မုံရွာ

ဒိန်းဂျား၊ အောင်စိုး

မြေလတ်အသံ၊ ဇူလိုင် ၃၊ ၂၀၂၅။

စစ်ကိုင်းတိုင်း၊ မုံရွာအခြေစိုက် နမခ နဲ့ မကွေးတိုင်း၊ BPI မြင်းမွေးမြူရေးတပ်တို့မှ စစ်ကောင်စီတပ်ဖွဲ့ဝင်တွေ ဇူလိုင် ၂ ရက်နဲ့ ၃ ရက်မှာ ဘက်ပြောင်းခိုလှုံလာကြတယ်လို့ သက်ဆိုင်ရာတော်လှန်ရေး တပ်ဖွဲ့ဝင်တွေဆီက သိရပါတယ်။

မုံရွာမြို့အခြေစိုက် အနောက်ပိုင်းတိုင်းစစ်ဌာနချုပ်-နမခ ကစစ်ကောင်စီတပ်ဖွဲ့ဝင် ၄ ဦး လက်နက်တွေနဲ့အတူ ဘက်ပြောင်းခိုလှုံလာခဲ့တယ်လို့ ဇူလိုင် ၃ ရက်ဒီနေ့မှာ မုံရွာမြို့နယ်ပြည်သူ့ ကာကွယ်ရေးအဖွဲ့က ထုတ်ပြန်ပါတယ်။

ဘက်ပြောင်းလာသူ ၄ ဦးမှာ အသက် ၃၀ ကျော်အရွယ်ရှိပြီး သူတို့ဟာ ၂၀၂၄ အတွင်း လူစားထိုး ပေါ်တာဆွဲခံရပြီးနောက်မှာ စစ်တပ်ထဲကိုရောက်ရှိခဲ့ကြတာလို့ ဆိုပါတယ်။

“သူတို့က ပစတွေဗျ။ ပေါ်တာအစားထိုး ပါလာကြရတာ။ စစ်သက်ကတော့ တနှစ်မပြည့်သေးဘူးဗျ”လို့ မုံရွာမြို့နယ်ပြည်သူ့ကာကွယ်ရေးအဖွဲ့မှတာဝန်ရှိသူတဦးက ပြောပါတယ်။

အဆိုပါ ၄ ဦးအနက် ၁ ဦးမှာ သေနတ်ပါမလာပေမယ့် ကျန် ၃ ဦးမှာတော့ MA-3 ၂ လက်၊ MA-1 ၁ လက်၊ ကျည်ဘောက် ၈ ခု ပါရှိလာခဲ့တာကြောင့် ဆုချီးမြှင့်ပေးဖို့ပြင်ဆင်ထားတယ်လို့ သူက ဆိုပါတယ်။

လက်ရှိမှာ တော်လှန်ရေးမှာဝင်ပြီး ပြန်တိုက်ချင်တဲ့သူရှိသလို နေရပ်ကို ပြန်ချင်တဲ့သူလည်းရှိတာကြောင့် မြို့ နယ်ပကဖအနေနဲ့ ၎င်းတို့ဖြစ်ချင်တဲ့ ဆန္ဒအတိုင်း အတတ်နိုင်ဆုံး လုပ်ဆောင်ပေးမှာဖြစ်တယ်လို့ အထက်ပါတာဝန်ရှိသူကပြောပါတယ်။

ပြီးခဲ့တဲ့မေ ၂၇ ရက်ကလည်း နမခ က စစ်ကောင်စီတပ်သား ၂ ဦးဟာ MA-1သေနတ် ၂ လက် နဲ့အတူ CDM တွေကိုကူညီထောက်ပံ့ပေးနေ တဲ့ ဒို့အရေးချန်နယ်ဆီကို ဘက်ပြောင်းလာခဲ့သေးတယ်လို့ သိရပါတယ်။

ဒါ့အပြင် မကွေးတိုင်း၊ ပခုက္ကူမြို့နယ်ရှိ BPI မြင်းမွေးမြူရေးတပ်မှ စစ်ကောင်စီတပ်ဖွဲ့ဝင် ၁ ဦး ဇူလိုင် ၂ ရက်နေ့လယ် ၁ နာရီလောက်မှာ လက်နက်နဲ့အတူ ဘက်ပြောင်းခိုလှုံလာတယ်လို့ ပခုက္ကူမြို့နယ် နယ်မြေ ၁ ပကဖ ဆီကသိရပါတယ်။

ဘက်ပြောင်းခိုလှုံလာသူဟာ အသက် ၂၉ နှစ်အရွယ် စစ်ကောင်စီတပ်သား မိုးစက်ဖြစ်ပြီး MA 1 အမျိုးအစား သေနတ် ၁ လက်၊ ကျည်ဘောက် ၃ ခု၊ ကျည် ၁၃၅ တောင့်တို့နဲ့အတူလည်း ပါလာတာကြောင့် ဆုငွေ သိန်း ၅၀ ချီးမြှင့်ခဲ့တယ်လို့ ဆိုပါတယ်။

“ကျနော်တို့နဲ့ ချိတ်ဆက်ပြီးမှ ဝင်လာတာ၊ ကျနော်တို့ကလည်း ကြိုပေးရတဲ့ အပိုင်းတော့ရှိတာပေါ့၊ ကျနော်တို့နယ်မြေထဲအထိတော့ သူဟာသူလာတာ၊ သူအလင်းဝင်ရတဲ့အကြောင်းကတော့ စစ်ကောင်စီတပ်ထဲမှာ မနေချင်တော့လို့ ပြောတယ်၊ တပ်ထဲမှာ အပြင်တွေလည်း မထွက်ရဘူးပြောတယ်၊ လွတ်လပ်မှုလည်းမရှိဘူးလို့ ပြောတယ်၊” လို့ ပခုက္ကူမြို့နယ် နယ်မြေ ၁ ပကဖ တာဝန်ခံက ပြောပါတယ်။

လက်ရှိမှာ တပ်ရင်းမှာထိန်းသိမ်းထားပြီး ဆက်လက်စုံစမ်းမှုတွေလုပ်နေတယ်လို့လည်း ဆိုပါတယ်။

“သူကတော့ လွတ်မြောက်နယ်မြေတနေရာမှာ သွားပြီးလုပ်ကိုင်စားသောက်မယ်တော့ ပြောတယ်၊ အခုလောလောဆယ်တော့ ကျနော်တို့ဆီမှာ ထိန်းသိမ်းထားတယ်”လို့ သူက ဆက်ပြောပါတယ်။

၂၀၂၁ စစ်အာဏာသိမ်းချိန်ကနေ အခုနှစ် ဇူလိုင် ၂ ရက်အထိ ပခုက္ကူမြို့နယ် နယ်မြေ ၁ ပကဖ ဆီကို ဘက်ပြောင်းခိုလှုံလာသူ ၃ ဦးရှိပြီး အောင်သာရွာက ပျူစောထီး ၁ ဦးနဲ့ BPI မြင်းမွေးမြူရေးတပ်ထဲက တပ်သား ၂ ဦးဖြစ်တယ်လို့ သိရပါတယ်။

စာတည်း – လင်း

မုံရွာ၊ ဇွန် ၂၂၊ ၂၀၂၅။

စစ်ကိုင်းတိုင်း၊ မုံရွာမြို့ပေါ် ဈေးဆိုင်တွေကို စစ်ကောင်စီတပ်ဖွဲ့တွေက ဆိုင်းဘုတ်ခွန်အဖြစ် ၁ ပေပတ်လည် ၁၅,၀၀၀ ကျပ်နှုန်းနဲ့ကောက်ခံနေတယ်လို့ မြို့ခံတွေဆီက သိရပါတယ်။

ဇွန် ၁၇ ရက်ကစပြီး ယမန်နေ့ ဇွန် ၂၁ ရက်အထိ ပြည်ထောင်စုလမ်း၊ သာစည်လမ်း၊ ကျောက္ကာလမ်းနဲ့ ဗိုလ်ချုပ်လမ်းမကြီးတွေပေါ်မှာဖွင့်လှစ်ထားတဲ့ ဆိုင်ကြီး၊ ဆိုင်ငယ်တွေကို စစ်ကောင်စီတပ်အင်အား ၁၀ ဦးခန့်က တဆိုင်ဝင်တဆိုင်ထွက် အထက်ပါနှုန်းထားနဲ့ ဆိုင်းဘုတ်အရှည်အတိုင်း လိုက်ကောက်နေတာလို့ ဆိုပါတယ်။

“ပုံမှန်က ၁ ပေကို ၁,၅၀၀(ကျပ်)မကျော်ဘူးကောက်တာ။ အခုမှ ၁၅,၀၀၀ ထိ ထိုးတက်သွားတာ၊ ၁၀ ဆမကတက်သွားတယ်။ ဒီလိုသာ ၁ လ ၁ ခါဆောင်ရမယ်ဆို ဆိုင်းဘုတ်ပြန်သေးမှရတော့မယ်။ အခုကအလျားက ၃ ပေလုပ်ထားတာ။ ၁ ပေခွဲဆိုဒ် ပြန်ပြောင်းတော့မယ်”လို့ မြို့ခံစျေးဆိုင်ပိုင်ရှင်တဦးက မြေလတ်အသံကို ပြောပါတယ်။

ယခင်က ဆိုင်းဘုတ်ခွန်ကောက်ခံရာမှာ အိမ်ဆိုင်နဲ့ ဆိုင်ခန်းဆိုင်ကို ခွဲခြားကောက်ခံပြီး ဆိုင်းဘုတ် ၁ ပေပတ်လည်အတွက် ပျမ်းမျှ ၁,၅၀၀ ကျပ်နှုန်းနဲ့ ၃ လ ၁ ကြိမ် ပေးဆောင်ရပေမယ့် လက်ရှိမှာယခင်ထက် ၁၀ ဆခန့် တိုးမြှင့်ကောက်ခံတဲ့အပြင် လစဉ်ပေးဆောင်ရမှာဖြစ်ကြောင်း စစ်ကောင်စီတပ်ဖွဲ့တွေက ပြောဆို သွားတယ်လို့ မြို့ခံတွေက ပြောပါတယ်။

ဒါ့အပြင် ဆိုင်းဘုတ်ခွန်ကောက်ခံရာမှာ စည်ပင်ဝန်ထမ်းတွေမပါဝင်ဘဲ စစ်ကောင်စီတပ်ဖွဲ့ဝင်တွေက ပေကြိုးတွေနဲ့ ဆိုင်းဘုတ်အတိုင်းယူကာ ကောက်ခံသွားတာဖြစ်တယ်လို့ သိရပါတယ်။

“သူတို့က ပေကြိုးနဲ့တိုင်းပြီး ဆိုင်လိပ်စာရယ်၊ ဆိုင်နာမည်ရယ် စာရင်းလုပ်သွားတယ်။ နောက်လကျ ပေကြိုးနဲ့မတိုင်းတော့ဘဲ ကျသလောက် တခါတည်းဆောင်ပေးရုံပဲတဲ့။ ဘဏ်တို့ Kpayတို့ကနေ ဆောင်လို့ရလားမေးကြည့်တော့ သူတို့ပဲလာကောက်မယ်ပြောသွားတာ။”လို့ နောက်ထပ်မြို့ခံတဦးက ပြောပါတယ်။

စစ်အာဏာသိမ်းပြီးနောက် လက်ရှိအထိ ဆိုင်းဘုတ်အခွန် လာရောက်ကောက်ခံသူမရှိတာကြောင့် မပေးဆောင်ရတာ ၄ နှစ်ကျော် ကြာရှိပြီဖြစ်ပြီး အခုလို လာရောက်ကောက်ခံချိန်မှာလည်း အခွန်နှုန်းတွေကို ၁၀ ဆအထိ တိုးမြှင့်ကောက်ခံနေတာဖြစ်ပါတယ်။

လက်ရှိမှာ မုံရွာမြို့ရဲ့အဓိကလမ်းမကြီးဘေးက ဆိုင်တွေကိုသာ ဆိုင်းဘုတ်ခွန်ကောက်ခံနေတာဖြစ်ပြီး ရပ်ကွက်အတွင်းဖွင့်ထားတဲ့ ဆိုင်တွေကိုတော့ ကောက်ခံတာမရှိသေးဘူးလို့ သိရပါတယ်။

ပြီးခဲ့တဲ့ ၂၀၂၄ စက်တင်ဘာလကစပြီး လက်ရှိအထိ စစ်ကောင်စီက စက်မှုဇုန်ရပ်ကွက်ရှိ စက်ရုံတွေနဲ့ အဟောင်းပစ္စည်းဆိုင်တွေကို ငွေကျပ် ၃၀,၀၀၀ လစဉ်ကောက်ခံတယ်လို့လည်း စုံစမ်းသိရပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၇၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ် (နမခ) ၁၀၇ မမ ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့တယ်လို့ Brave Warriors for Myanmar BWM အဖွဲ့ဆီက သိရပါတယ်။

ဇွန် ၁၄ ရက် ည ၁၀ နာရီ ၁၀ မိနစ်ခန့်က ပစ်ခတ်တိုက်ခိုက်ခဲ့တာဖြစ်ပြီး ရှော့တိုက်ဒုံး ၃ လုံးဟာ နမခ စစ်ဆင်ရေးရုံး၊ လေ့ကျင့်ရေးရုံးနဲ့ အရာရှိရိပ်သာနေရာတွေကို ကျရောက်ပေါက်ကွဲပြီး အဆောက်အဦတချို့ မီးလောင်ခဲ့တယ်လို့ ဆိုပါတယ်။

” ကျတော်တို့ ရည်ရွယ်ချက်ကတော့ ပြည်သူတွေမလုံခြုံရသလို သူတို့ စစ်ခေါင်းဆောင်တွေလည်း နေ့စဥ်နဲ့အမျှ ထိတ်လန့်နေစေရဖို့ အခုလိုမစ်ရှင်တွေ လုပ်ဖြစ်တာပါ”လို့ BWMအဖွဲ့တာဝန်ရှိသူတဦးက မြေလတ်အသံကို ပြောပါတယ်။

ရှော့ဒုံးကျရောက်ပေါက်ကွဲမှုအတွင်း အရာရှိ ၂ ဦးအပါ စစ်ကောင်စီတပ်ဖွဲ့ဝင် ၅ ဦး နေရာမှာသေဆုံးကာ ၁၀ ဦးကျော် ထိခိုက်ဒဏ်ရာရရှိပြီး ဒဏ်ရာရသူတွေကို စစ်တပ်ဆေးရုံနဲ့ ပြည်သူ့ဆေးရုံကြီးသို့ ပို့ဆောင်ထားတယ်လို့ ဆိုပါတယ်။

” အဲ့နေ့ညက တအုံးအုံးနဲ့ မြို့ပေါ်ကနေကို အသံတွေကြားနေရတာ။ အနောက်မြောက်ဘက်ကနေ အသံကလာတာ။ နမခဘက်ဆီကဘဲလို့တော့ ထင်မိလိုက်သေးတယ်။ ရွာတွေထဲ လှမ်းထုတယ်ထင်တာ။”လို့ မုံရွာမြို့ခံအမျိုးသမီးတဦးက မြေလတ်အသံကို ပြောပါတယ်။

ရှော့တိုက်ဒုံးနဲ့ ပစ်ခတ်ပြီးနောက်မှာတော့ နမခတပ်တွင်းထဲက စစ်ကောင်စီတွေဟာ လက်နက်ကြီးတွေနဲ့ ပြန်လည်ပစ်ခတ်တာတွေလုပ်ဆောင်ခဲ့ပြီး အဆိုပါစစ် ဆင်ရေးကို Brave Warriors for Myanmar (BWM)ရဲ့ဦးဆောင်စီမံမှုနဲ့ မဟာမိတ်အဖွဲတွေဖြစ်တဲ့ Shadow(မုံရွာ)၊ ရွှေတြိဂံမဟာမိတ်တပ်ရင်း၊ Justice Brothers Force အဖွဲ့တို့ ပူးပေါင်းလုပ်ဆောင်ခဲ့တယ်လို့ သိရပါတယ်။

အလားတူ မကွေးတိုင်း၊ မြိုင်မြို့နယ်က ပျူစောထီးအထိုင်ချတပ်စွဲထားတဲ့ ကန်နီရွာရှိ ကင်းမျှော်စင်မှာ ကင်းစောင့်နေတဲ့ ပျူစောထီးတပ်ဖွဲ့ဝင် ၁ ဦးကို ကာ ကွယ်ရေးတပ်ဖွဲ့တွေက စနိုက်ပါနဲ့ပစ်ခတ်ခဲ့ရာ သေဆုံးခဲ့တယ်လို့သိရပါတယ်။

ဇွန် ၁၀ ရက် မနက် ၇ နာရီဝန်းကျင်မှာ ကန်နီရွာအရှေ့ပိုင်းရှိ မီတာ ၄၀ ဝန်းကျင်အမြင့်ရှိ မျှော်စင်ပေါ်ကို ကင်းစောင့်ဖို့တက်သွားတဲ့ ပျူစောထီးကို ပစ်ခတ်ခဲ့တာလို့ ဗစ်တာပျောက်ကျားတပ်ဖွဲ့မှ ကိုဗစ်တာက ပြောပါတယ်။

ကန်နီရွာမှာ ဂျိုးသိမ်းမျှော်စင်ခေါ် မြင့်စင် ၁၇ ခုရှိပြီး အဆိုပါမျှော်စင်တွေအနက် ယခုပစ်ခတ်ခဲ့တဲ့ မျှော်စင်ဟာအမြင့်ဆုံး ဖြစ်တယ်လို့သိရပါတယ်။

ပစ်ခတ်မှုကို ဗစ်တာပျောက်ကျားတပ်ဖွဲ့၊ ပခုက္ကူခရိုင်တပ်ရင်း ၂ တပ်ခွဲ ၂ ၊မုံရွာခရိုင်တပ်ရင်း ၂၅ တပ်ခွဲ ၂ sniper အဖွဲ့၊ အညာမြေပျောက်ကျားတပ်ဖွဲ့မြို့ နယ်(ပကဖ)၊ လျှပ်စီးပျောက်ကြားတပ်ဖွဲ့(မြို့နယ်ပကဖ)မဟာမိတ်အဖွဲ့တို့ ပူးပေါင်းလုပ်ဆောင်ခဲ့တာလို့ သိရပါတယ်။

ဒါ့အပြင် မန္တလေးတိုင်း၊ ငါန်းဇွန်မြို့နယ် မြို့သာရဲစခန်းကနေ ဂိတ်ကြေးကောက်ဖို့ထွက်လာတဲ့ စစ်ကောင်စီတပ်ဖွဲ့ဝင်တွေကို မြို့သာဆေးရုံအနီးမှာ မိုင်းဆွဲတိုက်ခိုက်ခဲ့တယ်လို့ နဂါးနီပြောက်ကျားတပ်ဖွဲ့- မြင်းခြံဆီက သိရပါတယ်။

ဇွန် ၁၆ ရက် မနက် ၅ နာရီ ၅၀ မိနစ်မှာ အင်အား ၂၅ ဦးဝန်းကျင်ရှိ စစ်ကောင်စီတပ်ဖွဲ့ဟာ မြို့သာဆေးရုံအနီး ဂိတ်ချဖို့လုပ်ဆောင်နေစဥ် တိုက်ခိုက်ခဲ့တာလို့ ဆိုပါတယ်။

မိုင်းဆွဲတိုက်ခိုက်မှုကြောင့် စစ်ကောင်စီတပ်ဖွဲ့ဝင် ၃ ဦးသေဆုံးပြီး ၄ ဦးဒဏ်ရာရှိခဲ့ကြောင်း မြေပြင်သတင်းပေးတွေကတဆင့် စုံစမ်းသိရှိရပြီး ဒဏ်ရာရသူတွေကို မြို့သာဆေးရုံကတဆင့် မန္တလေးဆေးရုံကို သယ်ဆောင်သွားတယ်လို့ နဂါးနီပြောက်ကျားတပ်ဖွဲ့-မြင်းခြံတာဝန်ခံက ဆိုပါတယ်။

အထက်ပါ စစ်ကောင်စီတပ်ဖွဲ့တွေ သေဆုံးထိခိုက်မှုနဲ့ပတ်သက်ပြီး မြေလတ်အသံက သီးခြားအတည်မပြုနိုင်ပါဘူး။

မုံရွာ၊ ဇွန် ၁၃၊ ၂၀၂၅။

စစ်ကိုင်းတိုင်း၊ မုံရွာမြို့မှာ ဇွန် ၂ ရက်ညနေပိုင်းကစပြီး စစ်ကောင်စီတပ်ဖွဲ့ဝင်တွေက စစ်မှုထမ်းဖို့ အမျိုးသားတွေကို ပြန်လည်ဖမ်းဆီးနေတယ်လို့ ဒေသခံတွေဆီက သိရပါတယ်။

မုံရွာမြို့ပေါ် လမ်းမကြီးတွေနဲ့ မြို့ဝင်မြို့ထွက်၊ ရပ်ကွက်ကလမ်းကြားတွေကအစ လမ်းသွားလမ်းလာ အမျိုးသားတွေကိုစစ်မှုထမ်းဖို့ စစ်ကောင်စီတပ်ဖွဲ့ဝင်တွေက စစ်ကားနဲ့ အုပ်စုဖွဲ့ကာဖမ်းဆီးမှုတွေ လုပ်ဆောင်လာတယ်လို့ ဆိုပါတယ်။

“မနက်နေ့ည မရွေးဘူး စစ်ကားဖင်ထိုးပြီး ဖမ်းတာ။ ဆီဆိုင်ထဲ ဆီဖြည့်နေရင်းကို ဆွဲခံရတာဆိုတော့ မလုံခြုံတော့ဘူး။ လမ်းပေါ်မြို့ထဲမှာဆို တော်ရုံ လူငယ်တွေ သွားသွားလာလာ မလုပ်ရဲကြတော့ဘူး။ ဘီယာဆိုင်၊ လက်ဘက်ရည်ဆိုင်တွေလည်း လူငယ်လူလတ်ပိုင်းတွေ မရှိဘူး လူကြီးပိုင်းတွေဘဲ တွေ့ရတော့တာ။”လို့ အသက် ၄၀ ကျော်အရွယ် မုံရွာမြို့ခံအမျိုးသားတဦးက မြေလတ်အသံကို ပြောပါတယ်။

မတ်လပိုင်း ၂၈ နေ့ ငလျင်လှုပ်ခတ်ပြီးနောက်ပိုင်းမှာတော့ မုံရွာမြို့မှာ စစ်မှုထမ်းဖို့ပေါ်တာဆွဲ ဖမ်းဆီးမှုတွေကို ယာယီရပ်နားထားခဲ့ပေမယ့် ၂ လကျော်အကြာမှာတော့ ယခုလို ဖမ်းဆီးမှုတွေ ပြန်လည်လုပ်ဆောင်လာတာဖြစ်တယ်လို့ ဒေသခံတွေက ဆိုပါတယ်။

ဇွန် ၂ ရက်ညနေပိုင်းမှာ မြဝတီရပ်ကွက်၊ ဗိုလ်တေဇလမ်းပေါ်မှာ ဆီဖြည့်နေတဲ့ ဒယ်လီပို့ အမျိုးသား ၂ ဦး၊ ဇွန် ၄ ရက်မှာ ရေဦးဆန်ဆိုင်ဂိတ်ကိုဖြတ်သွားတဲ့ သက္ကယ်ကျင်းရွာခံ အမျိုးသား ၂ ဦး၊ ဇွန် ၉ ရက်မှာ ချမ်းမြသာစည်နဲ့ ဘုန်းစိုးရပ်ကွက်ရှိ အရက်ဆိုင် ၂ ဆိုင်က အမျိုးသား ၆ ဦး၊ ဇွန် ၁၀ ရက်မှာ ပေ ၈၀ လမ်းအတွင်း ဆိုင်ကယ်စီးအမျိုးသား ၁ ဦးနဲ့ သလ္လာကျောင်းအနီးအမျိုးသား ၂ ဦး စုစုပေါင်း အမျိုးသား ၁၃ ဦးဝန်းကျင်စစ်မှုဖမ်းဖို့ ဖမ်းဆီးခံလိုက်ရတယ်လို့ မြေလတ်အသံက စုံစမ်းသိရှိရပါတယ်။

ဖမ်းဆီးခံရသူတွေဟာ အသက် ၂၀ ဝန်းကျင်အရွယ်ကနေ ၃၀ ကျော် ဝန်းကျင်အရွယ်တွေဖြစ်ပြီး ဖမ်းဆီးခံရတဲ့နေ့မှာတော့ မုံရွာမြို့ရဲ့ စစ်ကြောရေးနေရာဖြစ်တဲ့ မြို့တော်ခန်းမထဲမှာထားလေ့ရှိတယ်လို့ သိရပါတယ်။

“မနက်အစောပိုင်းဆို စစ်ကားနဲ့ ဖမ်းဖမ်းလာတယ်။ ဘယ်ကနေ ဘယ်လိုကို ဖမ်းလာများမသိဘူး။ ညနေဆိုလည်း စစ်ကားကခန်းမရှေ့ထိုးရပ်ပြီး ဖမ်းလာတဲ့သူတွေကို အော်ငေါက်ဆဲဆို ဆင်းခိုင်းတာ။ မိုးရွာရွာ နေပူပူ ဖမ်းချင်တဲ့နေ့ ထွက်ဖမ်းနေကြတာဘဲ။” လို့ မြို့ခံတဦးက မြေလတ်အသံကို ပြောပါတယ်။

ဖမ်းဆီးခံရသူတွေကို မြို့တော်ခန်းမထဲမှာ နှစ်ညအိပ်ထားရှိပြီးနောက်မှာတော့ မုံရွာမြို့အနောက် မြောက်တိုင်းစစ်ဌာနချုပ် – နမခ ဆီကို ပို့ဆောင်စေလွှတ်တယ်လို့ သူက ဆက်ပြောပါတယ်။

အခုရက်ပိုင်း မုံရွာမြို့ပေါ်မှာ စစ်မှုထမ်းဖို့ပေါ်တာဆွဲ ဖမ်းဆီးမှုတွေ လုပ်ဆောင်နေတာကြောင့် မြို့ပေါ်က လူငယ်လူလတ်ပိုင်း အမျိုးသားတွေတင်မကဘဲ သက္ကယ်ကျင်း၊ လယ်ဇင်၊ အောင်သာ စတဲ့အနီးနားဝန်းကျင် ကျေးရွာကရွာသားတွေပါ မြို့ပေါ် အလုပ်မလာကြဘူးလို့လည်း အလုပ်ပွဲရုံတွေဆီက သိရပါတယ်။

စာတည်း- လင်း