အလောင်းကို မြွေရေခွံအိတ်နဲ့ထုပ်ပြီး စွန့်ပစ်ခံထားရ

မိတ္ထီလာ၊ ဇွန် ၁၁၊ ၂၀၂၅။

မန္တလေးတိုင်း၊ မိတ္တီလာမြို့နယ်၊ ဒဟတ္တန်းကျေးရွာမှာ နေအိမ်ကနေ ၄ ရက်ကြာပျောက်နေတဲ့ အသက် ၉ နှစ်အရွယ် မိန်းကလေးငယ် သေဆုံးလျက်ပြန်တွေ့ခဲ့တယ်လို့ ဒေသခံတွေဆီကသိရပါတယ်။

သေဆုံးသူဟာ အသက် ၉ နှစ်အရွယ် Grade 3 ကျောင်းသူ မနှင်းရတီ ဖြစ်ပြီး ဇွန် ၁၁ ရက် မနက် ၉ နာရီခန့်မှာ ကျေးရွာသုသာန်အနီး မြေရေခွံအိတ်အတွင်းမှာထုပ်လျက်အနေထားနဲ့ သေဆုံးနေတာကို တွေ့ရတယ်လို့ ဆိုပါတယ်။

“ဆိတ်ကျောင်းသွားတဲ့ ဦးလေးကြီးက ပုပ်စော်နံနေတာဆိုတော့ တိရစ္ဆာန်တွေပစ်ထားလား ဆိုပြီးသွားကြည့်တာ။ ဖိနပ်ကလေးတွေတော့ ရွာကလူတွေလှမ်းခေါ်လိုက်တာ။ လာကြည့်ကြတော့မှာ အိတ်ထဲမှာ ကလေးအလောင်းကို တွေ့ရတာ။ အိတ်ထဲထည့်ခံထားရတယ်ဆိုတော့ အသတ်ခံရတဲ့ ပုံစံတော့ ရှိမယ်”လို့ ရွာခံတဦးကပြောပါတယ်။

ကလေးငယ်ရဲ့အလောင်းကို ပြန်တွေ့ရချိန်မှာ ပုပ်ပွနေပြီးဖြစ်တာကြောင့် အသတ်ခံထားရတဲ့ အခြေအနေနဲ့ပတ်သက်ပြီး ဘယ်လိုနည်းလမ်းနဲ့သတ်ထားတယ်ဆိုတာ အဖြေရှာလို့မရသေးဘူးလို့ ဆိုပါတယ်။

အဆိုပါ မိန်းကလေးငယ်သေဆုံးမှုနဲ့ပတ်သက်ပြီး တရားခံကို ဖမ်းဆီးရမိဖို့ရဲဘက်က စုံစမ်းစစ်ဆေးနေကာ အလောင်းကိုလည်း မိတ္ထီလာဆေးရုံကို သယ်ယူစစ်ဆေးမှုလုပ်နေပြီး ဆေးစစ်ချက် အဖြေကတော့ မရသေးဘူးလို့ဆိုပါတယ်။

ဇွန် ၇ ရက်ညနေ ၃ နာရီကျော်ကတည်းက မနှင်းရတီဟာ နေအိမ်ကနေ ကျေးရွာစာသင်ကျောင်းအနီးမှာ ကစားမယ်ဆိုပြီး အိမ်ကထွက်သွားရာမှ နေအိမ်ကို ပြန်ရောက်မလာဘဲ ပျောက်ဆုံးနေခဲ့တာပါ။

ကလေးငယ်ရဲ့ မိဘတွေက ထိုင်းမှာအလုပ်လုပ်နေတာကြောင့် အဖွားဖြစ်သူ၊ အကိုဖြစ်သူတို့နဲ့ နေထိုင်ပြီး ကျေးရွာထဲမှာ နေ့စဥ်ကျောင်းဆင်းချိန်တိုင်း ထွက်ကစားလေ့ရှိတယ်လို့လည်း သိရပါတယ်။

စာတည်း – လင်း

ပျော်ဘွယ်၊ ဇွန် ၁၁၊ ၂၀၂၅။

မန္တလေးတိုင်း၊ ပျော်ဘွယ်မြို့မြောက်ဘက်အထွက် နီလာရိုးမစက်သုံးဆီဆိုင်အနီး ရန်ကုန်-မန္တလေး လမ်းပိုင်းမှာ ကားက ဆိုင်ကယ်ကိုဝင်တိုက်ခဲ့တာကြောင့် ၂ ဦးသေပြီး ၃ ဦးဒဏ်ရာရတယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဇွန် ၁၀ ရက်ညနေ ၃ နာရီခန့်မှာ ပျော်ဘွယ်မြို့ဘက်နေ မန္တလေးဘက်ကို ဦးတည်ပြီးမောင်းလာတဲ့ ဆိုင်ကယ်ကို နောက်ကမောင်းလာတဲ့ လိုက်ထရပ်ယာဥ်က ကျော်တက်ရာမှာ ယာဥ်တိုက်မှုဖြစ်ခဲ့တာလို့ ဆိုပါတယ်။

“ကားက ဆိုင်ကယ်ကိုတိုက်ပြီးတော့ ကားရှေ့အောက်ထဲ ဆိုင်ကယ်ကဒရွတ်တိုက်ပါသွားတာ။ ကားက လမ်းဘေးထိုးကျတိမ်းမှောက်နေတယ်။”လို့ ကူညီကယ်ဆယ်ရေးပြုလုပ်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် ဆိုင်ကယ်စီးလာတဲ့ ပျော်ဘွယ်မြို့နယ်၊ ဧကရာဇ်ကုန်းအုပ်စု၊ ရေလယ်ကွေ့ ကျေးရွာမှာနေထိုင်သူ အသက် ၂၀ အရွယ် အမျိုးသား ၂ ဦးတို့ နေရာတင်သေဆုံးခဲ့တယ်လို့ ဆိုပါတယ်။

ဒါ့အပြင်လိုက်ထရပ်ယာဥ်ပေါ်မှာလိုက်ပါလာတဲ့ ပျော်ဘွယ်မြို့မှာနေထိုင်သူ အမျိုးသား ၃ ဦး ဒဏ်ရာရခဲ့ပြီး ပျော်ဘွယ်မြို့နယ်ဆေးရုံကို ပို့ဆောင်ထားရတယ်လို့ ကူညီကယ်ဆယ်ရေးလုပ်ပေးခဲ့သူက ပြောပါတယ်။

သေဆုံးသွားသူ ၂ ဦးရဲ့အလောင်းတွေကိုတော့ ဇွန် ၁၁ ရက်မှာ ဆေးရုံကနေနေအိမ်ပြန်သယ်ပြီး နာရေးပြုလုပ်သွားမယ်လို့ သိရပါတယ်။

မေ ၉ ရက်ကလည်း ပဲခူးတိုင်း၊ ရေတာရှည်မြို့နယ်၊ ရေတာရှည်မြို့နဲ့ ကေတုမတီမြို့သစ်ကြား မြောက်နမ်ချွန်ကျေးရွာအနီး ရန်ကုန်-မန္တလေး လမ်းဟောင်းမှာ ဆီဘောက်ဆာ ၂ စီးတိုက်ပြီး ၃ ဦးသေ ၄ ဦးဒဏ်ရာရတယ်လို့ သိရပါတယ်။

စာတည်း – လင်း

မန္တလေး၊ ဇွန် ၁၀၊ ၂၀၂၅။

မန္တလေးမြို့၊ အောင်မြေသာစံမြို့နယ်၊ ၁၂ လမ်း၊ ၇၂ ×၇၃ လမ်းကြားအနီးကျုံးအတွင်း အမျိုးသား ၁ ဦး သေဆုံးနေပြီး အလောင်းပိုင်ရှင်မပေါ်သေးဘူးလို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

ဇွန် ၉ ရက် ယမန်နေ့မနက် ၇ နာရီခန့်မှာ ကျုံးအတွင်း အသက် ၅၀ ဝန်းကျင်အရွယ်အမျိုးသား အလောင်း ၁ လောင်းပေါ်နေကြောင်း တွေ့ရှိသူတွေက အကြောင်းကြားတာကြောင့် သွားရောက်ဆယ်ယူခဲ့ပြီး သေဆုံးသူနဲ့ပတ်သက်တဲ့အချက်အလက်တွေမသိရဘူးလို့ ဆိုပါတယ်။

” ဒဏ်ရာဒဏ်ချက်ဘာညာတော့မရှိဘူး။ ရေနစ်သေဆုံးတဲ့ပုံစံပါဘဲ။ မနက်လမ်းလျှောက်တဲ့သူတွေက အလောင်းကိုတွေ့ကြတာ။ ညကတည်းက ပြုတ်ကျပြီးသေတာဖြစ်လောက်တယ်”လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

သေဆုံးအမျိုးသားရုပ်အလောင်းကို မန္တလေးဆေးရုံကြီးကို ပို့ဆောင်ပေးခဲ့ပြီး၎င်းနဲ့ပတ်သက်တဲ့ အချက်အလက်တွေ မသိရသေးသလို ဇွန် ၁၀ ရက် ဒီကနေ့မနက်ပိုင်းထိ အလောင်းပိုင်ရှင်မပေါ်သေးဘူးလို့ ဆိုပါတယ်။

ဇန်နဝါရီ ၁၁ ရက်နေ့ကလည်း အောင်မြေသာစံမြို့နယ်၊ ၁၂ လမ်း၊ ၇၄×၇၅လမ်းကြားရှိ ကျုံးထဲကို အမျိုးသမီးတဦးခုန်ချခဲ့ရာမှ ရေနစ်သေဆုံးခဲ့တယ်လို့ သိရပါတယ်။

စာတည်း – ဟိန်းစံ

မန္တလေး၊ ဇွန် ၇၊ ၂၀၂၅။

မန္တလေးတိုင်း၊ ချမ်းအေးသာစံမြို့နယ်၊ ပြည်ကြီးပျော်ဘွယ်အနောက်ရပ်ကွက်၊ ၈၇ လမ်း၊ ၃၃ လမ်းနဲ့ ၃၄ လမ်းကြားက လူစည်ကားရာနေရာမှာ အမျိုးသမီး ၁ ဦး ဓားနဲ့ခုတ်၊ ငွေလုခံရတယ်လို့ ဒေသခံတွေဆီက သိရပါတယ်။

ဇွန် ၆ ရက်နေ့လယ် ၁ နာရီခန့်မှာ စစ်ကိုင်းမြို့နေ့ အသက် ၂၃ နှစ်အရွယ်အမျိုးသမီးဟာ ဖြစ်စဥ်နေရာ အနီးက ငွေလွှဲဆိုင်တဆိုင်ကနေ ငွေထုတ်ပြီးအပြန်မှာ လုယက်ခံရတာလို့ ဆိုပါတယ်။

“သူက ငွေလွှဲဆိုင်ကနေ ထွက်လာတာကို ဓားနဲ့ခုတ်တာ။ ကောင်မလေးလက်မောင်းကတော့ ထုတ်ချင်းပေါက်သွားတယ်။ တရားခံကမမိသေးဘူး။ ဓားနဲ့ခုတ်သွားတဲ့သူတွေက ဘယ်နှစ်ဦးလည်းဆိုတာတော့ မသိရသေးဘူး”လို့ ဒေသခံတဦးကပြောပါတယ်။

ဓားနဲ့ခုတ်ခံရသူ အမျိုးသမီးငယ်မှာ စိုးရိမ်ရတာကြောင့် မန္တလေးပြည်သူ့ဆေးရုံကို ဒေသလူမှုကူညီရေး အသင်းတွေက ပို့ဆောင်ပေးထားရပြီး လုယက်ခံရလို့ ငွေကျပ် သိန်း ၃၀ ပါသွားတယ်လို့ ဆိုပါတယ်။

ဇွန် ၇ ရက်ထိ ဓားနဲ့ခုတ်ခံရတဲ့ အမျိုးသမီးငယ်က ဆေးရုံမဆင်းရသေးဘဲ ဆေးကုသမှု ဆက်လက်ခံယူနေရပေမယ့် အသက်အန္တရာယ်ကတော့မစိုးရိမ်ရတော့ဘူးလို့ သိရပါတယ်။

ဓားခုတ်မှုဖြစ်တဲ့နေရာက ငွေလွှဲဆိုင်ရဲ့ မျက်စောင်းထိုးလောက်အနေထားသာရှိပြီး လူသွားလူလာ အမြဲတမ်းရှိနေတဲ့လမ်းဖြစ်ကာ လုယက်သူကိုလည်းမဖမ်းမိသေးဘူးလို့ ဒေသခံကပြောပါတယ်။

ဧပြီ ၂၈ ရက်ကလည်း ချမ်းမြသာစည်မြို့နယ်၊ အောင်ပင်လယ်ရပ်ကွက်၊ ၁၀၃×၁၀၄ လမ်းကြား၊ ၅၅ လမ်းပေါ်ရှိ “ရွှေဇာမဏီ”ရွှေဆိုင်ဓါးပြတိုက်ခံရပြီး ရွှေ ၂၀ ကျပ်သားကျော်ပါသွားတယ်လို့ သိရပါတယ်။

စာတည်း – လင်း

နာရေးကိုလူထောင်ချီလိုက်ပို့သင်္ဂြိုဟ်ခဲ့

ညောင်လေးပင်၊ ဇွန် ၆၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ ကြံဘိုကျေးရွာကနေ ညောင်လေးပင်မြို့ပေါ်ကို ကျောင်းသုံးပစ္စည်းသွားဝယ်တဲ့ ဆရာမနဲ့ကျောင်းသား ရွာကိုပြန်ချိန် ယာဥ်တိုက်မှုဖြစ်ပြီးသေဆုံးခဲ့တယ်လို့ ဒေသခံတွေဆီက သိရပါတယ်။

ဇွန် ၁ ရက် ညနေ ၄ နာရီခန့်မှာ ကြံဘိုရွာ အလက ကျောင်းက အသက် ၃၄ နှစ်အရွယ် ဆရာမ ဒေါ်ပြည့်ပြည့်ဖြိုးဝေအောင်နဲ့ G 9 ကျောင်းသား ၁၆ နှစ်အရွယ် ဖြိုးမောင်မောင်တို့ဟာ ညောင်လေးပင်မြို့ ကနေ ကြံဘိုကျေးရွာကိုဆိုင်ကယ်နဲ့ပြန်လာချိန် ဌက်ပျောတောလမ်း၊ ဂျပန်တံတား စစ်တပ်ဂိတ်အနီး အရောက်မှာ ကားတစီးကဝင်တိုက်ခဲ့တာလို့ ဆိုပါတယ်။

“သူကလည်းအရင်ကတည်းက ဘယ်ကျောင်းသားဖြစ်ဖြစ် လိုအပ်တဲ့အဝတ်အစားတွေကအစဝယ် ပေးနေကြ။ ဘယ်ကျောင်းသားအပေါ်ဖြစ်ဖြစ်သဘောကောင်းတယ်။ ရွာကလည်းသူ့ကိုချစ်ကြတယ်။ ဆရာမတွေကလည်း အကုန်ခင်တယ်။ သဘောလည်းကောင်းတယ်။ ခုလည်း ကျောင်းသားအတွက် ထီးနဲ့ဖိနပ်ဝယ်ပေးဖို့ခေါ်လာတာ။ အပြန်မှာဖြစ်တာ”လို့ ဒေသခံတဦးကပြောပါတယ်။

ယာဥ်တိုက်မှုဖြစ်ချိန် ကားနဲ့ဆိုင်ကယ်ကချိတ်ပါသွားပြီး ဆရာမက နေရာတင်ပွဲချင်းပြီးသေဆုံးကာ ကျောင်းသားကတော့ ညောင်လေးပင်ဆေးရုံရောက်မှ သေဆုံးသွားတယ်လို့ ဆိုပါတယ်။

ဆရာမဟာ အိမ်ထောင်ပြုထားတာ ၁ နှစ်ခန့်သာရှိသေးပြီး ထိုင်းမှာအလုပ်လုပ်နေတဲ့ အမျိုးသားဖြစ်သူ နာရေးကိုပြန်လာဖို့စောင့်နေတဲ့အတွက် ဇွန် ၅ ရက်နေ့လယ် ၁၂ နာရီဝန်းကျင်မှ ကျေးရွာသုသာန်မှာ ဆရာမနဲ့ကျောင်းသားတို့ရဲ့ နာရေးကို တချိန်တည်းပြုလုပ်ခဲ့တယ်လို့ သိရပါတယ်။

ဆရာမဒေါ်ပြည့်ပြည့်ဖြိုးဝေအောင်ဟာ လူချစ်လူခင်ပေါသူဖြစ်ပြီး ကျောင်းအတွက်လိုအပ်တာရှိပါက ကိုယ်တိုင်ငွေကြေးစိုက်ထုတ်လုပ်ကိုင်တာ၊ ချို့တဲ့ တဲ့ ကျောင်းသားကျောင်းသူတွေအတွက်လည်း ကျောင်းသုံးပစ္စည်းတွေကို ဝယ်ပေးတတ်သူဖြစ်တယ်လို့ ဆိုပါတယ်။

နာရေးကိုလည်းလူထောင်နဲ့ချီလိုက်ပို့ခဲ့ကြပြီး ၂ ဦးစလုံးကိုတော့ ကျေးရွာသုသာန်မှာပင် ဂူသွင်းသင်္ဂြိုဟ်ခဲ့တယ်လို့ ဆိုပါတယ်။

“ကျောင်းသားတွေမှန်သမျှက ဆရာမရဲ့စိတ်ဓာတ်ကိုသိကြတယ်။ ဆရာမကလည်း သဘောတကယ်ကောင်းတာ။ ကလေးတွေကငိုနေတာကလည်း သရုပ်ဆောင်နေကြတာမဟုတ်ဘူး။ သူတို့ဟာသူတို့ သဘာဝကို ငိုနေကြတာ။ တကယ်ငိုတာ။ သူတို့ဆရာမကိုတကယ်ချစ်ကြတာ။ ဆရာမကလည်း အကုန်လုံးကိုချစ်ကြတာ။ တနယ်လုံးချစ်ကြတာ”လို့ သူကဆက်ပြောပါတယ်။

ယာဥ်တိုက်မှုနဲ့ပတ်သက်ပြီး ကားမောင်းသူကို ရဲကဖမ်းထားတယ်လို့သိရကြောင်း အထက်ပါဒေသခံက ပြောဆိုပြီး ဒီအခြေအနေတွေနဲ့ပတ်သက်တဲ့ နောက်ဆက်တွဲကိုတော့မြေလတ်အသံက သီးခြားအတည် မပြုနိုင်သေးပါဘူး။

စာတည်း – လင်း

မိတ္ထီလာ၊ ဇွန် ၂၊ ၂၀၂၅။

မန္တလေးတိုင်း၊ မိတ္ထီလာမြို့နယ်၊ ဖလန်ကျင်းကျေးရွာအနီး၊ မိတ္ထီလာ-ကျောက်ပန်းတောင်လမ်းမှာ ခရီးသည်တင်ကားတိမ်းမှောက်ပြီး အမျိုးသမီး ၆ ဦးသေဆုံးကာ ၁၁ ဦးဒဏ်ရာရတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

ဇွန် ၂ ရက်မနက် ၂ နာရီခန့်မှာ ရန်ကုန်ဘက်ကနေ ချောက်ဘက်ကို ခရီးသည် ၁၉ ဦးတင်ဆောင်ပြီး မောင်းနှင်လာတဲ့ Elite ခရီးသည်တင်ကားဟာ ကားလမ်းမိုင်တိုင်အမှတ် ၁၄ မိုင် ၃ ဖာလုံကျော်အရောက်မှာ တိမ်းမှောက်ခဲ့တာလို့ဆိုပါတယ်။

“ကားက စလစ်ဖြစ်ပြီးတော့ ယာဥ်မောင်းကထိန်းရင်းနဲ့ ဘယ်ဘက်ခြမ်းကို မှောက်သွားတာ။ မိုးကတော့ အစောပိုင်းလေးက ကျထားတာရှိတယ်။ လမ်းတွေကလည်း အကွေ့အကောက်ရှိတယ်။ မိုးရွာထားတာရယ် Speed လေးလည်းနည်းနည်း ပါလာတယ်ထင်ပါတယ်။”လို့ ကူညီကယ်ဆယ်ရေး လုပ်ဆောင်ပေးခဲ့သူတဦးကပြောပါတယ်။

သေဆုံးဒဏ်ရာရသူတွေက ဘယ်ဒေသခံတွေဖြစ်တယ်ဆိုတာကိုတော့ လတ်တလောမှာ စာရင်းကောက်ယူထားရတာမျိုးမရှိဘူးလို့ အထက်ပါ ကူညီကယ်ဆယ်ရေးလုပ်ဆောင်ပေးခဲ့သူက ဆက်ပြောပါတယ်။

ယာဥ်တိမ်းမှောက်တာကြောင့် ယာဥ်ပေါ်ပါ ခရီးသည်တွေအနက် အသက် ၆၁ နှစ်အရွယ် ဒေါ်လှကြိုင်၊ ၆၀ နှစ်အရွယ် ဒေါ်တင်တင်မူ၊ ၃၃ နှစ်အရွယ် ဒေါ်သန်းသန်းဦး၊ ၃၁ နှစ်အရွယ် မချိုချိုမြင့်၊ ၂၃ နှစ်အရွယ် မဖြူဖွေး၊ ၄ နှစ်အရွယ် မချစ်စနိုးတို့ သေဆုံးခဲ့တယ်လို့ ဆိုပါတယ်။

ဒါ့အပြင် အသက် ၁၁ နှစ်ကနေ ၇၀ အရွယ်ကြားရှိ အမျိုးသမီး ၈ ဦး၊ အမျိုးသား ၃ ဦးထိခိုက် ဒဏ်ရာရသွားပြီး သေဆုံးထိခိုက်သူတွေကိုတော့ ဒေသလူမှုကူညီရေးအသင်းတွေက မိတ္ထီလာမြို့နယ် ပြည်သူ့ဆေးရုံကိုပို့ဆောင်ပေးခဲ့ရတယ်လို့ သိရပါတယ်။

ပြီးခဲ့တဲ့ ဇန်နဝါရီ ၂ ရက်ကလည်း မိတ္ထီလာမြို့နယ်အပိုင် ရန်ကုန်-မန္တလေးအမြန်လမ်း မိုင်တိုင်အမှတ် ၂၉၀/၇ အနီးတွင် လူ ၄ ဦးလိုက်ပါလာတဲ့ အိမ်စီးကားအရှိန်လွန်ပြီး လမ်းလယ်ကျွန်းကိုဝင်တိုက်လို့ အမျိုးသမီး ၁ ဦးသေဆုံးပြီး ၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – လင်း

ကျူးလွန်သူကို ဖမ်းဆီးအမှုဖွင့်ထား

သနပ္ပင်၊ မေ ၂၈၊ ၂၀၂၅။

ပဲခူးတိုင်း၊ သနပ္ပင်မြို့နယ်၊ မကြက်စုကျေးရွာမှာ ခင်ပွန်းကဇနီးဖြစ်သူကို ဓာတ်ဆီလောင်းမီးရှို့တဲ့အတွက် သေဆုံးခဲ့တယ်လို့ ဒေသခံတွေဆီကသိရပါတယ်။

အသက် ၁၈ နှစ်အရွယ် မသူသူစံကို မေ ၂၄ ရက်ည ၁၁ နာရီခန့်မှာ ခင်ပွန်းဖြစ်သူ အသက် ၃၇ နှစ်အရွယ် ကျော်လင်းသိန်းက ဓာတ်ဆီလောင်းမီးရှို့ခဲ့တာလို့ ဆိုပါတယ်။

“ကောင်လေးက ကောင်မလေးကို ယခင်ယခင်ကတည်းက မူးရူးပြီးညှင်းဆဲတာတော့ရှိတယ်။ အခုတော့ဘာဖြစ်တယ်ဆိုတာ မသိရဘူး။ သူယောကျာ်းက အရက်သောက်လာပြီး မူးယစ်ပြီး ရိုက်နှက်တာကနေဓာတ်ဆီလောင်းမီးရှို့တာ။ သနပ်ပ္ပင်ဆေးရုံကနေ ပဲခူးဆေးရုံပို့ရတာ။ နောက်တရက်ဆုံးတာ”လို့ ရွာခံတဦးကပြောပါတယ်။

မီးရှို့ခံရတဲ့ဒဏ်ကြောင့် အဆိုပါအမျိုးသမီးမှာ ပေါင်လည်စကာ ခန္ဓာကိုယ်အထက်ပိုင်းတခုလုံး မီးလောင်ဒဏ်ရာတွေရရှိထားပြီး ပဲခူးဆေးရုံမှာ ဆေးကုသမှုခံယူနေစဥ် မေ ၂၅ ရက်ည ၈ နာရီခန့်မှာ သေဆုံးသွားတယ်လို့ ဆိုပါတယ်။

ဒါ့အပြင် လက်ရှိ အွန်လိုင်းပေါ်မှာပျံ့နှံ့နေသလို ရည်စားထားလို့ယောကျ်ားဖြစ်သူနဲ့ရန်ဖြစ်ပြီး မီးရှို့ခံရတာမဟုတ်ဘူးလို့လည်း သေဆုံးသူနဲ့နီးစပ်တဲ့အထက်ပါရွာခံက ပြောပါတယ်။

“Facebookမှာ ပျံ့နေသလိုမဟုတ်ပါဘူး။ ရှုပ်ရှုပ်ယှက်ယှက်မရှိဘူး။ ကောင်မလေးကရိုးတာမှ အဖေတခုသမီးတခုပါ။ ရိုးပါတယ်။ သူ့ယောကျာ်းရဲ့ခိုင်းရာနေ စေရာသွားလေးပါ။ ရွာမှာလည်း လာစုံစမ်းလို့ရပါတယ်။”လို့ ဆက်ပြောပါတယ်။

အလောင်းကိုတော့ ကျေးရွာကိုပြန်မသယ်တော့ဘဲ မေ ၂၆ ရက်က ပဲခူးမြို့ရှိ သုဿန်တခုမှာပင် သင်္ဂြိုဟ်လိုက်ကြတယ်လို့ သိရပါတယ်။

ခင်ပွန်းဖြစ်သူ ကျော်လင်းသိန်းကိုတော့ ဒေသခံတွေကဖြစ်စဥ်ဖြစ်တဲ့ညတွင်းချင်း ဖမ်းဆီးကာ သနပ္ပင်ရဲစခန်းကို အပ်နှံထားပြီး ရဲစခန်းက ရာဇသတ်ကြီးပုဒ်မ ၃၂၆ (အပြင်းအထန်နာကျင်စေမှု) အရ ကနဦးအမှုဖွင့်ထားတယ်လို့ သိရပါတယ်။

စာတည်း – လင်း

မုံရွာ၊ မေ ၂၇၊ ၂၀၂၅။

စစ်ကိုင်းတိုင်း၊ မုံရွာမြို့မှာ နေအိမ်တွေကို လျှပ်စစ်မီးသွယ်တန်းထားတဲ့ မီးကြိုးတွေ အုပ်စုဖွဲ့ခိုးယူခံနေရပြီး ခိုးယူခံရတဲ့မီးကြိုးတွေပြန်သွယ်ဖို့ EPC ရုံးက ငွေ ကြေးကောက်ခံတယ်လို့ မြို့ခံတွေထံက သိရပါတယ်။

မေ ၂၅ ရက် မနက်အစောပိုင်း ၂ နာရီခန့် မီးပြတ်နေချိန်မှာ အောင်မင်္ဂလာရပ်ကွက်ရှိ လူနေအိမ်တွေထံ သွယ်တန်းထားတဲ့ လျှပ်စစ်မီးကြိုးတွေကို ဘေးတွဲဆိုင်ကယ်တွေနဲ့လူအုပ်စုဖွဲ့ လာရောက်ဖြုတ်ခိုးသွားခဲ့တာလို့ ဆိုပါတယ်။

” ည ၁၂ လောက်ကတည်းက ဘေးတွဲအသံ ဆိုင်ကယ်အသံတွေကြားရတာ။ ညဆို မီးမလာရင် တလမ်းလုံးက မှောင်လို့လေ။ မှောင်ရိပ်ခိုပြီး ခိုးတာ။ အသံတွေကတော့ ယောက်ျားသံတွေရော မိန်းမအသံတွေရော ကြားရတယ်။ ရပ်ကွက်ထဲကလူတွေကလဲ မထွက်ရဲတော့ ခိုးလိုက်၊ ပြန်တပ်လိုက်နဲ့ သံသရာလည်နေပြီ” လို့ ရပ်ကွက်နေထိုင်သူအမျိုးသမီးတဦးက မြေလတ်အသံကို ပြောပါတယ်။

ဖြုတ်ခိုးခံရတဲ့ မီးကြိုးတွေဟာ ၇၀၀ ဗို့ (0.7 KVA ) လျှပ်စစ်မီးကြိုး( Service ကြိုး) တွေဖြစ်ပြီး မုံရွာလျှပ်စစ်ရုံးဝန်ထမ်းတွေက ဖြုတ်ခိုးခံရတဲ့ မီးကြိုးတွေ ပြန်လည်တပ်ဆင်ဖို့ နေအိမ်တအိမ်ကို ငွေကျပ် ၆ သောင်း ကောက်ခံတယ်လို့ သိရပါတယ်။

အောင်မင်္ဂလာရပ်ကွက်မှာ ပုံမှန်အားဖြင့် မနက် ၁၀ နာရီမှ ည ၁၀ နာရီခန့်အထိ လျှပ်စစ်မီး ၁၂ နာရီခန့်ရရှိကာ ည ၁၀ နာရီနောက်ပိုင်းမီးပြတ်လေ့ရှိပြီး လျှပ်စစ်မီးပြတ်တောက်ချိန် အုပ်စုဖွဲ့ခိုးယူခံနေရတာလို့ ဆိုပါတယ်။

လျှပ်စစ်မီးကြိုးတွေ ခိုးယူခံရကြောင်း အဆိုပါနေ့ နေ့လယ်ပိုင်းမှာ ရပ်ကွက်နေသူတွေက လျှပ်စစ်ရုံးဝန်ထမ်းတွေကို ဆက်သွယ်ပြောဆိုရာ လာရောက်ကြည့်ရှုပြီးနောက် မီးကြိုးပြန်သွယ်ဖို့ဆိုကာ ငွေကြေးကောက်ခံခဲ့တာဖြစ်ပြီး လက်ရှိမုံရွာမြို့မှာ မိုးအဆက်မပြတ်ရွာနေတာကြောင့် လျှပ်စစ်မီးကြိုးတွေ ပြန်သွယ်ဖို့ အခက်အခဲရှိနေကာ ဒီကနေ့အထိ ပြန်မတပ်နိုင်သေးဘူးလို့ သိရပါတယ်။

အောင်မင်္ဂလာရပ်ကွက်မှာ အခုလို လျှပ်စစ်မီးကြိုးတွေ ဖြုတ်ခိုးခံရတာဟာ သုံးကြိမ်မြောက်ရှိပြီဖြစ်ပြီး ပြီးခဲ့တဲ့ ၂၀၂၄ အတွင်း ၂ ကြိမ် ဖြုတ်ခိုးခံခဲ့ရကာ အခုလို ငွေကျပ်ကောက်ခံပြီး ပြန်သွယ်တန်းခဲ့ရတာလို့ သိရပါတယ်။

စာတည်း – ဟိန်းစံ

ဝက်လက်၊ မေ ၂၅၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်ပြည်သူ့အုပ်ချုပ်ရေးအဖွဲ့ရဲ့ ရုံးအဖွဲ့မှူးနဲ့ အမျိုးသမီး ၁ ဦး သေနတ်နဲ့ပစ်သတ်ခံခဲ့ရတယ်လို့ ဒေသခံတွေဆီက သိရပါတယ်။

မေ ၂၃ ရက်ညပိုင်းက ဝက်လက်မြို့နယ်၊ ဂျိုးဖြူကုန်းတဲစုမှာ အသက် ၃၀ အရွယ် ဝက်လက်မြို့နယ်ပြည်သူ့အုပ်ချုပ်ရေး ရုံးအဖွဲ့မှူးနဲ့အတူ အမျိုးသမီး ၁ ဦးတို့ရဲ့ ရုပ်အလောင်းတွေကို သေနတ်ဒဏ်ရာတွေနဲ့ တွေ့ရှိခဲ့တာလို့ ဆိုပါတယ်။

“ရွာတော်ကုန်းရွာဘေးက ဂျိုးဖြူကုန်းတဲစုထဲ ည ၁ နာရီလောက် စစ်တပ်ကဝင်သတ်သွားတာလို့လည်း ကြားတယ်၊ ဘယ်သူကသတ်မှန်း မသိသေးဘူး၊ ရွာသာကြီးနဲ့ နီးတယ်ဗျ၊ ၁ မိုင် ၁ မိုင်ခွဲလောက် နီးတယ်၊ အမျိုးသမီးက ဝက်လက်မြို့နယ်၊ သရက်ကြီး(ရွာ)က” လို့ ရွာတော်ကုန်း ဒေသခံတဦးကပြောပါတယ်။

အလောင်းတွေ့ရှိခဲ့တဲ့နေရာဟာ စစ်ကောင်စီတပ်တွေအထိုင်ချတပ်စွဲထားတဲ့ ရွာသာကြီးရွာနဲ့ ၁ မိုင်ကျော်မှာတည်ရှိတာကြောင့် ဒီသတ်ဖြတ်မှုကို စစ်ကောင်စီတပ်ဖွဲ့ဝင်တွေကလုပ်တာဖြစ်နိုင်တယ်လို့ ဒေသခံတွေက ပြောပါတယ်။

ကိုမျိုးအောင်ကိုရဲ့ ရုပ်အလောင်းကို မေ ၂၄ ရက်က ရွာတော်ကုန်းရွာမှာ သင်္ဂြိုဟ်ခဲ့ပြီး၊ အမျိုးသမီးကိုတော့ သူ့ရွာကို ပြန်သယ်သွားတယ်လို့ ဆိုပါတယ်။

ကိုမျိုးအောင်ကိုဟာ ၂၀၂၁ စစ်အာဏာသိမ်းပြီးနောက် ဝက်လက်မြို့နယ်ပြည်သူ့အုပ်ချုပ်ရေးအဖွဲ့ စတင်ဖွဲ့စည်းကတည်းက ပအဖအဖွဲ့ထဲမှာ ပါဝင်ခဲ့သူဖြစ်တယ်လို့ သိရပါတယ်။

စာတည်း – လင်း