ပစ်ခတ်

တောင်တွင်းကြီး၊ ဖေဖော်ဝါရီ ၂၈၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ထောက်ကြံ့ကွင်းကျေးရွာ စစ်တပ်ဂိတ်အနီးအရက်ဆိုင်ဖွင့်ကာ စစ်ကောင်စီတပ်ဖွဲ့နဲ့ပူးပေါင်းပြီး လမ်းသွားလမ်းလာတွေကို ဆက်ကြေးကောက်နေတဲ့လင်မယားကို သေနတ်နဲ့ပစ်ခတ်ခဲ့တယ်လို့ Magway Guerrilla Warfare မကွေးပြောက်ကျားတပ်က ပြောပါတယ်။

သေဆုံးသူတွေဟာ အသက် ၅၀ နှစ်ဝန်းကျင်ရှိကြတဲ့ ဦးမြင့်သန်းနဲ့ ၎င်းရဲ့ဇနီးဖြစ်သူ မြစန်းရီတို့ဖြစ်ပြီး ဖေဖော်ဝါရီ ၂၇ ရက်မနက် ၆ နာရီခွဲလောက်မှာ ၎င်းတို့အရက်ဆိုင်အတွင်း ဝင်ရောက်ပစ်ခတ်ခဲ့တာလို့ ဆိုပါတယ်။

“သူတို့ဆိုင်ရှေ့မှာ စစ်တပ်က ဂိတ်ထိုင်ထားတယ်။ ပြီးတော့ သစ်ကားဝါးကားတွေကို ပိုက်ဆံတောင်းတယ်။ အချိန်မတော်သွားလာတဲ့သူတွေကိုလည်း အမြင်မကြည်ရင်မကြည်သလို စစ်တပ်ကို ဖမ်းဆီးခိုင်းတယ်။ သူတို့ပြီးမှပြီးတာ။ ဆက်သွားတိုက်နယ်တကြောမှာတော့ နာမည်အကြီးဆုံးလင်မယားလို့ ပြောလို့ရတယ်။” Magway Guerrilla Warfare မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

တောင်တွင်းကြီးအခြေစိုက် ကပစ ၁၈ နဲ့ စခတ ၇ တပ်တွေက စစ်ကောင်စီတပ်ပူးပေါင်းအင်အား ၁၀ ဦးခန့်ဟာ ၎င်းတို့လင်မယားအရက်ဆိုင်အရှေ့မှာ ဂိတ်ချတပ်စွဲကာ အတူချက်ပြုတ်စားသောက် အနီးကပ်နေထိုင်ကြသူတွေဖြစ်တယ်လို့ ဆိုပါတယ်။

ဖေဖော်ဝါရီလနောက်ဆုံးပတ်အတွင်းမှာ အဆိုပါစစ်ကောင်စီတပ်ဖွဲ့ဝင်တွေဟာ ပျဉ်းချောင်းရွာဘက်ကို အပြီးရွှေ့ပြောင်းသွားခဲ့လို့ ဝင်ရောက်ပစ်ခတ်ရှင်းလင်းနိုင်ခဲ့တာဖြစ်ပြီး ပစ်ခတ်ခံရပြီးနောက် ဦးသန်းမြင့်လင်မယားရဲ့ ရုပ်အလောင်းတွေကို စစ်ကောင်စီတပ်ဖွဲ့ဝင်တွေက လာရောက်ကောက်ယူသွားတယ်လို့ အထက်ပါတာဝန်ခံက ပြောပါတယ်။

ပစ်ခတ်မှုကို Magway Guerrilla Warfare မကွေးပြောက်ကျားတပ်နဲ့ Taungdwingyi Fighter Force (LPDF) တို့က ပူးပေါင်းလုပ်ဆောင်ခဲ့တာဖြစ်ပြီး ဖေဖော်ဝါရီ ၂၄ ရက်ကလည်း စစ်ကောင်စီလက်အောက် မကွေးမြို့နယ်၊ သက်ရင်းတောအုပ်စုအုပ်ချုပ်ရေးမှူးကို Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – ဟိန်းစံ

ကြို့ပင်ကောက်၊ ဖေဖော်ဝါရီ ၂၅၊ ၂၀၂၅။

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်၊ ဂွေးကောင်းပင်ရွာအုပ်ချုပ်ရေးမှူးနဲ့ ဇနီးဖြစ်သူတို့ ပစ်ခတ်ခံရပြီးသေဆုံးသွားတယ်လို့ သာယာဝတီခရိုင်တပ်ရင်း အမှတ် ၃၈၀၁ တပ်ခွဲ ၅ ကြို့ပင်ကောက် Heroပျောက်ကျားတပ်ဖွဲ့ဆီမှ သိရပါတယ်။

သေဆုံးသူတွေမှာ ဂွေးကောင်းပင်ရွာအုပ်ချုပ်ရေးမှူး ဦးကံမြင့်နဲ့ ဇနီးဖြစ်သူ ဒေါ်ခင်ဝင်း တို့ဖြစ်ပြီး ဖေဖော်ဝါရီ ၂၄ ရက် ညနေ ၃ နာရီကျော်မှာ ၎င်းတို့နေအိမ်အတွင်းဝင်ရောက် ပစ်ခတ်ခဲ့တာလို့ ဆိုပါတယ်။

“ သူ့မိန်းမကိုတော့မလွှဲသာလို့သတ်လိုက်ရတာပါ၊ သူ့မိန်းမကိုတော့ သတ်ဖို့အစီအစဉ်မရှိဘူး” လို့ Hero ပြောက်ကျားတပ်ဖွဲ့တာဝန်ရှိသူတဦးက ပြောပါတယ် ။

ဦးကံမြင့်ကို ပစ်ခတ်ရှင်းလင်းပြီးချိန် ၎င်းရဲ့ဇနီးဖြစ်သူ ဒေါ်ခင်ဝင်းက ကာကွယ်ရေးတပ်ဖွဲ့ဝင်တွေကို ဓါးနဲ့ ခုတ်ဖို့လုပ်ဆောင်တာကြောင့် ထပ်မံပစ်ခတ်ခဲ့ရတာလို့ ဆိုပါတယ် ။

အုပ်ချုပ်ရေးမှူး ဦးကံမြင့် ဟာ စစ်ကောင်စီကပေးထားတဲ့ သေနတ်နဲ့လက်ပစ်ဗုံးတွေ ကိုင်ဆောင်ထားသူဖြစ်ပေမယ့် ရှာဖွေချိန်မရခဲ့လို့ သိမ်းဆည်းနိုင်ခဲ့တာမရှိဘူးလို့ ဆိုပါတယ်။

ဦးကံမြင့်မှာ ရပ်ရွာတွေအတွင်း ပေါ်တာဆွဲဖမ်းဆီးတာတွေမှာဦးဆောင်တာ၊ စစ်‌ကောင်စီတပ်ဖွဲ့နဲ့ပူးပေါင်းပြီး ဆက်ကြေးငွေကောက်ခံတာတွေအပြင် PDF အဖွဲ့ဝင်တွေကိုစုံစမ်းလေ့လာနေသူဖြစ်ကာ ဖေဖော်ဝါရီ ၂၅ ရက် ဒီကနေ့မှာ ကျေးရွာပျူစောထီးအယောက် ၂၀ ကို နေပြည်တော်ရှိ စစ်သင်တန်းကို ပို့ဆောင်ဖို့ လုပ်ဆောင်နေသူလည်းဖြစ်တယ်လို့ အထက်ပါတာဝန်ရှိသူက ပြောပါတယ်။

အုပ်ချုပ်ရေးမှူးလင်မယားပစ်ခတ်ခံရပြီးတဲ့နောက် စစ်ကောင်စီတပ်နဲ့ရဲတပ်ဖွဲ့ အင်အား ၂၀ ဝန်းကျင်ရောက်ရှိလာပြီး ရုပ်အလောင်းတွေကို ကြို့ပင်ကောက်မြို့ပေါ်ကို ယူဆောင်သွားကာ ဒီကနေ့မနက်မှာတော့ ဂွေးကောင်းပင်ရွာမှာ စစ်ကောင်စီတပ်ဖွဲ့အင်အား ၆၀ ဝန်းကျင် ရောက်ရှိနေတယ်လို့ ဆိုပါတယ် ။

ယမန်နေ့ ဖေဖော်ဝါရီ ၂၄ ရက် မနက်ပိုင်းမှာပဲ လက်ပံတန်းမြို့နယ်၊ မှောင်အင်းအုပ်စုအုပ်ချုပ်ရေးမှုး ဦးသန်းဦး ကို ဒေသကာကွယ်ရေးတပ်ဖွဲ့တွေက သေနတ်နဲ့ပစ်ခတ်ခဲ့လို့ သေဆုံးသွားပါသေးတယ်။

စာတည်း – ဟိန်းစံ

လက်ပံတန်း၊ ဖေဖော်ဝါရီ ၂၄၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်မှာ စစ်မှုထမ်းစုဆောင်းပေးနေတဲ့ အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

လက်ပံတန်းမြို့နယ်၊ မှောင်အင်းအုပ်စု အုပ်ချုပ်ရေးမှူး သန်းဦး ကို ဖေဖော်ဝါရီ ၂၄ ရက် ဒီမနက် ၈ နာရီ လောက်မှာ ရန်ကုန်-ပြည်လမ်းပေါ်ရှိ လွှစင်ကုန်းတာဆုံမှာ ဒေသခံကာကွယ်ရေးတပ်ဖွဲ့ဝင်တွေက ပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

“သတင်းအရ ရဲဘော်တွေ လွှစင်ကုန်းတာဆုံမှာစောင့်နေတုန်း အုပ်ကြီးကဆိုင်ကယ် ၁ စီး၊ ပျူစောထီးနဲ့ ရာအိမ်မှူးက ဆိုင်ကယ် ၁ စီး အတူစီးလာကြတာတွေ့ပါတယ်။ ပစ်ကွင်းထဲရောက်တော့ အုပ်ကြီးကို သေနတ်နဲ့ ၁၂ ချက်ပစ်တာ ရင်ဘတ်နဲ့ ခေါင်းတွေရော တခြားနေရာတွေရောမှန်ပြီး နေရာတင် သေပါတယ်။” လို့ သူကပြောပါတယ်။

သူနဲ့အတူလာတဲ့ ပျူစောထီးနဲ့ ရာအိမ်မှူးကတော့ ထွက်ပြေးလွတ်မြောက်သွားပြီး ပစ်ခတ်ပြီးနောက် ဦးသန်းဦးဆီကနေ လက်ပစ်ဗုံး ၂ လုံး၊ ငွေသားကျပ် ၁ သိန်း၊ ဆိုင်ကယ် ၁ စီး၊ စည်းတံဆိပ်တုံး ၂ ခု၊ မှတ်ပုံတင် ၂ ခု၊ စစ်မှုထမ်းနဲ့ပတ်သက်တဲ့ စာရွက်စာတမ်းတွေကို သိမ်းဆည်းခဲ့တယ်လို့ အထက်ပါ တာဝန်ရှိသူကပြောပါတယ်။

ဦးသန်းဦးဟာ လူငယ်တွေကိုစစ်မှုထမ်းအတွက်စုဆောင်းတာ၊ လက်ပစ်ဗုံးကိုင်ဆောင်ပြီး ဒေသခံတွေကိုခြိမ်းခြောက်တာ၊ ကာကွယ်ရေးတပ်တွေကိုစိန်ခေါ်ပြောဆိုတာတွေရှိပြီး သူ့ကြောင့်ဖမ်းဆီးခံရသူ အနည်းဆုံး ၁၀ ဦးလောက်ရှိတယ်လို့လည်း ဆိုပါတယ်။

သူဟာ ၂၀၂၁ ခုနှစ် စစ်အာဏာသိမ်းကတည်းက အုပ်ချုပ်ရေးမှူးလုပ်နေသူဖြစ်သလို မှော်အင်းရွာရဲ့ ပျူစောထီးခေါင်းဆောင်တဦးလည်းဖြစ်တယ်လို့ ဆိုပါတယ်။

ဒေသခံတွေနဲ့ တော်လှန်ရေးတပ်ဖွဲ့တွေကို ဒုက္ခပေးတဲ့ စစ်ကောင်စီအဖွဲ့ဝင်တွေနဲ့ ထောက်တိုင်တွေကို အရှိန်မြှင့်တိုက်ခိုက်သွားမှာဖြစ်တဲ့အတွက် ပြည်သူတွေအနေနဲ့ ၎င်းတို့အနီးမှာသွားလာနေထိုင်တာတွေ လုံဝမပြုလုပ်ဖို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ရဲ့ထုတ်ပြန်ချက်မှာပါရှိပါတယ်။

ပြီးခဲ့တဲ့ ဖေဖော်ဝါရီ ၂၀ ရက်ကလည်း သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဟာ ဆားချောင်းရွာမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်းလှိုင်နဲ့ ပျူစောထီး ကတုံး (ခ) ဇော်မင်းထွန်းကိုလည်း ပစ်ခတ်ရာသေဆုံးခဲ့သေးတယ်လို့ သိရပါတယ်။

စာတည်း – လင်း

စစ်ကိုင်း၊ ဖေ‌ဖော်ဝါရီ ၂၃၊ ၂၀၂၅။

စစ်ကိုင်းတိုင်း၊ စစ်ကိုင်းမြို့၊ မြောက်ဘော်ဂါရပ်ကွက်ကနေအိမ်မှာ အမျိုးသားတဦး ပစ်သတ်ခံလိုက်ရတယ်လို့ ဖြစ်စဉ်ကိုသိထားတဲ့ဒေသခံတဦးဆီက သိရပါတယ်။

သေဆုံးသူဟာ အသက် ၃၅ နှစ်အရွယ် ကိုကိုဦး (ခ) ကမ္ဘာစိုးဆိုသူဖြစ်ပြီး ဖေဖော်ဝါရီ ၂၂ ရက် နေ့လယ် ၂ နာရီကျော်မှာ နေအိမ်မှာရှိနေချိန် လက်နက်ကိုင်လူတစုက လာရောက်ပစ်သတ်သွားတာ လို့ဆိုပါတယ်။

“ဆိုင်ကယ် ၂ စီး လူ ၄ ယောက်ဝင်လာပြီးတော့ နာမည်တောင်မခေါ်ဘူး။ သူ့ကိုလူတွေ အများကြီးကြားထဲက ကျောက်သမားတွေဆိုတော့ ကျောက်စီတာ ကျောက်ဖြန့်တာ လုပ်နေတဲ့ကြားက သူကထမင်းစားနေတာ။ သူ့ကိုရွေးပစ်သွားတာ။”လို့ ဖြစ်စဉ်ကိုသိထားတဲ့ ဒေသခံတဦးက ပြောပါတယ်။

သေနတ်နဲ့အနီးကပ်ပစ်ခံရတာကြောင့် ညာဘက်ရင်အုံ၊ ဘယ်ဘက်ချိုင်းအောက်တို့မှာ စုစုပေါင်းကျည်ထိဒဏ်ရာ ၈ ချက်ဝန်းကျင်ရပြီး နေရာမှာတင် သေဆုံးသွားတယ်လို့ ဆိုပါတယ်။

ပစ်ခတ်မှုဖြစ်ပြီးနောက်မှာ စစ်ကောင်စီအဖွဲ့တွေရောက်လာပြီး အလောင်းကိုစစ်ဆေးကာ စစ်ကိုင်းဆေးရုံကို ယူဆောင်သွာတယ်လို့ သိရပါတယ်။

ဒေသခံတွေပြောဆိုချက်အရ သေဆုံးသူအမျိုးသားဟာ သူမသေဆုံးခင်တပတ်ခန့်အလိုလောက်က PDF အဖွဲ့တွေကို စိန်ခေါ်ပြောဆိုမှုတွေရှိနေပြီး စစ်ကောင်စီ၊ အုပ်ချုပ်ရေးပိုင်းတွေနဲ့ပတ်သက်မှု ရှိ မရှိတော့ မသိရဘူးလို့ ဆိုပါတယ်။

အဲ့ဒီပစ်ခတ်မှုကိုတော့ ဘယ်အဖွဲ့အစည်းတွေဘက်က လုပ်ဆောင်ခဲ့တယ်ဆိုတာကိုတော့ ထုတ်ပြန်ကြေညာတာမရှိသေးပါဘူး။

ဖေဖော်ဝါရီ ၁၀ ကလည်း စစ်ကိုင်းမြို့နယ်၊ မင်းကွန်းမြို့မှာ မင်းကွန်းနယ်မြေရဲစခန်းမှူး ရဲအုပ်မြင့်လွင် နေအိမ်မှာပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – လင်း

အောင်လံ၊ ဖေဖော်ဝါရီ ၂၃၊ ၂၀၂၅။

မကွေးတိုင်း၊ အောင်လံမြို့နယ်၊ သမ္ဘူလကျေးရွာထိပ်ရှိ ကွမ်းယာဆိုင်အနီးမှာ သမ္ဘူလတိုက်နယ်ရဲစခန်းမှ နယ်ထိန်းရဲဒုတပ်ကြပ် ၁ ဦး ပစ်ခတ်ခံရပြီးသေဆုံးခဲ့တယ်လို့ အောင်လံမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

သေဆုံးသူဟာ အသက် ၃၀ ကျော်အရွယ်ရှိ နယ်ထိန်းရဲဒုတပ်ကြပ် မျိုးကြီး ဖြစ်ပြီး ဖေဖော်ဝါရီ ၂၂ ရက် မနက် ၈ နာရီခန့်မှာ အရပ်ဝတ်နဲ့ကွမ်းယာဆိုင်မှာကွမ်းဝယ်နေစဉ် ဒေသခံကာကွယ်ရေးတပ်ဖွဲ့ ဝင်တွေက ပစ်ခတ်ခဲ့တာလို့ ဆိုပါတယ်။

“မနက်ဆို သူက တကြိမ်နှစ်ကြိမ်လောက် အပြင်ပုံမှန်ထွက်လေ့ရှိတယ်။ အဲ့ဆိုင်ကလည်း သူထိုင်နေကျ ဆိုင်ဆိုတာ ကျနော်တို့သိထားတယ်။ မနက်စောဆို သွားလာတာရှိတယ်။ ကွမ်းထုတ်တယ်ပေါ့။ မကြာပါဘူး။ အဲ့မှာ လေးငါးမိနစ်နေ ပြန်ပေါ့။ အရပ်ဝတ်နဲ့ရှိနေချိန် ကျည် ၆ တောင့်ပစ်ခဲ့တာ”လို့ အောင်လံမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံကပြောပါတယ်။

ပစ်ခတ်ခံရလို့ ရဲဒုတပ်ကြပ် မျိုးကြီးမှာ ဦးခေါင်းနဲ့နောက်ကျောတွေမှာ ကျည်ထိဒဏ်ရာနဲ့ နေရာတင် သေဆုံးခဲ့တယ်လို့ ဆိုပါတယ်။

ပစ်ခတ်ခံရတဲ့နေရာနဲ့ရဲစခန်းဟာ ကိုက် ၅၀၀ ခန့်ကွာဝေးပြီး ပစ်ခတ်ခံရပြီးနောက် ရဲတွေက အလောင်းကိုလာကောက်သွားတယ်လို့ အောင်လံမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံက ပြောပါတယ်။

အဲ့ဒီနောက် ရဲတပ်ဖွဲ့ဝင်တွေဟာ ကျေးရွာအဝင်အထွက်လမ်းတွေပိတ်ပြီး ရှာဖွေမှုတွေပြုလုပ်ခဲ့သလို အောင်လံအခြေစိုက် ခလရ ၇၁၊ ကပစ ၁၅ က စစ်ကောင်စီအင်အား ၇၀ ခန့်ကလည်း သမ္ဘူလရဲစခန်းကို အင်အားဖြည့်ပြီးရောက်လာတယ်လို့ သိရပါတယ်။

ဒီပစ်ခတ်မှုကိုတော့ သရက်ခရိုင်တပ်ရင်း ၁၊ နေပြည်တော်တပ်ရင်း ၉၀၂၊ နေပြည်တော်တပ်ရင်း ၈၀၄၊ အောင်လံမြို့နယ်ပကဖအဖွဲ့ဝင်တွေက ပူးပေါင်းပစ်ခတ်ရှင်းလင်းခဲ့တာလို့ ဆိုပါတယ်။

ပြီးခဲ့တဲ့နှစ် စက်တင်ဘာ ၂၄ ရက်ကလည်း အောင်လံမြို၊ ရွာထောင်ရပ်ကွက်၊ အေးချမ်းဖြိုး (၁၉) လမ်းမှာနေထိုင်နေတဲ့ တလုပ်ပင်ကျေးရွာအုပ်ချုပ်ရေးမှူးနဲ့ တပည့်ဖြစ်သူတို့ နေအိမ်ရှေ့ရှိနေစဉ် ပစ်ခတ်ခံရပြီး အုပ်ချုပ်ရေးမှူသေဆုံးကာ တပည့်ဖြစ်သူဒဏ်ရာရခဲ့တယ်လို့ သိရပါတယ်။

စာတည်း – လင်း

မင်းလှ၊ ဖေဖော်ဝါရီ ၂၂၊ ၂၀၂၅။

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ထောက်ကြန့်အုပ်စု၊ ဆားချောင်းရွာမှာနေတဲ့ အုပ်ချုပ်ရေးမှူးနဲ့ ပျူစောထီးဆိုသူတို့ကိုပစ်ခတ်ရာ သေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ ဆီက သိရပါတယ်။

ဖေဖော်ဝါရီ ၂၀ ရက်ည ၇ နာရီခွဲလောက်မှာ ဒေသခံကာကွယ်ရေးတပ်ဖွဲ့ဝင်တွေက ဆားချောင်းရွာ အနောက်ပိုင်းမှာနေထိုင်တဲ့ ထောက်ကြန့်အုပ်စုအုပ်ချုပ်ရေးမှူး ဝင်လှိုင်နဲ့ ရွာအရှေ့ပိုင်းမှာနေထိုင်တဲ့ ပျူစောထီး ကတုံး (ခ) ဇော်မင်းထွန်းတို့ကို ပစ်ခတ်ခဲ့တာလို့ဆိုပါတယ်။

“ပျူစောထီးကတုံးကို သွားရှင်းတော့ အိမ်မှာတင်တွေ့လို့ တခါတည်းရှင်းနိုင်တယ်။ အုပ်ကြီးဝင်းလှိုင်က အိမ်မှာမရှိဘဲ သူ့တအိမ်ကျော်က မင်္ဂလာဆောင်ရောက်နေတာ။ သူ့သမီးကို သွားခေါ်ခိုင်းရတယ်။ သူက ကျနော်တို့ရဲဘော်တွေကို PDF မှန်းမသိဘူး။ သူမင်္ဂလာဆောင်အိမ်ကအထွက် သူ့အိမ်မရောက်ခင် ကြားထဲက အိမ်ရှေ့မှာရှင်းလိုက်တာ။” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ မှ တာဝန်ရှိသူက ပြောပါတယ်။

ပျူစောထီး ကတုံးဟာ အုပ်ချုပ်ရေးမှူး ဦးဝင်းလှိုင်ခိုင်းသမျှကို လုပ်ဆောင်ပေးနေသူဖြစ်ပြီး သူတို့ ၂ ဦးကြောင့် ဖမ်းဆီးခံရသူ ၁၀ ဦးထက်မနည်းရှိတယ်လို့ သူကဆက်ပြောပါတယ်။

အုပ်ချုပ်ရေးမှူး ဦးဝင်းလှိုင်ဆီကနေ လက်လုပ်သေနတ် ၁ လက်နဲ့ ကျည် ၁၀ တောင့် သိမ်းဆည်းရရှိခဲ့တယ်လို့ ဆိုပါတယ်။

ဒါ့အပြင် သူတို့ ၂ ဦးဟာ လူငယ်တွေကိုစစ်မှုထမ်းရန် ဖိအားပေးလူစုစောင်းတာ၊ စစ်မှုထမ်းကြေး ဆိုကာ ငွေအတင်းအကြပ်ကောက်ခံတာ၊ ငွေမပေးသူတွေကိုလည်း စစ်တပ်ခေါ် ဖမ်းဆီးခိုင်းတာ၊ လက်နက်ပြပြီး ဖိနှိပ်ဒုက္ခပေးတာတွေ လုပ်တဲ့အတွက် အခုလိုပစ်ခတ်ခဲ့တာလို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က ထုတ်ပြန်ရေးသားထားပါတယ်။

အုပ်ချုပ်ရေးမှူး ဦးဝင်းလှိုင်ဟာ ယခင်ထောက်ကြန့်ကျေးရွာအုပ်စု အုပ်ချုပ်ရေးမှူးဖြစ်တဲ့ ကျော်ဦးကို စစ်ကောင်စီတပ်သားတွေဝိုင်းရိုက်လို့ ဆေးရုံတက်နေတဲ့အချိန်မှာ အုပ်ချုပ်ရေးမှူး ဝင်လုပ်ခဲ့သူဖြစ်တယ်လို့ဆိုပါတယ်။

သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တပ်ဖွဲ့ဟာ ဖေဖော်ဝါရီ ၁၅ ရက်ကလည်း မင်းလှမြို့နယ်၊ ဇရစ်မျှောင်ကျေးရွာ၊ ခွက်မအုပ်စု အုပ်ချုပ်ရေးမှူးသန်းထွေးကို ၎င်းရဲ့နေအိမ်မှာ သွားရောက်ပစ်ခတ် ရှင်းလင်းခဲ့ပြီး မိုလ်ဘိုင်းဖုန်း ၁ လုံး၊ ဆိုင်ကယ် ၁ စီး၊ စည်းတံဆိပ်တုံး ၂ ခုနဲ့ ထောက်ခံစာ စာရွက်တွေကို သိမ်းဆည်းရရှိခဲ့တယ်သေးလို့ သိရပါတယ်။

စာတည်း – လင်း