မြေလတ်အသံ၊ ဇွန် ၁၁၊ ၂၀၂၅။

စစ်ကိုင်းတိုင်း၊ ဝန်းသိုနဲ့ ကောလင်းမြို့နယ်တို့ကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ၅ ဦးဒဏ်ရာရရှိခဲ့တယ်လို့ ဒေသခံတွေက ပြောပါတယ်။

ဇွန် ၁၀ ရက်ည ၉ နာရီကျော်မှာ ဝန်းသိုမြို့နယ်၊ ကံကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ရော့ကတ် ၁၀ လုံးပစ်ခတ်ခဲ့ရာ အသက် ၁၅ နှစ်အရွယ် မကြယ်ဇင်လင်း သေဆုံးပြီး ၁၀ နှစ်အရွယ်ယောက်ျားလေးနဲ့ ၄၀ အရွယ်အမျိုးသားတို့ ဒဏ်ရာရရှိခဲ့တာလို့ဆိုပါတယ်။

“ဒဏ်ရာရသူ ၂ ယောက်က မကြယ်ဇင်လင်းရဲ့ အဖေနဲ့မောင်ပါ။ ရော့ကတ်ကျည်က သူတို့အိမ်ကို ကျသွားတာ။ အဖေဖြစ်သူကတော့ ဒဏ်ရာပြင်းတယ်။”လို့ ဝန်းသိုဒေသခံ အမျိုးသားတဦးက ပြောပါတယ်။

ကံကုန်းကျေးရွာဟာ အိမ်ခြေ ၅၀ ခန့်ရှိတဲ့ ကျေးရွာ ၁ ရွာဖြစ်ပြီး ဝန်းသို၊ ကောလင်း၊ ထီးချိုင့် စတဲ့မြို့နယ် ၃ မြို့နယ်ရဲ့နယ်စပ်မှာတည်ရှိတာပါ။

အလားတူ ဇွန် ၉ ရက်ည ၉ နာရီကျော်မှာလည်း ကောလင်းမြို့နယ်၊ ဖလဲကျေးရွာကို စစ်ကောင်စီရဲ့ တိုက်ခိုက်ရေးလေယာဉ် ၁ စီးနဲ့ ပေါင် ၃၀၀ ဗုံး ၂ လုံးကြဲချခဲ့ရာ အသက် ၃၀ နဲ့ ၄၀ အရွယ်အမျိုးသမီး ၂ ဦး၊ အမျိုးသား ၁ ဦးတို့ ဒဏ်ရာရရှိခဲ့တယ်လို့ သူကဆက်ပြောပါတယ်။

ဗုံးကြဲခံရမှုကြောင့် အိမ်ခြေ ၁၀၀ ကျော်ရှိတဲ့ ဖလဲကျေးရွာမှာ လူနေအိမ် ၆ လုံးပျက်စီးခဲ့ပြီး အဲဒီထဲက ၃ လုံးမှာ လုံးဝပြိုကျပျက်စီးခဲ့တယ်လို့ သိရပါတယ်။

စစ်ကောင်စီတပ်က ကံကုန်းနဲ့ ဖလဲကျေးရွာတို့ကို လေကြောင်းကနေဗုံးကြဲတိုက်ခိုက်တဲ့နေ့တွေမှာ တိုက်ပွဲဖြစ်ပွားတာမရှိခဲ့ဘူးလို့လည်း ဒေသခံတွေကပြောပါတယ်။

ပြီးခဲ့တဲ့ဇွန် ၇ ရက်ကလည်း NUG ထိန်းချုပ်နယ်မြေ ထီးချိုင့်မြို့နယ်က ပေါက်ကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ပေါင် ၅၀၀ ဗုံး ၁ လုံးကြဲချခဲ့တာကြောင့် အသက် ၄၀ အရွယ်အမျိုးသမီး သေဆုံးခဲ့ပါသေးတယ်။

၂၀၂၁ စစ်အာဏသိမ်းချိန်ကနေ ၂၀၂၅ ဇွန် ၁၀ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့ပြည်သူစုစုပေါင်း ၆၇,၉၃ ဦးရှိခဲ့တယ်လို့ နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP ရဲ့အစီရင်ခံစာအရ သိရပါတယ်။

စာတည်း – လင်း

ဝန်းသို၊ ဧပြီ ၉၊ ၂၀၂၅။

စစ်ကိုင်းတိုင်း၊ ဝန်းသိုမြို့နယ်၊ နမ်းခမ်းကျေးရွာကို စစ်ကောင်စီတပ်က ဧပြီ ၉ ရက် နေ့လယ် ၂ နာရီကျော်ကစပြီး လေကြောင်းကနေ ဗုံးကြဲတိုက်ခိုက်ခဲ့တာကြောင့် ကလေးငယ်တွေအပါအဝင် လူအစုလိုက်အပြုံလိုက် သေဆုံးခဲ့တယ်လို့ ဒေသခံတွေက ပြောပါတယ်။

အိမ်ခြေ ၂,၀၀၀ ကျော်ရှိတဲ့ နမ်းခမ်းကျေးရွာရဲ့စာသင်ကျောင်း၊ ဆေးရုံ၊ ကျွန်းခင်းစတဲ့ နေရာအနီးတဝိုက်တွေကို တိုက်ပွဲမဖြစ်ဘဲ တိုက်ခိုက်ရေးလေယာဉ် ၂ စီးနဲ့ ပေါင် ၅၀၀ ဗုံးသီး ၁၂ လုံးကြဲချခဲ့တာလို့ ဆိုပါတယ်။

“သေဆုံးတဲ့သူအရေအတွက်က သတင်းတွေမှာတော့ ၃၀ ကျော်လို့ပြောထားပေမယ့် တကယ်တမ်းကျတော့ သေဆုံးသူက ၅၀ ကျော် ၁၀၀ နီးပါရှိတယ်။ အခုထက်ထိ အလောင်းမကောက်ရသေးတာတွေလည်း ရှိတယ်။ တချို့ဆို မိသားစုလိုက်တွေရော အများကြီးရှိပါတယ်။”လို့ ဝန်သိုမြို့နယ်ဒေသခံ အမျိုးသမီးတဦးက ပြောပါတယ်။

စစ်ကောင်စီတပ်က ဗုံးကြဲခဲ့တဲ့အချိန်မှာ နမ်းခမ်းကျေးရွာဒေသခံတွေဟာ ကျေးရွာရှိ အောင်ဇာနည်ကုန်းတံတားဖွင့်ပွဲကို အများစုရောက်ရှိနေကြတာကြောင့် သေဆုံး၊ ဒဏ်ရာသူများပြားခဲ့တာလို့ ဆိုပါတယ်။

အဲ့ဒီနောက် ၆ နာရီကျော်မှာလည်း နမ်းခမ်းကျေးရွာကို တိုက်ခိုက်ရေးလေယာဉ် ၁ စီးနဲ့ ဗုံးကြဲတိုက်ခိုက်ခဲ့ပြီး ဒီတိုက်ခိုက်မှုမှာတော့ အထိအခိုက်မရှိခဲ့ဘူးလို့ အထက်ပါအမျိုးသမီးက ဆက်ပြောပါတယ်။

ဒါ့အပြင် ဒီဖြစ်စဉ်နဲ့ပတ်သက်ပြီး Kawlin info တာ၀န်ရှိသူကလည်း နမ်းခမ်းရွာ လေကြောင်းတိုက်ခိုက်မှုမှာ သေဆုံးသူများပြီး လက်ရှိဒေသခံတွေလည်း လေကြောင်းရန်ကနေ တိမ်းရှောင်နေကြတယ်လို့ ပြောပါတယ်။

လက်ရှိအချိန်ထိ အလောင်းတွေကိုရှာဖွေနေကြဆဲဖြစ်ပြီး သေဆုံးသူက ရာဂဏန်းနီးပါး လောက်ရှိနိုင်တယ်လို့ ခန့်မှန်းထားပေမယ့် မြေလတ်အသံက သီးခြားအတည်မပြုနိုင်သေးပါဘူး။

စာတည်း – လင်း