မကွေး၊ အောက်တိုဘာ ၂၅၊ ၂၀၂၅။

မကွေးတိုင်း၊ ပခုက္ကူမြို့နယ်၊ ထန်းတပင်ကျေးရွာကို စစ်ကော်မရှင်တပ်က ပါရာမော်တာနဲ့ ဗုံးကြဲ ပစ်ခတ်ခဲ့တာကြောင့် ပြည်သူ ၂ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

အောက်တိုဘာ ၂၄ ရက်ည ၁၀ နာရီဝန်းကျင်မှာ ပါရာမော်တာ ၃ စီးနဲ့ ထန်းတပင်ရွာကို ဗုံး ၂ လုံးကြဲချပြီး စက်သေနတ်တွေနဲ့ပစ်ခတ်ခဲ့တာကြောင့် အသက် ၅၀ အရွယ်အမျိုးသမီး ၁ ဦးနဲ့ အမျိုးသား ၁ ဦး သေဆုံးပြီး အမျိုးသမီး ၂ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“စစ်ကြောင်းကတော့လှုပ်ရှားမှုမရှိဘူး။ ရှောင်သူတွေများလို့ အဲ့လောက်ပဲသေတာ။ အစတွေ မှန်ပြီးသေကြတာ။ စက်လတ်နဲ့ရောပစ်တယ်။ တချို့ကျတော့ရုတ်တရက်ဆို ရှောင်ရခက်တယ်” လို့ ဒေသခံတဦးကပြောပါတယ်။

ပခုက္ကူမြို့နယ်အတွင်း ပခုက္ကူအခြေစိုက် တပ်မ ၁၀၁ မှစစ်ကော်မရှင်တပ်တွေကလည်း စစ်ကြောင်း ထိုးနေတာကြောင့် အိမ်ခြေ ၂၀၀ ခန့်ရှိထန်းတပင်ရွာက ဒေသခံတွေတိမ်းရှောင်ခဲ့ရပြီး အခုထိခိုက်သူတွေဟာ မတိမ်းရှောင်နိုင်ပဲ ကျန်ခဲ့သူတွေဖြစ်တယ်လို့ ဆိုပါတယ်။

အဆိုပါစစ်ကြောင်းဟာ အင်အား ၂၀၀ ခန့်နဲ့ ညောင်ဂျစ်ပင်ရွာမှာအထိုင်ချပြီးနောက် အောက်တိုဘာ ၂၅ ရက်ဒီမနက်ပိုင်းမှာ ပခုက္ကူမြို့နယ်အနောက်ဘက်ကို စစ်ကြောင်းထိုးနေတယ်လို့ သိရပါတယ်။

စစ်ကြောင်းကြောင့် ထန်းတပင်ကျေးရွာ အပါအဝင် ရေလာကြီး၊ ဝါးကျွန်းကွင်း၊ ဖောင်းကွဲ၊ ဖောင်းကျောင်း၊ ရေမျက်၊ ရွာသာအေး၊ ပြည့်အိုင်၊ ချောင်းဦးတိုစတဲ့ကျေးရွာကဒေသခံတွေလည်း ထွက်ပြေးတိမ်းရှောင်နေကြရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ အောက်တိုဘာ ၂၄ အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ပြည်သူစုစုပေါင် ၇,၄၀၅
ဦးရှိတယ်လို့ နိုင်ငံရေးအကျဥ်းသားများကူညီစောင့်ရှောက်ရေးသင်း – AAPP က ထုတ်ပြန်ပါတယ်။

စာတည်း – လင်း

ပေါက်ခေါင်း၊ အောက်တိုဘာ ၂၄၊ ၂၀၂၅။

ပဲခူးတိုင်း၊ ပေါက်ခေါင်းမြို့နယ်၊ စမ်းမကြီးကျေးရွာကို စစ်ကော်မရှင်တပ်တွေပစ်ခတ်တဲ့ လက်နက်ကြီး ကျရောက်ပေါက်ကွဲပြီး အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၂၃ ရက်မနက် ၈ နာရီကျော်မှာ အောင်လံမြို့နယ်၊ ရွှေပန်းတောရဲစခန်းအထိုင်ချ စစ်ကော်မရှင်တပ်ဖွဲ့ဝင်တွေက လက်နက်ကြီး အလုံး ၂၀ ကျော်ပစ်ခတ်ခဲ့ရာ စမ်းမကြီးကျေးရွာထဲကို ၁ လုံးကျရောက်ပေါက်ကွဲခဲ့ချိန် ခုလိုထိခိုက်ခဲ့တာလို့ဆိုပါတယ်။

“လက်နက်ကြီးကျည်တွေက စမ်းမကြီးရွာထဲကိုလဲ ကျတယ်။ ရွာအနီးနားကိုလည်းကျတယ်။ တချို့ကပြေးကြတယ်။ တချို့ကျ ဗုံးခိုကျင်းထဲဝင်နေကြတယ်။ သူကတော့ တောထဲကပြန်လာပြီး အိမ်အရောက် ခြေထောက်ဆေးနေချိန် ဖြစ်သွားတာလို့သိရတယ်။ သူ့မှာကလေးနှစ်ယောက်လည်း ရှိတယ်”လို့ ဒေသခံတဦးကပြောပါတယ်။

လက်နက်ကြီးထိမှန်ပြီး အသက် ၄၅ နှစ်အရွယ် မနွဲ့ကြည် ရဲ့ပေါင်ကို လက်နက်ကြီးထိမှန်ပြီး သွေးထွက်လွန်ကာ သေဆုံးသွားတယ်လို့ ဆိုပါတယ်။

စစ်ကော်မရှင်ဘက်က ပစ်ခတ်နေတာကြောင့် ရွာခံအချို့က ဘေးလွတ်ရာထွက်ပြေးနေကြရပြီး အချို့ကတော့ ပဲသိမ်းချိန်ဖြစ်နေတာကြောင့် မပြေးကြဘဲ ကျေးရွာအတွင်း ကတုတ်ကျင်းတွေထဲမှာ ပုန်းခိုနေကြရတယ်လို့ သိရပါတယ်။

အဲ့ဒီနေ့ည ၇ နာရီခန့်မှာ ရွှေပန်းတောကျေးရွာ စစ်ကော်မရှင်စခန်းကနေ လက်နက်ကြီး ၃ လုံး ပေါက်ခေါင်းမြို့နယ်ဘက်ကို ထပ်မံပစ်ခတ်ခဲ့ရာ ဗြန်ဒီကျေးရွာအနီး ကျရောက်ပေါက်ကွဲခဲ့ပေမယ့် ထိခိုက်ပျက်စီးမရှိခဲ့ဘူးလို့ ဆိုပါတယ်။

ဩဂုတ် ၁၅ ရက်ကလည်း ပေါက်ခေါင်းမြို့နယ်၊ ကြိမ်ချောင်းကျေးရွာကို ပါရာမိုတာနဲ့ဗုံး ၄ လုံးကြဲချခံရလို့ မိန်းကလေးငယ် ၁ ဦးအပါအဝင် ၆ ဦးသေဆုံးပြီး ၁၁ ဦးဒဏ်ရာရခဲ့တယ်လို့ သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ အောက်တိုဘာ ၂၃ အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့တဲ့ပြည်သူစုစုပေါင်း ၇,၃၉၉ ဦးရှိတယ်လို့ နိုင်ငံရေးအကျဥ်းသားများကူညီစောင့်ရှောက်ရေးသင်း – AAPP က ထုတ်ပြန်ပါတယ်။

စာတည်း – လင်း

သပိတ်ကျင်း၊ အောက်တိုဘာ ၂၂၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ဇရပ်ကွင်းကျေးရွာ စျေးတံတားထိပ်အနီးမှာ စစ်ကော်မရှင်တပ်က ဒရုန်းနဲ့ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် ၂ ဦးသေဆုံးပြီး ၃ ဦးဒဏ်ရာရတယ်လို့ ဖြစ်စဥ်ကိုသိရှိတဲ့ဒေသခံတဦးဆီက သိရပါတယ်။

အောက်တိုဘာ ၂၁ ရက်ညနေ ၆ နာရီခန့်မှာ စစ်ကော်မရှင်စစ်ကြောင်းကလွှတ်လိုက်တဲ့ ဒရုန်းက ‘ငွေလမင်း’ထမင်းဆိုင်အနီးကို ဗုံး ၁ လုံးကြဲချခဲ့တယ်လို့ ဆိုပါတယ်။

” **ကြောင်းနဲ့နီးနေတော့ စကစဒရုန်းနဲ့လာချတာ။ ဇရပ်ကွင်းဆိုတာက နဂိုကတည်းကနာမည်ကြီး။ ရွှေတောဆိုတော့ ထမင်းဆိုင်စားသောက်ဆိုင် လူစည်ကားတဲ့နေရာပါ “လို့ ဒေသခံတဦးကပြောပါတယ်။

ဗုံးပေါက်ကွဲစထိမှန်တာကြောင့် အသက် ၂ နှစ်အရွယ် ကလေးငယ် ၁ ဦး၊ အသက် ၄၀ ဝန်းကျင် အမျိုးသမီး ၁ ဦးပွဲချင်းပြီးသေဆုံးပြီး အသက် ၃၀ ကနေ ၆၀ ကြားအမျိုးသား ၃ ဦး ထိခိုက်ဒဏ်ရာပြင်းထန်ရရှိသွားပြီး နီးစပ်ရာဆေးခန်းမှာ ဆေးကုသနေရတယ်လို့ ဆိုပါတယ်။

လက်ရှိမှာလည်း မိုးကုတ်ဘက်ကို ဦးတည်စစ်ကြောင်းထိုးနေတဲ့ စစ်ကော်မရှင်အဖွဲ့ဟာ ဇရပ်ကွင်းကျေးရွာအနီးထိရောက်ရှိနေတယ်လို့ အထက်ပါဒေသခံက ပြောပါတယ်။

စက်တင်ဘာ ၉ ရက်ကလည်း သပိတ်ကျင်းမြို့နယ်၊ ဇရပ်ကွင်းကျေးရွာစာသင်ကျောင်းကို စစ်ကော်မရှင်ဘက်က လေကြောင်းကနေ ဗုံးကြဲခဲ့ရာ စာသင်ကျောင်းပျက်စီးခဲ့ပြီး လူထိခိုက်တာ မရှိခဲ့ဘူးလို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၂၁၊ ၂၀၂၅။

မန္တလေးတိုင်း၊ မိုးကုတ်မြို့ရှိ ဖူဆယ်ဘောလုံးကွင်းကို စစ်ကောင်စီတပ်က အောက်တိုဘာ ၂၁ ရက်နေ့လည် ၃ နာရီခန့်မှာ ဗုံးကြဲတိုက်ခိုက်ခဲ့တာကြောင့် အမျိုးသား ၃ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

မိုးကုတ်မြို့အရှေ့ပိုင်း ကန်တော်ရပ် ဘုရားငါးဆူအနီးရှိ ဖူဆယ်ဘောလုံးကွင်းကို ဗုံးသီး ၂ လုံးကြဲချခဲ့တာကြောင့် အသက် ၂၀ ဝန်းကျင်ရှိတဲ့ အမျိုးသား ၃ ဦးသေဆုံးခဲ့တာလို့ဆိုပါတယ်။

“အသေးစိတ်အချက်အလက်တွေကိုတော့ မသိရသေးဘူး။ ရှာ‌ဖွေကယ်ဆယ်ရေးတွေ ဦးစားပေးလုပ်နေကြရတယ်”လို့ မိုးကုတ်မြို့ခံ အမျိုးသားတဦးက ပြောပါတယ်။

သေဆုံးသူ အမျိုးသား ၃ ဦးနဲ့ပတ်သက်ပြီး အသေးစိတ်အချက်အလက်တွေကို မြေလတ်အသံက စုံစမ်းနေဆဲဖြစ်ပါတယ်။

ပြီးခဲ့တဲ့အောက်တိုဘာ ၁၉ ရက်နေ့လည် ၂ နာရီကျော်အချိန်ကလည်း မိုးကုတ်မြို့ အနောက်ပိုင်းရှိ ကျောက်ဖားကျေးရွာရှိ ကြက်မွေးမြူရေးခြံကို စစ်ကော်မရှင်တပ်က ပေါင် ၂၅၀ ဗုံးသီး ၁ လုံးကြဲချခဲ့တာကြောင့် ခြံပျက်စီးပြီး ကြက်တွေသေဆုံးခဲ့တယ်လို့ သိရပါတယ်။

ဆားလင်းကြီး၊ အောက်တိုဘာ ၂၁၊ ၂၀၂၅ ။

စစ်ကိုင်းတိုင်း၊ ဆားလင်းကြီးမြို့နယ်၊ ထန်းပုကျေးရွာကို စစ်ကော်မရှင်တပ်ကလေကြောင်းကနေ ဗုံးကြဲတိုက်ခိုက်ခဲ့တာကြောင့် ပြည်သူ ၂ ဦးသေဆုံးပြီး ၁ ဦးဒဏ်ရာရခဲ့တယ်လို့ ဒေသကာကွယ်ရေးအဖွဲ့တာဝန်ရှိသူတွေထံက သိရပါတယ်။

အောက်တိုဘာ ၂၀ ရက် ယမန်နေ့ ညနေ ၅ နာရီခန့်မှာ မုံရွာ၊ အနောက်မြောက်တိုင်းစစ်ဌာနချုပ် (နမခ) ကနေလာတဲ့ စက်တပ်လေထီး ၂ စီးဟာ ထန်းပုကျေးရွာဝန်းကျင်ကို ဗုံး ၃ လုံးကြဲချခဲ့ရာ ကျေးရွာအတွင်း နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

” ပါရာမိုတာနဲ့ချတယ်။ ဂျိုင်ရိုကော်ပတာနဲ့ ချတယ်။ မအူကနေဟောင်ဝစ်ဇာပစ်တယ်။ မအူ(ရွာ)ကနေ လက်နက်ကြီးတွေက ဆက်တိုက်ပစ်နေတာ။ မနေ့ကတုန်းက အကြောင်းမဲ့စစ်ရှောင်နေတဲ့နေရာကိုချတာ”လို့ ဒေသကာကွယ်ရေးအဖွဲ့တာဝန်ရှိသူတဦးက မြေလတ်အသံကို ပြောပါတယ်။

ဗုံးထိမှန်တာကြောင့် ဆားလင်းကြီးမြောက်ဘက်ကျေးရွာတွေကနေ ထန်းပုရွာကို စစ်လာရှောင်နေတဲ့ အသက် ၂၂ နှစ်ဝန်းကျင် လင်မယား ၂ ဦးသေဆုံးခဲ့ပြီး အသက် ၅၀ ကျော်အရွယ် အမျိုးသား ၁ ဦးခြေထောက် ၂ ဖက်လုံးပြတ်တောက်ဒဏ်ရာရခဲ့တယ်လို့ သိရပါတယ်။

စစ်ကော်မရှင်တပ်က အောက်တိုဘာ ၁၈ ရက်ကစတင်ကာ ဆားလင်းကြီးမြို့နယ်၊ ဖောင်းတကာရွာနဲ့ ဝမ်ပေါင်ကြေးနီထုတ်စက်ရုံအနီးဝန်းကျင်ကျေးရွာတွေကို အင်အား ၂၀၀ ကျော်နဲ့စစ်ကြောင်းထိုးလာလို့ ဒေသတွင်းမှာ အောက်တိုဘာ ၂၀ ရက် ယမန်နေ့အထိ တိုက်ပွဲတွေဖြစ်ပွားနေတာပါ။

စစ်ကော်မရှင်ဘက်က စစ်ကြောင်းထိုးနေပေမယ့် ရှေ့ဆက်မတိုးနိုင်တာကြောင့် လေကြောင်းပစ်ကူ၊ လက်နက်ကြီးပစ်ကူယူပြီး နေ့စဉ်ပစ်ခတ်နေတာလို့ ဆိုပါတယ်။

စစ်ကြောင်းထိုးတာနဲ့ လေကြောင်း၊ လက်နက်ကြီးပစ်ခတ်နေတာတွေကြောင့် ရွှေလှေ၊ လက်ပံတောင်း၊ တောကျောင်း၊ တုံရွာ၊ လယ်တီနဲ့ ဆည်တည်း၊ ဖောင်းတကာ၊ ထန်းပု၊ အလယ်တော၊ အလယ်ရွာ၊ တုံရွာသစ်၊ တုံရွာမ၊ ဝဲကြီး၊ ဝဲကွဲကျေးရွာတွေအပါ ရွာပေါင်း ၂၀ ခန့်က ဒေသခံ ၁၅,၀၀၀ ကျော် ဘေးလွတ်ရာကို ထွက်ပြေးတိမ်းရှောင်နေကြရတာလည်း ဖြစ်ပါတယ်။

စာတည်း – ဟိန်းစံ

နွားထိုးကြီး၊ အောက်တိုဘာ ၂၀၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ ပဲချက်ကျေးရွာကို စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် ပြည်သူ ၄ ဦးသေဆုံးပြီး ၂ ဦးဒဏ်ရာရခဲ့တယ်လို့ နွားထိုးကြီးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

အောက်တိုဘာ ၁၉ ရက်မနက် ၆ နာရီခန့်မှာ မိတ္ထီလာလေတပ်ဘက်ကလာတဲ့ စက်တပ်လေထီး ၃ စီးဟာ ပဲချက်ရွာထဲကို ဗုံး ၅ လုံးကြဲချတိုက်ခိုက်ခဲ့တယ်လို့ ဆိုပါတယ်။

“ရွာထဲ ကျတာပါဗျ။ စစ်ရေးပစ်မှတ်မဟုတ်တဲ့ နေရာတွေကို စကစ အနေနဲ့ ရည်ရွယ်ချက်ရှိရှိ ပြည်သူကို ဦးတည်တိုက်ခိုက်တာပါ။ ထိတဲ့သူတွေက အိပ်နေကြတာပါဗျ။ အိမ်ပေါ်တည့်တည့် ကျတာ။”လို့ နွားထိုးကြီး ပကဖပြန်ကြားရေးတာဝန်ခံကပြောပါတယ်။

ဗုံးစထိမှန်ပြီး တအိမ်တည်းနေ အသက် ၅၅ နှစ်အရွယ် ဦးကျော်နိုင် နဲ့ ဇနီးဖြစ်သူ ဒေါ်ခင်သန်းနု၊ အသက် ၅၇ နှစ်အရွယ် ဦးခင်မောင်ဝင်း၊ အသက် ၉၁ နှစ်အရွယ် ဒေါ်ခင်တင့်တို့ ၄ ဦးဟာ နေရာမှာပင်သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၀ နှစ်အရွယ် မဂျူဂျူးကို၊ အသက် ၄၅ နှစ်အရွယ် ဒေါ်ရွှေဝါထွန်းတို့ ဒဏ်ရာရပြီး နေအိမ် ၆ လုံးလည်းပျက်စီးသွားတယ်လို့ သိရပါတယ်။

ခုလိုဗုံးကြဲလို့ အိမ်ခြေ ၁,၀၀၀ ကျော်ရှိတဲ့ ပဲချက်ရွာက ပြည်သူအများစုက ဘေးလွတ်ရာကို တိမ်းရှောင်ခဲ့ရပြီး အနည်းစုလောက်ကရွာထဲမှာပဲ ဆက်လက်နေထိုင်နေကြတယ်လို့ ဆိုပါတယ်။

အောက်တိုဘာ ၁၇ ရက်ကလည်း နွားထိုးကြီးမြို့နယ်၊ ဘုရားကြီးကျေးရွာမှာ လက်နက်ကြီးထိမှန်လို့ နေအိမ်ထဲအိပ်နေတဲ့ သက်ကြီးမောင်နှမ ၂ ဦးသေဆုံးခဲ့တယ် သိရပါတယ်။

စာတည်း – လင်း

တောင်ငူ၊ အောက်တိုဘာ ၁၉၊ ၂၀၂၅။

ပဲခူးတိုင်း၊ တောင်ငူမြို့နယ်၊ ထီးလှိုင်ရပ်ကွက် ၉၊ စံပယ်ခြံအနီးက ရေကန်ထဲမှာ ငါးပိုက်ထောင်သွားတဲ့ အမျိုးသား ပျောက်ဆုံးနေရာမှ ရေနစ်သေဆုံးလျက်ပြန်တွေ့တယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

သေဆုံးသူဟာ ဒိုးအင်းကျေးရွာဘက်ကနေ တောင်ငူမြို့ပေါ်မှာ စစ်ဘေးလာရှောင်နေတဲ့ အသက် ၅၀ ကျော်အရွယ် အမျိုးသားဖြစ်ပြီး သူ့အလောင်းကိုတော့ အောက်တိုဘာ ၁၈ ရက်နေ့လယ်ပိုင်းမှာ ရေနစ်သေဆုံးနေတာကို မိသားစုဝင်တွေက ပြန်တွေ့ကြတယ်လို့ ဆိုပါတယ်။

” သူကိုပြန်တွေ့တဲ့အချိန်မှာ လက်ထဲမှာလည်းငါးတွေနဲ့ လက်ကလည်း ပိုက်နဲ့ငြိနေသေးတယ်။ အရက်လည်းသောက်တတ်တယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

အဆိုပါ အမျိုးသားဟာ အောက်တိုဘာ ၁၇ ရက်ညပိုင်းကတည်းက ငါးပိုက်ထောင်သွားမယ်ဆိုပြီး နေအိမ်ကနေထွက်ခွာသွားရာ နေအိမ်ကိုပြန်မလာဘဲ ပျောက်ဆုံးနေခဲ့တာဖြစ်ပြီး အလောင်းကိုတော့ ဒေသခံလူမှုကူညီရေးအသင်းအဖွဲ့တွေကဆယ်ယူပြီး တောင်ငူဆေးရုံကိုပို့ဆောင်ပေးထားရတယ်လို့ သိရပါတယ်။

မေ ၅ ရက်ကလည်း တောင်ငူမြို့နယ်၊ ပွတ်စုကျေးရွာအနီး ခပေါင်းချောင်းအတွင်းမှာ ရေဆင်းကူးတဲ့ လူငယ် ၂ ဦး ရေနစ်သေဆုံးသွားသေးတယ်လို့ သိရပါတယ်။

စာတည်း – လင်း