ဒိန်းဂျား

အရာတော်၊ မတ် ၅၊ ၂၀၂၅။

စစ်ကိုင်းတိုင်း၊ အရာတော်မြို့နယ်အခြေစိုက် မုံရွာခရိုင်တပ်ရင်း ၂၁ Ngwe Dwin Revolution Force ရဲ့တပ်ဖွဲ့ဝင် ၉ ဦးကို ကျည်ကာပြားနဲ့ ဦးထုပ်တွေ တပ်ဆင်ပေးနိုင်ခဲ့တယ်လို့ တပ်စုမှူး ဗိုလ်စိုးကြီး ဆီက သိရပါတယ်။

အောက်တိုဘာ ၁ ရက်ကနေ နိုဝင်ဘာ ၁၅ ရက်အထိ တပ်ရင်း ၂၁ က ပြုလုပ်ခဲ့တဲ့ “ အားအင်အပြည့်ဖြင့်ဆက်တိုက်မယ်” ကမ်ပိန်း(Campaign) ကနေ ကျပ်သိန်း ၁၅၀ ပြည့်မီရရှိခဲ့ပြီး အဆိုပါရရှိငွေတွေကနေ တပ်ဖွဲ့ဝင် ၉ ဦးအတွက် L4 ကျည်ကာနဲ့ L4 ဦးထုပ်တွေ တပ်ဆင်ပေးနိုင်ခဲ့တာလို့ ဆိုပါတယ်။

“ကျည်ကာကမ်ပိန်းလုပ်ရတဲ့ ရည်ရွယ်ချက်က ရှေ့တန်းမှာတိုက်ပွဲဝင်နေတဲ့ရဲဘော်တွေ တခါတလေဆိုရင်ဘေးလွယ်အိတ်တွေနဲ့ တိုက်တာရှိတယ်။ ကျည်ကာတွေမပါပဲတိုက်တာရှိတယ်၊ အထိအခိုက်အနည်းဆုံးဖြစ်အောင်လို့ တပ်ဆင်တာပါ။” လို့ တပ်စုမှူး ဗိုလ်စိုးကြီးက ပြောပါတယ်။

မုံရွာခရိုင် တပ်ရင်း ၂၁ မှာ တပ်ဖွဲ့ဝင် အင်အား ၁၀၀ ကျော်ရှိပြီး လက်ရှိပြုလုပ်ခဲ့တဲ့ကမ်းပိန်းဟာ တပ်ခွဲ ၂ အတွက် တပ်ခွဲ ၁ ခွဲစာ ပြုလုပ်ခဲ့တာဖြစ်ကာ အဲ့ဒီတပ်ခွဲမှာ တပ်ဖွဲ့ဝင် ၂၀ ဦးအတွက် ကျည်ကာနဲ့ ဦးထုပ်တွေတပ်ဆင်ပေးဖို့ ကျန်ရှိနေသေးတယ်လို့ သိရပါတယ်။

မြေလတ်အသံ၊ မတ် ၅၊ ၂၀၂၅။

မကွေးတိုင်း၊ ပခုက္ကူမြို့အခြေစိုက် တပ်မ ၁၀၁ က စစ်ကောင်စီတပ်သား ၂ ဦး မတ် ၄ ရက် မနက်ပိုင်းမှာ တပ်ထဲကထွက်ပြေးပြီး ဘက်ပြောင်းခိုလှုံလာတယ်လို့ Burma Revolution Rangers အဖွဲ့ဆီက သိရပါတယ်။

ဘက်ပြောင်းခိုလှုံလာသူတွေဟာ အသက် ၂၅ နှစ်အရွယ် တပ်သား ချစ်ဆန်းနိုင်နဲ့ ၂၇ နှစ်အရွယ် တပ်သား ချစ်ကိုတို့ဖြစ်ပြီး သူတို့ကိုဒေသခံကာကွယ်ရေးတပ်ဖွဲ့ဝင်တွေက သွားရောက်ခေါ်ဆောင်ခဲ့ရတာလို့ ဆိုပါတယ်။

“သူတို့ပြေးလာတာကတော့ မနက်အစောကြီး ၄ နာရီခွဲ၊ ၅ နာရီလောက်က။ ကျနော်တို့သွားခေါ်တဲ့အခါကျတော့ ၈ နာရီခွဲလောက်တော့ရှိပြီ။ လက်နက်ခဲယမ်းကတော့ ဘာမှမပါဘူး၊ သူတို့လည်း ကိုယ်လွတ်ရုန်းလာရတာ။” လို့ Burma Revolution Rangers တာဝန်ခံ ရဲဘော်ဒီမိုက ပြောပါတယ်။

တပ်သားချစ်နိုင်ဟာ မန္တလေးမှာဖမ်းဆီးခံခဲ့ရပြီး တပ်သားချစ်ကိုကတော့ မုံရွာမှာဖမ်းဆီးခံခဲ့ရတာလို့ ဆိုပါတယ်။

အဲ့ဒီနောက် ၂ ဦးစလုံးက ရပ်စောက် ဗထူးသင်တန်းကျောင်းမှာ ၂ လခွဲစစ်သင်တန်းတက်ခဲ့ရပြီး သင်တန်းဆင်းတဲ့အခါ မိတ္ထီလာတပ်ရင်းတခုကို ရောက်ရှိကာ အဲ့ဒီကနေတဆင့် အခုနှစ် မတ် ၂ ရက်မှာ တပ်မ ၁၀၁ ကို ရောက်ရှိလာတာလို့ ဆိုပါတယ်။

လက်ရှိမှာသူတို့ကို Burma Revolution Rangers ရဲ့မဟာမိတ်တပ်ဖွဲ့တဖွဲ့ဆီကို ပို့ဆောင်ထားပြီး နေထိုင်စားသောက်ရေးအတွက် စီစဥ်ပေးထားတယ်လို့ ပြောပါတယ်။

Burma Revolution Rangers အဖွဲ့ဟာ မကွေးတိုင်း၊ ပခုက္ကူမြို့မြို့နယ်အခြေစိုက် တပ်ဖွဲ့တခုဖြစ်ပြီး ဘက်ပြောင်းခိုလှုံတဲ့စစ်ကောင်စီတပ်ဖွဲ့ဝင် ၈ ဦးထိ ရှိပြီလို့ သိရပါတယ်။

စာတည်း – လင်း

ဆင်ဖြူကျွန်း၊ မတ် ၄၊ ၂၀၂၅။

မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့၊ အမှတ် ၁၊ သုံးပင်တောင်ရပ်ကွက်မှာ ဆင်ဖြူကျွန်းနယ် မြေရဲစခန်းမှူး ပစ်ခတ်ခံရပြီးသေဆုံးခဲ့တယ်လို့ ဆင်ဖြူကျွန်းမြို့ခံတွေဆီက သိရပါတယ်။

စခန်းမှူးသန်းလွင်ဟာ မတ် ၄ ရက်ဒီမနက် ၇ နာရီခွဲမှာ အမှတ် ၁၊ သုံးပင်တောင်ရပ်ကွက်ရှိ “ချမ်းမြေ့အောင်” လက်ဘက်ရည်ဆိုင်ကထွက်လာချိန်မှာ ပစ်ခတ်ခံရတာလို့ ဆိုပါတယ်။

“စခန်းမှူးသန်းလွင် ပစ်ခံလိုက်ရတာ၊ PDF အဖွဲ့က ၂ ဦး ဆိုင်ကယ်မရပ်ဘဲနဲ့ ပစ်သွားတာ၊ ပစ်တာက တော်လှန်ရေးရဲမေကပစ်တာ၊ သေမှာပါ၊ နားထင်တေ့ပစ်သွားတာ၊ ၁ ချက်ထဲပစ်သွားတာ၊ ပစ္စတိုနဲ့ပစ်သွားတာ၊ အသံကတော့ စီပေါင်းပေါက်တဲ့အသံလောက်ပဲ” လို့ မြို့ခံတဦးက ပြောပါတယ်။

ပစ်ခတ်ခံရပြီးနောက် စခန်းမှူးသန်းလွင်ကို စလင်းဆေးရုံကိုပို့ခဲ့ပြီး ဆေးရုံမှာသေဆုံးသွားပြီလို့ သိရကြောင်းသူကဆက်ပြောပါတယ်။

“စခန်းမှူး သေတယ်လို့ကြားတယ်၊ စလင်းဆေးရုံပို့တာ၊ ကားကလည်းတန်းပြန်လာတာ၊ အခုတော့ ချမ်းမြေ့အောင် လက်ဘက်ရည်ဆိုင်ပိုင်ရှင်တွေကိုတော့ ရဲစခန်းထဲခေါ်သွားပြီ၊ ၆ ဦးလောက်ပါ သွားတယ်” လို့ ဆင်ဖြူကျွန်းမြို့ခံတဦးက ထပ်ပြောပါတယ်။

လက်ရှိမှာ ဆင်ဖြူကျွန်းမြို့ပေါ်တဝိုက်နဲ့ ရေနားတန်းရွာ နတ်စင်ရွာတို့မှာ စစ်ကောင်စီတပ်ဖွဲ့ဝင်တွေက စစ်ဆေးမှုတွေလုပ်နေတယ်လို့ သိရပါတယ်။

ဒီပစ်ခတ်မှုကို ဘယ်သူတွေလုပ်ဆောင်ခဲ့တယ်ဆိုတာကိုတော့ မြေလတ်အသံက အတည်မပြုနိုင်သေးပါဘူး။

ပြီးခဲ့တဲ့ဖေဖော်ဝါရီ ၄ ရက်မနက် ၈ နာရီလောက်မှာလည်း စလင်းမြို့နယ်၊ တညောင်ရဲစခန်းက ဒုရဲအပ် လဲ့လဲ့စိုး (ခေါ်) ဝက်မ ဆိုသူပစ်ခတ်ခံရပြီး သေဆုံးခဲ့တဲ့ဖြစ်စဥ်ရှိခဲ့ပါသေးတယ်။

စာတည်း – လင်း

မင်းဘူး၊ မတ် ၃၊ ၂၀၂၅။

မကွေးတိုင်း၊ မင်ဘူးခရိုင်ထဲက တော်လှန်ရေးတပ်ဖွဲ့တွေစိုးမိုးနယ်မြေမှာ မင်းဘူးခရိုင် အမှတ် ၄ တပ်ရင်းရဲ့ အပတ်စဥ် ၆ အခြေခံစစ်ပညာသင်တန်းဆင်းပွဲကို မတ် ၂ ရက်မှာ ပြုလုပ်ခဲ့တယ်လို့ အဲ့ဒီတပ်ဖွဲ့ဆီကသိရပါတယ်။

ဇန်နဝါရီ ၂ ရက်မှ မတ် ၂ ရက်အထိ ၂ လကြာပြုလုပ်ခဲ့တဲ့ အဆိုပါအခြေခံစစ်ပညာသင်တန်းကို တပ်ဖွဲ့ဝင်သင်တန်းသား အမျိုးသား ၄၆ ဦးနဲ့ အမျိုးသမီး ၂ ဦး တက်ရောက်ခဲ့ကြပြီး ခရိုင်အဆင့်သင်တန်းဆင်းထားတဲ့ သင်တန်းနည်းပြဆရာတွေက မြေပြင်စစ်ပညာ၊ စစ်သည်တော်ကျင့်ဝတ်နဲ့ လိုက်နာရမဲ့စည်းမျဉ်းစည်းကမ်းတွေကို စာတွေ့၊လက်တွေ ပြန်လည်သင်ကြားပေးခဲ့တယ်လို့ ဆိုပါတယ်။

“ သင်တန်းတက်ရောက်လာသူတွေကတော့ စစ်အာဏာရှင်ကိုတော်လှန်ချင်လို့ PDF ထဲကို စိတ်ပါဝင်စားစွာဝင်ရောက်လာတဲ့သူတွေဖြစ်ပြီး မင်းဘူးခရိုင်ထဲက တက်ရောက်လာကြတာဖြစ်တယ်။” မင်းဘူးခရိုင်အမှတ် ၄ တပ်ရင်းတာဝန်ရှိသူတဦးက ပြောပါတယ်။

သင်တန်းဆင်းပွဲမှာ သင်တန်းကာလတလျှောက် စစ်စည်းကမ်းလိုက်နာနိုင်မှု၊ လက်နက်ငယ်ပစ်ခတ်စဉ်နဲ့ ကတုတ်ကျင်းတူးဖော်မှုတွေမှာ ထူးချွန်ဆုရရှိသူသင်တန်းသားတွေကို ဆုချီးမြှင့်ခဲ့တယ်လို့ သိရပါတယ်။

အခြေခံစစ်ပညာ အပတ်စဉ် ၆ သင်တန်းဆင်းပြီးသူတွေကို PDF တပ်ဖွဲ့ဝင်သစ်အဖြစ် အမှတ် ၄ တပ်ရင်းရဲ့သက်ဆိုင်ရာတပ်ရင်းတွေကို ပို့ဆောင်သွားမှာဖြစ်ပြီး အဆိုပါသင်တန်းသားတွေအနက် ဆေးဘက်ဆိုင်ရာသင်တန်း၊ ရုံးလုပ်ငန်းနဲ့ကွန်ပျူတာသင်တန်း၊ ဒရုန်းသင်တန်း၊ မိုင်းနဲ့ဆက်စပ်သင်တန်းတွေကို ဆက်လက်တက်ရောက်နိုင်မယ့်သူတွေကို ဆက်လက်ရွေးတက်ရောက်နိုင်ဖို့ ဆောင်ရွက်ပေးသွားမယ်လို့ အထက်ပါတာဝန်ရှိသူက ဆိုပါတယ်။

စာတည်း – ဟိန်းစံ

ပခုက္ကူ၊ မတ် ၃၊ ၂၀၂၅။

မကွေးတိုင်း၊ ပခုက္ကူမြို့နယ်၊ မြောက်လုကန်ကျေးရွာစစ်ကောင်စီစခန်းက တပ်ဖွဲ့ဝင် ၁ ဦး လက်နက်၊ ခဲယမ်းတွေနဲ့အတူ တော်လှန်ရေးတပ်ဖွဲ့တွေဘက်ကို ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

ဘက်ပြောင်းခိုလှုံလာသူမှာ ခြေမြန်တပ်မဌာနချုပ် ၁၀၁ က အသက် ၂၆ နှစ်အရွယ် တပ်သား မျိုးမင်းအောင် ဖြစ်ပြီး မတ် ၁ ရက်မှာ ၎င်းအထိုင်စခန်းကနေ တော်လှန်ရေးပူးပေါင်းတပ်ဖွဲ့တွေဆီ ထွက်ပြေးခိုလှုံလာတာလို့ ဆိုပါတယ်။

“ ကျနော်တို့က တခြားတပ်နဲ့ဆက်သွယ်ပြီးတော့ သူ့ကိုခေါ်ထုတ်ရတာ။ သူတို့အထိုင်ချထားတဲ့ အနီးနားအထိ သွားပြီး ခေါ်ထုတ်ခဲ့ရတာ။” လို့ မြိုင်မြို့နယ်ပကဖတာဝန်ရှိသူတဦးက ပြောပါတယ်။

၎င်းဟာ စစ်ကောင်စီတပ်ရဲ့ပေါ်တာဆွဲဖမ်းဆီးမှုမခံရမီက စစ်ကိုင်းမြို့တွင်းပြေးဆွဲတဲ့ ခရီးသည်တင်လိုင်းကားမောင်းနှင်သူဖြစ်ပြီး ၂၀၂၄ ဒီဇင်ဘာ ၁၂ ရက်က လိုင်းကားမောင်းနှင်နေစဉ် စစ်ကိုင်းတံတားပေါ်မှာ စစ်ကောင်စီတပ်မ ၃၃ ရဲ့ ပေါ်တာဆွဲဖမ်းခံခဲ့ရပြီး ရှမ်းပြည်နယ်(တောင်ပိုင်း)၊ ဟိုပုံးမြို့ရှိ တကန သင်တန်းကျောင်းကို ပို့ဆောင်ခံခဲ့ရသူဖြစ်ပါတယ်။

စစ်သင်တန်း ၂ လခွဲကြာတက်ရောက်ပြီးနောက် ပခုက္ကူအခြေစိုက် တပ်မ ၁၀၁ ဌာနချုပ်ကတဆင့် မြောက်လုကန်ရွာစစ်ကောင်စီစခန်းကို ပို့ဆောင်ခံခဲ့ရကာ အဆိုပါစခန်းကိုရောက်ပြီး ၄ ရက်အကြာမှာ လက်နက်နဲ့အတူထွက်ပြေးလာနိုင်ခဲ့တာလို့ ဆိုပါတယ်။

ဘက်ပြောင်းခိုလှုံလာတဲ့ တပ်သား မျိုးမင်းအောင်ဟာ MA 1 သေနတ် ၁ လက်၊ MA ကျည် ၆၀ တောင့်၊ ကျည်ဘောက် ၃ ခု ကို ယူဆောင်လာနိုင်လို့ ၎င်းကို ဒေသတော်လှန်ရေးတပ်ဖွဲ့ဝင်တွေဘက်က ငွေကျပ် သိန်း ၃၀ ချီးမြှင့်ခဲ့တယ်လို့ သိရပါတယ်။

စာတည်း – ဟိန်းစံ