သိရပါတယ်။

“ကျနော်တို့ဆီကိုလာပြီး သမက ကြွေးဆပ်ဖို့ လာပြောတယ်။ မဆပ်နိုင်ရင် ဖမ်းချုပ်မယ်။ ငွေကြေမှ ပြန်လွှတ်ပေးမယ်ဆိုပြီး ခြိမ်းခြောက်သွားတာ။ တချို့လည်း ကြောက်လန့်ပြီး ရှာကြံပေးလိုက်တာမျိုးတော့ ရှိတယ်။ ခုအချိန်က အလုပ်အကိုင်ကအစ မကောင်းတော့ စားဖို့တောင် အနိုင်နိုင်ဖြစ်နေတာ” လို့ သမအသင်းသားတဦးက မြေလတ်အသံကို ပြောပါတယ်။

သမချေးငွေတွေ လိုက်လံတောင်းခံရာမှာ စစ်ကောင်စီသမဝန်ထမ်းတွေနဲ့ စစ်ကောင်စီတပ်သားတွေက ရက်ချိန်းကြိုတင်ပြောဆိုတာမျိုးမရှိဘဲ နာရီပိုင်းသာကြိုပြီး အသိပေးတယ်လို့ ဒေသခံတဦးက ပြောပါတယ်။

“သမကလူတွေက သူတို့လာတဲ့လမ်းမှာ ချောင်းပြီးအလုပ်ခံရမှာစိုးလို့ ထင်တယ်။ စစ်တပ်ပါတာတောင် ကြွေးတောင်းလာမယ့်နေ့နဲ့ အချိန်ကိုလည်း ကြိုမပြောဘူး။ နာရီပိုင်းအလိုကျမှ ရွာသားက သိရတာ။ ကြိုမပြောတော့ ရှာရဖွေရ ပိုခက်ခဲတယ်” လို့ ပြောပါတယ်။

ပေါင်းတည်မြို့နယ် သမဝါယမဦးစီးအရာရှိ ဒေါ်အေးအေးခိုင်ဟာ စစ်တပ်အာဏာသိမ်းတာကို ထောက်ခံခဲ့သူဖြစ်ပြီး သူ့ရဲ့အမျိုးသားဖြစ်သူဟာလည်း ဒေသကာကွယ်ရေးတပ်ဖွဲ့ဝင်တွေကို ဆဲဆိုနေသူဖြစ်ကာ လက်ရှိမှာ စစ်ကောင်စီလက်အောက် ပေါင်းတည်မြို့နယ် ရွေးကောက်ပွဲကော်မရှင်မှာ ဝင်ရောက်လုပ်ကိုင်နေသူဖြစ်တယ်လို့ ဒေသခံတွေက ပြောပါတယ်။

ပေါင်းတည်မြို့နယ်အတွင်းက သမချေးငွေပေးဆပ်ရန် ကျန်ဒေသခံ အသင်းဝင်တွေဟာ ယခင်အရပ်သားအစိုးရလက်ထက်က သမချေးငွေတွေ ရယူထားတာဖြစ်ပြီး အများစုဟာပေးဆပ်ရန် ကျန်ချေးငွေ အနည်းဆုံး ၅ သောင်းကနေ အများဆုံး ၂ သိန်းကျပ်အထိ ရှိကြတယ်လို့ သိရပါတယ်။

စာတည်း – ရင်ငြိမ်း

တောင်ငူ၊ မတ် ၁၈၊ ၂၀၂၃။

ပဲခူးတိုင်းအရှေ့ခြမ်း၊ တောင်ငူခရိုင်၊ သံတောင်မြို့၊ တပ်မတော်(ကြည်း) တိုက်ခိုက်ရေးကျောင်း(ဘုရင့်နောင်)ကို မတ်လ ၁၇ ရက် တရက်တည်း လက်နက်ကြီးနဲ့ ၂ကြိမ် ပစ်ခတ်တိုက်ခိုက်ခဲ့တယ်လို့ တိုက်ခိုက်မှုမှာပါဝင်သူတဦးက မြေလတ်အသံကို ပြောပါတယ်။

မနေ့က မနက် ၈ နာရီနဲ့ ညနေ ၅ နာရီတို့မှာ တကြိမ်ကို ၂လုံးစီ တိုက်ခိုက်ခဲ့ပြီး တိုက်ခိုက်မှုကို KNLA တပ်မဟာ ၂၊ တပ်ရင်း ၅ နဲ့ PDF တို့က ပူးပေါင်းဆောင်ရွက်ခဲ့တယ်လို့ ဆိုပါတယ်။

“ပထမအကြိမ်ကတော့ သူတို့ဆီကို မကျဘူး။ ညနေပိုင်းပစ်တဲ့ ၂ချက်လုံး သူတို့ဆီကို ကျတယ်။ ထိခိုက်မှုရှိ မရှိကတော့ စုံစမ်းရခက်လို့ မသိရသေးဘူး” လို့ မြေလတ်အသံကို ပြောပါတယ်။

စစ်ကောင်စီဘက်ကလည်း ၁၂၀ မမ စိန်ပြောင်းနဲ့ တနေကုန်ပြန်ပစ်ခတ်ခဲ့ပြီး ပူးပေါင်းတပ်ဖွဲ့တွေ ထိခိုက်မှုမရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

စစ်ကောင်စီရဲ့ တပ်မတော်(ကြည်း) တိုက်ခိုက်ရေးကျောင်း(ဘုရင့်နောင်)ဟာ စစ်ကောင်စီ အရာရှိငယ်များအတွက် တပ်စုမှူး၊ တပ်ခွဲမှူး၊ တပ်ရင်းမှူး သင်တန်းတွေ ဖွင့်လှစ်ရာ သင်တန်းကျောင်းတစ်ခုဖြစ်ပြီး ရှမ်းပြည်နယ်တောင်ပိုင်း ဗထူးမြို့မှာလည်း အလားတူသင်တန်းကျောင်းတစ်ခုရှိပါတယ်။

ပြည်၊ မတ် ၁၈၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်အကျဉ်းထောင်တွင်း အထူးတရားရုံးကနေပြီး အကြမ်းဖက်မှု တိုက်ဖျက်ရေးဥပဒေတွေနဲ့ ဖမ်းဆီးတရားစွဲထားသူ ၆ ဦးကို ထောင်တသက်နဲ့ ထပ်တိုးနှစ်တွေအပါ တပေါင်းတည်းကျခံစေဖို့ အမိန့်ချလိုက်တယ်လို့ အကျဉ်းထောင်နဲ့ နီးစပ်သူများထံက သိရပါတယ်။

ပြီးခဲ့တဲ့ မတ်လ ၁၅ ရက်နေ့က အမိန့်ချမှတ်လိုက်တာဖြစ်ပြီး ကိုဇင်မျိုးဟိန်း(ခ)ဇေကြီး နဲ့ ကိုအောင်သက်ပိုင် တို့နှစ်ဦးကို အကြမ်းဖက်မှု တိုက်ဖျက်ရေးဥပဒေ ပုဒ်မ-၅၀(ဈ)၊ ၅၂(က) တို့ဖြင့် ထောင်တသက်နှင့်အပို ၇ နှစ်၊ ကိုတရုတ်ကြီး(ခ) သီရိဇော် နဲ့ ကိုရန်နောင်စိုး၊ ကိုကျော်ကိုကို တို့ကို ပုဒ်မ ၅၀(ဈ) နဲ့ ထောင်တသက်၊ ကိုထွန်းထွန်းလွင်ကို ပုဒ်မ ၅၂(က)နဲ့ ထောင် ၇ နှစ် အသီးသီး အမိန့်ချမှတ်ခဲ့တာလို့ သိရပါတယ်။

“သူတို့က ပေါက်ခေါင်းမြို့မှာ ဖမ်းဆီးခံရတာ။ ဖေါက်ခွဲမှုတခုမှာ လုပ်တဲ့သူကို မမိလို့ သူတို့ကို ဖမ်းတာလို့ သိရပါတယ်။ ပြီးခဲ့တဲ့ ဖေဖော်ဝါရီလ က ဖမ်းဆီးခံရတာပါ။ ကျောင်းဆရာတယောက် ပါတယ်လို့ ပြောတယ်။” လို့ မြို့ခံတဦးက ပြောပါတယ်။

အကြမ်းဖက်မှု တိုက်ဖျက်ရေးဥပဒေ ပုဒ်မ ၅၀(ဈ) မှာ အများပြည်သူပိုင် အဆောက်အဦးကို ဗုံးခွဲတိုက်ခိုက်တာ၊ အားပေးကူညီတာ၊ ကြံရာပါအဖြစ် ဆောင်ရွက်တာတွေကို စွဲဆိုတဲ့ပုဒ်မ ဖြစ်ပြီး အနည်ဆုံးထောင်ဒဏ် (၁၀) နှစ်မှ ထောင်တသက်အထိ အမိန့်ချမှတ်နိုင်တယ်လို့ ရှေ့နေတဦးက ပြောပါတယ်။

အလားတူ ပုဒ်မ ၅၂(က) မှာ အကြမ်းဖက်မှုအုပ်စုဖွဲ့စည်းရန် အကြမ်းဖက်အဖွဲ့အစည်းတခုခုသိလျှက်နဲ့ တာဝန်ပေး၍ လှုပ်ရှားစေရန် ဆောင်ရွက်မှုတွေ၊ အကြမ်းဖက်သူတွေလွတ်မြောက်ရန် သတင်းထိန်ချန်တာ၊ ဖွက်ထားတာ၊ အဆောက်အအုံသုံးပြုခွင့်ပေးတာ၊ ထောက်ပံ့ပြုလုပ်တာတွေကို စွဲဆိုတာဖြစ်ပြီး ထောင်ဒဏ်အနည်းဆုံး ၃ နှစ်မှ ၇ နှစ်ထိ ချမှတ်နိုင်တယ်လို့ ဆိုပါတယ်။

“သူတို့က အခုပုဒ်မ နှစ်ခုလုံး အမိန့်ချတာကိုကြည့်ရင် အမြင့်ဆုံးပြစ်ဒဏ်တွေကို အမိန့်ချတာပါ။ အခုကလည်း ပြဌာန်းချက်မှာပါတာကို ပြောတာပဲဖြစ်တယ်။ သူတို့က ဥပဒေကို တလွဲသုံးတာပေါ့။ ဖမ်းဆီးအမိန့်ချခံရသူတွေကို အကြမ်းဖက်သမားလို့ ပြောချင်တာမဟုတ်ပါဘူး” လို့ ရှေ့နေတဦးက ပြောပါတယ်။

အထူးတရားရုံးတွေအနေနဲ့ နောက်ပိုင်းကာလတွေမှာ မည်သည့် ပုဒ်မတွေကိုမဆို အမြင့်ဆုံးပြစ်ဒဏ်တွေကိုသာ ချမှတ်လေ့ရှိပြီး တရားစီရင်ရေးစနစ်ကို ကြိုးကိုင်ကာ ပြည်သူလူထုကို အကြောက်တရား ထည့်ပေးနေသည့်သဘောမျိုးဖြစ်သလို သက်ညှာပေးမှာမဟုတ်ဘူး ဆိုတဲ့ စစ်ကောင်စီရဲ့ သဘောထားကိုလည်း ထုတ်ပြရာရောက်နေတယ်လို့ သူကဆက်လက်ပြောပါတယ်။

လက်ရှိမှာလည်း အကျဉ်းထောင်တွေထဲက တချို့အကျဉ်းသားတွေဟာ ထောင်ဝင်စာတွေ့ခွင့်မရတာမျိုး ရှိနေပြီး အဆက်သွယ်မရသူတွေလည်းရှိနေလို့ ထောင်တွင်းခက်ခဲမှုတွေနဲ့ ရင်ဆိုင်နေရတယ်လို့ နိုင်ငံရေးအကျဉ်းသားဟောင်းတဦးက ပြောပါတယ်။

ဝေါ၊ မတ် ၁၈၊ ၂၀၂၃။

ပဲခူးတိုင်း၊ ပဲခူးခရိုင်၊ ဝေါမြို့နယ်အတွင်းက ကျေးရွာတွေမှာ မတ်လ ဒုတိယအပတ်က စတင်ပြီး စစ်ကောင်စီတပ်နဲ့ ပျူစောထီးအဖွဲ့တွေက ဒေသခံတွေကို ဖိအားပေးကင်းစောင့်ခိုင်းနေတယ်လို့ သိရပါတယ်။

ဝေါမြို့နယ်အတွင်း စစ်တောင်းမြစ်ကမ်းတလျှောက်ဒေသတွေကို KNLA နဲ့ PDFတွေ ဝင်လာရောက်လာမယ်လို့ ဒေသတွင်း သတင်းတွေထွက်ပေါ်နေပြီး အဲ့ဒီသတင်းတွေကြောင့် စစ်ကောင်စီတပ်က ကျေးရွာတွေကို ကာကွယ်ရမယ်လို့ဆိုကာ ဒေသခံတွေကို အတင်းအကျပ်ဖိအားပေး ကင်းစောင့်ခိုင်းနေတာလို့ ဝေါပကဖတာဝန်ရှိသူက မြေလတ်အသံကို ပြောပါတယ်။

“အဓိက ရွာကြီးတွေမှာ စောင့်ခိုင်းတယ်။ ပျူတွေနဲ့တွဲပြီး ကင်းစောင့်ခိုင်းတာ။ အိမ်တိုင်းမစောင့်မနေရဘဲ။ ကိုယ့်အလှည့်ကျလို့ မစောင့်နိုင်ရင် ပိုက်ဆံပေးရတယ်။ ကင်းကြေးသဘောမျိုး ပိုက်ဆံ ၁ သောင်း တောင်းတယ်။ ရွာဝင်ရွာထွက်နေရာတွေမှာ စောင့်ရတယ်” လို့ ပြောပါတယ်။

စစ်ကောင်စီတပ်က ဖိအားပေး ကင်းစောင့်စေခိုင်းမှုတွေကို ဝေါမြို့ပေါ်ရပ်ကွက်တွေ အပါအဝင် ညောင်ကိုင်း၊ ကတွတ်၊ မြစ်ကျိုး၊ ရှမ်းကိုင်း၊ ဘုရားပျို၊ သူရဲသမိန်၊ လက်ပံစတဲ့ ကျေးရွာကြီးတွေမှာ အဓိကထား လုပ်ဆောင်ခိုင်းနေတာလို့ သိရပါတယ်။

ကျေးရွာဒေသခံတွေဟာ စစ်ကောင်စီတပ် လက်နက်တပ်ဆင်ပေးထားတဲ့ စစ်ကောင်စီခန့်အုပ်ချုပ်ရေးမှူး၊ စစ်တပ်ပြည်သူ့စစ်ခေါ် ပျူစောထီးအဖွဲ့နဲ့အတူ ပူးတွဲကင်းစောင့်နေရတာဖြစ်ပြီး ရွာသားတွေကိုတော့ လက်နက်တပ်ဆင်ပေးထားတာမျိုး မရှိဘူးလို့ ဆိုပါတယ်။

စစ်ကောင်စီတပ်ရဲ့ဖိအားပေးမှုကြောင့် ကင်းစောင့်နေရတဲ့ ဒေသခံရွာသားတွေကို စစ်ကောင်စီတပ်၊ ရဲနဲ့ ပျူခေါင်းဆောင်တွေက ညပိုင်းတွေမှာ ကင်းစစ်ဆေးတာတွေ လုပ်ဆောင်နေတယ်လို့ ဒေသခံတွေဆီက သိရပါတယ်။

ဝေါမြို့နယ်ဟာ KNU တပ်မဟာ ၁၊ တပ်မဟာ ၃ နယ်မြေတွေနဲ့ နယ်မြေထိစပ်နေတာ ဖြစ်ကာ အဲ့ဒီ တပ်မဟာနယ်မြေတွေထဲမှာလည်း KNLA ၊ PDF ပူးပေါင်းတပ်ဖွဲ့တွေနဲ့ စစ်ကောင်စီတပ်ဖွဲ့တွေအကြား တိုက်ပွဲတွေ ဖြစ်ပွားနေသလို စစ်ကောင်စီယာဉ်တန်းတွေ မကြာခဏတိုက်ခိုက်ခံနေရတယ်လို့ သိရပါတယ်။

မိုးညို၊ မတ် ၁၈၊ ၂၀၂၃။

ပဲခူးတိုင်း(အနောက်ခြမ်း)၊ မိုးညိုမြို့နယ်က လောင်းကစားဝိုင်းကို မတ်လ ၁၇ ရက်မနေ့ မနက်အစောပိုင်းက ဗုံးခွဲတိုက်ခိုက်ခဲ့လို့ ထိခိုက်မှုတွေရှိတယ်လို့ မိုးညိုပြည်သူ့ကာကွယ်ရေးတပ်ဖွဲ့က သတင်းထုတ်ပြန်ထားပါတယ်။

မိုးညိုမြို့နယ်၊ ရေကင်းနယ်မြေရဲစခန်းအနောက်ဘက် ၄ ဖာလုံလောက်မှာ ပြုလုပ်နေတဲ့လောင်းကစားဝိုင်းကို မနေ့မနက်အစောပိုင်း ၁ နာရီလောက်မှာ လက်ပစ်ဗုံး ၂ လုံးနဲ့ပစ်ခတ်ခဲ့လို့ အနည်းဆုံး ၈ ဦး ဒဏ်ရာရရှိသွားတယ်လို့ ဆိုပါတယ်။

“မိုးညိုနယ်တလွှားမှာက လောင်းကစားဝိုင်းလုပ်နေတာက ကြာပြီ။ အနည်းဆုံး ၆ လလောက်ရှိမယ်။ ဗုံးခွဲသတိပေးလည်း ဆက်လုပ်တယ်။ စာထုတ်လည်း ဆက်လုပ်နေတယ်။ ပြည်သူရဲ့အကျိုးစီးပွားကို ထိခိုက်လာလို့ တိုက်ခိုက်ရတာဖြစ်တယ်” လို့ မိုးညိုပြည်သူ့ကာကွယ်ရေးတပ်ဖွဲ့က သတင်းထုတ်ပြန်ထားပါတယ်။

အဓိကက စစ်ကောင်စီက လူထုကိုအကျင့်စာရိတ္တ ပျက်ပြားအောင်လုပ်ရင် သူတို့အုပ်ချုပ်လို့ရတယ်ဆိုတာကို သူတို့သိထားပြီး အဲဒါကို ဗျူဟာတခုလို လုပ်နေတာဖြစ်တယ်လို့ သူကဆက်ပြောပါတယ်။

ထိခိုက်ဒဏ်ရာရရှိသူတွေနဲ့ ပတ်သက်ပြီး မြေလတ်အသံက သီးခြားအတည်ပြုချက် မရရှိပေမယ့် ဒေသခံတဦးကတော့ သေဆုံးသူ ၃ ဦးအထိရှိတယ်လို့ ဆိုပါတယ်။

အဲဒီလောင်းကစားဝိုင်းကို စစ်ကောင်စီခန့် ရေကင်းရွာအုပ်ချုပ်ရေးမှူး ကိုမင်းဇော်နဲ့ မိုးညိုမြို့နယ် ကြံ့ခိုင်ရေးမြို့နယ် အလုပ်အမှုဆောင် ကိုခင်မောင်ဝင်းတို့က စစ်ကောင်စီကို လိုင်းကြေးပေးကာ ပြုလုပ်နေတာလို့ ထုတ်ပြန်ချက်မှာ ဖော်ပြထားပါတယ်။

မိုးညိုမြို့နယ်မှာ စစ်ကောင်စီက လောင်းကစားသမားတွေဆီက လိုင်းကြေးယူကာ ပြုလုပ်နေလို့ မိုးညိုမြို့နယ် ပြည်သူ့ကာကွယ်ရေးတပ်ဖွဲ့က လောင်းကစားဝိုင်းတွေမလုပ်ဖို့ ပြီးခဲ့တဲ့နှစ်ဒီဇင်ဘာလ ၁၆ ရက်က ကြိုတင်သတိပေးစာ ထုတ်ပြန်ခဲ့ပါသေးတယ်။

ပြီးခဲ့တဲ့မတ်လ ၁၄ ရက်ညကတော့ ပဲခူးတိုင်းအနောက်ခြမ်းက မြို့နယ်တခုဖြစ်တဲ့ ပေါင်းတည်မြို့က စစ်တပ်သတင်းပေးလည်းဖြစ် လောင်းကစားဝိုင်းတွေ ဦးဆောင်လုပ်နေသူ ၁ ဦးကိုတော့ သူနေထိုင်တဲ့ လက်ပံပါးပျဥ်းရွာထိပ်မှာ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း ၃၆၀၁ တပ်ခွဲ ၅ နွေဦးတပ်ဖွဲ့က သုတ်သင်ရှင်းလင်းခဲ့ပါသေးတယ်။

ပေါင်းတည်၊ မတ် ၁၇၊ ၂၀၂၃။

ပဲခူးတိုင်း(အနောက်ခြမ်း)၊ ပြည်ခရိုင်၊ ပေါင်းတည်မြို့နယ်က စစ်တပ်သတင်းပေးလို့ သတင်းထွက်ပေါ်နေသူ သေနတ်နဲ့ပစ်သတ်ခံရတာနဲ့ပတ်သက်ပြီး NLD ရပ်/ကျေးဥက္ကဌအပါ ရွာသား ၅ ဦး ဖမ်းဆီးခံထားရတယ်လို့ သိရပါတယ်။

ကြို့ပင်သာအုပ်စု၊ လက်ပံပါးပျဥ်းရွာက စစ်တပ်သတင်းပေးဆိုသူ ကိုမောင်ဝင်း အသတ်ခံရတာနဲ့ပတ်သက်ပြီး ကြို့ပင်ကောက်အုပ်စု ရပ်/ကျေးNLD ဥက္ကဌအပါ ကျွဲတဲရွာက အသက် ၅၀ ဝန်းကျင်လောက်တွေရှိတဲ့ အမျိုးသား ၄ ဦးနဲ့ ဖားယားကြီးကျေးရွာက အမျိုးသား ၁ ဦးတို့ မတ်လ ၁၅ ရက်နဲ့ ၁၆ ရက်နေ့တွေက ဖမ်းဆီးခဲ့တာလို့ ဆိုပါတယ်။

“အသတ်ခံရတဲ့ ကိုမောင်ဝင်းနဲ့ လောင်းကစားဝိုင်းမှာ ဒိုင်အတူလုပ်တဲ့ ၂ ယောက်နဲ့ ကျန်တဲ့မဆိုင်တဲ့လူ ၃ ယောက်ကို ဖမ်းသွားတာ။ အဲ့ရွာမှာ အခုထိ လောင်းကစားဝိုင်းတွေ ရှိနေတုန်းပဲ” လို့ ပေါင်းတည်ရဲတပ်ဖွဲ့နဲ့ နီးစပ်သူ ဒေသခံတဦးက မြေလတ်အသံကို ပြောပါတယ်။

ဖမ်းဆီးခံရသူတွေဟာ ကြို့ပင်သာအုပ်စု ရပ်/ကျေး NLD ဥက္ကဌ ကိုဇော်နိုင် ကြို့ပင်သာအုပ်စု၊ ကျွဲတဲရွာက ကိုဝင်းအောင်၊ ကိုအေးကို၊ မောင်ရင်ထွေးနဲ့ ဖားယားကြီးရွာက ကိုအောင်ဇော်ဦးတို့ ဖြစ်တယ်လို့ သိရပါတယ်။

လက်ရှိအချိန်အထိ စစ်ကောင်စီတပ်က ဖမ်းဆီးသွားသူတွေနဲ့ အဆက်အသွယ်ပြတ်နေပြီး ဘယ်နေရာမှာ ဖမ်းဆီးစစ်ဆေးနေတယ်ဆိုတာကို မသိရသေးဘူးလို့ ဆိုပါတယ်။

စစ်တပ်သတင်းပေးဆိုသူ ကိုမောင်ဝင်းဟာ မတ်လ ၁၄ ရက်ညပိုင်းက ကျွဲတဲရွာ လောင်းကစားဝိုင်းကနေ လောင်းကြေးငွေရှင်းပြီး ပြန်လာချိန် လက်ပံပါးပျဥ်းရွာ အနောက်ဘက် သင်္ချိုင်းကုန်းအနီးမှာ ပစ်သတ်ခံခဲ့ရတာဖြစ်ပြီး အဲ့ဒီလုပ်ဆောင်မှုနဲ့ပတ်သက်လို့ ပေါင်းတည် PDF ၃၆၀၁ တပ်ရင်း – တပ်ခွဲ ၅ နွေဦးအဖွဲ့က လုပ်ဆောင်ခဲ့တာ ဖြစ်တယ်လို့ သတင်းထုတ်ပြန်ခဲ့ပါတယ်။

ပေါင်းတည်မြို့နယ်ဟာ စစ်ကောင်စီတပ်ဖွဲ့ဝင်တွေနဲ့ စစ်တပ်ထောက်တိုင် အုပ်ချုပ်ရေးအဖွဲ့ဝင်တွေ မကြာခဏဆိုသလို ပစ်ခတ်တိုက်ခိုက်ခံနေရလို့ စစ်အုပ်ချုပ်ရေး ကြေညာထားတဲ့ မြို့တခုဖြစ်တယ်လို့ သိရပါတယ် ။

စာတည်း – ရင်ငြိမ်း