ဒိန်းဂျား

မြေလတ်အသံ၊ ဖေဖော်ဝါရီ ၁၃၊ ၂၀၂၅။

ဖေဖော်ဝါရီ ၁၃ ရက် ဒီကနေ့မှာကျရောက်တဲ့ ဗိုလ်ချုပ်အောင်ဆန်းရဲ့ ၁၁၀ နှစ်ပြည့်မွေးနေ့အမှတ်တရ အဖြစ် မကွေးတိုင်း၊ မြိုင်မြို့နယ်ထဲမှာပြုလုပ်ခဲ့တယ်လို့ Pakokku – Special Task Force သတင်းနဲ့ ပြန်ကြားရေးတာဝန်ခံ ရဲဘော်မှိုင်းက ပြောပါတယ်။

မြိုင်မြို့နယ်ရှိ အမျိုးသားညီညွတ်ရေးအစိုးရ – NUG လက်အောက်ခံကျောင်းက ကျောင်းသား၊ ကျောင်းသူတွေကို ဒီမနက် ၁၀ နာရီခွဲကနေ ၁၁ နာရီခွဲအထိ ပဲပြုတ်၊ နံပြားနဲ့ နွားနို့ ကျွေးခဲ့တာလို့ ဆိုပါတယ်။

ကျောင်းသား၊ ကျောင်းသူ ၁၇၀ ဦးကိုကျွေးမွေးခဲ့တာဖြစ်ပြီး စုစုပေါင်းနံပြား ၃၅၀ ချပ်နဲ့ နွားနို့ ၃၅၀ ခွက် ကုန်ခဲ့တယ်လို့ သိရပါတယ်။

မကွေး၊ ဖေဖော်ဝါရီ ၁၃၊ ၂၀၂၅။

မကွေးတိုင်း၊ ရေစကြိုမြို့နယ်၊ သာဂေါင်ရွာကို စစ်ကောင်စီကဗုံးကြဲတိုက်ခိုက်ခဲ့တာကြောင့် ဒေသခံပြည်သူ ၁ ဦးထိခိုက်ဒဏ်ရာရပြီး နေအိမ် ၂ လုံးလည်းပျက်စီးခဲ့တယ်လို့ ဒေသခံတဦးကပြောပါတယ်။

သာဂေါင်ရွာကို တံတားဦးလေတပ်ကနေ ဂျက်ဖိုက်တာနဲ့ ဖေဖော်ဝါရီ ၁၃ ရက်ဒီမနက် ၂ နာရီ ၅ မိနစ်မှာ ၁ ကြိမ်၊ ၂ နာရီ ၁၀ မိနစ်မှာ ၁ ကြိမ်၊ စုစုပေါင်း ၂ ကြိမ်ဗုံးကြဲချခံရတာလို့ ဆိုပါတယ်။

“ဝဲပြီးတော့ ၂ ကြိမ်ကြဲသွားတာ။ ၁ ကြိမ်ကြဲလိုက် ၁ ကြိမ်ပျံဝဲလိုက်၊ မြို့ပေါ်ရပ်ကွက်တွေကော ဝဲပြီးတော့ ဗုံးကြဲသွားတာ။ လူနေအိမ် ၂ လုံးပျက်စီးတယ်၊ ပြည်သူ ၁ ဦး ထိခိုက်ဒဏ်ရာရတယ်။ ဒဏ်ရာရတဲ့သူကတော့ နည်းနည်းတော့စိုးရိမ်ရတယ်။” လို့ ဒေသခံတဦးက ပြောပါတယ်။

လက်ရှိမှာဒဏ်ရာရသူဟာ အသက် ၄၀ အရွယ်အမျိုးသားဖြစ်ပြီး သူရဲ့အိမ်မှာအိပ်နေချိန် ဗုံးစထိမှန်ခဲ့တာလို့ ဆိုပါတယ်။

“ဒဏ်ရာရတဲ့သူကိုတော့ ကျေးလက်ကျန်းမာရေးဆေးခန်းမှာ သူတို့နည်းနဲ့သူတို့ ကုနေရတယ်။ ရေစကြိုမြို့ပေါ်ကုဖို့ဟာကလည်း မဖြစ်ဘူး။ စစ်တပ်က ကုခွင့်လည်းမပေးဘူး။”လို့ ရေစကြိုမြို့ ဒေသခံတဦးက ပြောပါတယ်။

သာဂေါင်ရွာမှာ အိမ်ခြေ ၆၀၀၊ လူဦးရေ ၂,၅၀၀ လောက်ရှိပြီး ပြီးခဲ့တဲ့ ၂၀၂၄ ဒီဇင်ဘာလကလည်း ၁ ကြိမ်ဗုံးကြဲတိုက်ခိုက်ခံရတာကြောင့် ၁၅ နှစ်အရွယ်အမျိုးသား ၁ ဦး သေဆုံးခဲ့တယ်လို့ သိရပါတယ်။

စာတည်း – လင်း

မကွေး၊ ဖေဖော်ဝါရီ ၁၂၊ ၂၀၂၅။

မကွေးတိုင်းအတွင်းတနေရာမှာ ရန်ကုန်၊ မကွေးနဲ့ ဧရာဝတီတိုင်းတို့ကနေရောက်လာတဲ့ လူငယ် ၁၈ ဦးကို အခြေခံစစ်ပညာအပြင် ကိုယ်ခံသိုင်းပညာ သင်တန်းပေးနေတယ်လို့ မင်းဘူးခရိုင် အမှတ် ၂ တပ်ရင်း ထံက သိရပါတယ်။

ပြီးခဲ့တဲ့ ဇန်နဝါရီ ၁၆ ရက်ကစပြီး သင်တန်းသားအသစ်တွေကို အခြေခံစစ်ပညာ၊ တပ်စိတ်မှူးတွေရဲ့သဘောသဘာဝတွေနဲ့ ကိုယ်ခံသိုင်းပညာတွေ သင်ကြားပေး‌နေကာ သင်တန်းကာလ ၄၅ ရက်ကြာမှာဖြစ်ပြီး မင်းဘူးခရိုင် တပ်ရင်း ၂ က သင်တန်းဆရာတွေ ပြန်လည်သင်ကြားပေးနေတာလို့ သိရပါတယ်။

သင်တန်းမှာ ရန်ကုန်၊ မကွေး၊ ဧရာဝတီတိုင်းတို့က စစ်ကောင်စီဘက်ကိုမပူးပေါင်းချင်တဲ့ အမှန်တရားကိုမြတ်နိုးသူ လူငယ်တွေပါဝင်တယ်လို့ ဆိုပါတယ်။

“သူတို့ကတော့ သူတို့ရဲ့စိတ်ဆန္ဒနဲ့ ဝင်ရောက်လာတာပါ။ ကျနော်တို့ ၄၅ ရက်ကြာ ပို့ချမှာပါ။ ကျနော်တို့ တပ်ရင်းထဲက သင်တန်းဆရာတွေက သင်တန်းပေးတာပါ။ သင်တန်းသားတွေကတော့ ရန်ကုန်၊ မကွေးတိုင်းနဲ့ ဧရာဝတီတိုင်းက ဝင်လာတဲ့သူတွေ ဖြစ်တယ်။” လို့ တပ်ရင်းမှူးဗိုလ်ဇာမဏီက ဆက်ပြောပါတယ်။

မင်းဘူးခရိုင် အမှတ် ၂ တပ်ရင်းဆီလာရောက်ပြီး သင်တန်းတက်ရောက်သူတွေထဲမှာ စစ်ကောင်စီတပ်ဖွဲ့ရဲ့ စစ်မှုထမ်းဖို့ ဖမ်းဆီးခြင်းကိုခံရပြီး ပြန်လည်လွတ်မြောက်လာသူတွေပါဝင်သလို တောရောမြို့ပါမကျန် လူတန်းစားအားလုံး ဒုက္ခရောက်နေကြပြီး ပေါ်တာဆွဲခံရတာတွေကြောင့် စစ်ကောင်စီကိုတော်လှန်မှဖြစ်မယ်ဆိုတဲ့စိတ်နဲ့ ပူးပေါင်းပါဝင်လာသူတွေလည်း ရှိတယ်လို့ သိရပါတယ်။

“ကျနော် ဒီသင်တန်းမတက်ခင်တုန်းကတော့ ၂၀၂၅ ခုနှစ်မရောက်ခင် ၁၂ လပိုင်းလောက်မှာ စစ်**တွေ ပေါ်တာဆွဲတာခံခဲ့ရဖူးတယ်။ သိန်း ၈၀ ကျော်လောက် ကုန်သွားတယ်။ အဲ့ဒီကနေ စစ်အာဏာရှင်မကြိုက်လို့ ဝင်ဖြစ်တာ။ စစ်အာဏာရှင်ကိုမကြိုက်တဲ့အပြင် လွတ်လပ်မှုကိုလိုချင်လို့ပါ။” လို့ မကွေးတိုင်း၊ သရက်ခရိုင်ကနေ သင်တန်းတက်လာသူတဦးက ပြောပါတယ်။

သင်တန်းနဲ့တိုက်ပွဲတွေမှာ လူငယ်တွေကတက်ကြွစွာပါဝင်နေကြပြီး တော်လှန်ရေးအတွက် မနားမနေလုပ်ဆောင်နေကြကာ ပြည်သူတရပ်လုံးလည်း ပါဝင်နေတာကြောင့် ဒီတော်လှန်ရေးဟာ အမြန်ဆုံးပြီးမြောက်အောင်မြင်မယ်လို့ ရန်ကုန်တိုင်းကနေ လာရောက်ခဲ့တဲ့ သင်တန်းသား အားကွေ့က ပြောပါတယ်။

မင်းဘူးခရိုင် အမှတ် ၂ တပ်ရင်းဟာ ငဖဲမြို့နယ်အတွင်းမှာအခြေစိုက်ကာ စစ်ကောင်စီကို တော်လှန်နေတဲ့အဖွဲ့အစည်းဖြစ်ပါတယ်။

စာတည်း – ကိုချမ်း

မကွေး၊ ဖေဖော်ဝါရီ ၉၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့၊ မြို့မအနောက်စျေး နရပတ္တိစည်သူလမ်းမှာ စစ်ကောင်စီတပ်ဖွဲ့ဝင်တွေနဲ့ပတ်သက်ဆက်နွယ်တဲ့အမျိုးသမီး ၁ ဦးပစ်ခတ်ခံရပြီး သေဆုံးခဲ့တယ်လို့ ဒေါင်းညီနောင် မြို့ပြပြောက်ကျားဆီက သိရပါတယ်။

သေဆုံးသူဟာ အသက် ၄၀ အရွယ်ဒေါ်ဟန်ဆုယဥ်ဆိုသူဖြစ်ပြီး ဖေဖော်ဝါရီ ၉ ရက်မနက် ၉ နာရီလောက်မှာ စလင်းမြို့မအနောက်စျေးမှာ ဆန်ရောင်းနေချိန် ဒေသခံကာကွယ်ရေးတပ်ဖွဲ့ဝင်တွေက ပစ်ခတ်ခဲ့တာလို့ ဆိုပါတယ်။

“ကျနော်တို့ သေနတ်အတိုနဲ့ ဝင်ပစ်ပြီးရှင်းလင်းခဲ့တာ။ သူ့ကို ၁ ချက်ပစ်ခတ်ခဲ့တယ်။ ခေါင်းမှန်တာ၊ သူ့ကိုရှင်းလင်းပြီးနောက်မှာ စစ်ကောင်စီကားရောက်လာပြီး ရုပ်အလောင်းကို သယ်သွားတယ်” လို့ ဒေါင်းညီနောင်မြို့ပြပြောက်ကျား ခေါင်းဆောင် ဗိုလ်သတ္တိက ပြောပါတယ်။

ဒေါ်ဟန်ဆုယဥ်ဟာ ၂၀၂၀ ရွေး‌ကောက်ပွဲမှာ စလင်းမြို့နယ် ကြံ့ခိုင်ရေးပါတီကိုယ်စားပြုပြီး မ‌ကွေးတိုင်းဒေသကြီးအမျိုးသားလွှတ်တော်ကိုယ်စားလှယ်အဖြစ်၀င်ရောက်ယှဉ်ပြိုင်ခဲ့သူ ဦးဝင်းမြိုင်ရဲ့ဇနီးဖြစ်ပြီး စစ်ကောင်စီတပ်ဖွဲ့ဝင်တွေနဲ့ပူးပေါင်းကာ ပေါ်တာဆွဲဖမ်းမှုတွေမှာလည်းပါဝင်တာရှိတယ်လို့ သူကဆက်ပြောပါတယ်။

“သူ့ရဲ့ ဆန်ဆိုင်အနီးမှာ လက်နက်ကိုင် စစ်ကောင်စီတပ်ဖွဲ့ဝင်တွေအစောင့်အကြပ်ရှိတယ်၊ သူ့မိသားစုကို တမြို့နယ်လုံးက ရှင်းစေချင်တာ၊ ပြည်သူနစ်နာအောင်လုပ်ထားတဲ့ အတိုင်းအတာတွေရှိတယ်၊‌” လို့ ဒေါင်းညီနောင် မြို့ပြပြောက်ကျားခေါင်းဆောင် ဗိုလ်သတ္တိက ပြောပါတယ်။

ဒေါ်ဟန်ဆုယဥ်ပစ်ခတ်ခံရပြီးနောက် စလင်းမြို့ပေါ်မှာ စစ်ကောင်စီတပ်သားတွေ စစ်ဆေးမှုတွေ လုပ်ခဲ့တယ်လို့ သိရပါတယ်။

ပြီးခဲ့တဲ့ ဖေဖော်ဝါရီ ၃ ရက်ကလည်း မကွေးတိုင်း၊ စလင်းမြို့နယ်၊ လင်းဇင်းတိုက်နယ် ရဲစခန်းက စစ်ကောင်စီတပ်ဖွဲ့ဝင်တွေကို ဒေါင်းညီနောင် မြို့ပြပြောက်ကျားအဖွဲ့က တိုက်ခိုက်ခဲ့ပါသေးတယ်။

စာတည်း – လင်း

မကွေး၊ ဖေဖော်ဝါရီ ၈၊ ၂၀၂၅။

မကွေးတိုင်း၊ ပခုက္ကူခရိုင်၊ ဆိပ်ဖြူအခြေစိုက် ကပစ ၂၁ ကထွက်လာတဲ့စစ်ကောင်စီယာဥ်တန်းကို ဒေသခံကာကွယ်ရေးတပ်ဖွဲ့ဝင်တွေက ဖေဖော်ဝါရီ ၇ ရက်မှာ ကြားဖြတ်တိုက်ခိုက်ရာစစ်ကောင်စီဘက်က ထိခိုက်သေဆုံးမှုတွေရှိခဲ့တယ်လို့ Yenather Column ဆီက သိရပါတယ်။

စစ်ကား ၃ စီး၊ ဖောကား ၁ စီး၊ အိမ်စီးကား ၁ စီးနဲ့ အင်အား ၅၀ လောက်ပါတဲ့ စစ်ကောင်စီ တပ်ဖွဲ့ဝင်တွေကို မနက် ၁၀ နာရီလောက်က ဆိပ်ဖြူမြို့နဲ့ ကန်ဇွန်းမလမ်းပိုင်းမှာ ၄၅ မိနစ်ကြာ တိုက်ခိုက်ခဲ့ကြတာလို့ ဆိုပါတယ်။

“ဆိပ်ဖြူမြို့နယ် ကပစ ၂၁ ကနေ ပြင်ဦးလွင်ကိုပစ္စည်းသွားပို့မယ့်ကားတန်းလို့တော့သိရတယ်။ ပစ်ခတ်မှုဖြစ်တဲ့အကွာအဝေးကတော့ မီတာ ၅၀ အကွာအဝေးပါပဲ။ ကားတွေကတော့ ဘာတွေသယ်လာလဲမသိရဘူး။ ယာဥ်တန်းက ကား ၂ စီးပျက်စီးပြီး ဆိပ်ဖြူဘက်ကိုပဲ ပြန်ထွက်သွားတယ်၊” လို့ Yenather Column တာဝန်ရှိသူတဦးက ပြောပါတယ်။

ဒီတိုက်ခိုက်မှုအတွင်း စစ်ကောင်စီဘက်က ၁၀ ဦးဝန်းကျင်သေဆုံးပြီး အလောင်းတွေနဲ့ ဒဏ်ရာရသူတွေကိုတော့ ဆိပ်ဖြူဆေးရုံကိုသယ်သွားတယ်လို့ သူက ဆက်ပြောပါတယ်။

ထိခိုက်သေဆုံးမှုအခြေအနေတွေကိုတော့မြေလတ်အသံက သီးခြားအတည်မပြုနိုင်သေးပါဘူး။

ဒီတိုက်ခိုက်မှုကို Yenather Column၊ မင်းဘူးခရိုင် အမှတ် ၁ တပ်ရင်း၊ ပခုက္ကူခရိုင် တပ်ရင်း ၁၉ ၊ ဆိပ်ဖြူမြို့နယ် အနောက်ပိုင်းဇုန် ၁ ပကဖ အဖွဲ့တို့ ပူးပေါင်းလုပ်ဆောင်ခဲ့တာလို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁ ရက်ကလည်း ပွင့်ဖြူမြို့နယ် ပုသိမ်-မုံရွာကားလမ်းပိုင်းရှိ မဲဇလီ-ဆည်‌တော် စစ်ဆေးရေးဂိတ်ကို Yenather Column အဖွဲ့က တိုက်ခိုက်ခဲ့ရာ စစ်ကောင်စီဘက်က ၁၃ ဦး သေဆုံးခဲ့တယ်လို့ သိရပါတယ်။

စာတည်း – လင်း