ပဲခူး

ပဲခူး၊ မေ ၉၊ ၂၀၂၃။

ပဲခူးတိုင်း၊ ကျောက်ကြီးမြို့နယ်၊ နတ်သံကွင်းကျေးရွာအနီးက မိုင်းခွဲခံထားရတဲ့ ဘုံသရောတံတားကို လာရောက်ပြုပြင်တဲ့ စစ်ကောင်စီအဖွဲ့တွေ မိုင်းထပ်ထိလို့ ထိခိုက်သေဆုံးမှုတွေ ရှိခဲ့တယ်လို့ သိရပါတယ်။

မေလ ၈ ရက်နေ့ မနက် ၁၀ နာရီဝန်းကျင်မှာ စစ်ကောင်စီအဖွဲ့တွေက တံတားကိုလာရောက်ပြုပြင်ချိန် ပျက်စီးနေတဲ့တံတားအနီးမှာ ထောင်ထားတဲ့မိုင်းကို နင်းမိပြီး ပေါက်ကွဲမှု ဖြစ်ခဲ့တာလို့ မြေပြင်နဲ့နီးစပ်တဲ့ PDF တပ်ဖွဲ့ဝင်တဦးက မြေလတ်အသံကို ပြောပါတယ်။

“ညဘက် တံတားမိုင်းခွဲခံရလို့ ပျက်စီးသွားတာ။ မနေ့မနက် သူတို့ လာပြင်ချိန် မိုင်းထပ်ထိတာ။ ဒီဘက်က ထောင်ထားတဲ့ နင်းမိုင်းထိသွားတာ။ စကစဘက်က AE တယောက် သေတယ်လို့တော့ သိရတယ်။ ဒဏ်ရာရသူတွေလည်း ရှိတယ်။ အဲဒါကိုတော့ အသေးစိတ်စုံစမ်းတုန်းပဲ” လို့ ပြောပါတယ်။

တံတားလာပြင်တဲ့အဖွဲ့မှာ စစ်ကောင်စီတပ်က လုံခြုံရေးယူပေးပြီး မြို့နယ်လမ်းတံတားဦးစီးဌာနက ဝန်ထမ်းအချို့နဲ့ စစ်အင်ဂျင်နီယာတပ်က တပ်ဖွဲ့တွေ ပါဝင်ကာ မိုင်းပေါက်ကွဲမှုကြောင့် လမ်းဦးစီးဌာနက AE သေဆုံးတယ်လို့ ပြောဆိုပေမယ့် သီးခြားအတည်ပြုနိုင်ဖို့ စုံစမ်းနေပါတယ်။

မိုင်းထိလို့ ထိခိုက်သေဆုံးသူတွေကိုတော့ စစ်ကောင်စီအဖွဲ့က လာရောက်ခေါ်ဆောင်သွားပြီး စစ်ဆေးရုံကို ပို့ဆောင်ထားတယ်လို့ သိရပါတယ်။

ဘုံသရောတံတားဟာ မေလ ၇ ရက်နေ့ ည ၁၂ နာရီခန့်က မိုင်းခွဲခံရလို့ ပြိုကျပျက်စီးခဲ့တာဖြစ်ပြီး ကျောက်ကြီး-နတ်သံကွင်းလမ်းပိုင်းပေါ်က တံတားတစင်းဖြစ်ကာ စစ်ကောင်စီတပ်က ရိက္ခာနဲ့စစ်ကူပေးပို့ရာမှာ အသုံးပြုနေသလို တော်လှန်ရေးအဖွဲ့တွေဘက်ကလည်း စစ်ရေးအရ အသုံးပြုနေတယ်လို့ သိရပါတယ်။

မတ်လ ၃၀ ရက်နေ့ မနက် ၈ နာရီ ၅၀ မိနစ်ခန့်မှာ ပဲနွယ်ကုန်းဘက်ကနေ ကျောက်ကြီးဘက်ကို မောင်းနှင်လာတဲ့ Fawကား ကျောက်ကြီး-နတ်သံကွင်းလမ်း ညောင်ကုန်းတံတားမှာ မိုင်း ထိလို့ ၂ ဦး သေ၊ ၃ ဦး ဒဏ်ရာရသွားတယ်လို့ သိရပါတယ်။

စာတည်း – ရင်ငြိမ်း

ပဲခူး၊ မေ ၈၊ ၂၀၂၃။

ပဲခူးတိုင်းဒေသကြီး၊ ပြည်မြို့နယ်၊ ကြပ်ကုန်းရွာအနီး တောင်နဝင်းဆည်နားမှာ စျေးကပြန်လာတဲ့ အုပ်ချုပ်ရေးမှူးလင်မယား သေနတ်နဲ့ပစ်သတ်ခံခဲ့ရတယ်လို့ သိရပါတယ်။

မေလ ၈ ရက်ဒီမနက် ၈ နာရီ ၄၀ မိနစ်လောက်မှာ တဲကုန်းကျေးရွာအုပ်ချုပ်ရေးမှူး ဦးစိုးသန်း ၅၁ နှစ်နဲ့ ဇနီးဖြစ်သူ ဒေါ်ဆွေဆွေမြင့် ၄၈ နှစ်တို့ဟာ ကြပ်ကုန်းစျေးကနေ ကားနဲ့တဲကုန်းရွာဘက်ပြန်လာချိန်မှာ ပစ်ခတ်ရှင်းလင်းခဲ့တာလို့ ပြည်ခရိုင်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက ပြောပါတယ်။

“မြေပြင်က သတင်းပေးပို့လာတာကတော့ အုပ်ကြီးလင်မယားက ကားနဲ့ပြန်လာတဲ့အချိန် လမ်းကနေ စောင့်ပြီး ရှင်းလိုက်တာလို့သိရတယ်။ သူတို့လင်မယားမှာ မိန်းမကပိုဆိုးတယ်။ စကစ အားကိုးနဲ့ ရွာသူရွာသားတွေအပေါ် ခြိမ်းခြောက်ပြောဆိုတာတွေရှိတယ်။ ဒါကြောင့် ရှင်းလိုက်တာဖြစ်တယ်”လို့ ပြောပါတယ်။

အဲ့ဒီ အုပ်ချုပ်ရေးမှူးလင်မယား စီးလာတဲ့ကားကို တောင်နဝင်းဆည်အနီးမှာ ဒေသကာကွယ်ရေး တပ်ဖွဲ့ဝင်တွေကတားပြီး၊ ၂ ဦးစလုံးကားအပြင် ရောက်တဲ့အချိန်မှ ရှင်းလင်းခဲ့တာကြောင့် လည်ပင်းနဲ့ ရင်ဘတ်တွေမှာ ကျည်ထိဒဏ်ရာတွေနဲ့ သေဆုံးသွားတယ်လို့ ဆိုပါတယ်။

အဲဒီပစ်ခတ်မှုကို ပြည်ခရိုင် PDF တပ်ရင်း ၃၆၀၂၊ တပ်ခွဲ ၁ ရဲဘော်တွေက လုပ်ဆောင်ခဲ့တာဖြစ်ပြီး၊ အုပ်ချုပ်ရေးမှူးလင်မယားဟာ စစ်ကောင်စီအားကိုးနဲ့ ပြည်သူလူထုအပေါ် အနိုင်ကျင့် ဗိုလ်ကျနေတာကြောင့် ခုလိုပစ်ခတ်ရှင်းလင်းခဲ့တာ ဖြစ်တယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။

စာတည်း – လင်း

ပဲခူး၊ မေ ၈၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ နောင်ကုန်းကျေးရွာ ပေါက်မြောင်းတံတားအနီးမှာ မိုင်းခွဲခံရလို့ ပျက်စီးနေတဲ့ဓာတ်တိုင်တွေကို လာပြင်တဲ့အဖွဲ့ ဒရုန်းနဲ့ဗုံးချခံရပြီး ၁ ဦးသေဆုံးကာ ၁ ဦးဒဏ်ရာရသွားတယ်လို့ သိရပါတယ်။

ယနေ့မေလ ၈ ရက်နေ့ မနက် ၁၁ နာရီကျော်ခန့်မှာ စစ်ကောင်စီတပ်သားတွေ လုံခြုံရေးယူပေးထားတဲ့ မြို့နယ်လျှပ်စစ်က မီးတိုင်ပြင်တဲ့အဖွဲ့ကို လက်နက်ကိုင်အဖွဲ့တခုက ဒရုန်းအသုံးပြုတိုက်ခိုက်ခဲ့တယ်လို့ ဒေသခံတဦးက ပြောပါတယ်။

“ပြီးခဲ့ရက်ပိုင်းက ပေါင်မြောင်းတံတားကမီးတိုင်မိုင်းကွဲထားတာကို လာပြင်တဲ့အဖွဲ့ ဒရုန်းနဲ့ဗုံးချခံရတာပါ။ ဒီမနက်ဖြစ်တာပါဆို ၃ ခါရှိပြီ၊ မီးပြင်တဲ့အဖွဲ့တွေ ဒရုန်းနဲ့တိုက်ခိုက်ခံရတာ။ အရင်ရက်တွေကတော့ လူမထိဘူး။ ဒီမနက်မှာ မီးလာပြင်တဲ့အဖွဲ့က လူတော့များတယ်။ လုံခြုံရေးလည်းပါတယ်။ ဒရုန်း ၂ စင်းနဲ့ ဗုံးလာချတာ” လို့ ပြောပါတယ်။

ဒရုန်းဗုံးထိလို့ အသက် ၄၀ နှစ်ခန့်ရှိ ဦးမင်းသိန်း စည်ပင်နေ့စားဝန်ထမ်း အောင်သုခရပ် ကျောက်ကြီးမြို့နေသူ သေဆုံးပြီး နတ်သံကွင်းကျေးရွာ ၃ ရပ်ကွက်နေ EPC နေ့စားဝန်ထမ်း အမျိုးသား ၁ ဦး ထိခိုက်ဒဏ်ရာရခဲ့တယ်လို့ သိရပါတယ်။

ထိခိုက်သေဆုံးသွားသူတွေကိုတော့ ကျောက်ကြီးဆေးရုံကို ပို့ထားရပြီး မီးတိုင်ပြင်တဲ့လုပ်ငန်းကိုတော့ ရပ်ဆိုင်းထားရတယ်လို့ ဆိုပါတယ်။

အဲ့ဒီတိုက်ခိုက်မှုကို ဘယ်သူတွေက လုပ်ဆောင်ခဲ့တယ်ဆိုတာ ထုတ်ပြန်ထားတာမျိုးမရှိသေးပါဘူး။

ပြီးခဲ့တဲ့ မေလ ၄ ရက်ညပိုင်းက နောင်ကုန်းရွာ၊ ပေါက်မြောင်းတံတားအနီးက ဓာတ်တိုင် ၂ တိုင်ကို လက်နက်ကိုင်အဖွဲ့တခုက မိုင်းထောင်ဖောက်ခွဲခဲ့လို့ ဓာတ်တိုင်တွေလဲကျ ပျက်စီးခဲ့တာပါ။

ဓါတ်အားလိုင်းမှာ ပဲနွယ်ကုန်း – ကျောက်ကြီးကို သွယ်တန်းထားတဲ့ 33 Kv ဓာတ်အားလိုင်း ဖြစ်ပြီး ကျောက်ကြီးမြို့ထဲမှာ မီးပြတ်တောက်နေတာ ၅ ရက်ခန့် ရှိပြီလို့ ဆိုပါတယ်။

စာတည်း – 007

ကဝ၊ မေ ၇၊ ၂၀၂၃။

ပဲခူးတိုင်း၊ ကဝမြို့ပေါ်က လူငယ် ၂ ဦး ဧပြီလ ၂၇ ရက်နေ့က ဖမ်းဆီးခံရပြီးနောက် ၁၀ ရက်အကြာ မေလ ၆ ရက်မနေ့ကအထိ အဆက်အသွယ်ပြတ်တောက်နေတယ်လို့ သိရပါတယ်။

ဖမ်းဆီးခံရသူတွေဟာ ကဝမြို့၊ အမှတ် ၁ ရပ်ကွက်နဲ့ ၃ ရပ်ကွက်မှာနေထိုင်တဲ့ အသက် ၂၅ နှစ်အရွယ် ကိုခန့်ဦးကိုနဲ့ ကိုဖြိုးဝေကျော်တို့ဖြစ်ပြီး၊ သူတို့ ၂ ဦးဟာ ကဝမြို့နယ်၊ မုဒုကျေးရွာကို ရောက်ရှိနေချိန် စစ်ကောင်စီတပ်ဖွဲ့တွေရဲ့ ဖမ်းဆီးတာကိုခံခဲ့ရတာလို့ ဒေသတွင်းသတင်းရင်းမြစ်တဦးက မြေလတ်အသံကို ပြောပါတယ်။

“သူတို့က မုဒုရွာကိုရောက်နေတဲ့အချိန် ဖမ်းခံလိုက်ရပြီး စစ်ကြောရေးပို့လိုက်တယ်လို့ဘဲ သိရတယ်။ ဘာကြောင့်ဖမ်းခံရတယ်ဆိုတာရော အခုထိအဆက်အသွယ်ပြတ်နေပြီး ဘာမှမသိရသေးဘူး။ သူတို့ရဲ့မိသားစုဝင်တွေလည်း တခုခုဖြစ်သွားမှာ စိုးရိမ်နေကြတယ်” လို့ ပြောပါတယ်။

သူတို့ ၂ ဦးကိုဖမ်းဆီးပြီးနောက် သက္ကလမြို့ရဲစခန်းကို ခေါ်ဆောင်သွားကာ အဲ့ဒီကနေတဆင့် ပဲခူးမြို့၊ တပ်မ ၇၇ စစ်ကြောရေးကို ပို့ဆောင်လိုက်တယ်လို့သာသိရပြီး မိသားစုဝင်တွေနဲ့အဆက်အသွယ်ပြတ်တောက်နေတယ်လို့ ဆိုပါတယ်။

ဒါ့အပြင် အဲ့ဒီ ဧပြီလ ၂၇ ရက်နေ့ တရက်တည်းမှာဘဲ ကိုခန့်ဦးကိုနဲ့ ကိုဖြိုးဝေကျော်တို့အပြင် မုဒုကျေးရွာက ဒေသခံအမျိုးသား ၆ ဦးကိုလည်း စစ်ကောင်စီတပ်က ဖမ်းဆီးခေါ်ဆောင်သွားခဲ့တယ်လို့ သိရပါတယ်။

စာတည်း-ရင်ငြိမ်း

ပဲခူး၊ မေ ၆၊ ၂၀၂၃။

ပဲခူးတိုင်း၊ သာယာဝတီခရိုင်၊ သုံးဆယ်မြို့၊ ဗေဒင်ကုန်းရပ်ကွက်မှာ နေထိုင်ကြတဲ့ မိသားစု ၁၈ စုရဲ့ နေအိမ် ၁၈ လုံးကို သမဝါယမအသင်းစုရဲ့မြေနဲ့ မလွတ်ကင်းလို့ဆိုပြီး မေလ ၁၀ ရက်နေ့ နောက်ဆုံးထား ဖြိုဖျက်ဖယ်ရှားပေးဖို့ ခြိမ်းခြောက်ပြောဆိုလာတဲ့အတွက် ဖျက်ပေးနေရတယ်လို့ ဒေသခံတွေက ပြောပါတယ်။

ယနေ့ မေလ ၆ ရက်နေ့မှာတော့ ဖယ်ရှားခိုင်းခံရသူတွေထဲက မိသားစုဝင် ၇ စုက နေအိမ်တွေကို စတင်ဖျက်သိမ်းနေပြီး လက်ရှိမှာတော့ ၂ အိမ်ဖျက်ပြီးသွားပြီလို့ သိရပါတယ်။

“သူတို့တွေက ဒီနေရာမှာနေလာတာ နှစ်ပေါင်း ၅၀ ကျော်ရှိပြီ။ သူတို့နေအိမ်တွေကို သမဝါယပိုင်မြေထဲမှာ ပါနေတယ်။ ဖယ်ရှားပေးရမယ်။ မဖယ်ရှားရင်ဖမ်းဆီးပြီး ထောင်ချလိုက်မယ်။ ထောင်တွေကို ချဲ့ပေးရမလားလို့ ပြောခဲ့တယ်။ လက်မှတ်ကိုလည်း အတင်းအဓမ္မထိုးခိုင်းလို့ထိုးခဲ့ရတယ်”လို့ ဖယ်ရှားခံရသူတွေနဲ့နီးစပ်သူ တဦးက ဆိုပါတယ်။

လက်ရှိမှာ အဆိုပါနေရာကနေ ဖယ်ရှားပေးရမယ့် မိသားစုတွေမှာ နစ်နာကြေးပိုက်ဆံတပြားမှမရရှိသလို အိမ်တွေကိုပါ ဖြိုဖျက်ပေးရမှာဖြစ်လို့ အခက်အခဲတွေအများကြီးဖြစ်လာနိုင်တယ်လို့ သူကဆက်ပြောပါတယ်။
စစ်ကောင်စီတပ်သား ၄ ဦး၊ သုံးဆယ်မြို့မရဲစခန်းမှူး၊ မြေစာရင်းဦးစီး၊ သမဝါယမအသင်းစု ဥက္ကဋ္ဌ၊ ထွေ/အုပ်ဦးစီးမှူး၊ ရပ်ကွက်အုပ်ချုပ်ရေးမှူးတို့က ဧပြီလ ၂၆ ရက်နေ့မှာ မိသားစု ၁၈ စုကို မြို့နယ်ထွေအုပ်ရုံးကို ခေါ်ကာ ဖယ်ရှားဖို့လက်မှတ်ထိုးခိုင်းပြီး ဖိအားပေးခြိမ်းခြောက်ပြောဆိုခဲ့တာဖြစ်တယ်လို့ ပြောကြပါတယ်။

“ကျနော်တို့က လက်လုပ်လက်စားတွေပါ။ တနေ့လုပ်မှ တနေ့စားနေရတာ။ အိမ်တွေဖြိုဖျက်ပြီး ဖယ်ပေးလိုက်ရင် တော်တော်လည်း ဒုက္ခတွေဖြစ်သွားမယ်။ မဖယ်ရှားရင်လည်း အသရော်ရွာက သမချေးငွေပြန်မဆပ်တဲ့ ကလေးတွေနဲ့အမျိုးသမီးတွေ ဖမ်းဆီးခံရတာကို နမူနာကြည့်ထားဆိုပြီး ခြိမ်းခြောက်ပါတယ်” လို့ ဆိုပါတယ်။

လက်ရှိဖယ်ရှားပေးရမယ့်မိသားစုတွေဟာ ၁၉၅၂ ခုနှစ်ကတည်းက သုံးဆယ်မြို့ သူဌေးဦးတင်စွမ် ဆန်စက်မှာ အလုပ်သမားတွေအဖြစ် လုပ်ကိုင်ခဲ့ကြတာကြောင့် လုပ်သားတန်းလျားအဖြစ်ထားပြီး နေခဲ့ကြသူတွေ ဖြစ်တယ်လို့ သိရပါတယ်။

အဲဒီနောက် ဦးတင်စွမ်က သမဝါယမအသင်းစုကို အဆိုပါမြေနေရာကို ရောင်းချခဲ့ပေမယ့် လုပ်သားတန်းလျားမှာ နေထိုင်ကြသူတွေဟာ မပြောင်းရွေ့ပဲ အဲဒီနေရာမှာဘဲ နေထိုင်ခဲ့ကြတာဖြစ်တယ်လို့ သိရပါတယ်။

ဒါ့အပြင် NLD လက်ထက်ကချေးယူခဲ့တဲ့ သမဝါယမငွေကို ပြန်မဆပ်နိုင်သေးလို့ဆိုကာ မေလ ၅ ရက်နေ့က သာယာဝတီမြို့နယ်၊ အသရော်ကျေးရွာက အမျိုးသမီး ၁၃ ဦးနဲ့ အမျိုးသား ၂ ဦးကို စစ်ကောင်စီတပ်သားတွေက ထော်လာဂျီနဲ့သာယာဝတီမြို့ပေါ်ကို ဖမ်းခေါ်ခဲ့တာမှာ မိခင်ဖြစ်သူနဲ့အတူ နို့စို့အရွယ်ကလေးငယ်တချို့လည်း ပါသွားခဲ့တယ်လို့ သိရပါတယ်။

စာတည်း – 007