ပဲခူး၊ ဇန်နဝါရီ ၄၊ ၂၀၂၂။

ပဲခူးတိုင်း၊ ပဲခူးမြို့ရှိ ဗကသခေါင်းဆောင်တဦးဖြစ်တဲ့ ကိုမျိုးကိုရဲ့နေအိမ်ကို စစ်ကောင်စီတပ်တွေက ဇန်နဝါရီ ၃ ရက်နေ့ ဒီကနေ့မှာ ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

“နှစ်သစ်မှာတော့ အိမ်ကိုသော့ခတ်တာကနေ ချိတ်ပိတ်တဲ့အဆင့်ကို တဆင့်တိုးသွားတယ်။ တော်လှန်ရေးမှာပါဝင်နေတဲ့သူတိုင်းဟာ ပေးဆပ်မှုပေါင်းစုံနဲ့ ပေးဆပ်ပြီး၊ ဒီပွဲကိုတိုက်ယူနေကြတာပါ။ အောင်ပွဲကိုလည်းတန်းတူခံစားချင်မိပါတယ်” လို့ ကိုမျိုးကိုကိုက သူရဲ့လူမူ့ကွန်ယက်စာမျက်နှာမှာရေးသားဖော်ပြထားပါတယ်။

ပြီးခဲ့တဲ့ ဧပြီလ ၁၀ ရက်နေ့ကစတင်ပြီး သူရဲ့နေအိမ်ကို စစ်ကောင်စီတပ်တွေက အင်အား ၁၀၀ ကျော်နဲ့ လာရောက်ရှာဖွေပြီး အိမ်ထဲမှာရှိတဲ့ ရွှေထည်ပစ္စည်းတချို့နဲ့ အိမ်ထဲက တန်ဖိုးကြီးတဲ့အရာတွေကို သိမ်းယူသွားခဲ့တယ်လို့လည်း သိရပါတယ်။

မကြာခဏဆိုသလို စစ်ကောင်စီတပ်တွေက နေအိမ်ကို လာရာက်စစ်ဆေးမှု‌တွေ ၁၀ ကြိမ်ထက်မနည်း ပြုလုပ်လေ့ခဲ့ပြီး၊ အိမ်ကိုသော့ခတ်ခဲ့တယ်လို့လည်း မိသားစုနဲ နီးစပ်သူတွေ
ကပြောပါတယ်။

ကိုမျိုးကိုကိုဟာ မြန်မာအစ္စလာရ် လူငယ်တဦးဖြစ်ပြီး သူရဲ့အကိုဝမ်းကွဲတဦးမှာလည်း ဧပြီလ ၉ ရက်နေ့က သူတို့အိမ်ရဲ့ လမ်းထိပ်မှာပဲစစ်တပ်ရဲ့အနီးကပ်ပစ်သတ်ခြင်းကြောင့် ကျဆုံးခဲ့ရပါတယ်။

ပဲခူး၊ ဇန်နဝါရီ ၂၊ ၂၀၂၂။

ပဲခူးတိုင်း အနောက်ခြမ်းသာယာဝတီခရိုင်၊ မင်းလှမြို့နယ် ၊စိန်ကန့်လန့်ကျေးရွာအနီးရှိ တပ်မ ၆၆ လက်အောက်ခံ ခလရ (၁)တပ်က တပ်ရင်းမှူးအပါအဝင် ၁၀ ဦးကျော် ရှေ့တန်းမှာ တိုက်ပွဲကျခဲ့တယ်လို့ ဒေသတွင်းစစ်ကောင်စီနဲ့ နီးစပ်သူတွေကဆီက သိရပါတယ်။

ဒီဇင်ဘာလ ၃၁ ရက်နေ့တိုက်ပွဲမှာ သေဆုံးခဲ့ခြင်းဖြစ်ပြီး၊ ရှေ့တန်းကိုမသွားခင် မင်းလှမြို့ပေါ်က တအိမ်တယောက်ထွက်ပြီး ပန်းကုံးစွပ်ကြဖို့ အမိန့်ပေးထားတဲ့ အစီအစဉ်လည်းပျက်သွားခဲ့တယ်လို့ ဒေသခံတွေက ပြောပါတယ်။

သေဆုံးခဲ့တဲ့ ရှေ့တန်းစစ်မြေပြင်နေရာကို အတိအကျမသိရပေမယ်၊ ကရင်နီပြည်နယ်အတွင်း ဖြစ်နိုင်ကြောင်းနဲ့ ချောင်ပိတ်တိုက်ခိုက်ခံလိုက်ရတာဖြစ်တယ်လို့လည်း သေဆုံးသွားတဲ့ စစ်ကောင်စီတပ်ဖွဲ့ဝင်တွေရဲ့ မိသားစုနဲ့ နီးစပ်သူတွေက ပြောပါတယ်။

အဆိုပါစစ်တပ်နဲ့နီးစပ်သူအသိုင်းအဝိုင်းရဲ့ Facebook စာမျက်နှာတွေမှာလည်း သေဆုံးသွားတဲ့ တပ်ရင်းမှူးနဲ့ ပတ်သက်လို့ ဝမ်းနည်းကြောင်း ရေးသားဖေါ်ပြထားကြပါတယ်။

ပြီးခဲ့တဲ့ ရက်ပိုင်းကလည်း တပ်မ ၆၆ လက်အောက်ခံ ခလရ (၁) စိန်ကန့်လန့်တပ်က စစ်ယူနီဖေါင်းဝတ်ထားတဲ့ စစ်သားမိန်းမတွေကို တင်ဆောင်ထားတဲ့ စစ်ကား ၂ စီးဟာ မင်းလှတာဆုံဘက်ကို စစ်ကြောင်းချီတက်သွားတဲ့ပုံစံနဲ့ တက်သွားကြောင်းတွေ့မြင်ခဲ့ရကြောင်း ဒေသခံတွေက ပြောပါတယ်။

ပဲခူး၊ ဒီဇင်ဘာ ၂၇၊ ၂၀၂၁။

ပဲခူးတိုင်း၊ သာယာဝတီအကျဉ်းထောင်မှာ ဖမ်းဆီးထိန်းသိမ်းခံထားရတဲ့ သတင်းထောက် ကိုငြိမ်းချမ်းဝေရဲ့ ဒီကနေ့ရုံးချိန်းကို လာရောက်ခဲ့တဲ့ သူရဲ့ဇနီးသည်ကို သာယာဝတီခရိုင်တရားရုံးမှာပဲ စစ်ကောင်စီက ဖမ်းဆီးလိုက်တယ် ဒေသခံတွေဆီက သိရပါတယ်။

ဖမ်းဆီးခံရသူမှာ Bago Weekly ဂျာနယ် သတင်းထောက် ကိုငြိမ်းချမ်းဝေရဲ့ဇနီး မဝေဝေလွင်ဖြစ်ပြီး၊ ပုဒ်မ ၁၂၃(ဂ) နဲ့ သာယာဝတီခရိုင်တရားရုံးမှာ ရုံးထုတ်မှာဖြစ်လို့ အကြော်အလှော်တွေလာပို့ပေးစဉ် ဖမ်းဆီးခံရကာ၊ ဘာကြောင့် ဖမ်းဆီးတယ်ဆိုတာကိုတော့ မသိရသေးဘူးလို့ မိသားစုနဲ့ နီးစပ်သူတဦးကပြောပါတယ်။

“ဖမ်းတာက (သာယာဝတီခရိုင်) တရားရုံးထဲမှာပဲ ဖမ်းလိုက်တာ။ လက်ရှိ ထိန်းသိမ်းထားတယ်ပဲ သိရသေးတယ်။ ဘာနဲ့ ဆွဲထားတယ် ပုဒ်မ ဘယ်လောက်လဲ မသိရသေးဘူး၊ ဖမ်းသွားတာ သူနဲ့အတူ ရုံးချိန်းလိုက်သွားတဲ့ အသိတွေက လှမ်းပြောတယ်။” လို့ မိသားစုနဲ့ နီးစပ်သူတဦးက ပြောပါတယ်။

ကိုငြိမ်းချမ်းဝေဟာ ပဲခူးတိုင်းဒေသကြီးအနောက်ခြမ်း၊ သာယာဝတီခရိုင်၊ လက်ပံတန်းမြို့နယ်မှာနေထိုင်တဲ့ သတင်းထောက် တဦးဖြစ်ပြီး၊ စစ်ကောင်စီက ပြီးခဲ့တဲ့ ဒီဇင်ဘာ ၁၆ ရက်နေ့က သာယာဝတီထောင်ရုံးချိန်းမှာ ပုဒ်မ ၅၀၅(က) အမှုအတွက် ထောင်ဒဏ် ၃ နှစ်အမိန့်ချမှတ်ခံထားရကာ၊ နောက်ထပ် ပုဒ်မ ၁၂၃ (ဂ) နဲ့ ထပ်မံအဖွင့်ခံထားရပြီး ဒီကနေ့ သာယာဝတီခရိုင် တရားရုံးမှာ သူရဲ့ ဇနီးသည်ကို ထပ်မံဖမ်းဆီးခဲ့တာ ဖြစ်ပါတယ်။

ကိုငြိမ်းချမ်းဝေကို လက်ပံတန်းမြို့နယ်၊ ခမုံကျေးရွာက နေအိမ်မှာ မတ်လ ၁၉ ရက်နေ့ ညပိုင်းမှာ ဝင်ရောက်ဖမ်းဆီးခဲ့တာဖြစ်ပြီး၊ သူ့ရဲ့ဇနီးသည်ကို ဒီကနေ့မှာဖမ်းဆီးခံလိုက်ရတာဖြစ်ပါတယ်။ သူတို့ဇနီးမောင်နှံ ၂ ဦးမှာ နှစ်အရွယ်သမီး ၁ ဦးကျန်ခဲ့ပြီး အဖွားဖြစ်သူက ခေါ်ယူစောင့်ရှောက်ထားရတယ်လို့ သိရပါတယ်။

ကိုငြိမ်းချမ်းဝေဟာ ပဲခူးမြို့အခြေစိုက် Bago Weekly Journal မှာ နယ်မြေခံသတင်းထောက်အနေနဲ့ သတင်းတွေရေးသားပြီး သူရဲ့ ဂျာနယ်တိုက်ကို မတ်လထဲမှာ စစ်ကောင်စီက ဝင်ရောက်ဖျက်ဆီးခဲ့ကာ၊ သတင်းဌာနရဲ့ Facebook လူမှုကွန်ရက်စာမျက်နှာကိုပါ နည်းပညာအရ ပိတ်ခံထားရတဲ့ သတင်းဌာနတခုဖြစ်ကြောင်း သိရပါတယ်။

ပဲခူး၊ ဒီဇင်ဘာ ၂၅၊ ၂၀၂၁။

ဘူတာပိုင်မြေတွေမှာ နေထိုင်သူတွေ ဒီဇင်ဘာလအကုန်အပြီးဖယ်ပေးရမှာဖြစ်ပြီး မဖယ်ပေးသူတွေကို စစ်ကောင်စီက အင်အားသုံးပြီး ဖယ်ရှားမယ်လို့ အကြောင်းကြားစာတွေ သက်ဆိုင်ရာမြို့တွေမှာ ထုတ်ပြန်ထားပါတယ်။

ပြည်၊ လက်ပံတန်း၊ ပေါင်းတည် မြို့တွေက ဘူတာ‌ပိုင်မြေတွေမှာ နေတဲ့ သူတွေကို အဲ့ဒီအကြောင်းကြားစာ ပို့ထားခဲ့ပြီး အဲဒီနို့တစ်စာ အပိုဒ်၂ မှာ ရေးသားထားတာကတော့ “အိမ်ဥပစာမှထွက်ခွာ၍မသွားလျင် သင်သည် အနိုင်ထက်ပြုမူမူဖြင့် အဲဒီအိမ်ကနေ ဖယ်ရှားခြင်းခံရလိမ့်မယ်”လို့ဖော်ပြထားတယ်လို့ဆိုပါတယ်။

“ဇီးဖြူကုန်းကိုပေးထားတဲ့စာကိုဖတ်ကြည့်တော့ ဒီဇင်ဘာ၃၁ရက်‌ နောက်ဆုံးထားပြီးဖယ်ရှားပေးရမယ်လို့အကြောင်းကြားစာထဲမှာပါတယ် ဖယ်မပေးရင်အတင်းဝင်ဖျက်မယ့်သဘောလည်းရေးထားတယ်”လို့ လက်ပံတန်းမြို့ခံတဦးက မြေလတ်အသံကို ပြောပါတယ်။

ပေါင်းတည်မြို့ကနို့တစ်စာပို့ခံထားရတဲ့သူတွေဟာ ကျူးကျော်သူတွေမဟုတ်ပဲ မီးရထားဌာနကိုအခပေးနေထိုင်သူတွေဖြစ်တယ်လို့ သိရပါတယ်။

“ပေါင်းတည် ၃ လမ်းက စား‌သောက်ဆိုင်ခန်းတွေက ကျူးကျော်ဆိုင်တွေမဟုတ်ဘူး မီးရထားကိုအခပေးနေတာ အဲဒါကလည်း အရင်စစ်အာဏာရှင်ခေတ်က ဆောက်ပြီးငှားစားနေတာ ကျူးကျော်တာမဟုတ်ဘူး အခုတော့ညှိနိူင်းနေတယ်လို့ကြားတယ် “ လို့ မြို့ခံတဦး‌က ပြောပါတယ်။

ဟင်္သာတခရိုင်အတွင်းကဘူတာပိုင်မြေမှာ နေထိုင်သူ‌တွေကိုလည်း ဒီဇင်ဘာလအတွင်းအပြီးဖယ်ရှားပေးဖို့ စစ်ကောင်စီကအကြောင်းကြားထားတယ်လို့လည်း သိရပါတယ်။

မီးရထားနယ်မြေအတွင်း ဝင်ရောက်နေထိုင်သူအများစုဟာ မီးရထားဝန်ထမ်းတွေရဲ့သားစဥ်‌မြေးဆက်‌‌ နေထိုင်လာကြတဲ့မိသားစုဝင်‌တွေဖြစ်ပြီး ဖယ်ရှားခံရရင် အိုးအိမ်မဲ့သူတွေဖြစ်သွားနိုင်တယ်လို့ သိရပါတယ်။

ပဲခူး၊ ဒီဇင်ဘာ ၂၃၊ ၂၀၂၁။

ပဲခူးတိုင်းအနောက်ခြမ်း ပေါင်းတည်အကျဥ်းထောင်မှာ ပုဒ်မ၅၀၅ က နဲ့ အကျဥ်းချခံထားရသူ ၉ ဦးကို ဒီနေ့မနက်မှာ အကျဥ်းထောင်တရားရုံးကနေ ထောင်ဒဏ်၂နှစ်စီ ချမှတ်ခဲ့တယ်လို့ မိသားစုဝင်တဦးကပြောပါတယ်။

သူတို့တွေဟာပြီးခဲ့တဲ့ မတ်လ ၂၇ရက် တော်လှန်ရေးနေ့က ပေါင်းတည်မြို့မှာငြိမ်းချမ်းစွာဆန္ဒပြနေတုန်း စစ်ကောင်စီက ပစ်ခတ်ဖြိုခွင်းလို့ ဖမ်းဆီးခံခဲ့ရသူတွေ ဖြစ်ပါတယ်။

“အခုမနက်ပဲ ထောင်တရားရုံးကနေ ပုဒ်မ ၅၀၅ နဲ့ တရားစွဲခံရသူ ၉ဦးကို ထောင်ဒဏ် ၂ နှစ်စီ ချမှတ်လိုက်တယ်၊ အားလုံးက အုန်းနဲစမ်းရွာကပါ၊ အဲ့အထဲမှာမှ ထက်ကိုကိုလင်းဆိုတဲ့ တယောက်ကကျ ပုဒ်မ ၃၀၇နဲ့ ကပ်ခံရပြီး ၃၀၇အတွက်က ထောင်တနှစ်ချလိုက်တော့ သူက သုံးနှစ်ဖြစ်သွားတယ်” လို့ လိုက်ပါအကျိုးဆောင်ပေးနေသူတဦးက ပြောပါတယ်။

သူတို့အားလုံးဟာတရွာတည်းသားတွေဖြစ်ပြီး ချုပ်နှောင်ခံနေရတာ ၉ လရှိပြီဖြစ်ကြောင်း သိရပါတယ်။

ပဲခူး၊ ဒီဇင်ဘာ ၁၈၊ ၂၀၂၁။

ပဲခူးတိုင်းဒေသကြီးအနောက်ခြမ်း၊ သာယာဝတီခရိုင်၊ လက်ပံတန်းမြို့နယ်က သတင်းထောက် တဦးဖြစ်တဲ့ ကိုငြိမ်းချမ်းဝေကို စစ်ကောင်စီက ဒီဇင်ဘာ ၁၆ ရက်နေ့က သာယာဝတီထောင်ရုံး ချိန်းမှာ ပုဒ်မ ၅၀၅(က)အမှုအတွက် ထောင်ဒဏ် ၃ နှစ်အမိန့်ချလိုက်ကြောင်း သိရပါတယ်။

ကိုငြိမ်းချမ်းဝေကို နောက်တိုးအမှုတခုအနေနဲ့ ပုဒ်မ ၁၂၃ (ဂ)နဲ့ ပါ စစ်ကောင်စီက အမှုဖွင့်ထပ်ဖွင့်ထားပြီး၊ သူကိုဖမ်းဆီးချိန်မှာ လက်ပံတန်းမြို့နယ်၊ ခမုံဆိပ်ကျေးရွာက သူတိမ်းရှောင်နေတဲ့နေရာမှာ ဖမ်းဆီးခဲ့ခြင်းဖြစ်ပါတယ်။

အာဏာသိမ်းပြီးနောက်စစ်ကောင်စီက ပုဒ်မ ၅၀၅(က)ဖွင့်ထောင်ချခံရတဲ့ သတင်းသမားတွေကိုပြန်လွှတ်ပေးခဲ့ပေမယ့် ပုဒ်မ၅၀၅ (က)နဲ့ အမှုရင်ဆိုင်နေရတဲ့ ကိုငြိမ်းချမ်းဝေကတော့ ထောင် ၃ နှစ် အမိန့်ချခံလိုက်ရကြောင်း သိရပါတယ်။

ကိုငြိမ်းချမ်းဝေကို မတ်လ ၁၉ ရက်နေ့မှာ ပုဒ်မ၅၀၅ (က)နဲ့စစ်ကောင်စီက ဖမ်းဆီးအမှုဖွင့်ခဲ့တာဖြစ်ပြီး ဒီဇင်ဘာလ ၁၆ ရက်နေ့မှာ၎င်းပုဒ်မအတွက် ရက်ပေါင်း ၂၇၃ ရက်ကြာ တရားရင်ဆိုင်အပြီးမှာ ထောင်ဒဏ် ၃ နှစ်ချမှတ်လိုက်တာဖြစ်ပါတယ်။

ကိုငြိမ်းချမ်းဝေမှာ ပဲခူးမြို့အခြေစိုက် Bago Weekly Journal မှာ နယ်မြေခံသတင်းထောက်အနေနဲ့ သတင်းတွေရေးသားပြီး သူရဲ့ ဂျာနယ်တိုက်ကို မတ်လထဲမှာ စစ်ကောင်စီက ဝင်ရောက်ဖျက်ဆီးခဲ့ကာ၊ သတင်းဌာနရဲ့ Facebook လူမှုကွန်ရက်စာမျက်နှာကိုပါ နည်းပညာအရ ပိတ်ခံထားရတဲ့ သတင်းဌာနတခုဖြစ်ကြောင်း သိရပါတယ်။

ပဲခူး၊ ဒီဇင်ဘာ ၁၄၊ ၂၀၂၁။

ပဲခူးတိုင်းအနောက်ခြမ်း ဇီးကုန်းမြို့မှာစစ်ကောင်စီက ဒီဇင်ဘာလဆန်းပိုင်းကစလို့ နေ့စဥ်ဆိုသလိုလူငယ်တွေကိုဖမ်းစီး စစ်ဆေးနေကြောင်း ဒေသခံတွေဆီက သိရပါတယ်။

စစ်ကောင်စီကအခုလို ဖမ်းဆီးတာ​ကြောင့်လူငယ်တွေအဟာ နေအိမ်မှာမအိပ်ရဲပဲတိမ်းရှောင်နေကြကြောင်း သိရပါတယ်။

“မြို့ပေါ်ကလူငယ်တွေစစ်ကောင်စီကနေ့စဥ်ဆိုသလိုဖမ်းတာကိုခံနေရတယ် နှစ်ရက်သုံးကြာရင်ပြန်လွှတ်တယ် ဘာမှမဟုတ်ဘူးမဲမဲမြင်ရာ ဖမ်းနေကြတာအခုလူငယ်တွေက အိမ်မှာတောင်ရဲရဲမနေရဲကြဘူးအခုဆို ၈ဦး၉ဦးလောက်ရှိနေပြီ မြို့ပေါ်ရပ်ကွက်က ကလေးတွေအများစုပဲ”လို့ မြို့ခံတဦးကပြောပါတယ်။

ဇီးကုန်းမြို့မှာရပ်ကွက် ၅ ခုရှိကြောင်း ဖမ်းဆီးခံရသူအများစုဟာ အပစ်မရှိသူတွေဖြစ်ကြောင်း အခုလိုဖမ်းဆီးခံရတဲ့အတွက် ကလေးငယ်တွေအပြင် မိဘများပါစိုးရိမ်ထိတ်လန့်နေကြောင်းနဲ့ဖမ်းဆီးစစ်မေးခံရသူတွေဟာ ပြန်လွှတ်လာချိန်မှာလည်း ကြောက်ရွံ့စိတ်တွေများနေတာကိုတွေ့ရကြောင်း ဖမ်းဆီးခံရသူနဲ့နီးစပ်သူတဦးကမြေလတ်အသံကိုပြောတယ်။

အခုလိုလူငယ်တွေဖမ်းဆီးခံရတာဟာဇီးကုန်းPDFက အုပ်ချုပ်ရေးမှူးတွေကိုလာမယ့်ဒီဇင်ဘာ၁၅ရက်နေ့အထိနောက်ဆုံးထားနုတ်ထွက်ကြရန် သတိပေးထားတဲ့အတွက်စစ်ကောင်စီကအခုလိုလိုက်လံဖမ်းဆီးနေတာလည်း ဖြစ်နိုင်ကြောင်း မြို့ခံတချို့က သုံးသပ်ပြောဆိုနေကြပါတယ်။