ကျောက်ကြီး၊ စက်တင်ဘာ ၂၉၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ မုန်းမြို့၊ ရေအိုးစင်ကျေးရွာအနီးမှာ ထင်းခုတ်သွားတဲ့အမျိုးသား မြေမြှုပ်မိုင်းထိပြီး သေဆုံးသွားတယ်လို့ ကူညီလုပ်ဆောင်ပေးခဲ့သူတွေဆီက သိရပါတယ်။

မိုင်းထိသေဆုံးသူဟာ မုန်းမြို့၊ အမှတ် ၄ ရပ်ကွက်နေ အသက် ၅၀ အရွယ် ဦးအောင်ဘုဆိုသူဖြစ်ပြီး စက်တင်ဘာ ၂၈ ရက် ညနေ ၃ နာရီခန့်မှာ နေအိမ်ကနေ ရေအိုးစင်ကျေးရွာဘက် ထင်းကောက် အသွား မြေမြှုပ်မိုင်းနင်းမိခဲ့တာလို့ ဆိုပါတယ်။

“လာပို့သူတွေအပြောအရတော့ ထင်းသွားခွေတယ်ပြောတယ်။ သူ့ရပ်ကွက်ကနေ ရေအိုးစင် ကျေးရွာနား သင်္ချိုင်းကုန်းနားမှာ သွားရင်းထိတာ။ “လို့ ကူညီပေးခဲ့သူတဦးကပြောပါတယ်။

မိုင်းထိလူနာကို မုန်းကနေ တောင်ငူမြို့အထိ ဘေးတွဲဆိုင်ကယ်နဲ့မောင်းလာရတာ၊ လမ်းခရီးကြမ်းတာ ကြောင့် သွေးထွက်လွန်ပြီးသေဆုံးသွားတာဖြစ်နိုင်တယ်လို့ သူကဆက်ပြောပါတယ်။

မိုင်းထိလို့ ကိုအောင်ဘုရဲ့ ခြေထောက်နှစ်ဖက်စလုံးမှာ ပြတ်ထွက်ပြီး အသားစတွေဖွာလန်ကြဲ ဒဏ်ရာရခဲ့ကာ ဒေသခံတွေက ဘေးတွဲဆိုင်ကယ်နဲ့ တောင်ငူဆေးရုံပို့ခဲ့ရာ ဆေးရုံအရောက်မှာ သေဆုံးသွားခဲ့တာပါ။

မုန်းမြို့နဲ့အနီး ကျေးရွာတွေတဝိုက်မှာ စစ်ကော်မရှင်တပ်ရော KNLA ပူးပေါင်းတပ်တွေဘက်ကလည်း လှုပ်ရှားသွားလာနေတာဖြစ်လို့ ခုနင်းမိတဲ့ မြေမြှုပ်မိုင်းဟာ ဘယ်အဖွဲ့အစည်းဘက်ကထောင်ထားတဲ့ မိုင်းဆိုတာ အတည်မပြုနိုင်သေးဘူးလို့ ဆိုပါတယ်။

ကိုအောင်ဘုရဲ့အလောင်းကိုတော့ မိသားစုဝင်တွေက နေအိမ်ပြန်မသယ်တော့ဘဲ စက်တင်ဘာ ၂၉ ရက်ညနေမှာပဲ တောင်ငူမြို့မှာ သဂြိုလ်သွားမယ်လို့သိရပါတယ်။

ဇွန် ၅ ရက်ကလည်း ထန်းတပင်မြို့နယ်၊ ရွှေအင်းမကျေးရွာမှာ မိသားစုဝမ်းရေးအတွက် အင်ဥထွက်ကောက်တဲ့ အမျိုးသား မိုင်းထိလို့ ခြေထောက်ပြတ်သွားတယ်လို့ သိရပါတယ်။

စာတည်း – လင်း

ကြို့ပင်ကောက်၊ စက်တင်ဘာ ၂၉၊ ၂၀၂၅။

ပဲခူးတိုင်း၊ ကြို့ပင်ကောက်မြို့နယ်၊ ဥယျာဥ်ကြီးကျေးရွာမှာ စစ်ကော်မရှင်တပ်ကပစ်ခတ်တဲ့ ဗုံးသီးက နေအိမ်ပေါ် ကျရောက်ပေါက်ကွဲပြီး စာကျက်နေတဲ့ ၁၀ တန်းကျောင်းသားသေဆုံးသွားတယ်လို့ သာယာဝတီခရိုင် ၃၈၀၁ တပ်ရင်း၊ တပ်ခွဲ ၁ တာဝန်ရှိသူတွေဆီက သိရပါတယ်။

စက်တင်ဘာ ၂၈ ရက် ညနေ ၅ နာရီခန့်မှာ ကြို့ပင်ကောက်မြို့ပေါ်ကနေ အလယ်ကုန်းကျေးရွာ ရဲစခန်းမှာရောက်နေတဲ့ စစ်ကော်မရှင်တပ်က ဥယျာဥ်ကြီးကျေးရွာထဲကို ဒရုန်းနဲ့ ဗုံး ၂ လုံးချခဲ့ရာ ၁ လုံးက လယ်ကွင်းထဲကျပြီး ၁ လုံးက ကျေးရွာအရှေ့ဘက် ပြည်သူနေအိမ်ပေါ်ကျရောက် ပေါက်ကွဲခဲ့တယ်လို့ ဆိုပါတယ်။

“သူက ဆယ်တန်း(G-10) စာမေးပွဲဖြေနေတော့ အိမ်ပေါ်မှာတက်ပြီးစာကျက်နေတာ။ အဲ့ချိန်မှာ တည့်တည့်ကျတာ။ သူ့ကိုထိမှန်သွားတာ။ သူ့အိမ်မှာလည်း မိသားစုအားလုံးက ၄ ယောက်ရှိတာ။ ကျန်တဲ့မိသားစုတွေက အဖေရယ်၊ အမေရယ်၊ အကိုရယ်က အိမ်အောက်မှာ။ သူကအိမ်ပေါ်တက်ပြီး စာကျက်နေတာ။ ပြောရင်တော့နေရာမှတင်ထိမှန်ပြီးသေတာ”လို့ သာယာဝတီခရိုင် ၃၈၀၁ တပ်ရင်း၊ တပ်ခွဲ ၁ တပ်ခွဲမှူး ကိုကရင်လေးကပြောပါတယ်။

သေဆုံးသူဟာ ရွှေပန်းတောရွာ အထကကျောင်းမှာ ၁၀ တန်းတက်နေတဲ့ အသက် ၁၈ နှစ်အရွယ် မောင်အိုင်စတိုင်းဖြစ်ပြီး ဘယ်ဘက်နို့အုံအောက် အစဖောက်ဝင်ပြီး နှလုံးထိမှန်သေဆုံးသွားခဲ့ကာ သူနေထိုင်တဲ့အိမ်လည်း ပျက်စီးသွားခဲ့တယ်လို့ ဆိုပါတယ်။

ဒါ့အပြင် ပေါက်ကွဲမှုပြီးချိန်မှာလည်း နောက်ထပ် ဗုံး ၂ လုံးထပ်မံကြဲခဲ့ရာ ဗုံးသီးတွေက အိမ်ရှေ့တွေ ကျခဲ့ပေမယ့်ပေါက်ကွဲတာမျိုးမရှိတာကြောင့် ရှင်းလင်းခဲ့ရသေးတယ်လို့ သူကဆက်ပြောပါတယ်။

ဒရုန်းဗုံးချပြီးနောက် စစ်ကော်မရှင်တပ်အင်အား ၁၀၀ ခန့်ဟာ အလယ်ကုန်းရွာကို ထပ်ရောက်လာပြီး နောက် ဥယျာဥ်ကြီးကျေးရွာကို စစ်ကြောင်းထိုးမယ့်သတင်းထွက်လာတာကြောင့် ဥယျာဥ်ကြီးကျေးရွာက ရွာလုံးကျွတ်ထွက်ပြေးနေရပြီး ဗုံးထိမှန်သေဆုံးခဲ့တဲ့ မိသားစုဝင်တွေသာ ရွာမှာကျန်ခဲ့တယ်လို့ ဆိုပါတယ်။

ဗုံးထိမှန်သေဆုံးသွားတဲ့ မောင်အိုင်စတိုင်းရဲ့နာရေးကိုတော့ စက်တင်ဘာ ၂၉ ရက် ဒီကနေ့မှာ ကျေးရွာမှာတင် သင်္ဂြိုဟ်သွားမယ်လို့ သိရပါတယ်။

အလားတူ စက်တင်ဘာ ၂၇ ညနေပိုင်းမှာလည်း စစ်ကော်မရှင်တပ်တွေက ဖလံပင်ရွာကို ဒရုန်းနဲ့ဗုံးကြဲ တိုက်ခိုက်တဲ့အပြင် အလယ်ကုန်းတိုက်နယ် ရဲစခန်းကနေ လက်နက်ကြီးတွေနဲ့ ပစ်ခတ်တာတွေလည်း ရှိခဲ့ပါသေးတယ်။

စာတည်း – လင်း

တန့်ဆည်၊ စက်တင်ဘာ ၂၇၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာ လေကြောင်းတိုက်ခိုက်ခံရမှုမှာ သေဆုံးသူ ၃ ဦးထပ်တိုးလာပြီးစုစုပေါင်း ၁၁ ဦးအထိရှိလာပြီး ဒဏ်ရာရသူတွေထဲမှာ စိုးရိမ်ဒဏ်ရာရထားသူတွေလည်းရှိတယ်လို့ ဒေသခံတွေဆီက သိရပါတယ်။

ကံထူးမရွာက ‘နိုဘယ်ဝမ်း’ ဆီပန့်ဆိုင်နဲ့ ‘ဇွဲထက်’ အအေးဆိုင်အနီး လူစည်ကားတဲ့ နေရာကို စက်တင်ဘာ ၂၆ ရက် မနေ့ကနေ့လယ် ၁၁ နာရီခွဲမှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာပါ။

လေကြောင်းတိုက်ခံရမှုမှာ ကနဦး အသက်၂၀ အရွယ် ဆီဆိုင်ပိုင်ရှင်ရဲ့သမီး ကိုယ်ဝန်သည် မစံထိပ်ထားဝေ၊ ကုန်စိမ်းရောင်းသူ ၂၁ နှစ်အရွယ် မမိထက်၊ ၂၇ နှစ်အရွယ်ကိုသက်အောင်၊ ပန်းရံလုပ်ကိုင်နေတဲ့ အသက် ၄၃ နှစ် ကိုဖိုးထွန်း၊ အသက် ၂၀ ကျော်အရွယ် ကိုတူးနိုင်၊ ထထူး၊ နေအောင်၊ စိုးကို တို့ သေဆုံးခဲ့ပါတယ်။

“ညနေပိုင်း ထပ်ရှာတော့ ဆီဆိုင်ပိုင်ရှင် ကိုပြူးစိန်ကို ရှာမတွေ့တော့ဘူး။ သေဆုံးတဲ့အထဲပါသွားတယ်လို့ ယူဆရတယ်။ ဆောက်လက်စနှစ်ထပ်တိုက်ပိုင်ရှင်ပါ”လို့ မြို့နယ်ပြည်သူ့လုံခြုံရေးအဖွဲ့တာဝန်ခံက ပြောပါတယ်။

ဒါ့အပြင် မနေ့ညနေပိုင်းမှာဆေးကုသမှုခံယူနေတဲ့ ကိုအောင်ကိုဝင်း၊ စက်တင်ဘာ ၂၇ ရက် ဒီနေ့မနက်ပိုင်းမှာ ကိုကျော်ကိုလင်း သေဆုံးခဲ့ပြီး ပျောက်ဆုံးနေတဲ့ကိုပြူးစိန်ဆိုသူကိုလည်း သေဆုံးပြီလို့ ယူဆထားတယ်လို့ ဆိုပါတယ်။

“ကိုအောင်ကိုဝင်းက ဈေးလာဝယ်တဲ့သူ ကားဖြတ်မောင်းတဲ့အချိန် အချခံလိုက်တာ မနေ့ညနေက ဆုံးတာ။ ကိုကျော်ကိုလင်းက ချောင်းဆုံရွာက ဒီဘက်ရောက်နေတဲ့အချိန်နဲ့ တွေ့သွားတာ”လို့ မြို့နယ်ပလဖတာဝန်ခံက ပြောပါတယ်။

ကနဦးသေဆုံးသူတွေဟာ ရုပ်အလောင်း ၅ လောင်းသာရခဲ့ပြီး ကျန်တဲ့သူတွေဟာ အပိုင်းပိုင်းပြတ်နေတဲ့ ခန္ဓာကိုယ်တွေကို လိုက်လံကောက်ယူခဲ့ရတာလို့ သိရပါတယ်။

စစ်ကော်မရှင်က ရွေးကောက်ပွဲ‌ကြေညာပြီးနောက် စစ်ကိုင်းနဲ့မကွေးတိုင်းအပါ တိုင်းနဲ့ပြည်နယ်အများစုက ပြည်သူတွေရှိတဲ့နေရာတွေကို ဆက်တိုက်ဆိုသလို လေကြောင်းတိုက်ခိုက်မှုတွေ လုပ်ဆောင်လျှက်ရှိနေတာလည်း ဖြစ်ပါတယ်။

သတင်း – မြတ်

တန့်ဆည်၊ စက်တင်ဘာ ၂၆၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမရွာကို စစ်ကော်မရှင်တပ်က လေကြောင်းကနေ ဗုံးကြဲ တိုက်ခဲ့တာကြောင့် အသက် ၂၀ ဝန်းကျင်လူငယ်တွေအပါအဝင် ၈ ဦးသေဆုံးပြီး ၁၂ ဦး ထိခိုက်ဒဏ်ရာ ရခဲ့တယ်လို့ ဒေသခံတွေဆီကသိရပါတယ်။

ကံထူးမရွာက ‘နိုဘယ်ဝမ်း’ ဆီဆိုင်နဲ့ ‘ဇွဲထက်’ အအေးဆိုင်အနီး လူစည်းကားတဲ့နေရာကို စက်တင်ဘာ ၂၆ ရက်ဒီနေ့လယ် ၁၁ နာရီခွဲမှာ ဗုံးကြဲတိုက်ခိုက်ခဲ့တာလို့ ဆိုပါတယ်။

“အခုဆောက်နေတဲ့ နှစ်ထပ်တိုက်အရှေ့တည့်တည့်ကိုကျတာ။ အဲ့ဒီက ပန်းရံလုပ်နေတဲ့ အလုပ်သမား ၅ ဦး သေတာပါ။ တိုက်ပွဲလည်းမရှိဘူး။ လူစည်းကားတဲ့နေရာကို ရည်ရွယ်ချက်ရှိရှိလုပ်တာပါ”လို့ ဒေသခံ အမျိုးသားတဦးက ပြောပါတယ်။

လေကြောင်းတိုက်ခိုက်ခံရမှုကြောင့် အသက်၂၀ အရွယ် ဆီပန့်ဆိုင်ပိုင်ရှင်ရဲ့ သမီး၊ ၂၁ နှစ်အရွယ် ကုန်စိမ်းသည် အမျိုးသမီး ၁ ဦး၊ ၂၇ အရွယ် အမျိုးသား ၁ ဦး၊ ပန်းရံလုပ်နေတဲ့ ၄၃ နှစ်အရွယ် အမျိုးသား ၁ ဦးနဲ့ အသက် ၂၀ ကျော်အရွယ် အမျိုးသား ၄ ဦး စုစုပေါင်း ၈ ဦး သေဆုံးပြီး ၁၂ ဦး ဒဏ်ရာရကာ ၃ ဦးက ဒဏ်ရာပြင်းထန်ခဲ့တယ်လို့ ဆိုပါတယ်။

ဒီဗုံးကြဲမှုမှာ စစ်ကော်မရှင်တပ်က ပေါင် ၅၀၀ ဗုံး ၂ လုံးကိုသုံးခဲ့ပြီး လူ ၅ ဦးရဲ့ ရုပ်အလောင်းကို ပကတိအတိုင်းပြန်ရပြီး ၃ ဦးကိုတော့ အပိုင်းပိုင်းပြတ်နေတဲ့ ခန္ဓာကိုယ်အပိုင်းအစတွေကို ပြန်ကောက်ထားရတာလို့ ဆိုပါတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ စက်တင်ဘာ ၂၅ ထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ ဒေသခံစုစုပေါင်း ၇,၂၈၄ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

သတင်း – မြတ်

မတ္တရာ၊ စက်တင်ဘာ ၂၄၊ ၂၀၂၅။

မန္တလေးတိုင်း၊ မတ္တရာမြို့နယ်၊ ရုံးပင်ကျေးရွာမှာ စစ်ကော်မရှင်တပ်တွေပစ်ခတ်တဲ့ လက်နက်ကြီး ကျရောက်ပေါက်ကွဲခဲ့တာကြောင့် အမျိုးသမီး ၁ ဦးသေဆုံး ၂ ဦးဒဏ်ရာရတယ်လို့ ကျေးရွာနဲ့ နီးစပ်သူတွေဆီက သိရပါတယ်။

စက်တင်ဘာ ၂၃ ရက်ညနေ ၃ နာရီခန့်မှာ လက္ကောင်းကြီးကျေးရွာသင်္ချိုင်းမှာ တပ်စွဲထားတဲ့ စစ်ကော်မရှင်တပ်ဖွဲ့ဝင်တွေက ရုံးပင်ကျေးရွာဘက်ကို လက်နက်ကြီး ၆ လုံးပစ်ခဲ့ရာ လူနေအိမ်ပေါ်တွေနဲ့ ကျေးရွာအပြင်ဘက်ကိုကျရောက်ပေါက်ကွဲခဲ့တယ်လို့ ဆိုပါတယ်။

“ထိတဲ့သူမိသားစုက နေအိမ်ပေါ်တည့်တည့်ကျတာ။ အမျိုးသမီးက သေတယ်။ ကလေးနဲ့ ယောကျာ်းလုပ်သူက ဒဏ်ရာရတယ်။ ခုတလော ဒီကောင်တွေ(စကမ)လက်နက်ကြီးတွေပစ်တာ များပြားလာ တယ်။ တနေ့ကို အလုံး ၅၀ လောက် ပြည်သူကျေးရွာတွေကိုပစ်နေတာ။ သူတို့ပစ်တဲ့နေရာတွေက တိုက်ပွဲဖြစ်တာမရှိဘူး”လို့ ရုံးပင်ကျေးရွာနဲ့နီးစပ်သူတဦးကပြောပါတယ်။

လက်နက်ကြီးထိမှန်လို့ အသက် ၃၅ နှစ်အရွယ် မအေးအေးမော်မှာ နေရာမှာတင်သေဆုံးပြီး အသက် ၁၀ နှစ်အရွယ် သမီးဖြစ်သူမှာ မျက်ခုံးဒဏ်ရာရ၊ အမျိုးသားဖြစ်သူ အသက် ၃၆ နှစ်အရွယ် ကိုသိန်းထွေးမှာ လက်မှာဒဏ်ရာသွားပြီး နေအိမ်လည်းပျက်စီးခဲ့တယ်လို့ ဆိုပါတယ်။

စစ်ကော်မရှင်ဘက်က လက်နက်ကြီးပစ်ခတ်လို့ အိမ်ခြေ ၁၅၀ ကျော်ရှိတဲ့ ရုံးပင်ကျေးရွာက ဒေသခံ ၅၀၀ ကျော်လည်း ဘေးလွတ်ရာကိုတိမ်းရှောင်နေရတယ်လို့ ဆိုပါတယ်။

စက်တင်ဘာ ၁၃ ရက်ကလည်း မတ္တရာမြို့နယ်အရှေ့မြောက်ခြမ်း၊ အင်ကြင်းမြိုင်ကျေးရွာ အနီးဝန်းကျင်ကို စစ်ကော်မရှင်တပ်က လေကြောင်းကနေဗုံးကြဲလို့ ကိုရင် ၁ ပါးအပါအဝင် ၃ ဦးသေဆုံးတယ် သိရပါတယ်။

စာတည်း – လင်း