စလင်း၊ မေ ၁၅၊ ၂၀၂၅။

မကွေးတိုင်း၊ စလင်းမြို့နယ်၊ ကူရင်းချောက်ကျေးရွာအုပ်စု၊ မကျီးကုန်းကျေးရွာကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တဲ့အတွက် သက်ကြီးပိုင်းအမျိုးသမီး ၁ ဦးထိခိုက်ပြီး နေအိမ်ပျက်စီးမှုတွေရှိခဲ့တယ်လို့ ဒေသခံတွေဆီက သိရပါတယ်။

မေ ၁၄ ရက် မနေ့ကညနေ ၃ နာရီခွဲမှာ ၁ ကြိမ်နဲ့ ၃ နာရီ ၄၆ မိနစ်မှာ ၁ ကြိမ် ဂျက်ဖိုက်တာပေါ်က ဗုံးသီး ၁ လုံးစီကြဲချတိုက်ခိုက်ခဲ့တာလို့ ဆိုပါတယ်။

“ကျနော်တို့ဆီကကြည့်ရင် အရှေ့ကလာတာဆိုတော့ မိတ္ထီလာဘက်ကလာတာ ဖြစ်ပါလိမ့်မယ်။ ဗုံးအနေနဲ့ကတော့ ပေါင် ၃၀၀ လောက်ရှိမယ်လို့ ယူဆတယ်။ ဘုန်းကြီးကျောင်းဘက်မှာ ၁ လုံး၊ စာသင်ကျောင်းဘက်မှာ ၁ လုံး၊ ခါးလောက်မြုပ်တဲ့ကျင်းကြီးတွေ ဖြစ်သွားပါတယ်။” စလင်းမြို့ခံ အမျိုးသမီးတဦးက ပြောပါတယ်။

ဗုံးစထိမှန်ပြီး ကျေးရွာရဲ့အရှေ့ဘက်အပိုင်းမှာရှိတဲ့ ဘုန်းကြီးကျောင်းဆောင် ၁ ခု၊ သိမ် ၁ ခု၊ ရွာလမ်းအနောက်ဘက်ရှိ စာသင်ကျောင်း ၁ ခု၊ ၆ ခန်းတွဲဝန်ထမ်းအိမ်ရာ ၁ ဆောင်၊ စာကြည့်တိုက် ၁ တိုက်နဲ့ နေအိမ် ၆ လုံးပျက်စီးခဲ့ပါတယ်။

ဒါ့အပြင်အသက် ၆၀ အမျိုးသမီး ၁ ဦးလည်း လက်ကိုဗုံးစထိမှန်ဒဏ်ရာရခဲ့ပြီး အခြေအနေက မစိုးရိမ်ရဘူးလို့ ဆိုပါတယ်။

ရွာသားတွေဟာ တော်လှန်ရေးတပ်ဖွဲ့ဝင်တွေနဲ့ စစ်ကောင်စီတပ်တို့ရဲ့တိုက်ပွဲတွေကြောင့် အများစုက ရွာထဲကနေတိမ်းရှောင်နေတာကြောင့် လေကြောင်းတိုက်ခိုက်ချိန်မှာ ထိခိုက်မှုနည်းသွားတာဖြစ်တယ်လို့ အထက်ပါအမျိုးသမီးကပြောပါတယ်။

မကျီးကုန်းကျေးရွာဟာ အိမ်ခြေ ၁၅၀၊ လူဦးရေ ၆၀၀ ကျော်ရှိပြီး လေကြောင်းတိုက်ခိုက်ပြီးနောက်မှာလည်း ကျန်ရှိနေတဲ့ဒေသခံတွေ ထွက်ပြေးတိမ်းရှောင်တာတွေရှိနေပါတယ်။

ပြီးခဲ့တဲ့ မေ ၁၃ ရက်ကလည်း စလင်းမြို့နယ်၊ ကူရင်းချောက်ကျေးရွာအုပ်စု၊ ညောင်ပင်သာကျေးရွာဘုန်းကြီးကျောင်းကို တိုက်ပွဲဖြစ်တာမရှိဘဲ စစ်ကောင်စီတပ်က ဂျက်ဖိုက်တာနဲ့ဗုံးကြဲချ တိုက်ခိုက်ခဲ့ပါသေးတယ်။

စာတည်း – လင်း

ဒိန်းဂျား ၊ ကျော်ကြီး

မြေလတ်အသံ၊ မေ ၁၄၊ ၂၀၂၅။

ပဲခူးတိုင်းနဲ့ မန္တလေးတိုင်းကမြို့နယ်တွေမှာ ဒုရဲအုပ် နယ်ထိန်းခေါင်းဆောင် ၁ ဦးနဲ့ အုပ်ချုပ်ရေးမှူး ၁ ဦး ပစ်ခတ်ခံရပြီးသေဆုံးခဲ့တယ်လို့ သက်ဆိုင်ရာမြို့နယ်တွေရဲ့တော်လှန်ရေးတပ်ဖွဲ့ဝင်တွေက ပြောပါတယ်။

ပဲခူးတိုင်း၊ ကြို့ပင်ကောက်မြို့နယ်၊ အလယ်ကုန်းကျေးရွာနဲ့ ကြို့ပင်ကောက်မြို့ လမ်းပိုင်းပေါ်မှာ ဒုရဲအုပ် နယ်ထိန်းခေါင်းဆောင် ပစ်ခတ်ရာသေဆုံးခဲ့တယ်လို့ သာယာဝတီခရိုင် ၃၈၀၂ တပ်ခွဲ ၄၊ မြေအောက်ပြောက်ကျားတပ်ဖွဲ့ – အုတ်ဖိုက မေ ၁၄ ရက်မှာ သတင်းထုတ်ပြန်ပါတယ်။

ပစ်ခတ်ခံရသူဟာ အလယ်ကုန်းကျေးရွာ နယ်မြေရဲစခန်းက အသက် ၃၁ နှစ်အရွယ် ဒုရဲအုပ် နယ်ထိန်းခေါင်းဆောင် မာန်ဟိန်းဆိုသူဖြစ်ပြီး မေ ၁၃ ရက် မနက် ၁၀ နာရီခန့်မှာ ပစ်ခတ်ခဲ့တာ လို့ဆိုပါတယ်။

“သူက တာဝန်ကျရာ အလယ်ကုန်း စခန်းကနေ ကြို့ပင်ကောက်မြို့ကို အပြန်လမ်းမှာ စောင့်ပြီး ရှင်းလင်းခဲ့တာပါ။ ခုချိန်ထိ အမြဲပြည်သူအပေါ် ဒုက္ခပေးနေဆဲမို့ ရှင်းလင်းရတာပါ။ ကျနော်တို့ကို မြင်တာနဲ့ မြေအောက်ပြောက်ကျားတပ်ဖွဲ့ အုတ်ဖိုမှန်းသိတော့ နီးရာအိမ်ထဲဝင်ပြေးတာ အိမ်ထဲထိလိုက်ပြီး ဦးခေါင်းကိုတချက်ပစ်ခဲ့တယ်”လို့ မြေအောက်ပြောက်ကျားတပ်ဖွဲ့ အုတ်ဖိုမှ တပ်ဖွဲ့င်ဒေဝကပြောပါတယ်။

ပစ်ခတ်မှုကြောင့်နေရာတင်သေဆုံးခဲ့ပြီး သူ့ဆီကနေ G3 ကျည် ၁၂ တောင့်၊ ဆိုင်ကယ် ၁ စီး၊ စကားပြောစက် ၁ လုံး၊ ငွေ ၆၀၀ ကျပ်ကို သိမ်းဆည်းရမိခဲ့တယ်လို့ ဆိုပါတယ်။

ဒါအပြင် မန္တလေးတိုင်း၊ ငါန်းဇွန်မြို့နယ်၊ ရွှေတောင်ကျေးရွာက အုပ်ချုပ်ရေးမှူး ဦးထွန်းဦးကို မေ ၁၂ ရက်ညနေ ၅ နာရီခွဲမှာ ပစ်ခတ်ရာသေဆုံးခဲ့တယ်လို့ နဂါးနီပြောက်ကျားတပ်ဖွဲ့ – မြင်းခြံ ဆီက သိရပါတယ်။

“သူတို့ရွာအရှေ့ ကြက်ပြင်မှာ **ဂိတ်ရှိတယ်၊ ဂိတ်ကိုပုံမှန်သွားပြီး‌တော့ သောက်စားပြီးပြန်လာတာ၊ သူက ဆိုင်ကယ်နဲ့တိုက်မလို့လုပ်ပြီး မောင်းသွားတာ၊ ရွှေတောင်ရွာထိပ်မှာ ရှင်းလင်းခဲ့တာ၊ သူ့ကို လိုက်ပစ်တာမှာ ပေါင် ၁ ချက်၊ လက် ၁ ချက်၊ ဦးခေါင်း ၁ ချက် ပစ်ခဲ့တာ၊ အလောင်းကိုတော့ ရွှေတောင်နဲ့ မြို့သာကြားထဲမှာ ထားခဲ့တာ”လို့ နဂါးနီပြောက်ကျားတပ်ဖွဲ့-မြင်းခြံ တာဝန်ခံက ပြောပါတယ်။

ဦးထွန်းဦးဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ဒေသခံတွေအပေါ်အနိုင်ကျင့်တာတွေရှိတာကြောင့် ပစ်ခတ်ခဲ့တာလို့ နဂါးနီပြောက်ကျားတပ်ဖွဲ့-မြင်းခြံရဲ့ မေ ၁၃ ရက်ကထုတ်ပြန်တဲ့ ထုတ်ပြန်ချက်မှာ ဖော်ပြထားပါတယ်။

ဦးထွန်းဦးဆီကနေ လက်ပစ်ဗုံး ၂ လုံးနဲ့ နိုင်ငံသားကပ်ပြား ၁ ခု တို့ကို သိမ်းဆည်းရရှိခဲ့ပြီး ပစ်ခတ်မှုဖြစ်ပြီးနောက် မေ ၁၃ ရက်မနက်ပိုင်းမှာ စစ်ကောင်စီတပ်ဖွဲ့ဝင်တွေက အလောင်းကို ရွှေတောင်ရွာထဲ ပြန်သယ်သွားကြတယ်လို့ သိရပါတယ်။

ပြီးခဲ့တဲ့ မတ် ၃ ရက်ကလည်း မြင်းခြံခရိုင် ငါန်းဇွန်မြို့၊ အင်းဝဘဏ်အနီးမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို နဂါးနီပြောက်ကျားတပ်ဖွဲ့က ပစ်ခတ်တိုက်ခဲ့ရာ ၄ ဦးသေဆုံးခဲ့တယ်လို့ အဲ့ဒီအဖွဲ့ဆီက သိရပါတယ်။

စာတည်း – လင်း

ပခုက္ကူ၊ မေ ၁၄၊ ၂၀၂၅။

မကွေးတိုင်း၊ ပခုက္ကူမြို့က ပျူစောထီးခေါင်းဆောင်တဦးကို လက်ပစ်ဗုံးတွေနဲ့အတူဖမ်းမိခဲ့တယ်လို့ မြင်းခြံခရိုင်တပ်ရင်း ၉၊ Myingyan Black Tiger – MBT က မေ ၁၃ ရက်မှာ သတင်းထုတ်ပြန်ပါတယ်။

မေ ၉ ရက် ညနေ ၅ နာရီလောက်မှာ ပခုက္ကူမြို့၊ စက်မှုဇုန် ၆ လမ်းနဲ့ ၇ လမ်းကြားမှာနေထိုင်တဲ့ ပျူစောထီးခေါင်းဆောင် အရှည်ကြီး (ခ) ဒူးရှည်ကို ဖမ်းမိတာလို့ သိရပါတယ်။

“အဓိကတော့ တခြား mission လုပ်ဖို့သွားတာ၊ ကျနော်တို့ ရဲဘော်တွေက အဲ့ဒီရပ်ကွက်က ပျူစောထီး ခေါင်းဆောင်ကိုတွေ့တာ၊ သူကလည်း စစ်ကောင်စီရဲ့အဓိကအရေးပါတဲ့သူမလို့ ကျနော်တို့ ဖမ်းဆီးခေါ်ဆောင်လာခဲ့တာပါ၊” လို့ MBT ခေါင်းဆောင် ဗိုလ်မိုက်ခဲက ပြောပါတယ်။

အရှည်ကြီးဟာ စစ်ကောင်စီတပ်တွေနဲ့ပေါင်းပြီး ငွေတောင်းတာ၊ ဒေသခံတွေကိုဖမ်းဆီးရိုက်နှက်တာတွေလုပ်တဲ့အပြင် သူကြောင့်လူသေဆုံးတဲ့ဖြစ်စဥ်တွေလည်းရှိတယ်လို့ ဆိုပါတယ်။

ပြီးခဲ့တဲ့ ၂၀၂၄၊ ဧပြီ ၁၀ ရက်က ပခုက္ကူမြို့၊ စက်မှုဇုန် ၆ လမ်းနဲ့ ၇ လမ်းကြားမှာနေထိုင်တဲ့ ပြည်သူ ၁ ဦးကို PDF တွေကိုထောက်ပံ့တယ်ဆိုပြီး ပျူစောထီးခေါင်းဆောင်အရှည်ကြီးက စစ်ကောင်စီကိုသတင်းပေးဖမ်းဆီးခိုင်းခဲ့သေးတယ်လို့ သိရကြောင်း ခေါင်းဆောင် ဗိုလ်မိုက်ခဲက ပြောပါတယ်။

လက်ရှိမှာစစ်ဆေးမေးမြန်းမှုတွေလုပ်နေပြီး သူ့ဆီကနေ လက်ပစ်ဗုံး ၁ လုံး၊ ဖုန်း ၂ လုံးနဲ့ ဆိုင်ကယ် ၁ စီး တို့ကို သိမ်းဆည်းရရှိထားတယ်လို့ ဗိုလ်မိုက်ခဲကပြောပါတယ်။

ပြီးခဲ့တဲ့ ဧပြီ ၃၀ ရက်ကလည်း မြင်းခြံခရိုင်၊ဆီမီးခုံမြို့အတွင်း ကင်းပတ်လှည့်လည်နေတဲ့ စစ်ကောင်စီတပ်ဖွဲ့ဝင်တွေကို MBT အဖွဲ့က ပစ်ခတ်တိုက်ခိုက်ခဲ့ရာ ဗိုလ်တဦးနဲ့ ပျူစောထီး ၂ ဦးသေဆုံးခဲ့ပါသေးတယ်။

စာတည်း – လင်း

ဒိန်းဂျား၊ ကျော်ကြီး

မြို့သစ်၊ မေ ၁၂၊ ၂၀၂၅။

မကွေးတိုင်း၊ မြို့သစ်မြို့နယ်၊ တလုပ်ပင်အုပ်စု၊ တလုပ်ပင်ကျေးရွာမှာ အမျိုးသား ၅ ဦးမိုးကြိုးထိမှန်ပြီး အဲ့ဒီထဲက ၂ ဦးသေဆုံးခဲ့တယ်လို့ ဒေသခံတွေနဲ့ ကူညီကယ်ဆယ်ရေး လုပ်ပေးခဲ့သူတွေဆီက သိရပါတယ်။

သေဆုံးသူတွေဟာ တလုပ်ကျေးရွာနေ အသက် ၃၀ နှစ်အရွယ်အမျိုးသားတွေဖြစ်ပြီး မေ ၁၁ ရက်ညနေ ၅ နာရီလောက်မှာ မိုးကြိုးထိမှန်သေဆုံးခဲ့ကြတာပါ။

“၂ ဦးသေသွားတယ်၊ အမျိုးသား ၂ ဦးပါ၊ သူတို့ကတောထဲမှာ ထင်းခုတ်တာ ၅ ဦးလို့သိရတယ်၊ ၃ ဦးတော့ လွှင့်စင်သွားတာ၊ မြို့သစ်ပြည်သူ့ဆေးရုံမှာတင်ထားရတယ်၊ သူတို့က တောင်သူတွေပဲ တောထဲမှာ ထင်းခုတ်တာ၊” လို့ မြို့သစ်မြို့ဒေသခံအမျိုးသမီးတဦးက ပြောပါတယ်။

အဆိုပါအမျိုးသားတွေဟာ တလုပ်ရွာနဲ့ အင်းရွာကြီး ရွာအကြားမှာလဲနေတဲ့သစ်ပင်ကို ခုတ်ဖြတ်နေသူတွေဖြစ်ပြီး မိုးရွာလာလို့ ခေတ္တနားနေချိန်မှာ မိုးကြိုးထိမှန်ခဲ့ကြတာလို့ ဆိုပါတယ်။

“သူတို့က ၂ ရွာကူးတဲ့လမ်းမှာ သစ်ပင်လဲနေလို့သွားပြီးတော့ ခုတ်တာ၊ သွားခုတ်တဲ့အချိန်မှာ မိုးတွေရွာနေလို့ဆိုပြီး ကင်းထဲထိုင်ပြီး တောထန်းရည်သောက်နေတာ၊ ၅ ဦးသောက်တဲ့အချိန်မှာ ဖြစ်ဖြစ်ချင်း ၃ ဦးကတော့ ဘေးကိုလွှင့်သွားတာ၊ ပစ်တဲ့ပုံစံမျိုးတော့မဟုတ်ဖူး စက်ကွင်းမလွတ်တာ၊ ၂ ဦးကတော့တန်းပြီး သေသွားတာ” လို့ ကူညီကယ်ဆယ်ရေးလုပ်ခဲ့တဲ့အမျိုးသားတဦးက ပြောပါတယ်။

မိုးကြိုထိမှန်လို့ သေဆုံးသူ ၂ ဦးရဲ့အလောင်းကိုတော့ မြို့သစ်မြို့နယ်ဆေးရုံကို ပို့ဆောင်ပေးခဲ့ရပြီး မိုးကြိုးစက်ကွင်းထိပြီး လွှင့်စင်သွားသူ ၃ ဦးက ထိခိုက်ဒဏ်ရာကြီးကြီးမားမားမရတာကြောင့် ဆေးရုံတက် ကုသရတာမျိုးမရှိဘူးလို့ သိရပါတယ်။

သေဆုံးသူတွေကိုရဲ့အလောင်းတွေကိုတော့ဆေးရုံကနေ မေ ၁၂ ရက်မှာ နေအိမ်ပြန်သယ်လာပြီး ညနေပိုင်းက ကျေးရွာသုသာန်မှာ သင်္ဂြိုဟ်ခဲ့ပြီးပြီလို့ ဆိုပါတယ်။

မြို့သစ်မြို့နယ်၊ တလုပ်ပင်ကျေးရွာဟာ အိမ်ခြေ ၁၀၀၊ လူဦးရေ ၃၀၀ ကျော်ရှိပြီး အများစုက တောင်ယာလုပ်ငန်းလုပ်ကိုင်ကြသူတွေဖြစ်တယ်လို့ သိရပါတယ်။

ပြီးခဲ့တဲ့ ၂၀၂၃ ဧပြီလ ၂၄ ရက်နေ့ကလည်း မကွေးမြို့နယ်၊ ဆူးကောက်စမ်းကျေးရွာမှာ လယ်လုပ်နေတဲ့ သားအဖ ၂ ဦး မိုးကြိုးပစ်ခံရပြီးသေဆုံးသွားသေတယ်လို့ သိရပါတယ်။

စာတည်း – လင်း