မှုခင်း

လယ်ဝေး၊ အောက်တိုဘာ ၈၊ ၂၀၂၆။

ပဲခူးတိုင်း၊ ရေတာရှည်မြို့နယ်နဲ့ လယ်ဝေးမြို့နယ်အစပ် ကျောက်အိုးကျေးရွာက အရှိုချင်း မိသားစုဝင် ၄ ဦး နေအိမ်မှာပစ်သတ်ခံရတယ်လို့ ဒေသခံတွေထံက သိရပါတယ်။

ပစ်သတ်ခံရသူတွေဟာ အသက် ၄၂ နှစ်အရွယ် ဦးဝင်းဦး၊ ဇနီးဖြစ်သူ အသက် ၃၅ နှစ်အရွယ် ဒေါ်ဖြူသွယ်ဦးနဲ့ သူရဲ့မောင်ဖြစ်သူ အသက် ၂၀ အရွယ် မောင်စိုးလင်းထက်၊ တူ​ဖြစ်သူ ၁၇ နှစ်အရွယ် မောင်ဆန်းသူအောင်တို့ ဖြစ်ပြီး အောက်တိုဘာလ ၇ ရက်နေ့ ည ၁၀ နာရီခန့်က နေအိမ်အတွင်း ပစ်သတ်ခံရတာလို့ ဆိုပါတယ်။

“ဖြစ်တဲ့အချိန် ညက မိုးရွာနေတယ်။ သူတို့သေတာကို ပတ်ဝန်းကျင်က မနက်မှ သိကြတာ။ အမကြီးကတော့ မီးဖိုချောင်မှာ မှောက်လျက် ပစ်ထားတယ်။ ယောက်ျားလုပ်သူက လှေကားအတက်အဆင်းနားမှာ။ တူလုပ်တဲ့သူနဲ့ညီလုပ်တဲ့သူကတော့ အိပ်ယာထဲမှာပစ်ခံထားရတာ”လို့ ဒေသခံတဦးက ပြောပါတယ်။

သေနတ်နဲ့ ပစ်သတ်ခံထားရတာကြောင့် မိသားစုဝင် ၄ ဦးစလုံးဟာ ဦးခေါင်း၊ နားထင်နဲ့ ရင်ဘတ်ပွင့်ထွက်ဒဏ်ရာတွေနဲ့ နေရာမှာပဲသေဆုံးနေကြတာ ဖြစ်ပါတယ်။

သေဆုံးသူတွေဟာ အရှိုချင်းတိုင်းရင်းသားတွေဖြစ်သလို သာမန်တောင်သူလုပ်စားသူတွေဖြစ်ပြီး စစ်တပ်၊ အုပ်ချုပ်ရေးပိုင်းတွေနဲ့ ပတ်သက်မှု ရှိ/မရှိကတော့ မသိရဘူးလို့ ဆိုပါတယ်။

သေဆုံးသူတွေကို ဒေသခံတွေနဲ့ လူမှုကူညီရေးအသင်းတွေက နေပြည်တော်ကုတင် (၁၀၀၀)ဆေးရုံကို ပို့ထားရပြီး သက်ဆိုင်ရာက စစ်ဆေးမှုတွေပြုလုပ်နေတယ်လို့ သိရပါတယ်။

အဆိုပါ ပစ်ခတ်မှုကိုတော့ ဘယ်အဖွဲ့အစည်းတွေက ဘာကြောင့်ပြုလုပ်ခဲ့တယ်ဆိုတာ အောက်တိုဘာလ ၈ ရက်နေ့အထိ သက်ဆိုင်ရာအဖွဲ့တွေဘက်က သတင်းထုတ်ပြန်တာ မရှိသေးပါဘူး။

ဝက်လက်၊ အောက်တိုဘာ ၈၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်၊ မူးကမ်းကြီးရွာကနေ လက်နက်ဖိုးအကြွေးတောင်းပြန်လာတဲ့ ပကဖ ရဲဘော် (၂) ဦးကို သတ်ဖြတ်ပြီး ငွေနဲ့လက်နက်ယူသွားသူတွေထဲက ခေါင်းဆောင်အချို့ကို ဖမ်းမိထားတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ပြစ်မှုကျူးလွန်သူတွေကိုတော့ အောက်တိုဘာလ(၅) ရက်နေ့ညနေမှာပဲ ဝက်လက်မြို့နယ်၊ တည်တောရွာမှာ ဖမ်းဆီးနိုင်ခဲ့ပြီး သတ်ဖြတ်မှုမှာ ပူးပေါင်းလုပ်ဆောင်ခဲ့ကြသူတွေဖြစ်တဲ့ ရွှေဘိုမြို့နယ်၊ ပေါက်ချိုင်ကျေးရွာပကဖတာဝန်ခံ ဦးကျော်အောင်နဲ့ သားဖြစ်သူ ဗိုလ်ကျားရိုင်း(LPDF) ယာယီတာဝန်ခံ ပိုင်ပိုင်၊ ဇနီးဖြစ်သူ မစန္ဒီ တို့အပြင် သူတို့ကိုလက်ခံပေးထားတဲ့ တည်တောရွာသား ကိုမင်းမင်း တို့ကို ထိန်းသိမ်း စုံစမ်းစစ်ဆေးနေတာလို့ ဆိုပါတယ်။

“ကိုမင်းမင်းက အိမ်ရှင်။ သူ့ဆီမှာ သိန်း ၂၀၀ အပ်ထားပြီးတော့ လာခိုနေကြတာဆိုတော့ အိမ်ရှင်ပါ ယာယီခေါ်ထားတာ။ သူကသိနိုင်တယ်ဆိုပြီးတော့ သူ့ပါထိန်းသိမ်းထားတာ။ သူကတော့ ပြစ်မှုကျူးလွန်တဲ့အထဲ ပါမပါတော့ မသိရဘူး။ ဖမ်းထားသူအားလုံးကိုတော့ ဘုတလင်ဘက် တာဝန်ရှိသူတွေဘက် လွှဲထားရတယ်။” လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ပစ်ခတ်မှုကျူးလွန်ခဲ့တာကတော့ တရားခံက (၅) ဦးလို့ ကြားသိရပြီး လက်ရှိ ဖမ်းမိသူ ၄ ဦးထဲမှာ ပိုင်ပိုင်နဲ့ ဇနီးဖြစ်သူ မစန္ဒီတို့က သတ်ဖြတ်မှုကို ပါဝင်လုပ်ဆောင်ခဲ့ကြောင်း ဝန်ခံထားတယ်လို့ ဆိုပါတယ်။

“အမှန်တကယ်က အဲ့ကောင်(ပိုင်ပိုင်)မှာက ပါရီတလက်ပါတယ်။ အဲ့ဒါနဲ့ အရင်ပစ်တာ။ ရဲဘော်တွေ လဲကျသွားတော့ ရဲဘော်တွေဆီကပါတဲ့ MA နဲ့ ထပ်ပစ်တာ ဒီကောင်က။ သူတို့လင်မယားနှစ်ယောက် ကျူးလွန်ရာမှာပါတယ်ဆိုတာကို ဝန်ခံထားတယ်”လို့ နောက်ထပ်ဒေသကာကွယ်ရေးအဖွဲ့ တာဝန်ရှိသူတဦးက ပြောပါတယ်။

အောက်တိုဘာလ (၄) ရက်နေ့ညနေပိုင်းက မူးကမ်းကြီးရွာမှာရှိနေတဲ့ ဗိုလ်ကျားရိုင်းအဖွဲ့(LPDF) ယာယီတာဝန်ခံ ပိုင်ပိုင် ဆီကနေ လက်နက်ဖိုး ကျပ်သိန်း (၂၂၀) ကို ဘုတလင်မြို့နယ်၊ နတ်ရွာကျေးရွာပကဖ ရဲဘော်တွေဖြစ်တဲ့ မင်းသီဟနဲ့ အောင်မင်းထွေးတို့ က တောင်းယူပြီးအပြန် တိုက်ရွာ နဲ့ အုတ်ရှစ်ကြီးရွာ ကြားမှာ သတ်ဖြတ်ခံခဲ့ရတာ ဖြစ်ပါတယ်။

ဒီသတ်ဖြတ်မှုကိုတော့ လက်နက်ဖိုးအကြွေးပေးချေခဲ့တဲ့ ပိုင်ပိုင်နဲ့အဖွဲ့ကလုပ်ဆောင်ခဲ့ကြတာဖြစ်ပြီး သေနတ်နဲ့ ဝိုင်းပစ်ခဲ့လို့ ပကဖရဲဘော် (၂) ဦးမှာ နေရာမှာတင် သေဆုံးခဲ့ရသလို အကြွေးတောင်းယူလာတဲ့ ငွေကျပ်သိန်း (၂၂၀) နဲ့ သေနတ်တွေကိုပါ ပိုင်ပိုင်တို့အဖွဲ့က ယူဆောင်ပြီးတိမ်းရှောင်နေခဲ့ကြတာလို့ ဒေသတွင်းကာကွယ်ရေးအဖွဲ့တွေက ပြောပါတယ်။

လက်ရှိမှာတော့ ဖမ်းဆီးရမိထားသူတွေဆီကနေ ပြစ်မှုကျူးလွန်ရာမှာ ရယူထားတဲ့ ငွေကျပ် သိန်း (၂၂၀) ထဲက သိန်း (၂၀၀) နဲ့ သေနတ်တလက်ကို ရရှိထားပြီး ကျန်သေနတ်တလက်နဲ့ ကျူးလွန်ရာမှာ ပါဝင်ခဲ့သူ နောက် (၁) ဦးကို ဆက်လက်ရှာဖွေနေဆဲ ဖြစ်တယ်လို့ သိရပါတယ်။

စာတည်း – စိုးဦး

ဒီပဲယင်း၊ အောက်တိုဘာ ၇၊ ၂၀၂၆။

စစ်ကိုင်းတိုင်း၊ ဒီပဲယင်းမြို့နယ်၊ တိုက်ရွာနဲ့ အုတ်ရှစ်ကြီးရွာကြားမှာ အကြွေးတောင်းပြန်လာတဲ့ ပကဖ ရဲဘော် ၂ ဦးပစ်သတ်ခံရ လက်နက်နဲ့ ငွေတွေပါ ယူဆောင်ခံရတယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေထံက သိရပါတယ်။

ပစ်သတ်ခံရသူတွေက ဘုတလင်မြို့နယ်၊ နတ်ရွာကျေးရွာပကဖ အဖွဲ့ဝင်တွေဖြစ်တဲ့ အသက် ၂၀ ကျော်အရွယ်ရှိ ရဲဘော် မင်းသီဟ နဲ့ အောင်မင်းထွေးဆိုသူတို့ဖြစ်ပြီး အောက်တိုဘာလ ၄ ရက်နေ့ည​နေ ၆ နာရီကျော်ခန့်မှာ မူးကမ်းကြီးရွာကနေ ငွေတောင်းပြီး ပြန်လာချိန် ပစ်သတ်ခံရတာလို့ဆိုပါတယ်။

“ပိုက်ဆံတောင်းခိုင်းတာ။ သိန်း ၂၂၀ ရစရာရှိလို့ သွားတောင်းခိုင်းတဲ့အခါ ကလေးတွေက သွားတောင်းကြတယ်။ ငွေယူပြီး ပြန်လာတဲ့အချိန်မှာ လုပ်ကြံခံရတာ။ ပေးတဲ့သူကပဲ လုပ်ကြံတဲ့သဘောရှိတယ်။ ငွေက အကြွေးရစရာရရှိတဲ့ငွေပေါ့”လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

ပကဖရဲဘော် ၂ ယောက်ပစ်သတ်ခံရတဲ့ နေရာအနီးမှာတော့ ၅.၅၆ ကျည်ခွံအချို့နဲ့ ၆.၈ မီလီမီတာ ကျည်ခွံအချို့တွေ့ရပြီး ရဲဘော် ၂ ဦးမှာ ဦးခေါင်းပွင့်သေဆုံးနေကြတာ ဖြစ်ပါတယ်။

ဒါ့အပြင် ရဲဘော် ၂ ဦးကိုင်ဆောင်လာတဲ့ သေနတ် ၂ လက်နဲ့ အကြွေးတောင်းယူလာတဲ့ ငွေကျပ် သိန်း ၂၂၀ လည်းပျောက်ဆုံးနေတယ်လို့ သိရပါတယ်။

ပစ်သတ်ခံရပြီးသေဆုံးသွားတဲ့ ရဲဘော် ၂ ဦးရဲ့အလောင်းကိုတော့ သက်ဆိုင်ရာ ရပ်ကျေးပကဖ အဖွဲ့တွေ ပြန်သယ်သွားပြီး နောက်တရက်မှာ သင်္ဂြိုဟ်လိုက်ကြတယ်လို့ သိရပါတယ်။

အဆိုပါ လူသတ်ငွေယူလက်နက်ယူသွားသူတွေကို ဖမ်းဆီးရမိနိုင်ရေး ခရိုင်နဲ့မြို့နယ်အဆင့် တာဝန်ရှိသူတွေက စုံစမ်းနေကြတယ်လို့ သိရပါတယ်။

စစ်ကိုင်း၊ အောက်တိုဘာ ၅၊ ၂၀၂၆။

စစ်ကိုင်းတိုင်း၊ စစ်ကိုင်းမြို့နယ်၊ ကျောက်ဆည်ကျေးရွာအနီး စစ်ကိုင်း-မုံရွာလမ်းပိုင်းပေါ်မှာ ရပ်ထားတဲ့ကားကို ဟိုက်ဂျက်ကားက ဝင်တိုက်ပြီး ကားပေါ်ပါလာတဲ့ ခရီးသည် ၁၀ ဦးသေဆုံးကာ ၃ ဦးဒဏ်ရာရတယ်လို့ ကူညီကယ်ဆယ်ရေး လုပ်ဆောင်ပေးသူတွေထံက သိရပါတယ်။

အောက်တိုဘာလ ၅ ရက်နေ့မနက် ၉ နာရီခန့်က ကံတလူတိုးဂိတ်အနီးမှာ မုံရွာဘက်ကိုဦးတည်ပြီးရပ်ထားတဲ့ ၆ ဘီး ဘောက်ကား(ကွန်တိန်နာ)ကို ဟိုက်ဂျက်ယာဥ်က ဝင်တိုက်ခဲ့တာလို့ ဆိုပါတယ်။

“ဘရိတ်ပေါက်ပြီး ဝင်တိုက်တာလို့တော့ သိရတယ်။ ဟိုက်ဂျက်က ဝင်တိုက်တာ။ လာတိုက်တဲ့ကားက မုံရွာဘက်ကနေလာတာ။ သေတဲ့လူတွေက မြောင်ဘက်ကလို့တော့သိရတယ်”လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ဟိုက်ဂျက်ကားနဲ့ လိုက်ပါလာသူ ၁၃ ဦးအနက် အသက် ၂၅ ကနေ ၇၀ ကြားရှိ အမျိုးသမီး ၈ ဦးနဲ့ အမျိုးသား ၂ ဦးဟာ နေရာမှာပဲ သေဆုံးသွားတာ ဖြစ်ပါတယ်။

ဒါ့အပြင် ကျန်အမျိုးသားနဲ့ အမျိုးသမီး ၃ ဦးကတော့ ပြင်းထန်ဒဏ်ရာရသွားပြီး သေဆုံးထိခိုက်သူတွေကို ဒေသခံ လူမှုကူညီရေးအသင်းတွေက စစ်ကိုင်းပြည်သူ့ဆေးရုံကို ပို့ဆောင်ပေးထားကာ ထိခိုက်သူတွေကိုတော့ ဆေးကုသမှုခံယူနေရတယ်လို့ သိရပါတယ်။