မြင်းခြံ

မြင်းခြံ၊ မေ ၁၊ ၂၀၂၆။

မန္တလေးတိုင်း၊ မြင်းခြံမြို့နယ်၊ ဆင်ချောင်းရွာကို စစ်ကော်မရှင်ဘက်ကစစ်ကြောင်းထိုးနေပြီး ဒေသခံကာကွယ်ရေးတပ်တွေနဲ့လည်း တိုက်ပွဲဖြစ်နေတာကြောင့် ဒေသခံပြည်သူ ၅,၀၀၀ ကျော် ထွက်ပြေးနေရတယ်လို့ ဒေသခံတွေဆီက သိရပါတယ်။

မေလ ၁ ရက်မနက် ၆ နာရီခန့်မှာ မြင်းခြံမြို့နယ်၊ တောပုရွာကနေ အင်အား ၃၀၀ ကျော်နဲ့ ထွက်လာတဲ့စစ်ကြောင်းဟာ ဆင်ချောင်းကျေးရွာအနီး ကြားဖြတ်တိုက်ခိုက်ခံရပြီးနောက် နာရီဝက်ကြာ တိုက်ပွဲဖြစ်ခဲ့တယ်လို့ ဆိုပါတယ်။

“ထိတွေ့မှုဖြစ်ပြီး ရွာထဲကိုဝင်နိုင်သွားတယ်။ ပြည်သူတွေက စစ်ရှောင်ရတော့ ဒီဘက်ကမ်း (မြောင်နယ်)ကိုကူးရတာ။ လက်နက်ကြီးတွေနဲ့လှမ်းပစ်တာမှာ လှေတွေတော့မထိဘူး။ ရေထဲကျတာ။” လို့ ဒေသခံတဦးက ပြောပါတယ်။

တိုက်ပွဲအတွင်း နှစ်ဖက်ထိခိုက်ကျဆုံးအခြေနေကို မသိရသေးဘဲ ဒေသကာကွယ်ရေးအဖွဲ့တွေ တပ်ပြန်ဆုတ်ပေးလိုက်ရတာကြောင့် စစ်ကော်မရှင်စစ်ကြောင်းက ဆင်ချောင်းရွာထဲ ရောက်လာတာလို့ ဆိုပါတယ်။

ဆင်ချောင်းရွာကိုရောက်နေတဲ့ စစ်ကြောင်းဟာ ရန္တပို၊ ကိုင်းကျေးရွာတွေအထိ စစ်ကြောင်းထိုးမယ်ဆိုတဲ့ သတင်းတွေလည်းထွက်ပေါ်နေတယ်လို့ ဒေသခံတွေကပြောပါတယ်။

စစ်ကြောင်းကြောင့် ကမ်းပါးနီ၊ ဖက်ပင်အိုင်၊ ဆင်ချောင်း၊ ညောင်တို၊ ကိုင်း၊ ရန္တပို၊ နဘူးအိုင်၊ မရိုးကုန်းအပါအဝင် ကျေးရွာ ၁၀ က ပြည်သူ ၅,၀၀၀ ကျော်လည်း ဧရာဝတီမြစ်ကိုဖြတ်ပြီး မြောင်မြို့နယ်ထဲကကျေးရွာတွေမှာ စစ်ဘေးရှောင်နေကြရတယ်လို့ ဆိုပါတယ်။

ခုလိုဖြတ်ကူးချိန်မှာလည်း စစ်ကော်မရှင်ဘက်က လက်နက်ကြီးတွေနဲ့ ၁၀ ချက်ပစ်ခတ်ခဲ့ပြီးလူထိခိုက်မှုတော့ မရှိခဲ့ဘူးလို့သိရပါတယ်။

ပြီးခဲ့တဲ့ ဧပြီ ၂ ရက်ကလည်း မြင်းခြံမြို့နယ်၊ ဖက်ပင်အိုင်ရွာကို စစ်ကော်မရှင်စစ်ကြောင်းဝင်ကာ ဒရုန်းနဲ့ဗုံးချ ပစ်ခတ်မှုတွေအတွင်း PDF တပ်ဖွဲ့ဝင် ၄ ဦးအပါအဝင် ပြည်သူ ၂၀ ထက်မနည်း သေဆုံးခဲ့တယ်လို့ သိရပါတယ်။

စာတည်း – လင်း

မြင်းခြံ၊ ဧပြီ ၄၊ ၂၀၂၆။

မန္တလေးတိုင်း၊ မြင်းခြံမြို့နယ်၊ ဖက်ပင်အိုင်ရွာကို စစ်ကော်မရှင်စစ်ကြောင်းဝင်ကာ ဒရုန်းနဲ့ဗုံးချပစ်ခတ်မှုတွေအတွင်း PDF ရဲဘော် ၄ ဦးအပါအဝင် ပြည်သူ ၂၀ ထက်မနည်းသေဆုံးခဲ့တယ်လို့ ကျောက်ပေါင်းကျေးရွာပကဖတာဝန်ရှိသူတွေထံက သိရပါတယ်။

ဧပြီ ၂ ရက်မှာ ဆုံကျေးရွာကနေထွက်လာတဲ့ ပျုစောထီးနဲ့စစ်ကော်မရှင်အင်အား ၁၀၀ ကျော်ဟာ ဖက်ပင်အိုင်ကျေးရွာထဲကို လက်နက်ငယ်တွေနဲ့ပစ်ခတ်ပြီးဝင်ရောက်ခဲ့သလို ဒရုန်းတွေနဲ့ပါဗုံးချ တိုက်ခိုက်ခဲ့တာပါ။

အဆိုပါပစ်ခတ်ဗုံးချမှုတွေအတွင်း ကျောက်ပေါင်းကျေးရွာပကဖအဖွဲ့ဝင် ၁ ဦး၊ ကျောက်တိုင်ကျေးရွာပကဖအဖွဲ့ဝင် ၁ ဦး၊ ကျောက်ကန်ကျေးရွာပကဖအဖွဲ့ဝင် ကိုကံကောင်း နဲ့ Local PDF အဖွဲ့ဝင် ၁ ဦးသေဆုံးခဲ့သလို ရွာခံတွေထဲကလည်း အသက် ၁၀ နှစ်အောက် ကလေးငယ် ၅ ဦးနဲ့ အသက် ၂၅ ကနေ ၇၀ ကြား အမျိုးသား ၊ အမျိုးသမီး ၁၅ ဦးကျော် သေဆုံးထားတယ်လို့ ဆိုပါတယ်။

“ရဲဘော်တွေက မာတီဒရုန်းချခံရတာ။ ** တွေကပြည်သူတွေကိုပစ်ခတ်နေတဲ့အချိန် ရဲဘော်တွေက ** တွေကိုလုံးပြီး အပြတ်ချေမှုန်းမယ်ဆိုပြီး ရွာကိုချဉ်းကပ်တဲ့အချိန်မှာ ဒရုန်းချခံရပြီးကျတာ။ ရွာပတ်ပတ်လည်ဆို ဒရုန်းဗုံး ၁၀ လုံးအထက်ချခံရတာ။ ရွာခံတွေက ပစ်သတ်ခံရတာ။ အချို့တလေက ကိုယ့်အမေတွေကိုသယ်တဲ့အချိန်မှာ ဒရုန်းချခံရပြီး သေဆုံးကြတာ”လို့ ကျောက်ပေါင်းကျေးရွာပကဖတာဝန်ရှိသူက ပြောပါတယ်။

အဆိုပါသေဆုံးစာရင်းဟာ ပစ်ခတ်မှုဖြစ်ပွားနေစဥ်အတွင်း မြင်တွေ့ရတဲ့ အရေအတွက်သာဖြစ်ပြီး ရွာမီးလောင်ချိန် နောက်ထပ်သေဆုံးသူတွေလည်းရှိနိုင်သေးတယ်လို့ ဆိုပါတယ်။

“သေဆုံးအရေအတွက်ကို အတည်ပြုထားနိုင်တာက ဒရုန်းတိုက်ခိုက်နေတဲ့အချိန်မှာ။ ရဲဘော်တွေက မီးငြှိမ်းတဲ့သူကငြှိမ်း၊ ရွာသားတွေကို ဆွဲတဲ့ သူကဆွဲတဲ့အချိန်မှာ မြင်ရတာရှိသေးတယ်။ ဒရုန်းတွေကတအားချတဲ့အချိန်မှာ နောက်ဆုတ်လာခဲ့ရတာ”လို့ အထက်ပါတာဝန်ရှိသူက ဆက်ပြောပါတယ်။

ဒါ့အပြင် စစ်ကော်မရှင်စစ်ကြောင်း ဒရုန်းနဲ့ဗုံးချမှုကြောင့် အိမ်ခြေ ၅၀၀ ကျော်ရှိတဲ့ ဖက်ပင်အိုင်ကျေးရွာက အိမ်ခြေ ၃၀၀ ကျော် မီးလောင်ပျက်စီးခဲ့တယ်လို့ သိရပါတယ်။

စစ်ကောင်စီစစ်ကြောင်းကတော့ ဧပြီ ၄ ရက် ဒီကနေ့မနက် ၈ နာရီခန့်မှာ ဖက်ပင်အိုင်ရွာကနေ စစ်ကြောင်း ၂ ကြောင်းခွဲပြီးထွက်ခွာသွားကာ စစ်ကြောင်း ၁ ကြောင်းက ကျောက်တိုင်ရွာ အဲ့ဒီကမှတဆင့် ကန်နီရွာကို ရောက်ရှိတပ်စွဲထားသလို နောက်ထပ်စစ်ကြောင်း ၁ ကြောင်းကတော့ ဆုံရွာဘက်ကို ပြန်ထွက်သွားတယ်လို့ သိရပါတယ်။

စစ်ကြောင်းပြန်ထွက်သွားပေမယ့် အချိန်မရွေးပြန်ရောက်လာနိုင်တာကြောင့် တိမ်းရှောင်နေရတဲ့ရွာခံတွေဟာ ကျေးရွာထဲကို ပြန်မဝင်ရဲကြသေးဘူးလို့ ဆိုပါတယ်။

စစ်ကော်မရှင်တပ်က စစ်ကြောင်းထိုးဝင်ရောက်နေလို့ ကန်နီ၊ ကျောက်တိုင်၊ ဖက်ပင်အိုင်ရွာတွေက ဒေသခံထောင်ချီ ဘေးလွတ်ရာကို တိမ်းရှောင်ထွက်ပြေးနေကြရပါတယ်။

ပြီးခဲ့တဲ့မတ်လ ၈ ရက်ကနေ ၁၀ ရက်နေ့အတွင်းမှာလည်း မြင်းခြံမြို့နယ်၊ ပတ္တာကျေးရွာ၊ သင်္ဘောတင်ကျေးရွာ၊ တောင်ကျွန်းရွာနဲ့မြောက်ကျွန်းကျေးရွာတွေကို စစ်ကော်မရှင်ဘက်က စစ်ကြောင်းဝင်မီးရှိုလို့ အိမ်ခြေ ၉၀၀ ခန့်မီးလောင်ပျက်စီးခဲ့သေးတယ်လို့ သိရပါတယ်။

သတင်း – ကျော်ကြီး

မြင်းခြံ၊ မတ် ၁၁၊ ၂၀၂၆။

မန္တလေးတိုင်း၊ မြင်းခြံမြို့နယ်အတွင်းကျေးရွာတွေက နေအိမ်တွေကို မီးရှို့တာတွေဆက်တိုက်လုပ်ဆောင်နေတဲ့ စစ်ကြောင်းတိုက်ခိုက်ခံခဲ့ရပြီး အဲ့ဒီနောက် နောက်ထပ်ရွာတွေကို ထပ်မံမီးလိုက်ရှို့နေတယ်လို့ တော်လှန်ရေးတပ်တွေက ပြောပါတယ်။

ပြီးခဲ့တဲ့ ဖေဖော်ဝါရီ ၂၆ ရက်မှာ ယခင် PDF တွေ ထိန်းချုပ်ထားနိုင်တဲ့ နဘူးအိုင်ရွာကို သိမ်းပိုက်နိုင်ခဲ့ပြီးတဲ့နောက် အနီးဝန်းကျင်ရွာတွေကို ဆက်လက်စစ်ကြောင်းထိုးလာတဲ့ အဲ့ဒီစစ်ကော်မရှင်စစ်ကြောင်းနဲ့ တော်လှန်ရေးတပ်တွေအကြား မတ်လ ၁၀ ရက် ယမန်နေ့က မြောက်ကျွန်းရွာအနီးမှာ တိုက်ပွဲဖြစ်ခဲ့တာလို့ သိရပါတယ်။

” ရွာတွေကို မီးလိုက်ရှို့ နေတာဗျ။ ဝင်တဲ့ရွာတိုင်းကို ပစ္စည်းတွေသယ်ပြီး မီးပတ်ရှို့နေတာ။ စစ်ကြောင်းဝင်သမျှ မရှို့တဲ့ရွာမရှိဘူး” လို့ မြင်းခြံဒေသတော် လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

တိုက်ပွဲနဲ့ပတ်သက်လို့ အသေးစိတ်အခြေအနေတွေကို သက်ဆိုင်ရာတပ်ရင်းတွေက ဆက်လက်ထုတ်ပြန်ပေးသွားမယ်လို့လည်း သူက ဆိုပါတယ်။

တိုက်ပွဲဖြစ်ပြီးနောက် မြောက်ကျွန်းရွာနဲ့ တောင်ကျွန်းရွာနေအိမ်တွေကို စစ်ကော်မရှင်တပ်က မီးရှို့ခဲ့ပြီး ဒီကနေ့ မတ်လ ၁၁ ရက်မနက်ပိုင်းမှာလည်း ကမ်းပါးနီရွာကို ဆက်လက်ပြီး မီးရှို့နေတယ်လို့ သိရပါတယ်။

စစ်ကြောင်းစတင်ဝင်ရောက်တဲ့ ဖေဖော်ဝါရီ ၂၆ ရက်ကနေ ဒီနေ့အထိ မြင်းခြံမြို့နယ်မှာ သင်္ဘောကျင်း၊ ပတ္တရာ၊ ပြည်တော်သာ၊ ဒါးကျွန်း၊ တန်ဆောင်း၊ နတ်ညွှန်း၊ သက်ကယ်ကျင်း၊‌‌‌ တောင်ကျွန်း၊ မြောက်ကျွန်းရွာတွေ မီးရှို့ခံထားရတယ်လို့ သိရပါတယ်။

ဒီကျေးရွာတွေဟာ မြင်းခြံမြို့နယ်အနောက်ခြမ်းက ကျေးရွာတွေဖြစ်ပြီး မြင်းခြံမြို့နယ်၊အရှေ့မြောက်ခြမ်း၊မြင်းခြံ-နွားထိုးကြီးလမ်းပိုင်းနံဘေးကျေးရွာတွေမှာလည်း စစ်တပ်က နေအိမ်ကို မီးရှို့ဖျက်ဆီးတာတွေ လုပ်ဆောင်နေတာလည်း ဖြစ်ပါတယ်။

သတင်း – MG