ကျော်ကြီး

သဲကုန်း၊ ဇူလိုင် ၆၊ ၂၀၂၆

ပဲခူးတိုင်း၊ သဲကုန်းမြို့၊ ဆရာအတတ်သင် (၁) လမ်းမှာ အထိုင်ချထားတဲ့ စစ်ကော်မရှင်ဂိတ်စခန်းမှာ တိုက်ပွဲဖြစ်ပွါးခဲ့ပြီး နှစ်ဖက်ကျဆုံးမှုရှိတယ်လို့ ပြည်ခရိုင်တပ်ရင်း ၁ က ဇူလိုင်လ ၆ ရက်နေ့မှာ သတင်းထုတ်ပြန်ပါတယ်။

ဇူလိုင်လ ၂ ရက်နေ့ညနေ ၄ နာရီ ၁၅ မိနစ်ခန့်မှာ အင်အား ၃၀ ခန့်ရှိနေတဲ့ စစ်ကော်မရှင်စစ်ဆေးရေးဂိတ်ကို သွားရောက်တိုက်ခိုက်ခဲ့ရာမှာ အပြန်အလှန်ပစ်ခတ်မှု မိနစ် ၃၀ ခန့်ဖြစ်ပွါးခဲ့တယ်လို့ ဆိုပါတယ်။

“စကစဘက်က ထိခိုက်သေဆုံးက မြင်ရတာရှိတယ်။ (PDF) ကျဆုံးရဲဘော်က တိုက်ပွဲဖြစ်ပြီး စကစအင်အားတိုးလာတော့ နောက်ပြန်ဆုတ်တာ။ သူက နောက်ဆုံးကနေခံ ပစ်ပေးနေတော့ သူကိုဝိုင်းပစ်တာမှာ ကျသွားတယ်။ သူကိုတက်ဆွဲတဲ့ရဲဘော်ပါ ဒဏ်ရာရခဲ့သေးတယ်”လို့ ပြည်ခရိုင်တပ်ရင်း(၁) စစ်ထောက်လှမ်းရေးနှင့်သတင်းပြန်ကြားတာဝန်ခံ ရဲဘော် SHADOW ကပြောပါတယ်။

ကျဆုံးတပ်စုမှူး ရန်ကြီးအောင်ဟာ စစ်အာဏာသိမ်းပြီးနောက်ပိုင်း ၂၀၂၂ ခုနှစ်ကတည်းက တော်လှန်ရေးထဲဝင်ရောက်လာသူဖြစ်ကာ တပ်ရင်းအတွက်အားထားရတဲ့ ရဲဘော်ကောင်း တယောက်ဖြစ်တာကြောင့် သူကျဆုံးမှုအတွက် တပ်ရင်းမှာများစွာဆုံးရှုံးနစ်နာရတယ်လို့ ဆိုပါတယ်။

အဆိုပါတိုက်ပွဲအတွင်း အသက် ၂၅ နှစ်အရွယ် တပ်စုမှူး ရန်ကြီးအောင် ကျဆုံးခဲ့ပြီး နောက်ထပ် တပ်ဖွဲ့ဝင်တဦးလည်း ဒဏ်ရာရခဲ့ပါတယ်။

စစ်ကော်မရှင်ဘက်ကတော့ ၅ ဦးသေဆုံးပြီး ၂ ဦးဒဏ်ရာရခဲ့တယ်လို့ တပ်ရင်းထုတ်ပြန်ချက်မှာ ဖော်ပြထားပြီး ကျဆုံးတပ်စုမှုးရဲ့ နာရေးကိုတော့ ဇူလိုင်လ ၅ ရက်နေ့မှာ ပြုလုပ်ခဲ့တယ်လို့ သိရပါတယ်။

စစ်ကော်မရှင်အာဏာသိမ်းပြီးနောက်ပိုင်း ၂၀၂၂ နှစ်စပိုင်းကနေ ၂၀၂၆ ဇူလိုင်လ ၆ ရက်နေ့အထိကာလအတွင်းမှာ တိုက်ပွဲအတွင်း ပြည်ခရိုင်တပ်ရင်း ၁ က ကျဆုံးထားသူ ၄ ဦးရှိတယ်လို့ သိရပါတယ်။

မလှိုင်၊ ဇူလိုင် ၄၊ ၂၀၂၆။

မန္တလေးတိုင်း၊ မလှိုင်မြို့နယ်၊ အိမ်ကြီးတောရွာဘက်ကို စစ်ကြောင်းထိုးလာတဲ့ ရဲတပ်ရင်း ၈ စစ်ကြောင်းတိုက်ခိုက်ခံရလို့ ၇ ဦးသေ၊ ရဲအုပ်အပါအဝင် သုံးပန်း ၁၀ ဦးမိတယ်လို့ ဇူလိုင် ၃ ရက်မှာ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနလက်အောက်ရှိ ပြည်သူ့ကာကွယ်ရေးတပ်မတော် – PDF စစ်ရုံးချုပ်က သတင်းထုတ်ပြန်ပါတယ်။

ဇူလိုင် ၂ ရက်မနက် ၁၁ နာရီကျော်မှာ မလှိုင်မြို့ကနေစစ်ကြောင်းထိုးလာတဲ့ ရဲတပ်ရင်း ၈ မှ ဒုတိယရဲမှူးကြီး ဇော်ဝင်းထိန်ဦးဆောင်တဲ့ အင်အား ၁၀၀ ကျော်ပါ စစ်ကြောင်းကို အိမ်ကြီးတောရွာအနီးတိုက်ခိုက်ရာက အပြန်အလှန်တိုက်ပွဲ ၂ နာရီကျော်ကြာ ဖြစ်ခဲ့တယ်လို့ ဆိုပါတယ်။

“ခုစစ်ကြောင်းက မြင်းခြံ၊ တောင်သာ၊ မလှိုင်ဘက်ထိ စစ်ကြောင်းထိုးနေတဲ့အဖွဲ့ပါ။ သူတို့အနေနဲ့ဆို နယ်မြေရှင်းလင်းရေး လိုက်လုပ်နေတာပါ။ သူတို့က ကျနော်တို့ အနီးအနား ကျွံလာတဲ့ကောင်တွေ သေတာဖမ်းမိတာရှိတယ်။ ကျန်တဲ့သူတွေကတော့ ဝရုန်းသုန်းကားနဲ့ပြန်ပြေးကုန်တယ်”လို့ ဒေသကာကွယ်ရေးတပ်တွေနဲ့နီးစပ်သူတဦးက ပြောပါတယ်။

တိုက်ပွဲဖြစ်ချိန်မှာ စစ်ကော်မရှင်ဘက်က တိုက်ပွဲဧရိယာအပါအဝင် အနီးအနားရွာတွေကိုပါ ဗုံးကြဲတိုက်ခိုက်ခဲ့ပြီးနောက် စစ်ကြောင်းဟာ မလှိုင်မြို့နားအထိပြန်ဆုတ်ခွာသွားခဲ့တယ်လို့ ဆိုပါတယ်၊

တိုက်ပွဲအတွင်းမှာ စစ်ကော်မရှင်ဘက်က ၇ ဦးသေဆုံး၊ ၃၀ ကျော်ထိခိုက်ကာ ရဲအုပ် ၁ ဦးအပါအဝင် ရဲတပ်သား ၁၀ ဦးကို သုံ့ပန်းအဖြစ် ဖမ်းဆီးထားခဲ့တယ်လို့ ထုတ်ပြန်ချက်မှာ ဖော်ပြပါတယ်။

ဒါ့အပြင် လက်နက်မျိုးစုံနဲ့ စိန်ပြောင်း အလက် ၂၀၊ ဒရုန်းနဲ့ ဆက်စပ်ပစ္စည်းတွေ၊ ခဲယမ်းမျိုးစုံကိုလည်း သိမ်းဆည်းခဲ့တယ်လို့လည်း ဆိုပါတယ်။

ဒီတိုက်ခိုက်မှုကို မြင်းခြံခရိုင်စစ်ဌာနရဲ့ ကွပ်ကဲမှုနဲ့ မြင်းခြံခရိုင်စစ်ဌာန လက်အောက်ခံတပ်ရင်းတွေ၊ မိတ္ထီလာခရိုင် အမှတ် ၂ တပ်ရင်း၊ မြင်းခြံခရိုင် ပြည်သူ့ကာကွယ်ရေးအဖွဲ့ – ပကဖ၊ နွားထိုးကြီးမြို့နယ် ပကဖ၊ မလှိုင်မြို့နယ် ပကဖနဲ့ TTA ပြောက်ကျားတပ်ဖွဲ့တို့ ပူးပေါင်းတိုက်ခိုက်ခဲ့တာပါ။

မေ ၂၄ ရက်ကလည်း မြင်းခြံမြို့နယ်၊ မြင်းခြံ-တောင်သာသွားလမ်း ကုလားတန်ကွေ့အနီးမှာ မြင်းခြံပြည်သူစစ်အဖွဲ့ရဲ့ ရိက္ခာပို့ကား တိုက်ခိုက်ခံရပြီး ၅ ဦးသေဆုံးခဲ့ပါသေးတယ်။

အောင်လံ၊ ဇူလိုင် ၃၊ ၂၀၂၆။

မကွေးတိုင်း၊ အောင်လံမြို့နယ်၊ ဘုရားတောင်ဗွေကျေးရွာအနီး ပြည်-မကွေးကားလမ်းမှာ သရက်ခရိုင်ရဲတပ်ဖွဲ့မှူးလိုက်ပါလာတဲ့ယာဥ်တန်း တိုက်ခိုက်ခံရပြီး ခရိုင်ရဲမှူးဒဏ်ရာရကာ၊ မြို့နယ်ဦးစီးမှူး ၁ ဦးနဲ့ ရဲ ၁ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇူလိုင်လ ၁ ရက်နေ့ နေ့လယ် ၁ နာရီခန့်က အောင်လံကနေ ဆင်ပေါင်ဝဲဘက်ကို သရက်ခရိုင်ရဲတပ်ဖွဲ့မှူး ဒုရဲမှူးကြီးဝင်းနိုင်လိုက်ပါလာတဲ့ ကား ၄ စီးပါ ယာဥ်တန်းကို ကြားဖြတ်တိုက်ခိုက်ခဲ့ကြတာလို့ ဆိုပါတယ်။

“တော်လှန်ရေးအဖွဲ့တွေက ဘုရားတောင်ဗွေနားမှာ တိုက်ပွဲ​ဖော်ဆောင်တာပါ။ ပွင်းလင်းပြောရရင် ယာဥ်တန်းကို ကြားဖြတ်တိုက်ခိုက်တာပါ။ ကြားညှပ်တာမဟုတ်ဘူး။ သူတို့က တူတူလာကြတာ။ ရဲတပ်ဖွဲ့ပါတဲ့ယာဥ်တန်းပါ။”လို့ ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

အဆိုပါပစ်ခတ်မှုအတွင်းမှာ ဆင်ပေါင်ဝဲမြို့နယ် မြို့နယ်ကျေးလက်ဒေသဖွံ့ဖြိုးရေးဦးစီးဌာန ဦးစီးမှူးဦးကျော်ဇေယျနဲ့ ရဲတပ်ကြပ်ကြီးတဦးတို့ သေဆုံးတယ်လို့ ဆိုပါတယ်။

ဒါ့အပြင် ခရိုင်ရဲတပ်ဖွဲ့မှူး ဒုရဲမှူးကြီးဝင်းနိုင်အပါအဝင် ယာဥ်တန်းနဲ့ပါလာသူ ၅ ဦးခန့် ဒဏ်ရာရတာရှိတယ်လို့ သိရပါတယ်။

အဆိုပါပစ်ခတ်မှုကိုပြုလုပ်ခဲ့တဲ့ အဖွဲ့တွေဘက်ကတော့ ဇူလိုင်လ ၃ ရက်နေ့ မနက်ပိုင်းအထိ သတင်းတစုံတရာထုတ်ပြန်တာမျိုး မရှိသေးပါဘူး။

ပစ်ခတ်မှုပြုလုပ်ခဲ့တဲ့အဖွဲ့တာဝန်ရှိသူတွေထံ မြေလတ်အသံက ဆက်သွယ်နေပေမယ့် အဆက်အသွယ်မရသေးပါဘူး။

ပြီးခဲ့တဲ့ ဇွန်လ ၄ ရက်နေ့ကလည်း ချောက်မြို့နယ်၊ ဂွေးပင်ကျေးရွာနဲ့ ချောက်မြို့ကြားမှာ ဂွေးပင်ရဲစခန်းမှူး လိုက်ပါလာတဲ့ကား တိုက်ခိုက်ခံရပြီး စခန်းမှူးသေဆုံးတယ်လို့ သိရပါတယ်။

ဓာတ်ပုံ – သရက်ခရိုင်ရဲတပ်ဖွဲ့မှူး ဒုရဲမှူးကြီးဝင်နိုင် (MOI)

မင်းတပ်၊ ဇူလိုင် ၂၊ ၂၀၂၆။

မကွေးတိုင်း၊ ဆောမြို့နယ်နဲ့ ချင်းပြည်နယ်၊ မင်းတပ်၊ ကန်ပလက်မြို့နယ်အစပ်တွေမှာ ဖြစ်ပွားတဲ့တိုက်ပွဲတွေအတွင်း စစ်ကော်မရှင်တပ်သား ရာချီသေဆုံးကာ၊ အရှင်ဖမ်းမိသူတွေနဲ့ လက်နက်အများအပြား သိမ်းဆည်းရမိထားတယ်လို့ ဇူလိုင်လ ၂ ရက်နေ့ရက်စွဲနဲ့ ချင်းပြည်သူ့တပ်မတော် CPA က သတင်းထုတ်ပြန်ထားပါတယ်။

မေလ ၁၆ ရက်နေ့က စတင်ပြီး ဆောမြို့နယ်ဘက်ကနေ ချင်းပြည်နယ်၊ မင်းတပ်နဲ့ကန်ပက်လက်မြို့နယ်တွေကို အင်အား ထောင်ချီသုံးပြီး ဝင်လာတဲ့စစ်ကော်မရှင်တပ်တွေနဲ့ CPA ပူးပေါင်းတပ်တွေအကြား တိုက်ပွဲပေါင်းများစွာဖြစ်ပွါးခဲ့ပြီး စစ်ကော်မရှင်ဘက်က ရာချီသေဆုံးထားသလို ရာချီထိခိုက်ဒဏ်ရာရထားတယ်လို့ ထုတ်ပြန်ချက်မှာ ဖော်ပြထားပါတယ်။

တိုက်ပွဲအတွင်း ရန်သူ့အလောင်း၊ သုံးပန်းတွေနဲ့ လက်နက်တွေအပါအဝင် စစ်အသုံးအဆောင်ပစ္စည်းအများအပြားကိုလည်းသိမ်းဆည်းရမိထားတယ်လို့ မှတ်တမ်းဓာတ်ပုံတွေအပြင်၊ သေဆုံးသွားတဲ့ စစ်သားတွေရဲ့ ဓာတ်ပုံမှတ်တမ်းများစွာနဲ့ ထုတ်ပြန်ထားတာဖြစ်ပါတယ်။

တိုက်ပွဲကာလ တလကျော်အတွင်း ဆောနဲ့ မင်းတပ်အကြား၊ ဆောနဲ့ ကန်ပက်လက်ကြားမှာ တိုက်ပွဲအကြိမ်ရေပေါင်းများစွာ ဖြစ်ပွားထားကာ စစ်ကော်မရှင်ဘက်က သေဆုံးသူ ၁၅၀ ခန့်၊ ဒဏ်ရာရသူ ၂၀၀ ခန့်ရှိနိုင်ပြီး တော်လှန်ရေးပူးပေါင်းတပ်တွေဘက်ကတော့ သေဆုံးသူ ၂၀ ဝန်းကျင်နဲ့ ထိခိုက်သူ ၃၀ ဝန်းကျင်ရှိနေတယ်လို့ မြေပြင်စစ်ရေးအခြေနေ သိရှိသူတဦးကပြောပါတယ်။

“မင်းတပ်နဲ့ ကျောက်ထုကြားမှာတိုက်ပွဲဖြစ်နေတာဆိုကြာပြီကော တက်လိုက် လန်ကျလိုက်ဖြစ်နေတာ။ အဲဒီကြားဆို တိုက်ပွဲအကြိမ်ရေ ၁၂၀ လောက်ဖြစ်ထားတယ်။ ကန်ပက်လက်ဆိုလည်း ၆ မိုင်အကွာလောက်ထိ စစ်တပ်ရောက်တယ်။ အဲမှာလည်း ရာချီပဲ တိုက်ပွဲအကြိမ်ရေက။ နေ့တိုင်းဖြစ်တာ။ မင်းတပ်မှာဆို ညကအထိ ဖြစ်နေသေးတာ”လို့ မြေပြင်စစ်ရေးအခြေနေသိရှိသူတဦးက ပြောပါတယ်။

ပြီးခဲ့တဲ့မေလ ပထမအပတ်လော​က်ကစတင်ပြီး စစ်ကော်မရှင်အင်အား ၂၀၀၀ ခန့်ဟာ ဆောမြို့နယ်အတွင်း ဝင်ရောက်လာပြီးနောက် အဲဒီကနေတဆင့် မင်းတပ်နဲ့ ကန်ပက်လက်ဘက်ကို ထိုးစစ်ဆင်နေတာ ဖြစ်ပါတယ်။

အဆိုပါ စစ်ကြောင်းတွေဟာ ဇူလိုင်လ ၂ ရက်နေ့အထိ မင်းတပ်မြို့နဲ့ ၂ မိုင်အကွာ၊ ကန်ပက်လက်မြို့နဲ့ ၆ မိုင်အကွာထိရောက်ရှိနေကာ ရှေ့ဆက်မတိုးနိုင်သေးပဲ တိုက်ပွဲတွေက ဆက်လက်ဖြစ်ပွားနေပါသေးတယ်။

စစ်ကော်မရှင်ဘက်ကတော့ တိုက်ပွဲအတွင်း သေဆုံးသူတွေကို အလောင်းပြန်သယ်တာမရှိသလို၊ ထိခိုက်ဒဏ်ရာ ရသူတွေကိုတော့ ကျောက်ထုကနေတဆင့် မိတ္ထီလာအထိ လေကြောင်းကနေ သယ်ယူပြီးဆေးကုသ နေတာတွေရှိတယ်လို့ မြေပြင်စစ်ရေးအခြေအနေသိရှိသူက ဆက်ပြောပါတယ်။

တိုက်ပွဲကာလအတွင်း စစ်ကော်မရှင်ဘက်က လေကြောင်းတိုက်ခိုက်မှု အကြိမ်ရေ ရာနဲ့ချီအသုံးပြုထားသလို လေကြောင်းတိုက်ခိုက်မှုတွေကြောင့် အသက် ၁၀ နှစ်အောက် ကလေးငယ် ၇ ဦးအပါအဝင် ပြည်သူ ၂၀ ခန့်သေဆုံးထားတယ်လို့ ဆိုပါတယ်။

တိုက်ပွဲနဲ့ စစ်ကြောင်းထိုးတာ၊ လေကြောင်းဗုံးကြဲမှုတွေကြောင့် ဆော၊ မင်းတပ်၊ ကန်ပလက်မြို့နယ်တွေက စစ်ဘေးရှောင်သူ တသိန်းဝန်းကျင်ထိရှိနေပြီး အများစုက နေရပ်မပြန်နိုင်ကြသေးဘူးလို့ သိရပါတယ်။

ဓာတ်ပုံ – ချင်းပြည်သူ့တပ်မတော် CPA

မင်းလှ၊ ဇူလိုင် ၂၊ ၂၀၂၆။

ပဲခူးတိုင်း၊ မင်းလှမြို့နယ်၊ ရန်ကုန်-ပြည်လမ်းမဘေးရှိ အညာတန်းကျေးရွာနဲ့ ကိုင်းပြင်ကြီးရွာကြားက စစ်တပ်စခန်းတခုကို PDF တပ်ဖွဲ့တွေ ပူးပေါင်းတိုက်ခိုက်ရာ ထိခိုက်သေဆုံးသူ ၁၀ ဦးထက်မနည်းရှိတယ်လို့ သာယာဝတီခရိုင်ပြည်သူ့ကာကွယ်ရေးတပ်ဖွဲ့က ဇူလိုင်လ ၂ ရက်နေ့က သတင်းထုတ်ပြန်ပါတယ်။

ဇူလိုင်လ ၁ ရက်နေ့မနက် ၃ နာရီကျော်ခန့်မှာ ကျေးရွာအနီးမှာ အင်အား ၃၀ ခန့်နဲ့တပ်စွဲထားတဲ့ စစ်ကော်မရှင်စခန်းကို တော်လှန်ရေးပူးပေါင်းတပ်တွေဘက်က သွားရောက်တိုက်ခိုက်ခဲ့ရာ အပြန်အလှန်တိုက်ပွဲ ၁ နာရီကျော်ကြာမြင့်ခဲ့တယ်လို့ ဆိုပါတယ်။

“ဘန်ကာတခုတော့ရတယ်။ သူတို့ဘက်က အထိအခိုက်အကျအဆုံးနဲ့ ပြေးတာတွေလည်းရှိတယ်။ စခန်းကို လုံးလုံးဝင်သိမ်းမယ့်အချိန်မှာ လေကြောင်းလည်း လာတယ်။ ရဲဘော်တွေကအထဲကို ဆက်ဝင်ဖို့လုပ်နေချိန် အုတ်ဖိုဘက်က စစ်ကူလည်း ဖောကား ၃ စီးရောက်လာတယ်။ လက်နက်ကြီးတွေနဲ့လည်းပစ်တော့ ပြန်ဆုန်လာရတယ်”လို့ ရွှေတန်းမြေပြည်သူ့ကာကွယ်ရေးတပ်ဖွဲ့ တာဝန်ခံက ပြောပါတယ်။

တိုက်ပွဲအတွင်း တော်လှန်ရေးရဲဘော်တွေရဲ့မျက်မြင်နဲ့ ရွာခံပြည်သူတွေရဲ့ သတင်းအရ စစ်ကော်မရှင်ဘက်က ၁၀ ဦးထက်မနည်းထိခိုက်သေဆုံးပြီး လက်နက်တွေကတော့ မကောက်ယူနိုင်ခဲ့ဘူးလို့ဆိုပါတယ်။ ၁၀ ဦးထက်မနည်း သေဆုံးမှုကို မြေလတ်အသံအနေနဲ့ သီးခြားအတည်ပြုနိုင်ခြင်း မရှိသေးပါဘူး။

အဆိုပါ စစ်ကော်မရှင်စခန်းဟာ ၂၀၂၄ ခုနှစ်လောက်ကစပြီး ကျေးရွာအနီးမှာ လာရောက်တပ်စွဲထားသလို ခရီးသွားပြည်သူတွေကိုစစ်ဆေးငွေညှစ်တာနဲ့ ကျေးရွာတွေကို အကြောင်းမဲ့လက်နက်ကြီးတွေနဲ့ပစ်ခတ်နေတဲ့ စခန်းဖြစ်တယ်လို့ သိရပါတယ်။

အဆိုပါတိုက်ခိုက်မှုကိုတော့ သာယာဝတီခရိုင် ပြည်သူ့ကာကွယ်ရေးအဖွဲ့ရဲ့အမှတ် ၁ တိုက်ခိုက်ရေးတပ်ဖွဲ့ ၊ရွှေတန်းမြေပြည်သူ့ကာကွယ်ရေးတပ်ဖွဲ့တွေက ပူးပေါင်းတိုက်ခိုက်ခဲ့တာဖြစ်တယ်လို့ ဆိုပါတယ်။

ပြီးခဲ့တဲ့နှစ် ဒီဇင်ဘာလ ၇ ရက်နေ့ကလည်း မင်းလှမြို့နယ်၊ ဘန့်ဘွေးကုန်းကျေးရွာမှာ အထိုင်ချထားတဲ့ စစ်ကော်မရှင်စစ်ဆေးရေးဂိတ်တိုက်ခိုက်ခံရပြီး ၂ ဦးသေဆုံးကာ ၃ ဦးဒဏ်ရာရခဲ့တယ်လို့ သိရပါတယ်။