မန်စီးတီး

မြေလတ်အသံ၊ ဖေဖော်ဝါရီ ၃၊ ၂၀၂၅။

မနေ့က ယှဉ်ပြိုင်ခဲ့တဲ့ ပရီးမီးယားလိဂ် ပွဲစဉ် ၂၄ ရဲ့ နောက်ဆုံးပွဲစဉ်မှာ အာဆင်နယ်အသင်းက မန်ချက်စတာစီးတီးအသင်းကို ၅-၁ ရလဒ်နဲ့ ဂိုးပြတ်အနိုင်ရယူခဲ့ပြီး အဆင့် ၁ နေရာက လီဗာပူးလ်ကို ဆက်လက်ဖိအားပေးနိုင်ခဲ့ပါတယ်။

အာဆင်နယ်အသင်းက အဓိက တောင်ပံတိုက်စစ်ကစားသမား ဆာကာ ဒဏ်ရာရပြီးတဲ့နောက်ပိုင်း ပုံမှန်ပွဲထွက်လေ့ရှိတဲ့ မာတင်နယ်လီ၊ ထရော့ဆက်၊ ဟားဗက်ဇ် တို့နဲ့ တိုက်စစ်တွဲလုံးနဲ့ ပုံမှန်အတိုင်းပွဲထွက်လာပြီး ဆာကာ၊ ဂျေဇူး၊ တိုမီယာစု၊ ဘန်ဝှိုက်တို့ ဒဏ်ရာကြောင့် မပါဝင်နိုင်ခဲ့ပါဘူး။

မန်စီးတီးဘက်ကတော့ လက်ရှိ ဇန်နဝါရီ အပြောင်းအရွှေ့ကာလ ဖရန့်ဖတ်ကနေ ဝယ်ယူထားတဲ့ အိုမာ မာမွတ်ရှ် ကို ကွင်းလယ်မှာ ပွဲထုတ်လာသလို ဂိုးသမားနေရာမှာတော့ အီဒါဆင်အစား အော်တီဂါ နဲ့ ပွဲထွက်လာခဲ့ပါတယ်။ ဒီပွဲမှာ အဓိကပွဲထွက်လူစာရင်းက အကီ၊ ဒီယက်ဇ်၊ ဒိုကူ တို့နဲ့ ဒီရာသီကာလရှည်ကြာ အနားယူနေရတဲ့ ရိုဒရီ အပြင် အော်စကာဘော့ဘ် လည်း ဒဏ်ရာကြောင့် မပါဝင်နိုင်ခဲ့ပါဘူး။

ပွဲအစ ၁ မိနစ်ကျော်မှာပဲ မန်စီးတီး နောက်တန်းကစားသမား အကန်ဂျီရဲ့ ဘောလုံးထိန်းသိမ်းပုံ မသေသပ်မှုကနေတဆင့် အာဆင်နယ်အတွက် ဦးဆောင်ဂိုးကို အသင်းခေါင်းဆောင် အော်ဒီဂတ်က ရယူပေးနိုင်ခဲ့ပါတယ်။ အဲ့ဒီနောက် ပထမပိုင်းတပိုင်းလုံးနီးပါး မန်စီးတီးက တောက်လျှောက် တိုက်စစ်ဆင် ကစားလာခဲ့ပေမယ့် ချေပဂိုးမရရှိခဲ့ပါဘူး။

ဒုတိယပိုင်း ၅၅ မိနစ်မှာတော့ ဟာလန်းရဲ့ ခေါင်းတိုက်သွင်းဂိုးနဲ့ မန်စီးတီးတို့ ချေပဂိုးပြန်လည်ရရှိခဲ့ပါသေးတယ်။ ဒါပေမယ့် ချေပဂိုးသွင်းယူပြီး ၁ မိနစ်အကြာမှာပဲ ကွင်းလယ်လူပါတေးရဲ့ကန်ချက် ဂျွန်စတုန်းနဲ့ထိပြီး လမ်းကြောင်းပြောင်း ဂိုးဝင်ခဲ့လို့ အာဆင်နယ်တို့ ပွဲကိုချက်ချင်းပြန်လည် ဦးဆောင်နိုင်ခဲ့ပါတယ်။ အဲ့ဒီနောက် ၆၂ မိနစ်မှာ လူးဝစ်စကယ်လီ၊ ၇၆ မိနစ်မှာ ကိုင်ဟားဗက်ဇ် နဲ့ ၉၀ မိနစ်မှာ အီသန်နွယ်နာရီတို့က အသီးသီး သွင်းဂိုးတွေရယူနိုင်ခဲ့ကာ မန်ချက်စတာစီးတီးကို ဂိုးပြတ် အနိုင်ယူခဲ့တာပါ။

ဒီနိုင်ပွဲကြောင့် အာဆင်နယ်အသင်းက လက်ရှိ အဆင့် ၁ က လီဗာပူးလ်အသင်းထက် ၁ ပွဲပိုကန်ထားပြီး ၆ မှတ်ကွာဟနေပေးမယ့် အဆင့် ၂ နေရာကနေ အနီးကပ်ဆုံး ဖိအားပေးနေဆဲ ဖြစ်ပါတယ်။

ပြီးခဲ့တဲ့ ၄ ရာသီဆက်တိုက် ပရီးမီးယားလိဂ် ချန်ပီယံဖြစ်ခဲ့တဲ့ မန်ချက်စတာစီးတီးအသင်းက လက်ရှိမှာတော့ ပရီးမီးယားလိဂ် အဆင့် ၄ နေရာမှာ ရပ်တည်နေပြီး အဆင့် ၁ နဲ့ ၁၅ မှတ်အထိ ကွာဟနေပြီ ဖြစ်ပါတယ်။ ဒါ့အပြင် လက်ရှိခြေစွမ်းအရ လာမယ့်ဗုဒ္ဓဟူးနေ့ ရီရဲလ်မက်ဒရစ်နဲ့ ကန်ရမယ့် ချန်ပီယံလိဂ် ၁၆ သင်းအဆင့် Play-off ပွဲမှာလည်း ရုန်းကန်ရဦးမယ့် အခြေအနေပါ။

Photo – Premier League.

မြေလတ်အသံ၊ ဒီဇင်ဘာ ၁၊ ၂၀၂၄။

ယနေ့ည စူပါဆန်းဒေးရဲ့ ပရီးမီးယားလိဂ် ပွဲစဉ် ၁၃ က ပွဲကောင်းတပွဲဖြစ်တဲ့ လီဗာပူးလ်နဲ့ မန်ချက်စတာစီးတီးပွဲစဉ်ကို မြန်မာစံတော်ချိန် ည ၁၀ နာရီ ၃၀ မှာ ယှဉ်ပြိုင်သွားကြမှာဖြစ်ပါတယ်။

အိမ်ရှင်အသင်းကတော့ ဒီရာသီဟာ လီဗာပူးလ်ရဲ့ ရာသီလို့ပြောလို့ရလောက်အောင်ကို အကြိမ်ကြိမ်သက်သေပြနေခဲ့တာဖြစ်ပြီး နော်တင်ဟမ်ကို ရှုံးနိမ့်ခဲ့တဲ့ပွဲနဲ့ အာဆင်နယ်ကို သရေကျခဲ့တဲ့ပွဲကလွဲရင် ပွဲစဉ်တိုင်းကို နိုင်ပွဲရယူထားခဲ့ကာ ပရီးမီးယားလိဂ်မှာရော ချန်ပီယံလိဂ်မှာပါ အမှတ်ပေးဇယားတွေရဲ့ထိပ် ဦးဆောင်နေတာ ဖြစ်ပါတယ်။ 

အဓိကဂိုးသမား အလီဆင်အပါအဝင် ဒဏ်ရာရကစားသမား ၆ ယောက်အထိ ရှိနေပေမယ့် ဂိုးသမား ကယ်လင်ဟာရဲ့ လက်စွမ်းပြမှု၊ အသင်းရဲ့ ဟန်ချက်ညီမှုတွေနဲ့ ဆာလာ၊ ဒီးယက်ဇ်တို့ရဲ့ သွင်းဂိုးတွေကနေတဆင့် လီဗာပူးလ်အသင်းအနေနဲ့ အမှားအယွင်းမရှိဘဲ ရှေ့ဆက်နေခဲ့တာပါ။

လက်ရှိပရီးမီးယားလိဂ်ချန်ပီယံ မန်ချက်စတာစီးတီးကတော့ နောက်ဆုံး ၆ ပွဲမှာ ၅ ပွဲရှုံး ၁ ပွဲသရေ ရလဒ်နဲ့ နိုင်ပွဲပျောက်ဆုံးနေပြီး ပရီးမီးယားလိဂ်မှာ လက်ရှိ (၁ ပွဲလို) အဆင့် ၄ နေရာအထိ ရောက်ရှိနေခဲ့သလို ချန်ပီယံလိဂ်မှာလည်း အဆင့် ၁၇ နေရာအထိ ရောက်နေခဲ့တာ ဖြစ်ပါတယ်။

အဓိက ကွင်းလယ်လူ ဘလွန်းဒီအောဆုရှင် ရိုဒရီအပါအဝင် ဂျွန်စတုန်း၊ ကိုဗာဆစ် စတဲ့ခံစစ်နဲ့ ကွင်းလယ်ခံစစ်ပိုင်းက ဒဏ်ရာပြသနာတွေကြုံနေရချိန် ပေးဂိုးတွေ အများအပြားခွင့်ပြုနေခဲ့ရပြီး နိုင်ပွဲပျောက်ဆုံးနေတဲ့ မန်စီးတီးအသင်းဟာ လက်ရှိ ပရီးမီးယားလိဂ်ဇယားထိပ်က လီဗာပူးလ်ကို အဝေးကွင်းမှာ သွားရောက်ရင်ဆိုင်ရမယ့် အရေးဟာ နည်းပြ ဂွာဒီယိုလာအတွက် ခေါင်းခဲစရာအခြေအနေပါ။

ဒီနေ့ပွဲမှာ မန်စီးတီး နိုင်ပွဲရှာဖွေနိုင်ခဲ့ရင်တော့ အဆင့် ၂ နေရာအထိ ပြန်လည် တက်လှမ်းနိုင်မှာဖြစ်သလို ချန်ပီယံဆုဖလားအတွက် လီဗာပူးလ်ကို ဖိအားပေးနိုင်ဖို့ မျှော်လင့်နိုင်မှာ ဖြစ်ပေမယ့် ရှုံးနိမ့်ခဲ့ရင်တော့ ချန်ပီယံဆုဖလားနဲ့ ဝေးကွာသွားနိုင်တဲ့အထိ ဖြစ်သွားနိုင်လို့ မန်စီးတီးတို့ အကောင်းဆုံးပြန်လာဖို့ မျှော်လင့်ထားမှာ အသေအချာပါပဲ။

တဖက်မှာလည်း လီဗာပူးလ်အနေနဲ့ ဟန်ချက်ပျက်နေတဲ့မန်စီးတီးကို အိမ်ကွင်းမှာ အနိုင်ကစားပြီး ဇယားထိပ်မှာ အမှတ်ပြတ်နဲ့ ဆက်လက်ဦးဆောင်နိုင်ဖို့ကြိုးစားသွားမှာဖြစ်သလို လက်ရှိ ခြေစွမ်းပြန်မှန်လာတဲ့ အဆင့် ၂ က အာဆင်နယ်အသင်းရဲ့ ဖိအားပေးမှုကနေကင်းလွတ်ဖို့လည်း နိုင်ပွဲရယူဖို့ လိုအပ်နေတာပါ။

နောက်ဆုံး တွေ့ဆုံခဲ့တဲ့ ၅ ကြိမ်မှာတော့ ၁ ကြိမ်စီ အနိုင်ရခဲ့ပြီး ၃ ပွဲသရေကျထားတဲ့ လီဗာပူးလ်နဲ့ မန်စီးတီးတို့ ဒီတကြိမ် အန်ဖီးလ်ကွင်းမှာတော့ ဘယ်လို ရလဒ်ထွက်သွားမလဲဆိုတာကို ယနေ့ည မြန်မာစံတော်ချိန် ၁၀ နာရီ ၃၀ မိနစ်မှာ စောင့်ကြည့်သွားရတော့မှာပဲ ဖြစ်ပါတယ်။

Photo – lapremierleague. 

မြေလတ်အသံ၊ နိုဝင်ဘာ ၂၄၊ ၂၀၂၄။

မနေ့ညက ယှဉ်ပြိုင်ကစားခဲ့ကြတဲ့ ပရီးမီးယားလိဂ် ပွဲစဉ် ၁၂ မှာ စပါးအသင်းကို အိမ်ကွင်း အီတီဟတ်မှာပဲ ၄ ဂိုး ဂိုးမရှိရလဒ်နဲ့ မန်ချက်စတာစီးတီး ရှုံးနိမ့်ခဲ့ပြီး ဒါဟာ ပြိုင်ပွဲစုံ ၅ ပွဲဆက်တိုက် ရှုံးနိမ့်ခဲ့တာပဲ ဖြစ်ပါတယ်။

လတ်တလောမှာပဲ ဘလွန်းဒီအောဆု ရရှိထားတဲ့ အဓိက ကွင်းလယ်ကစားသမား ရိုဒရီ အပါအဝင် ကိုဗာဆစ်၊ ရူဘင်ဒီယက်စ်​၊​ ဒိုကူ၊​ အော်စကာဘော့ဘ် အစရှိတဲ့ ကစားသမားတွေ ဒဏ်ရာပြသနာနဲ့ကြုံတွေ့နေရချိန် အခုလို ၅ ပွဲဆက်တိုက် ရှုံးနိမ့်ခဲ့ရတာဖြစ်ပြီး ဒီ ၅ ပွဲအတွင်း ပေးဂိုး ၁၄ ဂိုးအထိ ခွင့်ပြုထားခဲ့ရကာ ၄ ဂိုးသာ သွင်းယူထားခဲ့နိုင်တာပါ။

၅ ပွဲဆက်တိုက် ရှုံးနိမ့်ခဲ့ရတဲ့ ပွဲစဉ်တွေဟာ ကာရာဘောင်းဖလားပွဲ ၁ ပွဲ၊​ ချန်ပီယံလိဂ် ၁ ပွဲနဲ့ ပရီးမီးယားလိဂ် ၃ ပွဲတို့ဖြစ်ပြီး ကာရာဘောင်းပွဲစဉ်နဲ့ ယမန်နေ့က ပရီးမီးယားလိဂ်ပွဲစဉ်မှာ စပါးအသင်းကိုရှုံးနိမ့်ခဲ့ရတာကြောင့် ဒီ ၅ ပွဲအတွင်း စပါးကိုပဲ ၂ ကြိမ် ရှုံးနိမ့်ခဲ့တာလည်း ဖြစ်ပါတယ်။

နောက်ဆုံး ၇ နှစ်အတွင်း ၆ ကြိမ်အထိ ပရီးမီးယားလိဂ်ဖလားရယူထားနိုင်ခဲ့တဲ့ မန်စီးတီးဟာ ဒီရာသီမှာလည်း ဖလားရယူဖို့ ရေပန်းစားခဲ့ပေမယ့် အခုလို ရှုံးနိမ့်မှုတွေကြောင့် လက်ရှိဇယားထိပ်မှာ ရပ်တည်နေတဲ့ လီဗာပူးလ်အသင်းနဲ့ အမှတ်ကွာဟချက် ကြီးမားလာသလို အဆင့် ၃၊ ၄၊ ၅ နေရာမှာရှိတဲ့ ချဲလ်ဆီး၊​ အာဆင်နယ်၊ ဘရိုက်တန်တို့နဲ့ ၁ မှတ်သာကွာဟခဲ့လို့ မန်စီးတီးအတွက် ဒါဟာ စိုးရိမ်စရာအခြေအနေ ဖြစ်ပါတယ်။

ဒီဇင်ဘာ ပွဲကြပ်ကာလ မတိုင်ခင်မှာတင် ပရီးမီးယားလိဂ်မှာ ရမှတ် ၉ မှတ်အထိ ဆုံးရှုံးခဲ့ရတဲ့ မန်စီးတီးအသင်းဟာ ဒီတစ်ရာသီလုံးနားလိုက်ရတဲ့ ရိုဒရီနဲ့ ဒီဇင်ဘာလလယ်လောက်မှ ဒဏ်ရာကနေပြန်လာနိုင်မယ့် ကိုဗာဆစ်တို့ မရှိချိန် ကွင်းလယ်အဖျက်နေရာကို ဖြည့်တင်းနိုင်မယ့် ကစားသမားမရှိလို့ ဆက်လက် ရုန်းကန်ရဦးမှာပါ။

လာမယ့် ဒီဇင်ဘာပွဲကြပ်ကာလအတွင်းမှာလည်း လီဗာပူးလ်၊ နော်တင်ဟမ်ဖောရက်စ်၊ ခရစ္စတယ်ပဲလေ့စ်၊ မန်ချက်စတာယူနိုက်တက်၊ အက်စတွန်ဗီလာ၊ အဲဗာတန်၊ လက်စတာ တို့နဲ့ ပရီးမီးယားလိဂ် ၇ ပွဲနဲ့ ဂျူဗင်တပ်နဲ့ ချန်ပီယံလိဂ် ၁ ပွဲ စုစုပေါင်း ၁ လအတွင်း ၈ ပွဲ ကစားရမှာကြောင့် မန်စီးတီးတို့အတွက် ခက်ခဲမယ့်ကာလတခုပါ။

လက်ရှိ အဆင့် ၁ နေရာက လီဗာပူးလ်ဟာ မန်စီးတီးကို ၁ ပွဲလို ၅ မှတ်ဖြတ်ထားနိုင်ပြီး ဒီနေ့ည ယှဉ်ပြိုင်မယ့် ဆောက်သမ်တန်ကို လီဗာပူးလ်အနိုင်ရခဲ့ရင် ၈ မှတ်အထိ ဖြတ်ထားနိုင်မှာဖြစ်လို့ လာမယ့်ပွဲစဉ်တွေမှာ မန်ချက်စတာစီးတီးအသင်း ဘယ်လိုပြန်လာနိုင်မလဲဆိုတာ ဆက်လက်စောင့်ကြည့်ရမှာဖြစ်ပါတယ်။

မြေလတ်အသံ၊ စက်တင်ဘာ ၂၂၊ ၂၀၂၄။

ပြီးခဲ့တဲ့နှစ်က ချန်ပီယံမန်စီးတီးအသင်းနဲ့ ဒုတိယနေရာသာရခဲ့တဲ့အာဆင်နယ်အသင်း ဒီရာသီရဲ့ ပထမဆုံးတွေ့ဆုံမှုအဖြစ် ပရီးမီးယားလိဂ်ပွဲစဉ် ၅၊ ယနေ့ည မြန်မာစံတော်ချိန် ၁၀ နာရီ၊ မန်စီးတီးအိမ်ကွင်း အီတီဟက်ကွင်းမှာ ယှဉ်ပြိုင်သွားကြမှာဖြစ်ပါတယ်။

ချန်ပီယံမန်စီးတီးအသင်းက ဒီရာသီမှာလည်း ပုံစံကောင်းပြသနေပြီး ၄ ပွဲကစား ၄ ပွဲလုံး အနိုင်ရရှိထားသလို တိုက်စစ်မှူး ဟာလန်း ကလည်း ၉ ဂိုးအထိ သွင်းယူထားနိုင်ခဲ့တာ ဖြစ်ပါတယ်။

ပရီးမီးယားလိဂ်မှာ ရာနှုန်းပြည့် နိုင်ပွဲရရှိထားပြီး ကြားရက်မှာကစားခဲ့ကြတဲ့ ချန်ပီယံလိဂ်ပွဲစဉ်မှာ အင်တာမီလန်အသင်းကို သရေကျခဲ့ပေမယ့် မန်စီးတီးအသင်းရဲ့ ခြေစွမ်းကို လျှော့တွက်လို့မရဘဲ အာဆင်နယ်အသင်း ရုန်းကန်ရမယ့် အခြေအနေပါ။

အာဆင်နယ်အသင်းကတော့ ၄ ပွဲကစား ၃ ပွဲနိုင် ၁ ပွဲသရေနဲ့ ရလဒ်ကောင်းနေခဲ့ပြီး ဒက်ကလန် ရိုက်စ် ရဲ့ အငြင်းပွားဖွယ် အနီကတ်ကြောင့်သာ ရာနှုန်းပြည့်နိုင်ပွဲ မရရှိခဲ့တာ ဖြစ်ပါတယ်။

ဒါ့အပြင် ကြားရက်မှာကစားခဲ့တဲ့ ချန်ပီယံလိဂ်ပွဲမှာလည်း မန်စီးတီးနည်းတူ အာဆင်နယ်လည်း သရေရလဒ်သာရရှိခဲ့ပေမယ့် ဒီရာသီ ပေးဂိုး ၁ ဂိုးသာ ခွင့်ပြုပေးထားရတဲ့ အာဆင်နယ်အသင်းရဲ့ ခံစစ်ပိုင်းကိုတော့ မန်စီးတီးအသင်း ခက်ခက်ခဲခဲ ရင်ဆိုင်ရနိုင်ချေရှိပါတယ်။

မန်စီးတီးအသင်းက လူငယ်တိုက်စစ်မှူး အော်စကာ ဘော့ဘ်နဲ့ ခံစစ်မှူး နသန် အကီတို့သာ ဒဏ်ရာရရှိထားပြီး အစားထိုးရမယ့် ကစားသမားကောင်းများစွာရှိနေပေမယ့် အာဆင်နယ်ကတော့ ဇင်ချန်ကို၊ တီယာနေး၊ တိုမီယာစု စတဲ့ ခံစစ်ကစားသမားတွေ ဒဏ်ရာရနေသလို အဓိက ကစားသမားဖြစ်တဲ့ အသင်းခေါင်းဆောင် မာတင် အိုဒီဂတ်နဲ့ အသစ်ခေါ်ယူထားတဲ့ မီခေးလ် မာရီနိုတို့လည်း ဒဏ်ရာရထားပါသေးတယ်။

ဒါကြောင့် ကွင်းလယ်ပိုင်းမှာ ပြဿနာအနည်းငယ်ရှိနေတဲ့ အာဆင်နယ်အသင်းအနေနဲ့ ပိုမိုရုန်းကန်ရနိုင်ပြီး မန်ချက်စတာစီးတီးအသင်းရဲ့ အိမ်ကွင်းကနေ အမှတ်ခွဲဝေရယူနိုင်မလား အမှတ်ဗလာ လက်ဗလာနဲ့ ပြန်လာခဲ့ရမလား စောင့်ကြည့်ရမှာပါ။

ရာသီသစ်အစ အစောပိုင်းသာ ရှိနေသေးပေမယ့် အရင်နှစ်တွေကတည်းက ချန်ပီယံဖြစ်ဖို့ ပြိုင်ဆိုင်မှုပြင်းထန်ခဲ့ကြတဲ့ နှစ်သင်းအတွက် ဒီပွဲရဲ့ အနိုင်အရှုံးရလဒ်ကလည်း ချန်ပီယံပြေးလမ်းအတွက် များစွာအကျိုးသက်ရောက်မှု ရှိစေမှာဖြစ်လို့ မန်စီးတီးနဲ့ အာဆင်နယ်ရဲ့ ပရီးမီးယားလိဂ် ပွဲစဉ် ၅ ယှဉ်ပြိုင်မှုကို စောင့်မျှော်ကြည့်ရှုကြရအောင်ပါ။

မြေလတ်အသံ၊ သြဂုတ် ၁၉၊ ၂၀၂၄။

ပရီးမီးယားလိဂ်ပွဲစဉ် ၁၊ တနင်္ဂနွေည နောက်ဆုံးပွဲအဖြစ် စတန်းဖို့ဒ်ဘရစ်ချ်မှာ ယှဉ်ပြိုင်ကစားခဲ့တဲ့ ချဲလ်ဆီးနဲ့ မန်စီးတီးပွဲမှာ အိမ်ရှင်ချဲလ်ဆီးအသင်းကို မန်စီးတီးက ၀-၂ နဲ့ အနိုင်ရရှိခဲ့ပါတယ်။

နည်းပြသစ် မာရက်ဇ်စကာရဲ့ ချဲလ်ဆီးအသင်းက ၄-၂-၃-၁ ကစားကွက်နဲ့ ပွဲထွက်လာပြီး တိုက်စစ်မှာ ပြီးခဲ့တဲ့ရာသီက ဝေဖန်မှုများစွာခံခဲ့ရတဲ့ နီကိုလပ်စ်ဂျက်ဆင်နဲ့ ပွဲထွက်လာခဲ့ပါတယ်။ မန်စီးတီးကတော့ ၃-၂-၄-၁ ကစားကွက်နဲ့ တိုက်စစ်ဦးစားပေး ပွဲထွက်လာခဲ့ပြီး အားထားရတဲ့ ကွင်းလယ်ကစားသမား ရိုဒရီ ဒဏ်ရာကြောင့်ပါဝင်ခဲ့ခြင်း မရှိပါဘူး။

ပထမပိုင်းမှာ မန်စီးတီး တောင်ပံကစားသမား ဒိုကူ ကို ညာတောင်ပံမှာ ကစားစေခဲ့လို့ ဒိုကူ ခြေစွမ်းမပြနိုင်ဘဲ ရုန်းကန်ခဲ့ရပါတယ်။ အဲ့ဒီနောက် ပွဲကစားချိန် ၁၀ မိနစ်ကျော်မှာတော့ ဒိုကူနဲ့ ဆာဗင်ဟိုတို့ တောင်ပံနှစ်ဖက် နေရာပြောင်းကစားစေခဲ့ပြီး သူ့ရဲ့မူလနေရာ ဘယ်တောင်ပံမှာ ဒိုကူ ပုံမှန်အတိုင်း ခြေစွမ်းပြနိုင်ခဲ့ပြီး သူ့ရဲ့ ပေးပို့မှုကနေတဆင့် ဘနာဒိုဆေးဗားနဲ့ထိပြီး လမ်းကြောင်းပြောင်းသွားတဲ့ဘောလုံးကို ဟာလန်းက နောက်တန်း ၂ ယောက်နဲ့ ဂိုးသမားတို့ကြားထဲကနေ အကောင်းဆုံး သွင်းယူပြီး အဖွင့်ဂိုးကို ပွဲကစားချိန် ၁၈ မိနစ်မှာ စတင်ရရှိခဲ့ပါတယ်။

ပထမပိုင်း ပြီးဆုံးကာနီးမှာ တိုက်စစ်မှူး ဂျက်ဆန်က ခြေပဂိုးပြန်သွင်းနိုင်ခဲ့ပေမယ့် လူကျွံနေလို့ ချဲလ်ဆီးအသင်း ဂိုးမရရှိခဲ့ပါဘူး။

ဒုတိယပိုင်းမှာတော့ ချဲလ်ဆီးတို့ ကစားပုံပိုမိုကောင်းမွန်လာပေမယ့် အဆုံးသတ်ပိုင်းနဲ့ ပြိုင်ဘက်ဧရိယာအတွင်း ပေးပို့မှုတွေမှာ လိုအပ်ချက်များစွာရှိခဲ့ပြီး ချေပဂိုးမရရှိခဲ့သလို ပွဲကစားချိန် ၇၆ မိနစ်မှာ ပင်နယ်တီဧရိယာ ကိုဗာဆစ် လက်ထိဘောကို ပင်နယ်တီမပေးခဲ့လို့ ချဲလ်ဆီးတို့ နစ်နာခဲ့ရပါတယ်။

အနိုင်ရလဒ်ကို ထိန်းဖို့ကြိုးစားနေတဲ့ မန်စီးတီးအသင်းက ပွဲကစားချိန် ၈၄ မိနစ်မှာ ကိုဗာဆစ်ရဲ့ တကိုယ်တောင်ထိုးဖောက်မှုနဲ့အတူ ဧရိယာထိပ် အဝေးကန်ချက်နဲ့ ဒုတိယဦးဆောင်ဂိုး ရရှိခဲ့ပြီး မန်စီးတီးအသင်းအတွက် အနိုင်ရလဒ်ကို သေချာစေခဲ့ကာ ၀-၂ ရလဒ်နဲ့ပဲ ပွဲပြီးဆုံးခဲ့ပါတယ်။

ဒီပွဲမှာ မန်စီးတီး ကစားသမားသစ် ဆာဗင်ဟိုနဲ့ ဒိုကူအပြင် ကွင်းလယ်လူ ကိုဗာဆစ်တို့ ခြေစွမ်းပြနိုင်ခဲ့ကြသလို ပြီးခဲ့တဲ့နှစ်က ချန်ပီယံဖြစ်ခဲ့တဲ့ မန်စီးတီးတို့ ချန်ပီယံခြေစွမ်းကို ဆက်လက်ထိန်းထားနိုင်ဆဲဖြစ်တယ်ဆိုတာ မြင်ခဲ့ရပါတယ်။ တဖက်မှာတော့ နည်းပြသစ်အပါအဝင် ကစားသမားသစ် အများအပြားဝယ်ယူထားတဲ့ချဲလ်ဆီးအသင်းအနေနဲ့ အသင်းလိုက်ကစားဟန် ပိုမိုကောင်းမွန်လာဖို့ လိုအပ်နေသေးသလို ရာသီအစမှာတင် မန်စီးတီးနဲ့ တွေ့ခဲ့ရပြီး ရှုံးနိမ့်ခဲ့ရလို့ စိတ်ဓါတ်ပိုင်းဆိုင်ရာ ထိုးနှက်ချက်တခု ဖြစ်လာနိုင်ပါတယ်။

ဒီတပတ် ပရီးမီးယားလိဂ် ပွဲစဉ် ၁ မှာတော့ ချဲလ်ဆီးအသင်းကလွဲလို့ အသင်းကြီးတွေ အားလုံး အနိုင်ရလဒ် ဖော်ဆောင်နိုင်ခဲ့ပြီး ပွဲစဉ် ၁ရဲ့ နောက်ဆုံးပွဲဖြစ်တဲ့ လက်စတာနဲ့စပါး ပွဲစဉ်ကိုတော့ တနင်္လာနေ့ည (အင်္ဂါမနက်) မြန်မာစံတော်ချိန် ၁ နာရီ ၃၀ မိနစ်မှာ ယှဉ်ပြိုင်သွားမှာ ဖြစ်ပါတယ်။

Photo – Manchester City.