ပဲခူး၊ မေ ၂၀၊ ၂၀၂၂။
ပဲခူးတိုင်း၊ ပြည်မြို့မှာ ပြီးခဲ့တဲ့ မေလ ၁၆ ရက် မနက်အစောပိုင်းက KTV တခုမှာ ဒုရဲအုပ်တဦးရဲ့ ခြောက်လုံးပြူး သေနတ်နဲ့အတူ ဖုန်းနဲ့ပိုက်ဆံတွေပါ ပျောက်ဆုံးမှု သံသယရှိသူကို ဖမ်းမိခဲ့ပြီး စစ်ဆေးနေစဥ်မှာပဲ သေဆုံးသွားပြီဖြစ်တယ်လို့ ဒေသခံတွေဆီက သိရပါတယ်။
သေနတ်နဲ့ ပစ္စည်းတွေခိုးတယ်လို့ သံသယနဲ့ ဖမ်းဆီးခံရပြီး စစ်ဆေးနေစဉ် သေဆုံးသွားသူဟာ Spider KTV က ဝန်ထမ်းတဦးဖြစ်ပြီး ဧရာဝတီတိုင်း ရေကြည်-အသုတ်ဒေသ ဇာတိဖြစ်တယ်လို့ သိရပါတယ်။
“Spider KTV က သေနတ်ခိုးတဲ့ Waiter လေးကို မနေ့က (မေ ၁၈) မိသွားပြီး၊ အမှတ် ၂ ရဲစခန်းမှာ နှိပ်စက်ခံရလို့ ဒီနေ့(မေ၁၉) သေသွားပြီ၊ နာမည်က ဝေယံစိုး တော်တော်ငယ်သးတယ်၊ သေနတ်က ရှာမတွေ့သေး။ သေနတ်ဘယ်မှာထားလဲစစ်ရင်း လက်လွန်သွားတာ” လို့ သတင်းအရင်းမြစ်တဦးက ဆိုပါတယ်။
ဧရာဝတီတိုင်း ငသိုင်းချောင်းမြို့နယ်မှာ ဖမ်းမိတာဖြစ်ပြီး ရဲတွေကတော့ မြွေကိုက်ခံရလို့ သေတယ်ဆိုပြီး ပြောဆိုနေကြတယ်လို့ ဒေသခံတဦးဆီက သိရပါတယ်။
လက်ရှိအချိန်အထိ ပျောက်ဆုံးသွားတဲ့ ခြောက်လုံးပြူးနဲ့ ကျည် ၆ တောင့်ကို ရှာမတွေ့သေးသလို ဒုရဲအုပ်အောင်မွန်ဟိန်းကလည်း အချုပ်ကျနေတယ်လို့သိရပြီး KTV ဝန်ထမ်းဘာကြောင့် သေဆုံးတယ် ဆိုတာနဲ့ ဒုရဲအုပ်ရဲ့ဖုန်းကို အဲ့ဒီဝန်ထမ်းဆီက ပြန်ရတယ်ဆိုတဲ့ အကြောင်းကို အတည်ပြုစုံစမ်းနေဆဲ ဖြစ်ပါတယ်။
