မှုခင်း

ပေါက်၊ စက်တင်ဘာ ၉၊ ၂၀၂၆။

မကွေးတိုင်း၊ ပေါက်မြို့နယ်၊ ဇုန် ၂ ပလဖ အဖွဲ့တွေက မူးယစ်ဆူပူမှုနဲ့ ဖမ်းဆီးခံရသူ အမျိုးသားတဦး နှိပ်စက်ခံထားရတဲ့ ဒဏ်ရာတွေနဲ့ သေဆုံးသွားကာ တရားမျှတမှုရှာပေးဖို့ မိသားစုက တောင်းဆိုလိုက်ပါတယ်။

ဩဂုတ်လ ၂၃ ရက်နေ့ နေ့လည်ပိုင်းမှာ သက္ကယ်ကျင်းကျေးရွာနေ အသက် ၄၉ နှစ်အရွယ် ဦးစိုးမြင့်နိုင်ကို မူးယစ်ဆူပူတယ်ဆိုတဲ့ အကြောင်းပြချက်နဲ့ ဇုန် ၂ ပလဖအဖွဲ့ဝင် ရဲဘော်ဒေါင်းမင်းဦးဆောင်တဲ့ ပလဖ အဖွဲ့ဝင် ၆ ဦးက ကျေးရွာအနီး ရေချောင်းထဲကနေ လာရော​က်ဖမ်းဆီးသွားတာ ဖြစ်ပါတယ်။

ဖမ်းဆီးချိန်မှာလည်း ဝါးတုတ်နဲ့ရိုက်နှက်လို့ ဦးစိုးမြင့်နိုင်မှာ အရှေ့သွား ၃ ချောင်းကျွတ်ထွက်သွားပြီးနောက် ဖမ်းဆီးသွားကာ ညနေပိုင်းမှာ ဇုန် ၂ ပလဖ စခန်းကနေ ကျေးရွာကို ပြန်ပြေးလာပြီး ၎င်းရဲ့အကိုဖြစ်သူနေအိမ်မှာ ပုန်းအောင်းနေစဥ် ညပိုင်းမှာ ပလဖ အဖွဲ့ဝင်တွေက ထပ်မံလာရောက်ဖမ်းဆီးကာ သူတို့စခန်းကို ခေါ်ဆောင်သွားပြီး နှိပ်စက်ခဲ့ကြတာလို့ ဆိုပါတယ်။

“လျှာဖျားလေးတွေကို ကတ်ကြေးနဲ့ဖြတ်တယ်။ သွားတွေကို ပလယာနဲနုတ်တယ်။ ခြေဖနောက်ကျောတွေဖြတ်တယ်။ ပေါင်တွေ ခြေသလုံးတွေမှာ ဓားမွန်းရာတွေရှိတယ်။ ခေါင်းကိုလည်း ရိုက်တော့ နောက်စေ့က ဖုထွက်နေတယ်။ ကျောတွေကို ဓားနဲ့မွန်းတယ်။ မျက်လုံးတွေကိုလည်း ဆွဲနုတ်တယ်။ မျက်လုံးကြီးကို ညိုမဲစွဲနေကော။ နားနဲ့မျက်လုံးထဲက သွေးတွေထွက်တယ်။ ပြီးတော့ ပလယာတွေနဲ့ ခြေထောက်ချောင်းလေးတွေကို ညှပ်တယ်။”လို့ မိသားစုဝင်တွေကပြောပါတယ်။

ဖမ်းဆီးခံထားရချိန် တပတ်လုံးနီးပါး နေ့စဥ်နှိပ်စက်ခံရပြီး မြေကျွင်းထဲမှာ ထည့်ထားသလို နှိပ်စက်ဒဏ်ရာတွေမှာ ယဥ်ကောင်တွေ လာကိုက်ပါကလည်း ဖယ်ခွင့်မပေးသလို ထမင်းမကျွေး၊ ရေမတိုက်ဘဲထားကာ အရက်သောက်ပြီး နှိပ်စက်ကြတာလို့ ဦးစိုးမြင့်နိုင်မသေဆုံးခင်က မိသားစုကို ပြန်ပြောပြခဲ့တာလို့ မိသားစုဝင်တွေက ဆိုပါတယ်။

နှိပ်စက်ပြီး သေလုမျောပါးအခြေနေဖြစ်နေအတွက် ဩဂုတ်လ ၃၁ ရက်နေ့မနက်ပိုင်းမှာ ဇုန် ၂ ပလဖ တာဝန်ရှိသူတွေက ဦးစိုးမြင့်နိုင်ရဲ့ အမျိုးသမီးတဦးနဲ့ သက္ကယ်ကျင်းကျေးရွာအုပ်ချုပ်ရေးအဖွဲ့ကို လာရောက်တွေ့ဆုံဖို့ပြောပြီး ပြန်လည် အပ်နှံပေးခဲ့တာလို့ ဆိုပါတယ်။

ဖမ်းဆီးခံရချိန်မှာလည်း မိသားစုဝင်တွေနဲ့ တွေ့ခွင့်မပေးခဲ့သလို သေဆုံးခါနီး ဦးစိုးမြင့်နိုင်ကို နေအိမ်ကို ပြန်လာခေါ်ဖို့ကိုပင် ဇနီးသည်နဲ့ ကျေးရွာအုပ်ချုပ်ရေးအဖွဲ့ဝင် တချို့နဲ့သာ ပြန်လာယူခွင့်ပြုခဲ့ပြီး၊ အဒီနေ့ ညပိုင်းမှာ သေဆုံးသွားခဲ့တာလို့ ဆိုပါတယ်။

သေဆုံးသူ ဦးစိုးမြင့်နိုင်နဲ့ ပတ်သက်ပြီး ပြစ်မှုကျူးလွန်သူတွေကို သက်ဆိုင်ရာက ဖမ်းဆီးအရေးယူပေးဖို့နဲ့ ထိုက်သင့်တဲ့ပြစ်ဒဏ်ပေးဖို့ မိသားစုက လိုလားနေပါတယ်။

အဆိုပါ ကိစ္စနဲ့ပတ်သက်ပြီး ရဲဘော်ဒေါင်းမင်းနဲ့ အဖွဲ့ကို အရေးယူပေးဖို့ ဇုန် ၂ ပလဖ ခေါင်းဆောင်ထံ စက်တင်ဘာလ ပထမအပတ်အတွင်းမှာ သွားရောက်တိုင်ကြားထားပေမယ့် ယနေ့အထိ အရေးယူပေးတာမရှိဘူးလည်း သိရပါတယ်။

အဆိုပါ ကိစ္စနဲ့ပတ်သက်ပြီး ပေါက်မြို့နယ်ပလဖနဲ့ ပကဖထံကို မြေလတ်အသံက ဖုန်းနဲ့ ဆက်သွယ်နေပေမယ့် အဆက်အသွယ်မရသေးသလို မူးယစ်ဆူမှုအပြင် တခြားဥပဒေပုဒ်မတွေနဲ့ ဘာကြောင့် ဖမ်းဆီးခဲ့တယ်ဆိုတာကိုလည်း မြေလတ်အသံအနေနဲ့ သီးခြား အတည်း မပြုနိုင်သေးပါဘူး။

မိတ္ထီလာ၊ စက်တင်ဘာ ၈၊ ၂၀၂၆။

မန္တလေးတိုင်း၊ မိတ္ထီလာမြို့နယ်အပိုင် ရန်ကုန်-မန္တလေး အမြန်လမ်းဘေး မိုင်တိုင် ၂၇၉ အနီးမှာ လူသတ် ကားလုသွားသူက ရဲတပ်သားဖြစ်နေပြီး တရားခံကို ဖမ်းမိထားတယ်လို့ ရဲတပ်ဖွဲ့နဲ့နီးစပ်သူတွေထံက သိရပါတယ်။

ပြစ်မှုကျူးလွန်သူက နေပြည်တော် လူကုန်ကူးမှုတားဆီး နှိမ်နင်းရေးရဲတပ်ဖွဲ့က အသက်၂၃ နှစ်အရွယ် ရဲတပ်သားရဲရင့်အောင်ဆိုသူဖြစ်ပြီး စက်တင်ဘာလ ၇ ရက်နေ့ မနက်ပိုင်းမှာ နေပြည်တော်မှာပဲ ဖမ်းမိခဲ့တာလို့ ဆိုပါတယ်။

“လူကုန်တားက ရဲတပ်သား ရဲရင်အောင်က သေနတ်နဲ့ ပစ်ခတ်သတ်ဖြတ်ပြီး ကားကိုလုသွားတာ။ နေပြည်တော်မှာ မိတာ။ ဖြစ်တာက မိတ္ထီလာ အပိုင်ဆိုတော့ မိတ္ထီလာစခန်းမှာ အမှုဖွင့်ထားတယ်။ နေပြည်တော်ကနေတော့ ဒီဘက်ကို လွဲပြောင်းလာတာတော့ မရှိသေးဘူး။ သေနတ်က အရာရှိသေနတ်ကို ယူလာတာဖြစ်ဖို့များတယ်”လို့ ရဲတပ်ဖွဲ့နဲ့ နီးစပ်သူတဦးက ပြောပါတယ်။

လူသတ်ပစ္စည်းလုယက်မှုနဲ့ ပတ်သက်ပြီး ပြစ်မှုကျူးလွန်သူကိုတော့ မိတ္ထီလာမြို့မရဲစခန်းက (ပ)၁၄၉/၂၀၆၊ ရာဇသတ်ကြီးပုဒ်မ-၃၀၂ ဖြင့် အမှုဖွင့် ထားတယ်လို့ သိရပါတယ်။

စက်တင်ဘာလ ၆ ရက်နေ့ညနေပိုင်းမှာ မိတ္ထီလာမြို့နယ်၊ ကန်ကြီးကုန်းကျေးရွာအနီး ရန်ကုန်-မန္တလေး အမြန်လမ်းဘေး မိုင်တိုင် ၂၇၆ အနီးမှာ အမျိုးသားတဦးသတ်ဖြတ်ခံထားရတဲ့ အနေထားနဲ့ သေဆုံးနေတာကို ကောက်စိုက်ပြီးပြန်လာသူတွေက တွေ့ရှိခဲ့ပါတယ်။

သေဆုံးသူဟာ ဇဗ္ဗူသီရိမြို့နယ်၊ သုခတော်ဝင်အိမ်ရာမှာ နေထိုင်သူအဌားယာဉ်ဝန်ဆောင်မှုလုပ်ငန်းလုပ်ကိုင်သူ အသက် ၃၄ နှစ်အရွယ် ကိုဝင်းကိုဆိုသူဖြစ်ပြီး အဆိုပါ မနက်ပိုင်းမှာ ကားအဌားလိုက်ဖို့ နေအိမ်မှ ထွက်သွားရာမှ ပျောက်ဆုံးနေခဲ့တာဖြစ်ကာ အလောင်းကို တွေ့ရချိန် ဝဲဘက် ဦးခေါင်းဂျိုစောင်းမှာ ရိုက်နှက်ခံထားရလို့ဘ ဦးခေါင်းခွံကြေမွ ပေါက်ပြဲဒဏ်ရာ၊ ယာဘက် မျက်လုံး ညိုမဲဖူးရောင် ဒဏ်ရာတွေနဲ့ ပက်လက်အနေအထား သေဆုံးနေတာကို တွေ့ရှိခဲ့ရတယ်လို့ သိရပါတယ်။

ကိုဝင်းကိုသေဆုံးပြီးနောက် သူမောင်းသွားတဲ့ သူ့ရဲ့ကား 9Q/4825 Hyundai Accent အမျိုးအစားကိုလည်း ပြစ်မှုကျူးလွန်သူက ယူဆောင်သွားခဲ့တာလို့ သိရပါတယ်။

မိတ္ထီလာ၊ စက်တင်ဘာ ၇၊ ၂၀၂၆။

မန္တလေးတိုင်း၊ မိတ္ထီလာမြို့နယ်အပိုင် ရန်ကုန်-မန္တလေး အမြန်လမ်းဘေး မိုင်တိုင် ၂၇၉ အနီးမှာ ရိုက်နှက်သတ်ဖြတ်ခံထားရတဲ့ အမျိုးသား အလောင်းတလောင်းတွေ့ရှိခဲ့တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

သတ်ဖြတ်ခံထားရသူဟာ ဇဗ္ဗူသီရိမြို့နယ်၊ သုခတော်ဝင်အိမ်ရာမှာ နေထိုင်သူ အဌားယာဉ်ဝန်ဆောင်မှုလုပ်ငန်းလုပ်ကိုင်သူ အသက် ၃၄ နှစ်အရွယ် ကိုဝင်းကိုဆိုသူဖြစ်ပြီး စက်တင်ဘာလ ၆ ရက်နေ့ညနေ ၅ နာရီခန့်မှာ သေဆုံးနေတာကို တွေ့ခဲ့ရတယ်လို့ ဆိုပါတယ်။

“ကန်ကြီးကုန်းရွာက ကောက်စိုက်ပြန်လာသူတွေက တွေ့တာ။ အဲတော့သက်ဆိုင်ရာ အုပ်ချုပ်ရေးမှူးကို အကြောင်းကြားတယ်။ အဲဒီကနေတဆင့် ရဲကိုအကြောင်းကြားလို့ သိကြရတာ။ “လို့ ကူညီဆောင်ရွက်ပေးခဲ့သူတဦးကပြောပါတယ်။

အလောင်းကိုတွေ့ရှိချိန်မှာ သေဆုံးသူရဲ့ ဝဲဘက် ဦးခေါင်းဂျိုစောင်းမှာ ရိုက်နှက်ခံထားရလို့ ဦးခေါင်းခွံကြေမွ ပေါက်ပြဲဒဏ်ရာ၊ ယာဘက် မျက်လုံး ညိုမဲဖူးရောင် ဒဏ်ရာတွေနဲ့ ပက်လက်အနေအထား သေဆုံးနေတာကို တွေ့ရှိခဲ့ရတယ်လို့ သိရပါတယ်။

သေဆုံးသူရဲ့ အလောင်းကိုတော့ လူမှုကူညီရေးအသင်းက ကောက်ယူပြီး မိတ္ထီလာပြည်သူ့ဆေးရုံကို တင်ပို့ထားရတယ်လို့ သိရပါတယ်။

သေဆုံးသူဟာ အဆိုပါ မနက်ပိုင်းမှာပင် ကားဌားသူရှိတာကြောင့် နေအိမ်ကနေ ကားနဲ့အတူ ထွက်သွားပြီးနောက် အဆက်အသွယ် မရတာကြောင့် မိသားစုက ရဲတပ်ဖွဲ့ထံ ဆက်သွယ်အကူအညီတောင်းခဲ့ရာမှ ပျောက်ဆုံးသူနဲ့ သေဆုံးသူရဲ့ ပုံစံအချက်အလက်တွေ ကိုက်ညီနေတာကြောင့် သေဆုံးသူဟာ ကိုဝင်းကိုဖြစ်တာကို အတည်ပြုနိုင်ခဲ့တယ်လို့ သိရပါတယ်။

ကိုဝင်းကိုနဲ့အတူ ပါသွားတဲ့ 9Q/4825 Hyundai Accent အမျိုးအစား ကားမှာလည်း ပျောက်ဆုံးနေပြီး စက်တင်ဘာလ ၇ ရက်နေ့မနက်ပိုင်းအထိတော့ တရားခံတွေကို ဖမ်းလို့မမိသေးဘူးလို့ သိရပါတယ်။

မကွေး၊ ဩဂုတ် ၂၀၊ ၂၀၂၆။

မကွေးတိုင်း၊ မကွေးမြို့နယ်၊ ကန်ဦးကျေးရွာမှာ အရက်ကြောင် ကြောင်နေတဲ့ ဖခင်ဖြစ်သူက အသက် ၅ နှစ်အရွယ် သားဖြစ်သူကို ရိုက်နှက်ရာမှ သေဆုံးသွားတယ်လို့ ဒေသခံတွေဆီက သိရပါတယ်။

ဩဂုတ်လ ၁၉ ရက်နေ့မနက် ၈ နာရီခန့်က အဆိုပါကျေးရွာနေ အသက် ၃၄ အရွယ် ဖခင်ဖြစ်သူ ကျော်သူလင်းဆိုသူက အသက် ၅ နှစ်အရွယ် သားဖြစ်သူကို ရွာအပြင်ခေါ်ထုတ်သွားပြီးနောက် သားဖြစ်သူမှာ သေဆုံးသွားတယ်လို့ ဆိုပါတယ်။

“ရွာခံတွေပြောပြချက်အရ ဖအေလုပ်တဲ့သူက အရက်ကြောင် ကြောင်နေတာ။ ကလေးကိုခေါ်သွားပြီး ကိုင်ပေါက်တာ၊ လည်ပင်းညှစ်တာနဲ့ တုတ်နဲ့ ရိုက်နှက်တာတွေ လုပ်ခဲ့တာ”လို့ ဒေသခံတဦးက ပြောပါတယ်။

ဖခင်ဖြစ်သူရဲ့ ရိုက်နှက်တာကိုခံရလို့ ကလေးငယ်မှာ ဦးခေါင်း၊ လည်ပင်းနဲ့ နဖူးအပါအဝင် ခန္ဓာကိုယ်တွေမှာ ဒဏ်ရာတွေရရှိပြီး နေရာမှာပင် သေဆုံးသွားတာလို့ ပြောပါတယ်။

သေဆုံးသွားတဲ့ကလေးငယ်ရဲ့အလောင်းကိုတော့ ဒေသလူမှုကူညီရေးအသင်းတွေက ကောက်ယူပြီး မကွေးပြည်သူ့ဆေးရုံကို ပို့ဆောင်ခဲ့ပြီးနောက် လိုအပ်တဲ့စစ်ဆေးမှုပြုလုပ်ကာ နေအိမ်ကို ပြန်ပို့လိုက်ကြတယ်လို့ သိရပါတယ်။

ဖခင်ဖြစ်သူမှာ အရက်သေစာကို နေ့စဉ်သောက်ပြီး မူးလာတိုင်း အိမ်ရှိမိသားစုဝင်တွေကို ပြဿနာရှာပြီး အကြောင်းမဲ့ ရိုက်နှက်တတ်သူလို့လည်း သိရပါတယ်။

သားဖြစ်သူကို သေစေအောင် ရိုက်နှက်ခဲ့တဲ့ ဖခင်ဖြစ်သူကိုတော့ ကျေးရွာအုပ်ချုပ်ရေးအဖွဲ့နဲ့ ရဲတွေက ဖမ်းဆီးပြီး မကွေးရဲစခန်းမှာ ထိန်းသိမ်းထားတယ်လို့ သိရပါတယ်။

ပဲခူး၊ ဩဂုတ် ၅၊ ၂၀၂၆။

ပဲခူးတိုင်း၊ ပဲခူးမြို့၊ မဇင်းရပ်ကွက်ရှိ အောင်သိုက်ကန်ဘုန်းကြီးကျောင်းမှာ သံဃာအချင်းချင်း စကားများရန်ဖြစ်ပြီး ဓားနဲ့ခုတ်လို့ တပါးပျံလွန်တော်မူတယ်လို့ ကျောင်းတိုက်နဲ့ နီးစပ်သူတွေထံက သိရပါတယ်။

ဩဂုတ်လ ၄ ရက်နေ့ည ၁၁ နာရီခန့်ကကျောင်းတိုက်နေ သက်တော် ၇၆ နှစ်အရွယ် ဦးနန္ဒဝံသ (ခ) ဦးတင်လှိုင်ကို သက်တော် ၄၀ ကျော်အရွယ်ရှိ ဦးမာဏိတ (ခ) မျိုးဇော်က ထင်းခုတ်ဓားမနဲ့ ခုတ်သတ်ခံတာလို့ ဆိုပါတယ်။

“သူတို့ရန်ဖြစ်ပြီး ဓားခုတ်မှုဖြစ်တာသိရတဲ့အချိန်သွားကြည့်တော့ တပါးကလဲနေပြီ။ ဘယ်လိုအကြောင်းကြောင့် ရန်ဖြစ်တယ်တော့သေချာမသိရဘူး။ သိတဲ့အချိန်သွားတော့ ဓားနဲ့ ခုတ်တဲ့တပါးကို ရဲတွေကဖမ်းသွားပြီ”လို့ ကျောင်းတိုက်နဲ့ နီးစပ်သူတဦးက ပြောပါတယ်။

ဓားနဲ့ခုတ်ခံရလို့ ဦးနန္ဒဝံသ (ခ) ဦးတင်လှိုင်မှာ ဦးခေါင်းနဲ့လည်ပင်း၊ လက်တွေမှာပြရှဒဏ်ရာတွေရထားလို့ မြို့ခံလူမှုကူညီရေးအသင်းတွေက ပဲခူးဆေးရုံကို ပို့ဆောင်ပေးခဲ့ရာ အခြေနေစိုးရိမ်ရတာကြောင့် ရန်ကုန်ပြည်သူ့ဆေးရုံကို လွှဲပြောင်းစဥ် ပျံလွန်တော်မူသွားတယ်လို့ သိရပါတယ်။

ဓားနဲ့ခုတ်သူ ဦးမာဏိတ (ခ) မျိုးဇော်ကိုတော့ အမှတ် ၂ နယ်မြေရဲစခန်းကနေ လူဝတ်လဲ ဖမ်းဆီးထားတယ်လို့ သိရပါတယ်။

ဓားနဲ့ခုတ်သူ ဦးမာဏိတ (ခ) မျိုးဇော်ဟာ အောင်သိုက်ကန်ဘုန်းကြီးကျောင်းမှာ ရဟန်းဝတ်ထားတာ ၂ ဝါခန့်ရှိပြီး၊ ပျံလွန်တော်မူသွားတဲ့ ဦးနန္ဒဝံသ (ခ) ဦးတင်လှိုင်က ၁၆ ဝါရှိပြီလို့ သိရပါတယ်။

ဇူလိုင်လ ၁၇ ရက်နေ့ကလည်း ပဲခူးမြို့၊ ဥဿာမြို့သစ် ၈ ရပ်ကွက်၊ တက္ကသိုလ်ဘုရားလမ်းမှာလည်း လင်မယားချင်း စကားများရန်ဖြစ်ရာ အမျိုးသားမှာ အမျိုးသမီးဖြစ်သူကို ဓားနဲ့ထိုး ငရုတ်ကျည်ပွေ့နဲ့ထုလို့ သေဆုံးခဲ့တယ်လို့ သိရ​ပါတယ်။

ဓာတ်ပုံ – ဓားနဲ့ခုတ်သူ ဦးမာဏိတ (ခ) မျိုးဇော်

မကွေး၊ ဩဂုတ် ၃၊ ၂၀၂၆။

မကွေးတိုင်း၊ မကွေးမြို့နယ်၊ ယင်းသာစည်(န)ကျေးရွာမှာ လယ်ထွန်စက်ပေါ်ကနေ ပြုတ်ကျပြီး ကားဘီးနဲ့နင်းကာ စက်သွားနဲ့ ခုတ်မိလို့ အမျိုးသား ၁ ဦးသေဆုံးသွားတယ်လို့ ဒေသခံတွေထံက သိရပါတယ်။

သေဆုံးသူဟာ အသက် ၄၂ နှစ်အရွယ် ကိုသန်းဝင်အောင်ဖြစ်ပြီး ဩဂုတ်လ ၂ ရက်နေ့မနက် ၆ နာရီခန့်မှာ ကျေးရွာအနီး လယ်ကွင်းမှာ လယ်ထွန်နေစဥ် ပြုတ်ကျပြီး သေဆုံးခဲ့တာလို့ဆိုပါတယ်။

“သူက မောင်းတာမဟုတ်ဘူး။ မောင်းတက တယောက် သူကဘေးက ထိုင်လိုက်တာ။ အိပ်ငိုက်ပြီး ပြုတ်ကျသွားတာ။ စက်ယန္တရားဆိုတော့ ကားတွေလို ချက်ချင်းဘရိတ်အုပ်လို့မရ၊ လည်ပတ်နေချိန်ဆိုတော့ ရပ်မရပဲဖြစ်သွားတာ။ ပြုတ်ကျချိန် အရင်ဆုံးဘီးနဲ့ နင်းမိတယ်။ အနောက်က ဓားသွားစက်နဲ့လည်း ခုတ်မိတာ”လို့ ဒေသခံတဦးက ပြောပါတယ်။

လယ်ထွန်စက်ကြိတ်မိပြီး ထွန်စက်ဓားသွားတဲ့ခုတ်မိတာကြောင့် ကိုသန်းဝင်းအောင်မှာ ဦးခေါင်းကြေမွကာ ဝမ်းဗိုက်ပွင့်ထွက်ပြီး အဲ့ဒီဒဏ်ရာတွေနဲ့နေရာမှာပဲ သေဆုံးသွားတာလို့ သိရပါတယ်။

သေဆုံးသွားသူရဲ့အလောင်းကိုတော့ ဒေသလူမှုကူညီရေးအသင်းတွေကကောက်ယူပြီး မကွေးပြည်သူ့ဆေးရုံကို ပို့ဆောင်ပေးခဲ့ရကာ လိုအပ်တဲ့စစ်ဆေးမှုပြုလုပ်ပြီး နေ့ချင်းပင် နေအိမ်ပြန်သယ်လာက နာရေးပြုလုပ်ကြရတယ်လို့ သိရပါတယ်။

မန္တလေး၊ ဇူလိုင် ၂၄၊ ၂၀၂၆။

မန္တလေးတိုင်း၊ ချမ်းမြသာစည်မြို့နယ်က မီလျံနာရွှေဆိုင် ဓားပြတိုက်မှုမှာ ပြစ်မှုကျူးလွန်သူ ၆ ဦးကို ဖမ်းမိထားတယ်လို့ ဖြစ်စဥ်ကိုသိထားတဲ့ မြို့ခံတွေထံက သိရပါတယ်။

ဓားပြတိုက်မှုဖြစ်ပွားပြီး ၂ ရက်အကြာ ဇူလိုင်လ ၂၂ ရက်နေ့မှာ ပြစ်မှူကျူးလွန်သူတွေအနက် ၂ ဦးကို တံတားဦးမြို့အပိုင် အမြန်လမ်းပေါ်မှာ ဖမ်းမိခဲ့ပြီးနောက် ကျန် ၄ ဦးကို ဇူလိုင်လ ၂၃ ရက်နေ့က ထပ်မံဖမ်းဆီးနိုင်ခဲ့တာလို့ ဆိုပါတယ်။

“အမြန်လမ်းမှာ နှစ်ယောက်မိပြီးတော့ နောက်နှစ်ယောက်ကို စစ်ကိုင်းသွားမယ့်လမ်းပေါ်မှာ ထပ်မိတယ်။ တယောက်က တံလျှပ်မော်တောင်ရပ်ကွက်က တည်းခိုခန်းတခုမှာ မိတာ။ နောက်တယောက်ကိုလည်း မြို့ထဲမှာ ထပ်မိတာ။ နောက်ဆုံးတယောက်က သေနတ်ကိုင်တဲ့တယောက်ပါ”လို့ ဖြစ်စဥ်ကိုသိထားတဲ့ မြို့ခံတဦးက ပြောပါတယ်။

ပြစ်မှူကျူးလွန်သူ ၆ ဦးအနက် ၄ ဦးဟာ မန္တလေးဇာတိတွေဖြစ်ပြီး ၂ ဦးက စစ်ကိုင်းဇာတိတွေဖြစ်ကာ ၆ ဦးအနက် ၄ ဦးဟာ ခိုးမှု၊ ဓားပြမှုတွေနဲ့ ထောင်ကျဖူးသူတွေဖြစ်တယ်လို့ ဆို​ပါတယ်။

လက်ရှိမှာတော့ ပြစ်မှူကျူးလွန်သူတွေကို မန္တလေးတိုင်း ရဲတပ်ဖွဲ့ရုံးမှာ ထိန်းသိမ်းထားပြီး စစ်ဆေးနေတယ်လို့ သိရပါတယ်။

ဓားပြတိုက်မှု ကျူးလွန်သူ ၆ ဦးကိုဖမ်းမိထားပေမယ့် ပြစ်မှူကျူးလွန်ချိန်က အသုံးပြုခဲ့တဲ့သေနတ်တလက်နဲ့ ရွေထည်အချို့ကိုသာ ပြန်လည်သိမ်းဆည်းရမိထားသေးပြီး ရွှေထည်ပစ္စည်းအများစုကိုတော့ ပြစ်မှူကျူးလွန်သူတွေကိုစစ်ဆေးပြီး သက်သေခံအဖြစ်သိမ်းဆည်းနိုင်ဖို့ ရဲအဖွဲ့က ဆောင်ရွက်နေတယ်လို့ သိရပါတယ်။

ဇူလိုင်လ ၂၀ ရက်နေ့ ည​နေ ၃ နာရီကျော်ခန့်မှာ ချမ်းမြသာစည်မြို့နယ်၊ ၁၁၀ လမ်း၊ ၆၂ လမ်းနဲ့ ၆၄ လမ်းကြားမှာတည်ရှိတဲ့ မီလျံနာရွှေဆိုင်ကို ဆိုင်ကယ် ၃ စီးနဲ့ အမျိုးသား ၆ ဦးပါတဲ့ ဓားပြတွေဟာ ပစ္စတိုသေနတ်တလက်နဲ့ရောက်လာပြီး သေနတ်တချက်ပစ်ဖောက်ကာ ဆိုင်ဝန်ထမ်းကို ရိုက်နှက်ပြီး ရွှေထည်ပစ္စည်းမျိုးစုံ တပိဿာကျော်ကို ယူဆောင်သွားတယ်လို့ သိရပါတယ်။

မန္တလေး၊ ဇူလိုင် ၂၁၊ ၂၀၂၆။

မန္တလေးတိုင်း၊ ချမ်းမြသာစည်မြို့နယ်၊ ၁၁၀ လမ်း၊ ၆၂ လမ်းနဲ့ ၆၄ လမ်းကြားမှာတည်ရှိတဲ့ မီလျံနာရွှေဆိုင် ဓားပြတိုက်ခံရပြီး ရွှေတပိဿာကျော် ပါသွားတယ်လို့ မြို့ခံတွေထံက သိရပါတယ်။

ဇူလိုင်လ ၂၀ ရက်နေ့ ည​နေ ၃ နာရီကျော်ခန့်မှာ ဆိုင်ကယ် ၃ စီးနဲ့ အမျိုးသား ၆ ဦးပါတဲ့ ဓားပြတွေက ဆိုင်ကိုဝင်စီးပြီး ရွှေတွေကိုယူသွားတာလို့ဆိုပါတယ်။

“သေနတ်အတိုတလက်ပါတယ်။ တချက်ဖောက်ပြီးတော့ ဆိုင်ထဲဝင်လာတယ်။ ဆိုင်ကယ်ဦးထုပ်တွေ ဆောင်းထားတယ်။ ကောင်တာကိုရိုက်ခွဲပြီး ရွှေတွေယူပြီးချက်ချင်းပြန်ထွက်သွားတာ။ မိနစ်ပိုင်းလေးပဲကြာတယ်။ မြန်တယ်။ ရွှေဆိုင်ကလည်း ကာစတန်မာတွေသိပ်မရှိတဲ့ဆိုင်ဆိုတော့”လို့ ဖြစ်စဥ်ကိုသိတဲ့ မြို့ခံတဦးက ပြောပါတယ်။

ဓားပြတိုက်ခံရလို့ ရွှေဆိုင်အတွင်းက ရွှေလက်ကောက်၊ လက်စွပ်၊ နားကပ်ပုံစံမျိုးစုံ တပိဿာကျော်ပါသွားတယ်လို့ ဆိုပါတယ်။

ဒါ့အပြင် ဓားပြတွေက သေနတ်ဒင်နဲ့ထုခဲ့လို့ ဆိုင်ဝန်ထမ်းအမျိုးသား ၁ ဦး ဒဏ်ရာ (မစိုးရိမ်ရ) ရခဲ့ကာ ဓားပြတိုက်ခံရချိန်မှာ ဆိုင်ရှင်အပြင် ဆိုင်ဝန်ထမ်း အမျိုးသား ၄ ဦးနဲ့အမျိုးသမီး ၂ ဦးရှိနေပေမယ့် ပြန်လည်မခုခံနိုင်ပဲ ဓားပြတွေက လွတ်မြောက်သွားပါတယ်။

ရွှေဆိုင်ဓားပြတိုက်ခံရပြီးနောက် စစ်ကောင်စီအဖွဲ့တွေလာရောက်စစ်ဆေးသွားပေမယ့် ဇူလိုင်လ ၂၁ ရက်နေ့အထိ ဓားပြတွေကို ဖမ်းမမိသေးဘူးလို့ သိရပါတယ်။

ဇွန်လ ၂၀ ရက်နေ့ကလည်း ကြို့ပင်ကောက်မြို့၊ စျေးချိုမြောက်ရပ်ကွက်၊ မြို့မစျေးရှိ မြမြင့်မိုရ်ရွှေဆိုင်ပိုင်ရှင် အသက် ၅၇ ဦးဝင်းလွင်ဆိုသူ ပစ်သတ်ခံရလို့ သေဆုံးသွားသေးတယ်လို့ သိရပါတယ်။