ပဲခူး

ပဲခူး၊ မေ ၁၇၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကောင်စီနဲ့ ဒေသခံ ကာကွယ်ရေးတပ်တို့ ဆက်တိုက်ဆိုသလို ထိတွေ့တိုက်ခိုက်မှုဖြစ်ခဲ့ရာ စစ်ကောင်စီတပ်သား ၅ ဦးထက်မနည်းသေဆုံးပြီး ထိခိုက်ဒဏ်ရာရရှိသူတွေလည်း ရှိခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ (PPDF)ရဲ့ တာဝန်ရှိသူဆီက သိရပါတယ်။

စစ်သားအင်အား ၁၀၀ ကျော်နဲ့ စစ်ကြောင်းထိုးတပ်စွဲနေတာတွေကို ဒေသခံ PDF တွေက မေလ ၇ ရက်ကနေ ၁၅ ရက်အတွင်း ခုခံတိုက်ခိုက်မှု ၆ ကြိမ် ပြုလုပ်ခဲ့တာလို့ သိရပါတယ်။

“ရိုးမအစပ်မှာ စစ်သားကအင်အား ၁၀၀ ကျော်ရှိတယ်။ အဲဒီ ၁၀၀ ကျော်ကနေ တခါတလေ စစ်ကြောင်း ၄ ကြောင်းဖြန့်ထိုးတယ်။ ကျနော်တို့ကလည်း အနီးကပ်တိုက်တာတွေရော သွားလမ်းလာလမ်းတွေကိုရော မိုင်းထောင်မိုင်းဆွဲတာ ထိတွေ့မှု ၆ ကြိမ် ပြုလုပ်နိုင်ခဲ့တယ်၊ အနီးကပ်မြင်ရတာရော ကင်းထောက်တွေရဲ့သတင်းပေးမှုတွေအရ စစ်သား ၅ ဦးထက်မနည်းသေပြီး ဒဏ်ရာရသူတွေလည်းရှိတယ်” လို့ PPDF ရဲ့တာဝန်ရှိသူက ပြောပါတယ်။

အဲ့ဒီစစ်ကောင်စီစစ်ကြောင်းဟာ အရင်ကလို တနေရာတည်းမှာ ကြာကြာမနေပဲ ရိုးမအစပ်မှာ လှည့်လည်လူပ်ရှားနေတာကို မျက်ခြေမပြတ်သတင်းစောင့်ယူကာ တိုက်ခိုက်ခဲ့တာလို့ သူက ဆက်ပြောပါတယ်။

မေလ ၇ ရက် မနက် ၃ နာရီမှာ သိမ်ကုန်းရွာတာဝါတိုင်စောင့်စစ်သားတွေကို လက်လုပ် ၄၀ မမ ၄ လုံးနဲ့ တိုက်ခိုက်ပြီး၊ အဲ့ဒီနေ့ မနက် ၈ နာရီလောက်မှာတော့ ပဲခူးရိုးမအစပ် သစ်ပျောက်စမ်းရွာအရှေ့ဘက်ကို စစ်ကြောင်းထိုးလာတဲ့ စစ်သားအင်အား ၄၀ ကို ကြို့ပင်တောင်အနီးကနေ မိုင်းဆွဲခဲ့လို့ စစ်သား ၆ ဦး ဒဏ်ရာရရှိခဲ့တယ်လို့ ဆိုပါတယ်။

ဒါ့အပြင် မေလ ၁၂ ရက်မှာ ရုပ်ဆိုင်ရွာမှာ တပ်စွဲထားတဲ့စစ်သားတွေကိုလည်း ရွာပြင်ကိုထွက်လာချိန် လက်နက်ငယ်တွေနဲ့ တိုက်ခိုက်ခဲ့လို့ စစ်သား ၄ ဦးလောက် ထိခိုက်ဒဏ်ရာရခဲ့ပါသေးတယ်။

အလားတူ မေလ ၁၃ ရက်မနက် ၇ နာရီလောက်မှာလည်း စစ်ကြောင်းထိုးလာတဲ့ တပ်သားတွေကို ဘန့်ဘွေးကန်ရွာအနီးကနေ လက်နက်ငယ်တွေနဲ့တိုက်ခိုက်ခဲ့ပြီးနောက် မနက် ၁၀ နာရီလောက်မှာတော့ ထိတွေ့မှုဖြစ်ခဲ့ရာ စစ်သား ၂ ဦးသေဆုံးပြီး ၅ ဦး ဒဏ်ရာရခဲ့ပါတယ်။

အဲ့ဒီနေ့က သေဆုံးသူတွေကိုတော့ ဘန့်ဘွေကန်းရွာအနီးက ယာတဲပေါ်မှာတင်ပြီး မီးရှို့ခဲ့တယ်လို့ သိရပါတယ်။

အဲ့ဒီနောက် မေလ ၁၅ ရက်ညနေ ၅ နာရီလောက်မှာတော့ သိမ်ကုန်းတာဝါတိုင်နဲ့ သိမ်ကုန်း ဘုန်းကြီးကျောင်းမှာတပ်စွဲနေတဲ့ စစ်သား ၇၀ လောက်ကို အသင့်ထောင်ထားတဲ့ အဝေးထိန်းပဒေသာမိုင်း ၂ လုံးနဲ့ တိုက်ခိုက်ခဲ့ရာ စစ်သား ၃ ဦးသေဆုံးပြီး ၂ ဦးဒဏ်ရာ ရှိခဲ့တယ်လို့ ဆိုပါတယ်။

“ဒီကောင်တွေ (စစ်သား)တွေ အလောင်းလာကောက်ပြီးအပြန်မှာ ထပ်ဆွဲမယ်ဆိုပြီးအပိုင်စောင့်နေတာ၊ သူတို့က အလောင်းကောက်ပြီးအခြားတလမ်းကနေ အထိုင်ချတဲ့ သိမ်ကုန်းရွာဘက်ကို ပြန်သွားလို့ တပွဲတော့လွတ်သွားတယ်” လို့ PPDF တာဝန်ရှိသူက ပြောပါတယ်။

ထိတွေ့တိုက်ခိုက်မှုတွေအတွင်း စစ်ကောင်စီဘက်က ထိခိုက်သေဆုံးတာတွေကိုတော့ မြေလတ်အသံက သီးခြားအတည်မပြုနိင်သေးပါဘူး။

အဲဒီ ထိတွေ့တိုက်ခိုက်မှုတွေကို ပြည်ခရိုင် – ၃၆၀၂ တပ်ရင်းနဲ့ ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ – ၃၆၀၁ တို့က တိုက်ခိုက်ခဲ့တာလို့ သိရပါတယ်။

အဆိုပါစစ်ကောင်စီစစ်ကြောင်းဟာ ပေါင်းတည်ပြည်သူ့ကာကွယ်ရေးတပ်ဖွဲ့ တပ်ရင်း – ၃၆၀၁ ရဲ့ ရှေ့တန်းကင်းတဲ ၆ လုံးကိုလည်း ပြီးခဲ့တဲ့ မေလ ၅ ရက်က မီးရှို့ဖျက်စီးခဲ့ပါသေးတယ်။

စာတည်း – လင်း

ပဲခူး၊ မေ ၁၆၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ စည်ပိုင်းအုပ်စု၊ ရှမ်းစုရွာနေ စစ်တပ်သတင်ပေးဆိုသူ ပြည်သူ့စစ်ခေါင်းဆောင် အမျိုးသားတဦး ပစ်သတ်ခံရတယ်လို့ သိရပါတယ်။

မေလ ၁၅ ရက် မနေ့က ရှမ်းစုကျေးရွာ ပြည်သူစစ်ခေါင်းဆောင် အသက် ၄၀ နှစ်အရွယ် ဦးကျော်ဆွေဦး ကို နေအိမ်ကနေဖမ်းဆီးပြီး လမ်းတနေရာမှာ ရှင်းလင်းခဲ့တာလို့ ရေတာရှည် ပကဖ တာဝန်ရှိသူက ပြောပါတယ်။

“သူက ရှမ်းစု ပြည်သူဌာနေခေါင်းဆောင်။ စကစ လမ်းပြ။ ရွာထဲမှာဆိုလည်း ဟိုခြိမ်းခြောက် ဒီခြိမ်းခြောက် လုပ်နေတာဆိုတော့ သူ့ကို ထိုက်သင့်တဲ့အပြစ်ဒဏ် ပေးလိုက်တာဖြစ်တယ်။ တပ်ဖွဲ့ကနေပြီး သူ့ကိုစီရင်ချက် ချမှတ်လိုက်တာဖြစ်တယ်” လို့ ပြောပါတယ်။

သေနတ်နဲ့ပစ်သတ်ခံရလို့ ဦးကျော်ဆွေဦးမှာ ဦးခေါင်းထိမှန်ဒဏ်ရာနဲ့ ရှမ်းရွာလေးတံတားပေါ်မှာ သေဆုံးခဲ့ကာ အလောင်းကိုတော့ ဒေသခံတွေကကောက်ယူပြီး ရေတာရှည်ဆေးရုံကို ပို့ထားခဲ့ရတယ်လို့ သိရပါတယ်။

မေလ ၁၄ ရက်နေ့ကလည်း ရေတာရှည်မြို့နယ်၊ မိကျောင်းအိုင်ကျေးရွာအုပ်စု၊ ကျောက်ပုံကျေးရွာနေ စစ်ကောင်စီသတင်းပေးဆိုသူ မောင်အေးစိုးမင်းကို ဖမ်းဆီးပြီး ကျေးရွာတနေရာမှာ ပစ်ခတ်ရှင်းလင်းခဲ့သေးတယ်လို့ သိရပါတယ်။

စာတည်း – လင်း

ပဲခူး၊ မေ ၁၃၊ ၂၀၂၃။

ပဲခူးတိုင်းဒေသကြီး၊ ရေတာရှည်မြို့နယ်၊ ဆွာစက်ရုံအုပ်စု၊ ရှမ်းရွာနေ ကြံ့ခိုင်ရေးနယ်မြေစည်းရုံးရေးမှူး ၁ ဦး နေအိမ်မှာ ပစ်ခတ်ခံရပြီး သေဆုံးသွားတယ်လို့ သိရပါတယ်။

မေလ ၁၂ ရက် ည ၈ နာရီခန့်မှာ ရှမ်းရွာကျေးရွာ (ပြည်ထောင်စုကြံ့ခိုင်ရေးနှင့်ဖွံဖြိုးရေးပါတီ နယ်မြေစည်းရုံး ရေးမှူး)၊ ရာအိမ်မှူး ဦးသန်းမြိုင် ၆၃ နှစ်ဟာ နေအိမ်မှာ ရှိနေချိန် သေနတ်သမားတွေက ဝင်ရောက်ပစ်ခတ်သွားတယ်လို့ ဒေသခံတဦးက ပြောပါတယ်။

“သူက ရာအိမ်မှူးလည်း လုပ်တယ်။ အရင်ကတော့ ကြံ့ခိုင်ရေးပါတီက နယ်မြေစည်းရုံးရေးမှူးပါ။ အခုတော့ လုပ်မလုပ် မသိရဘူး။ သူကတော့ ကျေးရွာအုပ်ကြီးက ခိုင်းတာရှိရင် လိုက်လုပ်ပေးရတာတော့ရှိတယ်။ ကျန်တာကတော့ ဘာလုပ်နေလဲဆိုတာတော့ မသိရဘူး”ပြောပါတယ်။

သေနတ်နဲ့ပစ်ခတ်ခံရလို့ ဦးသန်းမြိုင်ဟာ မေးစေ့အောက်ဖက်မှာ ကျည်ဖောက်ဝင်ဒဏ်ရာရပြီး နေရာမှာပဲ သေဆုံးသွားတယ်လို့ သိရပါတယ်။

သေဆုံးသွားတဲ့ ဦးသန်းမြိုင်အလောင်းကို စစ်ကောင်စီအဖွဲ့က စစ်ဆေးဖို့ ဆွာဆေးရုံကို ယူဆောင်သွားပါတယ်။

အဲဒီပစ်ခတ်မှုကိုတော့ ဘယ်အဖွဲ့က ဘာကြောင့်လုပ်ဆောင်ခဲ့တယ်ဆိုတာ ထုတ်ပြန်ထားတာမျိုး မရှိသေးပါဘူး။

မေလ ၈ ရက် ညကလည်း ရေတာရှည်မြို့နယ်၊ ရဲကုန်းအုပ်စု ဝါးရုံလဲကျေးရွာက ကြံ့ခိုင်ရေးပါတီဝင် ဦးစိုးကြည် ၄၈ နှစ်ဟာ နေအိမ်မှာ လည်ပင်းကိုဓားနဲ့လှီးပြီး သတ်ဖြတ်ခံရသေးတယ်လို့ သိရပါတယ်။

စာတည်း – လင်းဇေ

ပဲခူး၊ မေ ၁၂၊ ၂၀၂၃။

ပဲခူးတိုင်းအရှေ့ခြမ်း၊ ထန်းတပင်မြို့နယ်၊ ညောင်ပင်သာကျေးရွာမှ ကလေးငယ် ၅ ဦးအပါအဝင် ပြည်သူ ၁၈ ဦးကို စစ်တပ်က သတ်ဖြတ်မီးရှို့ခဲ့တယ်လို့ သိရပါတယ်။

ထန်းတပင်မြို့နယ်၊ ညောင်ပင်သာကျေးရွာ မြောက်ကမ်းအနီးမှာ မေလ ၁၀ ရက်၊ မနက် ၁၀ နာရီ လောက်ကနေ ညနေပိုင်းအထိ ထန်းတပင်မြို့နယ်အခြေစိုက် ခလရ ၇၃ နဲ့ KNU၊ PDF ပူးပေါင်းမဟာမိတ်အဖွဲ့တို့ တိုက်ပွဲဖြစ်ချိန် စစ်ကောင်စီဘက်က အရာရှိအပါ ၁၀ ဦးထက်မနည်း သေဆုံးခဲ့ပါတယ်။

အဲ့ဒီနောက် စစ်ကောင်စီဘက်က ညောင်ပင်သာရွာထဲကို စစ်ကြောင်းထိုးဝင်လာပြီး ရွာသားတွေကို ဖမ်ဆီးသတ်ခဲ့တာလို့ ထန်းတပင် ပြည်သူ့ကာကွယ်ရေးအဖွဲ့မှ တာဝန်ရှိသူတဦးက ပြောပါတယ်။

“သတ်ဖြတ်မီးရှို့​ခံရသူတွေထဲမှာ အသက် ၅ နှစ်အရွယ်ကနေ အသက် ၇၀ ကျော်အထိ ပါတယ်၊ စစ်တပ်က သူတို့လူတွေ မိုင်းဆွဲခံထိပြီး အထိနာသွားလို့ ပြည်သူတွေကို အကြောင်းမဲ့သတ်သွားတာ။ ခုချိန်ထိ စုံစမ်းသိရသလောက် ၁၈ ဦးသတ်ခံရတယ်။ အသတ်ခံရသူတွေထဲမှာ အမျိုးသား ၈ ဦးနဲ့ အမျိုးသမီး ၁၀ ဦးပါတယ်” လို့ ပြောပါတယ်။

အသတ်ခံထားရတဲ့ အလောင်းတွေကိုတော့ စစ်ကောင်စီတပ်တွေ ရွာကထွက်သွားပြီးနောက် မေလ ၁၁ ရက်ညနေပိုင်းမှာ ကာကွယ်ရေးတပ်တွေ နယ်မြေရှင်းလင်းရေးဝင်လုပ်ချိန်ကျမှ တွေ့ရှိခဲ့တာပါ။

တွေ့တဲ့အချိန်မှာ ခန္ခာကိုယ်တွေကို မီးရှို့ခံထားရတဲ့ အနေအထားရှိတာကြောင့် သတ်ပြီးမှ မီးရှို့တာလား၊ မီးရှို့ပြီးမှ သတ်ခဲ့တာလား ဆိုတာကိုတော့ အတည်မပြုနိုင်သေးပါဘူး။

သေဆုံးသူတွေမှာ (၁) ဒေါ်ခင်ရီ ၆၈ နှစ်၊ (၂) မသန်းသန်းဆွေ ၃၅ နှစ်၊ (၃) အာကလပ်စိန် ၁၀ နှစ်၊ (၄) ဦးဝင်းမြိုင် ၇၀ နှစ်၊ (၅) ကိုဇော်မိုးအောင် ၄၀ နှစ်၊ (၆) မသူဇာ ၄၀ နှစ်နဲ့ (၇) သားဖြစ်သူ ၁၅ နှစ်၊ (၈) သားဖြစ်သူ ၇ နှစ်၊ (၉) ဒေါ်ချွတ်တိ ၅၈ နှစ်၊ (၁၀) မတင်ဆန်း ၅၃ နှစ်၊ (၁၁) မခင်အုံး ၅၅ နှစ်၊ (၁၂) မတင်အုံး ၅၃ နှစ်၊ (၁၃) မသန်းဝေ ၂၈ နှစ်နဲ့ (၁၄) ၅ နှစ်အရွယ် သားတဦး၊ (၁၅) ကိုတိုးတိုး ၅၃ နှစ်နဲ့ (၁၆) သားဖြစ်သူ ၉ နှစ်၊ (၁၇) သမီးဖြစ်သူ ၁၈ နှစ်၊ (၁၈) ဦးကျော်သိန်း ၅၅ နှစ်တို့ ဖြစ်တယ်လို့ မြေပြင်စာရင်းကောက်သူတွေရဲ့ တင်ပြချက်အရ သိရပါတယ်။

ဒါ့အပြင် သေဆုံးသူတွေဟာ မိသားစု ၃ စုကသာ ဖြစ်တယ်လို့ ပြောဆိုတာမျိုးတွေ ရှိပေမယ့် မြေလတ်အသံက သီးခြားအတည်မပြုနိုင်သေးပါဘူး။

စာတည်း – လင်း

ပဲခူး၊ မေ ၁၀၊ ၂၀၂၃။

ပဲခူးတိုင်း(အနောက်ခြမ်း)၊ မိုးညိုမြို့နယ်၊ ထိန်တောမြို့မှာ စစ်ကောင်စီလက်အောက်ခံရဲတပ်ဖွဲ့က ခရီးသွားဆိုင်ကယ်တွေကိုဖမ်းဆီးကာ ငွေသိန်းဂဏန်းအထိတောင်းခံနေတယ်လို့ ဒေသခံတွေကပြောပါတယ်။

မေလ ၇ ရက် မနက်ပိုင်း ၁၀ နာရီဝန်းကျင်က မိုးညိုမြို့မရဲစခန်းမှ နယ်ထိန်းရဲဦးဆောင်တဲ့ ရဲတပ်ဖွဲ့တွေဟာ ထွန်းမြတ်တံတားထိပ်မှာ ဆိုင်ကယ်တွေဖမ်းဆီးပြီး ငွေတောင်းခံတဲ့အပြင် ဆိုင်ကယ်နဲ့အတူပါလာတဲ့ ပစ္စည်းတွေကိုလည်း အဓမ္မယူဆောင်သွားတယ်လို့ ထိန်တောမြို့ခံတဦးက ပြောပါတယ်။

” တွေ့သမျှအကုန်ဖမ်းတာ ဆိုင်ကယ်တွေကို။ အိမ်တွေဆောက်ဖို့ ဝါးလာဆွဲတဲ့ ဆိုင်ကယ်တွေ ဖမ်းပြီးယူသွားတာ။ ရဲစခန်းကိုပြန်လိုက်ရွေးရတယ်။ ဆိုင်ကယ်သမားတွေက ပြန်ရောင်းဖို့ ပုံးနဲ့ထည့်လာတဲ့ ဓာတ်ဆီပုံးတွေလည်း အကုန်သိမ်းတာ။ ဆိုင်ကယ်တော့ ပြန်ရတယ်။ ငွေတောင်းတာ ၃ သိန်းလောက်ပေးရတယ်။ တချို့ဆိုင်ကယ်တွေလည်း ဖမ်းပြီးသိမ်းသွားတာ ပြန်မရဘူး” လို့ ပြောပါတယ်။

ရဲတွေဟာ ဖမ်းဆီးယူဆောင်သွားတဲ့ ဓာတ်ဆီပုံးထဲက ဓာတ်ဆီတွေကို ပိုင်ရှင်တွေဆီပြန်လည်မပေးအပ်ဘဲ မြို့တွင်းက တခြားဓာတ်ဆီဆိုင်တွေမှာ ရောင်းချပြီး ကိုယ်ကျိုးအတွက်အသုံးပြုတယ်လို့လည်း အဲ့ဒီမြို့ခံက ဆက်ပြောပါတယ်။

စစ်ကောင်စီလက်အောက်ခံရဲတွေဟာ ထိန်တောမြို့ ထွန်းမြတ်တံတားထိပ်၊ ကျွဲတကုန်းထိပ်တွေ နဲ့ထိန်တောဆေးရုံရှေ့တွေမှာ ဖမ်းဆီးမှုတွေလုပ်ဆောင်လေ့ရှိပြီး ငွေညှစ်တောင်းခံတာတွေအပြင် ဆိုင်ကယ် ဖမ်းဆီးခံရပြီး လူကိုပါ ထောင်ဒဏ်ချမှတ်ခံရမှုတွေလည်း ရှိနေတယ်လို့ သိရပါတယ်။

စာတည်း-ရင်ငြိမ်း