ရွှေဘို

ရွှေဘို၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်က အမျိုးသား ၆ ဦးအပါအဝင် ဒေသခံ ၁၆ ဦးကို ဧပြီလ ၂၂ ရက်နေ့မှာ စစ်ကောင်စီတပ်ကရိုက်နှက်ဖမ်းဆီးသွားတယ်လို့ သိရပါတယ်။

ဧပြီလ ၂၂ ရက်နေ့ မနက်ပိုင်းက စည်ပင်သာယာရေးရုံးထဲမှာတပ်စွဲထားတဲ့စစ်အုပ်စု ဗုံးပစ်တိုက်ခိုက်ခံရပြီးတဲ့နောက် စည်ပင်ရုံးအနီးဈေးရောင်းနေတဲ့ ဈေးသည်တွေအပါအဝင် အရပ်သား ၁၆ ဦး ကို စစ်ကောင်စီတပ်က ဖမ်းဆီးသွားခဲ့တာလို့ Shwdbo District Battalion 23 တာဝန်ခံက မြေလတ်အသံကို ပြောပါတယ်။

“ဗုံးသွားပစ်တာကကျနော်တို့အဖွဲ့ပါ။အဲ့ဒီတိုက်ခိုက်မှုမှာထိခိုက်သေဆုံးတွေရှိတယ်။အဲတာကြောင့် စကစတွေကကားတစီးနဲ့ ချက်ချင်းရောက်လာပြီးတော့ရုံးနားမှာ အလုပ်လုပ်နေတဲ့အရပ်သားတွေကို ရိုက်နှက်ပြီးတော့ ဖမ်းခေါ်သွားတာ။ တချို့ဆိုရင် ရိုက်နှက်ခံရတာများလို့ PDFဆိုပြီးဝန်ခံခိုင်းတာ ဝန်ခံရတယ်တဲ့။ ကျနော်တို့အဖွဲ့ကတဦးတယောက်မှ အဖမ်းမခံခဲ့ရပါ” လို့ ဆိုပါတယ်။

ဖမ်းဆီးခံရသူတွေဟာ အမှတ် ၅ ရပ်ကွက်က အမျိုးသား ၆ ဦး၊ နေရပ်နဲ့ အမည်တွေကိုမသိရသေးတဲ့ အမျိုး သမီး ၃ ဦး နဲ့ အမျိုးသား ၇ ဦး တို့ဖြစ်တယ်လို့ ရွှေဘိုအခြေစိုက် PDF တပ်ဖွဲ့တွေနဲ့နီးစပ်သူ တဦးက ပြောပါတယ်။

“အဖမ်းခံရတာကတော့ အတည်ပြုလို့ရတယ်။ ဘယ်သူတွေဆိုတာကိုတော့ ကျနော်တို့ လည်း PDF အဖွဲ့တွေကို လိုက်မေးနေတာ တိတိကျကျ မသိကြဘူးဖြစ်နေတယ်။ဒီ ၁၆ ယောက်က စည်ပင်ရုံးတိုက် ခိုက်ခံရတာနဲ့ပတ်သက်လို့အဖမ်းခံရတာလို့သိရတယ်” လို့ ဆိုပါတယ်။

စစ်တပ်ထောက်ခံတဲ့တယ်လီဂရမ်ချန်နယ်တွေမှာတော့ ရွှေဘိုမြို့နယ်၊ စည်ပင်ရုံးကို ဖောက်ခွဲတိုက်ခိုက်ခဲ့ သူ ၄ ဦးနဲ့ အားပေးထောက်ပံ့သူ ၁၂ ဦးကို ဖမ်းဆီးရမိထားပြီး အကြမ်းဖက်တိုက်ဖျက်ရေး ဥပဒေတွေနဲ့ အမှုဖွင့်ထားတယ်လို့ ဖော်ပြထားပါတယ်။

ဧပြီလ ၄ ရက်နေ့မှာလည်း ရွှေဘိုမြို့နယ်၊ချီပါရွာက လမ်းသွားလမ်းလာ ဆိုင်ကယ်စီးနင်းသူ အမျိုးသား ၂ ဦးကို စစ်ကောင်စီတပ်က လက်ပြန်ကြိုးတုတ်ဖမ်းဆီးပြီးနောက် သတ်ဖြတ်ခဲ့သေးတယ်လို့ သိရပါတယ်။

စာတည်း – ရင်ငြိမ်း

ရွှေဘို၊ ဧပြီ ၁၄၊ ၂၀၂၃။

စစ်ကိုင်းတိုင်းဒေသကြီး၊ ရွှေဘိုမြို့၊ အမှတ် ၇ ရပ်ကွက်၊ ချီပါစုရပ်မှာ စစ်ကောင်စီခန့် အုပ်ချုပ်ရေးမှူး သေနတ်နဲ့ ၃ ချက်ပစ်ခတ်ခံရပြီး သေဆုံးသွားတယ်လို့ မြို့ခံတွေဆီက သိရပါတယ်။

ဧပြီလ ၁၃ ရက်နေ့မနက် ၉ နာရီခန့်မှာ ချီပါစုရပ်၊ နေရဗ္ဗန် ဘုရားဝင်းအတွင်းမှာ အမှတ် ၇ ရပ်ကွက် အုပ်ချုပ်ရေးမှူး ဦးသန်းဇော် (ခ) ဦးဆွေ ၆၃ နှစ် ရှိနေချိန်မှာ သေနတ်သမားတွေက ဝင်ပစ်သွားတာလို့ ဒေသခံတဦးက ပြောပါတယ်။

“သိရသလောက်က သူက ဘုရားဝင်းအတွင်း ဇောင်းတန်းမှာထိုင်ပြီး အခြားသူတွေနဲ့စကားပြောနေချိန် လာဝင်ပစ်သွားတယ်လောက်ပဲ သိရတယ်။ ကျည်ထိတာတော့ ၃ ချက်။ နေရာမှာပဲ သေသွားတယ်” လို့ ပြောပါတယ်။

ပစ်ခတ်ခံရလို့ ဦးသန်းဇော် (ခ) ဦးဆွေမှာ နားထင်၊ ပုခုံးနဲ့ဝမ်းဗိုက်တွေမှာ ဒဏ်ရာတွေရရှိပြီးနေရာမှာပဲ သေဆုံးသွားတယ်လို့ ဆိုပါတယ်။

အခင်းဖြစ်ပွားပြီးနောက် စစ်ကောင်စီတပ်ဖွဲ့တွေ ရောက်လာကာ စစ်ဆေးမှုတွေ ပြုလုပ်ပြီး အလောင်းကိုတော့ ဒေသလူမှုကူညီရေးအသင်းတွေက ကောက်ယူပြီး ရွှေဘိုဆေးရုံကို ပို့ပေးလိုက်ရတယ်လို့ သိရပါတယ်။

အဲဒီပစ်ခတ်မှုကို Buffalo soldiers Freedom force (SBDF2) က လုပ်ဆောင်ခဲ့တာဖြစ်ပြီး တော်လှန်ရေးအင်အားစုတွေကို စိန်ခေါ်သလို စစ်ကောင်စီနဲ့ ပူးပေါင်းလုပ်ဆောင်နေတာကြောင့် ရှင်းလင်းခဲ့တာဖြစ်တယ်လို့ ပြောဆိုထားပြီး ပစ်ခတ်ရှင်းလင်းခဲ့ချိန်မှာအုပ်ချုပ်ရေးမှူးဆီကနေ လက်ပစ်ဗုံးတလုံး သိမ်းဆည်းရမိခဲ့တယ်လို့ ဆိုပါတယ်။

ဧပြီလ ၂ ရက်နေ့က ရွှေဘိုတက္ကသိုလ်မှာ အထိုင်ချတပ်စွဲထားတဲ့ စစ်ကောင်စီတပ်ကို ကာကွယ်ရေးအဖွဲ့တွေက ဝင်ရောက်ပစ်ခတ်ချိန် နှစ်ဖက်သေဆုံးမှုတွေ ရှိခဲ့သေးတယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ ရွှေဘိုမြို့၊ မူးဘောင်တံတားပေါ်နဲ့ မြောက်ဘက်လမ်းပေါ်မှာ မိုင်းပေါက်ကွဲမှု ဖြစ်ခဲ့တာကြောင့် အမျိုးသား ၁ ဦးသေဆုံးကာ ၁၉ ဦး ဒဏ်ရာရခဲ့တယ်လို့ သိရပါတယ်။

မတ်လ ၂၈ ရက်ဒီမနက် ၁၀ နာရီခန့်က ကားကြီးကွင်းတံတားပေါ်မှာ ပထမအကြိမ်ပေါက်ကွဲပြီးနောက် ၁၀ မိနစ်ခန့်အကြာ ကားကြီးကွင်းမြောက်ဘက်ခြမ်းရှိလမ်းပေါ်မှာ ဒုတိယအကြိမ် ပေါက်ကွဲခဲ့တာလို့ ဒေသလူမှုကူညီရေးအသင်းမှ တာဝန်ရှိသူက ပြောပါတယ်။

“ပထမအကြိမ်က ရွှေဘိုမြို့အဝင် မူးဘောင်တံတားပေါ်မှာ မိုင်းကွဲတယ်။ နောက်တကြိမ်က အဲ့နားနဲ့ မလှမ်းမကမ်းမှာ နောက်တလုံး ထပ်ကွဲတယ်။ လူသွားလူလာစည်ကားနေတဲ့ အချိန်ဖြစ်နေတော့ ထိခိုက်သူတွေ တော်တော်များတယ်။ ခုတော့ အရေးပေါ်ကယ်ဆယ်ရေးလုပ်ငန်းတွေ လုပ်ဆောင်နေရတယ်။ ကျား ၁ ဦးကတော့ ဆေးရုံရောက်မှ ဆုံးသွားတယ်” လို့ ပြောပါတယ်။

မိုင်း ၂ ကြိမ်ကွဲလို့ ကားတစီးနဲ့ ဆိုင်ကယ် ၁၀ စီးခန့် ထိမှန်ခဲ့ပြီး အမျိုးသား ၁ ဦးသေဆုံးကာ၊ ကလေးငယ်ယောကျ်ားလေး ၂ ဦးအပါအဝင် အမျိုးသား ၁၁ ဦး၊ အမျိုးသမီး ၈ ဦး ထိခိုက်ဒဏ်ရာရသွားတယ်လို့ ဆိုပါတယ်။

ထိခိုက်ဒဏ်ရာရသူတွေအနက် စိုးရိမ်ရ လူနာ ၇ ဦးကို မန္တလေးဆေးရုံကို ပို့ဆောင်နေပြီး ကျန်သူတွေကိုတော့ ရွှေဘိုဆေးရုံးကို ပို့ထားတယ်လို့ သိရပါတယ်။

ဒီမိုင်းတွေကို ဘယ်အဖွဲ့အစည်းက ဘာကြောင့်ထောင်ထားတယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

မတ်လ ၂၅ ရက် ညနေ ၃ နာရီခွဲခန့်မှာလည်း ရွှေဘိုမြို့နယ်၊ တဂဏန်းကျေးရွာနဲ့ ဇီးတောကျေးရွာကြားမှာ ကား ၃ စီးနဲ့ဆိုင်ကယ် ၁ စီး မိုင်းထိလို့ ရဟန်း ၁ ပါးအပါအဝင် ၇ ဦး ဒဏ်ရာရရှိခဲ့ပါသေးတယ်။

စာတည်း – လင်း

စစ်ကိုင်း၊ မတ် ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်း ဒီနေ့မတ်လ ၂၇ ရက်နေ့ မနက်အာရုံဦးမှာတော်လှန်ရေးနေ့အထိမ်းအမှတ်အနေနဲ့ ကောက်စိုက်ပြည်သူဒေသခံတွေက သပိတ်မှောက်ကြွေးကြော်ခဲ့ကြပါတယ်။

“ဖက်ဆစ်တော်လှန်ရေးနေ့အထိမ်းအမှတ်နဲ့ ကောက်စိုက်ရင်း စစ်အာဏာရှင် အလိုမရှိကြောင်း ကြွေးကြော်ရင်း လက်သုံးချောင်းထောင် သပိတ်မှောက်ခဲ့ကြတာပါ” လို့ ဒေသခံတဦးက ပြောပါတယ်။

ကောက်စိုက်ပြည်သူများမှ ၂၀၂၃ ခုနှစ် မတ်လ ၂၇ ရက်နေ့မှာ ကျရောက်တဲ့ ဖက်ဆစ်တော်လှန်ရေးနေ့အတွက် “စစ်အာဏာရှင်အလိုမရှိ စစ်အာဏာရှင် ကျဆုံးပါစေ” ဆိုပြီး သပိတ်မှောက် ကြွေးကြော်ခဲ့သလို NUG အစိုးရကို ထောက်ခံကြောင်း ဆန္ဒပြခဲ့ကြတာပါ။

စစ်ကိုင်း၊ မတ် ၂၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ တဂဏန်းကျေးရွာနဲ့ဇီးတောကျေးရွာအကြား မန္တလေး-ရွှေဘိုကားလမ်းမပေါ် မှာ ကား ၃ စီးနဲ့ဆိုင်ကယ် ၁ စီးမိုင်းထိလို့ ရဟန်း ၁ ပါးအပါအဝင် ၇ ဦးဒဏ်ရာရခဲ့တယ်လို့ သိရပါတယ်။

မတ်လ ၂၅ ရက် ညနေ ၃ နာရီခွဲခန့်မှာ မန္တလေးဘက်ကနေ ရွှေဘိုဘက်ကိုမောင်းနှင်လာတဲ့ ခရီးသည်တင်ကား ၂ စီး၊ ကုန်တင်ကား ၁ စီးနဲ့ ဆိုင်ကယ် ၁ စီး မိုင်းထိခဲ့တာလို့ ဒေသခံတဦးက မြေလတ်အသံကိုပြောပါတယ်။

“မိုင်းက တနေရာထဲထိတာတော့ မဟုတ်ဘူး ။ အဲ့ဒီလမ်းပိုင်းပေါ် အကွာအဝေးသိပ်မကွာတဲ့နေရာ ၃ ခုမှာ မိုင်းထိတာ။ လမ်းဘေးမှာရှိနေတဲ့ မိုင်းတွေကနေ ကားတွေ၊ဆိုင်ကယ်တွေဖြတ်တဲ့အချိန် ထကွဲတာဖြစ်ပါတယ်။ စုစုပေါင်းထိတာက ကား ၃ စီးနဲ့ ဆိုင်ကယ် ၁ စီးပါ”လို့ ပြောပါတယ်။

မိုင်းပေါက်ကွဲမှုကြောင့် ဆိုင်ကယ်စီးနင်းသူ အသက် ၆၀ အရွယ် အမျိုးသား ၁ ဦး၊ ဒို့လူပျိုခရီးသည်တင်ကား၊ အောင်ရတနာခရီးသည်တင်ကားတွေနဲ့လိုက်ပါလာတဲ့ သံဃာတော် ၁ ပါး၊ အမျိုးသမီး ၂ ဦး၊ အမျိုးသား ၂ ဦး၊ ကုန်တင်ကားနဲ့လိုက်ပါလာသူအမျိုးသား ၁ ဦး ဒဏ်ရာရရှိခဲ့ပြီး ရွှေဘိုဆေးရုံကြီးကို ပို့ဆောင်ကုသနေကာ စိုးရိမ်ရလူနာ ၂ ဦးကို မန္တလေးဆေးရုံကို လွှဲပြောင်းဖို့လုပ်ဆောင်နေတယ်လို့ သိရပါတယ်။

လမ်းပိုင်းမိုင်းပေါက်ကွဲတာနဲ့ပတ်သက်လို့ ထုတ်ပြန်ပြောဆိုထားတာမျိုးမရှိသလို ဘယ်အဖွဲ့အစည်းရဲ့ လက်ချက်ဖြစ်တယ်ဆိုတာကိုတော့ မသိရသေးပါဘူး။

ဇန်နဝါရီလ ၃၁ ရက်ကလည်း တဂဏန်းကျေးရွာအနီး အဲ့ဒီလမ်းပိုင်းပေါ်မှာဘဲ သားအဖ ၂ ဦး ဆိုင် ကယ်စီးနင်းလာချိန် မိုင်းပေါက်ကွဲခဲ့လို့ ၂ ဦးစလုံးဒဏ်ရာရခဲ့သေးတယ်လို့ သိရပါတယ်။

ဝက်လက်၊ မတ် ၂၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်၊ စိုင်နိုင်ကြီးကျေးရွာက ဒေသခံတွေကို စစ်ကောင်စီတပ်သားတွေက မတ်လ ၂၅ ရက် ဒီမနက် ၉ နာရီလောက်မှာ ဖမ်းဆီးခေါ်ဆောင်သွားတယ်လို့ သိရပါတယ်။

အင်အား ၃၀ ကျော်ပါတဲ့ စစ်ကောင်စီစစ်ကြောင်းဟာ ရွာသာကြီးရွာကနေတဆင့် စိုင်နိုင်ကြီးရွာထဲကိုဝင်ရောက်လာပြီး ဒေသခံတွေကိုဖမ်းဆီးသွားတာလို့ ရွှေဘိုမြို့နယ်သတင်းမှန်ပြန်ကြားရေး တာဝန်ရှိသူက ပြောပါတယ်။

“ရွာထဲကိုဝင်လာတဲ့အချိန် လက်နက်ငယ်တွေရော၊ လက်နက်ကြီးတွေရော ပစ်ခတ်ခဲ့တယ်။ ရွာသားတွေကိုလည်း ဘာကြောင့်ဖမ်းခေါ်သွားတာလဲတော့ မသိပါဘူး၊ လူဦးရေအတိအကျတော့ မပြောနိုင်ပေမဲ့ ၁၀ ဦးထက်မနည်း အဖမ်းခံရတာပါ။ အခုချိန်ထိရွာသားတွေလည်း ရွာထဲကို ပြန်ဝင်မရဲသေးဘူး” လို့ ဆိုပါတယ်။

ဖမ်းဆီးခံရသူအရေအတွက်နဲ့ အသေးစိတ်အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

အဲ့ဒီစစ်ကြောင်းဟာ လက်ရှိ ရွှေဘိုမြို့နယ်၊ ဘုန်းဘွဲ့ရွာအနီးမှာ ရောက်ရှိနေတာကြောင့် ရွှေဘို − မန္တလေးလမ်းပိုင်းကို အသုံးပြုနေကြတဲ့ ပြည်သူတွေအနေနဲ့ မြေပြင်စစ်ရေးသတင်း နားစွင့်ပြီး အထူးသတိပြု သွားလာကြဖို့နဲ့ ဖြစ်နိုင်မည်ဆိုလျှင် အရေးပေါ် ကျန်းမာရေးကိစ္စကလွဲပြီး လုံးဝဖြတ်သန်းသွားလာ အသုံးမပြုဖို့ ရွှေဘိုမြို့နယ် သတင်းမှန်ပြန်ကြားရေးက ထုတ်ပြန်ထားပါတယ်။

မတ်လ ၃ ရက်ကလည်း စိုင်နိုင်ကြီးရွာဟာ အိမ်ခြေ ၇၀ နီးပါးကို စစ်ကောင်စီတပ်ဖွဲ့က မီးရှို့ဖျက်ဆီးသွားတာကြောင့် စပါးတင်း ၇ ထောင်ကျော် မီးလောင်ပျက်စီးခဲ့ရပါသေးတယ်။