သေဆုံး

စဉ့်ကိုင်၊ မတ် ၁၆၊ ၂၀၂၅။

မန္တလေးတိုင်း၊ စဉ့်ကိုင်မြို့နယ်၊ မီးသွေးဖုတ်ကျေးရွာအနီးမှာ ဘုရားဖူးယာဉ် ချောက်ထဲထိုးကျတိမ်းမှောက်လို့ ၆ ဦးသေဆုံးပြီး ၆ ဦးဒဏ်ရာရခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

မတ် ၁၅ ရက် မနေ့ညနေ ၅ နာရီခန့်မှာ အုန်းချောရွာ၊ ရွှေစာရံဘုရားပွဲတော်က‌နေပြန်လာပြီး အုန်းချော-ကျောက်ဆည်ခရိုင်ချင်းဆက်လမ်းအတိုင်း မောင်းနှင်လာတဲ့ ဟိုင်းလတ် ၁ ခန်းခွဲ မော်တော်ယာဉ်ဟာ အခင်းဖြစ်ပွားရာနေရာအရောက်မှာ ပေ ၃၀ ခန့်အနက်ရှိ လမ်းဘေးချောက်ထဲကို ထိုးကျတိမ်းမှောက်ခဲ့တာလို့ ဆိုပါတယ်။

” သူတို့ကားက ပြင်ဦးလွင်ဘက်ကို ပြန်မတက်ဘဲနဲ့ ကျောက်ဆည်ဘက်လမ်းကိုသွားတာမှာ မှောက်တာ။ မှောက်တာက မျက်မြင်တွေပြောကြားချက်အရကတော့ ကား ၁ စီးကိုကျော်တက်ရာကနေ အရှိန်မထိန်းနိုင်ဘဲ ချောက်ထဲကျသွားတာလို့တော့ သိရတယ်။”လို့ ကူညီကယ်ဆယ်ရေးပြုလုပ်ပေးခဲ့သူတဦးက ပြောပါတယ်။

ကားချောက်ထဲကျလို့ ယာဉ်ပေါ်ပါ ၁၄ ဦးအနက် အသက် ၁၂ အရွယ် မိန်းကလေး ၁ ဦး ၊ အသက် ၁၀ နှစ်အရွယ် ယောက်ျားလေး ၁ ဦးနဲ့ အသက် ၄၀ အရွယ် အမျိုးသား ၁ ဦး နေရာမှာသေဆုံးခဲ့ပြီး ကျန်ဒဏ်ရာရသူတွေကို စဉ့်ကိုင်ဆေးရုံသို့ ပို့ဆောင်ချိန်မှာ အသက် ၄၀ ကျော်အရွယ် အမျိုးသမီး ၃ ဦး ထပ်မံသေဆုံးခဲ့တယ်လို့ ဆိုပါတယ်။

ဒဏ်ရာရသူ ၆ ဦးမှာလည်း စိုးရိမ်ရတဲ့အခြေနေရှိနေလို့ စဉ့်ကိုင်ဆေးရုံကတဆင့် မန္တလေးပြည်သူ့ဆေးရုံကြီးကို လွှဲပြောင်းကာ ဆေးကုသနေရတယ်လို့ သိရပါတယ်။

သေဆုံးသူတွေဟာ ပြင်ဦးလွင်မြို့နယ်၊ မိုးကြိုးပစ်ကျေးရွာနေသူတွေဖြစ်ပြီး ရွှေစာရံဘုရားပွဲကို လာရောက်လည်ပတ်သူတွေဖြစ်ကာ ရွှေစာရံဘုရားပွဲကို တပေါင်းလပြည့်နေ့ မတ် ၁၃ ရက်ကနေ ၂၂ ရက် အထိ ကျင်းပနေတာဖြစ်ပြီး ဘုရားပွဲမှာ အနယ်နယ်အရပ်ရပ်က ဘုရားဖူးလာပြည်သူတွေနဲ့ စည်ကားနေတယ်လို့ သိရပါတယ်။

စာတည်း – ဟိန်းစံ

မန္တလေး၊ မတ် ၁၄၊ ၂၀၂၅။

မန္တလေးတိုင်း၊ ပြည်ကြီးတံခွန်မြို့နယ်၊ ညောင်ပင်သာရွာကနေ ပျောက်ဆုံးနေတဲ့ ညီအကို ၂ ဦးကို ၈ ရက်အကြာမှာ သေဆုံးလျက်ပြန်တွေ့ခဲ့တယ်လို့ မိသားစုနဲ့နီးစပ်သူတွေထံက သိရပါတယ်။

ပျောက်ဆုံးနေသူတွေဟာ အသက် ၁၃ နှစ် မောင်အောင်ခန့်ဦးနဲ့ ညီဝမ်းကွဲတော်စပ်သူ အသက် ၁၀ နှစ် မောင်ပြည့်စုံကျော်တို့ဖြစ်ပြီး ၎င်းတို့ ၂ ဦးဟာ မတ် ၂ ရက်ကစတင်ကာ နေအိမ်တွေကနေပျောက်ဆုံးနေရာက စဉ့်ကိုင်မြို့နယ်၊ ရဲရွာသစ်ကျေးရွာရဲ့အနောက်ဘက်လျှိုမြောင်အတွင်းမှာ မတ် ၁၀ ရက်က သေဆုံးလျက်ပြန်တွေ့ခဲ့ရတာလို့ ဆိုပါတယ်။

” စခန်းကတွေ့တယ်ဆိုလို့ အကြောင်းကြားလို့ သိရတာ။ အလောင်းမြင်ရချိန်မှာတော့ ခြေထောက်တွေ၊ခေါင်းတွေ အကုန်ကြေနေတာကိုတော့ မြင်ရတယ်။ နှစ်ယောက်စလုံးက အဲလိုတွေ့ရတာ။ ကျောက်ခဲနဲ့ထုသတ်ထားတယ်လို့တော့ သိထားရတယ်။”လို့ မိသားစုနဲ့နီးစပ်သူတဦး မြေလတ်အသံကို ပြောပါတယ်။

ပျောက်ဆုံးကလေး၂ ဦးအသတ်ခံရတာနဲ့ပတ်သက်ပြီး ကျူးလွန်သူတွေလို့ယူဆထားတဲ့ ပြည်ကြီးတံခွန်မြို့နယ်၊ ညောင်ဝန်းကျေးရွာနေ လူငယ် ၄ ဦးကို နယ်မြေခံရဲစခန်းက ဖမ်းဆီးစစ်ဆေးနေကာ ဖမ်းဆီးခံရသူတွေက ဘယ်သူတွေဆိုတာနဲ့ ဘာကြောင့်သတ်ဖြတ်ခဲ့တယ်ဆိုတာကို မသိရသေးဘူးလို့ဆိုပါတယ်။

ဆယ်ကျော်သက်ညီအကို ၂ ဦးရုပ်အလောင်းပြန်တွေ့ခဲ့တဲ့နေရာဟာ မြစ်ငယ်မြစ်ရဲ့တဖက်ကမ်းဖြစ်လို့ နေထိုင်ရာကျေးရွာနဲ့ ၁၀ မိုင်ကျော်ကွာဝေးပြီး ရုပ်အလောင်းတွေကို မတ် ၁၁ ရက်မှာ ပြန်သယ်ဆောင်သင်္ဂြိုဟ်ပေးခဲ့ကာ မတ် ၁၃ ရက်မှာ အလောင်းတွေ့ရှိတဲ့နေရာမှာ သပိတ်ဆွမ်းသွပ်အလှူပြုလုပ်ပေးခဲ့တယ်လို့ သိရပါတယ်။

အမှုနဲ့ပတ်သက်ပြီး ဖမ်းဆီးခံထားရတဲ့ လူငယ် ၄ ဦးနဲ့ပတ်သက်တဲ့ အချက်အလက်တွေနဲ့ ဘာကြောင့်သတ်ခဲ့တယ်ဆိုတာကို တရားရုံးတင်မှသိရမှာဖြစ်ကြောင်း ရဲဘက်ကအကြောင်းကြားထားလို့ တရားရုံးတင်မယ့်ရက်ကို နစ်နာသူမိသားစုဝင်တွေဘက်က စောင့်ဆိုင်းနေတယ်လို့ သိရပါတယ်။

စာတည်း – ဟိန်းစံ

ပဲခူး၊ မတ် ၁၂၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ခင်ပွန်းဟောင်းက သူ့ရဲ့ဇနီးဟောင်းကို ဓားနဲ့ထိုးလို့ သေဆုံးသွားတယ်လို့ ဖြစ်စဥ်ကိုသိရှိထားတဲ့ ဒေသခံတွေထံက သိရပါတယ်။

ဓားနဲ့ထိုးခံရသူဟာ အသက် ၃၀ ဝန်းကျင်အရွယ် မလင်းလင်းကျော်ဆိုသူဖြစ်ပြီး မတ် ၁၂ ရက် မနက် ၁ နာရီကျော်ခန့်က နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က ဓားနဲ့ထိုးခဲ့တာလို့ ဆိုပါတယ်။

“ယောကျာ်းဖြစ်သူက နေအိမ်ထဲဝင်လာပြီး ဓားနဲ့ထိုးသွားတာလို့တော့ သိထားရတယ်။ ဓားထိုးခံရလို့ ဒဏ်ရာတွေရနေလို့ဆေးရုံကိုပို့ပြီး ဆေးကုမှုလုပ်နေချိန်မှာ ဒီမနက်မှာဘဲဆုံးသွားတာ”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်မှာ ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားတယ်လို့ ဆိုပါတယ်။

သေဆုံးသူ မလင်းလင်းကျော်ရဲ့အလောင်းကို ဒီနေ့လယ် ၁ နာရီကျော်မှာ စင်ဖြူကွင်းသုဿာန်မှာ သင်္ဂြိုဟ်လိုက်တယ်လို့သိရပြီး ဓားနဲ့ထိုးသွားတဲ့ ကိုအောင်မြင့်မြတ်ကတော့ မတ် ၁၂ ရက် ညနေပိုင်းထိ ဖမ်းဆီးနိုင်ခြင်းမရှိသေးဘဲ ထွက်ပြေးလွတ်မြောက်နေဆဲလို့ ဒေသခံတွေက ပြောပါတယ်။

ကိုအောင်မြင့်မြတ်နဲ့မလင်းလင်းကျော်တို့ဟာ လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားတာဖြစ်ပြီး မလင်းလင်းကျော်မှာ သားနှစ်ဦးကျန်ရစ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၈ ရက်နေ့ကလည်း ပဲခူးမြို့နယ်၊ ဇောင်းတူကျေးရွာမှာ လင်မယားနှစ်ယောက် စကားများရန်ဖြစ်ရာမှ လင်ဖြစ်သူက မယားဖြစ်သူကို ဓားနဲ့ခုတ်လို့ သေဆုံးသွားတယ်လို့ သိရပါတယ်။

စာတည်း – ကိုချမ်း