သေဆုံး

ပဲခူး၊ ဇူလိုင် ၁၊ ၂၀၂၅။

ပဲခူးတိုင်း၊ ရွှေကျင်နဲ့ဝေါက စစ်ကောင်စီတပ်စွဲထားတဲ့နေရာ ၂ ခု တပြိုင်တည်းတိုက်ခိုက်ခံရပြီး စစ်ကောင်စီတပ်သား ၄ ဦးသေဆုံးခဲ့တယ်လို့ ဇူလိုင် ၁ ရက်နေ့ ဒီနေ့မှာ ပဲခူးခရိုင်ပကဖက သတင်းထုတ်ပြန်ထားပါတယ်။

ဇွန် ၂၉ ရက်နေ့ နေ့လည် ၁၂ နာရီကျော်ခန့်မှာ ခမရ ၅၉၈ တပ်ရင်းရှေ့မှာ ဘန်ကာနဲ့ ကတုတ်ကျင်းတွေ ပြန်လည်တည်ဆောက်နေတဲ့ စစ်ကောင်စီတပ်ဖွဲ့ဝင်တွေကို လက်နက်ကြီးတွေနဲ့သွားရောက်ပစ်ခတ်ခဲ့သလို ဝေါမြို့နယ်၊ သူရဲသမိန်ကမ်းနားပိုင်းရှိ စစ်ကောင်စီတပ်လက်နက်ကြီးအထိုင်ချထားတဲ့နေရာက စစ်ကောင်စီတပ်ဖွဲ့ဝင်တွေကို စနိုက်ပါနဲ့သွားရောက်ပစ်ခတ်ခဲ့တယ်လို့ သိရပါတယ်။

“တပြိုင်နက်ထဲ ပစ်တာပါ။ သူရဲသူမိန်ရော၊ ၅၉၈ ရောပါ တန်ပြန်လက်နက်ကြီးပြန်ပစ်ပါတယ်။ လက်နက်ငယ်လဲ ဖောက်ပါတယ်။ ကျနော်တို့ဘက်က ထိခိုက်မှုမရှိပါ။”လို့ ပဲခူးခရိုင်ပကဖ တာဝန်ခံကပြောပါတယ်။

ပစ်ခတ်မှုအတွင်းမှာ သူရဲသမိန်ကမ်းနားပိုင်းရှိ စစ်ကောင်စီတပ်လက်နက်ကြီးအထိုင်ချထားတဲ့နေရာက စစ်ကောင်စီတပ်ဖွဲ့ဝင် ၁ ဦး၊ ခမရ ၅၉၈ ဘန်ကာပြုပြင်နေတဲ့ နေရာက ၃ ဦးသေဆုံးပြီး ထိခိုက်ဒဏ်ရာရသူတွေလည်းရှိခဲ့တယ်လို့ ဆိုပါတယ်။

စစ်ကောင်စီတပ်ဖွဲ့ဝင်တွေ သေဆုံးဒဏ်ရာရတာကိုတော့ ဒေသခံ သတင်းပေးတွေထံကနေတဆင့် အတည်ပြုထားနိုင်တာဖြစ်တယ်လို့ ဆိုပါတယ်။

အဆိုပါ တိုက်ခိုက်မှုကိုတော့ KNU/KNLA တပ်မဟာ(၃)၊ ရင်း(၇)နဲ့ ပူးပေါင်းတပ်တွေဖြစ်တဲ့ ပဲခူးခရိုင် ပကဖ၊ ဗျူဟာ(၃၆) ဒေါနတပ်ရင်းတို့က သွားရောက်တိုက်ခိုက်ခဲ့တာလို့ ဆိုပါတယ်။

မေ ၈ ရက်နေ့မှာ ခမရ ၅၉၈ တပ်ကို KNLA ပူးပေါင်းတပ်တွေက တိုက်ခိုက်သိမ်းပိုက်ခဲ့ပြီးနော​က် ၃ ရက်အကြာ မေ ၁၁ ရက်နေ့မှာ စစ်ကောင်စီတပ်က ပြန်လည်ရယူပြီးနောက် ပျက်စီးသွားတဲ့အဆောက်အဦတွေကို ပြန်လည်ပြင်ဆင်နေတာလို့ သိရပါတယ်။

စာတည်း – မြတ်

မြေလတ်အသံ၊ ဇူလိုင် ၁၊ ၂၀၂၅။

စစ်ကိုင်းမြို့နယ်၊ မင်းကွန်းတိုက်နယ်ကျေးရွာကို မီးရှို့ဖျက်ဆီးနေတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ရာ စစ်သား ၄ ဦးသေဆုံးပြီး ၄ ဦးအရှင်ဖမ်းမိခဲ့တယ်လို့ ဇွန် ၃၀ ရက်‌နေ့မှာ ယူနီကွန်း ပျောက်ကြားတပ်ဖွဲ့က ထုတ်ပြန်ပါတယ်။

မင်းကွန်းတောင်ရွာရှိ နဂါးပတ်တောင်ကျောင်းတိုက်အတွင်း အင်အား ၃၀ခန့်နဲ့ တပ်စွဲထားတဲ့ စခန်းကုန်းကို ဇွန် ၂၇ ရက်နေ့မှာ အလစ်အငိုက်ဝင်ရောက်တိုက်ခိုက်ခဲ့ရာ နာရီဝက်အတွင်း သိမ်းပိုက်နိုင်ခဲ့တာလို့ ဆိုပါတယ်။

“၂၇ ရက်နေ့မှာပါ။ နာရီပိုင်းနဲ့သိမ်းလာနိူင်ပါတယ်။ အလောင်း ၄ လောင်းတွေ့ခဲ့တယ်။ စခန်းကဘုန်းကြီးကျောင်းမှာ တပ်စွဲထားတာဖြစ်လို့ မီးမရှို့ခဲ့ပါ။ ကျန်တဲ့စကစတွေကတော့ မင်းကွန်းထဲကို ထွက်ပြေးကြတယ်ထင်တယ်ဗျ”လို့ ယူနီကွန်းပျောက်ကြားတပ်ဖွဲ့မှ တာဝန်ရှိသူကပြောပါတယ်။

တိုက်ပွဲအတွင်း စစ်ကောင်စီတပ်သား အသက် ၂၀ အရွယ် ၃ ဦးနဲ့ အသက် ၄၀ ကျော်အရွယ် ၁ ဦးတို့ကို ဖမ်းမိပြီး G-3 ၄ လက်၊ MA-1 ၂ လက်အပါအဝင် စစ်အသုံးအဆောင်ပစ္စည်းတချို့တို့ကို သိမ်းဆည်းရရှိခဲ့တယ်လို့ No More Dictatorship People Defence Force-NMDမှတာဝန်ရှိသူက ပြောပါတယ်။

လက်ရှိတိုက်ခိုက်သိမ်းပိုက်ခံရတဲ့ စစ်ကောင်စီစခန်းဟာ မင်းကွန်းတိုက်နယ်ရဲစခန်းနဲ့ ၁ မိုင်ကျော်ခန့်ကွာဝေးသလို စစ်ကောင်စီတပ်က မင်းကွန်းတိုက်နယ်တခုလုံးမှာ အင်အား ၃၀၀ ခန့်နဲ့တပ်ဖြန့်ထားတဲ့ကြားက အခုလိုသိမ်းပိုက်နိုင်ခဲ့တာဖြစ်တယ်လို့လည်း သူကပြောပါတယ်။

ဒီတိုက်ခိုက်မှုကို ယူနီကွန်းပျောက်ကြားတပ်ဖွဲ့ နဲ့ No More Dictatorship (NMD) တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

အဲဒီစစ်တပ်ဟာ ဇွန် ၂၇ ရက်နေ့၊ မနက်ပိုင်းမှာပဲ မင်းကွန်းကျေးရွာကိုမီးရှို့ဖျက်ဆီးခဲ့သေးတယ်လို့ သိရပါတယ်။

အိမ်ခြေ ၆၀၀ ခန့်ရှိတဲ့ မင်းကွန်းတောင်ရွာကို စစ်ကောင်စီတပ်က ဇွန် ၈ ရက်နေ့ကစတင်ကာ စစ်ကြောင်းထိုးဝင်ရောက်လာခဲ့ပါတယ်။
ဒီစစ်ကြောင်းဟာ မင်းကွန်းရွာရဲ့ မြောက်ဘက်ကတော်လှန်ရေးတပ် တပ်တွေစိုးမိုးထားတဲ့ ကင်းရွာနဲ့ ချောင်းမကြီးရွာတွေကို စစ်ကြောင်းထိုးဝင်ရောက်ခဲ့ပြီး ကျောင်းထိုင်ဆရာတော် ၁ ပါးနဲ့ ပြည်သူ ၃ ဦး ကို သတ်ဖြတ်ခဲ့တယ်လို့ သိရပါတယ်။

အဲဒီနောက် ကင်းရွာနဲ့ ချောင်းမကြီးရွာတို့ကို မီးရှို့ကာ စစ်ကြောင်းနှစ် ကြောင်းခွဲပြီး တပ်စွဲခဲ့တယ်လို့ သိရပါတယ်။

ဇွန် ၂၈ ရက်နေ့မှာလည်း တော်လှန်ရေးပူးပေါင်းတပ်တွေက ချောင်းမကြီးရွာကို တပ်စွဲထားတဲ့ စစ်ကောင်စီတပ်ကို ဝင်ရောက်တိုက်ခိုက်ခဲ့တာမို့ စစ်ကောင်စီတပ်အကျဆုံးများခဲ့ပြီး မင်းကွန်းရွာထဲကို ပြန်ဆုတ်သွားကာ ဒီ‌နေ့အထိစစ်တပ်က မင်းကွန်းရွာထဲမှာ တပ်စွဲထားဆဲဖြစ်တယ်လို့ သိရပါတယ်။

စာတည်း – မြတ်

ဖြူး၊ ဇူလိုင် ၃၀၊ ၂၀၂၅။

ပဲခူးတိုင်း၊ ဖြူးမြို့နယ်၊ ဝဲဒေါင့်ဝဲကြီးကျေးရွာတိုက်ပွဲအတွင်းမှာ ကလေး ၁ ဦးအပါအဝင် ပြည်သူ ၄ ဦးသေဆုံးပြီး ၅၀ ကျော်ဒဏ်ရာရတယ်လို့ ကူညီဆောင်ရွက်ပေးနေသူတွေဆီက သိရပါတယ်။

ဇွန် ၂၉ ရက်မနက် ၂ နာရီခန့်မှာ ကျေးရွာအတွင်းတပ်စွဲထားတဲ့ စစ်ကောင်စီအဖွဲ့ကို ဖြူးပကဖ ပူးပေါင်းတပ်တွေဘက်က လာရောက်တိုက်ခိုက်ရာမှ တိုက်ပွဲပြင်းထန်ခဲ့ရာ နှစ်ဖက်လက်နက်ကြီး ပစ်ခတ်တာရှိသလို စစ်ကောင်စီဘက်က လေကြောင်းကနေလာရောက်ဗုံးကြဲတာတွေလည်းရှိခဲ့တယ်လို့ ဆိုပါတယ်။

“နှစ်ဖက်ပွဲကနေချိန်မှာ စကစဘက်က လေကြောင်းအကူအညီတောင်းတဲ့အချိန်မှာ လာကြဲသွားတာလည်းပါတယ်။ အစမှန်တဲ့ဒဏ်ရာများတယ်။ ဗုံးကြဲစတွေနဲ့ လက်နက်ကြီးစမှန်တာတွေ ရှိတယ်”လို့ ကူညီဆောင်ရွက်ပေးနေသူတဦးက ပြောပါတယ်။

လေကြောင်းကနေကြဲတဲ့ ဗုံးပေါက်ကွဲစတွေနဲ့ လက်နက်ကြီးစတွေမှန်တာကြောင့် အသက် ၇ နှစ်အရွယ် မောင်ဇွဲပြည့်၊ အသက် ၃၀ ကျော်အရွယ်အမျိုးသမီး ၁ ဦး၊ ၃၅ နှစ်အရွယ် ဒေါ်သီတာဦး နဲ့ ၅၆ နှစ်အရွယ် ဒေါ်ခင်အေးစုတို့ သေဆုံးခဲ့တယ်လို့ ဆိုပါတယ်။

ဒါ့အပြင် ကလေးငယ် ၄ ဦးအပါအဝင် အမျိုးသမီး၊ အမျိုးသား ၄၅ ဦးခန့်ဒဏ်ရာခဲ့ကာ စောင့်ကြည့်ကုသရမယ့်အခြေအနေကြောင့် ဆေးရုံမှာကုသမှုခံယူနေရသူ ကလေးငယ် ၃ ဦးအပါအဝင် ၂၀ ဦးခန့်ရှိနေသေးပြီး ကျန်သူတွေကတော့ ဆေးရုံကနေ နေအိမ်ပြန်သွားကြပြီလို့ သိရပါတယ်။

ဆေးရုံမှာကုသဆဲ လူနာတွေအနက် ၇ လသားအရွယ်ကလေးငယ် အပါအဝင် ၅ ဦးက စိုးရိမ်ရအခြေအနေရှိပြီး ကျန်သူတွေကတော့ ဦးခေါင်း၊ လက်၊ ခြေထောက်၊ ခန္ဓာကိုယ်တွေမှာ အစမှန်ဒဏ်ရာတွေရထားကြတာလို့ ဆိုပါတယ်။

ဝဲဒေါင့်ဝဲကြီးကျေးရွာရှိ စစ်ကောင်စီကင်းစခန်းကို တိုက်ခိုက်ခဲ့ရာ တိုက်ပွဲ ၅ နာရီခန့်ကြာမြင့်ခဲ့ပြီး တိုက်ပွဲအတွင်းမှာ စစ်ကောင်စီဘက်က ၁၀ ဦးထက်မနည်းသေဆုံးကာ ရန်ကုန်တိုင်းပကဖ အဖွဲ့ဝင် ၁ ဦးသေဆုံးပြီး ဖြူးပကဖအဖွဲ့ဝင်တဦးဒဏ်ရာရတယ်လို့ ဖြူးပကဖကထုတ်ပြန်ထားပါတယ်။

အဆိုပါတိုက်ပွဲအခြေအနေနဲ့ပတ်သက်ပြီး ဖြူးပကဖထံကို မြေလတ်အသံက ဆက်သွယ်မေးမြန်းထားပေမယ့် ပြန်လည်ဖြေကြားတာမျိုးမရှိပါဘူး။

အဆိုပါ တိုက်ခိုက်မှုကို ဖြူးမြို့နယ်ပကဖ၊ ရန်ကုန်တိုင်းပကဖ တိုက်ခိုက်ရေးတပ်ဖွဲ့(၃)၊ ဧရာဝတီအမှတ်(၃)တပ်ရင်းနှင့် အာဠာဝကစစ်ကြောင်းတို့ ပူးပေါင်းတိုက်ခိုက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဇွန် ၂၅ ရက်ကလည်း ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်တွေအတွင်းက ရန်ကုန်-မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့စခန်း ၉ ခုကို တပြိုင်နက် တိုက်ခိုက်ခံရပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံးကာ ရဲအုပ် ၁ ဦးအပါ စစ်သုံ့ပန်း ၃ ဦးကို ဖမ်းဆီးရရှိခဲ့ပြီး တော်လှန်ရေးတပ်ဖွဲ့တွေဘက်ကလည်း ၁ ဦး သေဆုံး၊ ၂ ဦး ထိခိုက်ဒဏ်ရာရခဲ့သလို လက်နက်ခဲယမ်းအများအပြားကိုလည်း သိမ်းဆည်းရမိခဲ့တယ်လို့ NUG ကာကွယ်ရေးဝန်ကြီးဌာနထုတ်ပြန်ချက်အရ သိရပါတယ်။

စာတည်း – လင်း

လက်နက်နဲ့ကျည်တွေလည်း PDF သိမ်းဆည်း

ပျော်ဘွယ်၊ ဇွန် ၂၈၊ ၂၀၂၅။

မန္တလေးတိုင်း၊ ပျော်ဘွယ်မြို့နယ်၊ ညောင်ကုန်းရဲစခန်းအနီးမှာ ဆက်ကြေးကောက်နေတဲ့ စစ်ကောင်စီအဖွဲ့ဝင်တွေ တိုက်ခိုက်ခံရပြီး အရာခံဗိုလ်အပါအဝင် ၄ ဦးသေဆုံးကာ လက်နက်ခဲယမ်းအချို့ သိမ်းဆည်းခဲ့တယ်လို့ အောင်ဆန်းမြေအဖွဲ့ဆီကနေ သိရပါတယ်။

ဇွန် ၂၆ ရက်မနက် ၈ နာရီဝန်းကျင်မှာ ပျော်ဘွယ်မြို့နယ်၊ ညောင်ကုန်းရဲစခန်းအနီးမှာ လမ်းသွား၊ လမ်းလာပြည်သူတွေဆီကနေ ဆက်ကြေးကောက်နေတဲ့ စစ်ကောင်စီတပ်ဖွဲ့ဝင် ၆ ဦး ကိုတိုက်ခိုက်ခဲ့တာလို့ ဆိုပါတယ်။

“ရဲစခန်းရဲ့ လမ်းဘေးဝဲယာမှာကောက်နေကြတာဗျ။ စစ်**တွေ ဆက်ကြေးကောက်တာကို သတင်းကြိုထောက်ပြီး အသာစီးရနိုင်မယ့်အချိန် ဝင်ရောက်တိုက်ခိုက်ခဲ့တာပါ။ လက်ဦးမှုရရှိခဲ့လို့ ၃ မိနစ်နဲ့ အပြီးပွဲက(တိုက်ခိုက်) နိုင်ခဲ့တာ။” လို့ အောင်ဆန်းမြေအဖွဲ့ရဲ့ တာဝန်ရှိသူတဦးက မြေလတ်အသံကို ပြောပါတယ်။

တိုက်ခိုက်ချိန် အရာခံဗိုလ် ၁ ဦးနဲ့ စစ်ကောင်စီတပ်သား ၃ ဦးသေဆုံးပြီး ပျူစောထီး ၁ ဦးနဲ့ ရဲ ၁ ဦးကတော့ လက်နက်တွေယူပြီးထွက်ပြေးသွားကြတယ်လို့ ဆိုပါတယ်။

တိုက်ခိုက်မှုအတွင်း MA -1 ၃ လက်၊ ၅.၅၆ ကျည် ၆၄ တောင့်၊ ဖုန်း ၂ လုံးနဲ့ ခရီးသွားပြည်သူတွေဆီကနေ ဆက်ကြေးကောက်ခံထားတဲ့ ငွေကျပ် ၁၈၀,၅၀၀ ကို သိမ်းဆည်းရရှိခဲ့တယ်လို့ အထက်ပါတာဝန်ရှိသူကပြောပါတယ်။

ပစ်ခတ်မှုဖြစ်ခဲ့တဲ့နေရာဟာ ရဲစခန်းနဲ့ ၅ မိနစ်လောက်သွားရင်ရောက်တဲ့ အကွာအဝေးဖြစ်ပြီး တိုက်ခိုက်မှုအပြီး ၁ နာရီလောက်အကြာမှာ ရဲတွေထွက်လာပြီး အလောင်းတွေကို ကောက်ယူသွားတယ်လို့ ဆိုပါတယ်။

“ကျနော်တို့က ပြည်သူ့အားနဲ့ ရှေ့ဆက်နေရတဲ့ ဒေသခံကာကွယ်ရေးတပ်ဖွဲ့ Local PDFဖြစ်တဲ့အတွက် ပြည်သူတွေရဲ့ ယုံကြည်အားကိုးထောက်ခံမှု အပြည့်ဝလိုအပ်ပါတယ်။ ကျတော်တို့ ရဲဘော်တွေ အနေနဲ့လည်း ဒီထပ်ပိုကြိုးစားတော်လှန်သွားမယ်။”လို့ အထက်ပါ တာဝန်ရှိသူတဦးက ဆက်ပြောပါတယ်။

ပြီးခဲ့တဲ့ ဇွန် ၈ ရက်မနက်ပိုင်းကလည်း ရန်ကုန်-မန္တလေး အမြန်လမ်းမှာ နမ့်စန်လေတပ်အတွက် လေယာဉ်ဆီသယ်ဆောင်လာတဲ့ ဆီဘောက်ဆာကား ၁ စီးနဲ့ စစ်သား ၂ ဦးကို Aung San’s Land Natmauk အဖွဲ့က ဖမ်းဆီးမိခဲ့တယ်လို့ သိရပါတယ်။

စာတည်း – လင်း

ပဲခူး၊ ဇွန် ၂၅၊ ၂၀၂၅။

ပဲခူးတိုင်း၊ ညောင်လေးပင်၊ ကျောက်တံခါး၊ ဖြူးမြို့နယ်တွေအတွင်းက ရန်ကုန်-မန္တလေး အမြန်လမ်းဟောင်းပေါ်ရှိ စစ်ကောင်စီတပ်ဖွဲ့စခန်း ၉ခုကို တပြိုင်နက်တိုက်ခိုက်ခဲ့တယ်လို့ အမျိုးသားညီညွတ်ရေးအစိုးရ- NUG ကာကွယ်ရေးဝန်ကြီးဌာနက ထုတ်ပြန်ပါတယ်။

အဆိုပါစခန်းတွေကို ဇွန် ၂၅ ရက် ဒီကနေ့မနက်အစောပိုင်းမှာ တပြိုင်နက်တိုက်ခိုက်ခဲ့တာဖြစ်ပြီး တိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံး၊ ရဲအုပ် ၁ ဦးအပါ စစ်သုံ့ပန်း ၃ ဦးကို ဖမ်းဆီးရရှိခဲ့ပြီး တော်လှန်ရေးတပ်ဖွဲ့တွေဘက်ကလည်း ၁ ဦး သေဆုံး ၂ ဦး ထိခိုက်ဒဏ်ရာရခဲ့တယ်လို့ ဖော်ပြပါတယ်။

အဆိုပါစခန်း ၉ ခုအနက် ညောင်လေးပင်နဲ့ကျောက်တံခါးမြို့အကြား တော်ဝိကျေးရွာစစ်ကောင်စီတပ်စခန်းကို ဇွန် ၂၅ ရက်မနက် ၁ နာရီမှာဝင်ရောက်တိုက်ခိုက်ခဲ့ပြီး မနက် ၂ နာရီမှာ အပြီးသတ်သိမ်းပိုက်နိုင်ခဲ့တယ်လို့ ပဲခူးရှေ့ခြမ်းမှာ စစ်ရေးလှုပ်ရှားနေတဲ့ တော်ဝင်ဒေါင်းတပ်ရင်းက ပြောပါတယ်။

အင်အား ၅၀ ခန့်ရှိ တော်ဝိစစ်တပ်အထိုင်စခန်းကို ၁ နာရီအကြာတိုက်ခိုက်ခဲ့ရပြီး တိုက်ပွဲတွေအတွင်း စစ်ကောင်စီဘက်က ၁၃ ဦးသေဆုံးပြီး ၃ ဦး အရှင်ဖမ်းမိကာ ကျန်စစ်ကောင်စီတပ်ဖွဲ့တွေဟာ စခန်းစွန့်ခွာထွက်ပြေးသွားခဲ့တယ်လို့ ဆိုပါတယ်။

“ သူတို့ကရွာထိပ်ဘုန်းကြီးကျောင်းကို အခြေပြုပြီးတော့ အထိုင်ချထားတာ၊ အဲဒီအထိုင်ချထားတဲ့နေရာတွေကို ကျနော်တို့ အဖွဲ့တွေခွဲပြီးရှင်းလင်းခဲ့တာဆိုတော့ သူတို့အခြေပြုနေထိုင်တဲ့နေရာတွေကိုအကုန်လုံး တိုက်ခိုက်ချေမှုန်းနိုင်ခဲ့တယ်၊ ပြီးတော့ ကျနော်တို့မီးရှို့ဖျက်ဆီးခဲ့တယ်၊ စုစုပေါင်း သေဆုံးတာက ၁၃ ဦး သူတို့ရဲ့ရုပ်အလောင်းတွေကိုလည်း အဲ့ဒီနားမှာပဲမီးရှို့ဖျက်ဆီးခဲ့တယ်” လို့ တော်ဝင်ဒေါင်းတပ်ရင်းသတင်းနဲ့ပြန်ကြားရေးတာဝန်ခံက မြေလတ်အသံကို ပြောပါတယ်။

ဒါ့အပြင် တော်ဝိစခန်းသိမ်းတိုက်ပွဲအတွင်း ရဲအုပ် ၁ ဦး၊ ရဲအရာခံဗိုလ် ၁ ဦးနဲ့ စစ်ကောင်စီတပ်သား ၁ ဦး ကို အရှင်ဖမ်းမိခဲ့ကာ ၎င်းစခန်းက MA3 ၁ လက်၊ MA 13 ၁ လက်၊ ၆ လုံးပြူးသေနတ် ၂ လက်၊ BA 63 (G3) ၃ လက်၊ ၆၀ မမ ကွန်မန်ဒိုစိန်ပြောင်း ၁ လက်၊ ၄၀ မမ ဗုံးပစ်လောင်ချာ ၁ လက်နဲ့ ကျည်မျိုးစုံအပါ စခန်းအားလုံးကနေ စုစုပေါင်း လက်နက်ကြီး၊ လက်နက်ငယ် ၁၆ လက် ခဲယမ်း၊ စစ်သုံးပစ္စည်းအများအပြားသိမ်းဆည်းနိုင်ခဲ့တယ်လို့ သိရပါတယ်။

တိုက်ခိုက်မှုကို အမှတ် ၂ စစ်ဆင်ရေးနယ်မြေ၊ တိုင်းစစ်ဌာန(ပဲခူး)၊ ဗျူဟာ ၂၄ နဂါးနီစစ်ကြောင်း၊ အာဠာဝက တပ်ရင်း၊ အမှတ် ၃၅၀၃ တပ်ရင်း၊ ဖြူး(ပကဖ)၊ ဗျူဟာ ၂၅၊ အမှတ် ၃၇၀၂ တပ်ရင်း၊ Spring Warriors Column၊ KNLA တပ်ရင်း ၉၊ ဗျူဟာ ၂၆၊ တော်ဝင်ဒေါင်းတပ်ရင်း၊ တောကျီးကန်းတပ်ရင်းတွေက ပူးပေါင်း တိုက်ခိုက်ခဲ့တာလို့ ကာကွယ်ရေးဝန်ကြီးဌာနက ထုတ်ပြန်ထားပါတယ်။

စာတည်း – ဟိန်းစံ

နွားထိုးကြီး၊ ဇွန် ၂၅၊ ၂၀၂၅။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်မှာ စစ်ကောင်စီစစ်ကြောင်းကို ကာကွယ်ရေးတပ်ဖွဲ့ဝင်တွေက စောင့်ကြိုတိုက်ခိုက်ရာ စစ်ကောင်စီအဖွဲ့ဝင် ၁၃ ဦးသေဆုံးပြီး ဒုတပ်ကြပ် ၁ ဦး အရှင်ဖမ်းမိခဲ့တယ်လို့ Natogyi People Defence Force အဖွဲ့ဆီကနေ သိရပါတယ်။

ဇွန် ၂၀ ရက် မနက် ၇ နာရီခွဲဝန်းကျင်မှာ နွားထိုးကြီးမြို့နယ်၊ သာစည်လေးကျေးရွာအနီးမှာ စစ်ကောင်စီ အင်အား ၁၃၀ ဝန်းကျင်ပါစစ်ကြောင်းကို ကြားဖြတ်စောင့်ကြိုတိုက်ခိုက်ခဲ့တယ်လို့ ဆိုပါတယ်။

တိုက်ပွဲအတွင်း စစ်ကောင်စီအဖွဲ့ဝင် ၁၃ ဦးသေဆုံးကာ တပ်မ ၈၈ က ဒုတပ်ကြပ် ၁ ဦး အရှင်ဖမ်းမိပြီး MA-1 ၁ လက်၊ MA-3 ၁ လက်၊ G-3 ကျည် ၉၂ တောင့်၊ ၅.၅၆ ကျည် ၁၅၀၀ တောင့်၊ M9 ၁၂ လုံး၊ ၆၀ မမ ၈ လုံး၊ ၆၀ မမ ဒေါက် ၁ ခု၊ RPG ၂ ဖူး၊ RPG ကျည် ၂ တောင့်၊ နင်းမိုင်း ၁၄ လုံး၊ လက်ပစ်ဗုံး ၁၁ လုံး၊ Drone Shooter ၁ လက် နဲ့ ကျည်ဘောက် ၆ ခု တို့ သိမ်းဆည်းရရှိခဲ့တယ်လို့ သိရပါတယ်။

“တိုက်ပွဲကြာချိန် ၂ နာရီခွဲလောက်တော့ ကြာမြင့်သွားတယ်ဗျ။ မြေပြင်စစ်ကြောင်းကို တိုက်တာဖြစ်တဲ့အတွက် အကွာအဝေးကိုတော့ ပြောဖို့ခက်မယ်။ သူတို့ဘက်ကလည်း လက်နက်ကြီး လက်နက်ငယ်တွေနဲ့ ပြန်ထုတယ်။ မျက်မြင် သေဆုံးသွားတဲ့ စစ်သား ၁၃ ဦးထဲက ၁၂ ဦး အလောင်းကိုတော့ ပြန်ကောက်သွားကြတယ်ဗျ။ အလောင်း ၁ လောင်းကိုတော့ ကျနော်တို့ဘဲ သင်္ဂြိုဟ်ပေးခဲ့တာ။” လို့ Natogyi PDF ရဲ့တပ်ရင်းမှူး ကိုစိုးအောင်က မြေလတ်အသံကို ပြောပါတယ်။

အရှင်ဖမ်းဆီးရမိခဲ့တဲ့ ဒုတပ်ကြပ် ၁ ဦးကိုတော့ သေချာထိန်းသိမ်းပေးထားပြီး သူရဲ့ အခြေအနေ အသေးစိတ်ကိုတော့ လုံခြုံရေးအရမထုတ်ပြန်သေးဘူးလို့ ဆိုပါတယ်။

တိုက်ခိုက်မှုအပြီးမှာ စစ်ကောင်စီစစ်ကြောင်းဟာ အနီးနားဝန်းကျင်က ကျေးရွာတွေကို လက်နက်ကြီး၊ လက်နက်ငယ်တွေနဲ့ ရမ်းသမ်းပစ်ခတ်ခဲ့တယ်လို့ တပ်ရင်းမှူး ကိုစိုးအောင်က မြေလတ်အသံကို ပြောပါတယ်။

အဆိုပါ တိုက်ခိုက်မှုကို မြင်းခြံခရိုင် အမှတ် ၁၀ တပ်ရင်း၊ မြင်းခြံခရိုင် အမှတ် ၄ တပ်ရင်းနဲ့ တံတားဦးမြို့နယ် ပြည်သူ့ကာကွယ်ရေးအဖွဲ့တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

စာတည်း – လင်း

မြို့သာ၊ ဇွန် ၂၄၊ ၂၀၂၅။

မန္တလေးတိုင်း၊ ငါန်းဇွန်မြို့နယ်၊ မြို့သာမြို့ရဲစခန်းကနေ ထွက်လာတဲ့ စစ်ကောင်စီတပ်ဖွဲ့တွေ လိုက်ပါလာတဲ့ အိမ်စီးကားကို မိုင်းဆွဲတိုက်ခိုက်ခဲ့ရာ ဗိုလ်အဆင့်အပါ ၂ ဦးသေဆုံးခဲ့တယ်လို့ နဂါးနီပြောက်ကျားတပ်ဖွဲ့-မြင်းခြံဆီက သိရပါတယ်။

ဂွေးကုန်းရွာစစ်ကောင်စီတပ်စခန်းကို မောင်းနှင်လာတဲ့ Honda Fit အိမ်စီးကားကို မြို့သာနဲ့ဂွေးကုန်း အကြားလမ်းတနေရာမှာ ဇွန် ၂၄ ရက် ဒီကနေ့မနက် ၇ နာရီခွဲလောက်က မိုင်းဆွဲတိုက်ခိုက်ခဲ့တာလို့ ဆိုပါတယ်။

“ မိုင်း ၂ လုံးနဲ့ဆွဲခဲ့တာ၊ တိုက်ခိုက်တဲ့အချိန် ကားက မိုင်းကွင်းအလည်တည့်တည့်မှာ ထိမှန်ပြီးတော့ ကားရဲ့မှန်စတွေနဲ့ ကားရဲ့အပိုင်းအစတွေက အဲ့ဒီအနားမှာပြုတ်ကျကျန်ခဲ့တယ်။ ဗိုလ်အပါအဝင် ၂ ကောင်သေဆုံးတယ်၊ နောက်ပြီးတော့ ၂ ကောင်ဒဏ်ရာအပြင်းအထန်ရတယ်” လို့ နဂါးနီပြောက်ကျားတပ်ဖွဲ့-မြင်းခြံ တာဝန်ခံက မြေလတ်အသံကို ပြောပါတယ်။

အိမ်စီးကားပေါ်မှာ စစ်ကောင်စီတပ်ဖွဲ့ဝင် ၅ ဦး လိုက်ပါလာတာဖြစ်ပြီး မိုင်းဆွဲခံရတာကြောင့် ဗိုလ်အဆင့် စစ်ကောင်စီတပ်အရာရှိ ၁ ဦးအပါ ၂ ဦးသေဆုံးပြီး ၂ ဦးဒဏ်ရာရရှိကြောင်း ဒေသခံတွေရဲ့ ပြောဆိုချက်ကို ကိုးကားပြီး အထက်ပါတာဝန်ခံက ဆက်ပြောပါတယ်။

မြို့သာရဲစခန်းထဲမှာ အထိုင်ချထားတဲ့ စစ်တပ်ဟာ မကြာခဏတပ်ချိန်းနေတာကြောင့် သေဆုံး၊ ဒဏ်ရာရစစ်ကောင်စီတပ်ဖွဲ့ဝင်ရဲ့ တပ်ရင်း၊တပ်ဖွဲ့ကိုတော့ မသိရဘဲ သေဆုံးအလောင်းတွေနဲ့ ဒဏ်ရာရရှိသူတွေကို ဂွေးကုန်းရွာအတွင်း ပို့ဆောင်ခဲ့ကာ စစ်ကောင်စီတပ်သားတွေ စီးနင်းလာတဲ့ ကားကိုလည်း နောက်ထပ်ကားတစီးနဲ့ သယ်သွားတယ်လို့ သိရပါတယ်။

ပြီးခဲ့တဲ့ ဇွန် ၁၆ ရက်ကလည်း ငါန်းဇွန်မြို့နယ် မြို့သာဆေးရုံအနီးတွင် ဂိတ်ချပြီး ဆက်ကြေးကောက်နေတဲ့ စစ်ကောင်စီတပ်ဖွဲဝင်တွေကို နဂါးနီပြောက်ကျားတပ်ဖွဲ့-မြင်းခြံက မိုင်းဆွဲတိုက်ခဲ့သေးတယ်လို့ သိရပါတယ်။

စာတည်း – ဟိန်းစံ