သေဆုံး

မြေလတ်အသံ၊ ဒီဇင်ဘာ ၂၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်ရှိ စစ်ကော်မရှင်တပ်စခန်းတခုကို ဝင်ရောက် တိုက်ခိုက်ခဲ့ရာ ၅ ဦးသေဆုံးပြီး သေနတ် ၂ လက်သိမ်းဆည်းရရှိခဲ့တယ်လို့ ပဲခူးရိုးမ PDF ဗျူဟာ-၂၂ က ပြောပါတယ်။

လိပ်ဥကုန်းလမ်း၊ မဒေါ့၊ သရက်ကုန်း၊ ပြည်တော်သာအာရှလမ်းမရဲ့ လမ်းဆုံရှိ ကျောက်တွင်းရွာမှာ အင်အား ၂၀ ဝန်းကျင်အထိုင်ချထားတဲ့ စစ်ကော်မရှင်ဂိတ်စခန်းကို ဗျူဟာ – ၂၂ ကွပ်ကဲမှုအောက်ရှိ အမှတ်-၃၈၀၂ တပ်ရင်း တပ်ခွဲ ၂၊ ရွှေတန်းမြေ-ပကဖ၊ လက်ပံတန်းမြို့နယ်-ပကဖအထူးတိုက်ခိုက်ရေး အဖွဲ့တို့က နိုဝင်ဘာ ၃၀ ရက်မနက်ပိုင်းမှာတိုက်ခိုက်ခဲ့တာပါ။

“စခန်းမှာ ရန်သူက ၁၀‌ ယောက်၊ ၁၅ ယောက်ဝန်းကျင်ရှိပါတယ်။ တခြားလက်နက်တွေက ရန်သူက ပြန်ဆွဲပြီး ပြေးကြတာပေါ့။ တိုက်ပွဲ ကြာချိန်က ခန့်မှန်း နာရီဝတ် ၁ နာရီနီးပါးကြာမြင့်ပါတယ်” လို့ ပဲခူးရိုးမ PDF- ဗျူဟာ၂၂ တာဝန်ခံက ပြောပါတယ်။

တိုက်ပွဲအတွင်း စစ်ကော်မရှင်တပ်သားအလောင်း ၅ လောင်း၊ ကာဘိုင် ၁ လက်၊ MA-1 ၁ လက်၊ 5.56 ကျည် ၁၅၀ တောင့်နဲ့ မိုဘိုင်းဖုန်း ၂ လုံးတို့ကို သိမ်းဆည်းရရှိခဲ့ပြီး တော်လှန်ရေးပူးပေါင်းတပ်ဖွဲ့တွေဘက်ကတော့ ထိခိုက်မှုမရှိခဲ့ဘူးလို့ သာယာဝတီခရိုင် တပ်ရင်း (၃၈ဝ၂) တပ်ခွဲ ၂ တာဝန်ရှိသူက ပြောပါတယ်။

“ဂိတ်စခန်းမှာတော့ အင်အားက ၂၀ ကျော် ၃၀ လောက်ရှိမယ်ဗျ။ မနက်စောစောစီးစီး ဆိုတော့ ပြန့်ကျဲနေတာပေါ့။ ကျနော်တို့လည်း ဝင်ရောက်စီးနင်းတဲ့အချိန်ကျရော အကုန်ပြေးကြတာပေါ့ဗျာ။ ပြေးတာကိုလည်း ကျနော်တို့တော်တော်လှမ်းလှမ်းကို လိုက်ရတယ်ဗျ။ သေဆုံးတဲ့ကောင်တွေက လယ်ကွင်းအစပ်တွေမှာက ၄ ကောင်ဗျ။ ဂိတ်ထဲမှာက ၁ ကောင်ဗျ။ စုစုပေါင်း ၅ ကောင်ပေါ့”လို့ တပ်ရင်း (၃၈ဝ၂) တပ်ခွဲ ၂တာဝန်ရှိသူက ပြောပါတယ်။

တိုက်ပွဲဖြစ်ပွားချိန် ၁ နာရီနီးပါးအကြာမှာ ဂိတ်စခန်းရှိကျန်ရှိနေသေးတဲ့ စစ်ကော်မရှင်တပ်သားတွေက ၎င်းစခန်းနဲ့အနီးဝန်းကျင်မှာရှိတဲ့ မှော်အင်းနဲ့ သာယာကုန်းရွာစခန်းတို့ဆီကို ထွက်ပြေးသွားခဲ့ကြတယ်လို့ သူက ဆိုပါတယ်။

ပဲခူးရိုးမ PDF-ဗျူဟာ ၂၂ ကွပ်ကဲမှုအောက်ရှိ တပ်ရင်း၊ တပ်ခွဲတွေ၊ ပကဖတပ်ဖွဲ့တွေအနေနဲ့ အခုလိုမျိုး စစ်ကောင်စီတပ်စခန်းတွေကို ထပ်မံပြီးတိုက်ခိုက်နိုင်ဖို့အတွက် လက်နက်နဲ့ကျည်ဆံတွေ လိုအပ်လျှက်ရှိနေတာကြောင့် ပြည်သူတွေအနေနဲ့ ဗျူဟာ-၂၂ တဆင့် ထောက်ကူပေးနိုင်တယ်လို့လည်း တောင်းဆိုထားပါတယ်။

ပြီးခဲ့တဲ့နိုဝင်ဘာ ၂၃ ရက်မနက်ပိုင်းကလည်း ကြို့ပင်ကောက်မြို့နယ်၊ ကြည်စုရွာအနီးရှိ စစ်ကော်မရှင်တပ်ရဲ့စစ်ဆေးရေးဂိတ်ကို တော်လှန်ရေးပူးပေါင်းတပ်ဖွဲ့တွေက ဝင်ရောက်တိုက်ခိုက်ခဲ့ရာ ရဲ ၁ ဦးနဲ့ ပြည်သူစစ် ၄ ဦး စုစုပေါင်း ၅ ဦးသေဆုံးသွားပြီး သူတို့ကိုင်ဆောင်တဲ့ ဘီအေ ၆၃ ၁ လက်၊ ဘီအေ ၆၄ ၁ လက်၊ အမ်အေ ၁၃ ၁ လက်တို့ကိုပါသိမ်းဆည်းရရှိခဲ့တယ်လို့သိရပါတယ်။

စာတည်း – လင်း

ရွှေဘို၊ ဒီဇင်ဘာ ၁၊ ၂၀၂၅။

စစ်ကိုင်းတိုင်း၊ ရွှေဘိုနဲ့ ဝက်လက်မြို့နယ်မှာ တိုက်ပွဲဖြစ်ပြီး စစ်ကော်မရှင်ဘက်ကသေဆုံးသူများကာ လက်နက်ခဲယမ်းတွေလည်းသိမ်းဆည်းနိုင်ခဲ့တယ်လို့ ၉၇၀၆ တပ်ရင်း ဒေါင်းနီတပ်ဖွဲ့က ဒီဇင်ဘာ ၁ ရက်မှာ သတင်းထုတ်ပြန်ပါတယ်။

နိုဝင်ဘာ ၂၇ ရက် မနက် ၆ နာရီခန့်မှာ ဝက်လက်မြို့နယ်၊ စိုင်နိုင်လေးရွာမှာ တပ်စွဲထားတဲ့ စစ်ကော်မရှင်စစ်ကြောင်းကို ၆ နာရီကျော်ကြာတိုက်ခိုက်ခဲ့ပြီး အဲ့ဒီနေ့ ညနေ ၃ နာရီခန့်မှာ စိုင်နိုင်လေးရွာကို ရွေဘိုမြို့ကနေစစ်ကူလာတဲ့ အင်အား ၇၀ ခန့်ပါစစ်ကြောင်းကို ရွှေဘို တောင်ဘက်အထွက် ရွှေဘိုမြို့နဲ့ တာဂဏန်းကျေးရွာကြားမှာ ၂ နာရီကျော်ကြာထပ်မံတိုက်ခိုက်ခဲ့တာလို့ ဆိုပါတယ်။

“စိုင်နိုင်လေးမှာဖြစ်ပြီးတော့ လိုက်ရှင်းလင်းရေးလုပ်တော့အလောင်းရတယ်။ ခဲယမ်းရတယ်။ ညနေပိုင်းကျတော့ ထွက်သွားတယ်။ ဘုန်းဘွဲရွာထဲဝင်သွားတယ်။ အဲ့မှာလည်းရှင်းလင်းရေးလုပ်တယ်။ ရှင်းလင်းရေးလုပ်နေတဲ့အခါမှာ ဖြတ်တောက်ရေးကိုလည်း ရွှေဘိုဘက်က စစ်ကူလာတဲ့ အင်အား ၇၀ ကျော်လောက်ပါတယ်။ အဲ့စစ်ကြောင်းကလည်း ညီနောင်တွေနဲ့ပေါင်းပြီး နှစ်ဖွဲ့ခွဲပြီးလုပ်တော့ အဲ့မှာလည်း အလောင်း ၂၀ ကျော် ၃၀ လောက်ရတယ်။ လက်နက်ခဲယမ်းတွေလည်းရတယ်”လို့ ၉၇၀၆ တပ်ရင်း ဒေါင်းနီတပ်ဖွဲ့က ဒုတပ်ရင်းမှူး နဂါးလေးက ပြောပါတယ်။

စိုင်နိုင်လေးတိုက်ပွဲအတွင်းမှာ စစ်ကော်မရှင်တပ်သား ၄ ဦးသေဆုံးပြီး အများအပြားဒဏ်ရာရခဲ့သလို ရွှေဘိုအထွက်တိုက်ပွဲမှာတော့ ၃၀ ဦးသေဆုံးကာ ဒဏ်ရာရသူတွေလည်း များခဲ့တယ်လို့ ဆိုပါတယ်။

ဒါ့အပြင်တိုက်ပွဲတွေအတွင်း MA1 ၅ လက်၊ MA2 ၂ လက်၊ MA3 ၂ လက်၊ MA4 ၁ လက်၊ RPG ၁ လက်၊ RPG သီး ၁၃ လုံး၊ ၆၀ မမ ၇ လုံး၊ RPG ပို့ကျည် ၈ တောင့်၊ ကျည်ဘောက် ၁၁ ဘောက် အီနာဂါ ၂ လုံး၊ နာနတ်သီး ၂ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။

တိုက်ပွဲဖြစ်နေချိန် ရွှေဘိုအခြေစိုက် ခလရ ၄၂ ကနေ ဟောင်ဝှစ်ဇာနဲ့ ၁၉ ကြိမ် ပစ်ခတ်ပြီး၊ မုံရွာ နမခမှ ၃ စီး၊ Y12 တွေနဲ့လည်း ဗုံးကြဲခဲ့တယ်လို့ ၉၇၀၆ တပ်ရင်း ဒေါင်းနီတပ်ဖွဲ့က ဒုတပ်ရင်းမှူး နဂါးလေး ကပြောပါတယ်။

“ရွှေဘိုမြို့ထဲကနေ ဟောင်ဝင်ဇာနဲ့လှမ်းထုတာ။ ကျနော်တပ်ထောက်အရာရှိက ဟောင်ဝစ်ဇာ ထိတာပေါ့။ ပထမအလုံး ၃ ချက်ပစ်တာ ကျနော်တို့ရဲဘော်တွေရှိနေတဲ့နေရာ။ ဒုရင်းမှူး၊ တပ်ထောက်အရာရှိနဲ့ ဒရုန်းတာဝန်ခံတွေရှိတဲ့နေရာကို ကောင်တာပြန်ပစ်တာမှာ သူတို့ရှိတဲ့ပွိုင့်ကို ပစ်တော့ ထိပြီးတခါတည်းကျတာ။ ကျန်တဲ့သူတွေကဒဏ်ရာရတယ်။”လို့ ဒုတပ်ရင်းမှူး နဂါးလေးက ဆက်ပြောပါတယ်။

လက်နက်ကြီးထိလို့ ၉၇၀၆ တပ်ရင်း ဒေါင်းနီတပ်ဖွဲ့က တပ်ထောက်အရာရှိ ဒင်ကြီး ကျဆုံးခဲ့သလို ရွှေဘိုပကဖက တပ်ဖွဲ့ဝင် ၁ ဦးကျဆုံးပြီး ၄ ဦးဒဏ်ရာရခဲ့တာလို့ ဆိုပါတယ်။

ဒီတိုက်ခိုက်မှုကိုတော့ ရွှေဘိုခရိုင်တပ်ရင်း (၁၅၊ ၁၈၊ ၂၃၊ ၂၆၊ ၉၇၀၆ – Together We Can)၊ ဝက်လက်/ရွှေဘိုမြို့နယ်ပကဖ/ဒီပဲယင်း ပကဖ အဖွဲ့များ ဒေသခံ တိုက်နယ် ပကဖတွေနဲ့ Drone အဖွဲ့တွေနဲ့မဟာမိတ်ပူးပေါင်းတပ်တွေက စုပေါင်းတိုက်ခိုက်ခဲ့ကြတာလို့ ဆိုပါတယ်။

တိုက်ပွဲပြီးနောက် ရွှေဘိုမြို့ကနေ စစ်ကူထွက်လာတဲ့စစ်ကြောင်းဟာ ရွေဘိုမြို့ထဲပြန်ဝင်သွားပြီး စိုင်နိုင်လေးကျေးရွာကစစ်ကြောင်းကတော့ ဘုန်းဘွဲရွာထဲဝင်ရောက်သွားတယ်လို့ သိရပါတယ်။

နိုဝင်ဘာ ၁၀ ရက်ကလည်း ရွှေဘိုမြို့နယ်၊ တာဂဏန်းကျေးရွာမှာ တိုက်ပွဲ ၂ ကြိမ်ဖြစ်ကာ စစ်ကော်မရှင်ဘက်က ၄ ဦးသေဆုံးပြီး ရွှေဘိုမြို့နယ်ပကဖ အဖွဲ့ဝင် ၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

ကြို့ပင်ကောက်၊ နိုဝင်ဘာ ၂၄၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်၊ ကြည်စုရွာအနီးရှိ စစ်ကော်မရှင်စစ်ဆေးရေးဂိတ် တိုက်ခိုက်ခံရပြီး ထိခိုက်သေဆုံးမှုတွေရှိတယ်လို့ ဒေသခံတွေဆီက သိရပါတယ်။

နိုဝင်ဘာ ၂၃ ရက်မနက် ၁၀ နာရီကျော်မှာ ကြို့ပင်ကောက်ရဲစခန်းမှ ဒုရဲအုပ် ကျော်ဇင်ထွန်းပါ ရဲ ၂ ဦး၊ ပြည်သူစစ်ခေါင်းဆောင် ဦးသိန်းဝင်းဦးဆောင်တဲ့ ပြည်သူစစ် ၄ ဦးရှိနေတဲ့ စစ်ဆေးရေးဂိတ်ကို လက်နက်ကိုင်အဖွဲ့တခုက ဖောကားနဲ့လာပြီးပစ်ခတ်ခဲ့တာလို့ စစ်ကော်မရှင်ထောက်ခံတယ်လီဂရမ်ချန်နယ်မှာ ဖော်ပြထားပါတယ်။

“ပစ်ခတ်ခံရတဲ့ အခြေအနေတော့ သိရတယ်။ အသေးစိတ်တော့မသိရဘူး။ သေတာတွေတော့ရှိတယ်”လို့ မြို့ခံတဦးက မြေလတ်အသံကိုပြောပါတယ်။

ပစ်ခတ်ခံရလို့ စစ်ဆေးရေးဂိတ်မှာရှိနေတဲ့ ရဲ ၁ ဦးနဲ့ ပြည်သူစစ် ၄ ဦး စုစုပေါင်း ၅ ဦးသေဆုံးသွားပြီး သူတို့ကိုင်ဆောင်တဲ့ ဘီအေ ၆၃ ၁ လက်၊ ဘီအေ ၆၄ ၁ လက်၊ အမ်အေ ၁၃ ၁ လက်တို့ကိုပါ ပစ်ခတ်တဲ့ အဖွဲ့ကယူဆောင်သွားတယ်လို့ စစ်ကောင်စီထောက်ခံတယ်လီဂရမ်တွေမှာ ရေးသားဖော်ပြထားကြပါတယ်။

ပစ်ခတ်မှုဖြစ်ပြီးနောက်မှာ ကြို့ပင်ကောက်မြို့နယ်ရဲတပ်ဖွဲ့မှူး ရဲမှူးဝင်းသိန်းနဲ့ ကပစ ၅ က ဗိုလ်မှူး စိုင်းခန့်နိုင်အပါ အင်အား ၃၀ ခန့်က ပစ်ခတ်မှုဖြစ်တဲ့နေရာကိုရောက်လာပြီး စစ်ဆေးမှုတွေ ပြုလုပ်သွားတယ်လို့ ဆိုပါတယ်။

အဆိုပါပစ်ခတ်မှုနဲ့ပတ်သက်ပြီး သက်ဆိုင်ရာအဖွဲ့တွေဘက်ကတော့ သတင်းတစုံတရာ ထုတ်ပြန်တာမျိုးမရှိသေးပါဘူး။

နိုဝင်ဘာ ၂၂ ရက်ညပိုင်းကလည်း ဇီးကုန်းမြို့နဲ့ ၃ ဖာလုံအကွာရှိ ရွေအရိပ် KTV မှာသောက်စားနေတဲ့ ရဲနဲ့စစ်ကော်မရှင်တပ်သားတွေ ပစ်ခတ်ခံရပြီး ၇ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း