ဒိန်းဂျား

ပေါက်၊ နိုဝင်ဘာ ၂၁၊ ၂၀၂၅။

မကွေးတိုင်း၊ ပေါက်မြို့နယ်ရှိ စစ်ကော်မရှင်တပ်နဲ့ ပျူစောထီးတွေအထိုင်ချတပ်စွဲထားတဲ့ကျေးရွာတွေထဲအထိ ဒေသခံတော်လှန်ရေးတပ်တွေက စီးနင်းတိုက်ခိုက်ခဲ့ပြီး စစ်ကော်မရှင်တပ်သား ၃ ဦးနဲ့ လက်နက်ခဲယမ်းတွေကိုသိမ်းဆည်းရရှိခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

နိုဝင်ဘာ ၁၈ ရက်ကနေ ၂၀ ရက်အတွင်း ပေါက်မြို့နယ်တောင်ပိုင်းရှိ ဝန်ကျုံး၊ သစ်ချိုကုန်း၊ ထန်းပေါက်ကုန်း၊ ချိုင်စောက်၊ ဖလံရွာကိုင်း၊ ကျောက်တိုင်ခင်ရွာနဲ့ ညောင်စင်တောတိုက်တို့မှ စစ်ကော်မရှင်နဲ့ ပျူစောထီးတွေကိုတိုက်ခိုက်ခဲ့ရာ ထန်းပေါက်ကုန်းရွာအနီးမှာ စစ်ကော်မရှင်တပ်သား ၃ ဦးကို လက်နက်ခဲယမ်းတွေနဲ့ ဖမ်းမိခဲ့တယ်လို့ ဆိုပါတယ်။

“မနေ့က အရှင်ဖမ်းမိတာ၊ သူတို့ကို ဖမ်းမိတာက ဒီကောင်တွေက အစာအာဟာရပြတ်နေပြီ၊ ဒီကောင်တွေစစ်ကြောင်းကို လိုက်ရှင်းရင်းနဲ့မိတာ၊ ထန်းပေါက်ကုန်းရွာ အရှေ့တောင်ဘက်မှာ ဖမ်းမိတာ”လို့ မြိုင်မြို့နယ် ပြည်သူ့ကာကွယ်ရေးတပ်ဖွဲ့တာဝန်ခံ ဗိုလ်လက်ယာက မြေလတ်အသံကို ပြောပါတယ်။

နိုဝင်ဘာ ၁၈ ရက်မှာ ဝန်ကျုံးရွာနဲ့ သစ်ချိုကုန်းရွာတို့ကို တိုက်ခိုက်သိမ်းပိုက်ခဲ့တာဖြစ်ပြီး နိုဝင်ဘာ ၁၉ ရက်မှာ ချိုင်စောက်ရွာ၊ ဖလံရွာကိုင်းရွာ၊ ညောင်စင်တောတိုက်ရှိ စစ်ကော်မရှင်တပ်တွေကို တိုက်ခိုက်ကာ နိုဝင်ဘာ ၂၀ ရက်မှာ ထန်းပေါက်ကုန်းရွာနဲ့ ကျောက်တိုင်ခင်ရွာကို တိုက်ခိုက်ချိန် စစ်ကော်မရှင်တပ်ဖွဲ့ ၃ ဦးကိုဖမ်းမိခဲ့တာလည်း ဖြစ်ပါတယ်။

ဖမ်းဆီးခံရသူတွေဟာ တပ်မ ၄၁၈ မှ အသက် ၂၆ နှစ်အရွယ်တပ်သားအောင်ပိုင်ဦး၊ ၁၉ နှစ်အရွယ် ညီညီနိုင်နဲ့ တပ်မ ၄၁၉ မှ ၃၂ နှစ်အရွယ် တပ်သားထွန်းမင်းဇော်ကတော့ဖြစ်တယ်လို့ ဆိုပါတယ်။

တပ်သားအောင်ပိုင်ဦးနဲ့ ညီညီနိုင်တို့ဟာ စစ်မှုထမ်းအပတ်စဥ် ၁၅ ဆင်းထားသူတွေဖြစ်ပြီး တပ်သား ထွန်းမင်းဇော်က စစ်မှုထမ်းအပတ်စဥ် ၁၀ ဆင်းထားသူဖြစ်ကာ ပေါက်မြို့နယ်အတွင်းရှိ ရေနံမှော်တွေနဲ့ ဒေသခံတော်လှန်ရေးတပ်တွေစိုးမိုးထားတဲ့နယ်မြေတွေကို စစ်ကြောင်းထိုးဖို့ ပခုက္ကူအခြေစိုက် တပ်မ ၁၀၁ ကိုရောက်ရှိပြီးနောက် စစ်ကြောင်းထိုးလာသူတွေဖြစ်တယ်လို့ ဆိုပါတယ်။

ဒါ့အပြင် အဲ့ဒီတပ်သားတွေဆီက RPG၊ ခြောက်လုံးပြူးသေနတ်နဲ့ ခဲယမ်းတွေကိုလည်းသိမ်းဆည်းရမိခဲ့တယ်လို့ သိရပါတယ်။

တော်လှန်ရေးတပ်တွေဘက်က ဝန်ကျုံးရွာနဲ့ သစ်ချိုကုန်းရွာတွေကိုပူးပေါင်းသိမ်းပိုက်ခဲ့ပြီး ပင်တောင်ရွာကိုတိုက်ခိုက်ချိန်မှာ စစ်ကော်မရှင်ဘက်ကအင်အားအများအပြားနဲ့ စစ်ကူလာတဲ့အတွက် ပြန်လည်ဆုတ်ခွာလာခဲ့ရတယ်လို့ မြိုင်ပကဖက ထုတ်ပြန်ထားပါတယ်။

တော်လှန်ရေးတပ်တွေသိမ်းပိုက်တိုက်ခိုက်ခဲ့တဲ့ ဝန်ကျုံးရွာနဲ့ သစ်ချိုကုန်းရွာမှာ စစ်ကော်မရှင်တပ်နဲ့ ပျူစောထီးအင်အား ၈၀ ဝန်းကျင်လောက်တပ်စွဲနေကြတာဖြစ်ပြီး တိုက်ခိုက်ခံရတာကြောင့် ပင်ထောင်ရွာဆီကို ထွက်ပြေးသွားကြတယ်လို့ ဗိုလ်လက်ယာ ကပြောပါတယ်။

လက်ရှိ ပင်ထောင်ရွာမှာ စစ်ကော်မရှင်အင်အား ၁၈၀ နီးပါးရှိနေပြီး တော်လှန်ရေးတပ်တွေ သိမ်းပိုက်ထားတဲ့ ရွာ ၂ ရွာမှာတော့ စစ်ကော်မရှင်တပ်တွေပြန်လည်နေထိုင်နေတာမရှိဘူးလို့ ဆိုပါတယ်။

ဒါ့အပြင် တိုက်ပွဲဖြစ်ပြီးနောက် ပေါက်မြို့နယ်အတွင်း စစ်ကော်မရှင်တပ်က လေကြောင်း တိုက်ခိုက်မှုတွေ ဆက်တိုက်လုပ်နေတယ်လို့ ဒေသခံတွေဆီက သိရပါတယ်။

စက်တင်ဘာ ၂၈ ရက်ကလည်း မြိုင်မြို့နယ်၊ တွင်းမရွာမှာ ပြည်သူပိုင်ပစ္စည်းတွေကို ဝင်ယူတဲ့ စစ်ကော်မရှင်တပ်ဖွဲ့ဝင်တွေကို မြိုင်မြို့နယ်ပကဖတပ်ဖွဲ့က တိုက်ခိုက်ခဲ့သေးတယ်လို့ သိရပါတယ်။

စာတည်း – လင်း

မြိုင်၊ နိုဝင်ဘာ ၁၉၊ ၂၀၂၅။

မကွေးတိုင်း၊ မြိုင်မြို့နယ်အခြေစိုက် အမှတ် ၃ တပ်မတော်အကြီးစားစက်ရုံ တကစ ၃ (ယခင် မြိုင်စက်မှု ၂)ကနေ ရိက္ခာရှာဖို့ထွက်လာတဲ့ စစ်ကော်မရှင်တပ်ဖွဲ့ဝင် ၂ ဦးကို ဒေသကာကွယ်ရေးတပ်ဖွဲ့တွေက ပစ်ခတ်တိုက်ခိုက်ခဲ့ရာမှာ ၁ ဦး သေဆုံးခဲ့တယ်လို့ မြိုင်ပကဖထံက သိရပါတယ်။

နိုဝင်ဘာ ၁၉ ရက် ဒီကနေ့မနက် ၈ နာရီခွဲမှာ မြိုင် တကစ ၃ နဲ့ ၂ မိုင်ခန့်ဝေးအကွာ တောတိုက်အတွင်းမှာ ရိက္ခာရှာနေတဲ့ စစ်ကော်မရှင်တပ်ဖွဲ့ဝင် ၂ ဦးကို မီတာ ၈၀ အကွာကနေ ပစ်ခတ်တိုက်ခိုက်ခဲ့တာလို့ ဆိုပါတယ်။

” စက်မှု ၂ ထဲကနေ အဲ့ဒီနားက ပတ်ဝန်းကျင်တောတိုက်တွေထဲက ဒန်အိုး‌တွေ၊ ဆန်တွေ၊ ရိက္ခာတွေ အကုန်လုံးယူကြတာ၊ ကျနော်တို့ကလည်း သူတို့ထွက်တဲ့နေရာတွေကို ပိတ်စောင့်နေကြတာ” လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်တာဝန်ခံ ဗိုလ်လက်ယာက မြေလတ်အသံကို ပြောပါတယ်။

ပစ်ခတ်တိုက်ခိုက်ခံရတာကြောင့် စစ်ကော်မရှင်တပ်ဖွဲ့ဝင် ၁ ဦးနေရာမှာသေဆုံးခဲ့ပြီး ၁ ဦးမှာ ပေါင်ကျည်ထိမှန် ဒဏ်ရာနဲ့ အရှင်ဖမ်းမိခဲ့ပြီး သူ့ကို ကာကွယ်ရေးတပ်ဖွဲ့တွေက ဆေးကုသပေးထားကာ စစ်ကော်မရှင်တပ်သားတွေထံက MA1 မောင်းပြန်သေနတ် ၁ လက်၊ ၅.၅၆ မမ ကျည် ၄၇၃ တောင့်၊ ကျည်ဘောက် ၆ ခု၊ ဖုန်းနဲ့အားသွင်းကြိုးတွေ သိမ်းဆည်းရမိခဲ့တယ်လို့ သိရပါတယ်။

သေဆုံးနဲ့ဖမ်းဆီးရမိသူတွေဟာ မြိုင်ဒေသကို တိုက်ခိုက်ရေးရောက်ရှိနေတဲ့ စလင်းအခြေစိုက် ခလရ ၂၅၃ တပ်ရင်းက စစ်ကော်မရှင်တပ်သားတွေဖြစ်တယ်လို့ သိရပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့-မြိုင်မြို့နယ်၊ Good Brothersတပ်ဖွဲ့ နဲ့ အညာမြေတပ်ပေါင်းစုတို့က လုပ်ဆောင်ခဲ့တယ်လို့ ဆိုပါတယ်။

စက်တင်ဘာ ၂၈ ရက်ကလည်း မြိုင်မြို့နယ်တွင်းမရွာမှာ ပြည်သူပိုင်ပစ္စည်းတွေကို ဝင်ယူတဲ့ စစ်ကော်မရှင်တပ်ဖွဲ့ဝင်တွေကို မြိုင်မြို့နယ်ပကဖတပ်ဖွဲ့က တိုက်ခိုက်ခဲ့သေးတယ်လို့ သိရပါတယ်။

ချောက်၊ နိုဝင်ဘာ ၁၈၊ ၂၀၂၅။

မကွေးတိုင်း၊ ချောက်မြို့ကထွက်လာတဲ့ စစ်ကော်မရှင်ကားတွေကိုတိုက်ခိုက်ရင်း အာဠာဝက မြို့ပြပြောက်ကျားတပ်ဖွဲ့မှ စခန်းမှူးကျဆုံးခဲ့တယ်လို့ အဲ့ဒီတပ်ဖွဲ့ဆီက သိရပါတယ်။

နိုဝင်ဘာ ၁၇ ရက် နေ့လယ် ၁၁ နာရီခွဲလောက်မှာ ချောက်မြို့နယ် တနေရာမှာ စစ်ကော်မရှင် ကားတွေကိုတိုက်ခိုက်ရာက အပြန်အလှန်ပစ်ခတ်မှုဖြစ်ပြီး စခန်းမှူးအသက် ၁၉ နှစ်အရွယ် အောင်ဇင်မျိုး (ခ) ဥသြမှာ အဆုတ်ကို ကျည်ထိမှန်ပြီး နေရာမှာပဲ သေဆုံးခဲ့တာလို့ ဆိုပါတယ်။

“ချောက်မြို့က ထွက်လာတဲ့ ယာဉ်တန်းကို ချောက်မြို့နယ် တနေရာမှာ တိုက်ခိုက်တာ၊ ကား ၂ စီးကို ကြားဖြတ်တိုက်ခိုက်ရင်း သူပစ် ကိုယ်ပစ်အပြန်အလှန်ပစ်ခတ်ရင်း ထိမှန်တာ၊ အဆုတ်ကို ထိမှန်တာ၊ အလောင်းကို ပြန်ရခဲ့ပါတယ်၊” လို့ အာဠာဝက မြို့ပြပြောက်ကျားတပ်ဖွဲ့ တာဝန်ရှိသူတဦးက ပြောပါတယ်။

ထိတွေ့တိုက်ခိုက်မှုဖြစ်ပွားချိန် မိနစ် ၃၀ ခန့်ကြာခဲ့ပြီး စစ်ကော်မရှင်တပ်ဖွဲ့ဝင်တွေဘက်က ၅ ဦးသေဆုံးမှုရှိကာ တိုက်ခိုက်မှုဖြစ်ပြီးနောက် ၁ နာရီခန့်အကြာမှာ စစ်ကော်မရှင်ကားတွေက ချောက်မြို့ဘက်ကို ဆက်သွားခဲ့ကြပြီး အဲ့ဒီနောက်မှ အလောင်းကိုကောက်ယူခဲ့ရတယ်လို့ တာဝန်ရှိသူတဦးက ပြောပါတယ်။

အောင်ဇင်မျိုး (ခ) ဥသြရဲ့ ဈာပနအခမ်းအနားကို နိုဝင်ဘာ ၁၇ ရက် မနေ့ကညနေ ၃ နာရီခွဲလောက်က မကွေးခရိုင်အတွင်း တပ်ရင်းအခြေစိုက်ရာနေရာမှာ ပြုလုပ်ခဲ့ပြီး တပ်ဖွဲ့ဝင် ၃၀ ဦးဝန်းကျင်တက်ရောက်ခဲ့ကြတယ်လို့ သိရပါတယ်။

အောင်ဇင်မျိုးဟာ ၂၀၂၅ ခုနှစ် ၅ လပိုင်းမှာ အာဠာဝကမြို့ပြပြောက်ကျားတပ်ဖွဲ့ကိုစတင်ဝင်ရောက်ခဲ့တာဖြစ်ပြီး လက်ရှိမှာ စခန်းမှူးအဖြစ်တာဝန်ထမ်းဆောင်နေတာ ၂ လကြာပြီး မြန်မာလူမျိုးဖြစ်တယ်လို့ တာဝန်ရှိသူတဦးက ပြောပါတယ်။

၂၀၂၃ ဇွန်လမှာစတင်တည်ထောင်ခဲ့တဲ့ အာဠာဝက မြို့ပြပြောက်ကျားတပ်ဖွဲ့ဟာ ချောက်မြို့နယ်အခြေစိုက်ကာ စစ်ကော်မရှင်တပ်တွေကိုတော်လှန်တိုက်ခိုက်နေတာဖြစ်ပြီး တပ်ဖွဲ့တည်ထောင်ချိန်ကနေ လက်ရှိအချိန်ထိ တပ်ဖွဲ့ဝင် ၆ ဦးကျဆုံးခဲ့တာပါ။

စာတည်း – လင်း