လီဗာပူးလ်

မြေလတ်အသံ၊ ဇန်နဝါရီ ၁၆၊ ၂၀၂၅။

ဇန်နဝါရီ ၁၆ ရက် ဒီနေ့ မနက်အစောပိုင်းမှာ ယှဉ်ပြိုင်ခဲ့တဲ့ အာဆင်နယ်နဲ့စပါးတို့ရဲ့ ပရီးမီးယားလိဂ် ပွဲစဉ် ၂၁ မြောက်လန်ဒန်ဒါဘီမှာ အာဆင်နယ်အသင်းက စပါးအသင်းကို ၂-၁ ရလဒ်နဲ့ အနိုင်ရရှိခဲ့ပါတယ်။

EFL Cup နဲ့ FA Cup ကနေ ထွက်ခဲ့ရပြီးနောက် နောက်ဆုံး ၃ ပွဲဆက် နိုင်ပွဲပျောက်ဆုံးနေတဲ့ အာဆင်နယ်အသင်းက ဒီနေ့ပွဲစဉ်မှာတော့ အကောင်းဆုံးပြင်ဆင်လာခဲ့ပြီး ဒါဘီပြိုင်ဘက် စပါးအသင်းကို အိမ်ကွင်း အမ်းမရိတ်မှာ အနိုင်ကစားနိုင်ခဲ့တာပါ။

ဒီပွဲစဉ်မှာ ဆွန်ဟောင်မင်က စပါးအသင်းအတွက် အဖွင့်ဂိုးကို ပွဲချိန် ၂၅ မိနစ်မှာ မြေမကျအဝေးကန်ချက်နဲ့ ကန်သွင်းခဲ့ပေမယ့် ပွဲချိန်မိနစ် ၄၀ မှာတော့ ထောင့်ကန်ဘောကနေတဆင့် အာဆင်နယ် နောက်ခံလူ ဂါဘရီရယ် ရဲ့ ခေါင်းတိုက်ချက်က စပါးတိုက်စစ်မှူး ဆိုလန်ကီ ကိုထိပြီး လမ်းကြောင်းပြောင်းကာ အာဆင်နယ်အသင်း ချေပဂိုးရရှိခဲ့ပါတယ်။ အဲ့ဒီနောက် ပွဲချိန် ၄၄ မိနစ်မှာ ဦးဆောင်ဂိုးကို ထရောဆက်ကနေ အဝေးကန်ချက်နဲ့ ကန်သွင်းခဲ့ကာ ၂-၁ ရလဒ်နဲ့ပဲ ​ပွဲပြီးဆုံးခဲ့ပြီး အိမ်ရှင်အာဆင်နယ်တို့ နိုင်ပွဲရရှိခဲ့တာပါ။

ဒီပွဲမှာ ရှုံးနိမ့်ခဲ့တာကြောင့် စပါးအသင်းက ပရီးမီးယားလိဂ် ၅ ပွဲဆက် နိုင်ပွဲပျောက်ဆုံးခဲ့နေပြီး အမှတ်ပေးဇယား အဆင့် ၁၃ နေရာအထိ ရောက်ရှိနေပြီဖြစ်ပါတယ်။

ဇန်နဝါရီ ၁၅ ရက်က ကစားခဲ့တဲ့ပွဲတွေမှာ လီဗာပူးလ်၊ ချဲလ်ဆီးနဲ့ မန်စီးတီး သရေရလဒ် ထွက်ပေါ်လာချိန် အာဆင်နယ်အသင်းက နိုင်ပွဲရှာဖွေနိုင်ခဲ့တာပါ။ ဒီနိုင်ပွဲကြောင့် အာဆင်နယ်အသင်းက အဆင့် ၁ က လီဗာပူးလ်အသင်းက် ၁ ပွဲအသာနဲ့ ရမှတ် ၄ မှတ်သာ ကွာဟတော့တာ ဖြစ်ပါတယ်။

မြေလတ်အသံ၊ ဒီဇင်ဘာ ၂၇၊ ၂၀၂၄။

မနေ့ညက ယှဉ်ပြိုင်ခဲ့တဲ့ ပရီးမီးယားလိဂ်ရဲ့ ခရစ္စမတ်ကာလဘောက်ဆင်ဒေးမှာတော့ လီဗာပူးလ်က လက်စတာကို အနိုင်ရရှိခဲ့ကာ ချဲလ်ဆီးနဲ့ ယူနိုက်တက်တို့ ရှုံးနိမ့်ခဲ့ပါတယ်။ ဒါ့အပြင် မန်စီးတီးကတော့သရေရလဒ်သာရရှိခဲ့လို့ ဆက်လက်ပြီး နိုင်ပွဲပျောက်ဆုံးနေဆဲ ဖြစ်ပါတယ်။

မနေ့ည အစောပိုင်းမှာ ယှဉ်ပြိုင်ခဲ့တဲ့ မန်စီးတီးနဲ့ အဲဗာတန် ပွဲမှာ တစ်ဖက် တစ်ဂိုးစီသာ ရရှိခဲ့ပြီး သရေရလဒ်နဲ့ ပွဲပြီးဆုံးခဲ့ပါတယ်။ ဒီပွဲမှာ မန်စီးတီး ပင်နယ်တီရရှိခဲ့ပေမယ့် မန်စီးတီးတိုက်စစ်မှူး ဟာလန်းရဲ့ ကန်သွင်းချက်ကို အဲဗာတန်ဂိုးသမား ပစ်ဖို့ဒ် ကာကွယ်နိုင်ခဲ့တဲ့အပြင် ပြန်ထွက်လာတဲ့ဘောလုံးကို ဘနာဒိုဆေးဗားရဲ့ပေးပို့မှုကတဆင့် ဟာလန်း ထပ်မံပိတ်သွင်းယူနိုင်ခဲ့ပေမယ့် လူကျွံနေခဲ့လို့ တစ်ဂိုးစီ သရေရလဒ်နဲ့သာ ပွဲပြီးဆုံးခဲ့ပါတယ်။ ဂွာဒီယိုလာရဲ့ မန်စီးတီးဟာ အခုပွဲအပါအဝင် ပြိုင်ပွဲစုံနောက်ဆုံး ၁၃ ပွဲမှာ ၉ ပွဲရှုံး၊ ၃ ပွဲသရေနဲ့ ၁ ပွဲသာ အနိုင်ရရှိထားခဲ့တာ ဖြစ်ပါတယ်။

အဆင့် ၂ နေရာမှာရှိနေပြီး ရလဒ်ကောင်းတွေဖော်ဆောင်နိုင်နေတဲ့ ချဲလ်ဆီးအသင်းကလည်း မနေ့ညက ဖူလ်ဟမ်အသင်းကို အိမ်ကွင်း စတန်းဖို့ဒ်ဘရစ်ချ်မှာ မထင်မှတ်ဘဲ ရှုံးနိမ့်ခဲ့ရပါတယ်။ ပွဲအစ ၁၆ မိနစ်မှာတင် ကိုးလ်ပါးမာရဲ့ ဦးဆောင်ဂိုးနဲ့ ချဲလ်ဆီးတို့ ဦးဆောင်နိုင်ခဲ့ပေမယ့် နောက်ထပ် သွင်းဂိုးမရရှိတော့ဘဲ ၈၂ မိနစ်နဲ့ နာကျင်အချိန်ပို ၉၅ မိနစ်တို့မှာ ဖူလ်ဟမ်အသင်းကို ချေပဂိုးနဲ့အနိုင်ဂိုး ခွင့်ပြုခဲ့ရပြီး ၁-၂ ရလဒ်နဲ့ ရှုံးနိမ့်ခဲ့ရပါတယ်။

ဒါ့အပြင် အမော်ရင်ရဲ့ ယူနိုက်တက်တို့ဟာလည်း ပုံစံကောင်းပျောက်ဆုံးနေဆဲဖြစ်ပြီး ဝုဗ်အသင်းကို ၂ ဂိုး ဂိုးမရှိနဲ့ ရှုံးနိမ့်ခဲ့ပါသေးတယ်။ ပထမပိုင်းမှာ ဝုဗ်အသင်းကို ဖိအားပေးကစားနိုင်ခဲ့ပေမယ့် သွင်းဂိုးမရရှိခဲ့တဲ့ ယူနိုက်တက်တို့ဟာဒုတိယပိုင်း ပွဲအစမှာပဲ အသင်းခေါင်းဆောင် ဘရူနို ဖာနန်ဒက် အနီကတ်နဲ့ ထုတ်ပယ်ခံရတာကြောင့် ၁ ယောက်လျော့နဲ့ယှဉ်ပြိုင်ခဲ့ရပြီး ဝုဗ် ကို အရေးနိမ့်ရတာပါ။ ဒီပွဲမှာ ထောင့်ကန်ဘောကနေ တိုက်ရိုက်ကန်သွင်းပြီး ဝုဗ်အသင်း ဦးဆောင်ဂိုး ရခဲ့တဲ့အပြင် နာကျင်အချိန်ပို နောက်ဆုံးမိနစ် တန်ပြန်တိုက်စစ်ကနေ အနိုင်သေချာစေမယ့် ဒုတိယဦးဆောင်ဂိုး ရရှိခဲ့တာကြောင့် ပွဲအပြီးမှ ၂ ဂိုး ဂိုးမရှိရလဒ်နဲ့ ယူနိုက်တက်တို့ အရေးနိမ့်ခဲ့ရပါတယ်။ ဒီပွဲစဉ်အပြီးမှာ ယူနိုက်တက်အသင်းဟာ တန်းဆင်းဇုံနဲ့ ၈ မှတ်အကွာ အဆင့် ၁၄ နေရာအထိ ရောက်ရှိသွားခဲ့ပြီပဲ ဖြစ်ပါတယ်။

ယမန်နေ့ည နောက်ဆုံးပွဲစဉ်အဖြစ်ယှဉ်ပြိုင်ခဲ့တဲ့ လီဗာပူးလ်နဲ့ လက်စတာအသင်း ပွဲစဉ်မှာတော့ လီဗာပူးလ်တို့ ၃-၁ ရလဒ်နဲ့ အိမ်ကွင်းနိုင်ပွဲရရှိခဲ့ပြီး အမှတ်ဇယားကို ဖိအားကင်းကင်းနဲ့ ဆက်လက်ဦးဆောင်နေဆဲ ဖြစ်ပါတယ်။ ဒီပွဲမှာတော့ လက်စတာတို့က ပွဲအစ ၆ မိနစ်မှာတင် ဦးဆောင်ဂိုးရခဲ့ပေမယ့် ပထမပိုင်းနာကျင်အချိန်ပိုမှာ ဂက်ပိုရဲ့ အဝေးကန်ချက်နဲ့ ချေပဂိုးကို ခွင့်ပြုခဲ့ရပါတယ်။ ဒါ့အပြင် အိမ်ရှင်လီဗာပူးလ်တို့က ပွဲစဉ်တလျှောက်လုံး တိုက်စစ်ပြီးတိုက်စစ်ကစားခဲ့ကာ ၄၉ မိနစ်မှာ ကာတစ်ဂျုံး ၈၂ မိနစ်မှာ ဆာလာတို့ရဲ့ သွင်းဂိုးတွေနဲ့ အနိုင်ရလဒ်ကို ဖော်ဆောင်သွားနိုင်ခဲ့ပါတယ်။ ပထမပိုင်းမှာ မိုဟာမက်ဆာလာရဲ့ ကန်သွင်းချက်တွေ ဂိုးအဖြစ်မရရှိခဲ့ဘဲ အကြိမ်ကြိမ်လွဲချော်ခဲ့လို့သာ ဒီထက် ဂိုးမပြတ်ခဲ့တာလို့ ဆိုရမှာလည်း ဖြစ်ပါတယ်။ ဒီနိုင်ပွဲကြောင့် လီဗာပူးလ်အသင်းဟာ အဆင့် ၂ က ချဲလ်ဆီးထက် ၁ ပွဲလျော့ကစားထားပြီး ၇ မှတ်အထိ ဖြတ်ထားနိုင်ကာ အမှတ်ပေးဇယားကို သက်တောင့်သက်သာနဲ့ပဲ ဆက်လက်ဦးဆောင်ထားနိုင်ပါသေးတယ်။

ဒါ့အပြင် ဒီရာသီမှာ အားလုံးမထင်မှတ်ထားတဲ့ နော်တင်ဟမ်ဖောရက်စ်အသင်းဟာလည်း စပါးစ်အသင်းကို အနိုင်ယူပြီး အဆင့် ၃ အထိ တက်လှမ်းလာနိုင်ခဲ့တာကိုလည်း တွေ့ရှိရပါတယ်။ 

မြေလတ်အသံ၊ ဒီဇင်ဘာ ၁၊ ၂၀၂၄။

ယနေ့ည စူပါဆန်းဒေးရဲ့ ပရီးမီးယားလိဂ် ပွဲစဉ် ၁၃ က ပွဲကောင်းတပွဲဖြစ်တဲ့ လီဗာပူးလ်နဲ့ မန်ချက်စတာစီးတီးပွဲစဉ်ကို မြန်မာစံတော်ချိန် ည ၁၀ နာရီ ၃၀ မှာ ယှဉ်ပြိုင်သွားကြမှာဖြစ်ပါတယ်။

အိမ်ရှင်အသင်းကတော့ ဒီရာသီဟာ လီဗာပူးလ်ရဲ့ ရာသီလို့ပြောလို့ရလောက်အောင်ကို အကြိမ်ကြိမ်သက်သေပြနေခဲ့တာဖြစ်ပြီး နော်တင်ဟမ်ကို ရှုံးနိမ့်ခဲ့တဲ့ပွဲနဲ့ အာဆင်နယ်ကို သရေကျခဲ့တဲ့ပွဲကလွဲရင် ပွဲစဉ်တိုင်းကို နိုင်ပွဲရယူထားခဲ့ကာ ပရီးမီးယားလိဂ်မှာရော ချန်ပီယံလိဂ်မှာပါ အမှတ်ပေးဇယားတွေရဲ့ထိပ် ဦးဆောင်နေတာ ဖြစ်ပါတယ်။ 

အဓိကဂိုးသမား အလီဆင်အပါအဝင် ဒဏ်ရာရကစားသမား ၆ ယောက်အထိ ရှိနေပေမယ့် ဂိုးသမား ကယ်လင်ဟာရဲ့ လက်စွမ်းပြမှု၊ အသင်းရဲ့ ဟန်ချက်ညီမှုတွေနဲ့ ဆာလာ၊ ဒီးယက်ဇ်တို့ရဲ့ သွင်းဂိုးတွေကနေတဆင့် လီဗာပူးလ်အသင်းအနေနဲ့ အမှားအယွင်းမရှိဘဲ ရှေ့ဆက်နေခဲ့တာပါ။

လက်ရှိပရီးမီးယားလိဂ်ချန်ပီယံ မန်ချက်စတာစီးတီးကတော့ နောက်ဆုံး ၆ ပွဲမှာ ၅ ပွဲရှုံး ၁ ပွဲသရေ ရလဒ်နဲ့ နိုင်ပွဲပျောက်ဆုံးနေပြီး ပရီးမီးယားလိဂ်မှာ လက်ရှိ (၁ ပွဲလို) အဆင့် ၄ နေရာအထိ ရောက်ရှိနေခဲ့သလို ချန်ပီယံလိဂ်မှာလည်း အဆင့် ၁၇ နေရာအထိ ရောက်နေခဲ့တာ ဖြစ်ပါတယ်။

အဓိက ကွင်းလယ်လူ ဘလွန်းဒီအောဆုရှင် ရိုဒရီအပါအဝင် ဂျွန်စတုန်း၊ ကိုဗာဆစ် စတဲ့ခံစစ်နဲ့ ကွင်းလယ်ခံစစ်ပိုင်းက ဒဏ်ရာပြသနာတွေကြုံနေရချိန် ပေးဂိုးတွေ အများအပြားခွင့်ပြုနေခဲ့ရပြီး နိုင်ပွဲပျောက်ဆုံးနေတဲ့ မန်စီးတီးအသင်းဟာ လက်ရှိ ပရီးမီးယားလိဂ်ဇယားထိပ်က လီဗာပူးလ်ကို အဝေးကွင်းမှာ သွားရောက်ရင်ဆိုင်ရမယ့် အရေးဟာ နည်းပြ ဂွာဒီယိုလာအတွက် ခေါင်းခဲစရာအခြေအနေပါ။

ဒီနေ့ပွဲမှာ မန်စီးတီး နိုင်ပွဲရှာဖွေနိုင်ခဲ့ရင်တော့ အဆင့် ၂ နေရာအထိ ပြန်လည် တက်လှမ်းနိုင်မှာဖြစ်သလို ချန်ပီယံဆုဖလားအတွက် လီဗာပူးလ်ကို ဖိအားပေးနိုင်ဖို့ မျှော်လင့်နိုင်မှာ ဖြစ်ပေမယ့် ရှုံးနိမ့်ခဲ့ရင်တော့ ချန်ပီယံဆုဖလားနဲ့ ဝေးကွာသွားနိုင်တဲ့အထိ ဖြစ်သွားနိုင်လို့ မန်စီးတီးတို့ အကောင်းဆုံးပြန်လာဖို့ မျှော်လင့်ထားမှာ အသေအချာပါပဲ။

တဖက်မှာလည်း လီဗာပူးလ်အနေနဲ့ ဟန်ချက်ပျက်နေတဲ့မန်စီးတီးကို အိမ်ကွင်းမှာ အနိုင်ကစားပြီး ဇယားထိပ်မှာ အမှတ်ပြတ်နဲ့ ဆက်လက်ဦးဆောင်နိုင်ဖို့ကြိုးစားသွားမှာဖြစ်သလို လက်ရှိ ခြေစွမ်းပြန်မှန်လာတဲ့ အဆင့် ၂ က အာဆင်နယ်အသင်းရဲ့ ဖိအားပေးမှုကနေကင်းလွတ်ဖို့လည်း နိုင်ပွဲရယူဖို့ လိုအပ်နေတာပါ။

နောက်ဆုံး တွေ့ဆုံခဲ့တဲ့ ၅ ကြိမ်မှာတော့ ၁ ကြိမ်စီ အနိုင်ရခဲ့ပြီး ၃ ပွဲသရေကျထားတဲ့ လီဗာပူးလ်နဲ့ မန်စီးတီးတို့ ဒီတကြိမ် အန်ဖီးလ်ကွင်းမှာတော့ ဘယ်လို ရလဒ်ထွက်သွားမလဲဆိုတာကို ယနေ့ည မြန်မာစံတော်ချိန် ၁၀ နာရီ ၃၀ မိနစ်မှာ စောင့်ကြည့်သွားရတော့မှာပဲ ဖြစ်ပါတယ်။

Photo – lapremierleague. 

မြေလတ်အသံ၊ အောက်တိုဘာ ၂၀၊ ၂၀၂၄။

လက်ရှိ အဆင့် ၁ နေရာမှာရှိနေတဲ့ လီဗာပူးလ်နဲ့ ခြေစွမ်းကောင်းပြန်ရလာပြီး လက်ရှိအဆင့် ၆ ကနေ ထပ်တက်လာဦးမယ့် ချဲလ်ဆီးတို့ ယနေ့ည ပရီးမီးယားလိဂ် ပွဲစဉ် ၈ အနေနဲ့ လီဗာပူးလ် အိမ်ကွင်း အန်ဖီးလ်မှာ ယှဉ်ပြိုင်သွားမှာပါ။

နှစ်သင်းလုံးက နည်းပြသစ်တွေနဲ့ ပြန်လည်တည်ဆောက်ဆဲကာလဆိုပေမယ့် ပိုမိုအထိုင်ကျနေတဲ့ လီဗာပူးလ်အသင်းကတော့ ဒီရာသီ ပရီးမီးယားလိဂ် ၇ ပွဲကစားထားရာမှာ ၆ ပွဲအနိုင်ရရှိထားပြီး နော့တင်ဟမ်ကို မထင်မှတ်ဘဲ ရှုံးခဲ့တာကလွဲရင် ပုံစံကောင်းရနေတဲ့အပြင် လက်ရှိချန်ပီယံမန်စီးတီးရဲ့အထက်မှာ ၁ မှတ်အသာနဲ့ ဇယားထိပ်ကနေ ဦးဆောင်နေတာပါ။

ချဲလ်ဆီးကတော့ ရာသီအစ မန်စီးတီးကို ရှုံးထားတာအပြင် သရေ ၂ ပွဲနဲ့အမှတ်လျော့ထားပြီး အဆင့် ၆ နေရာမှာ ရှိနေပေမယ့် ကိုးလ် ပါးမား ခြေစွမ်းပြနေမှုနဲ့အတူ အသင်းက ပုံစံကောင်းရလာနေပြီလည်း ဖြစ်ပါတယ်။

ဒီရာသီ ပရီးမီးယားလိဂ် ပေးဂိုး ၂ ဂိုးပဲ ခွင့်ပြုထားရတဲ့ လီဗာပူးလ် ခံစစ်က အကောင်းဆုံး အနေအထားမှာ ရှိနေပေမယ့် ချဲလ်ဆီးကတော့ ဒီရာသီ ပေးဂိုး ၈ ဂိုး ရှိထားပြီး အားထားရတဲ့ ဘယ်နောက်ခံလူ ကူကူရယ်လာ ပွဲပယ်ပြစ်ဒဏ်ကြောင့် ခံစစ်ပိုင်းမှာ အနည်းငယ် အားနည်းနေသလို ပြိုင်ဘက် လီဗာပူးလ်ရဲ့ အဓိက တောင်ပံတိုက်စစ်ကစားသမား မိုဟာမက် ဆာလာနဲ့ ရင်ဆိုင်ရမယ့်ဘက်ခြမ်းဖြစ်နေလို့ ဒါက စိုးရိမ်ရမယ့် အနေအထားပါ။

ချဲလ်ဆီးအနေနဲ့ကတော့ စက်တင်ဘာလ ပရီးမီးယားလိဂ် အကောင်းဆုံး နည်းပြဆုကို နည်းပြ အန်ဇို မာရက်စကာနဲ့ အကောင်းဆုံးကစားသမားဆုကို ကွင်းလယ်တိုက်စစ်ကစားသမား ကိုးလ် ပါးမားတို့ အသီသီးရရှိထားနိုင်ခဲ့တာ ဖြစ်ပါတယ်။ ဒီနေ့ပွဲမှာတော့ အသင်းရဲ့ အားထားရတဲ့ ကစားသမား ကိုးလ် ပါးမား ခြေစွမ်းပြစေနိုင်ဖို့နဲ့အတူ တိုက်စစ်မှူး နီးကိုးလပ်စ် ဂျက်ဆင် အဆုံးသတ်သေချာစေဖို့ ဂရုပြုရမှာပဲဖြစ်ပါတယ်။ 

ပရီးမီးယားလိဂ် အကောင်းဆုံးခံစစ်၊ ပေးဂိုးအနည်းဆုံးအသင်းကို ချဲလ်ဆီးတို့ ကျော်ဖြတ်သွားနိုင်မလား၊ အန်ဖီးလ်ရဲ့ အရှိန်အဝါအောက်မှာ လီဗာပူးလ်တို့ ဆက်လက် တောက်ပနေဦးမလား။ နည်းပြ အာနဲ စလော့ နဲ့ အန်ဇို မာရက်စကာ ဘယ်သူက နည်းစနစ်ပိုကောင်းပြီး ပွဲကို အသာစီးရယူသွားနိုင်မလဲဆိုတာ ဒီနေ့ည မြန်မာစံတော်ချိန် ၁၀ နာရီမှာ ပရီးမီးယားလိဂ်ပွဲကောင်း ၁ ပွဲကို စောင့်ကြည့်ရမှာပါ။

လက်ရှိ ဇယားထိပ်မှာ ဦးဆောင်နေတဲ့ လီဗာပူးလ်ကတော့ ဒီပွဲပြီးရင် အာဆင်နယ်၊ ဘရိုက်တန်၊ အက်စ်တွန်ဗီလာ၊ နယူးကာဆယ်၊ တော့တင်ဟမ် စတဲ့အသင်းတွေနဲ့ ပရီးမီးယားလိဂ်ပွဲကြပ်တွေ ကစားရမှာဖြစ်ပါတယ်။

Photo – DStv. 

မြေလတ်အသံ၊ စက်တင်ဘာ ၁၊ ၂၀၂၄။

ပရီးမီးယားလိဂ်ရဲ့ အအောင်မြင်ဆုံးအသင်းတွေထဲက နှစ်သင်းဖြစ်တဲ့ မန်ချက်စတာယူနိုက်တက်နဲ့ လီဗာပူးလ်တို့ ပရီးမီးယားလိဂ်ပွဲစဉ် ၃ အဖြစ် ယနေ့ည ၉ နာရီ ၃၀ မိနစ်မှာ ယှဉ်ပြိုင်မှာဖြစ်ပါတယ်။

အစဉ်အလာအားဖြင့် မြို့ခံပြိုင်ဘက်ချင်းတွေ့ကြတဲ့ ဒါဘီပွဲတွေဖြစ်တဲ့ မန်ချက်စတာဒါဘီ၊ မာဆေးဆိုက်ဒါဘီတို့ထက် ပြိုင်ဆိုင်မှုပိုမိုပြင်းထန်ပြီး အင်္ဂလန်ဒါဘီလို့ တင်စားခံရတဲ့ ဒီနှစ်သင်းတွေ့ဆုံမှုကိုတော့ ယူနိုက်တက်တို့ရဲ့ အိမ်ကွင်း အိမ်မက်ပြဇာတ်ရုံ အိုထရက်ဖို့ဒ်မှာ ယှဉ်ပြိုင်သွားမှာပါ။

ရာသီသစ်မှာ အနိုင်နဲ့စတင်ခဲ့ပေမယ့် ပွဲစဉ် ၂ မှာ ဘရိုက်တန်ကို ရှုံးနိမ့်ခဲ့ပြီး ခြေစွမ်းမတည်ငြိမ်သေးတဲ့ ယူနိုက်တက်တို့အတွက် ဒါဟာ ခက်ခဲတဲ့ ပွဲစဉ်တခု ဖြစ်လာမှာပါ။ ယူနိုက်တက်ရဲ့ အဓိက လိုအပ်ချက်ဖြစ်တဲ့ နောက်တန်းနဲ့ ကွင်းလယ်ပိုင်းကို အားဖြည့်ခေါ်ယူမှုအဖြစ် ဒီလစ်၊​ မာဇရာဝီနဲ့ ပီအက်စ်ဂျီကွင်းလယ်လူ အူဂါတေးတို့ကို ခေါ်ယူအားဖြည့်ထားနိုင်ခဲ့သလို ဟွိုက်လန်းဒဏ်ရာရနေပေမယ့် တိုက်စစ်မှူးအသစ် ဂျော့ရှူဝါ ဇာ့ခ်ဇီးကလည်း ပထမဆုံးပွဲမှာတင် ပထမဆုံးအနိုင်ဂိုးကို သွင်းယူပေးထားနိုင်ခဲ့တာဖြစ်လို့ ယူနိုက်တက်အသင်းအနေနဲ့လည်း ဒီပွဲအတွက် လူအင်အားအရတော့ တောင့်တင်းတဲ့အခြေအနေမှာရှိနေပါတယ်။ 

လီဗာပူးလ်အသင်းအနေနဲ့ နည်းပြသစ် အာနဲဆလော့ လက်ထပ်မှာ ဘယ်လိုဖြစ်လာမလဲဆိုပြီး ပူပန်မှုတွေ ရှိခဲ့ကြပေမယ့် ဒီရာသီအတွက် ၂ ပွဲကစားထားပြီး ၂ ပွဲလုံး နိုင်ပွဲဖော်ဆောင်ထားခဲ့လို့ နည်းပြအသစ် မူလလက်ဟောင်း လီဗာပူးလ်အဖြစ် ရှိနေဆဲလို့ ပြောလို့ရနိုင်ပါတယ်။ ရစ်သမ်မိနေတဲ့ ကြိုးကြာတို့ကတော့ မနေ့ညက သရေရလဒ်ဖြစ်ခဲ့တဲ့ အာဆင်နယ်နဲ့ဘရိုက်တန်တို့ကြောင့် ဒီနေ့အနိုင်ရယူနိုင်ခဲ့ရင် အမှတ်ပေးဇယားထိပ်ပိုင်းကို တက်လှမ်းနိုင်မှာဖြစ်ပါတယ်။ အသစ်ခေါ်ယူထားတဲ့ ဂျူဗင်တပ် တိုက်စစ်ကစားသမား ခီယေဆာကတော့ ကြံ့ခိုင်မှုမပြည့်ဝသေးတာကြောင့် ပါဝင်နိုင်ဦးမှာမဟုတ်ပေမယ့် ဂျိုတာ၊ ဒီယက်ဇ်၊ ဆာလတ်တို့ရဲ့ ခြေစွမ်းကောင်းပြသနိုင်မှုကြောင့် အဝေးကွင်းနိုင်ပွဲရအောင် စွမ်းဆောင်နိုင်မလား ကြည့်ရမှာပါ။

ပရီးမီးယားလိဂ် ပွဲစဉ် ၃ အထိ နိုင်ပွဲဖော်ဆောင်ထားနိုင်ခဲ့တဲ့ မန်စီးတီးအသင်းဟာ တိုက်စစ်မှူးဟာလန်း ဟက်ထရစ် ၂ ကြိမ် ရရှိခဲ့ခြင်းနဲ့အတူ ချန်ပီယံခြေစွမ်းကို ဆက်လက်ပြသနေဆဲဖြစ်ပြီး ပြီးခဲ့တဲ့နှစ်က အဓိကပြိုင်ဘက် အာဆင်နယ်ဟာ ပွဲစဉ် ၃ မှာတင် စတင် အမှတ်လျော့နေပြီဖြစ်သလို ပွဲကြပ် ရင်ဆိုင်ရမယ့် လီဗာပူးလ်ကလည်း ရုန်းကန်ရဦးမယ့် အခြေအနေပါ။ ဒီပွဲမှာသာ လီဗာပူးလ်တို့ အမှတ်လျော့ခဲ့ရင် ရာသီအစမှာတင် မန်စီးတီးတို့ ဖိအားကင်းကင်းနဲ့ စတင်ဖြတ်သန်းရတော့မှာဖြစ်ပါတယ်။

အင်္ဂလန်ဒါဘီပွဲကောင်းတပွဲဖြစ်တဲ့ ယူနိုက်တက်နဲ့ လီဗာပူးလ်တို့ရဲ့ ထိပ်တိုက်တွေ့ဆုံမှုကိုတော့ ယနေ့ တနင်္ဂနွေည ၉ နာရီ ၃၀ မိနစ်၊​ ယူနိုက်တက်အိမ်ကွင်း အိုးထရက်ဖို့ဒ်မှာ ရင်ဆိုင်သွားရမှာဖြစ်ပြီး ကွင်းလယ်ဒိုင်အဖြစ် အန်တိုနီတေလာ က တာဝန်ယူကိုင်တွယ်သွားမှာဖြစ်ပါတယ်။

ဓါတ်ပုံ – MUSC Kerala (Twitter)။