ဒိန်းဂျား

မကွေး၊ ဇူလိုင် ၄၊ ၂၀၂၅။

မကွေးတိုင်း၊ မကွေးမြို့နယ်၊ သစ်ရာကောက်တိုက်နယ်၊ ငါးဆောင်ကျေးရွာကအုပ်ချုပ်ရေးမှူး ပစ်ခတ်ခံရပြီး သေဆုံးခဲ့တယ်လို့ Magway Guerrilla Warfare မကွေးပြောက်ကျားတပ်တာဝန်ခံ ကိုကံကြီးမောင်ဆီက သိရပါတယ်။

ပစ်ခတ်ခံရသူဟာ အသက် ၅၅ နှစ်အရွယ် ဘိုဝင်း‌ဌေးဆိုသူဖြစ်ပြီး ဇူလိုင် ၂ ရက် နေ့လယ် ၁ နာရီခန့်က ငါးဆောင်ကျေးရွာနဲ့ ဖိုးပေါက်ကန်ရွာကြားမှာပစ်ခတ်ခဲ့တာလို့ ဆိုပါတယ်။

“လမ်းခုလတတ်နေရာမှာ သေနက်ကျည် ၂ ချက်နဲ့ ပစ်ခတ်ရှင်းလင်းခဲ့တာ၊ ကျနော်တို့ ဦးခေါင်းကို ၂ ချက်ပစ်ခဲ့တာ”လို့ Magway Guerrilla Warfare မကွေးပြောက်ကျားတပ် တာဝန်ခံ ကိုကံကြီးမောင်က ပြောပါတယ်။

ဦးဘိုဝင်းဌေးဟာ အုပ်စုဥက္ကဌ၊ ထွေအုပ်စာရေးတွေနဲ့ပူးပေါင်းပြီး စစ်မှုထမ်းကြေးကောက်တာအပြင် ဒေသခံတွေကိုလည်း စစ်မှုထမ်းထဲထည့်တာတွေလုပ်နေတာကြောင့် ခုလိုပစ်ခတ်ခဲ့တာလို့ ဆိုပါတယ်။

“သူရွာက ပြည်သူ ၃ ဦးကို အုပ်စုဥက္ကဌ၊ ထွေအုပ်စာရေးတွေပေါင်းပြီးတော့မှ စစ်မှုထမ်းထဲ ထည့်တယ်၊ စစ်မှုထမ်းအတွက်ဆိုပြီး သူတို့က ပိုက်ဆံတွေစုတယ်၊ စုလို့ရတဲ့ ပိုက်ဆံတွေကိုလည်း သူတို့သုံးစွဲကြတာ၊ ဒီရက်ပိုင်းမှာလည်း သူတို့စစ်မှုထမ်းကြေးဆိုပြီးကောက်တယ်၊ သစ်ရာ ကောက်ဗိုလ်လေးရဲ့ ညွှန်ကြားချက်အရဆိုပြီး ၁ အိမ်ထောင်ကို ၂ သောင်းဆိုပြီးကောက်တယ်၊ အဲ့ဒါတွေကြောင့်မလို့ ပစ်ခတ်ရှင်းလင်းခဲ့တာ”လို့ အထက်ပါတာဝန်ခံက ဆက်ပြောပါတယ်။

ငါးဆောင်ကျေးရွာဟာ ငါးဆောင်ကျေးရွာအုပ်စုထဲမှာရှိတဲ့ အိမ်ခြေ ၇၀၀ ဝန်းကျင်ရှိ ကျေးရွာ ၁ ရွာဖြစ်ပါတယ်။

ပစ်ခတ်ပြီးနောက် ဘိုဝင်ဌေးဆီက ဖုန်း ၁ လုံးနဲ့ ဆိုင်ကယ် ၁ စီး သိမ်းဆည်းခဲ့ပြီး အလောင်းကိုတော့ အဲ့ဒီနေရာမှာပဲထားခဲ့တယ်လို့ သူကဆက်ပြောပါတယ်။

ဒီပစ်ခတ်မှုကို Magway Guerrilla Warfare(မကွေးပြောက်ကျားတပ်ဖွဲ့)၊ Dragon King People Defence Force (နဂါးမင်းပြည်သူ့ကာကွယ်ရေးအဖွဲ့ တောင်တွင်းကြီး) နဲ့ Taungdwingyi Fighter Force(LPDF) တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မေ ၂၀ ရက်ကလည်း မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်၊ ဂွေးတောက်ခုန်ကျေးရွာက အမှုပွဲစားဆိုသူကို Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – လင်း

ဒိန်းဂျား၊ အောင်စိုး

မြေလတ်အသံ၊ ဇူလိုင် ၃၊ ၂၀၂၅။

စစ်ကိုင်းတိုင်း၊ မုံရွာအခြေစိုက် နမခ နဲ့ မကွေးတိုင်း၊ BPI မြင်းမွေးမြူရေးတပ်တို့မှ စစ်ကောင်စီတပ်ဖွဲ့ဝင်တွေ ဇူလိုင် ၂ ရက်နဲ့ ၃ ရက်မှာ ဘက်ပြောင်းခိုလှုံလာကြတယ်လို့ သက်ဆိုင်ရာတော်လှန်ရေး တပ်ဖွဲ့ဝင်တွေဆီက သိရပါတယ်။

မုံရွာမြို့အခြေစိုက် အနောက်ပိုင်းတိုင်းစစ်ဌာနချုပ်-နမခ ကစစ်ကောင်စီတပ်ဖွဲ့ဝင် ၄ ဦး လက်နက်တွေနဲ့အတူ ဘက်ပြောင်းခိုလှုံလာခဲ့တယ်လို့ ဇူလိုင် ၃ ရက်ဒီနေ့မှာ မုံရွာမြို့နယ်ပြည်သူ့ ကာကွယ်ရေးအဖွဲ့က ထုတ်ပြန်ပါတယ်။

ဘက်ပြောင်းလာသူ ၄ ဦးမှာ အသက် ၃၀ ကျော်အရွယ်ရှိပြီး သူတို့ဟာ ၂၀၂၄ အတွင်း လူစားထိုး ပေါ်တာဆွဲခံရပြီးနောက်မှာ စစ်တပ်ထဲကိုရောက်ရှိခဲ့ကြတာလို့ ဆိုပါတယ်။

“သူတို့က ပစတွေဗျ။ ပေါ်တာအစားထိုး ပါလာကြရတာ။ စစ်သက်ကတော့ တနှစ်မပြည့်သေးဘူးဗျ”လို့ မုံရွာမြို့နယ်ပြည်သူ့ကာကွယ်ရေးအဖွဲ့မှတာဝန်ရှိသူတဦးက ပြောပါတယ်။

အဆိုပါ ၄ ဦးအနက် ၁ ဦးမှာ သေနတ်ပါမလာပေမယ့် ကျန် ၃ ဦးမှာတော့ MA-3 ၂ လက်၊ MA-1 ၁ လက်၊ ကျည်ဘောက် ၈ ခု ပါရှိလာခဲ့တာကြောင့် ဆုချီးမြှင့်ပေးဖို့ပြင်ဆင်ထားတယ်လို့ သူက ဆိုပါတယ်။

လက်ရှိမှာ တော်လှန်ရေးမှာဝင်ပြီး ပြန်တိုက်ချင်တဲ့သူရှိသလို နေရပ်ကို ပြန်ချင်တဲ့သူလည်းရှိတာကြောင့် မြို့ နယ်ပကဖအနေနဲ့ ၎င်းတို့ဖြစ်ချင်တဲ့ ဆန္ဒအတိုင်း အတတ်နိုင်ဆုံး လုပ်ဆောင်ပေးမှာဖြစ်တယ်လို့ အထက်ပါတာဝန်ရှိသူကပြောပါတယ်။

ပြီးခဲ့တဲ့မေ ၂၇ ရက်ကလည်း နမခ က စစ်ကောင်စီတပ်သား ၂ ဦးဟာ MA-1သေနတ် ၂ လက် နဲ့အတူ CDM တွေကိုကူညီထောက်ပံ့ပေးနေ တဲ့ ဒို့အရေးချန်နယ်ဆီကို ဘက်ပြောင်းလာခဲ့သေးတယ်လို့ သိရပါတယ်။

ဒါ့အပြင် မကွေးတိုင်း၊ ပခုက္ကူမြို့နယ်ရှိ BPI မြင်းမွေးမြူရေးတပ်မှ စစ်ကောင်စီတပ်ဖွဲ့ဝင် ၁ ဦး ဇူလိုင် ၂ ရက်နေ့လယ် ၁ နာရီလောက်မှာ လက်နက်နဲ့အတူ ဘက်ပြောင်းခိုလှုံလာတယ်လို့ ပခုက္ကူမြို့နယ် နယ်မြေ ၁ ပကဖ ဆီကသိရပါတယ်။

ဘက်ပြောင်းခိုလှုံလာသူဟာ အသက် ၂၉ နှစ်အရွယ် စစ်ကောင်စီတပ်သား မိုးစက်ဖြစ်ပြီး MA 1 အမျိုးအစား သေနတ် ၁ လက်၊ ကျည်ဘောက် ၃ ခု၊ ကျည် ၁၃၅ တောင့်တို့နဲ့အတူလည်း ပါလာတာကြောင့် ဆုငွေ သိန်း ၅၀ ချီးမြှင့်ခဲ့တယ်လို့ ဆိုပါတယ်။

“ကျနော်တို့နဲ့ ချိတ်ဆက်ပြီးမှ ဝင်လာတာ၊ ကျနော်တို့ကလည်း ကြိုပေးရတဲ့ အပိုင်းတော့ရှိတာပေါ့၊ ကျနော်တို့နယ်မြေထဲအထိတော့ သူဟာသူလာတာ၊ သူအလင်းဝင်ရတဲ့အကြောင်းကတော့ စစ်ကောင်စီတပ်ထဲမှာ မနေချင်တော့လို့ ပြောတယ်၊ တပ်ထဲမှာ အပြင်တွေလည်း မထွက်ရဘူးပြောတယ်၊ လွတ်လပ်မှုလည်းမရှိဘူးလို့ ပြောတယ်၊” လို့ ပခုက္ကူမြို့နယ် နယ်မြေ ၁ ပကဖ တာဝန်ခံက ပြောပါတယ်။

လက်ရှိမှာ တပ်ရင်းမှာထိန်းသိမ်းထားပြီး ဆက်လက်စုံစမ်းမှုတွေလုပ်နေတယ်လို့လည်း ဆိုပါတယ်။

“သူကတော့ လွတ်မြောက်နယ်မြေတနေရာမှာ သွားပြီးလုပ်ကိုင်စားသောက်မယ်တော့ ပြောတယ်၊ အခုလောလောဆယ်တော့ ကျနော်တို့ဆီမှာ ထိန်းသိမ်းထားတယ်”လို့ သူက ဆက်ပြောပါတယ်။

၂၀၂၁ စစ်အာဏာသိမ်းချိန်ကနေ အခုနှစ် ဇူလိုင် ၂ ရက်အထိ ပခုက္ကူမြို့နယ် နယ်မြေ ၁ ပကဖ ဆီကို ဘက်ပြောင်းခိုလှုံလာသူ ၃ ဦးရှိပြီး အောင်သာရွာက ပျူစောထီး ၁ ဦးနဲ့ BPI မြင်းမွေးမြူရေးတပ်ထဲက တပ်သား ၂ ဦးဖြစ်တယ်လို့ သိရပါတယ်။

စာတည်း – လင်း

ရေစကြို၊ ဇူလိုင် ၂၊ ၂၀၂၅။

မကွေးတိုင်း၊ ရေစကြိုမြို့နယ်၊ ပခုက္ကူ-ရေစကြိုကားလမ်းပိုင်းမှာ ခလရ ၂၅၆ တပ်ရင်းကိုပို့မယ့် ရိက္ခာတင်ကား ၁ စီးကို ဖမ်းဆီးခဲ့တယ်လို့ ရေစကြိုပြည်သူ့ကာကွယ်ရေးအဖွဲ့ဆီက သိရပါတယ်။

ပခုက္ကူအခြေစိုက် တပ်မ ၁၀၁ ကနေ ရေစကြိုအခြေစိုက် ခလရ ၂၅၆ တပ်ကိုပို့မယ့် ရိက္ခာတင် မှန်လုံကားကို ဇူလိုင် ၂ ရက် မနက် ၉ နာရီမှာဖမ်းမိခဲ့တာလို့ ဆိုပါတယ်။

“ရေစကြို-ပခုက္ကူကားလမ်းမပေါ် တနေရာမှာ ကျနော်တို့ ရှောင်တခင်စစ်ဆေးရင်းနဲ့ ပခုက္ကူတပ်မ ၁၀၁ ကနေ ခလရ ၂၅၆ တပ်ထဲကိုပို့မဲ့ရိက္ခာတွေကို ဖမ်းဆီးမိခဲ့တာ၊ ဖမ်းဆီးမိတာက ရေစကြိုမြို့ ပခုက္ကူ-ရေစကြိုကားလမ်းတနေရာမှာပါ”လို့ ရေစကြိုပြည်သူ့ကာကွယ်ရေးအဖွဲ့ရဲ့ သတင်းနဲ့ ပြန်ကြားရေးတာဝန်ခံက ပြောပါတယ်။

ကားပေါ်မှာပါတဲ့ ဆန် ၃၅ အိတ်၊ စားဆုံးဆီ ၁၄ ပုံး၊ စက်သုံးဆီ ၇ ပုံး၊ ဆား ၁ အိတ်၊ ဟင်းချိုမှုန့် ၁ အိတ်တို့ကိုသိမ်းဆည်းထားပြီး ကားမောင်းနဲ့ယာဥ်နောက်လိုက်ကိုတော့ စစ်ဆေးနေတယ်လို့ သူကဆက်ပြောပါတယ်။

ခလရ တပ်ထဲကို ပို့မယ်ဆိုတာကို ရှောင်တခင်စစ်ဆေးချိန် ပြေစာထဲမှာတွေ့ရတဲ့ အချက်အလက်တွေအရ အတည်ပြုနိုင်တာလို့လည်း ဆိုပါတယ်။

ခုလိုစစ်ကောင်စီတပ်တွေဆီပို့မယ့် ရိက္ခာကားတွေကို ဖမ်းမိတာ ၄ ကြိမ်ထက်မနည်းရှိခဲ့ပြီး ပြီးခဲ့တဲ့နှစ် ဇူလိုင် ၁၄ ရက်ကလည်း ရေစကြို ခလရ ၂၅၇ တပ်ထဲကနေ ဇီးတောရွာ ပျူစောထီးတွေဆီပို့မဲ့ရိက္ခာကား ၁ စီးကိုလည်း ရေစကြိုပြည်သူ့ကာကွယ်ရေးအဖွဲ့က ရေစကြိုမြို့နယ်အတွင်းမှာ ဖမ်းဆီးခဲ့ပါသေးတယ်။

စာတည်း – လင်း

ပစ်ခတ်ဖို့သွားတဲ့ တော်လှန်ရေးတပ်ဖွဲ့ဝင် ၁ ဦးလည်းဓါးထိုးခံရပြီးသေဆုံး

တောင်တွင်းကြီး၊ ဇူလိုင် ၂၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ အိုးပေါက်အုပ်စု၊ အိုးပေါက်ကျေးရွာက ပျူစောထီးခေါင်းဆောင် အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ ပုဏ္ဏဝတီ ပြည်သူ့ကာကွယ်ရေးတပ် (တောင်တွင်းကြီး) တိုက်ခိုက်ရေးခေါင်းဆောင်ဆီက သိရပါတယ်။

ပစ်ခတ်ခံရသူဟာ အသက် ၆၀ နှစ်အရွယ် ဘိုကွီး(ခ)ခင်မောင်လတ်ဆိုသူဖြစ်ပြီး ဇွန် ၂၉ ရက် ည ၁၀ နာရီခွဲဝန်းကျင်က သူ့နေအိမ်မှာပစ်ခတ်ခဲ့တာလို့ ဆိုပါတယ်။

“သူ့ရဲ့ ဦးခေါင်းကို ၂ ချက်ပစ်ခဲ့တယ်၊ ဝမ်းဗိုက်ကို ၃ ချက်ပစ်ခဲ့တယ်၊ သူကထွက်ပြေးမယ်လုပ်တဲ့အချိန် ကျနော်တို့ ပစ်ခတ်ရှင်းလင်းတာ၊” လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဦးခင်မောင်လတ်ဟာ စစ်မှုထမ်းကြေးကောက်တာ၊ ပဲခူးရိုးမက ဆင်းလာတဲ့သစ်လှည်း၊ ဝါးလှည်းတွေကို ဆက်ကြေးကောက်တာ၊ ဖမ်းဆီးရိုက်နှက်တာတွေလုပ်နေသူဖြစ်တယ်လို့ သူကဆက်ပြောပါတယ်။

“တောင်တွင်းကြီး-ဆတ်သွား နေပြည်တော်လမ်းဘေး အိုးပေါက်ကျေးရွာမှာနေပြီးတော့ ပဲခူးရိုးမက ဆင်းလာတဲ့ သစ်လှည်း၊ ဝါးလှည်းတွေကို သူက ဂိတ်ဖွင့်ဖမ်းဆီးပြီး ဆက်ကြေးကောက်တယ်၊ ဖမ်းဆီး ရိုက်နှက်တယ်၊ နှိပ်စက်တယ်၊ သူ့ကျေးရွာမှာလည်း ပျူစောထီးဖွဲ့နိုင်ဖို့ ပျူစောထီးသင်တန်းတွေပေးဖို့ ဖိအားပေးတာတွေလုပ်တယ်”လို့ အထက်ပါတိုက်ခိုက်ရေးခေါင်းဆောင်က ဆက်ပြောပါတယ်။

ဘိုကွီး(ခ)ခင်မောင်လတ်ရဲ့အလောင်းကို နေအိမ်ရှေ့မှာထားခဲ့တာကြောင့် ဇွန် ၃၀ ရက်မှာ ဆိုင်ကယ် ၈ စီးနဲ့ စစ်ကောင်စီတပ်ဖွဲ့ဝင်တွေလာကြည့်ပြီး ဇူလိုင် ၂ ရက်ဒီကနေ့မှာတော့ အလောင်းကို အိုးပေါက်ရွာမှာ သင်္ဂြိုဟ်တယ်လို့သိရကြောင်း တိုက်ခိုက်ရေးခေါင်းဆောင်ကပြောပါတယ်။

ဇွန် ၂၉ ရက်မှာပဲ ဦးခင်မောင်လတ်ကို ပစ်ခတ်ဖို့ဝင်သွားတဲ့ အသက် ၂၆ နှစ်အရွယ် တော်လှန်ရေးတပ်ဖွဲ့ဝင် ၁ ဦးလည်း နေအိမ်ထဲကိုဝင်ချိန်နော က်ထပ် ပျူစောထီးဝပ်ဖွဲ့ဝင် ၁ ဦးက ဓါးနဲ့ထိုးခဲ့တာကြောင့် သေဆုံးခဲ့တယ်လို့ ဆိုပါတယ်။

“သူ့နေအိမ်ထဲကို ကျနော့်ရဲဘော်တဦးကဝင်သွားတဲ့အချိန်မှာ ပျူစောထီးအဖွဲ့ဝင်တဦးက အိမ်ထဲမှာ ပုန်းပြီးအလစ်အငိုက် ဓါးနဲ့ထိုးပြီးထွက်ပြေးသွားတယ်၊ ကျနော်တို့ ရဲဘော်တဦးတော့ ကျဆုံးသွားတယ်”လို့ သူက ဆက်ပြောပါတယ်။

သေဆုံးသွားတဲ့တပ်ဖွဲ့ဝင်ရဲ့အလောင်းကိုပြန်သယ်ပြီး ဇွန် ၃၀ ရက် ညနေ ၃ နာရီလောက်မှာ သင်္ဂြိုဟ်ခဲ့တယ်လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဒီပစ်ခတ်မှုကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး)၊ သရက်ခရိုင် အမှတ် ၅ တပ်ရင်း (ဆင်ပေါင်ဝဲမြို့နယ်)နဲ့ မကွေးတောင်ပိုင်းပြည်သူ့ကာကွယ်ရေးအဖွဲ့ တို့က ပူးပေါင်းလုပ်ဆောင်ခဲ့တာ လို့ သိရပါတယ်။

ပြီးခဲ့တဲ့ ဧပြီ ၂၃ ရက်ကလည်း မကွေးတိုင်း၊ ဆင်ပေါင်ဝဲမြို့နယ်၊ ဓနုံးမြှောင်ဂိတ်မှ ဗိုလ်ကြီးဖြိုးမောင် ဦးဆောင်ပြီး ဝါးစေ့မြှောင်ဂိတ်က ကားနဲ့တက်လာတဲ့ စစ်ကြောင်းကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး) အဖွဲ့က ဝါးစေ့မြှောင်ဂိတ်အနီးမှာ ပစ်ခတ်တိုက်ခိုက်ခဲ့ရာ စစ်ကောင်စီဘက်က ၈ ဦးသေဆုံးခဲ့ပါ‌သေးတယ်။

စာတည်း – လင်း

စလင်း၊ ဇွန် ၂၉၊ ၂၀၂၅။

မကွေးတိုင်း၊ စလင်းမြို့နယ်၊ ပန်းတိမ်ကုန်းရွာကို စစ်ကောင်စီတပ်ဖွဲ့ဝင်တွေက ဇွန် ၂၉ ရက် နေ့လယ်ပိုင်းမှာဝင်ရောက်ပြီး ရွာကိုမီးရှို့ဖျက်ဆီးနေတယ်လို့ စလင်းမြို့ခံတွေဆီက သိရပါတယ်။

အမြောက်နဲ့သံချပ်ကာကား ၅ စီးအပါ တပ်ဖွဲ့ဝင်အင်အား ၁၀၀ ခန့်ပါစစ်ကြောင်းက အိမ်ခြေ ၂၀၀၊ အိမ်ထောင်စု ၂၀၀ ရှိတဲ့ ပန်းတိမ်ကုန်းရွာကို ဒီညနေပိုင်းအထိ မီးရှို့နေတာကြောင့် ပျက်စီးဆုံးရှုံးမှုမသိရသေးဘူးလို့ ဆိုပါတယ်။

“ပန်းတိမ်ကုန်းရွာထဲဝင်တာက နေ့လယ် ၁၀ နာရီလောက်ကဝင်တာ၊ ကနဦးစရှို့တာက ကောက်ရိုးပုံကို ရှို့တာ၊ လွန်ခဲ့တဲ့ ၁ နာရီလောက်ကတော့ ရွာကိုရှို့နေပါတယ်၊ မီး‌ရှို့ခံရတဲ့ အိမ်ခြေကတော့ အတည်ပြုလို့ မရသေးပါဘူး၊ အခုအချိန်ထိ စစ်တပ်မီးရှို့နေတုန်းပါ၊” လို့ စလင်းမြို့ခံတဦးက ပြောပါတယ်။

ဒါ့အပြင် ဒီညနေပိုင်းမှာပဲ ကြည်တော်စုရွာက အသက် ၁၈ နှစ် အရွယ် စိတ်ကျန်းမာရေးချို့တဲ့သူ ကိုဖိုးထူးကိုပစ်သတ်ခဲ့သေးတယ်လို့ ဆိုပါတယ်။

အဲ့ဒီစစ်ကြောင်းဟာ ဇွန် ၂၈ ရက် မနေ့ကလည်း မြောင်းမကုန်းရွာမှာစခန်းချပြီး ရွာသား ၂ ဦးကိုဖမ်းဆီး ကာ ဒေါ်အောင်ဆန်းစုကြည်ပုံတက်တူးထိုးထားတဲ့နေရာတွေကို ဓါးနဲ့မွန်းပြီး ပြန်လွှတ်ပေးခဲ့တယ်လို့ သူကဆက်ပြောပါတယ်။

“အဲ့ဒီစစ်တပ်က မနေ့ကတဲ့က ဂုံကုန်းရွာဘက်မှာ ကားတွေထားပြီး ဆည်မြောင်းဘောင်လမ်းအတိုင်း တက်လာတာ၊ မနေ့က တောတွင်ရွာထဲဝင်ပြီးတော့ မွှေနှောက်သွားတယ်၊ နောက်တခါ မြောင်းမကုန်းရွာကထွေအုပ်စာရေးအိမ်မှာ စစ်ကြောင်းကစခန်းချပြီးတော့နေတယ်၊ ရွာသား ၂ ဦးကိုလည်း ဖမ်းတယ်၊ သူတို့က ရင်ဘတ်မှာ အမေစုပုံထိုးထားတယ်၊ အဲ့ဒီနေရာကိုလည်း ဓါးနဲ့မွှန်းသွားတယ်”လို့ စလင်းမြို့ခံ အမျိုးသမီးတဦးက ပြောပါတယ်။

ဒါ့အပြင် ဒီမနက်ပိုင်းမှာလည်း မိုးဝန်းရွာကနေ သရက်ချဥ်ရွာကိုသွားချိန်လမ်းမှာတွေ့တဲ့ မိုးဝန်းရွာသား ၅ ဦးကိုဖမ်းဆီးကာ သရက်ချဥ်ရွာအရောက်မှာပြန်လွှတ်ပေးခဲ့ပြီး ပန်းတိမ်းကုန်းရွာဘက်ကိုဆက်လက် စစ်ကြောင်းထိုးလာချိန်မှာလည်း နောက်ထပ်ဒေသခံ ၄ ဦးထပ်မံဖမ်းဆီးခဲ့ကာ လက်ရှိအချိန်ထိ ပြန်မလွှတ်သေးဘူးလို့ ဆိုပါတယ်။

ခုလို စစ်ကြောင်းထိုးမီးရှို့နေတာကြောင့် ဂုံကုန်းရွာ၊ ကျက်သကိုင်ရွာ၊ မင်းတဲရွာ၊ ပေါင်လောင်ရွာ၊ တပ်ပြင်ရွာ၊ သာစည်ရွာ၊ မြောင်းမကုန်းရွာ၊ မိုးဝန်းရွာ၊ သရက်ချဉ်ရွာ၊ ပန်းတိမ်ကုန်း၊ ကျီးသိုက်ရွာ၊ ကညှပ်ရွာ တို့က ဒေသခံ ၅,၀၀၀ ကျော်လည်း ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

ရေစကြို၊ ဇွန် ၂၈၊ ၂၀၂၅။

မကွေးတိုင်း၊ ရေစကြိုမြို့ပေါ်က ငြိမ်းဇာနည်အမည်ရှိ စစ်ကောင်စီတပ်ဖွဲ့ဝင်တွေတပ်စွဲထားတဲ့နေရာကထွက်လာတဲ့ အငြိမ်းစားတပ်ကြပ်ကြီး ၁ ဦးကို ပစ်ခတ်ရာသေဆုံးခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဇွန် ၂၈ ရက် ဒီမနက် ၉ နာရီလောက်မှာ အဆိုပါစခန်းကထွက်လာတဲ့ အသက် ၆၄ နှစ်အရွယ် အငြိမ်းစားတပ်ကြပ်ကြီး ထွန်းအောင် ကို ဒေသခံကာကွယ်ရေးတပ်တွေကဖမ်းဆီးရာ အဖမ်းမခံဘဲထွက်ပြေးချိန်မှာ ပစ်ခတ်လိုက်တာလို့ ဆိုပါတယ်။

“ငြိမ်းဇာနည်စခန်းကနေ ဒီကောင်က မြို့အပြင်ကိုထွက်လာတာ၊ ကျနော်တို့ရဲဘော်တွေက တားပြီးဖမ်းဆီးတာ၊ သူက အသာတကြည်အဖမ်းဆီးမခံဘဲ ဆိုင်ကယ်နဲ့ထွက်ပြေးတဲ့အတွက်ကြောင့် လိုက်လံပစ်ခတ်ပြီးတော့ အသေဖမ်းဆီးလိုက်ရတာ။”လို့ ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

သူဟာ ၂၀၂၁ ဧပြီ ၂၆ မှာအငြိမ်းစားယူပြီးနောက် ရေစကြိုမြို့ပေါ်က စစ်မှုထမ်းဟောင်းရုံးမှာ ပြန်လည်တာဝန်ထမ်းဆောင်နေသူဖြစ်တယ်လို့လည်း ဆိုပါတယ်။

“အငြိမ်းစားယူထားပေမဲ့လည်း သူက စစ်မှုထမ်းဟောင်းရုံးမှာပြန်ပြီးတော့ တာဝန်ထမ်းဆောင်နေတဲ့သူပါ၊ သူက မြို့ပေါ်မှာ စစ်ကောင်စီအတွက်ပေါ်တာဆွဲပေးတာမျိုးတွေ၊ သန်းခေါင်စာရင်းကောက်ပေးတာမျိုးတွေ လုပ်ပေးတယ်။”လို့ အထက်ပါသတင်းနဲ့ပြန်ကြားရေးတာဝန်ခံက ပြောပါတယ်။

ပစ်ခတ်ပြီးနောက် စာရွက်စာတမ်း၊ ဖုန်း ၁ လုံး၊ ဆိုင်ကယ် ၁ စီး သိမ်းဆည်းခဲ့ပြီး အလောင်းကို ရေစကြိုမြို့အထွက်မှာထားခဲ့တယ်လို့ သူကဆက်ပြောပါတယ်။

ပြီးခဲ့တဲ့ မေ ၃ ရက်ကလည်း ရေစကြိုမြို့ပေါ် ရုံးပေါင်းစုံထဲကို လက်နက်ခဲယမ်းပို့ပြီးပြန်လာတဲ့ ခလရ ၂၅၈ တပ်က အင်အား ၉၀ ပါ စစ်ကြောင်းကို ရေစကြိုမြို့နယ်ပြည်သူ့ကာကွယ်ရေးတပ်ဖွဲ့က ‌ရေစကြိုမြို့အထွက်မှာ မိုင်းဆွဲ တိုက်ခိုက်ခဲ့ပါသေးတယ်။

စာတည်း – လင်း