ပဲခူး

ပုလဲ၊ မတ် ၁၆၊ ၂၀၂၃။

ပဲခူးမြို့၊ ရွှေမော်ဓောဘုရားပွဲကို လာမယ့်မတ်လ ၂၀ ရက်နေ့ကနေ စတင်ပြီး စစ်ကောင်စီကကျင်းပပြုလုပ်မှာဖြစ်ကာ အဲ့ဒီဘုရားပွဲကို ပြည်သူတွေ အသိဥာဏ်နဲ့ယှဥ်ပြီး သွားလာကြဖို့ ပဲခူး ပကဖ က အသိပေးပြောဆိုလိုက်ပါတယ်။

စစ်ကောင်စီအနေနဲ့ ပဲခူးတိုင်းအတွင်း အေးချမ်းသာယာပြီးထိန်းချုပ်ထားနိုင်တဲ့ အခြေနေရှိပြီဆိုတာ ပြသချင်တာဖြစ်လို့ ဘုရားပွဲအပါအဝင် ပျော်ပွဲရွှင်ပွဲတွေကို ကျင်းပပြုလုပ်ဖို့ စီစဥ်နေတာဖြစ်တယ်လို့ ပဲခူးမြို့ နယ်ပကဖတာဝန်ရှိသူက ပြောပါတယ်။

“ပဲခူးတိုင်း စကစဝန်ကြီးချုပ်က သူ ပဲခူးကို ထိန်းချုပ်ထားနိုင်ပြီဆိုပြီး ပြသချင်တာဖြစ်တယ်။ ခုလည်း ရွှေမော်ဓောဘုရားပွဲလုပ်ဖို့ စီစဥ်နေတယ်။ ပြည်သူတွေထဲမှာ ပဲခူးဘုရားပွဲဆိုတာနဲ့ သွားကြမယ်ဆိုပြီး မြင်နေတယ်။ သွားမယ့်သူတွေကိုလည်း အပြစ်မတင်ဘူး။ ဒီကာလမှာ ကိုယ်စိတ်မွန်းကြပ်နေတာဖြစ်လို့ ခဏတာထွက်ပေါက်ရဖို့ အပျော်အပါးဆို သွားလာကြမှာပဲ။ ဒါပေမယ့် ခုအချိန်မှာ တိုင်းပြည်ဒုက္ခရောက်နေချိန် ပွဲလမ်းသဘင်လုပ်ရမယ့်အချိန်၊ သွားလာရမယ့်အချိန် မဟုတ်ဘူး” လို့ ပြောပါတယ်။

ပဲခူးပြည်သူ့ကာကွယ်ရေးအဖွဲ့တွေအနေနဲ့ အများပြည်သူ သွားလာနေတဲ့နေရာတွေကို ပစ်မှတ်ထား တိုက်ခိုက်မှာမဟုတ်ဘဲ စစ်ကောင်စီထောက်တိုင်တွေနဲ့ စစ်ကောင်စီနေရာတွေကိုသာ တိုက်ခိုက်သွားမှာဖြစ်တယ်လို့ ဆိုပါတယ်။

“ပြည်သူတွေအနေနဲ့က သွားလာမယ်ဆိုရင် ခုအချိန်ဟာ တိုင်းပြည်က ငြိမ်းချမ်းနေရဲ့လား။ အပျော်တွေနဲ့ သွားနေလို့ သင့်တော်ရဲ့လား။ နိုင်ငံရဲ့ပြုပြင်ပြောင်းလဲရေးကို ခုလိုလုပ်နေလို့ ပြောင်းလဲနိုင်ရဲ့လား။ ခုဘုရားပွဲကိုတော့ ကျနော်တို့ဘက်က ထိခိုက်အောင်မလုပ်ဘူး။ တစ်ခုပဲ ကျနော်အမြင်အရပြောမယ်ဆိုရင် ပဲခူးကပြည်သူတွေက အညာကပြည်သူတွေကို အားနာပါလို့ ပြောချင်တယ်” လို့ သူက ဆက်ပြောပါတယ်။

စစ်ကောင်စီက ပဲခူးရွှေမော်ဓောဘုရားပွဲကို လာမယ့် မတ်လ ၂၀ ရက်နေ့ကနေ ဧပြီလ ၁၈ ရက်နေ့ထိ ရက် ၃၀ ကျင်းပသွားမယ်လို့ ကြော်ငြာထားပြီး ဘုရားပွဲအတွင်း ပွဲလမ်းဇာတ်သဘင်တွေကို မတ်လ ၃၀ ရက်နေ့ကနေ ဧပြီလ ၈ ရက်နေ့အထိ ၁၀ ရက် ထည့်သွင်းကျင်းပပြုလုပ်မယ်လို့ ဆိုပါတယ်။

စာတည်း – ရင်ငြိမ်း

သာယာဝတီ၊ မတ် ၁၆၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင် မင်းလှမြို့နယ် လတ်ဆတ်ကျေးရွာအုပ်စု စိန်ကန့်လန့်ရွာအခြေစိုက် ခလရ ၁ က စစ်ကောင်စီတပ်သားက စစ်ကောင်စီတပ်ကနေ အငြိမ်း စားယူထားတဲ့ ဗိုလ်ကြီးရဲ့သမီးဖြစ်သူကို အကြိမ်ကြိမ် အဓမ္မပြုကျင့်ခဲ့တယ်လို့ တပ်တွင်းသတင်းရင်းမြစ်တွေနဲ့ ဒေသခံတွေဆီက သိရပါတယ်။

အဓမ္မပြုကျင့်ခံရသူဟာ မင်းလှမြို့နယ်၊ စိန်ကန့်လန့်ရွာ၊ ရေစက်တန်းလမ်းနေ အသက် ၂၁ နှစ်အရွယ် စိတ်ကျန်းမာရေးချို့တဲ့သူ မအဉ္ဇလီမျိုးမြင့် ဖြစ်ပြီး ၎င်းကို ခလရ ၁ တပ်ရင်း အမှတ် ၃ တပ်ခွဲက အသက် ၅၅ နှစ် အရွယ် စစ်ကောင်စီတပ်ဖွဲ့ဝင် တပ်သား ထွန်းနိုင်က မတ်လ ၄ ရက်နဲ့ ၅ ရက်တွေမှာ ၃ ကြိမ် အဓမ္မပြုကျင့်ခဲ့တာလို့ ခလရ ၁ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

အဓမ္မပြုကျင့်ခံခဲ့ရတဲ့ မအဉ္ဇလီမျိုးမြင့်ရဲ့မိဘတွေဟာ စစ်ကောင်စီတပ်အငြိမ်းစား ဗိုလ်ကြီးမျိုးမြင့်နဲ့ ဒေါ်ခင်မာလာ ဆိုသူတို့ဖြစ်ပြီး ဧရာဝတီတိုင်း၊ ဖျာပုံမြို့ကို ခရီးသွားနေချိန်မှာ အခုလိုဖြစ်ခဲ့တာပါ။

“ရေစက်တန်းလမ်းဆိုတာ အဲ့နားမှာလည်း စစ်တပ်အငြိမ်းစားတွေချည်းပဲ နေကြတာ။ ခလရ ၁ နဲ့ အဲ့ဒီနေရာနဲ့က လမ်းပဲခြားတယ်။ အဲ့ဒီရက်ပိုင်းက မိဘတွေက ခရီးထွက်နေတဲ့အချိန် အိမ်နီးနားချင်းတွေနဲ့ အပ်ထားခဲ့တာ။ အဲ့ဒီအချိန်မှာ ထွန်းနိုင်က ခလေးမလေးကို မုဒိန်းဝင်ကျင့်တာ။ သူလုပ်တာက ၃ ကြိမ်တောင်ဆိုတော့ အဲ့ဒီအိမ်ကို အဝင်၊အထွက်ထူးခြားနေတာကို သတိထားမိပြီး နောက်ဆုံးအကြိမ်မှာ ဘေးအိမ်နီးချင်းတွေက အိမ်ထဲဝင်ကြည့်တော့ အဲ့ဒီလို တန်းလန်းကြီးမိတာ” လို့ ခလရ ၁ တပ်တွင်းသတင်းရင်းမြစ်က ပြောပါတယ်။

မတ်လ ၄ ရက် မနက် ၈ နာရီမှာ ၁ ကြိမ်၊ ၅ ရက်နေ့ မနက် ၁၀ နာရီနဲ့ နေ့လည် ၂ နာရီတို့မှာ ၂ ကြိမ် အဓမ္မပြုကျင့်ခဲ့တာဖြစ်ပြီး နောက်ဆုံးပြုကျင့်တဲ့ နေ့လည် ၂ နာရီလောက်မှာ အိမ်နီးချင်းတွေက ဝိုင်းဝန်းဖမ်းဆီးခဲ့တာလို့ ဆိုပါတယ်။

“အဲ့ဒီလိုမိတော့ ကလေးမလေးကို ဝိုင်းမေးကြတော့ စလုပ်တဲ့နေ့က အတင်းဝင်လာ တွန်းလှဲပြီး အော်ရင် သတ်ပစ်မယ်ဆိုပြီး ခြိမ်းခြောက်ပြီး တခါလုပ်တယ်။ နောက်ရက်မိတဲ့နေ့မှာလည်း ၂ ခါလုပ်တယ်လို့ဖြေပြီး ကြောက်လို့ပါဆိုပြီး ငိုယိုနေတယ်။ ကိုထွန်းနိုင်က အသက်တွေလည်း ကြီးနေပြီ အမှုတွေလည်း တောက်လျှောက်ဖြစ်လို့ ခုအရွယ်ထိ တပ်သားအဆင့်ပဲ” လို့ သူက ဆက်ပြောပါတယ်။

အဓမ္မပြုကျင့်ခဲ့တဲ့ ခလရ ၁ စစ်ကောင်စီတပ်ဖွဲ့ဝင် တပ်သား ထွန်းနိုင်ဟာ ခလရ ၁ တပ်အတွင်း နေထိုင်သူဖြစ်ပြီး ၎င်းမှာ မိန်းမဖြစ်သူနဲ့သမီး ၃ ယောက်ရှိကာ သားသမက်တွေလည်း ရှိသူဖြစ်တယ်လို့ သိရပါတယ်။

လက်ရှိမှာ စစ်ကောင်စီတပ်သား ထွန်းနိုင် ကို ခလရ ၁ တပ်တွင်းအချုပ်မှာ ချုပ်နှောင်ထားပြီး ဒီအမှုနဲ့ပတ်သက်လို့ ခလရ ၁ နောက်တန်းမှူးက တပ်မ ၆၆ ဌာနချုပ်နဲ့ ဒေသကွပ်ကဲမှုစစ်ဌာနချုပ် (ဒကစ- ပြည်) တို့ကို သတင်းပို့တင်ပြတာမျိုး မရှိသေးဘဲ ပြုကျင့်ခံရတဲ့ အမျိုးသမီးငယ်ရဲ့မိသားစုဝင်တွေကို အမှုကြေအေးပေးဖို့ လတ်ဆတ်ကျေးရွာအုပ်စု စစ်ကောင်စီခန့်အုပ်ချုပ်ရေးမှူး ထွန်းမြင့် ကနေတဆင့် ခလရ ၁ တပ် တာဝန်ရှိအရာရှိတွေက ဖိအားပေးပြောဆိုခိုင်းနေတယ်လို့ ဆိုပါတယ်။

စစ်ကောင်စီတပ်ရဲ့ ခလရ ၁ တပ်ရင်းဟာ သဲကုန်းမြို့နယ်၊ အင်းမမြို့အခြေစိုက် အမှတ် ၆၆ ခြေမြန်တပ်မ ဌာနချုပ်(တမခ ၆၆) လက်အောက်ခံတပ်ရင်းတခုဖြစ်ပြီး လက်ရှိ တပ်မ ၆၆ နဲ့လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း တိုက်ခိုက်ရေး ဝင်ရောက်နေတဲ့ တပ်မတခု ဖြစ်ပါတယ်။

တပ်မ ၆၆ နဲ့ လက်အောက်ခံတပ်ရင်းတွေဟာ ကရင်နီ(ကယား)ပြည်နယ်အတွင်း စစ်အာဏာသိမ်းပြီး နောက်၂၀၂၁ ခုနှစ်၊ နိုဝင်ဘာလကစလို့ တိုက်ခိုက်ရေးဝင်ရောက်နေတာဖြစ်ပြီး ကရင်နီပူးပေါင်းအဖွဲ့တွေနဲ့ ၁ နှစ်ခွဲနီးပါးကာလအတွင်း တိုက်ပွဲတွေအကြား တပ်ရင်းမှူးအဆင့်တွေပါ အပါအဝင် အများအပြားထိခိုက်သေဆုံးဒဏ်ရာရမှု‌၊ အရှင်ဖမ်းဆီးခံရမှုနဲ့ ဒေသကာကွယ်ရေးတပ်ဖွဲ့တွေဘက်ကို ဘက်ပြောင်း CDM ပြုလုပ်မှုတွေ များပြားနေလို့ စစ်အင်အား သိသိသာသာ ယုတ်လျော့နေတဲ့ တပ်မတခု ဖြစ်တယ်လို့ တပ်တွင်း သတင်းရင်းမြစ်တွေက ပြောပါတယ်။

စစ်ကောင်စီတပ် တပ်မ ၆၆ ရဲ့ စစ်အင်အား အများအပြား ယုတ်လျော့လာမှုတွေကြောင့် စစ်ခေါင်းဆောင်တွေအနေနဲ့ စစ်အင်အား ထပ်မံမပြုန်းတီးစေရေးအတွက် ၎င်းတို့လက်အောက်ခံ စစ်ကောင်စီတပ်ဖွဲ့ဝင်တွေက သူတို့အပေါ် အမိန့်မနာခံ စစ်ပုန်ကန်မှုကလွဲရင် ကျန်တဲ့အမှုတွေကို အရေးယူဆောင်ရွက်တာမျိုး လုပ်ဆောင်မှာမဟုတ်ဘူးလို့ CDM တပ်မတော်သားအရာရှိ တဦးက ပြောပါတယ်။

“လက်ရှိအခြေအနေမှာ စကစတပ်က စစ်ဆင်ရေးအမှု၊ နောက် သူတို့သတင်းတွေအပြင်ကိုပေးတဲ့ ဖရဲသီးလိုအမှုမျိုးကလွဲရင် ကျန်တဲ့ကာရိုက်တာအမှုတွေနဲ့ပတ်သက်ပြီးအတတ်နိုင်ဆုံးအရေးမယူတော့ဘူး။ မလိုအပ်ဘဲအင်အားထပ်ပြီးပြုန်းတီးမခံတော့ဘူးပေါ့။ အောက် ခြေ စစ်ကောင်စီတပ်သားတွေ စိတ်ပျက်ပြီးထွက်ပြေးမှာကိုသူတို့အတော်စိုးရိမ်နေတယ်။ အဲ့တာကြောင့်ဒီလိုအမှုတွေကိုလည်း အင်အားမပြုန်းအောင် သတင်းဖုံးဖိပြီးအမှုကြေအေးနိုင်ဖို့ ဖိအားပေးလုပ်ဆောင်နေတာဖြစ်တယ်” လို့ CDM တပ်မတော်သား ဗိုလ်ကြီး ဇင်ယော်က ပြောပါတယ်။

ခလရ ၁ ယခင် တပ်ရင်းမှူး ဒု-ဗိုလ်မှူးကြီး ကျော်ဇေယျ မှာလည်း ကရင်နီပြည်နယ်အတွင်း တိုက်ပွဲကျ သေဆုံးခဲ့တာဖြစ်ပြီး သူ့သေဆုံးမှုဟာ တပ်ရေးဗိုလ်ကြီး မျိုးဝင်းခိုင်ဆိုသူနဲ့လူမှုရေးဖောက်ပြန်နေတဲ့ ဇနီးဖြစ်သူ တပ်ရင်းမှူးကတော်ရဲ့ အောက်လမ်းအစီအရင်တွေကြောင့် တိုက်ပွဲကျသေဆုံးခဲ့တာလို့ တပ်တွင်းမှာ လက်ရှိအချိန်ထိ ဝေဖန်ပြောဆိုနေကြတယ်လို့ သိရပါတယ်။

ပဲခူး၊ မတ် ၁၆၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်ထဲက လယ်သမားတွေကို စစ်ကောင်စီလက်အောက်ခံ မြန်မာ့လယ်ယာဖွံ့ဖြိုးရေးဘဏ်က စိုက်ပျိုးစရိတ်ချေးငွေတွေကို ပြန်ဆပ်ဖို့ ခြိမ်းခြောက်တောင်းခံနေတယ်လို့ ဒေသခံလယ်သမားတွေဆီက သိရပါတယ်။

ခရိုင်တွင်းရှိ သာယာဝတီ၊ အုတ်ဖို၊ နတ္တလင်း တို့မှာရှိတဲ့ မြန်မာ့လယ်ယာဖွံ့ဖြိုးရေးဘဏ်မန်နေဂျာက ခြိမ်းခြောက်စာတွေ ပို့ကာ တောင်းခံနေတာလို့ သိရပါတယ်။

“ကျတော်တို့မိသားစုက ၃ ဦးရှိတာ လယ်က ၆ ဧက ရှိတယ်။ အရင်က ပြေပြေလည်လည် စားနိုင်သောက်နိုင်တယ်။ အာဏာသိမ်းပြီးကတည်းက ကုန်စျေးနှုန်းတွေ ကြီးပြီး လယ်ထွက်စပါးကလည်း အရင်းလောက်ပဲ ပြန်ရတော့ ဘဏ်ကြွေးဆိုတာလည်း မဆပ်နိုင်ဘူး။ အခုအဲဒီကြွေးတွေ ပြန်ဆပ်နိုင်ဖို့ ထိုင်းနိုင်ငံကို တရားမဝင်သွားပြီး အလုပ်လုပ်နရတယ်” လို့ သာယာဝတီမြို့ခံ လယ်သမားတဦးက ပြောပါတယ်။

လက်ရှိမှာလည်း စိုက်ပျိုးစရိတ်ချေးငွေတွေ ပြန်ဆပ်ဖို့ တောင်းခံလွှာတွေ ရောက်နေတယ်လို့ သူကဆက်ပြောပါတယ်။

ငွေတောင်းခံစာတွင် စိုက်ပျိုးစရိတ်ချေးငွေကို လာမယ့်မတ်လ ၁၈ ရက် နောက်ဆုံးထား ပေးဆပ်ရန်နဲ့ ပျက်ကွက်ပါက ဘဏ်ရဲ့လုပ်ထုံးလုပ်နည်း နည်းဥပဒေတွေနဲ့အညီ စီမံခန့်ခွဲခြင်းနဲ့ တရားစွဲဆိုတာတွေ လုပ်ဆောင်သွားမှာဖြစ်တယ်လို့ ဖော်ပြထားပါတယ်။

အုတ်ဖိုမြို့နယ် မြန်မာ့လယ်ယာဖွံ့ဖြိုးရေးဘဏ် မန်နေဂျာ ဒေါ်လွင်မာကြည်ရဲ့ ပြီးခဲ့တဲ့ဖေဖေါ်ဝါရီလက တောင်းခံတဲ့စာမှာလည်း သတ်မှတ်ရက်မှာ ပျက်ကွက်ပါက လယ်ယာမြေလုပ်ပိုင်ခွင့်လက်မှတ် (ပုံစံ ၇)ကို ဘဏ်ဥပဒေနဲ့အညီအရေးယူသွားမှာဖြစ်တယ်လို့ ဖော်ပြထားပါတယ်။

ဒါ့အပြင် နတ်တလင်းမြို့နယ် မြန်မာ့လယ်ယာဖွံ့ဖြိုးရေးဘဏ် မန်နေဂျာလက်မှတ်ရေးထိုး တောင်းခံစာမှာတော့ သတ်မှတ်ရက်မှာ ပျက်ကွက်ပါက လယ်ယာမြေလုပ်ပိုင်ခွင့်လက်မှတ် (ပုံစံ – ၇)ကို လေလံတင် ရောင်းချသွားမှာ ဖြစ်တယ်လို့ သိရပါတယ်။

စစ်ကောင်စီက လက်အောက်ခံ မြန်မာ့လယ်ယာဖွံ့ဖြိုးရေးဘဏ်တွေက စိုက်ပျိုးစရိတ် ချေးငွေ ခြိမ်းခြောက်တောင်းခံနေပေမယ့် အုတ်ဖိုမြို့နယ်နဲ့ နတ်တလင်းမြို့နယ် အရှေ့ဘက်က ကျေးရွာတွေကို စစ်တပ်က စစ်ကြောင်းထိုးနေရတာကြောင့် ရွာလုံးကျွတ် တိမ်းရှောင်နေရပြီး စပါးစိုက်ပျိုးနိုင်ခြင်းမပြုရတဲ့ လယ်သမားတွေလည်း ရှိနေပါသေးတယ်။

သာယာဝတီခရိုင် ပကဖအဖွဲ့ဝင် ဦးလူအေးကတော့ “စစ်ကောင်စီစစ်အစိုးရ စစ်မိစ္ဆာဆိုတာက ဘယ်တုန်းကမှ ပြည်သူလူထု အကျိုးကျေးဇူး ပြည်သူလူထုအပေါ် မျက်နှာမူတယ်ဆိုတဲ့ အစိုးရတရပ် ဘယ်တုန်းကမှ မဖြစ်ခဲ့ဘူး။ သူတို့ကိုယ်ကျိုး သူတို့ရလိုမှုပဲ အမြဲတမ်းကြည့်နေတာဖြစ်တယ်” လို့ ဆိုပါတယ်။

ဆက်လက်ပြီးလည်း “သူတို့က ဒီထက်ပိုပြီး နိုင်ထက်စီးနင်းလုပ်နေအုံးမှာ ဖြစ်တယ်။ ပြည်သူလူထု ဘယ်သူ့ကိုမဆို လယ်သမားကိုပဲဖြစ်ဖြစ် အကုန်လုံးခေါင်းပုံဖြတ်ပြီးတော့ အားလုံးဆင်းရဲတွင်းနက်ပြီးတော့ ချွတ်ခြုံကျသွားအောင် လည်မြိုကိုနင်းလို့ရအောင် အုပ်ချုပ်နေတာ ဖြစ်တယ်” လို့ ပြောပါတယ်။

ပြည်သူ့ကာကွယ်ရေးအဖွဲ့တွေရယ် NUG အစိုးရရယ် ပူးပေါင်းပြီးတော့ ပြည်သူလူထုတရပ်လုံး ရရာလက်နက်စွဲကိုင်ပြီး တော်လှန်တဲ့တနေ့ ရောက်လာမှာပါလို့လည်း သူကဆက်ပြောပါတယ်။

လက်ရှိမှာ ချေးငွေပြန်မဆပ်နိုင်တဲ့ လယ်သမားတွေအနေနဲ့ ခြိမ်းခြောက်စာတွေကြောင့် တရားစွဲဆိုတာနဲ့ လယ်သိမ်းခံရမှာကို စိုးရိမ်နေကြတယ်လို့ သိရပါတယ်။

ပဲခူး၊ မတ် ၁၅၊ ၂၀၂၃။

ပဲခူးတိုင်း၊ ပဲခူးခရိုင်၊ ဝေါမြို့နယ် စစ်တောင်းမြစ်အတွင်း တရားမဝင် စည်းကမ်းမဲ့ငါးဖမ်းမှုတွေ များပြားလာလို့ ဒေသတွင်း ငါးဖမ်းလုပ်ငန်းလုပ်ကိုင်သူတွေ ငါးအရ နည်းပြီး အခက်တွေ့နေတယ်လို့ ဒေသခံတွေဆီက သိရပါတယ်။

ဝေါနဲ့ ကဝနယ်ထဲက စစ်တောင်းမြစ်အတွင်းမှာ စည်းကမ်းမဲ့ ငါးဖမ်းသူတွေဟာ ငါးအသေးတွေကိုပါ ဖမ်းဆီးနေလို့ ငါးကြီးထွားမှု နည်းလာသလို၊ ငါးမျိုးစိတ်အချို့ မရှိသလောက် နည်းပါးလာတယ်လို့ ငါးဖမ်းလုပ်ငန်း လုပ်ကိုင်နေသူ အမျိုးသမီးတဦးက မြေလတ်အသံကို ပြောပါတယ်။

“ငါးက ရှားသွားပြီ။ မျှောပိုက်တွေ၊ ဝိုင်းပိုက်သမားတွေက ငါးမရတော့ဘူး။ လှေသမားတောင် ငါးကောင်း မစားရဘူး ဖြစ်နေတယ်။ သတ်မှတ်ထားတဲ့အတိုင်း တလက်မနဲ့အထက် ပိုက်တွေနဲ့မဖမ်းဘဲ အသေးတွေပါ အကုန်သိမ်းကြုံးဖမ်းနေတော့ ငါးအကြီးတွေလည်း သိပ်မရတော့သလို ငါးမျိုးစိတ်တချို့လည်း မရှိသလောက် ဖြစ်လာတယ်” လို့ သူက ပြောပါတယ်။

ဝေါနဲ့ ကဝမြို့နယ်အတွင်းမှာ တရားမဝင် စည်းကမ်းမဲ့ ငါးဖမ်းနေတဲ့ လှေအရေအတွက်ဟာ ၃၀ ကျော်အထိ ရှိနေပြီး တလက်မအောက် ပိုက်စိပ်တွေနဲ့ငါးအသေးတွေကို ဖမ်းယူနေလို့ ဒေသတွင်း ငါးဖမ်းလုပ်ငန်း လုပ်ကိုင်သူတွေ ငါးရရှိမှု နည်းပါးလားကာ လုပ်ငန်းတွေ အရှုံးပေါ်လာရတယ်လို့ သူကဆိုပါတယ်။

“သံဇကာပိုက်သမားတွေက စည်းမဲ့ကမ်းမဲ့နဲ့ ငါးအသေးကအစ ဖမ်းသွားတော့ ကျမတို့ အခွန်ဆောင်မှတ်ပုံတင်ပြီး ငါးကြီးဖမ်းသူတွေက ငါးမရတော့ဘူး။ ကျမတို့က နှစ်ကျပ်ကွက် ပိုက်နဲ့ဖမ်းတာကိုး။ သူတို့ကငါးပိအတွက် ပိုက်စိတ်နဲ့ငါးအသေးတွေကိုပါ ဖမ်းတော့ ငါးအကြီးက မရှိတော့ဘူး။ ဘယ်လိုမှ တွက်ခြေမကိုက်တော့ဘူး” လို့ သူက ဆက်ပြောပါတယ်။

တရားမဝင် စည်းကမ်းမဲ့ ဖမ်းဆီးနေတဲ့ငါးဖမ်းလှေတွေဟာ ငါးပိထုတ်လုပ်နိုင်ဖို့ ငါးအသေးတွေကို အဓိကထား ဖမ်းဆီးနေကာ လစဥ်ငါးပိ ပိသာချိန် ၆၀၀၀၀ ကျော်လောက်အထိ ထုတ်ယူဖမ်းဆီးနေတယ်လို့ ဆိုပါတယ်။

စည်းကမ်းမဲ့ငါးဖမ်းဆီးမှုတွေ များပြားလာတာကြောင့် ငါးအရနည်းလာလို့ ဒေသတွင်းငါးဖမ်းလုပ်ငန်း လုပ်ကိုင်သူတွေဟာ စီပွားရေးအဆင်မပြေဖြစ်လာကာ လုပ်ငန်းရပ်နားသူတွေ ရှိလာသလို ပြည်ပနိုင်ငံတွေကို ရွှေ့ပြောင်းလုပ်သားအနေနဲ့ လုပ်ကိုင်သူတွေ များလာတယ်လို့ ဆိုပါတယ်။

စည်းကမ်းမဲ့ ငါးဖမ်းမှုတွေကြောင့် ယခင်က စစ်တောင်းမြစ်အတွင်း ပေါပေါများများ ရရှိခဲ့တဲ့ ငါးသလောက်၊ ငါးပုတ်သင်၊ ကက်ကူရံ၊ ငါးမွှေး စတဲ့ငါးမျိုးစိတ်တွေဟာ ဖမ်းဆီးရမိတာ မရှိသလောက် နည်းလာတယ်လို့ သိရပါတယ်။

စစ်တောင်းမြစ်အတွင်း အဲ့ဒီလို တရားမဝင်စည်းကမ်းမဲ့ ငါးဖမ်းနေသူတွေကို ကဝမြို့နယ် စစ်ကောင်စီက ငွေကြေးရယူခွင့်ပြုထားပြီး လက်ရှိအချိန်ထိ တစုံတရာ အရေးယူ ဆောင်ရွက်တာမျိုး မရှိဘူးလို့ ဝေါမြို့ နယ်အတွင်း ငါးဖမ်းလုပ်ငန်းလုပ်ကိုင်သူတွေက ပြောဆိုပါတယ်။

စာတည်း – ရင်ငြိမ်း

ပဲခူး၊ မတ် ၁၅၊ ၂၀၂၃။

ပဲခူးတိုင်း(အနောက်ခြမ်း)မှာ နွေစပါးစိုက်ပျိုးဖို့ မတ်လဆန်းက စတင်ကာ ပြင်ဆင်နေပြီဖြစ်တဲ့အတွက် ထွန်ယက်လုပ်ငန်းတွေ လုပ်ဆောင်ရာမှာ အခုလို စားရိတ်မြင့်တက်နေတာ ဖြစ်ပါတယ်။

လယ်ယာသုံးထွန်စက်တွေနဲ့ ထွန်ယက်ရာမှာ ယခင်နှစ်ကထက် စားရိတ်ပိုမိုကုန်ကျနေတာ ဖြစ်ပြီး ယခင်နှစ် ထယ်ထိုးကုန်ကျစားရိတ် ၂၅၀၀၀ – ၂၈၀၀၀ ကျပ်ကနေ ယခုနှစ် ထယ်ထိုး

ကုန်ကျစားရိတ် ၃၅၀၀၀ – ၃၈၀၀၀ ကျပ်ရှိကာ ရိုတာဗေလာဖြင့် သမန်းပြင်ရာ ယခင်နှစ်ကုန်ကျစားရိတ် ၃၀၀၀၀ – ၃၃၀၀၀ ကျပ်ကနေ ယခုနှစ် ၃၈၀၀၀ – ၄၀၀၀၀ ကျပ်အထိ မြင့်တက်နေသွားတယ်လို့ ဒေသခံလယ်သမားတွေက ပြောပါတယ်။

“ထွန်စက်နဲ့ ထယ်ထိုးရာ ထယ်သွားတပ်ဆင်ထားတဲ့ လင်ပန်းအလိုက် စျေးနှုန်းကွာခြားပေမယ့် သမန်းရဖို့ စိတ်ကြိုက်ထယ်ရေးရအောင် မြေပြင်ပေးရတယ်။ ထယ်ရေးက စိုက်သမန်းရဖို့ အရေးကြီးတယ်။ တောင်သူအများစုကတော့ လင်ဗန်းထယ် ၇ သွားပါတဲ့ ထွန်စက်နဲ့ထိုးတာများတယ်” လို့ သာယာဝတီခရိုင်တွင်းက တောင်သူတဦးက မြေလတ်အသံကို ပြောပါတယ်။

ပဲခူးတိုင်း(အနောက်ခြမ်း)မြို့နယ်အားလုံးမှာ စိုက်ပျိုးတာမျိုးမဟုတ်ဘဲ ဆည်ရေရရှိရာ ဒေသများဖြစ်တဲ့ ပြည်၊ ပေါင်းတည်၊ သဲကုန်း၊ ဇီးကုန်း၊ လက်ပံတန်း၊ သာယာဝတီ၊ သုံးဆယ် တို့မှာ အဓိကစိုက်ပျိုးပြီး အခြားမြို့နယ်များတွင်လည်း အနည်းငယ်စီ စိုက်ပျိုးကြတယ်လို့ သိရပါတယ်။

ပဲခူးတိုင်းအနောက်ခြမ်းမှာ နွေစပါးအဖြစ် ဆင်းသုခ၊ မှော်ဘီ(၃)၊ ရတနာတိုး၊ အဓိကစိုက်ပျိုးပြီး စိုက်ပျိုးချိန်မှ ရိတ်သိမ်းချိန်ထိ ၄ လကျော် ကြာတတ်တယ်လို့ ဆိုပါတယ်။

ပေါင်းတည်မြို့နယ်အတွင်းမှာတော့ ယခင်နှစ်ထက် ဆည်ရေလွှတ်ချိန် လဝက်ခန့် နောက်ကျနေတယ်လို့ သိရပါတယ်။

စာတည်း – 007

ပေါင်းတည်၊ မတ် ၁၅၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့နယ်က စစ်တပ်သတင်းပေးလို့ လူသိများသူ တဦးကို မတ်လ ၁၄ ရက်မနေ့ညက နန်းထိုက်အောင် စစ်ဆင်ရေးအဖြစ် ရှင်းလင်းခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေး တပ်ဖွဲ့ ၃၆၀၁ တပ်ရင်း – တပ်ခွဲ ၅ နွေဦးအဖွဲ့က သတင်းထုတ်ပြန်ထားပါတယ်။

ကြိုပင်သာအုပ်စု၊ လက်ပံပါးပျဉ်းရွာ သင်္ချိုင်းကုန်းအနီးမှာ အဲဒီရွာသား အသက် ၆၀ နှစ်အရွယ် ကိုမောင်ဝင်းဆိုသူကို ည ၈ နာရီခွဲလောက်က ပစ်ခတ်ရှင်းလင်းခဲ့တာလို့ ဆိုပါတယ်။

“သူက ကျွဲတဲရွာ လောင်းကစားဝိုင်းကနေ ဆိုင်ကယ်နဲ့အိမ်ပြန်လာတာကို သေနတ်နဲ့ ၅ ချက် ပစ်ခတ်ခဲ့တာပါ။ နေရာမှာပဲ ပွဲချင်းပြီး သေသွားတယ်။ ခေတ်အဆက်ဆက် လောင်းကစားဝိုင်းထောင်ပြီး အခုထိလိုင်းကြေးကောက်နေတဲ့ သတင်းပေး အစစ်ပါ” လို့ နွေဦးတပ်ဖွဲ့ဝင် တဦးက ပြောပါတယ်။

သေဆုံးသူဟာ ပေါင်းတည်က စစ်တပ်နဲ့ရဲကို ဆက်ကြေးပေးပြီး လောင်းကစားဝိုင်းတွေ အပတ်စဥ်လုပ်နေတာလို့လည်း ဒေသခံတဦးက ပြောပါတယ်။

“ကိုမောင်ဝင်းက အခုနှစ်ဆန်း စပါးပေါ်ချိန်ကစပြီး အင်္ဂါနဲ့ ဗုဒ္ဓဟူးရက်မှာ ကြို့ပင်သာအုပ်စု၊ ကျွဲတဲရွာမှာ လောင်းကစားဝိုင်း လုပ်တယ်။ ကြာသာပတေးနေ့နဲ့ သောကြာမှာက လက်ပံပါးပျဥ်းရွာမှာ လောင်းကစား လုပ်တယ်။ အဓိကက မှတ်တိုင်ရဲစခန်းကို အပတ်စဥ်သိန်းချီပြီး ဆက်ကြေးပေးနေသူ ဖြစ်တယ်” လို့ ပြောပါတယ်။

ဒ့ါအပြင် ကိုမောင်ဝင်းမှာ စစ်ကောင်စီအလိုကျ ချဲ၊ နှစ်လုံး၊ သစ်လိုင်းကြေး ကောက်ခံပေးတာ၊ ကိုယ်တိုင်ကြက်ဝိုင်း၊ ဂျင်ဝိုင်းထောင်ပြီး စစ်တပ်ကို ထောက်ပံ့နေသူလည်း ဖြစ်ပြီး ကျေးရွာအုပ်စုအတွင်းက တော်လှန်ရေးအင်အားစု သတင်းတွေကို စစ်တပ်ကိုပေးပို့တာ၊ CDM ဝန်ထမ်းတွေကိုလည်း စိတ်ဒုက္ခအမျိုးမျိုး ပေးနေသူဖြစ်တယ်လို့ နွေဦးအဖွဲ့ရဲ့ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့နှစ် နိုဝင်ဘာ ၅ ရက်မနက်ကလည်း အဲဒီကျေးရွာအုပ်ချုပ်ရေးမှူး အသက် ၇၀ နှစ်အရွယ် ဦးဆောင်းတင်ဆိုသူကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ (PPDF) ၃၆၀၁ တပ်ရင်း – တပ်ခွဲ ၅ နွေဦးအဖွဲ့က နန်းထိုက်အောင်စစ်ဆင်ရေးအဖြစ် ရှင်းလင်းခဲ့လို့ ဒီနေ့တိုင် အဲဒီအုပ်စုမှာ အုပ်ချုပ်ရေးမှူးလုပ်မယ့်သူ မရှိသေးဘူးလို့လည်း သိရပါတယ်။

စာတည်း – လင်း

ကြို့ပင်ကောက်၊ မတ် ၁၄၊ ၂၀၂၃။

ပဲခူတိုင်း(အနောက်ခြမ်း)၊ ကြို့ပင်ကောက်မြို့၊ အရှေ့တောင်ဘက် ကျေးရွာတရွာက အုပ်ချုပ်ရေးမှူးနဲ့အဖွဲ့ဟာ မတ်လ ၁၃ ရက်မနေ့ည ၁၀ နာရီခွဲလောက်က တိုက်ခိုက်ခံရလို့ သေဆုံးမှုတွေရှိတယ်လို့ သိရပါတယ်။

ကြို့ပင်ကောက်မြို့နယ်၊ ရုံးချောင်းအုပ်စု၊ ရုံးချောင်းရွာမှာ ဖြစ်ပွားခဲ့တာဖြစ်ပြီး အုပ်ချုပ်ရေးမှူးအပါ ၈ ဦးလောက် စကားပြောနေချိန်မှာ တိုက်ခိုက်ခဲ့တာလို့ ဆိုပါတယ်။

“ကိုအေးထွန်းက အုပ်ကြီးလည်းဖြစ်သလို ပျူစောထီးခေါင်းဆောင်လည်း ဖြစ်တယ်။ သူတို့အင်အား ၈ ဦးလောက်နဲ့ ရှိနေတာကို ပစ်ခတ်ခဲ့တာပါ။ သူတို့ဘက်ကလည်း တထောင့်ထိုးတူမီးတွေ လက်ပစ်ဗုံးတွေနဲ့ ပြန်ပစ်သေးတယ်ဗျ” လို့ တိုက်ခိုက်ရာမှာ ပါဝင်တဲ့ Black Dragon အဖွဲ့ဝင်တဦးက ပြောပါတယ်။

Black Dragon(GBK PDF)ရဲ့ သတင်းထုတ်ပြန်ချက်မှာတော့ အုပ်ချုပ်ရေးမှူးပျူစောထီးခေါင်းဆောင် ကိုအေးထွန်းနဲ့ ပျူခေါင်းဆောင် ပါ ၃ ဦး သေဆုံးပြီး ဒဏ်ရာရသူ ၅ ဦး ရှိတယ်လို့ ဖော်ပြထားပါတယ်။

ဒေသခံတဦးပြောတာကတော့ ကိုအေးထွန်းရဲ့အလောင်းနဲ့ ဒဏ်ရာရသူ ၂ ဦးကို အဲဒီညကပဲ ကြို့ပင်ကောက်မြို့နယ်၊ အလယ်ကုန်းတိုက်နယ်ဆေးရုံကို ပို့ဆောင်ထားတယ်လို့ ဆိုပါတယ်။

အဲဒီတိုက်ခိုက်မှုမှာ သာယာဝတီခရိုင်၊ ကြို့ပင်ကောက်မြို့နယ် နတ်စစ်သည်တပ်ရင်းအမှတ် ၃၈၀၁ တပ်ခွဲ ၂ – Black Dragon(GBK PDF)၊ တပ်ရင်းအမှတ် ၃၈၀၁ တပ်ခွဲ ၅ ဟီးရိုးပြောက်ကျား၊ Yoma – GBK PDF တပ်ပေါင်းစုတို့ ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်က Black Dragon (GBK PDF)က စစ်တပ်သတင်းပေးနဲ့ ပျူစောထီးခေါင်းဆောင်တွေ အုပ်ချုပ်ရေးမှူးတွေ နုတ်ထွက်ကြဖို့ သတိပေးထားခဲ့ပါသေးတယ်။

စာတည်း – 007