မြေလတ်အသံ၊ မတ် ၁၃၊ ၂၀၂၅။

ပဲခူးတိုင်းအတွင်းက စစ်ကောင်စီစစ်ဆေးရေးဂိတ်တွေမှာ မှတ်ပုံတင်နံပါတ်၊ နာမည်ကို ဆော့ဖ်ဝဲလ်မှာ ရိုက်ထည့်ပြီး စစ်ကောင်စီတပ်နဲ့ ရဲတပ်ဖွဲ့ကို စွန့်ခွာထွက်ပြေးလာတဲ့ စစ်ပြေး၊ ရဲပြေးတွေကို ရှာဖွေဖမ်းဆီးနေတယ်လို့ ပဲခူးတိုင်းရဲတပ်ဖွဲ့သတင်းရင်းမြစ်တွေထံက သိရပါတယ်။

မတ်လဒုတိယပတ်အတွင်းကစတင်ကာ အထက်ပါအတိုင်းဖမ်းဆီးနေတာဖြစ်ပြီး ဆော့ဖ်ဝဲလ်အသုံးပြုဖမ်းဆီးဖို့ စစ်ကောင်စီတပ်နဲ့ရဲပူးပေါင်းတပ်ဖွဲ့တွေ ထပ်မံပို့ဆောင်ထားတယ်လို့ ဆိုပါတယ်။

“ အဲ့ဒီလိုဖမ်းဆီးဖို့ စစ်ဆေးရေးဂိတ်တွေမှာTablet နဲ့ ဂိတ်ကြီးရင် ၃/၄ ယောက်၊ ဂိတ်သေးရင် ၁ ယောက် အဲ့ဒီလို သပ်သပ်ချပေးထားတယ်။ စစ်ပြေး၊ ရဲပြေး အရမ်းများလာလို့ အဲ့ဒီလိုလုပ်တာ။ အရင်လိုမှတ်ပုံတင်ကအလုပ်အကိုင်နေရာမှာ ကျောင်းသားတို့၊ ကုန်သည်တို့ ပြောင်းထားလည်း မရတော့ဘူး၊ လူပုံစံအနေအထားကြည့်ပြီး အဲ့ဆော့ဖ်ဝဲလ်ထဲကို မှတ်ပုံတင်က နာမည်၊ နံပါတ်ရိုက်ထည့်လိုက်တာနဲ့ စစ်ပြေး၊ရဲပြေးဆိုရင် အချက်အလက် အကုန်ပေါ်တယ်။” လို့ ပဲခူးတိုင်းရဲတပ်ဖွဲ့သတင်းရင်းမြစ်က မြေလတ်အသံကို ပြောပါတယ်။

မှတ်ပုံတင်စစ်ဆေးတဲ့ ဆော့ဖ်ဝဲလ်အပြင် စစ်ကောင်စီက ထပ်မံထုတ်ပေးထားတဲ့ စမတ်ကတ်တွေကနေတဆင့်လည်း ဖမ်းဆီးခံရမှုတွေရှိတယ်လို့ ဆိုပါတယ်။

အဆိုပါဆော့ဝဲလ်အသုံးပြုဖမ်းဆီးမှုတွေစတင်ခဲ့တဲ့ မတ်လဒုတိယပတ်အတွင်းမှာတင် ပဲခူးတိုင်းအတွင်းက စစ်ဆေးရေးဂိတ်တွေမှာ ရဲပြေး၊ စစ်ပြေးတွေ အများအပြား ဖမ်းဆီးခံထားရတယ်လို့ သိရပါတယ်။

စစ်ကောင်စီတပ်ကိုစွန့်ခွာလာတဲ့ စစ်ကောင်စီတပ်ဖွဲ့နဲ့ရဲတပ်ဖွဲ့ဝင်တွေအနေနဲ့ ပြန်လည်ဖမ်းဆီးခံရပါက ရှေ့တန်းစစ်မြေပြင်တွေကို ပို့ဆောင်ခံရနိုင်တာကြောင့် စစ်ကောင်စီစိုးမိုးနယ်မြေတွေမှာ မနေကြဖို့ CDM တပ်မတော်သား ဗိုလ်ကြီး ဇင်ယော်က အကြံပြုပါတယ်။

“ မြန်မာပြည်တွင်း စစ်ကောင်စီစိုးမိုးနယ်မြေတွေမှာဆိုရင်တော့ တဂိတ်မဟုတ်တဂိတ်မှာ ပြန်ဖမ်းခံရဖို့များတယ်။ စစ်ဆေးရေးဂိတ်တွေကို ရှောင်နိုင်တဲ့လမ်းတွေကို ရွေးပြီးသွားနိုင်မှ အဆင်ပြေမယ်။” လို့ သူက ပြောပါတယ်။

မန္တလေး၊ မေ ၂၅၊ ၂၀၂၅။

လူငယ်တွေ‌‌‌‌‌‌‌‌ဦးစီးပြုလုပ်တဲ့ မန္တလေးက ငလျင်ရန်ပုံငွေပန်းချီပြပွဲကို စစ်ကေင်စီတပ်က ဝင်စီးနင်းပြီး ပန်းချီပညာရှင်တွေကိုဖမ်းဆီးသွားတယ်လို့ ဒေသခံတွေဆီက သိရပါတယ်။

မန္တလေး ၇၉ လမ်း၊ ၂၇ လမ်းနဲ့ ၂၈ လမ်းကြားက လက်ဖက်ရည်ဆိုင်အပေါ်ထပ်မှာပြုလုပ်မယ့် “နမ္မတီး” ငလျင်ဒဏ်သင့် ပြည်သူများကူညီရေးပန်းချီပြပွဲ၊ ပြိုင်ပွဲနဲ့ စာအုပ်ရောင်းချပွဲအတွက်ပြင်ဆင်နေချိန် မေ ၂၂ ရက်ညနေပိုင်းမှာ စစ်ကောင်စီတပ်က ဝင်ရောက်စီးနင်းပြီး ပြပွဲဦးဆောင်သူနဲ့ ပန်းချီဆရာတွေကို ဖမ်းဆီးသွားတာလို့ သိရပါတယ်။

“ငလျင် ဘေးသင့်ပြည်သူတွေကို ယာယီအိမ်တွေဆောက်ပေးဖို့ ပြုလုပ်တဲ့ပွဲပါ။ ပထမဆုံး ဖိတ်ထားတဲ့သူတွေကို ပွဲက ခွင့်ပြုချက်မရဘူးလို့ သတင်းကြားတာ။ အဲ့ဒီကနေ ‌‌‌‌‌‌‌‌‌‌‌‌‌‌‌‌‌‌‌‌‌‌ဆက်တိုက် အကုန်လိုက်ဖမ်းတာတဲ့။ အခု တော်တော်များများ အဖမ်းခံထားရတယ်။” လို့ ဖြစ်စဥ်ကိုသိရှိသူနဲ့ နီးစပ်သူတဦးက ပြောပါတယ်။

အဆိုပါပွဲကို မေ ၂၃ ရက်ကနေ ၂၈ ရက်အထိပြုလုပ်ဖို့ စီစဥ်ထားတာဖြစ်ပြီး အခုလိုစီးနင်းဖမ်းဆီးခံရတာကြောင့် ပွဲကိုဖျက်လိုက်ရတယ်လို့လည်း သိရပါတယ်။

စစ်ကောင်စီချန်နယ်တွေမှာတော့ ဒီပြပွဲနဲ့ပတ်သက်ပြီး နိုင်ငံတော်အလံပုံတူပန်းချီပေါ်မှာ နိုင်ငံတော်အကြည်ညိုပျက်စေတဲ့ပုံတွေ ရေးဆွဲကြောင်းသတင်းရတဲ့အတွက် အမှတ် ၈ ရဲစခန်းကိုခေါ်ဆောင်စစ်ဆေးရာ နောက်ဆက်တွဲအကြမ်းဖက်တွေကို ဖမ်းမိတယ်ဆိုပြီး ဖော်ပြထားပါတယ်။

လက်ရှိမှာ အမျိုးသား၊ အမျိုးသမီး ၆ ဦးဝန်းကျင်လောက် အမှတ် ၈ ရဲစခန်းမှာ ဖမ်းဆီးခံထားရတယ်လို့သိရပြီး နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ဒါ့အပြင် ဒီဖမ်းဆီးမှုကြောင့် မေလနောက်ဆုံးပတ်ထဲမှာပြုလုပ်ဖို့စီစဥ်ထားတဲ့ ရန်ပုံငွေ ဂီတဖျော်ဖြေပွဲလည်း ရပ်နားလိုက်ရတယ်လို့ ဒေသခံတွေဆီကသိရပါတယ်။

တောင်ငူ၊ မေ ၁၆၊ ၂၀၂၅။

ပဲခူးတိုင်း၊ တောင်ငူမြို့နယ်၊ ကမ်းနီကျေးရွာအုပ်စု၊ ဂုန်မင်းအိုင်ကျေးရွာကို စစ်ကောင်စီတပ်စစ်ကြောင်းဝင်ရောက်ကာ ရွာခံ ၂၀ ဦးခန့်ကို ဖမ်းဆီးထားပြီး အဲ့ဒီထဲက ဆယ်ကျော်သက်လူငယ် ၂ ဦးဟာ ရိုက်နှက်နှိပ်စက်ခံရလို့ သေဆုံးသွားပြီလို့ ဒေသခံတွေထံက သိရပါတယ်။

မေ ၁၄ ရက် မှာ အင်အား ၂၀၀ ခန့်ပါ စစ်ကောင်စီစစ်ကြောင်းဟာ ဂုန်မင်းအိုင်ရွာအတွင်းဝင်ရောက်လာပြီး ကျေးရွာဘုန်းကြီးကျောင်းအတွင်း အထိုင်ချကာ ဒေသခံတွေကို ဖမ်းဆီးသတ်ဖြတ်နေတာလို့ ဆိုပါတယ်။

“မနေ့ကတော့ စကားမပြောနိုင်တော့ဘူး ပြောတယ်။ ဒီနေ့(မေ ၁၆)တော့ သေပြီလို့ သိရတယ်။ စဖမ်းတဲ့ရက်ကတည်းက ရိုက်နှက်ထားတာ။ တာယာတွေပုံ ထားတော့ သူတို့ကို မီးရှို့၊ မရှို့တော့ မသိရသေးဘူး။ သူတို့(သေဆုံးသူ) ၂ ဦးက စစ်ကြောင်းဝင်ကတည်းက ဖမ်းခံရတာ” လို့ ဒေသ သတင်းရင်းမြစ်တဦးက မြေလတ်အသံကို ပြောပါတယ်။

စစ်ကောင်စီစစ်ကြောင်း ကျေးရွာတွင်းဘုန်းကြီးကျောင်းထဲ စတင်ဝင်လာချိန် ဘုန်းကြီးကျောင်းနံဘေးနေအိမ်တွေက ပြည်သူအချို့၊ ကျောင်းအရှေ့ဆိုင်ကယ်ဖြတ်မောင်းသူတချို့နဲ့ ရွာထဲကနေအိမ်တွေကို လိုက်လံဖမ်းဆီးရာ ရွာခံ ၂၀ ဦးခန့် ဖမ်းဆီးခံခဲ့ရတယ်လို့ ဆိုပါတယ်။

ဖမ်းဆီးခံရသူတွေထဲက ဂုန်မင်းအိုင်ရွာခံ အသက် ၁၇ နှစ်နဲ့ ၁၈ နှစ်အရွယ်ခန့်ရှိ စုပ်လုံးနဲ့ ထွန်းအေးတို့ ၂ ဦးမှာ ၎င်းတို့ဖမ်းဆီးခံရတဲ့ မေ ၁၅ ရက်က စတင်ကာ ရိုက်နှက်နှိပ်စက်ခဲ့ရပြီး အဲ့ဒီဒဏ်ရာတွေနဲ့ သေဆုံးသွားခဲ့တာလို့ သိရပါတယ်။

ဒီကနေ့ မေ ၁၆ ရက်အထိ စစ်ကောင်စီတပ်ဖွဲ့ဝင်တွေအထိုင်ချထားတဲ့ ကျေးရွာဘုန်းကြီးကျောင်းအတွင်း ဂုန်မင်းအိုင်ရွာသား ဦးကျော်မြင့်၊ သားဖြစ်သူ ကျော်ဇင်မင်း၊ စိုးသူ၊ ဦးစိုးနိုင်၊ ကိုဝင်းစိုး၊ မဥမ္မာဝင်း၊ ဇော်ခိုင်၊ ဦးသိန်းစိုးတို့အပါအဝင် ၂၀ ခန့်ကို ဆက်လက်ဖမ်းဆီးထားတယ်လို့ ရွာခံတွေက ပြောပါတယ်။

စစ်ကောင်စီစစ်ကြောင်းဝင်လာလို့ အိမ်ခြေ ၂၀၀ ကျော် လူဦးရေ ၇၀၀ ကျော်ရှိတဲ့ ဂုန်မင်းအိုင်ရွာဒေသခံအများစုဟာ ကျေးရွာကနေ ဘေးလွတ်ရာကိုထွက်ပြေး တိမ်းရှောင်နေရပြီး စစ်ကောင်စီနဲ့နီးစပ်သူအချို့လောက်သာ ကျေးရွာထဲမှာ ကျန်ရှိနေတယ်လို့ သိရပါတယ်။

၎င်းစစ်ကောင်စီစစ်ကြောင်းဟာ မေ ၁၆ ရက် ဒီကနေ့ ညနေပိုင်းထိ ကျေးရွာဘုန်းကြီးကျောင်းအတွင်မှာပဲရှိနေပြီး ကျေးရွာထဲက နေအိမ် ၂ လုံး၊ ဆိုင်ကယ် ၂ စီးနဲ့ စပါးအိတ်တွေကို ဖျက်ဆီးထားတယ်လို့ သိရပါတယ်။

စာတည်း – ဟိန်းစံ

ချောင်းဦး၊ မေ ၁၅၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ခင်မွန်ကျေးရွာက ဒေသခံတွေကို စစ်ကောင်စီတပ်ဖွဲ့တွေက မေ ၁၃ ရက်ည ၈ နာရီကျော်မှာ ဝင်ရောက်ဖမ်းဆီးပြီးနောက် အဲဒီထဲကအမျိုးသား ၁ ဦးကို သတ်ဖြတ်ခဲ့တယ်လို့ ဒေသခံတွေဆီက သိရပါတယ်။

ခင်မွန်ကျေးရွာအနီးရှိ မြပုလဲဂိတ်စခန်းကထွက်လာတဲ့ အင်အား ၄၀ ပါစစ်ကောင်စီတပ်ဖွဲ့ဝင်တွေက ကျေးရွာအတွင်းကိုဝင်ရောက်လာပြီး ဒေသခံတွေကိုအကြောင်းမဲ့ဖမ်းဆီးခဲ့တာလို့ ဆိုပါတယ်။

“ပြည်သူတွေက လိုင်းသုံးပြန်လာတာ။ အာ့အချိန် **ကားနဲ့တန်းတိုးတာ။ ဓားစာခံက အယောက် ၂၀ လောက်ပါသွားတယ်။ အဲ့ဒီထဲက အသက် ၄၀ ကျော် အသက်ကြီးတဲ့သူ ၆ ယောက်လောက်ပဲပြန်လွှတ်ပေးပြီး ကျန်တဲ့သူတွေတော့ စစ်မှုထမ်းထဲထည့်မယ်ယူဆရတာပဲ”လို့ ဖြစ်စဥ်ကိုသိရှိထားတဲ့ ချောင်းဦးဒေသခံအမျိုးသမီးတဦးက ပြောပါတယ်။

အထက်ပါအဖမ်းခံသူတွေထဲက အသက် ၂၃ နှစ်အရွယ် မျိုးခန့်ကိုကို ကိုစစ်ကောင်စီ တပ်သားတွေက နှိပ်စက်ပြီးသတ်ဖြတ်ခဲ့တယ်လို့ ဆိုပါတယ်။

“မိသမျှကို မှောက်ခိုင်းပြီး စစ်ဆေးနေတုံး အသတ်ခံလိုက်ရတဲ့ကောင်လေးက ထွက်ပြေးတာ။ ပြန်မိသွားတော့ ဓားတွေမွှန်းတယ်။ မျက်နှာတွေရော။ ရုပ်တောင် မပီပြင်တော့ဘူး။ တော်တော်နှိပ်စက်ထားပြီးသတ်ပစ်ခဲ့တာ”လို့ အထက်ပါအမျိုးသမီးကဆိုပါတယ်။

ဖမ်းဆီးခေါ်ဆောင်သွားတဲ့ ၂၀ ဦးထဲက အသက် ၄၀ ကျော်အရွယ်ရှိ ၆ ဦးကို ပြန်လွှတ်ပေးကာ ၁ ဦးကိုသတ်ဖြတ်ခဲ့တာကြောင့် လက်ရှိဖမ်းဆီးခေါ်ဆောင်ခံရသူမှာ ၁၄ ဦးဖြစ်ပြီး သူတို့ကိုချောင်းဦးမြို့ပေါ်ရှိ အထွေထွေအုပ်ချုပ်ရေးရုံးမှာထိန်းသိမ်းထားတယ်လို့ သူမကဆက်ပြောပါတယ်။

ဖမ်းဆီးခေါ်ဆောင်ခံရသူ ၁၄ ဦးမှာ ဘယ်သူဘယ်ဝါဖြစ်တယ်ဆိုတာ ခွဲခြားမသိရသေးဘဲ ၎င်းတို့ကို မေ ၁၅ ရက်ဒီကနေ့ထိ ပြန်လွှတ်ပေးတာမရှိသေးဘူးလို့ ဆိုပါတယ်။

ခင်မွန်ကျေးရွာမှာ အိမ်ခြေ ၁,၀၀၀ ခန့်ရှိပြီး မုံရွာ-မန္တလေး ကားလမ်းမကြီးဘေးမှာရှိတာဖြစ်သလို စစ်ကောင်စီတပ်ရဲ့ မြပုလဲဂိတ်စခန်းနဲ့ ခင်မွန်ဘက်စုံခြံဂိတ်ကြားမှာ ရှိနေတာလည်းဖြစ်ပါတယ်။

စာတည်း – လင်း

ဂန့်ဂေါ၊ မေ ၁၃၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ လယ်မကျေးရွာကို စစ်ကောင်စီတပ်တွေဝင်စီးပြီး ဖမ်းဆီးသွားသူတွေအနက် ၁၁ ဦးပြန်လွတ်လာပြီလို့ ရွာခံတွေထံက သိရပါတယ်။

စစ်ကောင်စီတပ်တွေက ဖမ်းဆီးသွားသူတွေထဲက အမျိုးသမီး ၁၁ ဦးကို မေ ၁၂ ရက်နေ့ နေ့လယ်ပိုင်းမှာပင် ပြန်လွှတ်ပေးလိုက်ပြီး ကျန်သူတွေကို ဆက်ဖမ်းထားတယ်လို့ ဆိုပါတယ်။

“မနေ့က အမတ ၃၇၁ အရောက်မှာ မိန်းကလေးတွေကြီးဘဲ ပြန်လွှတ်လိုက်တာ။ ယောကျ်ားလေး ၁၁ ယောက်နဲ့မိန်းကလေး ၂ ယောက်ကျန်သေးတယ်။ ပြန်လွတ်လာသူတွေက ရိုက်နှက်ထားတာ ထုထားတာမရှိဘူး။ “လို့ ရွာခံတဦးကပြောပါတယ်။

ပြန်လွတ်လာတဲ့ အမျိုးသမီးတွေထဲမှာ အသက် ၂၀ ကနေ ၆၀ ကျော်အရွယ်တွေထိပါဝင်ပြီးကလေးမိခင်တွေလည်းပါဝင်တယ်လို့ သိရပါတယ်။

ဆက်လက်ဖမ်းဆီးထားတဲ့ အမျိုးသား ၁၁ ဦးနဲ့ အမျိုးသမီး ၂ ဦးထဲမှာ အသက် ၁၇ နှစ်အရွယ် ကျောင်းသား ၄ ဦးပါဝင်ပြီး သူတို့ကိုတော့ အမတ ၃၇၁ ကနေ ခလရ ၅၀ထဲကို ခေါ်ဆောင်သွားပြီး မေ ၁၃ ရက်နေ့ထိပြန်လွတ်မလာကြသေးဘူးလို့ဆိုပါတယ်။

မေ ၁၂ ရက်မနက် ၂ နာရီခန့်မှာ ဂန့်ဂေါ ခလရ ၅၀ က လာတဲ့ အင်အား ၁၀၀ ခန့်ပါစစ်ကြောင်းဟာ ကျေးရွာစာသင်ကျောင်းအနီးစခန်းချထားတဲ့ ပကဖစခန်းကိုဝင်စီးပြီး ကျေးရွာပကဖ တပ်ဖွဲ့၀င် ၇ ဦး၊ စခန်းမှာညလာအိပ်တဲ့ ကျောင်းသား ၄ ဦးကို ဖမ်းဆီးသတ်ဖြတ်ခဲ့ပြီး ကျေးရွာခံတွေဖြစ်တဲ့ အမျိုးသား ၁၁ ဦး၊ အမျိုးသမီး ၁၃ ဦးကို ဖမ်းဆီးသွားကာ ကျေးရွာပကဖ စခန်းထဲက သေနတ် ၁၇ လက်အပါအဝင် ဆက်စပ်ပစ္စည်းတွေကိုလည်းသိမ်းဆည်းသွားခဲ့ပါတယ်။

အိမ်ခြေ ၂၀၀ ကျော် လူဦးရေ ၈၀၀ ကျော်နေထိုင်တဲ့ လယ်မကျေးရွာဟာ အမတ ၃၇၁ နဲ့ ၃ မိုင်ကျော်၊ ခလရ ၅၀ နဲ့ ၅ မိုင်ကျော်သာကွာဝေးလို့ စစ်ကြောင်းထပ်ထိုးခံရမှာ ကြောက်ပြီး ရွာခံအများစုထွက်ပြေးနေရာ မေ ၁၃ ရက်ထိ ကျေးရွာကိုမပြန်ကြသေးဘူးလို့ ရွာခံတဦးကပြောပါတယ်။

စစ်ကောင်စီသတ်ဖြတ်ခဲ့တဲ့ ပကဖအဖွဲ့ဝင်တွေနဲ့ ကျောင်းသားတွေရဲ့ အလောင်းတွေကိုတော့ ရွာခံအချို့က နေ့ချင်းပဲ သင်္ဂြိုဟ်လိုက်တယ်လို့ သိရပါတယ်။

စာတည်း – လင်း