သေဆုံး

စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့ ဇီးကုန်း-မလယ်လမ်းပိုင်းမှာ စစ်ကောင်စီတပ်ဖွဲ့ဝင်တွေ လိုက်ပါလာတဲ့ ဖောကားကို ကန့်ဘလူခရိုင် တပ်ရင်း ၄က မိုင်းဆွဲတိုက်ခိုက်ခဲ့တဲ့အတွက် စစ်ကောင်စီတပ်ဖွဲ့ဝင်တပ်ကြပ် ၁ ဦးသေဆုံးခဲ့တယ်လို့ သိရပါတယ်။

မတ် ၃ ရက် မနေ့မနက်ပိုင်းမှာ စစ်ကောင်စီတပ်ဖွဲ့ဝင် ၂၀ ခန့်လိုက်ပါလာတဲ့ ကား ၂ စီးဟာ ဇီးကုန်းသကြားစက်ကနေ ထွက်လာခဲ့တာဖြစ်ပြီး အဲ့ဒီ ၂ စီးအနက် ကြံပင်နဲ့ ကျောက်တိုင်တွေ သယ်ဆောင်လာတဲ့ ဖောကားကို မိုင်း ၈ လုံးဆွဲကာ တိုက်ခိုက်ခဲ့တယ်လို့ ဆိုပါတယ်။

“ခေါင်းခန်းထဲမှာ လိုက်ခဲ့တဲ့တပ်ကြပ်ကြီးကတော့ တန်းပြီးတော့သေသွားတာ၊ မိုင်းဆွဲဆွဲချင်းမှာ၊ နောက်မှာပါတဲ့ ကောင်တွေကတော့ဒဏ်ရာရပေါ့၊ ကားကတော့ အဲ့နေရာမှာပဲ ပျက်စီးသွားတာ။”လို့ တပ်ဖွဲ့နဲ့ နီးစပ်သူတဦးက ပြောပါတယ်။

မိုင်းဆွဲတိုက်ခိုက်မှုအတွင်း တပ်ကြပ်ကြီး ၁ ဦးသေဆုံးကာ ဒဏ်ရာရတဲ့စစ်ကောင်စီတပ်ဖွဲ့ဝင်တွေကိုတော့ ကျန်ရှိနေသေးတဲ့ ကား ၁ စီးနဲ့ တင်ဆောင်ပြီး ဇီးကုန်းသကြားစက်ဘက်ကို ပြန်‌မောင်းနှင်သွားတယ်လို့ ဆိုပါတယ်။

စစ်ကောင်စီဘက်က သေဆုံးခဲ့တဲ့ တပ်ကြပ်ကြီးကိုတော့ မနေ့က နေ့ချင်းပဲ သင်္ဂြိုဟ်ခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေ ပြန်ဆုတ်ခွာသွားချိန် ကန့်ဘလူခရိုင် တပ်ရင်း ၄ နဲ့ နယ်မြေခံတပ်ဖွဲ့တွေ ပူးပေါင်းကာ နယ်မြေရှင်းလင်းခဲ့ပြီး စစ်ကောင်စီတပ်ဖွဲ့ဝင်တွေကျန်ခဲ့တဲ့ ဖောကားကိုတော့ ကာကွယ်ရေးတပ်တွေဘက်က မီးရှို့ဖျက်ဆီးနိုင်ခဲ့တယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၂၈ ရက်ကလည်း ကန့်ဘလူမြို့နယ်၊ ပေကြီးရွာမှာ ယာယီတပ်စွဲထားတဲ့ စစ်ကောင်စီတပ်ဖွဲ့ဝင်တွေကို ကန့်ဘလူခရိုင် တပ်ရင်း ၄ က ဝင်ရောက် ပစ်ခတ်ခဲ့သေးတယ်လို့ သိရပါတယ်။

စာတည်း – ချယ်ရီ

သဲကုန်း၊ ဖေဖော်ဝါရီ ၂၈၊ ၂၀၂၅။

ပဲခူးတိုင်း၊ ပြည်ခရိုင်၊ သဲကုန်းမြို့ပေါ်က စစ်ကောင်စီစစ်ဆေးရေးဂိတ် ပစ်ခတ်တိုက်ခိုက်ခံရပြီး ထိခိုက်သေဆုံးသူတွေရှိတယ်လို့ ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ တပ်ရင်းဆီက သိရပါတယ်။

သဲကုန်းမြို့၊ တယ်သီးပင်ရပ်ကွက်၊ ဆရာအတတ်သင် (၁) လမ်းမှာရှိတဲ့ စစ်ကောင်စီစစ်ဆေးရေးဂိတ်ကို ဖေဖော်ဝါရီ ၂၇ ရက် မနက် ၁၁ နာရီလောက်မှာ စတင်ပစ်ခတ်ခဲ့ပြီး အပြန်အလှန်ပစ်ခတ်ချိန် ၁၀ မိနစ်ဖြစ်ပြီးနောက် စစ်ကောင်စီဘက်က ၄ ဦးသေဆုံးသွားတယ်လို့ ဆိုပါတယ်။

“အဲဒီ ဂိတ်မှာ ၁၀ ကောင်လောက်ရှိတယ်။ သေဆုံးတာနဲ့ပတ်သက်ပြီး ပစ်ခတ်တိုက်ခိုက်စဉ်အတွင်းမှာလည်း မြင်ခဲ့ရတယ်။ စစ်တပ်နဲ့နီးစပ်တဲ့ အသိုင်းဝိုင်းကလည်း သတင်းရတယ်။” လို့ ၃၆၀၁ တပ်ရင်းမှ စစ်ထောက်လှမ်းရေးနဲ့ သတင်းပြန်ကြားရေးတာဝန်ခံ Shadow က ပြောပါတယ်။

အဲ့ဒီဂိတ်စခန်းဖွင့်လှစ်ထားတာ ၁ နှစ်ကျော်လောက်ရှိပြီး ခုလိုသွားရောက်ပစ်ခတ်ဖို့ ၁ ပတ်လောက်ယူခဲ့ရပြီး အခက်အခဲတွေတော့မရှိခဲ့ဘူးလို့ ဆိုပါတယ်။

ဒေသခံကာကွယ်ရေးတပ်ဖွဲ့ဝင်တွေ ပြန်လည်ဆုတ်ခွာချိန် စစ်ကောင်စီဘက်မှ လက်နက်ငယ်တွေနဲ့ ပစ်ခတ်ခဲ့ပြီး မြို့အဝင်၊ အထွက်ဂိတ်တွေကိုလည်း ပိတ်ဆို့စစ်ဆေးခဲ့တယ်လို့ ဆိုပါတယ်။

“ကျနော်တို့က နဂိုကတည်းက Plan ချပြီး အချိန် ၁ ပတ်လောက်ယူပြီးတော့မှ သွားရောက်စီစဉ်ပြီး လုပ်ဆောင်ခဲ့တဲ့အတွက် အခက်အခဲဆိုတာမရှိခဲ့ပါဘူး။ ပြန်ဆုတ်တဲ့အခါမှာလည်း ကျနော်တို့ ပစ်ပြီးလို့ရှိရင် ဘယ်သူကဘယ်ဘက်ဆုတ် ကျနော်တို့ ကြိုတင်စီမံဆောင်ရွက်ထားတာမျိုး ရှိတယ်။” လို့ ကို Shadow ကဆက်ပြောပါတယ်။

တိုက်ခိုက်မှုကို ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDF တပ်ရင်း၊ တပ်ခွဲ ၃ နဲ့ တပ်ခွဲ ၅ တို့က တပ်ဖွဲ့ဝင် စုစုပေါင်း ၆ ဦးက ပူးပေါင်းလုပ်ဆောင်ခဲ့ကြတာလို့ ဆိုပါတယ်။

ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ တပ်ရင်းဟာ ဖေဖော်ဝါရီ ၁၉ ရက်ကလည်း ပေါင်းတည်မြို့နယ်၊ သစ်ပုတ်ရွာနဲ့ ညောင်နီပင်ရွာကြား သစ်ပုတ်အထိုင်စခန်းမှာ လူလဲပြီးပြန်လာတဲ့ စစ်ကောင်စီတပ်ဖွဲ့ဝင်တွေကို မိုင်းဆွဲတိုက်ခိုက်ခဲ့ရာ ထိခိုက်သေဆုံးသူတွေရှိခဲ့ပါသေးတယ်။

စာတည်း – လင်း

မြင်းခြံ၊ ဖေဖော်ဝါရီ ၂၇၊ ၂၀၂၅။

မန္တလေးတိုင်း၊ မြင်းခြံခရိုင်၊ မြင်းခြံမြို့၊ အမှတ် ၁၈ ရပ်ကွက်မှာ ဆက်ကြေးကောက်နေတဲ့ စစ်ကောင်စီဂိတ်ကို ဒေသခံကာကွယ်ရေးတပ်ဖွဲ့ဝင်တွေက အနီးကပ်တိုက်ခိုက်ခဲ့တယ်လို့ မြင်းခြံခရိုင်တပ်ရင်း – ၉ Myingyan Black Tiger-MBT အဖွဲ့ဆီက သိရပါတယ်။

ဆက်ကြေးကောက်နေတဲ့ စစ်သား၊ ရဲ နဲ့ ပျူစောထီးအင်အား ၂၀ ဝန်းကျင်ကို ဖေဖော်ဝါရီ ၂၅ ရက်နေ့လယ် ၃ နာရီဝန်းကျင်မှာတိုက်ခိုက်ခဲ့တာလို့ ဆိုပါတယ်။

“ကျနော်တို့ ၃ ဖွဲ့သွားပြီးတော့ ပြောက်ကျားနည်းစနစ်နဲ့ အနီးကပ်သွားတိုက်ခိုက်ခဲ့တာပါ၊ နေရာမှာ စစ်‌ကောင်စီတပ်ဖွဲ့ဝင် ၂ ဦး လဲကျသွားတာရှိတယ်၊ အဲ့ဒီနေ့မှာတော့ ဒဏ်ရာရတယ်လို့ပဲကြားတာ၊ နောက်ရက်မှာတော့ သေဆုံးသွားပြီလို့သိခဲ့တာ” လို့ Myingyan Black Tiger-MBT မြင်းခြံခရိုင်တပ်ရင်း – ၉ ခေါင်းဆောင်ဗိုလ်မိုက်ခဲက ပြောပါတယ်။

အဲ့ဒီဂိတ်ကစစ်ကောင်စီတပ်ဖွဲ့ဝင်တွေဟာ ခရီးသွားကားတွေကို ဆက်ကြေးကောက်တာ၊ မြင်းခြံတောင်ဘက်ခြမ်းကျေးရွာတွေက ဒေသခံတွေဆီကနေ ရိက္ခာသယ်အခွန်ကို အဓမ္မကောက်ခံနေတာလို့ ဆိုပါတယ်။

“အဲ့ဒီဂိတ်မှာက သူတို့က ခရီးသွားကားတွေကို ဆက်ကြေးကောက်ကြတာ၊ မြင်းခြံတောင်ဘက်ခြမ်းက ရွာတွေက ပြည်သူတွေဆီက ဆန်အိတ် ၁ အိတ်ကို ၇ ထောင်နှုန်းတောင်းတယ်၊ ကျန်တဲ့ရွာတွေကဆိုရင် ဆန်အိတ် ၁ အိတ်ကို ၅ ထောင်နှုန်းတောင်းတယ်၊ ပြီးရင် ဆီ ၁ ပုံးကို ဘယ်လောက်ဆိုပြီးလည်း တောင်းတယ်၊” လို့ ဗိုလ်မိုက်ခဲက ဆက်ပြောပါတယ်။

ပစ်ခတ်ပြီးနောက်ပိုင်း အဲ့ဒီစစ်ကောက်စီဂိတ်ကနေ မြင်းခြံတောင်ဘက်ခြမ်းမှာရှိတဲ့ ရွာတွေကို လက်နက်ကြီးတွေနဲ့ပစ်ခတ်တာတွေလုပ်ခဲ့တယ်လို့ ဆိုပါတယ်။

ဒီတိုက်ခိုက်မှုကို Myingyan Black Tiger-MBT မြင်းခြံခရိုင်တပ်ရင်း – ၉၊ ဗိုလ်စားပြောက်ကျားတပ်ဖွဲ့နဲ့ BGFတို့က ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – လင်း

ဆင်ပေါင်ဝဲ၊ ဖေဖော်ဝါရီ ၂၇၊ ၂၀၂၅။

မကွေးတိုင်း၊ ဆင်ပေါင်ဝဲမြို့နယ်၊ လဲဇင်ရဲစခန်းကထွက်လာတဲ့ရဲတပ်ဖွဲ့ဝင်တွေ ကြားဖြတ်ပစ်ခတ်ခံရပြီး ဒုရဲအုပ် ၁ ဦးနဲ့ ရဲတပ်သား ၂ ဦးသေဆုံးခဲ့တယ်လို့ ဖေဖော်ဝါရီ ၂၇ ရက်မှာ ပုဏ္ဏဝတီပြည်သူ့ ကာကွယ်ရေးတပ်က သတင်းထုတ်ပြန်ပါတယ်။

ရဲတပ်ဖွဲ့ဝင် ၆ ဦးလိုက်ပါလာတဲ့အဆိုပါကားကို ကျောသာကျေးရွာနဲ့ သပြေစမ်းကျေးရွာအကြားမှာ ဒေသခံကာကွယ်ရေးတပ်ဖွဲ့ဝင်တွေကစောင့်ကြိုတိုက်ခိုက်ခဲ့ကြတာလို့ ဆိုပါတယ်။

“သူတို့က ဘုန်းကြီးကားနဲ့အယောင်ဆောင်ထွက်လာတာ၊ ရဲ**ကားပေါ့။ သူတို့ လစာထုတ်ဖို့ ထွက်လာတာလို့ ကျနော်တို့သိရတယ်၊ ၆ ဦးလောက်ပါလာတယ်။ ဒုရဲအုပ်နဲ့ ကျန်တာကတော့ ရဲတပ်သားတွေပါ၊ ထိခိုက်သေဆုံးမှုကတော့ ပွဲချင်းပြီး ၃ ဦးသေတယ်” လို့ ပုဏ္ဏဝတီ ပြည်သူ့ကာကွယ်ရေးတပ်ရဲ့ တိုက်ခိုက်ရေးခေါင်းဆောင်က ပြောပါတယ်။

ပစ်ခတ်တိုက်ခိုက်ချိန်မှာ ကားကိုအရှိန်နဲ့မောင်နှင်သွားချိန်မှာ တိမ်းမှောက်သွားခဲ့ပြီး ရဲတပ်သား ၃ ဦးကတော့ထွက်ပြေးလွတ်မြောက်သွားတယ်လို့ ဆိုပါတယ်။

“အဲ့ဒီနေ့က ပစ်ခတ်တိုက်ခိုက်တဲ့အချိန်မှာ ကားကိုမိုင်းမဆွဲပဲနဲ့ ကားလာပြီလို့ သတင်းအတိ အကျရတဲ့အချိန်မှာ ရှေ့ကနေပြီးတော့ တုံး ၁ တုံးကို တာလမ်းပေါ်မှာ ကန့်လန့်ဖြတ်ချထားတာ၊ ကျနော်တို့ ပစ်ခတ်တဲ့အချိန် ကားကိုအသကုန်မောင်းသွားတာ၊ တုံးကဝင်တိုက်ပြီးတော့ ကားကပတ်လက်လန်သွားတယ်” လို့ တိုက်ခိုက်ရေးခေါင်းဆောင်က ဆက်ပြောပါတယ်။

တိုက်ခိုက်ပြီးနောက် 79 ၁ လက်၊ ၄၀ မမ ဗုံးသီး ၂ လုံး၊ MA 13 ၁ လက်၊ MA 13 ကျည် ၁၃၀ တောင့်၊ G.3 ကျည် ၁၂၀ တောင့်၊ လက်ပစ်ဗုံး ၁ လုံး၊ ခြောက်လုံးပြူးသေနတ် ၁ လက်၊ လက်ကိုင်ဖုန်း ၅ လုံး၊ နိုင်ငံသားစီစစ်ရေးကဒ်ပြား ၅ ခုနဲ့ ဝန်ထမ်းကဒ် ၂ ခုတို့ကို သိမ်းဆည်းခဲ့တယ်လို့လည်း ဆိုပါတယ်။

ဒီတိုက်ခိုက်မှုကို ပုဏ္ဏဝတီ ပြည်သူ့ကာကွယ်ရေးတပ်နဲ့ သရက်ခရိုင်အမှတ် ၅ တပ်ရင်းတို့က ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဇန်နဝါရီ ၄ ရက်ကလည်း ဆင်ပေါင်ဝဲမြို့နယ်၊ ကိုးပင် EPC ရုံးမှာ အထ်ုင်ချတပ်စွဲပြီး ခရီးသွားမော်တော်ယာဉ်တွေကို ဆက်ကြေးကောက်နေတဲ့ စစ်ကောင်စီတပ်ဖွဲ့ဝင် ၁၀ ဦးကို ပုဏ္ဏဝတီ ပြည်သူ့ကာကွယ်ရေးတပ်ကပစ်ခတ်တိုက်ခိုက်ခဲ့ရာ စစ်ကောင်စီဘက်က ၆ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း

ရွှေဘို၊ ဖေဖော်ဝါရီ ၂၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်က ပျူစောထီးကင်းစခန်း ၃ ခု ဒရုန်းဗုံးချတိုက်ခိုက်ခံရပြီး ၁ ဦး သေဆုံးကာ ၈ ဦး ဒဏ်ရာရတယ်လို့ တိုက်ခိုက်မှုမှာပါဝင်တဲ့ PDF အဖွဲ့ဝင်တဦးထံက သိရပါ တယ်။

ဖေဖော်ဝါရီ ၂၄ ရက် မနေ့ နေ့လယ် ၁ နာရီခန့်မှာ ခွန်တောင်ကြီးရွာနဲ့ ခွန်တောင်ကြီး-ညောင်ကန်ရွာလမ်းပေါ်ရှိ ပျူစောထီးအဖွဲ့တွေရဲ့ ကင်းစခန်းနေရာနေရာ ၃ ခုကို ဒရုန်းနဲ့ဗုံးသီး ၁၈ လုံးချ တိုက်ခိုက်ခဲ့တာလို့ ဆိုပါတယ်။

” ညောင်ကန်ဘက်ကို ဝင်လာတာမို့လို့ ဒီဘက်နေပြီးတော့ သူတို့ရွာကင်းတွေပြန်ဆုတ်သွားတဲ့အချိန်မှာ ဒရုန်းတွေနဲ့ဗုံးချတာ”လို့ တိုက်ခိုက်မှုအတွင်းပါဝင်တဲ့ ဒရုန်းတပ်ဖွဲ့ဝင်တဦးက ပြောပါတယ်။

ဒရုန်းဗုံးချတိုက်ခိုက်မှုမှာ ခွန်တောင်ကြီးရွာပျူစောထီးစခန်းက ပျူစောထီး ၁ ဦးသေဆုံးပြီး တိုက်ခိုက်ခံရတဲ့ ပျူစောထီးစခန်း ၃ ခုက ဒဏ်ရာရရှိသူ ပျူစောထီး ၈ ဦးရှိတယ်လို့ ၎င်းက ဆိုပါတယ်။

ခွန်တောင်ကြီးကျေးရွာက ပျူစောထီးအားကောင်းတဲ့ကျေးရွာဖြစ်ပြီး လက်နက်ကိုင် ပျူစောထီးအဖွဲ့ဝင် ၅၀ ခန့်ရှိသလို စစ်ကောင်စီအင်အားလည်း ၂၀ ခန့်ရှိတယ်လို့ သိရပါတယ်။

ဖေဖော်ဝါရီ ၁၉ ရက်က ရွှေဘိုမြို့နယ်၊ ပန်းရံကျေးရွာက ပျူစောထီးခေါင်းဆောင် အောင်ကျော်ရဲ့ညီမဖြစ်သူ ဦးဆောင်ပြုလုပ်နေတဲ့ ရှင်ပြုအလှူ ဒရုန်းဗုံးချခံရလို့ ကလေး ၁ ဦးသေ ဆုံးပြီး အများအပြားဒဏ်ရာရခဲ့သေးတယ်လို့ သိရပါတယ်။

စာတည်း – ဟိန်းစံ