မန္တလေး

မန္တလေး၊ မေ ၆၊ ၂၀၂၃။

မန္တလေးတိုင်း၊ အမရပူရမြို့နယ်၊ စစ်ကောင်စီလက်အောက်ခံလူဝင်မှုကြီးကြပ်ရေး(လဝက)ရုံး မေလ ၅ ရက် မနေ့ညနေ ၆ နာရီလောက်မှာ ဗုံးပစ်ခံရပြီး ဝန်ထမ်း ၃ ဦး ထိခိုက်ဒဏ်ရာရသွားတယ်လို့ သိရပါ တယ်။

မှန်တန်းရပ်ကွက်မှာရှိတဲ့ စစ်ကောင်စီလဝကရုံးကို ဆိုင်ကယ်စီးလာသူတွေက ဗုံးနဲ့ပစ်ပေါက်ခဲ့လို့ ရုံးဝန်းအတွင်း ကျရောက်ပေါက်ကွဲခဲ့ကာ ရုံးဆင်းဖို့လုပ်နေတဲ့ စစ်ကောင်စီလက်အောက်ဝန်ထမ်းတွေ ထိခိုက်ခဲ့တာလို့ ဒေသခံတဦးက မြေလတ်အသံကို ပြောပါတယ်။

“မနေ့ညနေပိုင်း လဝကရုံး ဗုံးပစ်ခံရတာကဟုတ်တယ်။ အမျိုးသမီးဝန်ထမ်း ၃ ဦးကတော့ ဗုံးစထိမှန် ဒဏ်ရာရသွားတာရှိတယ်”လို့ ပြောပါတယ်။

ဒါ့အပြင် ဗုံးပေါက်ကွဲမှုကြောင့် ရုံးအဆောက်အဦနဲ့ ရုံးဝန်းအတွင်းရပ်ထားတဲ့ ကား ၁ စီး အနည်းငယ် ထိခိုက်ပျက်စီးခဲ့ပြီး ဒဏ်ရာရသွားတဲ့ အမျိုးသမီးဝန်ထမ်း ၃ ဦးကိုတော့ ဒေသလူမှုကူညီရေးအသင်းက မန္တလေးဆေးရုံကြီးကို ပို့ဆောင်ဆေးကုသနေရတယ်လို့ ဆိုပါတယ်။

ဗုံးပစ်ခတ်မှုနဲ့ပတ်သက်လို့ ဒေသတွင်း တော်လှန်ရေးအင်အားစုတွေဘက်က ထုတ်ပြန်ထားတာ မရှိသေးဘဲ ဗုံးပေါက်ကွဲပြီးချိန်မှာတော့ စစ်ကောင်စီတပ်ဖွဲ့တွေ လဝကရုံးကိုရောက်ရှိလာပြီး စစ်ဆေးခဲ့သလို မြို့တွင်းနေရာတချို့မှာလည်း လမ်းပိတ်စစ်ဆေးတာတွေ လုပ်ခဲ့တယ်လို့ သိရပါတယ်။

မေလ ၁ ရက်နေ့ မနက်ပိုင်းကလည်း အမရပူရမြို့မရဲစခန်း ဗုံးပစ်တိုက်ခိုက်ခံရပြီး ရဲတပ်ဖွဲ့ဝင် ၂ ဦး ထိခိုက်ဒဏ်ရာရရှိခဲ့သေးတယ်လို့ သိရပါတယ်။

စာတည်း – ရင်ငြိမ်း

မြင်းခြံ၊ မေ ၃၊ ၂၀၂၃။

မန္တလေးတိုင်း၊ မြင်းခြံအကျဉ်းထောင်ကနေ နိုင်ငံရေးအကျဉ်းသား ၂၁၇ ဦး ပြန်လည် လွတ်မြောက်လာခဲ့ပြီး အဲ့ဒီထဲမှာ ပခုက္ကူနဲ့ မုံရွာက နိုင်ငံရေးအကျဉ်းသားတွေအပြင် တခြားတိုင်းဒေသကသူတွေလည်း ပါဝင်တယ်လို့ သိရပါတယ်။

မေလ ၃ ရက် ဒီကနေ့နေလယ် ၁၂ နာရီကစတင်ကာ အမျိုးသမီးနိုင်ငံရေးအကျဉ်းသားတွေကို လွှတ်ပေးခဲ့တာဖြစ်ပြီး၊ အမျိုးသားတွေကတော့ နေ့လည် ၁ နာရီလောက်မှ စတင်လွတ်ခဲ့တာလို့ လွတ်မြောက်လာတဲ့ နိုင်ငံရေးအကျဉ်းသားတဦးက ပြောပါတယ်။

“၅၀၅ သီးသန့်အကုန်လွှတ်မပေးဘူး၊ ကျန်ကာလ တနှစ်အောက်တွေကိုပဲ လွှတ်ပေးတာ၊ ထွက်လာသူတွေက ကျန်းမာရေးကောင်းကြပေမယ့် အထဲမှာက ဆေးဝါးလိုအပ်ချက်တွေ အများကြီးရှိနေတယ်၊ ဘာရောဂါဖြစ်ဖြစ် ဆေးတမျိုးပဲပေးတယ်”လို့ ပြောပါတယ်။

အမျိုးသား ၁၅၄ ဦးနဲ့ အမျိုးသမီး ၆၃ ဦးတို့ လွတ်လာခဲ့ကာ အဲ့ဒီထဲမှာ ပခုက္က္ကူ၊ မုံရွာ၊ မြင်းခြံ၊ ငါန်းဇွန်၊ မန္တလေး၊ မိတ္ထီလာက နိုင်ကျဉ်းတွေ ပါဝင်နေတယ်လို့ သိရပြီး လွတ်မြောက်လာတဲ့ မြို့နယ်အလိုက် အရေတွက်ကတော့ မြေလတ်အသံအနေနဲ့ စုံစမ်းနေဆဲ ဖြစ်ပါတယ်။

စစ်ကောင်စီက ကဆုန်လပြည့်နေ့အထိမ်းအမှတ်အနေနဲ့ နိုင်ငံတဝန်းက နိုင်ငံရေးအကျဉ်းသား ၂၀၀၀ ကျော်ကို ပြစ်ဒဏ်ကလွတ်ငြိမ်းခွင့်ပေးမယ်လို့ ထုတ်ပြန်ထားတာလည်း ဖြစ်ပါတယ်။

စာတည်း – လင်း

နွားထိုးကြီး၊ မေ ၃၊ ၂၀၂၃။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့မရဲစခန်း မေလ ၁ ရက် နေ့လယ် ၂ နာရီခွဲလောက်မှာ ဒရုန်းနဲ့ ဗုံးချတိုက်ခိုက်ခံရလို့ ရဲတပ်ဖွဲ့ဝင်တွေ သေဆုံးဒဏ်ရာရတာတွေ ရှိခဲ့တယ်လို့ သိရပါတယ်။

အမှတ် ၄ ရပ်ကွက်၊ နွားထိုးကြီး-မြင်းခြံကားလမ်းမကြီးဘေးမှာရှိတဲ့ မြို့မရဲစခန်းဝန်းအတွင်းကို ဒရုန်းနဲ့ဗုံး ၃ လုံးချ တိုက်ခိုက်လို့ ၁ ဦး သေဆုံးပြီး၊ ၄ ဦး ပြင်းထန်ဒဏ်ရာရခဲ့တယ်လို့ မြင်းခြံခရိုင် တပ်ရင်း ၄ နွားထိုးကြီး PDF တာဝန်ခံ ဗိုလ်လင်းယုန်က မြေလတ်အသံကို ပြောပါတယ်။

“ရဲစခန်းဝန်းထဲက အိမ်စီးကားနား ရဲတွေစုပြုံနေတဲ့နေရာကို ဗုံးချခဲ့တာ။ ကားလည်း မီးလောင်ပျက်စီးသွားတယ်” လို့ ပြောပါတယ်။

ပျက်စီးသွားတဲ့ အိမ်စီးကားဟာ စစ်ကောင်စီလက်အောက်ခံရဲတပ်ဖွဲ့ဝင်တွေ ကင်းလှည့်ချိန်မှာ အသုံးပြုတဲ့ အဖြူရောင် Mark II ကားဖြစ်ပြီး မီးသတ်ကားတွေ ရောက်ရှိ မီးငြိမ်းသတ်ခဲ့လို့ ရဲစခန်းတွင်း ရေတွေလျှံတဲ့အထိ ဖြစ်ခဲ့ကာ မီးခိုးလုံးတွေကို တမြို့လုံးက မြင်ရတယ်လို့ ဒေသခံတွေရဲ့ပြောဆိုချက်တွေကို ကိုးကားပြီး သူက ဆက်ပြောပါတယ်။

သေဆုံးနဲ့ ဒဏ်ရာရတဲ့ ရဲတွေကိုတော့ နွားထိုးကြီးဆေးရုံကို ပို့ဆောင်ကာ ဆေးကုသနေတယ်လို့ ဆိုပါတယ်။

ဧပြီ ၃၀ ရက်နေ့ကလည်း နွားထိုးကြီးမြို့အရှေ့ဘက် ထန်းဇင်ကျေးရွာမှာရှိတဲ့ စစ်အုပ်စုကင်းစခန်းဂိတ်ကို နွားထိုးကြီး PDF အဖွဲ့က ဒရုန်းနဲ့ဗုံးချတိုက်ခိုက်ခဲ့လို့ ထိခိုက်သေဆုံးတာတွေ ရှိတယ်လို့ သိရပါတယ်။

စာတည်း – ရင်ငြိမ်း

စဉ့်ကူး၊ မေ ၂၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ ကြက်တူရွေးကျေးရွာက စစ်ကောင်စီလက်အောက်ခံ ပျူစောထီးခေါင်းဆောင်နေအိမ် ဧပြီလ ၃၀ ရက် နေ့လည်ပိုင်းအချိန်မှာ မီးရှို့ခံခဲ့ရတယ်လို့ဒေသခံတွေဆီက သိရပါတယ်။

အသက် ၅၀ နှစ်အရွယ် ပျူစောထီးခေါင်းဆောင် ဦးငမော်(ခ)သဲမော်ဟာ စဉ့်ကူးနယ်ထဲက စစ်ကောင်စီတပ်အတွင်းမှာ သွားရောက်ရှောင်တိမ်းနေတာဖြစ်ပြီး သူ့ရဲ့နေအိမ် မီးရှို့ခံရတာဖြစ်တယ်လို့ ဆိုပါတယ်။

“ငမော်က ဒလန်လုပ်နေတာကြာပြီ။ သူ့ကို ပကဖတွေက ဖမ်းဖို့လိုက်နေလို့ စစ်တပ်ထဲမှာ နေနေတယ်။ သူ့ အိမ်ကို ပကဖဘက်က မီးလာရှို့တာ၊ ဘေးကအိမ် ၂ လုံးပါ လောင်သွားတယ်” လို့ ရွာခံတဦးက မြေလတ်အသံကို ပြောပါတယ်။

အဲ့ဒီပျူစောထီးနေအိမ် မီးလောင်မှုကနေတဆင့် အနီးအနားက ဒေသခံတွေဖြစ်တဲ့ ဒေါ်သောင်းကြည်နဲ့ ဒေါ် မဌေး တို့ရဲ့ နေအိမ် ၂ လုံးပါ မီးလောင်ကျွမ်းခဲ့တယ်လို့ အဲ့ဒီရွာခံကဆက်ပြောပါတယ်။

အဲ့ဒီဖြစ်စဥ်နဲ့ပတ်သက်လို့ စဉ့်ကူးမြို့နယ် ပြည်သူ့ကာကွယ်ရေးတပ်ဖွဲ့(ပကဖ)မှ တာဝန်ရှိသူတဦးက ဦးငမော်ရဲ့နေအိမ်ကို တပ်ဖွဲ့ဝင် ၃ ဦးက မီးရှို့ခဲ့တာဟုတ်မှန်ပေမယ့် ပြည်သူတွေရဲ့နေအိမ်တွေကို မီးကူးစက်လောင်ကျွမ်းခဲ့တာ မရှိခဲ့ဘူးလို့ ပြောပါတယ်။

“ရဲဘော် ၃ ယောက်က စိတ်မထိန်းနိုင်လို့ မီးရှို့ခဲ့တာဆိုပြီးတော့ ဝန်ခံကြတယ်။ မီးရှို့ခဲ့လို့လည်း ပျူခေါင်းဆောင်တယောက်ရဲ့အိမ်ပဲ လောင်ကျွမ်းခဲ့တယ်။ အနီးအနားကအိမ်တွေ မလောင်ခဲ့ဘူး။ ကျနော်တို့ တပ်ဖွဲ့ဝင်တွေနဲ့ ရွာသားတွေပေါင်းပြီးတော့ မီးငြှိမ်းပေးခဲ့တာ” လို့ ဆိုပါတယ်။

လက်ရှိမှာ ပျူစောထီးခေါင်းဆောင် ဦးငမော် အနေနဲ့ သူ့ရဲ့မိသားစုတွေနဲ့အတူ စစ်ကောင်စီတပ်တခုမှာ ဝင်ရောက်ခိုလှုံနေတယ်လို့ သိရပါတယ်။

စာတည်း – ရင်ငြိမ်း

နွားထိုးကြီး၊ ဧပြီ ၂၇၊ ၂၀၂၃။

မန္တလေးတိုင်း၊ နွားထိုးကြီး မြို့မရဲစခန်းက ရဲတပ်ကြပ်တဦး ဧပြီလ ၂၆ ရက်မနေ့ည ၇ နာရီလောက်မှာ သေနတ်နဲ့ပစ်ခံရပြီး သေဆုံးခဲ့တယ်လို့ သိရပါတယ်။

အသက် ၃၀ အရွယ် ရဲတပ်ကြပ် ခိုင်မင်းထွန်းဟာ နွားထိုးကြီး မြို့မရဲစခန်းကနေ မြို့အရှေ့ဘက်ရှိ ရဲကင်းစခန်းကို ဆိုင်ကယ်နဲ့ထွက်လာချိန် ထန်းဇင်ရွာအနီးအရောက်မှာ ဒေသခံကာကွယ်ရေး တပ်ဖွဲ့ဝင်တွေနဲ့ ထိပ်တိုက်တွေ့လို့ ထွက်ပြေးရာမှာ ပစ်ခတ်ခံရပြီး နေရာတင်သေဆုံးခဲ့တာပါ။

“ကျနော်တို့အဖွဲ့ ကင်းပတ်နေတုန်း ထန်ဇင်းရွာအနားမှာ တွေ့တာ၊ လက်နက်မပါဘူးဗျ။ ဆိုင်ကယ်ရပ်ဖို့ ပြောတာကို မောင်းပြေးလို့ ကျနော်တပ်ဖွဲ့တွေ ပစ်ခတ်ရှင်းလင်းခဲ့တာပါ။ အဖွဲ့လိုက် ပစ်တာဆိုတော့ ဘယ်နှစ်ချက်ပစ်မိသလဲတော့ မမှတ်မိပါဘူး” လို့ မြင်းခြံခရိုင် အမှတ်-၄ တပ်ရင်း၊ နွားထိုးကြီး ပြည်သူ့ကာကွယ်ရေးတပ်ဖွဲ့ – NPDF တာဝန်ခံက ပြောပါတယ်။

ပစ်ခတ်ပြီး ကာကွယ်ရေးတပ်တွေ ပြန်ဆုတ်ခွာသွားချိန်မှာ ရဲတပ်ကြပ်အလောင်းကို စစ်ကောင်စီတပ်သားတွေက အင်အား ၃၀ ကျော်နဲ့ ညတွင်းချင်းပဲ အခင်းဖြစ်တဲ့နေရာမှာ လာသယ်သွားကြတယ်လို့ ဆိုပါတယ်။

စစ်တပ်ဝါဒဖြန့် တယ်လီဂရမ် ချန်နယ်မှာတော့ အဆိုပါရဲတပ်ကြပ်မှာ နားထင်၊ နောက်ကြော၊ မေးရိုး၊ နားအောက်၊ ရင်ညွန့်၊ ဗိုက်နဲ့ လက်ကောက်ဝတ် စတဲ့နေရာတွေမှာ ကျည်ထိမှန်သေဆုံးနေတာကို ထန်းဇင်ရွာအနီးမှာ တွေ့ခဲ့ရတယ်လို့ ရေးသားထားပါတယ်။

ပြီးခဲ့တဲ့ ဧပြီ ၂၃ ရက်ကလည်း နွားထိုးကြီးမြို့နယ်၊ သာယာကုန်းရွာနားမှာ စစ်သားတွေပါလာတဲ့ အိမ်စီးကား ၃ စီးကို NPDF အဖွဲ့သားတွေက ပဒေသာမိုင်းနဲ့ ဖောက်ခွဲတိုက်ခိုက်ခဲ့ပါသေးတယ်။

စာတည်း – လင်း