မြောင်၊ မတ် ၈၊ ၂၀၂၃။

စစ်ကိုင်းတိုင်း၊ မြောင်မြို့နယ်ထဲက ကျေးရွာတွေကို မီးရှို့ဖို့လာတဲ့ စစ်ကောင်စီစစ်ကြောင်း မိုင်းဆွဲခံရလို့ ဗိုလ် ၁ ဦးအပါ ၆ ဦး သေဆုံးသွားတယ်လို့ PDF တပ်ဖွဲ့ဝင်ဆီက သိရပါတယ်။

မတ်လ ၅ ရက်နေ့က အင်အား ၃၀၀ ခန့်ပါ စစ်ကောင်စီတပ်တွေဟာ မြောင်မြို့နယ်၊ ချောင်းဆင်းရွာကို စစ်ကောင်စီစစ်ကြောင်း ၃ ကြောင်းခွဲ ဝင်ရောက်ကာ ညအိပ်တပ်စွဲပြီးတဲ့နောက်၊ ၆ ရက်နေ့မနက် ၁၀ နာရီဝန်းကျင်မှာ ရသစ်ရွာကို စစ်ကြောင်းထိုးလာစဉ် ချောင်းဆင်းနဲ့ ရသစ်ရွာကြားမှာ မိုင်းဆွဲတိုက်ခိုက်ခဲ့တာလို့ ဆိုပါတယ်။

“စစ်ကြောင်းတကြောင်းက ချောင်းဆင်းရွာထဲမှာ ကျန်နေခဲ့တာ။ စစ်ကြောင်း ၂ ကြောင်းက ချောင်းဆင်းရွာနဲ့ ၁ မိုင်အကွာလောက်မှာရှိတဲ့ ရသစ်ရွာဘက်ကို စစ်ကြောင်းထိုး မီးရှို့ဖို့ ထွက်လာတဲ့အချိန် ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့တာ။ ဗိုလ်သင်တန်းဆင်း ၁ ယောက်နဲ့ နောက်လိုက် ၅ ယောက် သေတယ်။ ထိခိုက်သေဆုံးမှုကိုတော့ ကျနော်တို့ရဲ့ မြေပြင်သတင်းပေးသူတွေ ပြောကြားချက်တွေ တခြားကင်းထောက်အဖွဲ့တွေဆီက သိရတာပါ” လို့ MN PDF Myitnge တပ်ဖွဲ့ဝင် တဦးက ပြောပါတယ်။

မိုင်းဆွဲတိုက်ခိုက်ခံရပြီးတဲ့နောက် စစ်ကောင်စီစစ်ကြောင်းတွေဟာ ရသစ်ရွာထဲကို ဝင်ရောက်သွားခဲ့ကာ နေအိမ် ၂၀ ကျော်ကို မီးရှို့ဖျက်ဆီးခဲ့ပြီး မတ်လ ၇ ရက်နေ့ မနက် ၆ နာရီလောက်မှာ နဂါးပေါက်ရွာဘက်ကို ထပ်မံစစ်ကြောင်းထိုးပြီး လက်ရှိမှာ စစ်ကောင်စီစစ်ကြောင်း ၃ ကြောင်းဟာ နဂါးပေါက်ရွာကနေ လမ်းရိုးတလျှောက် ထွက်ခွာသွားတယ်လို့ သိရပါတယ်။

အဆိုပါတိုက်ခိုက်မှုကို မန္တလေးခရိုင် အမှတ်(၅)တပ်ရင်း၊ MNPDF Myitnge၊ ဇာမဏီပြောက်ကျားတပ်ဖွဲ့ (ငါန်းဇွန်)၊ ဗိုလ်တစ်ထောင်ငမိုးပြောက်ကျားတပ်ဖွဲ့၊ Maung Special People Defence Force (MS PDF) မဟာမိတ်တပ်ဖွဲ့တို့က ပူးပေါင်းတိုက်ခိုက်ခဲ့ကြတာလို့ သိရပါတယ်။

စာတည်း – ရင်ငြိမ်း

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ မရိုးကုန်းကျေးရွာနားမှာ ထိတွေ့ပစ်ခတ်မှုဖြစ်ပြီးနောက် စစ်ကောင်စီက မရိုးကုန်းရွာက အိမ်ခြေ ၂၀ နီးပါးကို မီးရှို့ဖျက်ဆီးသွားတယ်လို့ PDF တပ်ဖွဲ့ဝင်ထံက သိရပါတယ်။

ဖေဖော်ဝါရီလ ၁၂ ရက် မနေ့ကအစောပိုင်းမှာ စစ်ကောင်စီတပ်ဖွဲ့ဟာ မြောင်လမ်းခွဲကနေ ခြောက်ဘီးကားနဲ့လာပြီး ညနေ ၄ နာရီ‌လောက်မှာတော့ စစ်ကောင်စီတပ်ဖွဲ့တွေဟာ မရိုးကုန်းကျေးရွာဘက်ကို စစ်ကြောင်းထိုးလာချိန်မှာ ထိတွေ့ပစ်ခတ်မှု ဖြစ်ပွားခဲ့တယ်လို့ ဗိုလ်တောက်ထွန်းက ပြောပါတယ်။

“ထိတွေ့ပစ်ခတ်မှု ဖြစ်တာက ပြည်သူ့‌‌ကျေးရွာ ကာကွယ်ရေးတပ်ဖွဲ့ နဲ့ အခြားဒေသကာကွယ်ရေးတပ်ဖွဲ့ တွေနဲ့ပါ။ သူတို့(စစ်ကောင်စီ)တွေက အင်အား ၆၀ နီးပါး ရှိတယ်။ ပစ်ခတ်မှုက ၁ နာရီ ကြာသွားတယ်။ ပစ်ခတ်မှု ဖြစ်ပြီးတော့ ရွာထဲကိုဝင်ပြီး မီးရှို့တာပဲ” လို့ ဆိုပါတယ်။

မရိုးကုန်းကျေးရွာကို မီးရှို့ဖျက်ဆီးပြီးနောက် စစ်ကောင်စီစစ်ကြောင်းဟာ ညနေ ၆ နာရီလောက်မှာ ကျေးရွာထဲကနေပြန်လည်ထွက်ခွာသွားတယ်လို့ အဲဒီတပ်ဖွဲ့ဝင်က ဆက်ပြောပါတယ်။

“ကျတော်တို့တွေက သူတို့ထွက်သွားပြီးတာနဲ့ ရွာထဲကို မီးဝင်ငြိမ်းတယ်။ ရွာသားတချို့ကတော့ ရွာထဲကို ပြန်လာနေပါပြီး တချို့ကတော့ ကြောက်လို့ တောတွေထဲမှာ နေနေတုန်းပဲ” လို့ ဆိုပါတယ်။

အိမ်ခြေ ၂၀၀ ကျော်ရှိတဲ့ မရိုးကုန်းကျေးရွာထဲကို စစ်ကောင်စီတပ်ဖွဲ့တွေ စစ်ကြောင်းထိုး ဝင်‌ရောက်တာဟာ ၃ ကြိမ်မြောက်ရှိပြီဖြစ်ပြီး ပထမအကြိမ် မီးရှို့ဖျက်ဆီးခဲ့ခြင်း ဖြစ်ပါတယ်။

မြောင်၊ ဇန်နဝါရီ ၃၀၊ ၂၀၂၃။

စစ်ကိုင်းတိုင်း၊ မြောင်မြို့နယ်ထဲကို စစ်ကြောင်း ၂ ကြောင်းခွဲဝင်ရောက်လာတဲ့ စစ်ကောင်စီတပ်သားတွေကို ဇန်နဝါရီလ ၂၉ ရက်မနေ့ကနေ့လည်ပိုင်းကစပြီး ဒေသခံကာကွယ်ရေးတပ်တွေက ၃ ကြိမ်မိုင်းဆွဲတိုက်ခိုက်ခဲ့တဲ့အပြင် လက်နက်တွေနဲ့ပါ ပစ်ခတ်တိုက်ခိုက်ခဲ့တယ်လို့ သိရပါတယ်။

ကျောက်ရစ်ရွာဘက်ကိုထွက်လာတဲ့ စစ်ကြောင်းတခုကို ကင်းရွာနဲ့ကိုးပင်ရွာကြားအရောက် နေ့လယ် ၁၁ နာရီခွဲလောက်မှာ တကြိမ်နဲ့ ကိုးပင်ရွာထဲကိုဝင်ချိန် နေ့လယ် ၁၂ နာရီလောက်မှာ တကြိမ်တိုက်ခိုက်ခဲ့တယ်လို့ မြောင်မြို့နယ် ပြည်သူ့ကာကွယ်ရေးတပ် − T.G.Rမှ ဗိုလ်တိုက်ဂါးက ပြောပါတယ်။

“ကျောက်ရစ်ကိုထွက်လာတဲ့ အင်အား ၄၀ စစ်ကြောင်းကို နေ့လယ် ၁၁ နာရီခွဲဝန်းကျင် ကင်းရွာနှင့် ကိုးပင်ရွာအကြားမှာ ၁ ပွိုင့် မိုင်းဆွဲတိုက်ခိုက်တယ်၊ သူကတော့ ထိခိုက်မှုရှိတယ်၊ အသေအပျောက်မရှိဘူး၊ ကိုးပင်ရွာအဝင်မှာ နေ့လယ် ၁၂ နာရီဝန်းကျင်မှာ နောက်ထပ် ၁ ကြိမ် မိုင်းဆွဲတိုက်ခိုက်ခဲ့တယ်” လို့ ပြောပါတယ်။

ဒါ့အပြင် ညနေ ၃ နာရီလောက်မှာတော့ မြောင်မြို့ကနေ ကူတို့ကုန်းရွာဘက်ကိုထွက်လာတဲ့ စစ်ကြောင်းကို အဲ့ဒီလမ်းကြားတနေရာမှာပဲ ရှေ့ထွက်မိုင်း ၁ လုံးနဲ့ထပ်မံတိုက်ခိုက်ခဲ့တာလို့ ဗိုက်တိုက်ဂါးက ဆက်ပြောပါတယ်။

“မြောင်နဲ့ကူတို့ကုန်းရွာအကြား ညနေ ၃ နာရီ ဝန်းကျင်မှာ ရှေ့ထွက်မိုင်း ၃ လုံးနဲ့တိုက်ခိုက်တာ၊ နေရာမှာတင်ပွဲခြင်းပြီး ၁ ကောင်သေတယ်၊ ဒဏ်ရာအပြင်းအထန် ၄ ကောင်ရပြီး ကားနဲ့စခန်းကို တိုက်သွားတယ်၊ စခန်းရောက်မှ ၃ ကောင်ထပ်သေတယ်” လို့ ပြောပါတယ်။

တိုက်ခိုက်ချိန်တွေအတွင်း စုစုပေါင်းတပ်သား ၇ ဦးသေဆုံးခဲ့တယ်လို့ မြေပြင်တိုက်ခိုက်ရေးရဲဘော်တွေက ပြောပေမယ့် မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။
ခုစစ်ကြောင်းထိုးလာတဲ့ စစ်ကောင်စီတပ်တွေဟာ မိတ္ထီလာအခြေစိုက် တမခ ၉၉ က ဖြစ်တယ်လို့လည်း သိရပါတယ်။

ပြီးခဲ့တဲ့ ဇန်နဝါရီလ ၂၇ ရက်ကလည်း စစ်ကိုင်းကထွက်လာတဲ့ စစ်ကား ၃ စီးကို မြင်းမူမြို့နယ်၊ ဂွေးပင်တောရွာနဲ့ နတ်ရေကန်ရွာအကြားမှာ T.G.R အဖွဲ့က မိုင်းဆွဲတိုက်ခိုက်ခဲ့ရာ စစ်သား ၁၇ ဦး သေဆုံးခဲ့ပါသေးတယ်။

မြောင်၊ မေ ၃၊ ၂၀၂၂။

မြောင်မြို့နယ်က PDF စခန်းတခုကို ဝင်သိမ်းပြီး မီးရှို့တဲ့ စစ်အုပ်စုကို အလာမှာ မိုင်းဆွဲတိုက်ခိုက်ခဲ့ပြီး ပြန်သွားချိန်မှာလည်း နှစ်ဖပ်ထိတွေ့တိုက်ပွဲဖြစ်ခဲ့လို့ အာဏာသိမ်းစစ်အုပ်စုဘက်က အနည်းဆုံး ၁၀ဦး သေဆုံးခဲ့တယ်လို့ Myaung Revolution Army (MRA) တာဝန်ခံ က ပြောပါတယ်။

မေလ ၁ရက်မနက် ၆နာရီလောက်မှာ MRA ရဲ့ စခန်းတခုကို အင်အား ၁၀၀ ကျော်ပါတဲ့ စစ်အုပ်စုတွေက စခန်းဝင်စီးပြီး မီးရှိ့နေချိန်မှာ စခန်းအတွင်း ထောင်ထားတဲ့ ပဒေသာမိုင်းတွေနဲ့ တိုက်ခိုက်ခဲ့တာဖြစ်တယ်လို့ MRA တာဝန်ခံက ပြောပါတယ်။

” ကျနော်တို့က ရှောင်လိုက်တယ် စခန်းထဲမှာ ပဒေသာတွေထောင်ထားတာ၊ ဒီကောင်တွေလာတဲ့ အချိန် ကျနော်တို့ မိုင်းကုန်းကို မရောက်သေးတော့ ကျနော်တို့ မခွဲသေးဘူး၊ ပွိုင့်နေရာရောက်မှာ ကျနော်တို့က စခွဲတာ၊ ဒီကောင်တွေ ပထမဆုံး တဲတလုံးကို မီးစရှို့တယ် ပဒေသာမိုင်းတတွဲဆွဲပေးလိုက်တယ်၊ နောက်တလုံးထပ်ရှို့တော့ နောက်တတွဲ ထပ်ဆွဲပေးလိုက်တဲ့ အချိန်ကျတော့ ဒီကောင်တွေပြေးတော့တာပဲ ” လို့ ပြောပါတယ်။

စစ်အုပ်စုက တက်လာချိန်မှာ MRA အဖွဲ့က ဒရုန်းနဲ့ စောင့်ကြည့်နေခဲ့ပြီး ပဒေသာမိုင်းဆွဲခံရမှုကြောင့် စစ်ကောင်စီဘက်က သေဆုံးမှုတွေကို မြင်တွေ့နေရတယ်လို့ MRA တာဝန်ခံက ပြောပါတယ်။

” ဗီဒီယိုမှတ်တမ်းတွေအရ ကျနော်တို့တွေ့တာက ၃ယောက်လောက်ပေါ့ ၊ ဒေသခံတွေကင်းထောက်တွေက ပြောတာက ဆယ်ဂဏန်းလောက်ရှိမယ်၊ ဒါပေမယ့် ဒီကောင်တွေ ၁၀၀ကျော်နဲ့ ဝင်လာတာပြန်ထွက်သွားတော့ ၈၀ကျော်လောက်ပဲ ပြန်သွားတာဗျ” လို့ ပြောပါတယ်။

နောက်ထပ် မေလ ၂ရက် မနေ့ကလည်း မီးရှို့ပြီးပြန်ထွက်သွားတဲ့ အင်အား ၈၀‌ကျော်အဖွဲ့နဲ့ မြောင်မြို့နယ် တပ်ပေါင်းစု အားလုံးပေါင်းပြီး ထိတွေ့တိုက်ပွဲဖြစ်ခဲ့သေးတယ်လို့ သိရပါတယ်။

မေလ၂ရက် မနက် ၉နာရီဝန်းကျင်လောက်က မြောင်မြို့နယ် နဘတ်ရွာနဲ့ ဆွဲလဲအိုရွာအကြားမှာ နှစ်ဖက်ထိတွေတိုက်ပွဲဖြစ်ခဲ့ပြီး စစ်ကောင်စီဘက်က အသေအပျောက်ရှိခဲ့တယ်လို့ ပြောပါတယ်။

” မိုင်းကွင်းထဲရောက်လာလို့ မိုင်းထပ်ဆွဲခဲ့တယ်၊ ပြီးတော့ အပြန်အလှန်ပစ်ခတ်ကြတယ်၊ တိုက်ပွဲကြာချိန်က ၂နာရီခွဲလောက်ရှိမယ်၊ အကျအဆုံးကတော့ ဒေသခံတွေပြောချက်အရ ၁၀ ဦးလောက်ရှိတယ်။ ” လို့ MRA တာဝန်ခံက ပြောပါတယ်။

စခန်းသိမ်းဖို့လာတဲ့ အာဏာသိမ်းစစ်ကောင်စီတပ်ဖွဲ့တွေမှာ ရဲအင်အားများတာတွေ့ရပြီး ကျဆုံးသွားသူတွေရဲ့ အဝတ်အစားတွေက ရဲအသုံးအဆောင်တွေဖြစ်သလို အင်္ကျီတွေမှာလည်း ဗလတပ်ခွဲဆိုတဲ့ စာတန်းတွေ ပါဝင်တာကို တွေ့ရတယ်လို့ ပြောပါတယ်။

မေလ ၁ရက်နဲ့ ၂ရက် တိုက်ပွဲအတွင်း စစ်ကောင်စီဘက်က ကျဆုံးမှုကတော့ အနည်းဆုံး ၁၀ ဦးသေဆုံးတယ်လို့ MRA ဘက်က အတည်ပြုနိုင်ထားပြီး အဲ့ဒီထက်များနိုင်တယ်လို့ သိရပါတယ်။