သေဆုံး

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မြင်းခြံမြို့နယ်ထဲက ပျူစောထီးရွာတရွာဖြစ်တဲ့ ဆုံကျေးရွာကို ကာကွယ်ရေးအဖွဲ့တွေကတိုက်ခိုက်နေချိန် ပျူတွေဘက်ကို စစ်ကူပေးဖို့ထွက်လာတဲ့စစ်ကောင်စီကားတစီး မိုင်းဆွဲခံခဲ့ရတယ်လို့ သိရပါတယ်။

ဒီဇင်ဘာလ ၂၇ ရက်မနေ့ကမနက်အစောပိုင်း ၂ နာရီလောက်က နဘူးအိုင်ရွာကနေ စစ်ကူထွက်လာတဲ့ကားကို ဆီမီးခုံ-နဘူးအိုင် လမ်းပိုင်းတနေရာမှာ ကြားဖြတ်ပြီး ပဒေသာမိုင်း ၅ လုံးဆွဲတိုက်ခိုက်ခဲ့တာလို့ နောင်ရိုးအထူးပြောက်ကျားတပ်ရဲ့ ရဲဘော်တဦးက ပြောပါတယ်။

“နဘူးအိုင်ကနေ မှန်လုံကားသေးတစီး စစ်ကူထွက်လာတာ၊ စစ်သားတွေတပ်ကူလာမယ့်လမ်းမှာ ကြိုတင်ပြင်ဆင်ပြီး မိုင်းဆင်ထားတာပါ၊ နဘူးအိုင်နဲ့ပျူရွာ (ဆုံရွာ)က ဆိုင်ကယ်နဲ့ဆို မိနစ်၂၀လောက်ပဲဝေးတာ။ မိုင်းဆွဲခံရတဲ့ကားကတော့ နဘူးအိုင်ကို ကြိုးနဲ့ဆွဲပြီးပြန်သွားရတယ်”လို့ ပြောပါတယ်။

မိုင်းဆွဲတိုက်ခိုက်ခံရလို့ စစ်ကောင်စီတပ်သား ၄ ဦးသေဆုံးကာ ကားပျက်စီးခဲ့ပြီး၊ သေဆုံးအလောင်းတွေနဲ့ကားကို နဘူးအိုင်ရွာထဲကိုပဲ ပြန်သယ်သွားတယ်လို့ တပ်တွင်းသတင်းပေးတွေရဲ့ပြန်ပြောချက်အရ အတည်ပြုထားနိုင်ခဲ့တယ်လို့ ဆိုပါတယ်။

အဆိုပါတိုက်ခိုက်မှုကို နယ်မြေခံအဖွဲ့တွေဖြစ်တဲ့ မြင်းခြံခရိုင်တပ်ရင်း အမှတ် ၆၊ တပ်ခွဲ-၁ နောင်ရိုးအထူးပြောက်ကျားတပ် NYSGFနဲ့အတူ မြင်းခြံခရိုင် တပ်ရင်းအမှတ်-၁ 27 revolution forceတို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ဒါ့အပြင် မနေ့ကမနက် ဆုံရွာတိုက်ခိုက်မှုမှာတော့ အဲ့ဒီရွာက ပျူစောထီး ၃ ဦးသေဆုံးခဲ့ပြီး ၁၀ ဦးထပ်မနည်း ထိခိုက်ဒဏ်ရာရရှိခဲ့တယ်လို့ သိရပါတယ်။

မကွေး၊ ဒီဇင်ဘာ ၂၈၊ ၂၀၂၂။

မကွေးတိုင်းဒေသကြီး၊ ပေါက်မြို့နယ်၊ ကျူတောကျေးရွာ၊ ယောချောင်းဘေးအနီးက ကြက်သွန်စိုက်ခင်းအတွင်း မိုင်းပေါက်ကွဲလို့ ၁ ဦးသေဆုံးပြီး ၅ ဦးဒဏ်ရာရခဲ့တယ်လို့ သိရပါတယ်။

ဒီဇင်ဘာလ ၂၇ ရက်မနေ့ကမနက် ၈ နာရီဝန်းကျင်မှာ တောင်သူဦးတင်အေးပိုင်ဆိုင်တဲ့ ကြက်သွန်စိုက်ခင်းအတွင်း ကြက်သွန်နုတ်ဖို့လာကြတဲ့ နေ့စား အမျိုးသမီးတွေ စိုက်ခင်းထဲအရောက်မှာ ဘယ်အဖွဲ့ကထောင်ထားမှန်းမသိတဲ့ မိုင်းပေါက်ကွဲခဲ့တာလို့ ဒေသခံတဦးကပြောပါတယ်။

“ဦးတင်အေးက စကစ နဲ့ပဏာစားတဲ့သူ။ ရွာမှာကို မနေတာ။ ဘယ်ရောက်နေလဲ မသိဘူး။ စီးပွားရေးကတော့ သူ့သားသမီးတွေက လုပ်ပေးတာ။ ခုမိုင်းပေါက်ကွဲလို့ ထိတဲ့သူတွေက နေ့စားအငှားလိုက်တဲ့သူတွေလို့တော့ သိရတယ်။ ဘယ်အဖွဲ့က ဘာရည်ရွယ်ချက်နဲ့ ဘယ်သူကို လုပ်လဲဆိုတာတော့မသိရဘူး”လို့ ပြောပါတယ်။

မိုင်းပေါက်ကွဲလို့ ကျူတောကျေးရွာသူ အသက် ၃၅ နှစ်အရွယ်မမူမူဌေး မှာ မိုင်းထိမှန်ဒဏ်ရာတွေနဲ့ နေရာမှာတင် သေဆုံးသွားခဲ့ပြီး၊ ဒေါ်သီတာခိုင်၊ ဒေါ်အေးစန်း၊ မဇင်မာနွယ်၊ ဒေါ်မူမူဝင်းနဲ့ ဒေါ်မာမာလွင်တို့မှာ မိုင်းစထိမှန်ဒဏ်ရာတွေ ရရှိခဲ့တယ်လို့ ဆိုပါတယ်။

မိုင်းထိမှန်ဒဏ်ရာရသူတွေနဲ့ သေဆုံးသူကိုတော့ ဒေသလူမှုကူညီရေးအသင်းကားတွေနဲ့တင်ပြီး ပေါက်ဆေးရုံနဲ့ ပခုက္ကူဆေးရုံကို ပို့ထားရတယ်လို့ သိရပါတယ်။

ဒီမိုင်းပေါက်ကွဲတာနဲ့ပတ်သက်ပြီး PDF တွေကို နာမည်ဖျက်ဖို့ ပျူစောထီးအဖွဲ့တွေက လုပ်ဆောင်ခဲ့တာဖြစ်နိုင်တယ်လို့ ပြောဆိုမှုတွေရှိနေပေမယ့် ဘယ်အဖွဲ့အစည်းကအမှန်တကယ်လုပ်တာလဲကိုတော့ မြေလတ်အသံက အတည်မပြုနိုင်သေးပါဘူး။

ပေါက်မြို့နယ်၊ ကျူတောကျေးရွာဘက်မှာတော့ အခုလို မိုင်းပေါက်ကွဲတာကြောင့် ဒေသခံတွေထိခိုက်သေဆုံးတာ ပထမဆုံးအကြိမ်ဖြစ်တယ်လို့ သိရပါတယ်။

မကွေး၊ ဒီဇင်ဘာ ၂၈၊ ၂၀၂၂။

မကွေးတိုင်း၊ မြိုင်မြို့နယ်တောင်ပိုင်းမှာရှိတဲ့ ကင်းရွာထဲကို စစ်ကောင်စီ စစ်ကြောင်းဝင်ရောက်လာချိန် ထွက်ပြေး တိမ်းရှောင်နေတဲ့ဒေသခံတွေကို စစ်ကောင်စီတပ်ဖွဲ့ဝင်တွေက သေနတ်တွေနဲ့ လိုက်လံပစ်ခတ်လို့ အဖွားအိုတဦး အမောဖောက်ပြီး သေဆုံးသွားတဲ့အပြင်၊ ရွာသားတဦးကိုလည်း သတ်ဖြတ်သွားခဲ့တယ်လို့ သိရပါတယ်။

အင်အား ၁၀၀ ဝန်းကျင်ရှိတဲ့ စစ်ကောင်စီစစ်ကြောင်းဟာ ကင်းရွာထဲကို လက်နက်တွေနဲ့ပစ်ခတ်ပြီး ဒီဇင်ဘာလ၂၆ ရက်နေ့မနက် ၈ နာရီမှာ ရွာထဲကို ဝင်ရောက်လာခဲ့ပြီး နာရီဝက်ခန့်အကြာမှာ ရွာရဲ့ အနောက်ဘက်တောမှာ ပုန်းရှောင်နေတဲ့ ဒေသခံတွေကို လိုက်လံပစ်ခတ်ခဲ့ရာ အသက် (၈၀) အရွယ် ဒေါ်ခင်မေမှာ အမောဖောက်သေဆုံးသွားတဲ့အပြင် ရွာတောင်ဘက်နေထိုင်တဲ့ အသက် ၄၀ နှစ်အရွယ် ကိုစတန်ကိုလည်း လည်လှီးသတ်သွားတယ်လို့ KF People Defense Force တပ်ဖွဲ့ဝင်တဦး ဆိုပါတယ်။

“စခတွေက အင်ပင်ရွာကနေ စထွက်လာပြီး ကင်းရွာထဲကို ဝင်လာတာ။ ရွာထဲကိုဝင်ပြီးတော့ တောထဲကို ပတ်လာတာ။ ကျနော်တို့ကလည်း မသိလိုက်ဘူး။ ချုံတွေနဲ့ကွယ်နေတာဆိုတော့ သူတို့က လိုက်ပတ်ပစ်နေတာ။ ကျနော်တို့လည်း ရွာပြင်ကနေ ပတ်ပြေးလာရတာ။ နောက်ပြီးရွာတောင်ပိုင်းက ရေလာသယ်တဲ့ဦးလေးကိုလည်း သတ်သွားပြီး နွားချေးကုန်းထဲမှာဖွက်ခဲ့တာ” လို့ KF People Defense Force တပ်ဖွဲ့ဝင်တဦးက ပြောပါတယ်။

အဲဒီစစ်ကောင်စီစစ်ကြောင်းဟာ ရွာသားတွေကို လိုက်လံပစ်ခတ်ပြီးနောက် ကင်းရွာထဲမှာ တညတာ တပ်စွဲနေထိုင်သွားပြီး ရွာသား တွေမွေးမြူထားတဲ့ အိမ်မွေးတိရစ္ဆာန်တွေကို သတ်ဖြတ်စားသောက်သွားတဲ့အပြင် ရွာသားတွေရဲ့နေအိမ်တွေကို ဝင်ရောက်မွှေနှောက်ပြီး တန်ဖိုးကြီးပစ္စည်းတွေကိုလည်း ယူဆောင်သွားတယ်လို့ဆိုပါတယ်။

“အခုလိုရွာထဲကိုဝင်တာက ငါးကြိမ်လောက်ရှိပြီ။ ရွာထဲကိုဝင်လာတိုင်း ရွာသားတွေရဲ့အိမ်တွေကို တက်မွှေတယ်။ ၂၆ ရက်နေ့ကလည်း ရွာသားတွေကိုခေါ်ထုတ်နေချိန် စခတွေက ကျနော်တို့တပ်ဖွဲ့တွေရဲ့ကားတွေကိုလည်း မီးရှို့သွားတယ်။ ရွာထဲမှာတညစခန်းချသွားပြီးတော့ မနက်မိုးလင်းတော့ အနောက်ဘုန်းကန်ရွာကို ပြန်ထွက်သွားကြတယ်” လို့ အထက်ပါတပ်ဖွဲ့ဝင်က ဆက်ပြောပါတယ်။

စစ်ကောင်စီတပ်တွေသတ်သွားတဲ့ အိမ်မွေးတိရစ္ဆာန်တွေကိုလည်း ရှင်းလင်းရေးလုပ်လိုက်သလို သေဆုံးသွားတဲ့သူတွေကိုမနေ့က ၂၇ ရက်မှာ သဂြိုလ်ပေးလိုက်ပါတယ်လို့ ဆိုပါတယ်။

အဲ့ဒီနောက် KF People Defense Force တပ်ဖွဲ့ဝင်အနေနဲ့ ရွာသားတွေကိုထိခိုက်မိမှာ ဆိုးတဲ့အတွက် ထိတွေ့တိုက်ခိုက်တာမျိုးမပြုလုပ်နိုင်ဘဲ ပြန်လည်ဆုတ်ခွာခဲ့ရတယ်လို့ ဆိုပါတယ်။

ပဲခူး၊ ဒီဇင်ဘာ ၂၈၊ ၂၀၂၂။

ပဲခူးတိုင်းဒေသကြီး၊ သနပ်ပင်မြို့နယ်၊ ကျုံပါချောင်းနဲ့ကုလားတဲစုရွာကြားမှာ စစ်ကောင်စီသတင်းပေး ကြံခိုင်ရေးစည်းရုံးမှူး ၁ ဦးဖြစ်တဲ့ အသက် ၃၈ နှစ်အရွယ် ဦးတင်မောင်ထွန်း ဆိုသူ အာဝါဒေးဝိုင်းကအပြန် ပစ်ခတ်ခံရပြီး သေဆုံးသွားတယ်လို့ သိရပါတယ်။

မနေ့ကဒီဇင်ဘာလ ၂၇ ရက်နေ့ည ၁၁ နာရီဝန်းကျင်မှာ ကုလားတဲစုရှိ အာဝါဒေးဝိုင်းကနေပြန်လာတဲ့ ဝေါမြို့နယ်၊ အရှေ့ဘက်ကမ်းနေ ဦးတင်မောင်ထွန်း ကို နန်းထိုက်အောင်စစ်ဆင်ရေးအရ ရှင်းလင်းလိုက်တာဖြစ်တယ်လို့ ဝေါ PDF အဖွဲ့ဝင်တဦးက ပြောပါတယ်။

“သူအကိုက ဝေါ အရှေ့ဘက်ကမ်း အုပ်ကြီး နာမည်က ကျားကြီး။ သူက ကြံခိုင်ရေးကစည်းရုံးရေးမှူး။ သူက လက်ရှိ စစ်တောင်းမြစ်ရိုးတလျှောက်မှာ စကစအတွက် ငွေလိုက်တောင်းပေးနေတာ။ စကစ အမာခံဘဲ။ သူက CDM ဝန်ထမ်းတွေကို စကစကိုဖမ်းခိုင်းတာ။ PDF တွေ သွားလာမယ့်လမ်းတွေကိုလည်း စကစကို သတင်းပေးတာ။ သူက ဝေါမြို့နယ်သား။ သနပ်ပင်က သူ့မိန်းမရွာမှာ သွားရှောင်နေလို့ လိုက်ရှင်းလိုက်တာ” လို့ ပြောပါတယ်။

ဦးတင်မောင်ထွန်းကို သေနတ်နဲ့ ၂ ချက်ပစ်ခတ်ခဲ့ရာ ဦးခေါင်းနဲ့ဝမ်းဗိုက်မှာ သေနတ်မှန်ပြီး နေရာမှာဘဲ သေဆုံးသွားတယ်လို့ ဆိုပါတယ်။ သေဆုံးသွားတဲ့ အလောင်းကိုတော့ စစ်ကောင်စီအဖွဲ့ဝင်တွေက လာရောက် စစ်ဆေးပြီး နေအိမ်ကို ပြန်ယူသွားတယ်လို့ သိရပါတယ်။

ဒီဇင်ဘာလ ၅ ရက်နေ့ မနက်ပိုင်းကလည်း ပဲခူးတိုင်း ဝေါမြို့၊ ကန်တော်ရပ်ကွက် အုပ်ချုပ်ရေးမှူးရုံး မိုင်းထောင် ဖောက်ခွဲခံရလို့ ရုံးအဆောက်အဦး ထိခိုက်ပျက်စီးခဲ့သေးတယ်လို့ ဆိုပါတယ်။

ပဲခူးတိုင်းမှာ စစ်ကောင်စီတပ်ဖွဲ့ဝင်တွေနဲ့ လက်အောက်ခံတွေဟာ မြို့နယ်အတွင်းက ဆိုင်ကယ်စီးပြည်သူတွေကိုပါ ခေါင်းစဥ် အမျိုးမျိုးတပ်ကာ ခြိမ်းခြောက်ဖမ်းဆီး၊ ငွေညှစ်နေတာတွေ ပြုလုပ်နေသလို သာယာဝတီမြို့မှာ ဒီဇင်ဘာလလယ်လောက်ကစပြီး ဆိုင်ကယ်စီးပြည်သူတွေကို နည်းမျိုးစုံနဲ့ ဖမ်းဆီးနေသလို ဘဲလ်တပ်မထားတဲ့ စက်ဘီးတွေကိုလည်း ကျေးရွာတွေအထိ လိုက်လံဖမ်းဆီးခဲ့တာတွေ ပြုလုပ်ခဲ့နေတယ်လို့ သိရပါတယ်။

ပဲခူး၊ ဒီဇင်ဘာ ၂၇၊ ၂၀၂၂။

ပဲခူးတိုင်းအနောက်ခြမ်း၊ ရွှေတောင်မြို့နယ်ထဲက စစ်ကောင်စီစစ်ဆေးရေးဂိတ်ကို ဒီဇင်ဘာလ ၂၇ ရက်ဒီမနက် ၉ နာရီခွဲလောက်က ဗုံးခွဲတိုက်ခိုက်ခဲ့တယ်လို့ Bago Regin PDF က သတင်းထုတ်ပြန်ထားပါတယ်။

ရွှေတောင်မြို့နယ်၊ ရှားတိုင်းအုပ်စု၊ ပွဲသာရွာထိပ်က စစ်ကောင်စီစစ်ဆေးရေးဂိတ်ကို ပြည်ခရိုင်တပ်ရင်း ၃၆၀၁၊ တပ်ခွဲ ၅ နွေဦးအဖွဲ့က နန်းထိုက်အောင်စစ်ဆင်ရေးအဖြစ် တိုက်ခိုက်ခဲ့တယ်လို့ ဆိုပါတယ်။

“ပွဲသာရွာထိပ်က ဆိုင်ကယ်စစ်တဲ့ ရဲလေးယောက်ကို ဗုံးခွဲလိုက်တယ်။ ဗုံး၂ လုံးနဲ့ခွဲလိုက်တာ။ သေဆုံးတယ်လည်းကြားတယ်၊ တော်လှန်ရေးရဲဘော်တွေကတော့ အန္တရာယ်ကင်းတယ်”လို့ နွေဦးတပ်ဖွဲ့ဝင်တဦးကပြောပါတယ်။

အဲဒီစစ်ဆေးရေးဂိတ်ကတပ်သားတွေဟာ ပြည်သူတွေအပေါ်ဆိုင်ကယ်ဖမ်း စစ်ဆေးတာ၊ ငွေတောင်းခံတာ၊ မပေးနိုင်ပါက ဆိုင်ကယ်ကိုသိမ်းဆည်းတဲ့အပြင် လူကိုပါထောင်ချတာတွေကို ပြုလုပ်နေတာကြောင့် ခုလိုတိုက်ခိုက်ခဲ့တာလို့လည်း ဆိုထားပါတယ်။

တိုက်ခိုက်မှုကြောင့် စစ်ကောင်စီတပ်သား ၁ ဦးသေဆုံးခဲ့ပြီး၊ အဲ့ဒီအလောင်းကိုမသယ်သွားခင်မှာ ဂိတ်ထဲကနေ စစ်သားတွေက လက်နက်တွေနဲ့ရမ်းသမ်းပစ်ခတ်တာတွေလုပ်ဆောင်ခဲ့သေးတယ်လို့ ထုတ်ပြန်ချက်မှာဖော်ပြထားပါတယ်။

ဒီသေဆုံးမှုနဲ့ပက်သက်ပြီး မြေလတ်အသံက သီးခြားအတည်ပြုနိုင်ခြင်းမရှိသေးပါဘူး။

အလားတူဒီဇင်ဘာလ ၂၇ ရက်ဒီမနက် ၁၀ နာရီခွဲဝန်းကျင်ကလည်း ပဲခူးတိုင်းအနောက်ခြမ်း၊ သာယာဝတီမြို့နယ်၊ သုံးဆယ်မြို့၊ ဖိုးခေါင်လမ်းမ စိန်သဇင်စက်သုံးဆီအရောင်းဆိုင်အနီးမှာ ဆိုင်ကယ်ဖမ်းပြန်လာတဲ့ ရဲကား ၂ စီးကို သာယာဝတီဂဠုန်တပ်ဖွဲ့က အဝေးထိန်းမိုင်းနဲ့ တိုက်ခိုက်ခဲ့ပါသေးတယ်။

မကွေး၊ ဒီဇင်ဘာ ၂၆၊ ၂၀၂၂။

မကွေးတိုင်းဒေသကြီး၊ ဆောမြို့နယ်ထဲကကျေးရွာထဲကို စစ်ကောင်စီတပ်ဖွဲ့က လေယာဉ်နဲ့ဗုံးကြဲခဲ့လို့ ၄ဦးသေဆုံးပြီး ၈ဦးဒဏ်ရာရခဲ့ပါတယ်။

ဒီဇင်ဘာလ ၂၆ ရက် ဒီနေ့နေ့လယ် ၂ နာရီချိန်မှာ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်ဖွဲ့တွေက တိုက်ပွဲမဖြစ်ပဲ ဂျက်ဖိုက်တာ ၁ စီးနဲ့ လာရောက်ပစ်ခတ်ခဲ့လို့ဒေသခံ အမျိုးသမီး ၁ ဦးနဲ့ အမျိုးသား ၃ ဦးထိခိုက်သေဆုံးသွားတယ်လို့ဆိုပါတယ်။

“ဘာပစ်ခတ်မှုမှမရှိဘဲနဲ့ ရုတ်တရက်ကြီး လေယာဉ်နဲ့လာပစ်တာ။ ရွာသားတွေကပြေးချိန်တောင်မရလိုက်ဘူး။ သေဆုံးသွားတဲ့အန်တီကလည်း ညနေစာချက်ပြုတ်နေချိန်ထိမှန်သွားတာ။ နေအိမ်၄လုံးလည်းပျက်စီးသွားတယ်” လို့ ယောဒေသခံအမျိုးသမီးတဦးက ပြောပါတယ်။

သေဆုံးသွားသူတွေက ဒေါ်စောဝိုင်း၊ ကိုဇော်ဌေးဝင်း၊ ကိုကျော်ဌေးလင်းတို့ သားအမိ ၃ဦးနဲ့ တူဖြစ်သူ ‌ကိုဇော်မင်းတို့ ၄ဦး ဖြစ်ကာ နောက်ထပ်ဒေသခံ ၈ဦးလည်း ဒဏ်ရာရရှိခဲ့ကြတယ်လို့ ဆိုပါတယ်။

အခုလက်ရှိအချိန်မှာတော့ ညောင်ကန်ကျေးရွာကဒေသခံတချို့ဟာ တောထဲမှာရှောင်တိမ်းနေကြပြီး ကျန်တချို့ကတော့ကျေးရွာထဲမှာပင်ဆက်လက်နေထိုင်ဆဲဖြစ်တယ်လို့ ဆိုပါတယ်။

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မုံရွာမြို့၊ အမှတ် ၂ ရဲစခန်းက စခန်းမှူးနဲ့ရဲတပ်သားတွေလိုက်ပါလာတဲ့ကား ဒီဇင်ဘာလ ၂၆ ရက်ဒီမနက်ပိုင်းမှာ ပစ်ခတ်တိုက်ခိုက်ခံခဲ့ရပါတယ်။

စခန်းမှူးအပါအဝင် ၇ ဦးလိုက်လာတဲ့ကားကို မုံရွာမြို့၊ နန္ဒရပ်ကွက်၊ သမစိတ္တလမ်း၊ အင်ကြင်းခိုင်ဟိုတယ်အနီးမှာ ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တိုက်ခိုက်မှုကြောင့် စခန်းမှူးနဲ့ ရဲ ၂ ဦး နေရာတင်သေဆုံးခဲ့တယ်လို့ မုံရွာခရိုင်တပ်ရင်း(၇) – Lightning People Defence Force တာဝန်ခံကပြောပါတယ်။

“မုံရွာမြို့ပေါ်က နန္ဒဝန်ရပ်ကွက်၊ အင်းကြင်းခိုင်ဟိုတယ်နားက ပစ်တိုင်းထောင်ကွမ်းယာဆိုင်ရှေ့မှာ ကွမ်းယာဝယ်ကြတာ၊ ကားပေါ်မှာအမှတ် ၂ စခန်းမှူးအပါအဝင် ၆ ယောက်နဲ့ စခန်းမှူးရဲ့မိန်းမလည်း ပါတယ်။ အဲဒီအမျိုးသမီးကလည်း ကွမ်းယာဆိုင်ဘေးမှာထိုင်စောင့်နေတာ။ သေတဲ့အထဲမှာ စခန်းမှူးတယောက်အပြင် သူ့ရဲ့ဘော်ဒီကပ် ၂ ယောက်ပါတယ်။ အောက်ကို ဆင်းပစ်တဲ့ ၂ ယောက်လည်းစုတ်ပြတ်နေပြီး သွေးအိုင်ထဲမှာပါ” လို့ ပြောပါတယ်။

အပြန်အလှန်ပစ်ခတ်ချိန် ၂ မိနစ်ဝန်းကျင်သာကြာခဲ့ပြီး အဆိုပါရဲတွေဘက်က ကား ၂ စီးနဲ့အင်အားထပ်ရောက်လာလို့ ပြန်ဆုတ်ခွာလာခဲ့ရတယ်လို့ ဆိုပါတယ်။

ဒီတိုက်ခိုက်မှုကို မုံရွာခရိုင်တပ်ရင်း(၇) – Lightning People Defence Force၊ Black Falcon မြို့ပြပျောက်ကြားအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး ကာကွယ်ရေးရဲဘော်တဦးလည်း ထိခိုက်ဒဏ်ရာရရှိခဲ့တယ်လို့ သိရပါတယ်။

ပြီးခဲ့တဲ့ဒီဇင်ဘာလ ၂၁ ရက်ကလည်း မုံရွာမြို့နယ်၊ တောပုကျေးရွာအနောက်ဘက်ခြမ်းရှိ တောဝါကျောင်းအနီးမှာ ကင်းပုန်းဝတ်နေတဲ့ပျူစောထီးတွေကို မုံရွာခရိုင်တပ်ရင်း(၇) – Lightning People Defence Force အဖွဲ့က လက်နက်ကြီးနဲ့ပစ်ခတ်တိုက်ခိုက်ခဲ့ရာ ပျူစောထီး ၅ ဦးသေဆုံးခဲ့ပါသေးတယ်။

မန္တလေး၊ ဒီဇင်ဘာ ၂၆၊ ၂၀၂၂။

မန္တလေးတိုင်း၊ အောင်မြေသာစံမြို့နယ်ရှိ မြန်မာ့စီးပွားရေးဘဏ် ၃ ရှေ့ရှိ လုံခြုံရေးစောင့် စစ်ကောင်စီဘန်ကာကို လက်ပစ်ဗုံးနဲ့ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင်နှစ်ဦး သေဆုံးခဲ့တယ်လို့ No More Distatorship People Defence Defence Force – NMD ဆီက သိရပါတယ်။

အောင်မြေသာစံမြို့နယ်၊ ၂၆ ဘီလမ်း၊ ၈၅ လမ်းနဲ့ ၈၆ လမ်းရှိ မြန်မာ့စီးပွားရေးဘဏ် ၃ ကို ဒီဇင်ဘာလ ၂၅ ရက်မနေ့က နေ့လယ် ၁၁ နာရီလောက်မှာ တိုက်ခိုက်ခဲ့တာဖြစ်ပြီး အင်အား ၇ ဦးရှိတဲ့အနက် ၂ ဦးသေဆုံးခဲ့တာလို့ NMD ရဲ့ တာဝန်ရှိသူကပြောပါတယ်။

“ဆိုင်ကယ်ပေါ်ကနေ မောင်းရင်းပစ်တာ။ စစ်သားတယောက်နဲ့ ရဲတယောက်သေတယ်။ လဲသွားတဲ့ကောင်ကို တရွတ်တိုက်ဆွဲခေါ်သွားတယ်။ လက်ပစ်ဗုံးနဲ့ပစ်တဲ့ချိန်တုန်းကတော့ သူတို့ဘက်က သေနတ် ၆ ချက် ၇ ချက်ပြန်ပစ်တယ်။ နာရေးကားရော လူနာတင်ယာဥ်ရော သွားတယ်” လို့ NMD ရဲ့ တာဝန်ရှိသူက ပြောပါတယ်။

အဲဒီတိုက်ခိုက်မှုကို No More Dictatorship People Defence Force – NMD နဲ့ VOMDY–Front Warriors တို့က ပူးပေါင်းတိုက်ခိုက်ခဲ့တာဖြစ်ပြီး တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ သိရပါတယ်။

NMD အဖွဲ့ဟာ ပြီးခဲ့တဲ့ဒီဇင်ဘာလ ၂၁ ရက်နေ့လယ်ကလည်း မန္တလေးမြို့၊ အမှတ် ၁၀ ချမ်းမြသာစံမြို့နယ်ရဲစခန်းလိုင်းခန်းကို လက်ပစ်ဗုံးနဲ့ ပစ်ခတ်တိုက်ခိုက်ခဲ့ပါသေးတယ်။