သေဆုံး

နွားထိုးကြီး၊ အောက်တိုဘာ ၁၇၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ ဘုရားကြီးကျေးရွာမှာ လက်နက်ကြီးထိမှန်လို့ သက်ကြီးမောင်နှမ ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

သေဆုံးသူတွေက အသက် ၈၀ အရွယ် ဒေါ်သောင်းကြည်နဲ့ အသက် ၇၅ နှစ်အရွယ် ဦးလှသိန်းတို့ မောင်နှမ ၂ ဦးဖြစ်ပြီး အောက်တိုဘာ ၁၇ ရက်မနက် ၁ နာရီဝန်းကျင်မှာ ပြင်စည်ကျေးရွာအထိုင်ချစစ်ကော်မရှင်တပ်ဘက်က ပစ်ခတ်တဲ့ လက်နက်ကြီးထိမှန်သေဆုံးတာလို့ဆိုပါတယ်။

“ပြင်စည် **စခန်းက ပစ်တာ။ လေးလုံးပစ်တာမှာ တလုံးကမပေါက်ဘူး။ တလုံးက ကျေးရွာမြောက်ပိုင်းက အိမ်ပေါ်ကျတာ။ အိမ်မှာက ဒီ့ပြင်လူတွေရှိတယ်မထိကျဘူး။ သူတို့မောင်နှမနှစ်ယောက်ဘဲ သေတာ”လို့ ဒေသခံတဦးကပြောပါတယ်။

လက်နက်ကြီးထိမှန်တာကြောင့် မောင်နှမ ၂ ယောက်ဟာ နေရာမှာတင်ပွဲချင်းပြီးသေဆုံးပြီး နေအိမ် ၄ လုံးပျက်စီးခဲ့တယ်လို့ ဆိုပါတယ်။

အဆိုပါ ကျေးရွာဟာ အိမ်ခြေ ၄၀၀ ကျော်ရှိပြီး လက်နက်ကြီးကျလို့ ပြည်သူအများစုက ကျေးရွာအနီးဝန်းကျင် တောတိုက်တွေနဲ့အခြားရွာတွေကို တိမ်းရှောင်သွားကြပြီး လူနည်းစုလောက်ကတော့ ကျေးရွာထဲမှာ ကျန်ရစ်နေခဲ့တယ်လို့ သိရပါတယ်။

အောက်တိုဘာ ၁၀ ရက်ကလည်း နွားထိုးကြီးမြို့နယ်၊ မကျီးကုန်းကျေးရွာက စစ်ရှောင်တွေနေတဲ့ ဘုန်းကြီးကျောင်း စစ်ကော်မရှင်ဘက်က လေကြောင်းကနေ ဗုံးကြဲလို့ ပြည်သူ ၂ ဦးသေပြီး ၁၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ပေါင်းတည်၊ အောက်တိုဘာ ၁၅၊ ၂၀၂၅။

ပဲခူးတိုင်း၊ ပေါင်းတည်မြို့နယ်၊ ရေဆည်ကြီးကျေးရွာမှာ နေအိမ်မှာရှိနေတဲ့ အုပ်ချုပ်ရေးမှူးလင်မယား ပစ်ခတ်ခံရပြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ ဒေသကာကွယ်ရေးအဖွဲ့တွေနဲ့ နီးစပ်သူတွေဆီက သိရပါတယ်။

ပစ်သတ်ခံရသူတွေဟာ ရေဆည်ကြီးကျေးရွာနေ အုပ်ချုပ်ရေးမှူးဖြစ်သူ အသက် ၆၄ နှစ်အရွယ် ဦးဝင်းမြင့်နဲ့ ဇနီးဖြစ်သူ အသက် ၆၇ နှစ်အရွယ်ဒေါ်သန်းသန်းမြင့်တို့ဖြစ်ပြီး အောက်တိုဘာ ၁၃ ရက် ည ၉ နာရီကျော်ခန့်မှာနေအိမ်မှာရှိနေချိန် ပစ်ခတ်ခံရတာလို့ဆိုပါတယ်။

“သူကအုပ်ချုပ်ရေးမှူးဆိုတော့ စကစဒေါက်တိုင်ဘဲ။ စကစဒေါက်တိုင် အုပ်ချုပ်ရေးမှန်သမျှကို ပစ်မှတ်ထားလုပ်နေကြတာဆိုတော့ သူလည်းအုပ်ချုပ်ရေးမှူးဖြစ်လို့ ရှင်းခံရတာ။ အိမ်ထဲမှာတင် ရှင်းခဲ့ကြတာလို့သိရတယ်။ “လို့ ဒေသကာကွာကွယ်ရေးအဖွဲ့တွေနဲ့နီးစပ်သူတဦးကပြောပါတယ်။

နေအိမ်ထဲဝင်ရောက်ပစ်ခတ်ခံရတာကြောင့် အုပ်ချုပ်ရေးမှူး ဦးဝင်းမြင့်မှာ ဦးခေါင်းကျည်ထိဒဏ်ရာနဲ့ နေရာမှာတင်သေဆုံးသွားပြီး ဇနီးဖြစ်သူ ဒေါ်သန်းသန်းမြင့်မှာတော့ ဒဏ်ရာပြင်းထန်ရသွားတယ်လို့ ဆိုပါတယ်။

အုပ်ချုပ်ရေးမှူးလင်မယားပစ်သတ်ခံရပြီးနောက် အောက်တိုဘာ ၁၄ ရက်မှာတော့ စစ်ကော်မရှင်အဖွဲ့တွေက ကျေးရွာကို လာရောက်စစ်ဆေးမှုပြုလုပ်သွားတယ်လို့ သိရပါတယ်။

အဆိုပါပစ်ခတ်မှုကိုတော့ ဘယ်အဖွဲ့တွေဘက်က ပြုလုပ်တယ်ဆိုတာကိုတော့ အောက်တိုဘာ ၁၅ ရက်အထိ သတင်းထုတ်ပြန်တာမျိုးမရှိသေးပါဘူး။

ပြီးခဲ့တဲ့စက်တင်ဘာ ၁၁ ရက်ကလည်း ပေါင်းတည်မြို့နယ်၊ ပန်းသင်းပင်ကျေးရွာမှာ ပျူစောထီး ၁ ဦး လယ်ခင်းထဲအသွားပစ်သတ်ခံရလို့ သေဆုံးသွားတယ်လို့ သိရပါတယ်။

စာတည်း – လင်း

ပြည်ကြီးတံခွန်၊ အောက်တိုဘာ ၁၂၊ ၂၀၂၅ ။

မန္တလေးမြို့၊ ပြည်ကြီးတံခွန်မြို့နယ်၊ (စ)ရပ်ကွက်၊ ၁၂၃ × ၁၂၄လမ်းကြားရှိ နေအိမ်တခုမှာ ပေါက်ကွဲမှုဖြစ်ပြီး အသက် ၁၃ နှစ်မိန်းကလေး ၁ ဦးသေဆုံးကာ ၂ ဦးဒဏ်ရာရခဲ့တယ်လို့ ဖြစ်စဉ်မှာကူညီဆောင်ရွက်ပေးခဲ့သူတွေထံက သိရပါတယ်။

အောက်တိုဘာ ၁၁ ရက် ယမန်နေ့ ညနေ ၃ နာရီကျော်မှာ ပန်းရံလုပ်ငန်းလုပ်သူ ကိုဝင်းနိုင်ဦးဟာ နေအိမ်အတွင်းမှာ ဝယ်ယူလာတဲ့သံတိုသံစထုပ်အတွင်းရှိပစ္စည်းတခုကို ထုခွဲမိရာက ပေါက်ကွဲမှုဖြစ်ပွားခဲ့တာလို့ ဆိုပါတယ်။

” သူတို့က သံတိုသံစဝယ်လာတာ။ အဲ့ထဲက ပါလာတဲ့ဟာတခုကို ထုလိုက်တာ။ ဘိုးတော်(အဖေ)က မသိဘဲထုလိုက်တော့ ရှူးဆိုပြီးမြည်လာတဲ့အချိန်မှာ အဲဒါကိုယူပြီး လွှင့်ပစ်လိုက်ချိန် လေထဲမှာတင်ကွဲပြီး ဆုံးတာ၊ထိတာဖြစ်ကုန်တာ” လို့ ကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ပေါက်ကွဲမှုကြောင့်အသက် ၃၈ နှစ် ကိုဝင်းနိုင်ဦး၊ ဇနီးဖြစ်သူ ၃၆ နှစ် မနုနုဝေနဲ့ သမီးဖြစ်သူ အသက် ၁၃ နှစ် မဆောင်းနှင်းဝေတို့မှာ ထိခိုက်ဒဏ်ရာရခဲ့လို့ မန္တလေးပြည်သူ့ဆေးရုံကို ပို့ဆောင်ကုသပေးခဲ့ပြီး ဆေးကုသမှုခံယူနေစဉ် သမီးဖြစ်သူ မဆောင်းနှင်းဝေမှာ သေဆုံးသွားခဲ့တယ်လို့ သိရပါတယ်။

ဓာတ်ပုံမှတ်တမ်းတွေအရ ပေါက်ကွဲခဲ့တဲ့ပစ္စည်းအတွင်းကနေ သံဘောစိအများအပြားပေါက်ကွဲထွက်လာတာကြောင့် မပေါက်ကွဲသေးတဲ့ ဗုံး သို့မဟုတ် လက်နက်ကြီးဗုံးသီးလို့ ယူဆရတဲ့ပစ္စည်းဖြစ်နိုင်တယ်လို့ CDM တပ်မတော်သားတဦးက ခန့်မှန်းပါတယ်။

အဆိုပါ ပေါက်ကွဲမှုဖြစ်ပြီးနောက် စစ်ကော်မရှင်တပ်နဲ့ရဲအဖွဲ့တွေရောက်ရှိလာပြီး စစ်ဆေးမှုတွေပြုလုပ်ခဲ့တယ်လို့ သိရပါတယ်။

အပြည်ပြည်ဆိုင်ရာကလေးများရံပုံငွေအဖွဲ့ UNICEF ရဲ့ဇွန်လက ထုတ်ပြန်တဲ့အစီရင်ခံစာအရ ၂၀၂၅ ဇန်နဝါရီမှဇွန်လအထိ ၆ လတာအတွင်း မြန်မာနိုင်ငံတဝှမ်း မြေမြှုပ်မိုင်းနဲ့မပေါက်ကွဲသေးတဲ့စစ်ကျန်ပစ္စည်းတွေကြောင့် ထိခိုက်မှု ၃၅၇ ခုရှိခဲ့ပြီး အဲ့ဒီထဲမှာ ကလေးသူငယ်က ၂၇ ရာခိုင်နှုန်းပါဝင်တယ်လို့ ဖော်ပြထားပါတယ်။

စာတည်း – ဟိန်းစံ

မြေလတ်အသံ၊ အောက်တိုဘာ ၁၁၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ ငါးလုံးတင်ကျေးရွာကို စစ်ကော်မရှင်တပ်ပစ်ခတ်လိုက်တဲ့ လက်နက်ကြီးကျရောက်ပေါက်ကွဲခဲ့တာကြောင့် အမျိုးသမီး ၂ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

အောက်တိုဘာ ၁၀ ရက်ည ၉ နာရီကျော်မှာ ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီး ကျည် ၁ လုံးက ငါးလုံးတင်ရွာထဲကိုကျရောက်ပေါက်ကွဲခဲ့ရာ အသက် ၅၀ ကျော်အရွယ် အမျိုးသမီး ၂ ဦး သေဆုံးကာ ၁၁ နှစ်အရွယ်ယောကျာ်းလေး ၁ ဦးဒဏ်ရာရရှိခဲ့ တာလို့ဆိုပါတယ်။

“သေဆုံးတဲ့သူတွေက ဆွေမျိုးတွေမတော်ကြဘူး။ စစ်ဘေးရှောင်တွေ။ ကလေးနဲ့ အမျိုးသမီးကြီး ၁ ယောက်ကတော့ မြေးဖွားတော်ကြတယ်။ အမျိုးသမီး ၂ ယောက်မှာ ၁ ယောက်က ပွဲချင်းပြီး သေတယ်။ နောက် ၁ ယောက်ကတော့ ဆေးကုနေရင်းသေတာ”လို့ ချောင်းဦးဒေသခံအမျိုးသား တဦးကပြောပါတယ်။

သေဆုံးသူ ၂ ဦးမှာ ၁ ဦးက အောက်တိုဘာ ၁၀ ရက်ညမှာသေဆုံးခဲ့ပြီး နောက် ၁ ဦးကတော့ အောက်တိုဘာ ၁၁ ရက်ဒီမနက်ပိုင်းမှာဘဲ ဆေးကုသရင်းသေဆုံးခဲ့တာဖြစ်တာလို့ ဆိုပါတယ်။

ငါးလုံးတင်ကျေးရွာဟာ အိမ်ခြေစုစုပေါင်း ၁,၀၀၀ ခန့်ရှိပြီး ချောင်းဦးမြို့နယ်၊ တောင်ဘက်မှာတည်ရှိကာ ချောင်းဦးမြို့နဲ့ ၆ မိုင်ကျော်ကွာဝေးပါတယ်။

ပြီးခဲ့တဲ့မေ ၁၅ ရက်ည ၉ နာရီကလည်း ချောင်းဦးမြို့ပေါ်ကနေ ပစ်ခတ်လိုက်တဲ့ လက်နက်ကြီးကျည် ၂ လုံးဟာ ငါးလုံးတင်ကျေးရွာကို ကျရောက်ပေါက်ကွဲခဲ့တာကြောင့် ရွာသား ၅ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

အလားတူ အောက်တိုဘာ ၆ ရက် (သီတင်းကျွတ်လပြည့်နေ့) ည ၈ နာရီမှာလည်း ချောင်းဦးမြို့နယ်၊ ဘုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်းပြီး ဆီမီးသပိတ် ပြုလုပ်နေချိန် မုံရွာနမခက တက်လာတဲ့ ပါရာမော်တာက ၁၂၀ မမ ဗုံးသီး ၂ လုံးကြဲချခဲ့ရာ သပိတ်ဦးဆောင်သူတွေ အပါအဝင် ပြည်သူ ၂၄ ဦးသေဆုံးကာ ၄၆ ဦး ဒဏ်ရာရခဲ့ပါသေးတယ်။

စာတည်း – လင်း

ပေါင်းတလည်၊ အောက်တိုဘာ ၁၀၊ ၂၀၂၅ ။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတလည်မြို့မှာ ကျေးရွာလုံခြုံရေးနှင့်အကြမ်းဖက်နှိမ်နင်းရေး(လုံကြမ်း)နဲ့ ပြည်သူ့စစ်(ပျူစောထီး) ခေါင်းဆောင်တဦး ပစ်ခတ်ခံရပြီးသေဆုံးတယ်လို့ ပြည်ခရိုင်တပ်ရင်း ၂ က အောက်တိုဘာ ၁၀ ရက် ဒီကနေ့မှာ သတင်းထုတ်ပြန်ပါတယ်။

သေဆုံးသူမှာ အသက် ၆၀ နှစ်ခန့်ရှိ ခွေးရဲချင်းရုပ်ကုန်းကျေးရွာ လုံ/ကြမ်းနဲ့ပြည်သူ့စစ်ခေါင်းဆောင် ဦးလှမြင့် ဖြစ်ပြီး အောက်တိုဘာ ၆ ရက် မနက် ၁၀ နာရီခန့်မှာ သူနေထိုင်ရာ ခွေးရဲချင်းရုပ်ကုန်းရွာကနေ တဦးတည်းဆိုင်ကယ်နဲ့ထွက်လာချိန် ဝန်တင်ဆိပ်ကျေးရွာအနီးမှာ ပစ်ခတ်ခဲ့တာလို့ ဆိုပါတယ်။

” ဆေးကုလာရင်း မိတာ။ သူသွားတဲ့အချိန် သတင်းရလို့ပါ။ သူဖမ်းမိပြီးခေါ်သွားတဲ့အချိန်လမ်းမှာပြေးလို့ ပစ်ခတ်ခဲ့တယ်။ လိုက်လံဖမ်းဆီးပစ်ခတ်တဲ့အခါမှာ သေသွားတာ” လို့ ပြည်ခရိုင်တပ်ရင်း ၂ သတင်းနဲ့ပြန်ကြားရေးတာဝန်ခံ Red Star က ပြောပါတယ်။

ပစ်ခတ်ခံရလို့ ဦးလှမြင့်မှာ ဦးခေါင်းကျည်ထိဒဏ်ရာနဲ့နေရာမှာသေဆုံးသွားပြီး ၎င်းထံကနေ ဂတ်စ်အသုံးပြုပစ်ခတ်တဲ့ ပစ္စတိုသေနတ် ၁ လက်၊ ဆိုင်ကယ် ၁ စီး၊ ဖုန်း ၁ လုံးသိမ်းဆည်းရမိခဲ့တယ်လို့ ဆိုပါတယ်။

ဦးလှမြင့်ဟာ စစ်ကော်မရှင်လက်အောက် ကျေးရွာပြည်သူ့စစ်ခေါင်းဆောင်၊ ကျေးရွာပြည်သူ့လုံခြုံရေးနှင့်အကြမ်းဖက်နှိမ်နင်းရေးခေါင်းဆောင်တဦးဖြစ်သလို ဒေသတွင်းမှာ ပြည်သူ့စစ်(ပျူစောထီး)အင်အားစုဆောင်းတာ၊ လူငယ်တွေရဲ့အချက်အလက်တွေစုဆောင်းပြီး ပေါင်းတလည်ရဲစခန်းနဲ့စစ်ကော်မရှင်တပ်ဖွဲ့ဝင်တွေထံ ပေးပို့တာ၊ လူငယ်တွေကို စစ်မှုထမ်းဖို့ ပေါ်တာဆွဲတာတွေပြုလုပ်နေသူဖြစ်လို့ ပစ်ခတ်ရှင်းလင်းခဲ့တာလို့ ဆိုပါတယ်။

စစ်အာဏာသိမ်းပြီးနောက် ၂၀၂၄ ကစတင်ကာ စစ်ကော်မရှင်တပ်က စစ်မှုထမ်းဟောင်း၊ ရဲမှုထမ်းဟောင်းတွေ၊ ၎င်းတို့ကိုထောက်ခံသူတွေ၊ ကြံ့ခိုင်ရေးပါတီဝင်တွေနဲ့ ရပ်ကွက်၊ကျေးရွာ၊ မြို့နယ်အဆင့်အလိုက် ပြည်သူ့လုံခြုံရေးနှင့်အကြမ်းဖက်နှိမ်းနင်းရေးအဖွဲ့ ဖွဲ့စည်းကာ စစ်ကော်မရှင်တပ်၊ ရဲ၊ ပျူစောထီးတပ်ဖွဲ့တွေနဲ့ ပူးပေါင်းဆောင်ရွက်နေကြတာပါ။

သိမ်းဆည်းရမိ ဦးလှမြင့်လက်ကိုင်ဖုန်းကနေ ပေါင်းတလည်နဲ့ဝက်ထီးကန်‌နယ်မြေက ရပ်ကွက်၊ ကျေးရွာပြည်သူ့စစ်စာရင်းတွေရရှိထားပြီး စစ်ကော်မရှင်ထောက်တိုင်တွေနဲ့ စစ်ကော်မရှင်လုပ်မဲ့ရွေးကောက်ပွဲအတွက် ပူးပေါင်းဆောင်ရွက်သူတွေကို စုံစမ်းပြီးထိရောက်စွာအရေးယူသွားမယ်လို့ ဆိုပါတယ်။

စက်တင်ဘာ ၁၁ ရက်ကလည်း ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပန်းသင်းပင်ကျေးရွာမှာ ပျူစောထီးတပ်ဖွဲ့ဝင် ၁ ဦး လယ်ခင်းထဲအသွား ပစ်သတ်ခံရလို့ သေဆုံးသွားတယ်လို့ သိရပါတယ်။

စာတည်း – ဟိန်းစံ

၆ လအတွင်းပေါက်နဲ့ မြိုင်မှာ အကြိမ်ရေ ၂၀၀ နီးပါးဗုံးကြဲခံရပြီး ဒေသခံ ၂၀ ကျော်သေဆုံး

မကွေး၊ အောက်တိုဘာ ၉၊ ၂၀၂၅။

မကွေးတိုင်း၊ ပေါက်မြို့နယ်မြောက်ပိုင်းရှိ သပြေညိုရေနံမှော်ကို စစ်ကော်မရှင်တပ်က ဗုံးကြဲတိုက်ခိုက်တာကြောင့် အလုပ်သမားလင်မယား ၂ ဦးသေဆုံးပြီး ကလေးဖြစ်သူဒဏ်ရာရခဲ့တယ်လို့ ပေါက်မြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။

အောက်တိုဘာ ၈ ရက်မနက် ၁၀ နာရီဝန်းကျင်မှာ ဂျိုင်ရိုကော်ပတာ ၃ စီးနဲ့ဗုံးကြဲတိုက်ခိုက်ခဲ့ရာ ရေနံမှော်ရှိ ရေနံလုပ်သားတွေရဲ့ ယာယီနေအိမ်တွေပေါ်ကျရောက်ပေါက်ကွဲပြီး အသက် ၃၀ အရွယ် ရေနံလုပ်သား လင်မယား ၂ ဦးသေဆုံးပြီး ၇ နှစ်အရွယ်ကလေး ၁ ဦးထိခိုက်ဒဏ်ရာရခဲ့တယ်လို့ ဆိုပါတယ်။

“ရေနံမှော်ဆိုတော့ အလုပ်သမားတွေက နေအိမ်ပုံစံမျိုးနဲ့ အဆောက်အအုံတွေဆောက်နေတာမျိုးတွေ ရှိတယ်။ အဲ့လိုနားကိုကျသွားတာ။ နေအိမ်ပဲဆိုပါတော့ အဲ့အိမ်မှာ မိသားစု ၃ ယောက်ရှိတယ်။ အမျိုးသားနဲ့ အမျိုးသမီး တောက်လျောက်ဆုံးတယ်၊ ကလေးလေးကထိခိုက်မှုရှိတယ် အသက်ရှင်နိုင်ပါ့မယ်လို့မသိရဘူး၊ ထိခိုက်ပြင်းထန်တယ်” လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက ပြောပါတယ်။

ဒါ့အပြင် ပေါက်မြို့နယ်နဲ့ မြိုင်မြို့နယ်အတွင်းကို စစ်ကော်မရှင်တပ်က လေကြောင်းကနေ မကြာခဏဗုံးကြဲတိုက်ခိုက်နေပြီး မေလကနေ အောက်တိုဘာ ၉ ရက်အတွင်း အဲ့ဒီမြို့နယ်တွေထဲကို အကြိမ်ရေ ၂၀၀ နီးပါးကြဲခံရပြီး ဒေသခံ ၂၀ ကျော်လည်းသေဆုံးခဲ့တယ်လို့ ပေါက်မြို့နယ်ပြည်သူ့ကာကွယ်ရေးတပ်ဖွဲ့ မှ စုစည်းထားတဲ့စာရင်းကိုးကားပြီး အထက်ပါတာဝန်ရှိသူက ပြောပါတယ်။

အောက်တိုဘာ ၉ ရက်ဒီမနက်ပိုင်းမှာလည်း ပေါက်နဲ့ မြိုင်အစပ်တနေရာကို ဗုံးကြဲတိုက်ခိုက်ခဲ့သေးတယ်လို့ သိရပြီး ဒီအခြေအနေကိုတော့ မြေလတ်အသံကဆက်လက်စုံစမ်းနေပါတယ်။

ဗုံးကြဲရာမှာ Y12၊ Y8၊ ပါရာမော်တာအပြင် အခုနောက်ပိုင်း ဂျိုင်ရိုကော်ပတာတွေကိုပါ အသုံးပြုလာကာ လေကြောင်းအပြင် မြေပြင်ကနေလည်းစစ်ကြောင်းထိုးတာတွေရှိတဲ့အတွက် ဒေသခံတွေလည်း စိုးရိမ်မှုမြင့်တက်နေတယ်လို့ ဆိုပါတယ်။

“မြေပြင်စစ်ကြောင်းကလဲ ၅ လပိုင်းကတည်း ပေါက်နယ်အတွင်းမှာရှိနေတာ အခုချိန်ထိပဲဆိုပါတော့။ တနေရာမဟုတ် တနေရာမှာစစ်ကြောင်းလုပ်နေလို့ ပြည်သူရှောင်တိမ်းနေရတာမျိုးတွေရှိတယ်။ ဒုက္ခရောက်နေတာမျိုးတွေရှိတယ် စိုးရိမ်မှုအမျိုးမျိုးနဲ့ပေါ့ ပြည်သူကတော့”လို့ အထက်ပါတာဝန်ရှိသူက ပြောပါတယ်။

ပြီးခဲ့တဲ့ အောက်တိုဘာ ၇ ရက်မှာလည်း မြိုင်မြို့နယ်၊ ကျောက်ခွက်ရေနံမှော်အနီးကို ပါရာမှော်တာ ၂ စီး နဲ့ ဗုံးကြဲချတိုက်ခိုက်ခဲ့တာကြောင့် အမျိုးသား ၃ ဦးသေဆုံးခဲ့ပါသေးတယ်။

၂၀၂၁၊ စစ်အာဏာသိမ်းချိန်ကနေ ၂၀၂၅၊ အောက်တိုဘာ ၈ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၃၃၉ ဦးရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

ကျော်ကြီး၊ ဟယ်သာ

မြေလတ်အသံ၊ အောက်တိုဘာ ၈၊ ၂၀၂၅။

မန္တလေးတိုင်း၊ နွားထိုးကြီးမြို့နယ်နဲ့ ဆားလင်းကြီးမြို့နယ်မှာ စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦးသေဆုံးပြီး ၁၁ ဦးထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

နွားထိုးကြီးမြို့နယ်၊ မကျီးကုန်းကျေးရွာက စစ်ရှောင်တွေနေတဲ့ဘုန်းကြီးကျောင်းကို အောက်တိုဘာ ၈ ရက် မနက် ၈ နာရီခွဲမှာ ဂျက်ဖိုက်တာနဲ့ ဗုံးကြဲခဲ့တာကြောင့် ဘုန်းကြီးကျောင်းဝင်းအတွင်း စစ်ရှောင်နေတဲ့ အမျိုးသမီး ၁ ဦးသေပြီး ၁၀ ဦးကျော်ဒဏ်ရာရတယ်လို့ ကူညီရေးလုပ်ဆောင်ပေးနေသူဆီက သိရပါတယ်။

“ရဲဘော်တွေလည်းမရှိဘဲ ဘုန်းကြီးကျောင်းကိုလေကြောင်းတိုက်ခိုက်မှုလုပ်သွားတာ။ ပြည်သူ ၁ ယောက် ဦးခေါင်းခွံလန်ပြီးဆုံးသွားတယ်။ ဒဏ်ရာရသူ ၁၀ ဦးကျော်တယ်။ ကလေး ၁ ယောက်ဆို ပေါင်ပြတ်သွားတယ်။”လို့ ကူညီကယ်ဆယ်ရေးလုပ်ဆောင်ပေးနေသူတဦးက ပြောပါတယ်။

ဗုံးထိမှန်တာကြောင့် အသက် ၄၅ နှစ်အရွယ် ဒေါ်ကြင်မှာ နေရာမှာတင်သေဆုံးပြီး စစ်ဘေးရှောင်ကလေးငယ်တွေ သံဃာတွေအပါအဝင် ၁၀ ဦးထက်မနည်းထိခိုက်ဒဏ်ရာရခဲ့ကာ ထိခိုက်သေဆုံးသူတွေကိုတော့ နီးစပ်ရာဆေးရုံဆေးခန်းတွေကို ပို့ဆောင်နေကြတယ်လို့ ဆိုပါတယ်။

ထိခိုက်သေဆုံးသူတွေက မကျီးကုန်းရွာခံတွေဖြစ်ပြီး တိုက်ပွဲအခြေအနေကြောင့် ကျေးရွာအတွင်း က နေအိမ်တွေမှာ မနေရဲဘဲ ဘုန်းကြီးကျောင်းထဲမှာ လာစုနေကြတာလို့ ဆိုပါတယ်။

မကျီးကုန်းကျေးရွာနဲ့ ၂ မိုင်ခန့်အကွာ စည်ပင်ကျေးရွာဘက်မှာ စစ်ကော်မရှင်တပ်နဲ့ ဒေသကာကွယ်ရေး ပူးပေါင်းတပ်တွေ တိုက်ပွဲဖြစ်နေတာ ၁၂ ရက်ရှိနေပြီလို့ သိရပါတယ်။

ဒါ့အပြင် စစ်ကိုင်းတိုင်း၊ ဆားလင်းကြီးမြို့နယ်၊ ကျားတက်ရွာကို အောက်တိုဘာ ၇ ရက်မှာလည်း စစ်ကော်မရှင်တပ်က လေကြောင်းကနေ ၂ ကြိမ်ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီက သိရပါတယ်။

ကျားတက်ရွာအနီးကို မနက်ပိုင်းမှာ ဂျက်ဖိုက်တာနဲ့ဗုံး ၂ လုံးကြဲချိန် ပေါက်ကွဲ၊ ထိခိုက်မှုမရှိခဲ့ဘဲ နေ့လယ် ၃ နာရီလောက်မှာ ရွာထိပ်ဆီဆိုင်ရှေ့ကို ထပ်မံဗုံးကြဲခဲ့တာကြောင့် ဆီဆိုင်ပိုင်ရှင် အသက် ၄၀ အရွယ် အမျိုးသမီး ၁ ဦးသေဆုံးပြီး အသက် ၅၀ အရွယ် အမျိုးသား ၁ ဦးထိခိုက် ဒဏ်ရာရခဲ့တယ်လို့ ဆိုပါတယ်။

“ကျတာက ကျားတက်ရွာထိပ်ပေါ့၊ ဓာတ်ဆီဆိုင်ရှေ့တည့်တည့်ကျသွားတာ ဆီဆိုင်ပိုင်ရှင်ကတော့ ပြေးမလွတ်တဲ့သဘောထင်ပါတယ်။ အမြင့်ကြီးပဲ အပေါ်အမြင့်ကြီးကနေမှကြဲချတာ မနက်ကလည်း ဖိုက်တာလုပ်ထားတာဆိုတော့ ဒီဟာတော့ မြင်လဲမမြင်ရဘူး အသံပဲကြားရတာ ၃စီးတပြိုင်ထဲပဲ “လို့ ဒေသခံအမျိုးသမီးတဦးက ပြောပါတယ်။

နေ့လယ်ပိုင်းမှာ ဂျိုင်ရိုကော်ပတာ ၃ စီးနဲ့ ဗုံး ၃ လုံးကြဲချရာ ဆီဆိုင်ရှေ့နဲ့ ဆိုင်အနီးအနောက်ဘက်က လယ်ကွင်းတွေထဲကို ကျရောက်ခဲ့ပြီး ဒေသခံတချို့လည်းထွက်ပြေးတိမ်းရှောင်ခဲ့ကြတယ်လို့ ဆိုပါတယ်။

အောက်တိုဘာပထမအတွင်း စစ်ကော်မရှင်တပ်တွေရဲ့ ဂျိုင်ရိုကော်ပတာတွေဟာ ပုလဲမြို့နယ်၊ ဆားလင်းကြီးမြို့နယ်တို့ကိုဖြတ်ပြီး ပေါက်နဲ့ မြိုင်မြို့နယ်ဘက်ကို နေ့စဥ်နီးပါးဗုံးကြဲနေပြီး အမြင့်ပိုင်းကနေ ပျံသန်းနေကြတာကြောင့် ဒေသခံတွေလည်းသတိမထားနိုင်ခဲ့ကြဘူးလို့ ဒေသခံအမျိုးသမီးက ပြောပါတယ်။

“ပြောရရင်တော့ရှောင်တော့ရှောင်ကြတယ်။ ဒါပေမယ့် မနက်ခင်းကတက်သွားတာက သူတို့ နှစ်ကြိမ်တောင် လုပ်သွားတာဆိုတော့ ထပ်ပြီးတော့မလာတော့ဘူးထင်ပြီး နေတာလဲပါရင်ပါမှာပေါ့။ အခုရက်ပိုင်းထဲမှာ ဒီဘက်တွေကိုသန်သန်လာတာလေ၊ မမြင်ဘူးတော့ကျတော့ မမြင်ရဘူး အတော်ကိုမြင့်တယ်။” လို့ သူကပြောပါတယ်။

စစ်ကော်မရှင်တပ်က စစ်ကိုင်း၊ မကွေးနဲ့ မန္တလေးတိုင်းတို့အတွင်းမှာ လေကြောင်းတိုက်ခိုက်မှုတွေကို ခပ်စိပ်စိပ်လုပ်ဆောင်လျှက်ရှိနေပြီး ပြီးခဲ့တဲ့ အောက်တိုဘာ ၆ ရက် သီတင်းကျွတ်လပြည့်ညမှာလည်း ချောင်းဦးမြို့နယ်၊ ဗုံတိုကျေးရွာအနီး ဒေသတွင်းသပိတ်အဖွဲ့တွေနဲ့ ပြည်သူတွေစုပေါင်း ဆီးမီးသပိတ်လုပ်နေချိန် ဗုံးကြဲခဲ့တာကြောင့် ဒေသခံဒါဇင်နဲ့ချီသေဆုံးခဲ့ပါသေးတယ်။

စာတည်း – လင်း