သေဆုံး

ရွှေဘို၊ ဧပြီ ၂၂၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ ဆောင်နန်းကျေးရွာအနီး လေကြောင်းကနေဗုံးကြဲခဲ့တာကြောင့် အမျိုးသမီး ၁ ဦးသေဆုံးပြီး ၃ ဦးဒဏ်ရာရတယ်လို့ ကျေးရွာနဲ့နီးစပ်သူတွေဆီက သိရပါတယ်။

ဧပြီ ၂၁ ရက်ည ၁၁ နာရီ ၄၅ မိနစ်မှာ ဂျက်ဖိုက်တာ ၂ စီးကကျေးရွာအနီးတောစပ်ကို ဗုံး ၃ လုံးကြဲချခဲ့တယ်လို့ ဆိုပါတယ်။

“ရွာသူရွာသားတွေ ဆိတ်မွေး၊ နွားမွေးလုပ်နေတဲ့တောတိုက်ကိုမှ ဘယ်သူကဘယ်လိုသတင်းပေးလို့ ကြဲမှန်းမသိဘူး။ တဲပေါ်မီးလောင်ဗုံးကျလို့ မိန်းမက မီးဖုတ်ပြီးသားဖြစ်သွားတယ်။ တလုံးက ဆိတ်ခြံထဲကျတယ်”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးကြဲခံရတာကြောင့် အသက် ၄၅ နှစ်အရွယ် ဒေါ်မဲစိန်ဆိုသူ နေရာတင်သေဆုံးပြီး မိသားစုဝင်တွေဖြစ်တဲ့ အသက် ၂၀ ကနေ ၄၀ ကြား အမျိုးသား ၃ ဦး ဒဏ်ရာရခဲ့တယ်လို့ဆိုပါတယ်။

ဒါ့အပြင် တဲ ၁ လုံးမီးလောင်ပျက်စီးပြီး ဆိတ် ၁၄ ကောင်နဲ့နွား ၃ ကောင်လည်းသေဆုံးသွားတယ်လို့ သိရပါတယ်။

ဧပြီ ၆ ရက်ကလည်း ရွှေဘိုမြို့နယ်၊ ဆင်အင်းကျေးရွာအနီးတောစပ်ကို ဗုံးကြဲခဲ့တာကြောင့် သံဃာ ၁ ပါးအပါအဝင် ၂ ဦးသေဆုံးကာ ၉ ဦးဒဏ်ရာရတယ်လို့ သိရပါတယ်။

စာတည်း – လင်း

ရွှေဘို၊ ဧပြီ ၇၊ ၂၀၂၆။

စစ်ကိုင်းတိုင်း၊ ရွှေဘိုမြို့နယ်၊ ဆင်အင်းကျေးရွာအနီးတောစပ်ကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် သံဃာ ၁ ပါးအပါအဝင် ၂ ဦးသေဆုံးကာ ၉ ဦးဒဏ်ရာရခဲ့တယ်လို့ ရွာခံတွေဆီက သိရပါတယ်။

ဧပြီ ၆ ရက်မနက် ၁၁ နာရီခန့်မှာ ကျေးရွာအနီးတောစပ်မှာ ရွာခံတွေစုဖွဲ့နေထိုင်တဲ့နေရာကို စစ်ကော်မရှင်ရဲ့ ဂျက်ဖိုက်တာ ၁ စီးက ဗုံး ၄ လုံးကြဲချခဲ့ရာ ၂ လုံးက ပဲခင်းထဲကျရောက်ပေါက်ကွဲပြီး ၂ လုံးက ဘုန်းကြီးကျောင်းအနီး ကျရောက်ပေါက်ကွဲခဲ့တယ်လို့ ဆိုပါတယ်။

“စစ်ရှောင်နေရာလည်း မဟုတ်ဘူး။ နဂိုကတည်းက ရွာခံတွေက တောတက်လုပ်စားတဲ့သူတွေစုနေတဲ့ နေရာပေါ့နော်။ နွားတွေဘာတွေ မွေးနေကြတယ်။ ဟိုတုန်းကတည်းက နေတဲ့ တဲတွေပါ။ ဘုန်းကြီးကလည်း တောထဲမှာနေတာကြာပြီ။ စစ်ရှောင်စခန်းလည်းမဟုတ်ဘဲနဲ့ လာကြဲတာ ဘုန်းကြီးလည်းပျံလွန်တော်မူသွားတယ်”လို့ ရွာခံတဦးက ပြောပါတယ်။

ဗုံးပေါက်ကွဲထိမှန်လို့ သက်တော် ၄၀ ကျော်အရွယ် သံဃာ ၁ ပါး ပျံလွန်တော်မူပြီး ဘုန်းကြီးအတွက် ဝေယျာဝစ္စလုပ်ကိုင်ပေးနေသူ အသက် ၆၀ ကျော်အရွယ်အမျိုးသမီး ၁ ဦးသေဆုံးခဲ့ကာ အသက် ၂၀ ကျော်အရွယ် လူငယ် ၃ ဦး၊ အသက် ၄၀ ဝန်းကျင် အမျိုးသား ၄ ဦးနဲ့ အသက် ၂၀ ကနေ ၃၀ အကြား အမျိုးသမီး ၂ ဦးဒဏ်ရာရခဲ့တယ်လို့ ဆိုပါတယ်။

ဗုံးကြဲခံရတဲ့နေရာဝန်းကျင်မှာ တဲအရေအတွက် ၁၅ တဲနဲ့ ဘုန်းကြီးကျောင်းသာရှိပြီး ဗုံးကြဲမှုအတွင်း ဘုန်းကြီးကျောင်းနဲ့တဲအချို့ပျက်စီးခဲ့ကာ တဲစုမှာနေထိုင်သူတွေကတော့ ဘေးလွတ်ရာကို တိမ်းရှောင်နေကြရတယ်လို့ ဆိုပါတယ်။

ဇန်နဝါရီ ၂၆ ရက်ကလည်း ရွှေဘိုမြို့နယ်၊ ငပိအိုးကျေးရွာ လေကြောင်းကနေ ဗုံးကြဲခံရလို့ ပြည်သူ ၃ ဦးသေပြီး ၈ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

တန့်ဆည်၊ မတ် ၃၀၊ ၂၀၂၆။

စစ်ကိုင်းတိုင်း၊ တန့်ဆည်ရဲစခန်းအချုပ်အတွင်းမှာ ထောင်ဒဏ်အနှစ် ၂၀ ချမှတ်ခံထားရတဲ့ နိုင်ငံရေးအကျဥ်းသူသေဆုံးသွားတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ယက် – PPNM က မတ်လ ၃၀ ရက်မှာ သတင်းထုတ်ပြန်ထားပါတယ်။

သေဆုံးသွားသူဟာ စစ်ကော်မရှင်ရဲ့ နမခ တပ်မှ ပုဒ်မ ၅၀၅(က)၊ ၅၀(ည)၊ ၅၂(က) တိုနဲ့ စွဲချက်တင်ကာ ထောင်ဒဏ် ၂၀ နှစ် အမိန့်ချမှတ်ခံထားရတဲ့ အသက် ၅၄ နှစ်အရွယ် မသက်သက်မာဖြစ်ပြီး မတ်လ ၂၇ ရက်မနက်အစောပိုင်းမှာ ရဲစခန်းအချုပ်အတွင်းသေဆုံးတာလို့ ဆိုပါတယ်။

“သူက အဖမ်းမခံရခင်ကတည်းက သွေးလေးဘက်နာရောဂါ ခံစားနေရသူဖြစ်တယ်။ အချုပ်ကိုရောက်တဲ့အချိန်မှာ ဆေးကုသခွင့်မရပါဘူး။ အချုပ်ဖြစ်လို့ ဆေးရုံဆေးခန်းပြဖို့ဆိုတာထက် ဆေးဝယ်သောက်ဖို့တောင် ရဲအကူအညီနဲ့သောက်နေရတာ။ ရောဂါပြင်းထန်နေချိန် ပြင်ပဆေးကုသခွင့်ရဖို့တောင်းဆိုခဲ့ပေမယ့်လည်း ဆေးကုသခွင့်မရလို့ မသေဆုံးသင့်ဘဲ သေဆုံးခဲ့ရတာ။ “လို့ PPNM ဦးဆောင်ကော်မတီဝင် မရောင်နီလင်းက ပြောပါတယ်။

မသက်သက်မာဟာ ရွှေဘိုခရိုင် ထောက်ပို့တာဝန်ခံ စာရေးဆရာ ရန်ငြိမ်းသူရဲ့ ဇနီးဖြစ်ပြီး ၂၀၂၃ မေလ ၁၃ ရက်မှာ ကိုရန်ငြိမ်းသူကို စစ်ကော်မရှင်အဖွဲ့တွေက နေအိမ်မှာလာဖမ်းချိန် မမိတာကြောင့် သားဖြစ်သူနဲ့အတူ မသက်သက်မာကို ဓားစာခံအဖြစ် ဖမ်းဆီးခဲ့တာလို့ ဆိုပါတယ်။

အဲ့ဒီနောက် ထောင်ဒဏ် ၂၀ နှစ် အမိန့်ချမှတ်ခံခဲ့ရပြီး တန့်ဆည်ရဲစခန်းအချုပ်ထဲမှာ နေထိုင်ခဲ့ရတယ်လို့ဆိုပါတယ်။

ထောင်ကျသူတွေကို ရွှေဘိုထောင်ကိုပို့ဆောင်ရမှာဖြစ်ပေမယ့် ထောင်ကိုအကျဉ်းသားတွေ ပြောင်းရွှေ့ရင် လမ်းခရီးမှာ ကြားဖြတ်တိုက်ခိုက်၊ လုယက်ခံရမှာကို စိုးရိမ်တာကြောင့် ထောင်မပြောင်းရွှေ့ဘဲ တန့်ဆည်အချုပ်မှာပဲ ထားရှိခဲ့တာလို့ PPNM က ဖော်ပြပါတယ်။

PPNM အနေနဲ့ အကျဉ်းသားအခွင့်အရေး ချိုးဖောက်မှုများ၊ ဆေးကုသခွင့် ပိတ်ပင်မှုနဲ့ ဓားစာခံအဖြစ်ဖမ်းဆီးမှုတွေကို ပြင်းထန်စွာ ရှုတ်ချပြီး၊ တရားမျှတမှုရရှိစေဖို့နဲ့ ကျန်ရှိနေတဲ့နိုင်ငံရေးအကျဉ်းသား‌တွေရဲ့ အသက်ဘေးကင်းလုံခြုံရေးအတွက် နိုင်ငံတကာက အလေးထား စောင့်ကြည့်ပေးဖို့လည်း တောင်းဆိုထားပါတယ်။

စာတည်း – လင်း

မင်းလှ၊ မတ် ၂၃၊ ၂၀၂၆။

ပဲခူးတိုင်း၊ မင်းလှမြို့နယ်မှာ စစ်ကော်မရှင်လက်အောက် ရပ်ကျေးအုပ်ချုပ်ရေးမှူး ၁ ဦး သေနတ်ပစ်ခံရပြီး သေဆုံးခဲ့တယ်လို့ ရွှေတန်းမြေပြည်သူကာကွယ်ရေးတပ်ဖွဲ့တာဝန်ရှိသူတွေထံက သိရပါတယ်။

သေဆုံးသူဟာ မင်းလှမြို့နယ်၊ ဝက်လှကြီးကျေးရွာအုပ်ချုပ်ရေးမှူး အသက် ၄၅ နှစ်အရွယ် ဦးအောင်ကျော်မိုးဆိုသူဖြစ်ပြီး ၎င်းကို မတ်လ ၂၂ ရက် ယမန်နေ့ ညနေ ၄ နာရီခန့်မှာ နေအိမ်အတွင်းအထိဝင်ရောက်ပစ်ခတ်ခဲ့တာလို့ ဆိုပါတယ်။

” သူက ထွေအုပ်ကပြန်တာလား စစ်ကွင်းတာဆုံဂိတ်က ပြန်လာတာလားတော့ မသိဘူး။ သူပြန်လာတဲ့အချိန်ကို ရဲဘော်တွေက သွားစောင့်တာ။ သူကအိမ်ကိုရောက်နှင့်နေတုန်းပဲရှိသေးတယ်။ လွယ်အိတ်တွေတောင်မချရသေးဘူး။ အဲ့ဒီအချိန်မှာရဲဘော်တွေက သူ့နာမည်ခေါ်ပြီးဝင်သွားချိန် ထွက်ပြေးဖို့လုပ်လို့ ၂ ချက်ပစ်ခတ်ခဲ့တာ”လို့ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ရှိသူက မြေလတ်အသံကို ပြောပါတယ်။

သေဆုံးသူ ဦးအောင်ကျော်မိုးဟာ ဝက်လှကြီးကျေးရွာအုပ်ချုပ်ရေးမှူးအဖြစ်လုပ်ကိုင်တာ ၃ လသာ ရှိသေးပြီး ယခင်ဝက်လှကြီးကျေးရွာအုပ်ချုပ်ရေးမှူးက ကျန်းမာရေးမကောင်းတာကြောင့် အနားယူသွားလို့ အစားထိုးဝင်ရောက်လာတာလို့ ဆိုပါတယ်။

ဦးအောင်ကျော်မိုးဟာ အုပ်ချုပ်ရေးမှူးမဖြစ်ခင်ကတည်းက စစ်ကော်မရှင်တပ်၊ အထွေထွေအုပ်ချုပ်ရေးဌာနတွေနဲ့နီးစပ်သူဖြစ်ပြီး အုပ်ချုပ်ရေးမှုးဖြစ်လာပြီးနောက် စစ်မှုထမ်းကြေးအတင်းအဓမ္မတောင်းခံတာ၊ တောင်းခံလို့မရရင်ဖမ်းဆီးမှုတွေလုပ်ဆောင်မယ်လို့ ခြိမ်းခြောက်မှုတွေရှိလာကြောင်း တိုင်ကြားလာလို့ ပစ်ခတ်ရှင်းလင်းခဲ့တာလို့ သိရပါတယ်။

သေနတ်နဲ့အနီးကပ်ပစ်ခံရလို့ ဦးအောင်ကျော်မိုးမှာ နေရာမှာသေဆုံးသွားပြီး ၎င်းထံကနေ နိုင်ငံသားစိစစ်ရေးကတ်၊ ယာဥ်မောင်းလိုင်စင်၊ စစ်မှုထမ်းကြေးကောက်ယူထားတဲ့စာရွက်စာတမ်းတွေ သိမ်းဆည်း ရရှိခဲ့ကာ ပစ်ခတ်မှုဖြစ်ပြီးနောက် ရန်ကုန်-ပြည်လမ်း စစ်ကွင်းတာဆုံဂိတ်တာဝန်ကျ စစ်ကော်မရှင်တပ်ဖွဲ့ဝင်တွေလာရောက်စစ်ဆေးမှုပြုလုပ်ခဲ့တယ်လို့ သိရပါတယ်။

မတ်လ ၁၄ ရက်ကလည်း မင်းလှမြိုနယ်၊ ဘုရားကွင်းကျေးရွာနေ ပျူစောထီးအဖွဲ့ဝင် ဦးရဲထွန်းဆိုသူဟာ နေအိမ်မှာရှိနေချိန် သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

ရေတာရှည်၊ မတ် ၂၁၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ ကြို့ပင်သာကျေးရွာတောင်ဘက် ရေနုတ်မြောင်းအနီးမှာ အင်ဖက်ကောက် ထွက်တဲ့ အသက် ၁၂ အရွယ် မိန်းကလေးငယ် ကင်းပုန်းဝပ်နေတဲ့ စစ်ကော်မရှင်တပ်တွေရဲ့ ပစ်ခတ်မှု ကြောင့်သေဆုံးသွားတယ်လို့ ကျေးရွာနဲ့နီးစပ်သူတွေဆီက သိရပါတယ်။

ပစ်ခတ်ခံရသူဟာ သပြေကုန်းရွာမှာနေထိုင်သူ အသက် ၁၂ နှစ်အရွယ် မသဲနုခိုင်ဖြစ်ပြီး မတ်လ ၂၀ ရက် မနက် ၅ နာရီခန့်မှာ သပြေကုန်းကျေးရွာနေ ၂ မိုင်ခန့်အကွာ ကြို့ပင်သာကျေးရွာဘက် မိသားစုဝင် ၄ ဦးနဲ့အတူ အင်ဖက်ကောက်ဖို့သွားရာမှ ပစ်ခတ်ခံရတာလို့ ဆိုပါတယ်။

“ဖက်ကောက်သွားတာကို ပစ်သတ်လိုက်တာ။ မရှိဆင်းရဲတဲ့အခါကျတော့ အင်ဖက်ကောက်စားတာပေါ့။ ရွာကထွက်သွားကြတာက မနက် ၄ နာရီလောက်ကထွက်သွားကြတာ။ ကြို့ပင်သာရွာတောင်ဘက်ကျတော့ မအေ(အမေ)လုပ်သူ ဒေါ်စံပယ်ဦးနဲ့သမီးလုပ်တဲ့သူ ၄ ဦးသွားတာကို စကစအဖွဲ့တွေက ပစ်လိုက်တာ။ ကင်းပုန်းနဲ့ တိုးပြီးပစ်ခံရတာ။ ပစ်ခံရတော့ မအေ(အမေ)လုပ်သူက ကုန်းအော်တော့ စကစအဖွဲ့က ထွက်သွားတယ်”လို့ ကျေးရွာနဲ့နီးစပ်သူတဦးက ပြောပါတယ်။

သေနတ်နဲ့ပစ်ခံရတဲ့ဒဏ်ကြောင့် မသဲနုခိုင်မှာ ပွဲချင်းပြီးသေဆုံးခဲ့ပြီး အလောင်းကိုတော့ မိသားစုဝင်တွေက ရွာကိုပြန်သယ်ကာ နာရေးကို ကျေးရွာရဲ့ထုံးစံအရ မတ်လ ၂၁ ရက်မှာ သင်္ဂြိုဟ်သွားမယ်လို့ သိရပါတယ်။

ပစ်ခတ်ခံရတဲ့နေရာဟာ ရန်ကုန်-မန္တလေး အမြန်လမ်းနဲ့နီးကပ်ပြီး စစ်ကော်မရှင်တပ်တွေ မကြာခဏဆိုသလို ကင်းပုန်းဝပ်နေတတ်တဲ့နေရာဖြစ်တယ်လို့ ဆိုပါတယ်။

ဖေဖော်ဝါရီ ၂၈ ရက်ကလည်း ရေတာရှည်မြို့နယ်၊ မရိုးခုံကျေးရွာအနီးမှာ စစ်ကော်မရှင်စစ်ကြောင်းနဲ့တွေ့တဲ့ PDF ၁ ဦးနဲ့ ပြည်သူ ၁ ဦးဖမ်းဆီးသတ်ဖြတ်ခံရလို့ သိရပါတယ်။

စာတည်း – လင်း

■ ရွှေမျောလုပ်ငန်းတွေရပ်ထားပြီး လုပ်သားထောင်နဲ့ချီထွက်ပြေးနေ

မင်းကင်း၊ မတ် ၁၉၊ ၂၀၂၆။

စစ်ကိုင်းတိုင်း၊ မင်းကင်းမြို့နယ်၊ ရွာဘရွာနဲ့မြောက်ချွန်းကျေးရွာအကြား ချင်းတွင်းမြစ်အတွင်းမှာရှိတဲ့ ရွှေမျောတွေ လေကြောင်းကနေ ဗုံးကြဲတိုက်ခိုက်ခံရလို့ လုပ်သား ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မတ်လ ၁၈ ရက် ယမန်နေ့ နေ့လယ် ၂ နာရီခန့်မှာ စစ်တပ်တိုက်လေယာဥ် ၁ စီးက ချင်းတွင်းမြစ်အတွင်း ရွှေမျောလုပ်ကွက်တွေကို ဗုံး ၃ လုံးကြဲချခဲ့ရာ သောင်ခုံတွေပေါ်ကျရောက်ပေါက်ကွဲတာလို့ ဆိုပါတယ်။

“လေယာဥ်ကပတ်ဝဲပြီးမှ ချသွားတာ။ ၁ ယောက်က ရင်ဘတ်ပွင့်ပြီးသေသွားတာ။ ၃ ယောက်က ဒဏ်ရာများတယ်။ သေဆုံးထိခိုက်တာက မျောသားတွေ။ အလယ်သောင်ပေါ်မှာ ချသွားတာ” လို့ ရွာဘရွာခံတဦးက မြေလတ်အသံကို ပြောပါတယ်။

လေယာဥ်ဗုံးစထိမှန်တာကြောင့် ရွှေမျောဖောင်တွေမှာဝင်ရောက်လုပ်ကိုင်နေတဲ့ အသက် ၂၅ နှစ်အရွယ် အမျိုးသား ၁ ဦးနေရာမှာသေဆုံးပြီး အသက် ၂၀ က နေ ၃၀ ကြားအမျိုးသား ၃ ဦး ပြင်းထန်ဒဏ်ရာတွေရခဲ့တာပါ။

ဗုံးကြဲခံရတာကြောင့် ရွှေမျောတွေမှာလုပ်ကိုင်နေတဲ့ လုပ်သားထောင်ချီဟာ နီးစပ်ရာကျေးရွာတွေနဲ့ တောစပ်တွေဆီ ထွက်ပြေးပြောင်းရွှေ့နေကြပြီး ရွှေမျောလုပ်ငန်းတွေလည်းရပ်ထားကြတယ်လို့ သိရပါတယ်။

စစ်အာဏသိမ်းပြီးနောက်ပိုင်း မင်းကင်းမြို့နယ်၊ ရွာဘ၊ မြောက်ချွန်းအပါအဝင် အနီးအနားကျေးရွာတွေက ချင်းတွင်းမြစ်အတွင်းမှာ ရွှေမျောတွေလာရောက်လုပ်ကိုင်သူတဖြည်းဖြည်းများလာရာမှ လက်ရှိအထိ ရွှေတူးနေတဲ့ ရွှေမျောအရေအတွက် ၇၀၀ ထက်မနည်းရှိတယ်လို့ ဆိုပါတယ်။

ပြီးခဲ့တဲ့နှစ် နိုဝင်ဘာ ၂၂ ရက်ကလည်း မင်းကင်းမြို့နယ်၊ လောင်းပြည့်ကျွန်းရွာအနီးရွှေမျောတွေကို စစ်ကော်မရှင်က လေကြောင်းကနေဗုံးကြဲခဲ့လို့ ပြည်သူ ၁၃ ဦးဒဏ်ရာရခဲ့သေးတယ်လို့ သိရပါတယ်။

မုံရွာ၊ မတ် ၁၈၊ ၂၀၂၆။

စစ်ကိုင်းတိုင်း၊ မုံရွာမြို့၊ ညောင်ပင်ကြီးရပ်ကွက်ရှိ ညောင်ပင်ကြီးဇက်ဆိပ်အနီး ချင်းတွင်းမြစ်မှာ ရေနစ်ပျောက်ဆုံးခဲ့တဲ့ ဆယ်ကျော်သက်ကလေး ၃ ဦးရဲ့ ရုပ်အလောင်းတွေကို ပြန်လည်တွေ့ရှိခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

မတ်လ ၁၈ ရက် ဒီကနေ့မနက် ၈ နာရီခန့်မှာ ရေနစ်ပျောက်ဆုံးနေရာရဲ့ ရေမိုင် မိုင်ဝက်ခန့်အကွာနေရာမှာ အလောင်း ၂ လောင်း၊ မတ်လ ၁၇ ရက် ယမန်နေ့ မနက် ၇ နာရီခန့်မှာ ရေမိုင် ၁ မိုင်ခန့်အကွာ မြစ်အတွင်းမှာ အလောင်း ၁ လောင်းကို ဆယ်ယူရရှိခဲ့တာလို့ ဆိုပါတယ်။

“ကျန်တဲ့ ၂ လောင်းက ဒီမနက်ရတယ်။ ၁ လောင်းက မနေ့မနက်က ရတယ်။ ဆုံးတာက ကျား ၂ ၊ မ ၁ ပါ။ ဘောလုံးနဲ့ရေဆင်းကစားရင်း နစ်သွားတာလို့တော့ သိရတယ် “လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

မတ်လ ၁၆ ရက် ည​နေ ၅ နာရီခန့်မှာ ညောင်ပင်ကြီးဇက်ဆိပ်အနီး ချင်းတွင်းမြစ်မှာ ဆယ်ကျော်သက်အရွယ် ကလေး ၅ ဦး ရေဆင်းကစားရာက ၅ ဦးလုံး ရေနစ်ခဲ့ပြီး ၂ ဦးကို အနီးအနားရှိ စက်လှေသမားတွေက ကယ်ဆယ်နိုင်ခဲ့တာကြောင့် အသက်ရှင်ခဲ့ပေမယ့် ၃ ဦးဟာ ရေနစ်မြုပ် ပျောက်ဆုံးသွားခဲ့တာပါ။

သေဆုံးသူတွေဟာ မုံရွာမြို့ ရုံးကြီးရပ်ကွက်နဲ့ ရန်ကင်းရပ်ကွက်နေထိုင်တဲ့ အသက် ၁၃ နှစ်နဲ့ ၁၄ နှစ်အရွယ်ရှိ မိန်းကလေး ၁ ဦးနဲ့ ယောက်ျားလေး ၂ ဦးတို့ဖြစ်တယ်လို့ ဆိုပါတယ်။

ဆယ်ယူရရှိတဲ့ ကလေးတွေရဲ့အလောင်းတွေကို မုံရွာမြို့ဆေးရုံကို ပို့ဆောင်ပေးခဲ့ရပြီး အဲ့ဒီကတဆင့်မိသားစုဝင်တွေက နေအိမ်တွေကိုပြန်လည်သယ်ယူသွားပြီဖြစ်တယ်လို့ သိရပါတယ်။