အုတ်တွင်း၊ ဇွန် ၂၇၊ ၂၀၂၅။

ပဲခူးတိုင်း၊ အုတ်တွင်းမြို့နယ်မှာ ၅ နှစ်အရွယ်မိန်းကလေးကို သေဆုံးအောင် အဓမ္မပြုကျင့်ညှင်းပန်းနှိပ်စက်ခဲ့တဲ့ မွေးစားမိဘလင်မယားကို ထောင်ဒဏ်တသက်နဲ့ ၂၇ နှစ် ချမှတ်ခံခဲ့ရတယ်လို့ တရားရုံးနဲ့နီးစပ်သူတွေထံက သိရပါတယ်။

အထက်ပါမိန်းကလေးငယ် သေဆုံးမှုနဲ့ပတ်သက်ပြီး ကျူးလွန်ခဲ့တဲ့ တင်ဇော်ဝင်းကို မုဒိန်းမှုပုဒ်မ ၃၇၆(၃) အရ ထောင်ဒဏ်တသက်လွတ်ရက်မရှိ၊ အပြင်းအထန်နာကျင်စေမှု ပုဒ်မ ၃၂၆(၃) အရ ထောင်ဒဏ် ၂၀ နှစ်၊ ပုဒ်မ ၃၂၅(၃) အရ ထောင်ဒဏ် ၇ နှစ်၊ စုစုပေါင်း ၂၇ နှစ်(သီးခြားစီကျခံစေရန်)၊ ဇနီးဖြစ်သူ မပိုပိုချစ်ကိုတော့ ပုဒ်မ ၃၂၆ (၃)အရ ထောင်ဒဏ် ၂၀ နှစ်၊ ပုဒ်မ ၃၂၅ (၃)အရ ထောင်ဒဏ် ၇ နှစ် စုစုပေါင်း ၂၇ နှစ် (သီးခြားစီကျခံစေရန်) တောင်ငူခရိုင်တရားရုံးက အမိန့်ချခဲ့တာလို့ ဆိုပါတယ်။

” ဒီနေ့အပြီးသတ်အမိန့်ချတယ်။ သီးခြားကျခံစေဆိုတာက ဥပမာ တသက်တကျွန်းပါတဲ့သူဆို ၂၇ နှစ်ကို အရင်ကျခံပြီးမှ တသက်တကျွန်းပေါ့။ လောလောဆယ်တော့ သူတို့တောင်ငူထောင်မှာပဲ” လို့ တရားရုံးနဲ့ နီးစပ်သူဒေသခံတဦးက မြေလတ်အသံကို ပြောပါတယ်။

အဓမ္မပြုကျင့်ညှင်းပန်းနှိပ်စက်ခဲ့ပြီး သေဆုံးသွားတဲ့ကလေးငယ်ဟာ အုတ်တွင်းမြို့နယ်၊ ပေါက်တောကျေးရွာအုပ်စုကဖြစ်ပြီး တရွာတည်းနေ ဦးတင်ဇော်ဝင်းနဲ့ ဇနီးဖြစ်သူမပိုပိုချစ်တို့က ၂၀၂၃ ကစတင်ကာ မွေးစားခဲ့ပြီးနောက် ၂၀၂၄ ဩဂုတ်လ နောက်ဆုံးအပတ်မှာ မွေးစားဖခင်ဖြစ်သူက ကလေးငယ်ကို ကျေးရွာနေအိမ်မှာ ၁ ကြိမ်၊ တောစပ်မှာ ၁ ကြိမ် စုစုပေါင်း ၂ ကြိမ် ရက်ခြားအဓမ္မပြုကျင့်ပြီး ညှင်းပန်းနှိပ်စက်မှုတွေပြုလုပ်ခဲ့သလို ညှင်းပန်းနှိပ်စက်ရာမှာလည်း ဇနီးဖြစ်သူ မပိုပိုချစ် လည်း ပါဝင်ခဲ့ပါတယ်။

ညှင်းပန်းနှိပ်စက် အဓမ္မပြုကျင့်ခံရတာနဲ့ပတ်သက်ပြီး မွေးစားမိဘတွေကို ကလေးငယ်ရဲ့အဘိုးဖြစ်သူက အုတ်တွင်းမြို့မရဲစခန်းမှာအမှုဖွင့်တိုင်ကြားခဲ့ပြီးနောက် ၂၀၂၄ စက်တင်ဘာ ၂၆ ရက်မှာ ၎င်းတို့နေထိုင်ရာကျေးရွာကနေ ရဲက သွားရောက်ဖမ်းဆီးခဲ့ကာ မုဒိန်းမှု၊ အပြင်းအထန်နာကျင်စေမှုပုဒ်မတွေနဲ့ အမှုဖွင့်ထားခဲ့တာပါ။

ကလေးငယ်ဟာ မွေးစားမိဘတွေရဲ့ အဓမ္မပြုကျင့်တာအပြင် ရေနွေးပူနဲ့လောင်းတာ၊ လက်သီးဖြင့်ထိုးတာတွေအပါ နည်းမျိုးစုံနဲ့ ညှင်းပန်းနှိပ်စက်ခံခဲ့ရတဲ့ဒဏ်တွေကြောင့် ခန္ဓာကိုယ်ပြင်ပဒဏ်ရာ၊ ကိုယ်တွင်းထိခိုက်ဒဏ်ရာတွေနဲ့ တောင်ငူဆေးရုံမှာ ၄ ကြိမ်တက်ရောက် ဆေးကုသခံခဲ့ရပြီး ဒီဇင်ဘာ ၂၇ ရက် မနက် ၆ နာရီကျော်မှာ တောင်ငူဆေးရုံမှာပဲ ဆေးကုသရင်း သေဆုံးသွားခဲ့ကာ သေဆုံးရခြင်းမှာ အဆုတ်ရောင်၊ အသည်းမကောင်း၊ ကိုယ်ခန္ဓာအားနည်းမှုတွေကြောင့်ဖြစ်ကြောင်း မှုခင်းဆရာဝန်သုံးသပ်ချက်အရ သိရပါတယ်။

စာတည်း – ဟိန်းစံ၊ တည်းဖြတ် – HP

အုတ်တွင်း၊ မေ ၁၈၊ ၂၀၂၅။

ပဲခူးတိုင်း၊ အုတ်တွင်းမြို့နယ်၊ သာဂရကျေးရွာတောင်ကျောင်းမှာ အရက်မူးပြီးရမ်းကားတဲ့ သက်တော် ၇၀ အရွယ် ကျောင်းထိုင်ဘုန်းကြီးကို မူးယစ်ရမ်းကားမှုနဲ့ဖမ်းဆီးထားတယ်လို့ ဒေသခံတွေဆီက သိရပါတယ်။

မေ ၁၆ ရက်ညနေ ၅ နာရီခန့်ကတည်းက သာဂရတောင်ကျောင်းဆရာတော် သက်တော် ၇၀ ကျော်၊ ဝါတော် ၃၀ ကျော်ရှိ ဦးစန္ဒိမာဟာ အရက်သေစာသောက်စားပြီး မူးယစ်ရမ်းကားနေတာကြောင့် ရွာခံတွေက မြို့နယ်သာသနာထိန်းသိမ်းစောင့်ရှောက်ရေးအဖွဲ့ကို အကြောင်းကြားခဲ့ပြီး အဖွဲ့က သွားရောက်စစ်ဆေးပြီးနောက် လူဝတ်လဲကာ ရဲကိုဖမ်းဆီးခိုင်းလိုက်တာလို့ ဆိုပါတယ်။

“သွားစစ်ကြတဲ့အချိန်မှာ အရက်နံ့ကထွက်နေတယ်။ သူကအရက်ပြင်းလည်းချတယ်။ တနေ့က ဂရမ်းဆိုရင်အပြားအလုံး မဝယ်ပေးရင်လည်းဆဲသေးတယ်။ လူဝတ်လဲပြီး ရဲလက်အပ်ကြတယ်။ သက်သေခံဓားလည်း အပ်လိုက်ကြတယ်။ “လို့ ဒေသခံတဦးကပြောပါတယ်။

ဖမ်းဆီးမခံရခင်မှာ ဦးစန္ဒိမာဟာ ဓားကိုင်ပြီး ကြိမ်းဝါးတာတွေလည်းလုပ်ခဲ့တယ်လို့ ဆိုပါတယ်။

“ဓားကိုင်ပြီးတော့ လှီးမယ်ဖြတ်မယ်၊ ခုတ်မယ်ထစ်မယ်ဆိုပြီးလုပ်နေတာ။ သူကဓားကိုင်ရမ်းနေတော့ စွတ်လည်း မဝင်ရဲကြဘူး။ ကိုယ်တွေကလည်း ဓားကိုင်လို့ရတာမဟုတ်တော့ ရောက်တဲ့အချိန် ကျောင်းပေါက်နေ ခေါ်ချရတာ”လို့ ဒေသခံတဦးကပြောပါတယ်။

သူဟာ ယခင်ကတည်းက သောက်စားနေတတ်တာကို ရွာခံတွေကမြို့နယ်သာထိန်းအဖွဲ့ကို ဖုန်းဆက်တိုင်ကြားတာတွေရှိခဲ့တာကြောင့် အကြိမ်ကြိမ်သတိပေးခဲ့ပေမယ့် လိုက်နာတာမရှိဘဲ ဓားကိုင်ရမ်းကားတဲ့အခြေနေထိဖြစ်လာတာလို့ သိရပါတယ်။

ယခင်က သာဂရတောင်ကျောင်းမှာ သံဃာ ၅ ပါးခန့်ရှိခဲ့ပြီး ခုလိုလုပ်ရပ်တွေကို မကြာခဏလုပ်တဲ့အတွက် ဒဏ်မခံနိုင်တော့ဘဲ အခြားကျောင်းကို ပြောင်းရွှေ့ကြသလို လူထွက်ကြတာတွေလည်း ရှိခဲ့တယ်လို့ သိရပါတယ်။

မြို့နယ်သာသနာထိန်းသိမ်းစောင့်ရှောက်ရေးအဖွဲ့က အုတ်တွင်းမြို့မရဲစခန်းကို အပ်လိုက်တာကြောင့် ရဲအဖွဲ့က မူးယစ်ရမ်းကားမှုနဲ့အမှုဖွင့်ကာ အချုပ်ခန်းထဲမှာထိန်းသိမ်းထားပြီး တရားစွဲဆိုဖို့ ပြုလုပ်နေတယ်လို့ သိရပါတယ်။

စာတည်း – လင်း၊ တည်းဖြတ် – HP