လက်ဝှေ့⁩

မြေလတ်အသံ၊ နိုဝင်ဘာ ၂၂၊ ၂၀၂၄။

နိုဝင်ဘာ ၂၂ ရက် ဒီနေ့ညမှာကျင်းပမယ့် ONE Friday Fights 88 မှာ ထွန်းမင်းအောင်ဟာ မော်ရိုကိုဖိုက်တာနဲ့ ယှဉ်ပြိုင်ထိုးသတ်သွားရမှာ ဖြစ်ပါတယ်။ 

ONE Friday Fights 88 မှာ ထွန်းမင်းအောင်နဲ့ ထိုးသတ်ဖို့ပွဲတည်ထားသူက ဘရာဇီးဖိုက်တာတဦးဖြစ်ပေမယ့် ပွဲထိုးခါနီးနှစ်ပတ်အလိုမှာနုတ်ထွက်သွားတာကြောင့် မော်ရိုကိုဖိုက်တာအက်ဘ်ဒလာလီဇာဟီဒီက အစားထိုးဝင်ရောက်လာတာဖြစ်ပါတယ်။ 

မော်ရိုကိုဖိုက်တာ ဇာဟီဒီဟာ အသက် ၂၅ နှစ်၊ အရပ် ၆ ပေ ၁ လက်မနဲ့ ထွန်းမင်းအောင်ထက် အရပ်၊ လက်တံပိုရှည်ကာ ဒေသဆိုင်ရာမွေထိုင်းပွဲတွေမှာ လှည့်လည်ထိုးသတ်နေတာကြာပြီဖြစ်ပြီး နိုင်ငံတကာမွေထိုင်းအဖွဲ့အစည်းများအဖွဲ့ချုပ် (IFMA)ရဲ့ ပြိုင်ပွဲတခုမှာ ဗိုလ်စွဲထားတာမကြာသေးပါဘူး။ 

မော်ရိုကိုနိုင်ငံရဲ့အကောင်းဆုံးလူငယ်လက်ဝှေ့သမားတွေထဲက တယောက်အဖြစ် သတ်မှတ်ထားခံထားရသူဖြစ်ပြီး ဒီပွဲဟာ သူ့အနေနဲ့  ONE နဲ့ပထမဆုံးလက်တွဲမယ့်ပွဲ ဖြစ်ပါတယ်။ 

ဒေသဆိုင်ရာမွေထိုင်းပွဲတွေမှာ လှည့်လည်ထိုးသတ်နေသူဖြစ်တာနဲ့အညီ နည်းစနစ်ပိုင်းကောင်းမွန်ပေမယ့် သူထိုးခဲ့တဲ့ပွဲတွေဟာ အကာအကွယ်အပြည့်အစုံ၊  လက်ဝှေ့အိတ်အထူကြီးတွေနဲ့ ထိုးသတ်ခဲ့ရတာများတာကြောင့် မာဂုဏ်နဲ့သက်လုံပိုင်းကတော့ အားနည်းချက်ဖြစ်လာနိုင်ပါတယ်။ 

ထွန်းမင်းအောင်ကတော့ ဒီပွဲဟာသူ့အတွက် ONE မှာထိုးသတ်ရတဲ့ တတိယမြောက်ပွဲဖြစ်ပြီး အနိုင်ရရှိဖို့အတွက်ပြင်ဆင်မှုတွေ သေချာလုပ်ထားတာကို တွေ့ရပါတယ်။ မြန်မာ့လက်ဝှေ့ထိုးသတ်နေတဲ့ ဖိုက်တာဖြစ်တာကြောင့် ထွန်းမင်းအောင်ရဲ့မာဂုဏ်က မြင့်မားတာတွေ့ရပါတယ်။ 

ဘယ်သန်ကစားသမားဖြစ်တဲ့ ထွန်းမင်းအောင်ဟာ ထိုးလုံးထိုးပေါက်စုံအောင် ထိုးသတ်နိုင်ပြီး အားပါတဲ့အနိမ့်ကန်ချက်တွေနဲ့ ပြိုင်ဘက်ကိုဒုက္ခပေးတတ်ပါတယ်။ သူသတိပြုရမှာကတော့ အသာစီးရတဲ့အချိန်မှာ အလောတကြီးဝင်တတ်တာနဲ့ ပြိုင်ဘက်အထိနာမယ်ထင်တဲ့ ထိုးပေါက်ကို ထပ်ခါထပ်ခါသုံးတတ်တာကိုတော့ ပြိုင်ဘက်ရဲ့ကောင်တာမခံရအောင် သတိပြုရမှာဖြစ်ပါတယ်။ 

ONE Friday Fights 88 ပြိုင်ပွဲကို နိုဝင်ဘာ ၂၂ ဒီနေ့ည မြန်မာအချိန် ၇ နာရီမှာကျင်းပသွားမှာဖြစ်ပြီး ONE မှာ မြန်မာဖိုက်တာတွေရှုံးပွဲဆက်နေမှုကို ထွန်းမင်းအောင်တယောက် ရပ်တန့်နိုင်မလား စောင့်ကြည့်ရမှာဖြစ်ပါတယ်။ 

Photo – One Lumpinee FC

မြေလတ်အသံ၊ စက်တင်ဘာ ၂၇၊ ၂၀၂၄။

စက်တင်ဘာ ၂၇ ရက် ယနေ့ညမှာယှဉ်ပြိုင်ခဲ့တဲ့ One Friday Fights 81 မှာဝင်ရောက်ယှဉ်ပြိုင်ခဲ့ကြတဲ့ မြန်မာဖိုက်တာနှစ်ဦးစလုံး ရှုံးနိမ့်ခဲ့ပြီး သန့်ဇင်က တာကေရုကို အလဲထိုးနဲ့ရှုံးနိမ့်ခဲ့သလို စိုးလင်းဦးကတော့ နာဘီလ်ကိုအမှတ်နဲ့ရှုံးနိမ့်ခဲ့ပါတယ်။

■ ဒုတိယအချီမှာ အလဲထိုးနဲ့ရှုံးနိမ့်တဲ့ သန့်ဇင် 

သန့်ဇင်နဲ့ ပြိုင်ဘက်ကစားသမားတာကေးရုတို့ပွဲဟာ နောက်မဆုတ်တမ်းထိုးသတ်ကြတဲ့ ဖိုက်တာတွေဖြစ်တာနဲ့အညီ ပွဲဟာကြည့်ကောင်းခဲ့ပြီး သန့်ဇင်ရဲ့အစွမ်းအစဘာလဲဆိုတာကို ပြသနိုင်ခဲ့တဲ့ပွဲဖြစ်ပါတယ်။ 

ပထမအချီကို သန့်ဇင်ဟာ အနိမ့်ကန်ချက်နဲ့ စပါတယ်။ ပွဲဟာအပြိုင်ထိုးရင်း ကြည့်ကောင်းခဲ့သလို သန့်ဇင်ရဲ့ ဘယ်ဝိုက်လက်သီးဟာ တာကေးရုကို အမှတ်စဉ်ရေစေခဲ့ပြီး ဒါဟာ ချတ်ထရီနေရထိုင်ရခက်သွားစေမယ့် ထိုးချက်တချက်လို့ ထင်မိပါတယ်။ ပွဲကြည့်စင်‌ပေါ်က ရော့ထန်တယောက်တောင် ခေါင်းခါခါလည်ခါခါနဲ့ အံ့ဩနေတာကိုလည်း တွေ့လိုက်ရပါတယ်။ ပထမအချီဟာ သန့်ဇင်အသာရပြီး တာကေးရုအတွက်တော့ အခြေအနေ အကဲခတ်နေရင်း အမှတ်စဉ်ရေတွက်ခံလိုက်ရတဲ့ အချီဖြစ်ပါတယ်။ 

ဒုတိယအချီမှာလည်း သန့်ဇင်ဟာ ပွဲကိုထိန်းမကစားဘဲ ဖွင့်ထိုးခဲ့တာကြောင့် သူ့ရဲ့လက်သီးချက်တွေ ထိရောက်ခဲ့ပေမယ့် လူချင်းဆိုင်ထိုးချိန်မှာထွက်လာတဲ့ တာကေးရုရဲ့ ဘယ်ဝိုက်လက်သီးဟာ သန့်ဇင်ခေါင်းကို သေချာထိသွားပါတယ်။ နောက်ထပ် ဆိုင်ထိုးချိန်မှာလည်း ညာဝိုက်လက်သီးထပ်မိခဲ့ပြီး မူးဝေသွားတဲ့သန့်ဇင်ဟာ ရှောင်မထိုးဘဲ ပေထိုးလိုက်တာကလည်း သူ့အတွက်အထိနာစေခဲ့သလို ဘယ်ခြေဦးနဲ့အထိုးခံလိုက်ရချိန်မှာ အမှတ်စဉ်အရေခံလိုက်ရပါတော့တယ်။ နောက်ထပ် ပွဲကိုပြန်စချိန်မှာတော့ တာကေးရုဟာ ဆက်တိုက်လိုက်ထိုးခဲ့ပြီး ပွဲကိုအလဲထိုးအနိုင်ယူ အဆုံးသတ်သွားပါတယ်။

သန့်ဇင်ဟာ ဒီပွဲရှုံးပေမယ့် တာကေးရုကိုအမှတ်စဉ်ရေတွက်စေခဲ့သလို ထောက်လက်သီးတွေ ပင့်လက်သီးတွေနဲ့ အခက်တွေ့အောင်လုပ်နိုင်ခဲ့ပြီး ပရိယာယ်ပိုင်းမကြွယ်ဝသေးတာကြောင့်သာ အလဲထိုးရှုံးနိမ့်ခဲ့ရတာပါ။ ကိုယ်အကျွမ်းမဝင်သေးတဲ့ နည်းစနစ်မှာ ကမ္ဘ့ာအဆင့်ကစားသမားကိုယှဉ်ပြီး အကောင်းဆုံးထိုးသတ်သွားတာကို ချီးကျူးရမှာဖြစ်သလို ဒီအစွမ်းအစတွေဆက်လက်ထိန်းသိမ်းနိုင်ရင် သန့်ဇင်ရဲ့ချန်ပီယံအိပ်မက်တွေ မဝေးတော့ဘူးလို့ ဆိုရမှာပါ။ 

■ အချီပြည့်အထိုးခံပြီး အမှတ်နဲ့အရှုံးပေးလိုက်ရတဲ့ စိုးလင်းဦး

ပထမအချီဟာ နာဘီလ်ရဲ့စိတ်ကြိုက်ဖြစ်ခဲ့ပြီး နာဘီလ်ဟာ သူ့ထုံးစံအတိုင်း အကွာအဝေးချိန်ထိုးခဲ့ကာ အောက်ခြေကန်ချက်တွေ၊ အမြင့်ကန်ချက်တွေနဲ့ စိုးကြီးကို ထိန်းကစားသွားပါတယ်။ စိုးကြီးကတော့ နာဘီလ်ကိုထိရောက်အောင်ထိုးနိုင်မယ့် အခြေအနေမျိုးကို ရှာဖွေမတွေ့နိုင်ဘဲ လူချင်းကပ်ရင်လည်း နာဘီလ်ရဲ့ချုပ်ကွက်ထဲမှာပဲ မျောနေပါတယ်။ 

ဒုတိယအချီမှာလည်း နာဘီလ်ကပဲ ပွဲကိုဦးဆောင်ခဲ့ပြီး သူ့စိတ်ကြိုက်တံတောင်ရိုက်ချက်တွေ၊ ဒူးတိုက်ချက်တွေကို ပိုပြီးအသုံးပြုလာပေမယ့် စိုးလင်းဦးကတော့ နာဘီလ်ထိလောက်တဲ့ထိုးချက်ကန်ချက်တွေ အသုံးမပြုနိုင်ခဲ့ပါဘူး။ တတိယအချီမှာလည်း ဒီလိုပါပဲ နာဘီလ်ဟာ သူ့ရဲ့အားသာချက်တွေကို ကောင်းကောင်းအသုံးချသွားပြီး ဒိုင်အားလုံးရဲ့ဆုံးဖြတ်ချက်နဲ့အတူ သူ့ရဲ့ဦးထုပ်လေးကိုဆောင်းပြီး အောင်ပွဲခံသွားပါတယ်။ 

ဒီပွဲဟာအရပ်အမောင်းကွာဟတာကို မကိုင်တွယ်နိုင်တဲ့စိုးလင်းဦးအတွက် အထိုးခံသက်သက်ပွဲတပွဲလိုဖြစ်ခဲ့ပြီး ONE ရဲ့တသိန်းတန်စာချုပ် အဖွင့်ပွဲမလှခဲ့ဘူးလို့ဆိုရမှာဖြစ်ကာ နောက်ပွဲတွေမှာ ဒီထက်ပိုမိုကောင်းမွန်တဲ့စွမ်းဆောင်ရည်တွေ ပြသဖို့လိုအပ်သွားပါတယ်။ 

Photo – SS From ONE Championship.

မြေလတ်အသံ၊ စက်တင်ဘာ ၂၇၊ ၂၀၂၄။

ONE Friday Fights 81 က တာကေးရုနဲ့သန့်ဇင်တွဲဆိုင်းဟာ ကစားသမားတွေအတွက်မဟုတ်ဘဲ ONE အတွက် လုပ်ဆောင်လိုက်တဲ့တွဲဆိုင်းဖြစ်နေတာ လူတိုင်းသိကြပါလိမ့်မယ်။ တာကေးရုနဲ့ ထိုးဖို့ တည်ထားတဲ့ ထိုင်းဖိုက်တာကိုဖယ်ပြီး သန့်ဇင်ကိုထည့်ပေးလိုက်တာဟာ သန့်ဇင်ကို တဆင့်မြှင့်ပေးတာမျိုးထက် တာကေးရုပွဲမပန်းဖို့နဲ့ ပရိသတ်လှုပ်ခတ်မှု အားကောင်းစေဖို့ လုပ်လိုက်တာမျိုးပါပဲ။

ONE ဟာ တိုက်ခိုက်ရေးအားကစားကို ချစ်မြတ်နိုးတယ်ဆိုတာထက် ဒီကစားသမားတွေကိုအသုံးချလွန်းတယ်လို့ ပြောလို့တောင်ရတဲ့အဖွဲ့အစည်းမျိုးဖြစ်ပြီး သူတို့အဖွဲ့အစည်းလက်အောက်မှာ ဝင်ကစားနေကြတဲ့ မွေထိုင်း၊ ကစ်ဘောင်ဆင်၊ MMA နဲ့ နပန်းကစားသမားတွေကို စည်းမျဉ်းမျိုးစုံနဲ့ ပွဲတည်ပေးကာ လူစိတ်ဝင်စားအောင်လုပ်တတ်ပါတယ်။

ရော့ထန်နဲ့ ဒီဂျေတို့ရဲ့ မွေထိုင်းတချီ MMA တချီပွဲတွေ၊ MMA ဖိုက်တာကြီး ဂျွန်လင်နစ်ကာရဲ့ မွေထိုင်းပွဲစဉ်တွေဟာ အထင်ရှားဆုံးဥပမာတွေဖြစ်ပြီး အခု တာကေးရုနဲ့ သန့်ဇင်တို့ရဲ့တွဲဆိုင်းဟာလည်း အဲ့ဒီလိုပွဲစဉ်တွေထဲက တပွဲဖြစ်နေပါတယ်။ 

■ တာကေးရုနဲ့သန့်ဇင် 

တာကေးရုဆိုတာ ကမ္ဘာ့အဆင့်ကစ်ဘောင်ဆင်သမား၊ သန့်ဇင်ဆိုတာ မွေထိုင်းစည်းမျဉ်းအောက်မှာ ထိုးသတ်နေတဲ့ မြန်မာ့လက်ဝှေ့ထွန်းတောက်လူငယ်လေးတဦး။ ဒီပွဲဟာ ကစားသမားတွေရဲ့ စွမ်းဆောင်ရည်ပိုင်း ကွာဟခြင်း မကွာဟခြင်းထက် ထိုးသတ်နေတဲ့ နယ်ပယ်ချင်းတောင် တော်တော်ကွဲနေတဲ့တွဲဆိုင်းပါ။

ONE ကတော့ ONE လိုပဲ လုပ်ဆောင်သွားပြီဆိုတော့ ဖိုက်တာတွေအနေနဲ့လည်း သူတို့အသုံးချခံရမှုပေါ်မှာ ကိုယ့်အစွမ်းအစကိုထုတ်ပြရင်း ကိုယ်ရနိုင်မယ့်အခွင့်အလမ်းတွေကို ဒဏ်ရာအနာတရနည်းစွာနဲ့ ဆုပ်ကိုင်ဖို့ စဉ်းစားနေကြမှာသေချာပါတယ်။ အထူးသဖြင့် သန့်ဇင်ပါ။ 

သူဟာ မြန်မာ့လက်ဝှေ့ကနေ မွေထိုင်းစည်းမျဉ်းအောက်မှာဝင်ကစားနေရင်း ကစ်ဘောင်ဆင်ပွဲစဉ်အတွက် လူစားဝင်ကစားဖို့ ရွေးချယ်ခံလိုက်ရသလို သူနဲ့ထိုးမယ့်ပြိုင်ဘက်ကလည်း ကမ္ဘာ့အဆင့်ကစားသမားဖြစ်နေတာမို့ ဒါဟာ အခွင့်အရေးတခုလို့ ပြောရင်ရနိုင်သလို ဒီပွဲကြောင့် အထိနာသွားတာမျိုးမဖြစ်ဖို့လည်း လိုအပ်ပါတယ်။ 

တာကေးရုဟာ ကမ္ဘာ့အဆင့်ကစားသမားဖြစ်ပြီး ထိုးချက်တွေမြန်ဆန်သလို ကန်ချက်တွေဟာလည်း အားပါထိရောက်ပါတယ်။ သူဟာ ကစားသမားချင်းအကဲခတ်ချိန် ဘယ်ခြေကိုတချက်ရွှေ့ပြီး ဘယ်ထောက်လက်သီးထုတ်တာမျိုးကို ထိထိရောက်ရောက် အသုံးပြုတတ်သလို တဘက်ကစားသမားမွှန်သွားချိန်မှာ လျှင်မြန်တဲ့ဘယ်ညာတွဲလုံးကို သုံးတတ်ပါတယ်။ ဝါရင့်ဖိုက်တာတဦးဖြစ်တဲ့အတွက် သူ့ရဲ့ခွန်အားကို ဘယ်အချိန်မှာ အသုံးချရမလဲဆိုတာကို ကောင်းကောင်းသိသူပါ။  ပြီးတော့ သူ့ရဲ့ဘယ်ခြေဟာ အောက်ခြေသိမ်းကန်ချက်အပြင် အမှတ်တမဲ့ ခြေဦးနဲ့ထိုးတာကလည်း တဘက်ကစားသမားကိုအခက်တွေ့စေပါတယ်။ 

ဂျပန်ကစားသမားတွေထဲမှာ မာဂုဏ်မြင့်မားတဲ့၊ လွယ်လွယ်နဲ့အရှုံးမပေးတတ်တဲ့ ကစားသမားဖြစ်သလို စူပါလတ်နဲ့ပွဲမှာ ဒါကိုသက်သေပြခဲ့ပြီး သူ့ဆီက အားနည်းချက်ကိုရှာဖို့ဆိုရင် ပွဲချိန်ပြည့်အမှားစောင့်ရမယ့် ကစားသမားမျိုးဖြစ်ပါတယ်။ 

တာကေးရုဟာ ပွဲကိုဦးဆောင်ထိုးသတ်ချင်သူဖြစ်သလို ဖိအားပေးထိုးတတ်သူဖြစ်ပြီး သူဖိအားပေးလာတဲ့အချိန် သူ့ကိုထိုးလိုက် ရှောင်လိုက်နဲ့လုပ်တတ်သူဆိုရင် စိတ်မရှည်တတ်ပါဘူး။ သူ့ကို ထိထိမိမိနှစ်ချက်သုံးချက်ထိသွားရင် မွှန်ပြီးအတင်းလိုက်တတ်သလို လက်ကပွင့်နေတတ်တာမို့ ပင့်လက်သီးအဝင်ခံရတာတွေရှိပြီး အဲ့ဒီအချိန်မှာ အမိုက်ခံထိုးတတ်တာကိုတော့ တွေ့ရပါတယ်။ ပြီးတော့ စူပါလတ်ကန်ထားလို့ ဒဏ်ရာရှိထားတဲ့ နေရာက သူ့ရဲ့အားနည်းချက်တွေထဲက တချက်ဖြစ်နိုင်ပြီး သန့်ဇင်ရဲ့ခြေကန်ချက် ဘယ်လောက်အထိသွားနိုင်မလဲဆိုတာ ကြည့်ရပါမယ်။ 

သန့်ဇင်ကတော့ မြန်မာ့လက်ဝှေ့သမားပီပီ မာဂုဏ်မြင့်ပြီး လက်သီးထိုးချက်ထက် ခြေကန်ချက်က ပိုမိုကောင်းမွန်တာကိုလူသိများကာ မြန်မာ့လက်ဝှေ့ပွဲစဉ်တွေနဲ့ ONE မှာထိုးသတ်ခဲ့တဲ့ပွဲစဉ်တွေမှာ သူ့ရဲ့ကန်ချက်တွေ ဘယ်လောက်ထိရောက်သလဲဆိုတာ သိခဲ့ကြပြီးပါပြီ။ ONE မှာထုတ်မသုံးရသေးတဲ့ အမြင့်ကန်ချက်တွေကို ဒီပွဲမှာထုတ်သုံးနိုင်မလား စောင့်ကြည့်ရပါမယ်။ 

လက်ဝှေ့အိတ်အပြောင်းအလဲဟာ သန့်ဇင်အတွက်အခက်အခဲဖြစ်နိုင်သလို ကစ်ဘောင်ဆင်မှာ သုံးခွင့်မရှိတဲ့ တံတောင်ရိုက်ချက်တွေ ပါမသွားဖို့လည်း ထိန်းရဦးမှာပါ။ သန့်ဇင်ရဲ့အောက်ခြေသိမ်းကန်ချက်တွေ လူချင်းပူးချိန်ထွက်လာမယ့် လက်သီးချက်တွေ အံဝင်ခွင်ကျဖြစ်ဖို့ လိုပါတယ်။ 

သန့်ဇင်ရဲ့အင်တာဗျူးတွေကြည့်ရသလောက်တော့ ဒီပွဲစဉ်မှာ သူ့ရဲ့အနေအထားကို နားလည်ထားပုံရပြီး စကားလုံးကြီးတွေထက် သတိကြီးကြီးနဲ့ကစားသွားဖို့ ပြောတာမျိုးတွေ တွေ့ရပါတယ်။ ဒါဟာ ကောင်းမွန်တဲ့အချက်ပါပဲ။ ဝိတ်ချိန်တဲ့အချိန်မှာ သနပ်ခါးအဖွေးသားနဲ့ရောက်လာတဲ့သန့်ဇင်ကို ဂျပန်မီဒီယာတွေကပါ စိတ်ဝင်တစားဖော်ပြလာတာမို့ သူ့အတွက်မထိုးခင်ကတည်းက အမှတ်ရထားပြီလို့ ပြောရပါမယ်။ 

ဒီပွဲမှာ ကစားသမားတွေရဲ့ အရှုံးအနိုင်ထက် ဘယ်လိုအဖြေထွက်လာထွက်လာ လူစားထိုးခံရတာကိုအသုံးချပြီး ပုံရိပ်မြှင့်တင်မယ့် သန့်ဇင်ကိုအားပေးချင်ပါတယ်။ ဒီပွဲဟာ ဘာဖြစ်ဖြစ်  သန့်ဇင်ပါပဲ။ 

■ နာဘီလ်နဲ့ စိုးလင်းဦး

ဒီဖိုက်တာနှစ်ယောက်ကတော့ ဝမ်းရဲ့ဒေါ်လာတသိန်းတန်စာချုပ်ကို တချိန်တည်းရခဲ့ကြသူတွေဖြစ်ပြီး ဒီနေ့မှာတော့ ပြိုင်ဘက်တွေအဖြစ်ယှဉ်ပြိုင်သွားကြတော့မှာ ဖြစ်ပါတယ်။ 

နာဘီလ်ဟာ အသက်ငယ်ငယ်ရွယ်ရွယ်နဲ့ အောင်မြင်လာပြီး ဘန်တန်ဝိတ်တန်းမှာ အရပ်အမောင်းအားကိုးနဲ့ မိုက်နေတဲ့ ဖိုက်တာတယောက်လို့ ပြောနိုင်ပါတယ်။ သူကတော့ စိုးလင်းဦးကိုအလဲထိုးဖို့ ရည်ရွယ်ထားကြောင်း ပြောထားပါတယ်။ 

နာဘီလ်ဟာ အရပ်အမောင်းရှည်လျားတဲ့ဖိုက်တာဖြစ်တာနဲ့အညီ ထိုးချက်ကန်ချက်တွေက လေးလံတဲ့ဟာကွက်ရှိပေမယ့် အဲ့ဒီဟာကွက်တွေကို တံတောင်ရိုက်ချက်၊ ဒူးတိုက်ချက်တွေနဲ့ ပြန်ဖြည့်ထားတာတွေ့ရပါတယ်။ 

ပြိုင်ဘက်ကစားသမားကို အကွာအဝေးချိန်ဆထိုးပြီး ညာဖြောင့်လက်သီးကို အားကုန်အသုံးပြုထိုးတတ်ပါတယ်။ အားပါတဲ့ကန်ချက် သိပ်မထွက်ပေမယ့် သူ့ထက်အရပ်ပုတဲ့ပြိုင်ဘက်တွေ အနားကပ်လာရင်ထွက်လာတဲ့ ဒူးတိုက်ချက်ကတော့ တော်တော်လေးထိရောက်ပါတယ်။ လူချင်းပူးကပ်သွားချိန်မှာ ချုပ်အားသန်ပြီး ဒူးတိုက်ချက်ကိုလည်း တိတိကျကျထုတ်သုံးတတ်ပါသေးတယ်။ သူ့ရဲ့အားနည်းချက်တော့ နှစ်ချက်သုံးချက်လောက် ထိထိရောက်ရောက် အထိုးခံလိုက်ရရင် မတိုးရဲတော့တာပါ။ 

စိုးလင်းဦးကတော့ ရိုးရာလက်ဝှေ့ကတည်းက မာဂုဏ်နဲ့အနီးကပ်ပင့်လက်သီးတွေကို အသုံးပြုတဲ့ကစားသမားဖြစ်ပြီး သူ့ထက်အရပ်သာ ဝိတ်အသာကစားသမားတွေနဲ့ အကြိမ်များစွာ ထိုးသတ်ခဲ့ဖူးပါတယ်။ နာဘီလ်ကတော့ သူတွေ့ခဲ့ဖူးတဲ့ဖိုက်တာတွေထဲမှာ အရပ်အရှည်ဆုံးဖိုက်တာဖြစ်မယ်လို့ ထင်ပါတယ်။ 

စိုးလင်းဦးအနေနဲ့ နာဘီလ်ကိုပင့်လက်သီးအသုံးပြုဖို့ ပုံမှန်ထက်အားထုတ်ရမှာဖြစ်ပြီး အနီးကပ်ဘော်ဒီထိုးတဲ့အခါမှာလည်း ဒူးတိုက်ချက်ကိုဂရုပြုရမှာ ဖြစ်ပါတယ်။ စိုးလင်းဦးအနေနဲ့ ထိရောက်တဲ့လက်သီးချက် သုံးလေးချက်ထုတ်သုံးနိုင်ရင် ဒီပွဲကိုအသာစီးရသွားမယ်လို့ထင်ပြီး လုပ်ဆောင်နိုင်မယ်လို့လည်း မျှော်လင့်မိပါတယ်။ 

ဒေါ်လာတသိန်းတန်စာချုပ်ရဲ့ ပထမဆုံးအဖွင့်ပွဲမှာ စိုးကြီးတယောက်ရလဒ်ကောင်းမလား၊ အလွယ်မလဲတတ်တဲ့ စိုးလင်းဦးကို အလဲထိုးမယ်ဆိုတဲ့ နာဘီလ်ပဲအသာရသွားမလား စောင့်ကြည့်ရပါမယ်။ 

မြန်မာဖိုက်တာ စိုးလင်းဦးနဲ့ သန့်ဇင်တို့ပါဝင်ထိုးသတ်မယ့် One Friday Fights 81 ပွဲစဉ်တွေကို စက်တင်ဘာ ၂၇ သောကြာနေ့ ယနေ့ည မြန်မာစံတော်ချိန် ၇ နာရီမှာ စတင်သွားမှာဖြစ်ပါတယ်။ 

Photo – One Championship 

မြေလတ်အသံ၊ စက်တင်ဘာ ၂၀၊ ၂၀၂၄။

မြန်မာပြည်ရဲ့ထိပ်တန်းလက်ဝှေ့ကျော်တယောက်ဖြစ်တဲ့ သွေးသစ်ဝင်းလှိုင်ဟာ စက်တင်ဘာ ၂၀ ရက် ယနေ့ညနေပိုင်းမှာကျင်းပမယ့် One Friday Fights 80 မှာ ပါဝင်သွားမှာဖြစ်ပြီး ပြိုင်ဘက် ဥဇဘက်ကစ္စတန်ကစားသမား မာလွန်ခါခိုရော့ဗ်နဲ့ မွေထိုင်း(ဖယ်သာဝိတ်တန်း)မှာ ယှဉ်ပြိုင်ထိုးသတ်သွားမှာပါ။

ဒီပွဲဟာ အသက် ၂၉ နှစ်အရွယ် သွေးသစ်ဝင်းလှိုင်အတွက် One ကကျင်းပတဲ့ပြိုင်ပွဲတွေမှာ ဒုတိယမြောက်ဝင်ရောက်ထိုးသတ်တဲ့ပွဲဖြစ်ပြီး ပထမပွဲမှာတော့ ထိုင်းကစားသမားခွန်ဆတ်နဲ့ထိုးသတ်ခဲ့ကာ ပွဲစဉ်တလျှောက်လုံး ခွန်ဆတ်ရဲ့ကန်ချက်တွေကြောင့် ရုန်းကန်ခဲ့ရသလို ပွဲအပြီးမှာအမှတ်နဲ့အရှုံးပေးခဲ့ရပါတယ်။ ပြိုင်ဘက် ခါခိုရော့ဗ်အနေနဲ့လည်း ဒီပွဲဟာ သူ့အတွက် One ကကျင်းပတဲ့ပြိုင်ပွဲတွေမှာ ဒုတိယမြောက်ပွဲအဖြစ်ထိုးသတ်ရတာဖြစ်ပြီး ပထမပွဲမှာတော့ ပြိုင်ဘက်ကစားသမားနုတ်ထွက်သွားတာကြောင့် ပွဲမကစားရသေးပါဘူး။ 

ခါခိုရော့ဗ်ဟာ ဘယ်သန်ကစားသမားတဦးဖြစ်ပြီး အသက် ၃၇ နှစ်အရွယ်ရှိနေပြီဖြစ်ပေမယ့် သက်လုံပိုင်းကောင်းမွန်ကာ ဘယ်ခြေကန်ချက်ကိုအားပြုကစားတာတွေ့ရသလို ကန်ချက်ဟာလည်း ပြင်းထန်ပါတယ်။ သူအနိုင်ရရှိတဲ့ပြိုင်ပွဲတွေကိုကြည့်မယ်ဆိုရင် ဘယ်ခြေအနိမ့်ကန်ချက်နဲ့ ဘော်ဒီကန်ချက်တွေကိုအဓိကအသုံးပြုကစားသွားပြီး လက်သီးထိုးချက်ထိရောက်မှုအားနည်းပေမယ့် အရပ်နဲ့လက်တံသွေးသစ်ထက်ရှည်နေတာတွေ၊ အနီးကပ်ပူးသတ်ချိန် ထွက်လာတတ်တဲ့ ဒူးတိုက်ချက်တွေဟာ သူ့အတွက်အားသာချက်တခုလိုဖြစ်နေပါတယ်။ 

သွေးသစ်ဝင်းလှိုင်ကတော့ ကစားသမားဘဝ One ကန့်လန့်ကာအဖွင့်မှာ ရှုံးပွဲနဲ့ရင်ဆိုင်ထားခဲ့ရတာကြောင့် ဒီပွဲမှာသိက္ခာဆည်ဖို့နဲ့ One မှာနောက်ထပ်ပြိုင်ပွဲတွေထပ်မံရရှိနိုင်ဖို့အတွက် အစွမ်းကုန်ကြိုးစားလာမှာ သေချာပါတယ်။ သွေးသစ်ဟာလည်း ဘယ်သန်ကစားသမားတဦးဖြစ်ပြီး ခါခိုရော့ဗ်ထက် အရပ်နဲ့လက်တံထိရောက်မှုနိမ့်ပေမယ့် မြန်မာ့လက်ဝှေ့ကစားသမားပီပီ မာဂုဏ်မြင့်မားကာ လက်သီးတွဲလုံးတွေကောင်းမွန်ပါတယ်။ သူဟာ သူ့ထက်အရပ်အမောင်းမြင့်မားတဲ့ကစားသမာတွေကိုပါ အမြင့်ကန်ချက်တွေအသုံးပြုထိုးသတ်တတ်ပြီး ဘယ်ညာထောက်လက်သီးနဲ့ အနိမ့်ကန်ချက်တွေဟာလည်း ထိရောက်တာကိုတွေ့ရပါတယ်။ 

ဒီပွဲဟာ သွေးသစ်ဝင်းလှိုင်အတွက် ပွဲကျပ်တပွဲကိုရင်ဆိုင်ရတာဖြစ်ပြီး အနိုင်ရရှိဖို့ နှစ်ဦးစလုံးအတွက်အရေးပါနေတာကြောင့် ပွဲကောင်းတပွဲဖြစ်မှာတော့သေချာနေပါတယ်။ 

သွေးသစ်ဝင်းလှိုင်နဲ့ ခါခိုရော့ဗ်တို့တွဲဆိုင်းပါဝင်တဲ့ ONE Friday Fights 80 ပွဲစဉ်တွေကို One Championship ရဲ့ Facebook Page နဲ့ Youtube Channel တို့မှာ မြန်မာစံတော်ချိန် ည ၇ နာရီမှာ တိုက်ရိုက်ကြည့်ရှုနိုင်မှာဖြစ်ပါတယ်။ 

Photo – One Lumpinee FC.

မြေလတ်အသံ၊ ဇူလိုင် ၁၂၊ ၂၀၂၄။

ယနေ့ညယှဉ်ပြိုင်ထိုးသတ်နေတဲ့ One Friday Fights 70 ရဲ့ FEATHERWEIGHT MUAY THAI ပွဲမှာ ထွန်းမင်းအောင်ဟာ ပြိုင်ဘက်ဗီယက်နမ်ကစားသမား ထရန်ကွက်ထွမ်ကို ဒိုင်ပွဲရပ်နဲ့အနိုင်ရရှိခဲ့ပါတယ်။ 

နှစ်ဦးစလုံးဟာ နောက်မဆုတ်တမ်း ထိုးသတ်ခဲ့တာကြောင့် ပွဲဟာကြည့်ကောင်းခဲ့ပါတယ်။ ပထမပွဲစဉ်မှာအရှုံးနဲ့ရင်ဆိုင်ခဲ့ရတဲ့ ထွန်းမင်းအောင်ဟာ သတိကြီးကြီးနဲ့ယှဉ်ပြိုင်ခဲ့ပြီး သူ့ရဲ့ထိုးချက်တွေဟာလည်း ဗီယက်နမ်ကစားသမားအပေါ်မှာ အသာစီးရယူနိုင်ခဲ့တာပါ။

တတိယအချီပြန်အစမှာတော့ နှစ်ဦးသားထိုးသတ်နေရင်း လူချင်းပူးကပ်သွားချိန် ထွန်းမင်းအောင်ရဲ့တံတောင်ရိုက်ချက်ဟာ ပြိုင်ဘက်ဗီယက်နမ်ကစားသမားရဲ့မျက်ခုံးကိုတည့်တည့်ထိကာ ကွဲသွားခဲ့လို့ ဒိုင်လူကြီးက ဗီယက်နမ်ကစားသမားရဲ့ထိခိုက်သွားတဲ့ဒဏ်ရာကိုကြည့်ပြီး ထွန်းမင်းအောင်ကို အနိုင်ပေးလိုက်တာဖြစ်ပါတယ်။ 

ဒီပွဲအနိုင်ကြောင့် ထွန်းမင်းအောင်ဟာ One Championship ကချီးမြှင့်တဲ ဘောနပ်စ် ဘတ်သုံးသိန်းခွဲကိုလည်း ရရှိခဲ့ပါတယ်။ 

Photo – SS from ONE Friday Fights 70 Live

မြေလတ်အသံ၊ ဇူလိုင် ၁၂၊ ၂၀၂၄။

မြန်မာလက်ဝှေ့ကစားသမားထွန်းမင်းအောင်ဟာ One Championship က ပြုလုပ်တဲ့ One Friday Fights 70 ပွဲမှာဝင်ရောက်ထိုးသတ်သွားမှာဖြစ်ပါတယ်။ 

ထွန်းမင်းအောင်ဟာ အသက် ၁၈ နှစ်သာရှိသေးပြီး ဒီပွဲဟာ One Friday Fights မှာထိုးတဲ့ သူ့ရဲ့ဒုတိယပွဲစဉ်လည်းဖြစ်ကာ ပြိုင်ဘက်ကတော့ အသက် ၂၈ နှစ်အရွယ် ဗီယက်နမ်ကစားသမား Tuan Quoc Tran(ထရန်ကွက်ထွမ်) ဖြစ်ပါတယ်။

ထွန်းမင်းအောင်ဟာ One Friday Fights မှာထိုးတဲ့ ပထမပွဲစဉ်မှာ ရုရှဖိုက်တာကို အမှတ်နဲ့ရှုံးနိမ့်ထားတာ ကြောင့် ဒီပွဲဟာ One Championship ရဲ့ပိုမိုကောင်းမွန်တဲ့စာချုပ်တွေလိုချင်တဲ့ ထွန်းမင်းအောင်အတွက်အရေးပါတဲ့ပွဲစဉ်တပွဲဖြစ်ပါတယ်။ 

ထွန်းမင်းအောင်ဟာ မြန်မာ့လက်ဝှေ့ဝါရင့်ဖိုက်တာထွန်းထွန်းမင်း၊ ထွန်းမင်းလတ်နဲ့ One Championship ရဲ့ One Friday Fights မှာဝင်ရောက်ထိုးသတ်နေပြီဖြစ်တဲ့ ထွန်းမင်းနိုင်တို့ရဲ့ညီတဦးလည်းဖြစ်ပါတယ်။

ထွန်းမင်းအောင်ရဲ့ပြိုင်ဘက်ကစားသမား Tuan Quoc Tran ဟာ လက်သီးပါဝါမြင့်တယ်လို့နာမည်ကြီးပြီး ထွန်းမင်းအောင်ကတော့ ပြိုင်ဘက်ထက် အရပ်နဲ့ဝိတ်(အလေးချိန်)အားသာချက်ရှိကာ ထွန်းမင်းအောင်နဲ့ Tuan Quoc Tran ရဲ့ပွဲကိုတော့ ဒီနေ့ညမှာကြည့်ရှုရမှာပါ။ 

ထွန်းမင်းအောင်ပါဝင်ထိုးသတ်မယ့် ONE Friday Fights 70 ပွဲစဉ်တွေကို One Championship ရဲ့ Facebook Page နဲ့ Youtube Channel တို့မှာ မြန်မာစံတော်ချိန် ည ၇ နာရီကနေစတင်ပြီး တိုက်ရိုက်ကြည့်ရှုနိုင်မှာဖြစ်ပါတယ်။ 

Photo – One Lumpinee FC